رواية سلوجن الفصل الثالث 3 بقلم روزان مصطفى

رواية سلوجن الفصل الثالث 3 بقلم روزان مصطفى

رواية سلوجن الجزء الثالث

رواية سلوجن البارت الثالث

رواية سلوجن الحلقة الثالثة

فجأة خبط باب الشقة.. بصت ملك لإيمي بقلق ف راحت إيمي فتحت الباب وهي بتبُص للطفل اللي واقف قُدامها
إيمي ببرود: أيوة؟
الطفل: دي وقعت منك يا طنط وإنتي تحت وندهت عليكي مسمعتنيش
خدت آيمي منه العلبة وقالت: أه تمام شُكراً يا عسل
قفلت إيمي الباب ورجعت تبُص لملك تاني وهي بتقول: أنا دلوقتي عاوزة أفهم حاجة، إيه علاقتك بشريف فكراه بيحبك يا ملك؟
قعدت ملك على الكنبة وهي بترجع خُصلات شعرها لورا وقالت: مش بحس إنه بيحبني.. مش بحس ب كدا، بس أنا معاه عشان خايفة
قعدت إيمي جنبها وقالت بوضوح: خايفة من إيه؟ هو إنتي اللي دخلتي نفسك في الحوارات دي من الأول وفضولك ساقك
بصتلها ملك بتعب وقالت: مكونتش أنا بس.. اللي فضولي ساقني
* فلاااش باك. من ثلاث سنوات
المكان: غُرفة ملك
التوقيت: مُنتصف الليل

مسكت فونها وفتحت بوست على جروب بنات على فيس بوك، كتبت فيه ” لو حد أخد كمية برشام مُطهر معوي.. كبيرة نوعاً ما على سبيل الخنقة لكن ندمان.. يتصرف إزاي؟ ”
فات خمس دقايق والبوست إبتدى يتعمل عليه ريأكتات واو من الصدمة وبدأت الكومنتات من البنات يجاوبوها
البنت الأولى ( تقصُدي إنتحار! لازم تطلع على أقرب مُستشفى يتعملها غسيل معدة كدا هيحصلها تسمم من الدوا)
البنت التانية ( غسيل معدة طبعًاا إلحقوها)
بدأت ملك تهز في رجليها بتوتُر وخُصلات شعرها لازقين في بعض من مياه الرغاوي اللي بتطلعها من بوقها كُل شوية، عمالة تمسح بوقها بالمنديل وتضُم رجلها لجسمها وهي بتترعش وبتعيط
عملت ملك تعديل للبوست وكتبت ” طب ولو مينفعش الموضوع يوصل للمُستشفى؟ ”
فات وقت لحد ما ردت بنت وكتبت ( تروح لأقرب صيدلية تجيب فحم إسود وتطحنُه وتدوبه في مياه وتشربه لحد ما ترجع كُل اللي في بطنها ولو مش هتقدر تروح الصيدلية تشرب مياه بملح بس لاازم مُستشفى برضو دي حلول مؤقتة)
بصت ملك لخُصلات شعرها اللي مرمية على السرير اللي هي لسه قصاها
قامت وجسمها كُله عرقان وإتحركت ناحية غُرفة مامتها
والدتها كانت نايمة في الضلمة ف بهدوء ملك صحتها وهي بتقول: ماما إلحقيني
والدتها بنُعاس: حصل حاجة ولا إيه
ملك بتعب وخلاص بتطلع في الروح: ماما أنا خدت دوا..
والدتها بعدم إستيعاب ونُعاس: ممم

ملك: خدت دوا بكمية كبيرة وتعبانة برجع رغاوي
واتها ضربتها بقلم خفيف على وشها وهي بتقول: لييه عملتي كدا
ملك رجعت لورا بتعب وقالت: م ماشي مش وقته.. ساعديني
قامت والدتها وقعدت على السرير وهي بتقول: يا غُلبك في بنتك يا غُلبك
بعد مرور نصف ساعة كانت ملك قاعدة على الكنبة دايخة ووالدتها بتلبس الصندل وبتكلم أخوها اللي هو خال ملك وبتقول: معرفش.. معرفش إزاي تعمل كدا إتجننت، أنا لوحدي ومش عارفة أتصرف إزاي عاوزة أخُدها مركز السموم.. طب متتأخرش يخويا الله يرضى عنك
قفلت معاه وهي بتبُص لملك اللي في إيديها كوباية مياه مدوبة فيها ملح وقالت: إشربيها كُلها لحد ما أ، وح أقرب صيدلية أجيب الحجات اللي خالك قال عليها عشان إبنه دكتور وفاهم وعلى قد ما تقدري حاولي ترجعي
حركت ملك راسها بتعب ف نزلت مامتها جري وفضلت ملك الدُنيا بتروح وتيجي في عينيها
عن أي تماسُك تُحدثني؟ لوهلة فقدت المُتبقي من ذرة عقل بي حتى أنني بت لا أستطيع التفرقة بين الصواب والخطأ.. الحلال والحرام.. الذي يجوز والذي لا يجوز.. أهكذا إنتهت مسيرة المُنتحرين أم أنهُم كانوا في كامل قواهم العقلية! اللهم إغفر لي ف أنا لا أعلم لما أقدمت على فعل ذلك وإمنحني فُرصة أُخرى أكفر بها عن ذنبي هذا
جت والدتها أخيراً وهي ماسكة كيس من الصيدلية وبتقول: روحي يا ملك مددي على الكنبة الكبيرة وأنا جبتلك فحم إسود هطحنهولك في الهون وأدوبهولك في المياة
مددت ملك وجه خالها معاه عصاير طبيعية ومياه معدنية وعسل نحل.. وفضلت يومين كاملين تشرب الفحم الإسود المطحون وترجعه عشان تنظف معدتها من سموم الدوا.. بدون أكل أو شيء
بعد ما تعافت ملك قررت تعزم صديقتها إيمي عندها عشان هتاكُل وأخيراً للمرة الأولى بعد حادثة تسمُم الدوا
جت إيمي وقعدت معاها وهي بتبُصلها بحُب وحُزن بعدها قالت: إيه اللي وصلك للحالة دي يا ملك!؟ إزاي تهون عليكي نفسك كدا؟
سندت ملك راسها على إيديها وقالت بصوت مبحوح: بلاش نتكلم في الموضوع دا أنا حقيقي ندمانة جداً ومكونتش في وعيي خالص.. أكيد مقصدتش أغضب ربنا مني ودي مش هتتكرر حتى لو كان فيا إيه
حطت إيمي شنطتها جنبها وهي بتقرب من ملك وبتقول: دا كلام جميل مبسوطة إني بسمعه منك ويثبتلي فعلاً إنك صاحبتي العاقلة.. بس برضو عاوزة أعرف إيه اللي وصلك لكدا
بصتلها ملك بتعب وكانت جابت أخرها وبعدها قالت بهدوء: توعديني إن اللي هحكيهولك دا يفضل بيني وبينك؟
إيمي بترقُب: أوعدك.. إحكي!
خدت ملك نفس عميق وقالت: لما إتعرفت على ماجد كان مُجرد بوستات على السوشيال عن الحادثة بتاعتُه.. أيامها كان هو في غيبوبة من الخبطة الشديدة بتاعة راسُه.. وقتها كان في ناس بتفتري على ماجد بسبب موت الشاب اللي معاه.. بتفتري عليه هو وشريف وبيقولوا إنهم كانوا متخانقين معاه سوشيال إتسببوا في موته
فتحت إيمي بوقها وقالت بصدمة: إيه الهبل دا! دي قدريات
ملك بتنهيدة: ما هو عشان الكلام الأهبل اللي قالوه دا الظابط فتح تحقيق، خصوصاً إنهُم كانوا أخر ناس إتشافوا مع المتوفي.. وكمان البنت اللي إنت__حرت.. ماجد كان أخر واحد متخانق معاها في الشات وكانت منزلة سكرينات وقفلت في نفس سنة الحثة سوشيال ومرجعتش تاني.. بعدها إكتشفنا إنها إنتح__رت
المُشكلة إن..

إيمي بتشجيع ليها إنها تكمل: المُشكلة إيه إنطقي!
ملك بعيون حمرا من الدموع: المُشكلة إن ماجد كلمني قبل ما أدخُل التحقيق قالي عاوزك تنكري أي حاجة وتعملي نفسك هبلة، ودا خوفني منه أوي يا إيمي.. كُنت بحبه بقيت أشوفه إنسان غامض وراه حكايات مكونتش أعرف عنها حاجة، وكان هيتقفل علينا باب كُنت هبقى مراته.. فجأة كدا سابني في نُس الطريق وراح خطب سلمى.
إيمي بخوف عليها: وبتعملي إيه مع شريف هفضل أسألك لحد ما ينشف ريقي، خرجي نفسك من دايرتهم يا ملك أنا خايفة عليكي الكلام اللي قولتيه دا صعب وخطر عليكي.. عشان خاطري يا ملك كفاية اللي عانيتيه بسببهُم
رفعت ملك أكتافها وقالت: أنا بحاول أخرج نفسي بلاقيهم حصروني وسطهم تاني.. زي ما يكون مش من حقي أروح منهُم بعيد المُهم أفضل في دايرتهم
مسحت ملك دموعها ووشها وقالت: يعني المفروض إنتي جاية تروقيني وتنعشي قلبي من الحُزن جيتي تزودي عليا
طبطبت إيمي على ظهرها وهي بتقول: مش المقصد والله يا ملوك، بس أنا أختك وبحبك وبخاف عليكي وعارفة إنك غلبانة مش قدهم، خلاص طيب تحبي نتفرج على فيلم لذيذ يفرفشنا؟
ملك وهي بترجع شعرها لورا: ماشي بس هدخُل أخُد شاور عشان أفوق وإنتي جهزي الفيلم وإكلُبي لينا حاجة ناكُلها
دخلت ملك الحمام وكالعادة ظبطت المياه على درجة الحاراة فوق المُحتملة بشوية.. ونزلت تحتها وهي بتغمض عينيها وبترجع شعرها لورا..
وبتفتكر.. وكأن الذكريات عششت زي العنكبوت داخل نسيج عقلها
مبتسيبهاش لوحدها ولو للحظة..
* فلاش باك
العام: صيف ٢٠١٩
المكان: بحر مياهه صافية
جه ماجد قعد جنب ملك وهو بيفتح إيده وبيحُط قواقع شكلها حلو قُدامها
ملك بسعادة وهي بتفحصهُم بإيديها: الله شكلهم وألوانهُم تُحفة
مدد ماجد بظهره على الرمل وهو بيقول: دا الجو اللي أنا بحبه تماماً، الصيف.. الرزق فيه ماشي والمياه نزولها مسموح مش ثلج

سندت ملك على كوعها وهي بتبُصله وهو نايم على ظهره وبتقول: طب ولو حبيبتك مش بتحب الصيف تعمل إيه بقى؟
إتعدل ماجد وهو بيبُص لوشها وبيقول: حبيبتي مُحافظتها مفيهاش بحر ف هتحب الصيف إزاي، بس ولا يهمك هعملك أحلى شهر عسل في الساحل وهروق عليكي هنزلك المياه بعباية إيه رأيك
ضحكت ملك وهي بتقول: وجاي على نفسك كدا ليه؟
تنح ماجد فيها وقال بنظرتُه المُعتادة: عشان أنا مبحبش حد يشوفك غيري يا ملك
إتكسفت وهربت بنظراتها منه ف مسك دقنها وخلاها تبُصله وقال: هو إنتي ليه وإحنا بنتخانق قولتيلي أنا خايفة منك!
بلعت ملك ريقها وقالت بنظرات مُرتجفة: عشان.. عشان بحسك مخبي عليا حجات.. يعني
ماجد بمُقاطعة وكأن عينيه أظلمت: أهاا.. لا مبخبيش أنا صريح معاكي.. إقلعي الصندل بتاعك كدا جربي تمشي على الرمل المبلول حافية
ملك برفض: لا رجلي هتتوسخ.. بعدين فوق إني مبحبش الصيف أنا بخاف من البحر والمياه
ماجد بنبرة غريبة وكإن نصف إبتسامة غريبة ظهرت على طرف شفايفُه: بتخافي من المياه ليه؟ :))

*الوقت الحالي
تك تك تك تك
هااااه
فاقت ملك من افكارها على شهقة وهي بتحاول تاخُد نفسها تحت المياه لكنها بتعحز عشان مخنوقة..
إيمي من برا: إيه كُل البُخار اللي خارج من الحمام دا!! ملك إنتي بخير؟!
قفلت ملك المياه وهي بتكُح بهستيريا وبتقول بصوت مخنوق: بخير، هلف نفسي بالفوطة وطالعة
إيمي: طب إطلعي بسُرعة عشان..

يتبع…

لقراءة الفصل التالي : اضغط هنا

الرواية كاملة اضغط على : (رواية سلوجن)