رواية عوض الله الجميل الفصل الخامس 5 بقلم نشوة عادل
رواية عوض الله الجميل الجزء الخامس
رواية عوض الله الجميل البارت الخامس
رواية عوض الله الجميل الحلقة الخامسة
-هو فعلا مروان كان خاطب من تلات شهور بس خطيبته اتوفت تانى يوم من الخطوبة
هدى بصدمة: اييييييه لا حول ولا قوة إلا بالله طب ماتت موتة ربنا ولا لسبب معين ؟!
رنا: لا اتوفت بسبب ازمة قلبية اهلها كانوا بيصحوها الصبح لقوها ميتة
هدى بحزن: لا اله الا الله مبيلحقش يفرح يا حرام طب هو ليه لابس دبلتها لحد دلوقتى؟!
رنا: ع فكرة هو محبهاش هو خطبها عشان خاطر يرضى والدته مش اكتر خصوصًا ان البنت دى كانت جارته وبتحبه من زمان وبسبب زن والدته وافق وقال يعطى لنفسه فرصة معاها يمكن تقدر بحبها واحترامها وتفاهمها معاه تخليه يحبها ويشاء القدر ان الموت يفرقهم ومن وقتها وهو حاسس انها اكتر واحدة كانت تستحق حبه يعنى تقدرى تقولى شعور شفقة اتجاهها
هدى بحزن: انا السبب فى اللى هو وصل ليه يا رنا
رنا بتنهيدة: متلوميش نفسك ع حاجة انتى ملكيش ذنب فيها انتى مكنتيش فاهمة حقيقة مشاعرك اتجاهه لانه كان معاكى دايما فاعتبرتيه اخ وصاحب مش اكتر ومحدش عارف الايام الجاية مخبية ايه ممكن تهدى بقا
هدى: موافقة بس بشرط
رنا: انا صبرى بدأ ينفذ ع فكرة 😂 طلباتك كترت اوى اتفضلى اشجينى
هدى: عاوزة اشرب عصير قصب
رنا: بس كده من عنيا الجوز يا لوز اتفضلى ادامى
بالفعل اخدتها وشربتها العصير وروحتها ع البيت … طلعت هدى ع البيت وكان وقت الغدا والكل متجمع وفى انتظارها
هدى: السلام عليكم ورحمة الله وبركاته يا اهل البيت
الجميع: عليكم السلام …. ابراهيم: ها يا حبيبة بابا ازاى كان يومك النهاردة
وفاء: استنى طيب تاخد نفسها وتتغدى وبعدين نسألها
ابراهيم: الله وانتى مالك يا سيتى بنتى وحبيبتى وانا حر فيها مالك غيرانة ليه؟!
وفاء: انا اغيير من بنتى انتى اتجننت يا راجل؟!
ابراهيم: الله يرحم ايام ما كانت صغيرة وتيجى تنام جنبى وفى حضنى وكنتى تضايقى وتتقمصى وتقوليلى يا انا يا هى اللى ينام جنبك
وفاء باحراج: بس يا راجل عيب العيال قاعدين
ابراهيم بغمزة: بقالنا تلاتين سنة تأبيدة جواز ولسه بتخجلى وتحمرى يا بطتى
هادى: احم احم نحن هنا يا قوم عيب احترموا مشاعر السناجل مش كده
ضحك الجميع واتغدوا وبعدها كل واحد راح يشوف مصلحته وبعد ما اطمنوا ع هدى ودخلت غرفتها لقيت الباب بيخبط وكان هارون
هارون: حبيبتى وراكى حاجة؟
هدى: لا يا حبيبى تعالى … لاحظت هدى ان هارون عاوز يسأل ع حاجة فبادرت هى: انت محتاج حاجة؟!
هارون: هو انا بس كنت عاوز اسألك ع رنا … قصدى انسة رنا هى كويسه
هدى بغمزة: اه كويسه واوى كمان وارتبطت وهتتخطب قريب
هارون بوجع وعصبية: نعععععم تتخطب يعنى ايه تتخطب دى الكلام ده ع جثتى
هدى بضحك: ايوة بقا يا جامد اظهر وبان عليك الامان وقول انك وقعت ومحدش سمى عليك طب طالما واقع اوى كده مستنى ايه ها ها لما البت تضييع منك
هارون: خايف يا هدى تكون مش بتحبنى وتكون مشاعرى من طرف واحد
هدى: لا من الناحية دى اطمن المشاعر متبادلة
هارون بفرحة: بجد هى قالت ليكى كده؟
هدى: هى مقالتهاش صريحة بس انا بنت وبفهم يا هارون من نظراتها واسلوبها فى الكلام عنك الحقها قبل ما تضيع منك وترجع تندم زيى
هارون باندهاش: اندم زيك؟!
هدى بسرعة: اقصد يعنى انك تلاقيها بقت مع حد تانى غيرك
هارون قام وقف وراح ناحية الباب غمز ليها قبل ما يخرج: قريب اوى هتكونى اخت العريس
فى المساء دخل ابراهيم ع هدى وقال: تعالى يا هدى فيه ضيف عندنا عاوز يقابلك
هدى باستغراب: ضيف مين ده يا بابا اللى عاوزنى!
ابراهيم: مروان زميلك وووووووو……………………………..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية عوض الله الجميل)
