رواية احتواء قلب الفصل السابع والثلاثون 37 بقلم عبير سليم
رواية احتواء قلب الجزء السابع والثلاثون
رواية احتواء قلب البارت السابع والثلاثون
رواية احتواء قلب الحلقة السابعة والثلاثون
لا يعرف لما هو قلق لهذا لحد لا يعرف ما سبب ضيقته قد يكون لخروجها من العمل دون اذن منه و عدم ردها عليه عندما اتصل عليها أم لأنها خرجت مع شخص لا يعلم من هو و على الرغم من ثقته و يقينه برؤيته سابقا الا انه لم يستطع تذكره فما الذي يضايقه الآن يعاود الاتصال بها و لكن دون جدوى يريد أن يتصل على عمرو يسأله ان كان هناك خطب ما و لكنه لا يريد ان يسبب لها مشكله فلعله لا يعلم عن هذا الأمر شيئا اذن ماذا عليه أن يفعله الآن يحاول ان يستكمل عمله و ان أجلا او عاجلا فسيعلم كل شئ
يترك ما بيده ويفتح اللاب سريعا و يعاود صور آخر حفل حضره حيث كانت بصحبة بعض رجال الأعمال يتصفح الصور بدقه و لكنه يتوقف عند تلك الصورة و يدقق بها كثيرا نعم هو نفس الشخص الذي جاء إلى همسه اذن هو أحد رجال الأعمال فما علاقته اذن بها و ماذا يريد منها
مش عاوز منها حاجه يا همسه انا كل اللي عاوزه و نفسي فيه بجد انها تتغير و تبقى انسانه كويسه مش عشان حد عشان نفسها هي
همسه : ليه ايه اللي يخليك تضيع وقتك و تسيب شغلك و حياتك عشانها تهمك في ايه هي اذا كانت تتغير و اللا متتغيرش اكيد في سبب يا استاذ أشرف كلمني بصراحه انت في حاجه جواك ناحية اختي
اشرف : أول ليله اتقابلت فيها معاها انجذبت ليها و لجمالها حسيت ان فيها حاجه مختلفه منكرش اني اعجبت بيها اوي و اول ليله قضيتها معاها كانت من أجمل الليالي فحياتي وقتها مكنتش اعرف اي حاجه عنها قربنا اوي من بعض و بقينا بنتقابل و نتكلم و حكتلي كل حاجه و الغريبه انها مخبتش حاجه و لا حاولت ترسم علية شخصيه غير شخصيتها و لا تمثل علية البراءه و النقاء بالعكس كانت صريحه جدا بتقول عيوبها قبل مميزاتها و دي حاجه صعب تلاقيها فحد لقتها معهاش حد حستها محتاجاني جمبها معرفش ليه حسيت بالمسئوليه تجاهها لقيت نفسي بوعدها اني مش حسيبها و لا عمري حتخللى عنها بحاول معاها بكل الطرق اني اساعدها تتغير لكن هي للأسف مش عاوزة تساعد نفسها هواها غالب عليها و سايبه نفسها لشيطا.. نها يتحكم فيها
انا كل املي ان ربنا يهديها و اساعدها توصل لبر الأمان
همسه : و بعد كده تسيبها و تروح تعيش حياتك صح كده
اشرف :……………
همسه : هو ده الطبيعي يا استاذ أشرف انك تاسس حياه ليك حياة طبيعيه مكونه من ام و اب و اولاد
لكن ذكرى للأسف حكمت على نفسها انها تتحرم من احلى احساس كانت ممكن تحس بيه فحياتها ضيعت نفسها و مستقبلها و كل اللي سعت ليه ضاع منها حتستفيد بيها ايه دلوقتي الفلوس اللي ضيعت نفسها عشانها اهي حتصرفها على العلاج و ياريتها حتكفي يا خسارة يا ذكرى يا خساره
حقك تبدأ حياتك مع انسانه تكون ليك لوحدك لكن ذكرى للأسف ماضيها يخليك ترفض وجودها فحياتك
انا متشكرة جدا لوقفة حضرتك معاها حضرتك بجد حد كويس و اتمنالك كل خير بس الله يخليك خليك جمبها بس الفتره دي حضرتك عارف ان المرحله اللي داخله عليها حالتها النفسية حتكون داعم مهم ليها و هي فطريقها للشفا
اشرف : أنا معاها يا همسه مش حسيبها غير لما اطمن انها بقت كويسه ياااه يا همسه سبحان الله برغم انكم اخوات لكن تفكيركم مختلف نهائي عن بعض ياريتها كانت زيك
همسه : ربنا يهديها يارب
يطرقوا على الباب و يدخلوا و يلقوا عليهم التحيه و تعرفهم همس ببعض : ماما و عمرو جوزي
استاذ أشرف صديق لذكرى
يسلموا على بعضهم و يقعدوا يتكلموا شويه لحد ما تجيلهم الممرضه و تبلغهم ان العمليه خلصت و هي في حجرة الافاقه
بعد شويه تفوق ذكرى من البنج و تلاقي همسه و امها و اشرف و عمرو كلهم حواليها
الف حمد لله على سلامتك يا حبيبتي
ذكرى : الله يسلمك يا ماما
اشرف : حمد الله على السلامة يا ذكرى
ذكرى : الله يسلمك يا اشرف تعبتك معايا
اشرف : متقوليش كده اهم حاجه انك الحمد لله بخير
همسه : عامله ايه يا حبيبتي
ذكرى : تعبانه اوي مش قادره
تدخل الممرضه و تعلقلها محاليل فيها مسكنات
و بعد شويه تنام و اشرف يستئذن و يمشي و عمرو يمشي وراه بشويه و تبات معاها همسه و امها
ليله مرت عليها و هي بتتالم طول الليل و امها و اختها معاها بيحاولوا يخففوا عنها
و ييجي الصبح و هادي يروح الشركه و هو منتظر مجيئها عشان يفهم اللي حصل لكنه يتفاجئ بعمرو بيستئذن في الدخول ليه و بيطلب منه اجازة عشر ايام لهمسه
هادي : عشر ايام اجازة ليه في ايه
عمرو : تعبانه شويه و عاوزة ترتاح
هادي : همسه تعبانه الف سلامه عليها يا عمرو طب مالها طيب طمني انت عارف غلاوة همسه عندي
عمرو : عارف طبعا يا هادي همسه اختك و انا مقدر قلقك عليها بس معلش اعذرني انا مش حقدر اقولك غير انها تعبانه و محتاجه ترتاح
هادي : ماشي يا عمرو مفيش مشكله تاخد الاجازة اللي هي عاوزاها و لو عاوزة اكتر من عنيه اهم حاجه تبقي هي كويسه
عمرو : ربنا يخليك يا هادي
هادي : سلملي عليها
عمرو : يوصل ان شاء الله
يخرج عمرو من عنده و هو سايبه فحيره
ومش فاهم ايه اللي بيحصل
بعد ما يخلص شغله يروح على مسعد بقاله كام يوم مشافهومش و وحشوه و كالعاده يحكيلهم على كل حاجه و حيرته من اللي حصل
مسعد : البيوت أسرار يا هادي و الله اعلم يابني باللي هما فيه
هادي : أنا كل قلقي من اللي جه لهمسه و مشيت معاه خايف يكون وراه حاجه او يكون خروج همسه معاه عمل مشكله بينهم
مسعد : و الله ما عارف يا بني بس هي فعلا ممكن تكون تعبانه و على رأي المثل يا خبر بفلوس بكرة يبقى ببلاش
هادي : ربنا يطمني عليهم يارب
مسعد : طمني عليكم انتم يا حبيبي عاملين ايه
هادي : الحمد لله و الله يا حج عاوز ارجع و الله بس الجماعه مش عاوزيننا نمشي و امي كل ما نجيب ادامها سيرة اننا نرجع نفسيتها تتعب و كمان هي اتعلقت اوي بجنه ده اليوم اللي ببات فيه هنا في الشقه بتنيمها فحضنها و انا و الله لسه مش عارف اعمل ايه احنا مبسوطين جدا معاهم بس المشوار كل يوم من بنها للقاهره تعبني و فنفس الوقت بردو انا مش حقدر ابعد عن امي تاني
مسعد : سيبها على ربنا و ان شاء الله ربنا بدبرلهالك من عنده
هادي : يارب يا حج هي امي حنتاخر عند خديجه
مسعد : هي شكلها كده حتبات عندها هادي تعبان و هي الحمل مبهدلها و امك قالتلي لو معرفتش تسيبهم حتبات
هادي : ربنا يطمنها عليه يارب و ربنا معاها هي و جنه و نجلاء
مسعد : ربنا يكملهم على خير يا رب
طمني على صاحبك يا هادي عامل ايه دلوقتي
هادي : يومين ان شاء الله و حيخرج من المستشفى و يبدأ بعد كده في العلاج الطبيعي و ربنا معاه يارب
مسعد : ان شاء الله ربنا حيشفيه انت حتبات عنده الليله
هادي : أيوة ان شاء الله احنا مقسمينها مع بعض و الليلادي حبات معاه انا
مسعد : ربنا يخليكم لبعض يارب
هادي : يارب يا حج يارب
مسعد : بس انا ملاحظ انك من وقت ما جيت و فهد ماتصلش عليك خالص دي اول مرة تحصل
هادي : ما دام اختفى كده يبقى ربنا يستر اكيد بيهبب حاجه انا مبرتاحلوش لما بيغيب كده
مسعد : هههههههه خير ان شاء الله
طبعا خير يا فهودتي
فهد : انجزي و جيبي من الاخر في ايه عاوزه ايه يا بت عمي صلاح ربنا يجعل كلامنا خفيف عليه
نجلاء : عمك صلاح وحشني و عاوزه اروحله
فهد : اااه انا كان قلبي حاسس ان التماحيك دي اكيد وراها حاجه
نجلاء : فهد احنا من يوم ما جينا اخر مرة مرحناش من وقتها و انا بابا و ماما وحشوني انا عاوزه اروحلهم مليش دعوة
فهد : طب وانا يا نوجتي حهون عليكي تسيبيني لوحدي
نجلاء : ليه يا حبيبي هو انت مش حتقعد معانا
فهد : اقعد معاكم فين يا ام الذكاء هو انتي مش شايفه الحوسه اللي انا فيها ما بين شركة هادي لشىركة يونس للمستشفى للمحكمة ده انا عايش في معجنه
وبعدين انتي مالك قاعدالي ببجامة ابوكي كده ليه
نجلاء : يا دي النيله مش انت اللي قلتلي اقعدي بحاجه محترمه مش عارفه ايه الإيمان و التقوى اللي نزلوا عليك دول
فهد : و لا انا عارف و حياتك اللهم اغزيك يا شوشو بقولك ايه انا زهقان
متسيبك من موضوع ابوكي ده و تقومي تلبسيلي الجلابية ام ترتر دي و تيجي تركزي معايا و على رأي الشاعر الطشت قاللي الطشت قاللي يا حلوة ياللي قومي استحمي
واخده بالك انتي ياللي هاه
نجلاء : لاء مش واخده بالي يا فهد بلا ياللي بلا ميلليش انا عاوزة اروح لبابا يا فهد حتوديني و اللا اتصل بيه و اقولله انك مش عاوز توديني
فهد : حوديكي جتك الهم ستات تسد النفس
احسن بردو انا اوديها و اقعد انا بقى اعيش حياتي يومين مع حبيبتي و على رأي عمرو دياب راجعين نعشق و ندوب و نعيش مع بعض حياتنا
نجلاء : انت بتقول حاجه يا فهد
فهد : بقول اني حبقى وحيد من غيرك يا قلب فهد
نجلاء : وحيد اه علية انا ياخوفي منك يا فهودتي
فهد : عيب عليكي هو انتي مش عارفه جوزك
نجلاء : ده انا عارفاه عز المعرفه هههههه
بعد مرور يومين
يقوم من النوم و هو مفجوع : في إيه ايه اللي حصل
أدهم : زلز.. ال زلز…. ال قوم بسرعه
مراد : زلز.. ال فين
أدهم : فقلبي يا قلبي
مراد و هو بيضربه بالمخده : جاك وجع فقلبك فجعتني يا بني آدم انت
أدهم : اعمل ايه بس مانت لما تعرف حتعذرني
مراد : اعرف ايه الله بخرببيتك
أدهم : المزز تحت عندنا اه و ربنا
مراد : قصدك جيلان و بيسان
أدهم : هما يا معلم بعينهم بشحمهم و لحمهم لاء هو مش بلحمهم الصراحه هما معضمين شويه بس مش مهم انا حزغطها لحد ما اخليها زي البطه
مراد : هههههههه يا لهوي حتجنني
أدهم : انت لسه بتتكلم قوم يا بني آدم انت و اللا انت مش عاوز تشوف جيجي دي لابسه حتة بنطلون جينز إنما ايه حكايه
مراد : أدهم احترم نفسك
أدهم و هو بيزغزغه : احبك و انت بتغير
مراد : هههههههه بس يخرببيتك
أدهم : انتي بتغيري يا بيضه لا عيب عليك انا عاوزك تبقى مالي مركزك كده زي اخوك
بقولك ايه انا نازل و انت براحتك بقى
ينزل أدهم و هو بيهندم نفسه و قلبه بيرقص من فرحته بوجودهم : و الله العظيم احنا عندنا عيد النهارده ايه المفاجأة الحلوة دي
اسماء : اعمل ايه بقى جنه وحشتني اوي و انتوا كمان و الله وحشتوني و البنات قالولي عاوزين نيجي معاكي جبتهم و جينا
جميله : ده البيت نور و ربنا
يقعد أدهم : بيسان بتحبي الخيول
بيسان : اوي
أدهم : احنا عندنا اسطبل خيول تحبي تيجي تشوفيه
بيسان : اه يا ريت
غاليه : لاء و ايه سلطانه لسه والده وجابتلنا مهرة جميله
بيسان : بجد
جميله : ايوة و الله دي حتى مولوده على ايد أدهم نادي على مراد يا أدهم و خدوا جيلان و بيسان و فرجوهم على مهرة الصغيره
اسماء : بس الله يخليكم خللوا بالكم عليهم
غاليه : متخافيش عليهم يا حبيبتي
ينزل مراد و يسلم عليهم و ياخدوا البنات و يخرجوا و اسماء تتكلم مع جنه و جميله و غاليه و ناديه و كل شويه تتصل تطمن عليهم
بيسان : الله دي جميله اوي
أدهم لنفسه : و الله انتي اللي جميله اوي يخرببيت فقرك
جيلان : مراد انا عاوزة اركب خيل
مراد : ياللا بينا
بيسان : و انا كمان عاوزة اركب
أدهم : بس كده من عينيه ياللا بينا
يركبوا كلهم الخيل و يتمشوا بيه وسط المزرعه و هما فرحانين بيتكلموا و بيضحكوا مع بعض
مراد : وانتي ناويه على ايه يا جيلان
جيلان : عاوزة اتعلم الشغل عشان اساعد بابي في الشركه
مراد : و حتعرفي
جيلان : ان شاء الله بابي محتاجنا معاه و انا لازم افهم الشغل كويس عشان اكون جنبه
مراد : و بيسان بردو حتكون معاكي
بيسان : ايوة طبعا يا أدهم حكون مع اختي امال يعني حسيبها لوحدها بس ربنا يستر بقى
أدهم : طب و بالنسبه يعني لو حصل و اتقدملك عريس حتعملي ايه
بيسان : مش عارفه لما يبقى يحصل
أدهم : حيحصل ان شاء الله
يقضوا وقت طويل لحد ما يتصل بيهم هادي : هاتوا البنات و تعالوا ابوهم هنا
أدهم : ابوهم جه
هادي : أيوة جه معايا
أدهم : هادي عشان خاطري عاوز افتح معاهم سيرة الموضوع انا خلاص مش قادر استنى اكتر من كده لو مكلمتهوش انا حكلمه و مليش دعوة
هادي : طب تعالوا وربنا يسهل
يرجعوا البنات و هما مبسوطين اوي و يسلم على أدهم و مراد و يبدءوا يتكلموا مع بعض
هادي : ان شاء الله انا حبيع الشقه و حكمل على تمنها و حشتري فيلا صغنونه كده على ادي انا و جنه و ماما جميله و ماما ناديه و آلاء القمر طبعا حنعيش فيها ان شاء الله
فاروق : إيه انت بتقول ايه يا بني انت عاوز تاخد اختي مني
هادي : ماهي معاك عمرها كله يا خالي سيبهالي بقى انا كمان شويه و اللا ده مش من حقي
فاروق : لا حقك طبعا يا حبيبي بس انا اتعودت على وجود جميله فحياتي انا مقدرش يعدي يوم علية من غير ما جميله تكون ادامي
غاليه : و انا يا هادي معرفش اعيش غير معاها
هادي : اوعدكم و الله ان ماما حتكون عندكم على طول و انا و الله ححاول اجيب فيلا فاقرب مكان لهنا
و بعدين انا حاخد ماما و حجيبلكم عروستين قمرات ان شاء الله حينوروا حياتكم
بشمهندس يونس انا عارف ان مش ده المكان المناسب لطلبي الي حطلبه ده بس الكلام اللي حقوله ده من عشمي فيك و الله و اننا كلنا عيله واحده و مفيش فرق بيننا
و موافقة حضرتك و موافقة البشمهندسه اسماء حينقذوا شاب على وشك الج. نان
يونس : في إيه يا هادي اتكلم
هادي : بعد اذنك يا بشمهندس بعد اذن حضرتك يا خالي انا بطلب ايد اخواتي بيسان و جيلان لولاد خالي أدهم و مراد
يونس و اسماء يبصوا لبعض و يسكتوا
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية احتواء قلب)
