رواية غيرة زوجتي الفصل الأول 1 بقلم ماء البحر
رواية غيرة زوجتي الجزء الأول
رواية غيرة زوجتي البارت الأول
رواية غيرة زوجتي الحلقة الأولى
البارت (1)
دخل البيت وقفل الباب لكن لقى مراته واقفة وراه وبتبصله بنظرات غريبة
بصلها بتوتر وفضل يفتكر عمل إيه عشان تبصله كدا
مدتله إيدها وقالت بنفس النظرة: هات موبايلك
بلع ريقه وجسمه اترعش زي اللي عامل عمله، عمال يفتكر كلم مين أو شافت شات على موبايله وهو في الحمام او نايم بينه وبين حد
عمال يفتكر بس من الخوف دماغه مش مجمعة
طلع الموبايل من جيبه بإيد مرتعشة وهي باصة في عينه ومش بتنزلها خالص، رفع إيده بالموبايل وقال: أنا ماخونكيش، ولا بكلم بنات ولا ستات صدقيني لو حد بعتلك حاجة كدا ولا كدا أكيد عايز يوقع بينا
خدت منه الموبايل وقعدت في الصالون فتحت تطبيق الفيس وبدأت تبحث عن اسم حد
بقلم ماء البحر
هو واقف مكانه ماتحركش ووشه كله عرق وعينه لسه عليها خايف بس مش عارف من إيه وهو متأكد إنه ماعملش حاجة بس نظرتها له خلته يشك لنفسه وعايز يعرف هو عمل إيه
بعد خمس دقايق قامت مدلته إيدها بالموبايل وقالت: عارف لو اتكرر اللي حصل دا تاني مش هعديهالك بالساهل
خد الموبايل بقلق من غير ما يبص عليه وقالت: هدخل أسخنلك الغدا
بص مكانها وبص على موبايله لقاه مفتوح على بروفايلها على آخر بوست نزلته من ساعتين ومعمول عليه لاف وكومنت… مش فهم حاجة وهو أصلا ماشافش البوست دا
لكن استوعب أخيرا اللي حصل إن هي خدت موبايله عشان تعمل لنفسها لاف وكومنت يعني كل الأكشن والرعب اللي من خمس دقايق عشان بوست ماشوفتهوش وماعملتش ليها لاف ولا كومنت
بص عالمطبخ بصدمة وقال بنفس حالته: دا خلتني أشك في نفسي وأتخيل حاجات أنا ماعملتهاش ويا ترى هيبقى موقفي إيه
قعد عالكنبة في الصالة وخد كوباية مايه كانت عالتربيزة وشربها كلها بعد لما ريقه ودمه نشفوا بسبب الرعب بنظرتها له وقال: حسبي الله ونعم الوكيل
مارضييش يعلق على اللي حصل عشان عارف إنه مش هيتغلب عليها وهتقلب عليه التربيزة فسكت عشان مايحصلش مشكلة
تاني يوم قبل ما يروح الشغل دخلت له الأوضة وقالت: بقولك يا زوجي العزيز عايزه إير فراير
بصلها بعدم فهم وقال: إيه اللي أنتِ قولتيه دا؟ دا كريم جديد للبشرة ولا إيه؟
هي بتوضيح: لأ دي قلاية بس عايزه أجيبها عشان أعمل أكل صحي وسريع وبدون زيت كتير
هو بتفكير: تعملها كام دي؟
هي: كنت سألت عليها من كام شهر كانت وصلت عشرة آلاف وشوية دلوقتي زمانها زادت اديني 15 ألف ولو أغلى من كدا هكمل من فلوس شغلي
هو بصدمة: نعم ياختي لأ بقولك إيه لا جايبين فرير هادي ولا غيره اعملي أكل غير صحي وبزيت ومالكيش دعوة ماكنتش اشتكيت يعني
هي بعصبية: أنت بتقول إيه يا رجب؟
رجب بتوتر: ها بقول يعني مش معايا المبلغ دا، لما أجمعه بعد كام شهر هبقى أجبلك القلاية دي سلام عشان اتأخرت عالشغل
ومشي من قدامها بسرعة وهي بتبص على مكانه بصدمة وقالت: ماشي يا رجب.. ما هو سلفتي تجيبها وأنا لأ
يتبع..
لقراءة الفصل التالي : اضغط هنا
لقراءة الرواية كاملة اضغط على : (رواية غيرة زوجتي)
