رواية شمس الأقدار الفصل الخامس 5 بقلم دودو
رواية شمس الأقدار الجزء الخامس
رواية شمس الأقدار البارت الخامس
رواية شمس الأقدار الحلقة الخامسة
( قد أبتعد عنك قليلًا لتشعر بألمي وحزني، لكنّك حتمًا لا تعلم كيف أقضي وقتي دونك، أنا أتنفسك عشقًا )
حطت صحن الفواكه في الدار وفتحت اللابتوب ع فيلم تحبه .. وكاستين عصير رمان ورتبت القعدة مع صحن فوشار ومشقشقات ..
وقعدت تشوف لنفسها في المراية باعجاب .. عدلت من شعرها وحطت شوية لمسات ع وجهها وابتسمت
وداعبت شعرها بحب: محلاني ياربي
كان قصي في البلكونا يدخن .. بعد كمل خش لغرفته ..
تفاجئ وابتسم: ماشا الله ماشا الله
حضنها وباس ع راسها: والله ماركزت عليك وانتي توتي في هذا كله !
شمس ابتسمت: هذا من الدخان الله يفكك منه
قصي وعيونه يلفو ع الغرفة كيف مرتبة وشموع مخلية الجو رومانسي: والله وطلعتي فالحة .. !
شهقت شمس وضرباته بالخفيف ع كتفه: شن قالولك غبية !
ضحك: خللي نسكر ضي الحوش ونجي
طلع قصي .. تنهدت براحة وشافت للمراية وابتسمت ..
خش سكر باب الدار وصفق ايديه: وريني شن عندك هي !
ابتسمت وفتحت اللاب وقعمزت: تعالا شوف
خدي صحن الفوشار وقعمز: علاش اخترتي هذا ؟
كان الفيلم ( White Fang )
تدور احداث هذا الفيلم عن رجل يسافر الي آلاسكا للبحت عن منجم الذهب فيقع في طريقه ذئب ينقذه ويصبح صديقه ..
شمس ابتسمت: لانك تحب الحيوانات اهما
قصي كلي فوشار: نحب الكلاب انا
شمس ضيقت عيونها: زي بعض
قصي حط الفوشار وخدي كاس العصير شربه في مرة: مش زي
شمس اضايقت وسكرت اللاب: مافهمتش جاي تتفرج والا جاي تاكل !
ضحك: انا والله ماعندي عليهم الافلام لكن نساير فيك
رفعت حاجبها وفتحت اللاب : واللي يساير هكي ؟
حط الصونية والكاس وربع ايديه: هآ شوفيني نتفرج ومركز .. ( شاف للاب ) لكن الكلب مليح اهوا
شمس زفرت بضيق: قلنا ذيب هذا
ضحك واتكى جنبها: خاطرك تربي ذيب ؟
شمس: برااا
ضحك: خلاص سكتت ها
كانت سهرتهم حلوة ومرتبة إلـى ..
قصي: باب الحوش انفتح ولاه !
شمس رفعت عيونها جيهة باب الدار: شكله !
ناض وقف وطلع من الدار ..
عدلت تقعميزتها ع حافة السرير .. وسمعت صوت خواته .. عقدت حواجبها
شمس تعصبت: واااك علاش هكي !
وقفت لبست روبها الخارجي .. وكانت بتبكي بس تمالكت نفسها ع خاطر قصي ..
قصي لوطة استغرب جيتهم: خيركم شن في ؟
رجوى حطت شنطتها: شي انور قاللنا نبي النت مشي قلناله ارفعنا نباتو غادي
قصي استغرب: تباتو ؟
رتاج خشت حطت تليفونها في الشحن: اي
قصي: وتخشو هكي من غير ماطقو ؟
رجوى: قلنا اكيدة راقدين ولاه !
قصي تنهد: اي راقدين
ركب وهوا متعصب .. وصل لداره تنهد وصنع ابتسامة بالغصب ..
فتح الباب .. لقاها تشبحله
شمس: شن في ؟
قصي ابتسم: مافي شي .. خواتي جو بغيرو جو بس
شمس: بدون اذن ؟ فرضاً كنا مقعمزين في الجنان ؟
قصي ارتبك وتلعثم لسانه وبدي يدور حول الدار ولبس تيشرت تاني وسروال: اكيدة طقو واحني كنا لاهيين في الفيلم ماسمعناهمش
شمس ضحكت بهزوة: اي صح كيف نفتحو الفيلم ونقوو الصوت ماتجيش
قصي شافلها بس هي بسرعة عدلت الروب ومشت للحمام ..
خبط ايده ع الشكماجة بتعصب: الزفت الاحرف
وهي في الحمام .. كانت واقفة ع اللاوندينو وتحاول تكتم غضبها وزعلها .. ليش توا تحديداً ؟
ليش يستقصدو مايخلوهمش بروحهم ويعيشو ليلتهم ؟
غسلت وجهها كويس وطلعت ..
لقت قصي رافع بطانيته الخفيفة ع كتفه ..
شمس لمت شعرها: اسم الله خيرك ؟
قصي ابتسم: شي قلت خللي نبات لوطة والبنات يركبو تاخدو راحتكم مع بعض
استغربت: مافهمتش كلامك ؟
قصي بهمس: عيب شن نبات معاك ونخليهم لوطة بروحهم ؟
شمس: خوك وين ؟
قصي: قاعد في سيارته البرا .. وقالولي بيروح وبيقعدو هما هنا
شمس: علاش قاعدين؟
قصي رفع حواجبها: خيرك شمس ؟
شمس تنهدت: شي ولا حاجة ( اصتنعت ابتسامة ) ركبو والا تبيني اناديهم ؟
قصي حس بانها اضايقت بس تجاهل: تو نقوللهم
شمس بعد رحبت بيهم ودخلتهم لغرفة المعيشة وفتحت الشاشة ع مسلسل ماتابعش فيه اصلاً .. وكان منتصف الليل حلّ ..
شمس: شن رايكم نديرو بيتزا !
رجوى فرحت: اي عادي نعاونك فيها
شمس ابتسمت: هي نوضو
( شمس .. شمس .. !! )
رتاج: راجلك ينادي
ضحكت شمس: راجلي صار مش خوك ؟
رتاج: مش خوي هذا .. هذا غاليا وغزالي
فرحت شمس بمحبة الاخت لخوها ..
ونزلت بحذر خوفاً من وجود سلفها في الحوش ..
قصي ضحك: تي تعالي مافي حد
نزلت لقاته مقعمز قدام الحوش ومعاه الكلب
شمس: اعوذ بالله منه
قصي يمسح عليه ويضحك: اسكتي راهو يفهمك والله مانقدر نحزك منه
شمس قعمزت وضمت ركبتيها ع درجة الجنان: صدقتك اي
قصي: شن الامور ؟
شمس اصتنعت ابتسامة: شوفني كيف فرحانة
قصي باعد عن الكلب: واضح اصلا .. شن بديري عشي !
في داخلها ( عارفاتك مش من بلاش )
شمس: بيتزا
قصي ضمها ليه: خير مااخترتي .. عندك علم احلا بيتزا انذوقها في حياتي اللي اديري فيها انتي !
شمس مش عارفة تحدد شعورها حالياً: اي
قصي تباعد: خيرك حسيتك زعلانة !
شمس وقفت: لالا خللي نلحق اندير البيتزا معاش وقت ليل
ابتسم: عادي اسهري وغيري جوك
شمس همست: اي ماورانا شي
قصي: قلتي حاجة ؟
شمس ابتسمت مجاملة: ابداً .. خللي نركب
ركبت تجري .. وبدت تحوس ع البيتزا هي وحماتها الكبيرة .. بس الصغيرة ماتعرف ادير حاجة غير تلمح كل مرة بحاجة .. وتستفز بتصرفاتها
حطت اخر طاجين في الصونية ..
رتاج: هاتي بنزل لخوتي
رجوى: قعمزي واهفتي تو شمس تنزل لقصي
رتاج فنصت فيها: مادخلكش انتي
شمس تنهدت بنفاذ صبر: خليها تنزل عادي مرات انور قاعد او حاجة
خدت الصونية رتاج ونزلت ..
وقعمزت رجوى وشمس في غرفة المعيشة ورتبو صفرتهم مع كيسان مشروب ..
رن تليفون شمس والمتصلة كانت والدتها ..
شمس استاذنت .. وردت ع المكالمة: كيف حالك ماما !
حنان: كيف حالك يابنتي وشن اخبارك !
شمس: الحمد لله بخير
حنان: لقيتك باعتيلي مسج وانشغلت عليك شن في!
شمس: بعته امبكري غير شوره النت ضعيف هذا وين وصلك .. !
حنان: اي قلت شن مسهرها لتوا ؟ وقصي عنده خدمة غدوا
شمس: معاي رجوى ورتاج درتلهم بيتزا ع العشي
حنان بهمس: بايتين عندك ؟
شمس: اي
حنان استغربت: باهي كويس تغيرو جو .. غير اسمعيني جاي عارفاتك كيف فرفاشة ع القضية والتعب وماتهنيش روحك .. راك قاعدة عروسة دلعي راجلك واهتمي بيه مش تخليه صبابطي زي قبل زي تالي
ضحكت شمس: حاضر
حنان تنهدت: خلاص امالا بري تعشي واركبي لراجلك
شمس: ءء ( بعدين تراجعت تخبرها الحق ) حاضر .. تصبحي ع خير
حنان: وانتي من اهله بالسلامة
سكرت الخط وتنهدت .. ورجعت لعشاها ..
رجوى: كيف بيرقد لوطة ؟ عيب والله ماتجي قاعدين عرسان !
شمس منهمكة في الاكل: شن بديريله هي سكر راسه
ضحكت رتاج: يضحك قصي
شمس ابتسمت ببلاهة وكملت اكل ..
رجوى: بري انزلي كلميه .. والا بننزل انا
شمس: مش ح يسمع الكلام صدقيني خلاص
سكرت راسها رجوى ونزلتله ..
ماطقتش 10 دقايق ركبت تجر اذيال الخيبة ..
رجوى: ماباش يسمع الكلام
رتاج ضحكت ..
شمس: تو ننزل انا بنجرب تاني غير وين خوك !
رجوى قعمزت وخدت طاستها تشرب: روّح انور .. وقصي قاعد في الصالة لوطة
شمس حركت راسها بالايجاب ونزلت ..
شمس بصوت واطي بعد بدلت بيجامتها الوردية: قصي .. وينك !
قصي بصوت واضح: هنا تعالي
جت بالشويا وطبست ..
ضحك: خشي
خشت ولاقاته متلحف بالبطانية وشاد تليفونه: شن في ؟
شمس: عيب قصي شن نرقد بروحي وانا قاعدة عروسة ماطقيتش شهر ؟
قصي: خلاص عاد حبيبي .. الليلة بس
شمس عقدت حواجبها: يعني انت عندك عادي ؟
قصي: مش عندي عادي لكن بنخلي البنات بروحهم لوطة ؟
شمس: علاش انور ماقعدش معاهم ؟
قصي: جاي ع خاطر النت هوا وروّح
شمس اضايقت: براحتك .. ( عطت بظهرها ومشت وبعدين تلفتت ) راني زعلت
ايتسم قصي وغمزلها: نعرف نراضيك
ركبت للبنات .. وجهزتلهم مكانهم للنوم .. واتكت بحداهم ..
بعد خداهم النوم .. فاقت وخشت لدار النوم سكرت اللاب ورداته لمكانه .. وردت الفاكهة للثلاجة بعد حطتلهم منها مسبقاً ع العشي ..
وسكرت غرفتها بالمفتاح وتنهدت ..
ونزلت درجة درجة ..
لين وصلت للصالة ولقاته راقد ..
قعمزت ع حافة الفراش .. فاق بيها
صوته مليان نوم: حبي شن في ؟ خلعتيني ؟
ربعت رجليها: ماقدرتش نرقد
ضحك وجبدها جنبه وحضنها: عارف حتى انا ماقدرتش نرقد
شمس: اي بالدليل صوت تنخيطك لفوق واصل
ضحك وغمها بالبطانية: حسني صقعان
دفت البطانية وناضت قعمزت: تغطى كويس والله
ضحك: جااافة
شمس: بخبخني شويا
قصي مستمر في الضحك: تعرفي اللي عاجبني فيك .. دمك خفيف
شمس ضرباته بالخفيف ع راسه: واللي عاجبني فيك راسك المسكر .. تو هناك واحد يسيب عروسته ويبات هنا متغمر البطانية ؟
قصي يضحك: ناقص حنان
شمس: مبردك عاد ( وقفت ) برا ملح بنمشي فوق
قصي عدّل تقعميزته: تعالي نكملو السهرة في الجنان ؟
شمس: ع قيس الذبان وجميع انواع الحشرات يللي تقصف البرا .. وزيدك هالكلب يللي درته مشناه
قصي مدد ذراعيه يتكسل: الساعة كم توا ؟
شمس: الساعة 3 تصدق !
قصي: آوووه ( مسح ع وجهه ) معاش وقت غدوا عندي خدمة ومشية للسوق
شمس: سوق شني ؟
قصي باعد البطانية وخدي تليفونه ركبه في الشحن: سوق السيارات
شمس: بتشري سيارة ؟
تنهد: قولي ان شا الله
شمس ابتسمت: ربي يسخرلك الحال وتشري سيارة يللي في خاطرك
شافلها وابتسم محباً: وربس مايحرمني منك
جت بتمشي .. وقفها بكلامه: وين ماشية التالتة باللوز !
قامت المخدة وحذفتها عليه: مشناك
ناضت الصبح .. آشبه الليل مارقداته .. وجهزت الفطور .. فاقت بيها رجوى نزلت للحمام اللوطي وشطبت وركبت تعاون فيها ..
اما رتاج اصتبحت بالكلب ونزلتله تجري ..
رجوى: قصي ناض ؟
شمس: اي وفطر بكري وطلع
رجوى: سامحينا شمس هكي ضيقنا عليكم ماتوقعتاش يبات لوطة كان هذا والله مانباتو
ابتسمت شمس وقربت منها بحب: مادوري شي انتم وخياتي
تنهدت رجوى: ربي يخليك لينا وخيتي
شمس طبطبت ع كتفها: شن ماتبيش اديريلي شاهي ؟ نحبه الشاهي اللي اديري فيه خفيف ومنعنع يهبل
ابتسمت: من عيوني حاضر
رجوى كانت القريبة لشمس .. وتعامل فيها معاملة اخت وكانت شمس تعامل فيهم الزوز وخياتها .. واللي توده لهادي توده لهادي .. وماعمرها حست بروحها غريبة بينهم ..
ومرّت الايـام ..
وفي يوم مقعمزة شمس مع قصي تتغدا .. سمعت صوت كوثر تنادي ..
( شمس .. ياشمس ! )
وقفت تجري لجيهة السياج وطبست: نعم اللآي !
ضحك قصي وراها ويقلد فيها ..
كوثر: تعالي سلم بنيتي اشربي معانا قهوة لوطة
ابتسمت: حاضر هي
قصي يقلد فيها: حاضر اللآي ( يضحك ) ياعيون اللآها
تلفتت شمس وقعدت تجري جيهته تبي تحصل عليه ..
هرب منها علقت سوريته المغربية في مقبض الباب تشركت .. شهقت شمس
قصي يضحك: باهي هكي شركتيها ؟
شمس جت تتفحص فيها: حي تشركت حق
قصي: اشريلي غيرها مادخليش فيك
ضحكت: حاضر اعطيني حقها تو نشريلك
حوّلها وحطها ع جنب: حق مش عمتي حنان تخيّط ؟
شمس: اي !
لفها بايده ومدهالها: خلاص اعطيهالها تخيطهالي
شمس: علاش تو نخيطهالك انا !
قصي يضحك: ع اساس فالحة في الخياطة ! .. اعطيها لامك ماتلعبيليش فيها
ضحكت: حاضر
حطتها ع جنب ونزلت شربت قهوة مع عزوزتها وشبانيها في الجنان ..
شمس: يعني قداش يكلفني لو خدمت دولاب للغسالة من لوح MDF !
شبانيها طفى دخانه وتلفتلها: غالي يكلف ره
شمس: اي عارفة يعني في حدود كم !
كوثر: مش وقته خدمته توا وانتي قصي لا عنده سيارة ولا قدر يفصل شقته تبي تخدمي دولاب ! تي حتى غسالة ماعندكش !
انطفت شمس واصتنعت ابتسامة بالغصب: صح كلامك
كوثر: اشربي اشربي قهوتك وخلي عليك دوة الفيس
شمس ضحكت ببلاهة: لا مش قصة فيس .. انا هكي طبعي نحب نتخايل ونصمم وامتى ماتجيني الحاجة باهي
كوثر ضحكت ع جنب وحبت تغير الموضوع: اي قولي كيف حالها مرت خوك !
تنهدت شمس: باهية الحمد لله
كوثر: شفتها لما مشيتلكم الله يبارك عليها خاشة في العيلة وتقول ياعمتي وياعمتي
ابتسمت شمس: اي ماشا الله عليها وخية مش غير
كوثر شربت شويا من قهوتها: اي محلاها كلمة عمتي مانحبهاش كلمة اللآي انا
ابتسمت شمس: الله ! مش عارفة انا نحسها حلوة هكي ؟
كوثر حطت فنجان القهوة وشافت للقدام: شوف الطوبو غيره حطه في جدولة تانية !
قام عيونه صالح: اي باه
شبحت كوثر لشمس: احني سبرنا نقولو عمتي
شمس: اها
والتزمت الصمت ..
قصي ينوض فيها: حبيبي .. حبيبي ؟
فتحت عيونها بصعوبة وحوّلت اليرغان بالشويا: نعم ؟
قصي: خيرك راقدة توا ؟
شمس تكسلت: مريضة شويا
قعمز طرف السرير وشد ايديها: شن يوجع فيكً!
انحرجت وطبطبت ع ايده: بطني بس مادورش .. ماتشغلش بالك
قصي وقف حوّل سوريته: كيف ماندورش .. ندوش ونجيك ( رفع عيونه للمكيف ) كيف المكيف مفتوح بالك يزيدك ؟
شمس رفعت عيونها وواطتهم: لا عادي والله
قصي خدي حوايجه من الدولاب: شن تبيني نديرلك نخفف عليك ؟
شمس ابتسمت: تعرف تغلي نعناع ؟
قصي ابتسم وقرب منها: ياسّلام هادي وبس ! من عيوني
ابتسمت شمس: صحيت
ضحك قصي: غير تصحي انتي مانبي شي
تنهدت ودعت ربي
( يارب ماتحرمني منه ويدوم الحب بينا يارب )
حط الطاسة جنبها ونوضها بالشويا: ياعمري نوضي اشربي هي
قعمزت بالشويا وخدت الطاسة .. فكها منها بالشويا
قصي: لالا انا نشربك .. والله مرت قصي أميرة مش أميرة ملكة والله
ضحكت: تلخبط فيا !
قصي تلاشت ابتسامته: عيب عليك هذا اللي طلع معاك !
ضحكت وشدت ايده وباستها: ربي يخليك ليا
كوثر لقت قصي نازل ناداته: قصي وين ماشي ؟
قصي وقف وحط تليفونه في جيبه: بنجيب حاجة وجاي
كوثر: وينها شمس خيرها مانزلتش ؟
قصي تنهد: مريضة شويا
كوثر: شن فيها اللطف ؟
قصي شاف للدور الفوقي ورجع نظره لامه: والله مانعرف قالت بطني
كوثر خبطت ع صدرها: نهارك كان تطلع البنت حامل !
قصي استغرب ورفع كتافه: وين نعرف ؟
دفاته ع جنب: عاد انت وين بتعرف ؟ زي انت زي هي الزوز احرف من بعضكم !
حرك راسه بيأس من طباع امه وطلع ..
طقت ع باب الدار: شمس .. ياشمس نوضي
مسحت شمس ع وجهها ووقفت لبست روبها الخارجي الطويل وفتحت الباب ..
ابتسمت: نعم اللآي !
كوثر مشت لغرفة المعيشة: تعالي معاي
ركزت شمس في شبشبها اللي خاشة بيه للديار وزفرت بضيق وهمست
( ربي يهديها وتسيب هالعادة ! )
لحقتها للدار وقعمزت: نعم اللآي !
كوثر قدمت راسها: قاللي قصي مريضة ؟
شمس: اي تعبانة شويا
وواطت راسها خجلاً
كوثر بتمعن : شن فيك !
رفعت عيونها شمس: شي عادي بطني بس
كوثر: إمممم نحسابك حامل
شمس توسعو عيونها وتحشمت: لا
كوثر صفقت ايديها ع بعض: قاللي قصي قلت اكيد حامل .. عاد هداكا هوا كان بتحملي !
شمس حركت راسها بعدم فهم .. بس سكتت احتراماً ليها وفي ذات الوقت .. خوفها تلميحها بالحمل .. شن تقصد هل شمس تأخرت ؟ او في عيب ما ؟
فاتت سـاعة وشمس راقـدة ..
والمغرب ع وشك أذان ..
قصي خش للدار بهدوء ورفع اليرغان: حبيبي قاعدة راقدة !
شمس ماكانتش بالزبظ راقدة لانه تخمم في كلام كوثر .. بس خدتها غفوة نوعا ما وهي متعصبة ..
شمس: هممم !
ثني ركابه وابتسم في وجهها: عادي اديريلي صفرة قهوة ؟ الولاد برا زوز بس !
وقفت شمس من لخبطة هرمونات ع اعصاب .. فوق السرير وبدت تصيح: مش تشوف فيا مريضة ؟ حرام عليك اقسم بالله حرام
قصي مصدوم يشبحلها .. وسكت ماردش عليها
شمس حطت ايديها في نصها: ياربي مانقدرش نرتاح حتى مريضة ماحد يسخف عليك
قصي مازال في حالة صدمة .. طلع من الدار للكوجينا ..
سرعان ماحست بغلطها .. ولحقاته ..
شمس خدت من ايده البكرج: هات نديرها
قصي بتجاهل تام: بري ارقدي الغلط مني المفروض نحسك انتي مريضة
حضناته بحب: اسفة والله اسفة بس هكي هرومونات وجت الفشة فيك
ابتسم وتنهد: خلاص تكميلي الصفرة وكلميني !
غمزتله: من عيوني
بعد طلع قصي .. وخرت شعرها بايدها بتعصب ..
شمس: هما يستفزوني وانا نفش غلي فيه مسكين
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية شمس الأقدار)
