رواية فقيد قلبي الفصل الرابع 4 بقلم رويدا القاضي

رواية فقيد قلبي الجزء الرابع

رواية فقيد قلبي البارت الرابع

رواية فقيد قلبي الحلقة الرابعة

يقين:جيت بنطلع نسمع فيه يتكلم هو وياها…
رندا:مش مصدقة انه بعد السنين هاذي كلها بنولي مرتك …
عماد:لالا صدقي كنت نقولك ماايصير غير للي تبيه ….
رندا:كنت شايلة هم معتز ومعتصم لو عرف طارق انهم مش صغاره…وخصوصا الفترة الأخيرة كان شاك فيا…
عماد:لكن ريحتك منه وانا ع خاطرك مستعد نقتل بلاد مش نفر…
يقين:زاني وقاتل ….وين يبي بيه هذا كله ..عرفت انه الشخص للي كنت عايشة معاه من سنين مجرد مجرم قررت نحكم عقلي …..ونتصرف بعقلانية تامة….
في المغرب جتني اسماء واحلام بعد سمعوا بالخبر للي انتشر….
احلام:شن هذا للي اسمعناه بجد ولا كيف صار…
يقين:خلي اندير قهوة ونهدرزوا…ايه للي سمعتوه
حق تتفكرو لما تجمعنا قبل يومين واحكيت ع وحدة تحب سلفها….للأسف انا كنت نحكي عليها هيا اكتشفت انها ع علاقة مع عماد …
اسماء:فعلا قليل الاصل ماتنفع معاه مليحة لو علقوله في السما درجيحه…انت للي قعدتي معاها في العدة اطيبي وضمي واطبطبي عليها..
يقين:انا درت بأصلي وفي الأخير مش حد الدنيا راجل في امور ثانية اهم بهلباااا
احلام:قتلك انا في حالة الوفاة انها حاطة عينها ع واحد من رجالتنا لكن ماصدقتيش…
اسماء:كانت تحسابها انسانة مش حيوانه…
يقين:تتهنى بيه….ماعندي مانديرلهااا
احلام:تتهنى شن متعك درويشة انت تبي تعطيهولها ع طبق من ذهب…
يقين:شن نفتح جبهة ع خاطره …وفي الاخير للي في دماغه بيديره غير نضحك في الناس عليا بس.
اسماء:ربي ينتقم منها وبالنسبة ليا انا واحلام ماتفكرش تعفس حياشنا ولا عاد نبو نعرفوها…
تقوى:عاجبك العار للي داره خوك علاء قدام راجل اختك ضروري يكسرها ويهينها ويخليه يعرف انها بلا سند…
حاتم:اسمعي انت تعرفي انه كلمتي مش مسموعه ورغم هذا كله اتصلت بي يقين وقوتلها
ماتبيش تقعدي معاه روحي لو نطلع انا وياك من الحوش….هيا رفضت.
سالمة:ياحليلي ع بنتي الباهية من طامة لي طامة لا رضت بالهم والهم مارضاش بيها…
تقوى:للي محيرني انا توا محمد خوي كيف قاعد ساكت ويتفرج وبس ومع انه نعرف ومتأكدة انه مرته العقرب تعطي فيه في الاحداتياث الاول اول..
حاتم:لكن متأكد انا انه يقين في دماغها شئ تبي اديره ونصيحة تقوى راك تدخلي الا لو هيا طلبت منك …
تقوى:واجعتني اختي مقهورة ومظلومة وفوقها تطلع هيا للي غالطة….
سالمة:نتفرج وساكته نشوف في صغاري كل واحد همه نفسه وبس …
عماد:شن كنت نشوف في احلام واسماء عندنا في الحوش…
يقين:بكل برود جايات يباركولي …
عماد:بإستغراب ع شن …
يقين:ع فاتحتك …مش راجلي بيتزوج ضروري يباركولي..
عماد:لا هكي هلبا من قبل انتي دماغك ربع وزاد راح فيها توا…
يقين:واحنا نتكلموا ….طلع مهاب يبكي وخناقته العبرة…
مهاب:حق يابابا بتخلينا …ومعاش بنشوفك.
عماد:لا من قلك الكلام هذا اكيد امك تعبئ في راسك عليا…
مهاب:لالا.دادا رندا قتلي بوك بيخليك وبيعيش معانا…
عماد:سكت لانه الرد كان غير متوقع…
يقين:بدينا في العار هذا من توا…خش مهاب حبي شوية وانجيك ماما…اسمع خداتك اخر همي اما ولدي خليه برا الوسخ هذا كله….
بدت رندا تجهز وتشري الفترة هاذي كثرة التصاميم وهذا من فضل الله عز وجل عليا خلال 15يوم … طلعت مبلغ 3آلاف ومازال الطلبات كل يوم اتزيد …وربي اخد مني عماد واعطاني عمل وسمعة بدت تصاميمي مطلوبة…
جاء اليوم للي بيروح عندها …هههه ع اساس مش قاعد عندها من قبل هوا ناهد وفاطمة امه فرحانين…من عيونهم ….جيت لداري لقيته حاطلي ع السرير تاكم ذهب بسيط وكاتبلي هدية
عرسي…
اتصلت بي آرتست جتني للحوش وشريت فستان أسود …مخصر وطويل وفيه فتحة من الجنب …لعند الفخدة ….يلا مانبيش نتعمق بالتفاصيل 🤣🤣 ولبست انا ومهاب واخديت باقة ورد وامشينا
نكدوا عليهم ….
ناهد:ماما شوفي من جاي وشن لابسه…
فاطمة:هاذي هبلت…رسمي توا تلقيها بتموت لانه تزوج عليها….
رندا:شن ادير هاذي هنيا …بعقلها بتنكد عليا فرحتي شن تحساب روحها…
عماد:ليا اسنين ماشفتهاش بالجمال للي هيا فيه
توا غطت ع وجود رندا…
يقين:كنت نشوف عيونه وهو مش قادر يتخطى وجودي ويشوفلي قربت سلمت عليه بالوجه ومديتله باقة الورد….
عماد:معقولة لدرجة هاذي مش مهتمة لوجودي ..كنت نستنى في ردة فعلها كيف .
يقين:زواج الدهر حبيبي …تعالى مهاب ياعمري بارك لبوك …نشوف فيها بتموت بتاكلني بعيونها
لكن تجاري فيا وترسم في ابتسامة مزيفة غصب…
رندا:حلو طاقم الذهب متعك …
يقين:هدية من حبيبي قالي لازم تحضري بيه العرس وبعدين القالب غالب للي لابسته حلوة مش الطاقم للي حلو….هيا مصدومة من الرد
متعي…
نزلت وخليتهم ونشوف فيها تهزب فيه بتموت وامها واخواتها بيحرقوني بعيونهم…كانت أول مرة في حياتي نلبس عدسات ونركب رموش لانه هذا كله كان ممنوع عند الافندي عماد….كان حتى اللبس هو يختار فيه …لالون ولا منضر …لكن توا
خلاص معاش ليه سلطة عليا…
روحت للحوش شديت الهاتف وكلمت تقوى واحكيتلها ع كل شئ وهيا ميتة من الضحك
من اول ليلة ليه معاه وهو يرن عليا لكن..قررت
مانردش عليه بكل ونلعب بأعصابه ثاني ليلة يتصل يلقى فيه انتظار كنت نحكي مع تقوى …
فجأة سمعت صوت الباب انفتح لين وقف فوق راسي …
عماد:شد الهاتف في من تكلمي انتظار من بكري…
يقين:خديت الهاتف وفتحت المايك الو …
تقوى:من الطرف الثاني نسمع فيك شن الدوشة من جنبك…
يقين:ماعندكش علاقة بيا شن تحسابني الخاينة للي واخدها …انت اخترت حياتك وانا اخترت حياتي …
عماد: هيا ماعندكش علاقة بيها وانت مزلتي مرتي وع دمتي…
يقين:برالها بلا جو الغيره متعك اطلع منها الابواب اهيا…طلعت وخليته وخشيت غرفة مهاب فقت الصبح لقيته ماطلعش من الحوش…طبعا فقت ع المدام ترن في الجرس واجعها خاطرها كيف طلع وخلاها ومعاش رجلعها….
رندا:وين عماد حولي عماد….
يقين:دفيتها برا الباب عماد متعك راقد وهذا حوشي مش اسطبل حيوانات بتخشي لدار نومي
اقلبي وجهك برا …وامتا ايفيق توا يمشيلك
رندا:واقفة مصدومة في ردة فعل يقين للي كانت غير متوقعة….
ومرت الايام للي بعدها ع نفس الوضع يحاول هو يهتم ويعوضني وانا شئ تكسر في داخلي معاش قدرت نتقبله وجاء اليوم للي …بيوزعوا فيه الورث
وطبعا نصيب طارق بياخدوه اولاده معتصم ومعتز …. وهنيا كانت اللحظة للي نستنى فيها..
عامر وحسين مقعمزين في المربوعة متع بوهم والكل حاضرين ناهد وفاطمة ورندا واحلام واسماء….
عامر:خلي نبدو القسمة ع بركة الله بشرع الله..
يقين:دقايق قبل ماتبدأ القسمة …انا انسانة نخاف الله والميراث ليه ضرابط شرعية في القسمة وقبل مااتجيب الشهود ومحرر العقود
انا عندي ورقة نبيكم تشوفوها الكل باش نكون
برئية امام الله…
الكل مستغربين في الكلام للي يسمعوا فيه وأولهم عماد ….طلعت ورقة التحاليل للي فيها
معتز ومعتصم صغار عماد مش طارق …رندا
طول طلعت لما شافت الورقة وقفتها ومنعتها
اليوم مافيش مفر …مرت خوكم طارق الله يرحمه
انسانة منحطة وعديمة شرف واخلاق…
عماد:هاتي الورقة وتفاهمنا في الحوش وملامح العصبية ع وجوهه..
يقين:حوش شن ….اكيد تحلم مديت الورقة والكل مش فاهمين شئ قلتها وبصوت عالي الورقة هاذي ياعامر فيه اثبات نسب معتز ومعتصم لراجلي الخاين …هما مش صغار طارق
بدت رندا تعيط وتقول كذب هذا كله من حقدها عليا….
عامر:متأكدة من الكلام هذا راهو موضوع كبير ..مش بسيط
يقين:مش خاسرين شئ الصغار موجودين وتقدر اديرلهم التحاليل اللازمة…
حسين:وقف قدام عماد اتفوه عليك كنت نتوقع منك كل شئ الا هاذي…
اسماء واحلام:هزبوا رندا لين شبعوا واخلام كانت بتضربها لولا تدخل راجلها…
فاطمة:راني نغضب عليكم لو تفكروا تفضحوا خوكم ولا الكلام يطلع برا المربوعة…
عامر:هو مش رح يطلع لانه عار وخايفين ع بناتنا وأولادنا يلحقهم الكلام مش ع خاطر رضاك بدل ماتغضبي عليه وتطرديه …
طلعوا الكل وتفركشت القسمة وقفت قدامهم بكل قوة كنت متوقع اني غبيه وتستغفلني لا ياعماد ولا ممكن تفوت عملتك مرور الكرام …