رواية شيزوفرينيا أحاسيس الفصل السادس 6 بقلم حنين عادل
رواية شيزوفرينيا أحاسيس الجزء السادس
رواية شيزوفرينيا أحاسيس البارت السادس
رواية شيزوفرينيا أحاسيس الحلقة السادسة
بيفتح روقا الباب بعد لما زينات اتاخرت وبيتصدم وهو بينده بصوت عالي:
زينات يا اختي
بيجري عليها وبتكون نايمه علي الأرض فاقده الوعي بيضربها علي وشها وبيحاول يفوقها مش بتفوق
بيجري علي المطبخ وبيجيب بصلة كبيرة وبيقشرها وبيروح وبيقربها من مناخيرها لحد ما بتفوق وبيكون مقرب اوي من وشها
زينات بشهقة:
اعوذ بالله من الشيطان الرجيم
روقا بيبعد وهو مستغرب:
اعوذ بالله من الشيطان الرجيم انتِ شوفتي عفريت!
زينات بتقوم من عالأرض وبتتسند عالحيطه وهي بتضحك بتعب:
معلش يا خويا ههه اصل وشك من قريب غير من بعيد
روقا: تشكري يا زوق!
زينات: ههه والنبي ماتزعل دا انت جركن مان الشارع زي ما امك ما كانت بتقول
بيمسك ايدها يساعدها:
يا جاهلة ما اسمهاش جركن مان اسمها جنكن مان ج ن ل وبعدين مان بقا
زينات:
اعمل أي الله يرحمه ابويا ضحك عالراجل بنص جنيه وقال له ماعنديش بنات للعلام وانت اللي اتعلمت وخدت الابتدائية وبقيت مثقف
روقا: ايوه الله أكبر المهم انت ملاحظة ان دي تاني مره يغمن عليكي الاسبوع ده لازم تروحي تكشفي وتتطمني علي روحك
زينات: تلاقيه ضعف ولا انيميا دي اكل رمان وهابقي زي الفل
روقا: بقيتي دكتوره يا وليه روحي اتطمني علي روحك
زينات: حاضر يا خويا
روقا: المحروس ايه اللي اخره كده
زينات: اسكت مش التاكسي بتاعه اتسرق وهو في القسم
بيبتسم روقا وبيبان عليه انه مبسوط وبيفكر:
دا شكله الموضوع قرب اوي والدنيا اخيرا هتزهزه
زينات باستغراب: انت مبسوط ولا ايه وشردت في ايه
بيحاول يمثل انه متضايق:
مبسوط اخص عليكي دا انا قلبي بيتقطع يا زينات شكلنا مش مكتوب لنا الفرح يا زينات
زينات: الحمد لله علي كل اللي يجيبه من حمده زاده
روقا: مش لما يكون عندنا حاجة عشان تزيد
زينات: استغفر الله العظيم استغفر ربك بدل ما يبتليك بحاجة ما تقدرلهاش
روقا: طيب طيب استغفر الله
بقلم حنين عادل كاتبة الجيل
♕ـــــــــــــــــــــــــــــــــــــــــــــــــــــــــــــــ♕
وعلي الكورنيش موسي قاعد وهم الدنيا فوق كتافه
حماصة: ماتقلقش محلولة
موسي: ازاي بقا يا فالح اقولك يا حماصة زقني انت واهو كده ماكونش انتحرت اقتلني!
حماصة: عاوز تضيع مستقبلي يا صاحبي يرضيك والبت رضا اللي بكرش عليها دي تموت من غيري تتهبل تتجنن
موسي: ههه خلاص ياعم مايرضنيش
حماصة: التاكسي هايرجع ماتخافش
موسي: ازاي بقا
حماصة: اعرف واحد وش اجرام بس ايه صاحبي وحبيبي وكفاءه هايدلنا علي اللي عملوا كده ونرضيهم باي حاجة
موسي: وانا حيلتي حاجة
حماصة: خسارة بسيطة بس المكسب كبير وحد الله بس كده وروح لأمك فاتها قلقانة عليك
بيهز موسي راسه وبيمشي وهو بيفكر:
شفيق هايجي بكره عشان القسط اقوله ايه التاكسي بح وفلوسه ناقصه دا كان هايسجني مره عشان 100 جنيه دبرها يارب حلها من عندك!
مافيش في ايدي حاجة
♕ـــــــــــــــــــــــــــــــــــــــــــــــــــــــ♕
بيدخل ايوب نايت كلاب الاضواء والموسيقي عالية والبنات بتتمايل بدلع والشباب حواليهم اللي ماسك كاس وبيشرب واللي سكران
دخل وقعد عالبار بيتفرج علي كل اللي حواليه
ايوب: هات كاس يابني
*خليها ازازة
بيبُص لمصدر الصوت بيلاقيها بنت شبه اللي ماليين المكان بتقرب منه وبتلمسه فبيزق ايدها يبعدها عنه
*ليه كده دا انا شروق يعني الحب والشوق يعني الراحة والهدوء يعني اللي يشوفها يتغير موده ويروق!
ايوب: غوري يابت من هنا!
_الله الله ايه النور ده أيوب باشا حتة واحدة ايوه كده يا راجل عاش من شافك
ايوب بينفخ بضيق: عاوز ايه يا سامح
_عاوزك تكون بخير طبعاً وتخرج من ازمتك دا انا محامي شركتم ويهمني مصلحتكم ولحم كتافي من خيركم
ايوب: طيب شوف حالك بقا
_اوامراك يا ايوب باشا
بيمشي سامح والبنت بتلاقي مافيش فايدة بتمشي هي كمان..
بيطلع ايوب وفي ايده الازازة وبيتمشي الدنيا بتمطر فوقه بيقعد عالكورنيش
_وساكن في حي السيدة وحبيبي ساكن في الحسين وعشان انول كل الرضا هاا قول كمل
بتكون انجي بتجري في الشارع والدنيا بتمطر وبتغني
ايوب: وعشان انول كل الرضا تقريبا بيروح لها مرتين
انجي: شطووووور
بتقف تحت المطر وتتدروخ وهي بتضحك
ايوب: يا بنتي هايجي لك برد
انجي: مش مهم انا بحب الشتا وبحب اللي يحبه ولو البرد هو التضحية البسيطة لــ اللحظات الجميلة دي وماله
بيضحك ايوب…
انجي: يلا نضرب الجرس عالناس ونطلع نجري
ايوب بضحك: لأ انا اتقفشت المرة اللي فاتت وعملت فيها متخلف عقلي وكان ناقص اقول حبيشة اصاحبي
انجي: ههه ما المفروض تكون سريع عن كده بس حظك انه فتح في نفس ذات اللحظة ههه كنت عامل زي الكتكوت المبلول مش عارف تعمل ايه لحد ما عملت مجنون
ايوب: اه ماتفكرنيش
انجي: يلا يا حبيبي نغني الأغنية
ايوب بيقول معاها في صوت واحد:
الدنيا بتشتي واروح لستي
بيفوق من شروده وهو بيدمع:
تعمل لي فطيرة اكلها وانام ويا الحمام
بيكمل وهو بيبتسم:.
يا مطرة رُخي رخُي علي قرعة ابن اختي ههه انتِ وحشتيني اووي يا انجي وحشتــــــــــــــــيني
بيسمع انغام الأغنية اللي بتحبها انجي بيبُص وراه بيلاقي واحدة نفس جسم انجي وشعرها الطويل والفُستان الأحمر
بيقوم بسرعة وبيجري وراها وبيكون مركز معاها وبيعدي الطريق من غير ما يبُص علي العربيات
وفجأة صوت عربية بتفرمل وحد بيتخبط
بيقع عالأرض وثواني والدنيا بتسود واخر صورة شافها بتكون ذات الرداء الأحمر
♕ـــــــــــــــــــــــــــــــــــــــــــــــــــــ♕
بيدخل موسي البيت وامه زينات قاعدة مستنياه
بيقرب منها وبيبوس علي راسها فبتشده لحضنها فبيتفتح في العياط زي الطفل الصغير
زينات: اهدي يا حبيبي هيلاقوه بأمر الله بس انت قول يارب
موسي بيقعد تحت رجليها وبيريح دماغه علي رجليها:
تعبت ياأمي بسعي في الدنيا بايدي وسناني ومافيش فايدة كأنك يا ابو زيد ما غزيت
زينات: اصبر يا حبيبي ربنا بيحبك عشان بيبتليك وبيختبرك عاوزك علطول فاكره وتدعيه
موسي بيقوم يقف:
انا داخل ارتاح
زينات: والنبي يا موسي ما تشيل في نفسك ولا تنام زعلان وارمي حمولك علي اللي لا بيغفل ولا ينام
بيهز راسه وبيدخل اوضته وبينام علي السرير وبيحاول يسكن دماغه من التفكير في اي شئ
بقلم حنين عادل كاتبة الجيل
♕ــــــــــــــــــــــــــــــــــــــــــــــــــــــــــــ♕
بيفتح ايوب عينيه وبيبُص حواليه بيلاقيه في مستشفي والكل باين عليه القلق وايده متجبسة
ابوه سعد قاعد وساند راسه عالعكاز وامه رشا قاعدة جمب السرير ونورهان واقفة في الجمب التاني
سامح: حمد الله علي سلامتك يا بوس
ايوب: ايه اللي حصل لي؟!
بترد رشا: قدر ولطف يابني والحمد لله ان سامح كان قريب منك وجابك المستشفى ربنا عالم بحالنا
سعد: ايه اللي وداك الأماكن الزفت دي تاني يا ايوب
ايوب: بابا انا…….
بيقاطعه سعد: انت عاوز تموتني عاوز تحرق قلبي عليك ليه يابني بتعمل فيا كده لييه
نورهان بتجري عليه: اهدي يا عمي اهدي
بيطلع بخاخة وبيحُطها في بوقه: قولي كنت بتجري وانت بتعدي الطريق ليه
ايوب: اصل شوفت… شوفت انجي
سعد: لا ده انت اتجننت فعلا
نورهان بتتنهد….
سامح: اهدي يا سعد باشا انا عندي الحل لمشكلة ايوب باشا
سعد: وايه هو الحل!
سامح بابتسامة: الحل هو……
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية شيزوفرينيا أحاسيس)
