رواية غرام العز الجزء الثاني الفصل الأول 1 بقلم فرح وائل
رواية غرام العز الجزء الثاني البارت الأول
رواية غرام العز الجزء الثاني الجزء الأول
![غرام العز الجزء الثاني](https://camo3blog.com/wp-content/uploads/2024/07/غرام-العز-الجزء-الثاني-169x300.jpg)
رواية غرام العز الجزء الثاني الحلقة الأولى
= مبتردش عليا ليه يا جميل الملامح يا ابو رمش جارح، انتَ شكلك بتزن علي خراب عشك يا زوز صح؟
_ بزن علي خراب عشي؟ اي رقه التعبير دي يا كارما
= بقولك اي شغل الظباط دا مش عليا، متغيرش الموضوع يا ابن عبد البارئ وقولي مصدرلي الطرشه ليه
_ كان عندي شغل والله يا كارما، ولسه فاتح التليفون دلوقتي، في حاجه ولا اي
= اه رؤوف اخيرًا حن عليا وعطاني نص يوم اجازه، قولت اكلمك عشان تزوغ من شغلك وننزل نتغدي مع بعض، هتعرف تزوغ ولا هتتقفش وتفضحنا
_ عيب عليكي، دا انا متربي ع التزويغ من ايام المدرسه
= وهي المدارس ام 3 حروف اللي انتَ كنت فيها دي كان فيها تزويغ ؟ اللي يعيش ياما يشوف بصحيح
_ اه يختي كان فيها، واكتر من المدارس الحكومي كمان
= طب بالله عليك كُنت بتزوغ من اي، يعني فيها ملعب وبسين ونافوره ومسرح وكل ما تتمناه العين وتشتهيه الانفس، دا ولا الفور سيزون، دا انا كانت امنيه حياتي اروح اصيف هناك
_ حاضر هبقي اخدك بعد الجواز ونبقي نصيف هناك عنيا
= اه بمناسبه الجواز، خلي بالك انا لو جبت عيال مش هدخلهم المدارس المايعه دي، انا هدخلهم المدارس اللي انا روحتها، افخم واجدع مدارس في القاهره بضواحيها
_ اه مدرسه سعد الصغير المشتركه طبعًا علم من اعلام القاهره
= انا سامعه نبره تريقه في صوتك كده، هي مدرستي مضيقاك في حاجه ولا اي
_ لا طبعًا هو انا اطول ان عيالي يدرسوا في نفس مدرستك ، المهم اجي اخدك من الشغل ولا اي
= لا شغل اي انا طلعت من بدري، هو انا لسه هستناك
_ لا طبعًا ازاي تستنيني، متبقيش كارما، المهم اجيلك فين
= بص انا هسبقك ع الجونينه اللي في وش الشغل دي، وجيس وات هناكل اي
_ ابهريني
= اما انا هحضرلك اكله فسيخ يولا يا زوز تاكل دراعك وراها
_ دراعي، يستار يارب اي الاجرام دا
= لا دا تعبير مجاز ، من كتر ما هتعجبك يعني
_ مش بقولك بموت في رقه تعبيرك يا كارما
= اقل حاجه عندي يا زوز، ها اروح اجيب الفسيخ؟
_ لا الفسيخ دا تاكليه في بيتكم، انا مش هاكل البتاع ابو ريحه دا
= يولا اسمع بس، احنا هنجيب ملايه كروهات بتاعه الافلام دي، وفحلين بصل ونص فسيخ ونص رنجه وبتاع 26 رغيف عيش كده وطحينه ولمون، بجد انا هيغمي عليا من الجمال
_ دا انا اللي هيغمي عليا من مجرد التخيل، كارما لو خايفه علي علاقتنا متجبيش سيره البتاع دا قدامي
= والله؟ طب استني نتجوز بس يا عز وانا هعلقهولك فوق السرير كده، وابقي وريني هتعمل اي
_ هطلقك يا روح قلبي
= اهو شوفت، نيه الطلاق عندك من قبل ما نتجوز، انا مش عارفه انا كان فين عقلي وانا بوافق ع واحد توكسيك زيك، بقولك اي تعالي يلا خُد حاجتك وكل واحد يروح لحاله، انتَ مش بتاع جواز يا عز
_ اومال بتاع اي يا قلب عز
= يوه بقا، بطل تقول كده انا بتخانق معاك دلوقتي متضعفش موقفي لو سمحت
_ حاضر المره الجايه
= طب والمرادي؟
_ لا المرادي بقا انا هقابلك في الجنينه، ونجيب ساندوتشين شاورما اكس لارج، واتنين كريب نوتيلا، وتحكيلي عن مغامراتك في اعدادي، وازاي انتِ كنتِ اروش واحده في الفصل والبنات كلها كانت بتغير منك
” وكما توقع عز، نالت تلك الفكره استحسان كارما وقالت بحماس ”
= ماشي موافقه، احنا وقفنا لحد فين اخر مره؟
_ لحد البت ام غل اللي كانت مسمياكي كارما الصرمه
= ايوا صح، شطور يا عز
” ابتسم عز علي لقب (شطور) اللي تنعته بهِ كارما دائمًا عندما يفعل شئ ينال بهِ استحسانها، ثُم اكمل حديثه وهو يخرج من مكتبه قائلًا لها”
_ انا طالع من المكتب اهو وجايلك
= ماشي، تعالى نعمل سباق؟
_ سباق؟
= اه نشوف مين اللي هيوصل الجنينه الاول، واخر واحد يوصل امه رقاصه
” ضحك عز بعنف ثُم اردف بتذمر مصطنع ”
_ بس انا لسه هقف اشتري الاكل، كده ظلم
= مليش دعوه، السباق سباق، مفيش استثناء، يلا جود باي يا زوز
____________________________
” كان يشاهدها وهي تُفرغ الاطعمه التي احضرها وتُرتبها وعلى وجهها ابتسامة سعيدة، يُقسم انه لم يرى في حياته شيء مبهج كأبتسامتها، قاطعت تأمله بها وهي تقول ”
= بالله عليك مش صعبان عليك اكلة الفسيخ اللي انتَ فوتها دي؟
_ بالله عليكي انتِ، انا مش صعبان عليكِ من اللي انتِ بتعمليه فيا دا
= بعمل فيك اي يا زوز، دا انا شيلاك علي كفوف الراحه
_ والله! طب نزليني يختي.
” قالها عز بتذمر، الا يكفيها انهُ تركها تفوز بذلك السباق السخيف حتي لا تحزن، وتحمّل ثرثرتها بكيف انها ماهره ورشيقه ونشيطه وانهُ مُجرد كسول وانها حقًا لا تعلم كيف لتلك الحسناء ان تأخذ ذلك السلحفاه العرجاء، وظلت تثرثر وتثرثر حتي نفذت طاقتها، فأخبرته انها سوف تأكل لكي تستعيد نشاطها ومن ثُم ستكمل ما بدأته من توبيخ لهُ ”
= مالك يا زوز شايل طاجن ستك كده ليه، دا انتَ حتى قاعد معايا
_ مش يمكن هو دا السبب؟
= تصدق انتَ خساره فيك نص اليوم اللي غبته من الشغل عشانك، انتَ عارف الساعه واقفه عليا بكام؟
_ ساعه اي هو انتِ شغاله رقاصه.!
= وانتَ عرفت منين انهم بيشتغلوا بالساعه؟ دا انتَ شكلك متابع بقا
_ يبنتي ما الناس كلها عارفه.
= ايوا داري علي فسقك داري، تصدق البت ريهام كان عندها حق، قالتلي بلاش ظابط يا كارما، الظُباط بتوع ستات واخلاقهم بايظه يا كارما، وانا اتحمق وارفص واقولها لا كله الا زوز دا مفيش منه اتنين، دا الوَرِع التقي بتاعي، الله يكسفك يا شيخ سودت وشي قدامها
” نظر لها عز ببرود منتظرًا منها ان تنتهي من فقره النحيب تلك، وما ان انتهت حتي باغتها بذلك السؤال السهل… ”
_ هي مش ريهام صاحبتك دي اللي هتتخطب ل مهاب ابن خالتك الخميس الجاي؟
= اه هي
_ طب ومهاب دا شغال سايس يعني ولا اي، ماهو ظابط
= عز لو سمحت متغيرش الموضوع وقولي مبرر للحلاوه اللي انتَ فيها النهارده دي
” قالتها بأبتسامه بينما قهقه عز بشده، فهذه هي عادتها للتهرب منه كلما حاصرها في نقاش ما او اظهرها هي المُخطأه، تقوم بأخباره كم هو وسيم اليوم او ما سبب تألقهُ اليوم واشياء من هذا القبيل ، فأجابها عز اجابته الدافئه المعتاده ”
_ عشان قاعد معاكي بس
= انتَ عيل هجاص خلي بالك
_ هجاص؟؟
= اه يعني كذاب وبطنك فاضيه وبتتعشى كوسه نيه
_ اي العبط اللي انتِ بتقوليه دا.!
= بصراحه كده يا عز انتَ غلبتني معاك، هو كل حاجه هقولها هتتعجب منها كده، دي مبقتش عيشه
_ يمكن عشان كلامك غريب
= ما غريب الا الشيطان يا اخويا، ما الناس كلها بتقول كده انتَ بس اللي تربيه اجانب
_ يعني طبيعي ان الواحد يتعشى كوسه نيه يعني؟
= دا تعبير مجاز انك قراع يعني وكداب وبلمعه
_ قراع وبلمعه؟ انا هخاف اسيب عيالي معاكِ
= دا انا اللي هخاف اسيبهم معاك، لاحسن يلقطوا منك كلمه انجليزي كده ولا كده ، تبقي مصيبه
_ اه طبعا تبقي مصيبه، لكن طبيعي جدا يقولوا قراع وبلمعه
= بقولك اي يحبيبي، انتَ محدش ضحك عليك وقالك انك هتاخد حفيده اليزابسه، انتَ من الاول وانتَ عارف ان انا كده
_ حفيده مين يختي؟ اوعي يكون قصدك اليزابيث
= مفرقتش، كلها اسامي ربنا
= شوفي يا كارما مع ان لسانك زفر، وطريقتك في الكلام غريبه بس انا للاسف بحبك
_ ومالك بتقولها بحسره كده ليه يا ضنايا، انتَ كنت تطول.! الله يرحم ايام ما كُنت بتلف حوليا زي التِعبان كده
= والله؟ طب قومي يا كارما خساره فيكي القعده الرايقه دي
_ خلاص يعم بهزر معاك، كملي بقا اي اللي حصل بعد ما طنط قفشتك وانت قاعد ع الشجره زي القرد كده
” ضحك عز بخفه، واكمل تلك الحكايه التي قصها عليها وهو يحادثها في الهاتف مساء امس يخبرها عن مغامراته عندما كان صغيرًا، بينما كارما كانت تضع يدها علي خديها وهي تُنصت لهُ بشغف كبير وكأنه يروي لها قصه اسطوريه ل بطل ما، كان يتحدث عز وهو ينظر الي تعابير وجهها المتحمسه تلك، وهو يقسم انه الاكثر حظًا في هذا العالم لأن تلك الجميله تنصت له.♡”
_____________________________
_ جبنه رومي اي اللي عايز توزعها ع المعازيم يا مهاب هُما فيران؟
= يا ريهام والله هيتبسطوا، تخيلي كده كل واحد ياخد ساندوتش جبنه رومي سايحه مع كوبايه شاي بالنعناع، اوف ع الروقان بجد
_ والله؟ هتأكل المعازيم جبنه رومي وشاي؟ انتَ عازمهم علي خطوبتنا ولا علي الفطار
= خلي بالك انتِ مش مُحِبه للتغير وعاشقه للروتين ، no risk no fun يقلبي
_ انتَ عايز الناس تاكل وشي؟
= اي التوحش دا؟ لا مش هنعزم الناس اللي بتاكل الوشوش دي
_ مهاب احنا هنعمل اوبن بوفيه زي ما كل الناس ما بتعمل، من غير افتكاسات ولا تشغيل دماغ
= زي كل الناس ما بتعمل؟ والله انتِ مُرفهه، دا انا افخم فرح حضرته اكلت فيه حته جاتوه وساندوتش كفته وبقسماط كمون وكنت خارج حاسس اني املك الدُنيا وما عليها
_ عشان البقسماط كمون؟
= اه انا بعز الكمون انتِ عارفه
= سيبك من الحوار العبثي دا، وقولي هندخل علي اغنيه اي
_ الباشا جالكم ايدكم لفوق، انتم في مكانكوا مسمعش صوت
= هندخل القاعه ع الاغنيه دي!!
_ اه عشان ظابط بقا وكده
= والله؟ طب ما انا مُحاميه
_ اي ندخلك علي الماده 16 في الدستور المدني يعني ولا نعمل اي
= اتريق براحتك، بس انا مش هدخل ع القرف دا
_ قرف؟ القدوه عنبه قرف، تصدقي انا دلعتك
= بلا عنبه بلا بلحه انا مش هدخل ع الاغاني دي
_ اومال عايزه تدخلي ع اي يا ملكه، اي رأيك نشيلك في هودَك ولا ندخلك علي ضهر ناقه؟
= انا هستني منك اي يعني غير تريقه، انا هلاقيها منك ولا من بنت خالتك ارحمني شويه
_ خلاص يستي هعملك اللي انتِ عايزاه بس اهدي كده ومتشديش وشك اوي لاحسن يشقق مننا ويقع ولا حاجه
“قالها وهو يتظاهر بالجديه، فضحكت ريهام بقله حيله، فهو لا يترك اي فرصه دون ان يُثير غضبها، ثُم يُخبرها بكم انها فاتنة جدًا وهي غاضبه، فتضحك كالعاده متناسيه غضبها الذي يعرف كيف يمتصه وبسهوله ذلك الخبيث”
_ احنا لو فضلنا ع الوضع دا، هنعمل خطوبتنا السنه الجايه
= لا السنه الجايه اي ابوس ايدك دا انا ما صدقت اخوكي رضى عننا ونزل اجازه عشان نتخطب بقا، ولا انا مليش نفس اتدفى بالدبله زي بقيت الناس
_ مش المفروض انا اللي اقول الكلام دا ولا اي؟
= ما انتِ عملالي فيها كاريزما وبادره ولو اترزعت جمبك هنا لحد السنه الجايه مش هتقولي كلمه حلوه تبل ريقي
_ يعيني يا مهاب، تصدق صعبت عليا
= شوفتي بقا انا حالتي صعبه ازاي، بلاش مهاب دي بقا وقوليلي يا بيبي
_ بيبي اي يا شحط انتَ، اتكسف ع دمك دا انتَ ظابط
= قوليلي اي حاجه طيب، دا انا ريقي نشف علي كلمه حلوه منك
_ حاضر حاضر، اوعدك بعد الخطوبه هقولك كلام حلو كتير ويلا بقا عشان جعانه اوي
” قالتها وهي تهاوده كالطفل الصغير، جاذبه ذراعه مُتجهين الي مطعم ما، بعدما قضوا اليوم بأكمله بالخارج لكي يكملوا بعض اللمسات المتبقيه علي موعد خطبتهم ”
________________________________
= وبس يا سيدي، راح الراجل طلع خبط علي ماما وقالها بنتك قليله الادب وحدفت عليا المشابك بتاعه الغسيل، راحت ماما ضربتني حته علقه، ونزلتي الم المشابك من الشارع تاني
” كانت كارما تسرد علي عز بعض المقطتفات من طفولتها المشرده، بينما هو يجلس وهو مُنصت بأهتمام كما لو انها تسرد لهُ عن دورها وانتصارها في الحرب العالميه الثانيه مثلًا، فأجاب بأنفعال طفيف قائلًا ”
_ لا ملوش حق فعلًا دا راجل اوڤر، هو انتِ حدفتي عليه مايه نار يعني؟ دي شويه مشابك
= شوفت؟ عشان تعرف بس انهم ظالمني من وانا قد كده
” كاد ان يُجيب علي استيائها ولكن قاطعهُ رنين هاتفها بأسم ( رؤوف الاقرع) فأعتدلت في جلستها وبدأت تُلملم اشيائها قائله ”
_ انا لازم ارجع الشغل بقا لاحسن رؤوف يتعصب عليا ويطب ساكت، ودا راجل كبير وصاحب مرض
= ما تقعدي شويه كمان هيحصل اي يعني، المكتب مش هيتهد
_ لا مش هينفع لان زي ما انتَ عارف المكتب دا هيروح في شربه مايه لو انا اتأخرت دقيقه واحده عنه، بهزر معاك دا عشان ريهام غايبه بس ومفيش حد هناك غيري انا و كام حد بس
= طب وريهام غايبه ليه
_ عشان بتجهز بقا هي وهوبا حاجات الخطوبه وكده انتَ فاهم
= اه، عقبال تجهيزتنا احنا كمان
_ ان شاء الله، اتلحلح انتَ بس كده يا اخويا
= انا عن نفسي جاهز والله وعايز اتجوز من بكره بس في واحده كده عايزه تخللني جمبها
_ تتجوز من بكره اه، سلق بيض هو، انا عايزه اعيش فتره الخطوبه زي باقي البنات يحبيبي
= طب وفرقت اي الخطوبه من الجواز
_مش يمكن تطلع نص كُم وتتغير بعد الجواز، وانا الصراحه اتوقعها منك
= والله؟ طب قومي يلا عشان اوصلك قبل ما اتعصب عليكِ
” كادت ان تعترض كعادتها، ولكن قاطعها صوت رنين هاتفها مره اخرى بأسم رؤوف فأجابت بتذمر وهي تركب سياره عز ”
_ ايوا يا استاذ رؤوف انا جايه في السكه اهو
~ انتِ كل دا ولسه في الطريق يا كارما
_ معلش ياخويا حقك عليك نسيت المقشه اللي بطير بيها في البيت النهارده
” قالتلها بسخريه وهي تطلب من عز ان يُسرع قليلًا، حتي وصلت الي مقر عملها بعد ان ودعت عز، وما ان دخلت الي المكتب حتي قابلتها ليلى وهي اكثر شخص ثرثار وفضولي في هذا المكتب قائله”
~ بت يا كرمله، في حته منتج فرز اول بيتجول في قلب المكتب شوفتيه؟
_ لا انا لسه جايه، وبعدين انتِ لو تبطلي حشريه وتركزي في شغلك زي ما بتركزي في اخبار الناس كده، كان زمانك مكان رؤوف دلوقتي
~ بقولك اي انا غلطانه يعني اني جيت انبهك
_ تنبهيني من اي
~ من حته البسبوسه اللي بتتمشي دي، لاحسن تاكليه ولا حاجه انا عرفاكي طفسه وبتاعه اكل
_ لا متخافيش يختي مليش في الحلويات، نفسي بتجزع منهم
~ اومال عز دا اي نظامه، دا ماشاء الله صنيه كب كيك متحركه
_ بقولك اي سيبي الراجل اللي حيلتي في حاله، وروحي شوفي الفتنه المتحركه ع الارض دي بتعمل اي عندنا هنا
” وكادت ان تُجيب ليلى ولكن قاطعها دخول شاب وسيم يافع، وبجانبه استاذ رؤوف وبالكاد يصل الي منتصف صدره قائلًا ”
~ اقدملكم يا جماعه المدير الجديد
= المدير؟…….
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية غرام العز الجزء الثاني)