رواية سلف ودين الفصل الرابع 4 بقلم لولو محمد
رواية سلف ودين الجزء الرابع
رواية سلف ودين البارت الرابع
رواية سلف ودين الحلقة الرابعة
على / بس انا كنت شاطر على فكره تعرف انا بشتغل من يوم ما سبتك بصرف على نفسى و على اختك كنت بشتغل فى المحل ده من ايام مكان بتاع فول و طعميه بس تعرف جيت للحج انور و قولتله انا عاوز شغل ادانى فلوس قولتله انا ما بشحتش انا عاوز شغل و سبتله الفلوس و مشيت ندالى و قالى هشغلك عشان انت راجل و بقالى تمن سنين معاه اهو
عمر / كويس
على / جدا تعرف يا عمر انا اول ما جيت هنا كنت بشتغل فى المطبخ اغسل الصحون انضف اقطع اغسل الخضار اى حاجه ما كنتش بقول لا كنت بطلع من المدرسه اروح اختك و اجى على هنا اغير هدومى فى الحمام و اعينهم و اشتغل و لما يبقى الشغل خفيف اطلع الواجب اعمله حاجه ازاكرها انا مش خايب على فكره بس انت ان شاء الله هتبقى احسن منى و هتكمل و هتبقى حاجه كبيره انت نفسك تبقى دكتور صح
عمر / مهندس انا علمى رياضه
على / احسن والله خمس سنين زى الفل لحسن سبعه كتير اوى ههههههههههههههه و تعرف كمان ممكن تبقى دكتور فى الهندسه لكن عمرك شوفت مهندس فى الطب هههههههههههههه
عمر يبتسم
على / انت واحشنى اوى يا عمر
على يحضن عمر اوى و عمر مش بيحضنه
…………………….
على / اوعى تفتكر انى سبتك بمزاجى انا ما سبتكش بمزاجى يا عمر لو عليا ما كنتش فارقتك لحظه واحده بس
عمر يهز راسه
على / بقولك ايه احنا هنقضى الليل كلو رغى و لا ايه نام و ارتاح نام عشان الصبح تروح تشوف دروسك و كدا عارف انا محوش قرشين خدهم اشترى الحاجات اللى نقصاك الكتب و كدا و مصاريف الدروس و لو ما كفوش ما تشيلش هم اصلا كلها كام يوم على اول الشهر و هقبض و لو احتجت حاجه قولى هتصرف ما تشيلش انت بس هم ما تشيلش هم اى حاجه ماشى
عمر يهز راسه و ينام على الكرتونه و على يغطيه كويس و يبص عليه و هو فرحان
على / تصبح على خير
……………………
تانى يوم عمر يصحى على صوت على و هو بيرص الترابيزات تانى
على / صحيتك انا اسف كنت برص الحاجه مكانها عشان كلها ساعه و يفتحوا قوم خش الحمام من هنا اغسل وشك و ظبط نفسك و لو عوزت غيار فى فى الشنطه السمره اللى فى المطبخ طقم نضيف خده هيجى مقاسك ان شاء الله
عمر / لا انا هغسل وشى بس
عمر يدخل الحمام و على يكمل تظبيط و لما عمر يدخل على يديله فلوس ملفوفه فى كيس اسود
عمر / ايه ده
على / اقسم بالله دا كل اللى معايا شوف اللى ناقصك و كمله
عمر / انا مش هقدر اخد الفلوس دى انا هشتغل
على / اشتغل لما تتخرج اشتغل فى الاجازه بس دلوقت زاكر زاكر عشان تبقى احسن منى زاكر عشان نفسك ما حدش هينفعك
عمر يبصله
على / انت زعلان منى صح كلام بابا عنى واضح فى عنيك ليك حق ما انت ما شوفتش حاجه بتحكم عنى سماعى بتحكم
عمر / انا ما بحكمش عليك انا بس مش عاوز
على / روح الدروس و اشترى حاجات جديده زاكر فاضل قد ايه على الامتحانات ما تضيعش تعبك .. بص اعتبرهم سلف و لما ربنا يكرمك و تبقى مهندس قد الدنيا ابقى ادهملى و لا ساعتها بقى هتتكبر علينا و ما حدش هيعرف يكلمك
عمر يبصله
على / جعان اجيبلك تفطر
باب المحل يتفتح و يدخل مجموعه شباب على يحط الكيس فايد عمر و يتبت عليه جامد
على / صباحوا يا رجاله اخباركوا
احمد / مزاجك يا على
على / اخويا معايا يا جدع هو فى احلى من كدا انا هعمل شاى مين عاوز
احمد / طب يلا عشان زمان الزباين جايه
على يبص لعمر
على / اعمل زى ما قولتلك صباح الفل
////////////////////////
عمر يتنهد و يشرب شويه ميه
غاده/ كنت بتعامله كدا ليه
عمر / سؤال صعب اوى
غاده / بس انت عندك اجابه صح
عمر/ عندى مفيش حاجه ندمان عليها فى حياتى قد الاجابه دى
غاده / خلاص ما تقولهاش
عمر / انا لما على رجعنى لبابا و مشى قعدت فى الاوضه اعيط حسيت انى وحيد بابا دخل عليا و شايل أية قالى انت زعلان ليه اللى يبيعك بيعه و اشترى اللى شاريك و قالى أية اختك الصغيره عمرها ما هتبيعك قالى ان على وحش و رمانى قالى كلام كتير و الاسوء يوم موت عبير يوميها صرخ فيا قدامه و قالى بالحرف الكلب ده قتل اختك لو في يوم من الايام حطيت ايدك فى ايد الكلب ده انسى ان ابوك عايش
غاده / عشان كدا والدك مش راضى يسامحك عشان حطيت ايدك فى ايد على
عمر / انا شلت ايدى من ايده من زمان اوى من قبل موت عبير بكتير كان بيجيلى المدرسه كتير كنت بسيبه و امشى فى مره جرى ورايا قولتله يبعد و انى مش عاوز اشوفه تانى
غاده / عشان كدا كان فرحان اوى لما روحتله
عمر / الحمد لله انى روحتله الحمد لله ان ما كانش عندى مكان تانى اروحه الحمد لله انى سمعته على عاش عمره كله عشان غيره عمره ما اتمنى حاجه لنفسه … ماعدا ندى
غاده / دى اللى بيقعد معاها فى الكليه
عمر / اه امبارح راح لبابا عشان يجى معاه يخطبها طردنا
عمر يبتسم ابتسامه مكسوره و الاسوء ان على دفع كل الفلوس اللى معاه فى عمليه بابا و الاسوء ان بابا مش عارف
غاده / اكيد كل ده مش هيروح هدر
عمر / الوقت سرقنا و لا ايه يادوب ارجع الكليه عشان السيكشن
عمر يشاور للوايتر يجيبله الريسيت
…………………………..
فى البيت عند مصطفى
مصطفى / يعنى دا رايك الاخير يا ندى
ندى / يا بابا حسام دا زى اخويا و انا عمرى ما شوفته اكتر من كدا و بصراحه ما كنتش متخيله ابدا انه يتقدملى دا الفرق بينى و بينه فوق العشر سنين
مصطفى / على العموم انا مش هرد عليه دلوقت فكرى و صلى استخاره و شوفى
ندى / لا ياريت حضرتك ترد عليه عشان انا ما بحبش حسام و مش هتجوزه عن اذنكوا انا ورايا مزاكره
ندى تقوم
مها / قولتلك مش هتوافق
مصطفى يبصلها و يرفع حاجبه
مها / يا راجل البت بتقولك فرق السن عشر سنين هى عاوزه حاجه كدا فحدود اربعه و معاها فى الكليه و ساكن قصادنا و اسمه عمر ههههههههههههههههه
مصطفى / نقطينى بسكاتك
مها / يا راجل اصبر على البت اهو على الاقل تخلص دراستها
مصطفى / انا هديها فرصه تفكر و انتى ابقى جسى نبضها تانى و حاولى تعرفى منها حكايه عمر عشان نعرف راسنا من رجلينا
مها / متشلش هم
………………………..
فى القهوه
مصطفى / جرا ايه يا انور بقالك ساعه عمال تجيب و تودى و مش فاهم منك حاجه
انور / بقولك ايه من الاخر كدا انا هجيب ابنى بكره نشرب معاك الشاى فوق
مصطفى / ابنك !!! قصدك على الدكتور عمر و اخوه
انور / عليك نور انا باذن الله هاجى انا و هما و نطلب ايد بنتك ندى لابنى الكبير قولت ايه
مصطفى / قولت انك بصراحه يعنى الحقيقه فاجاتنى و انا لازم اخد راى البنت
انور / و ماله احنا نيجى و ندخل البيت من بابه و نتقدم و انتوا عليكوا الباقى
مصطفى / على العموم تنوروا هستناكوا بكره بعد العشا
انور / على بركه الله
………………….
فى البيت عند ندى ندى قاعده بتزاكر تجيلها رساله
ندى / هشوفك بكره على فكره … انت نسيت و لا ايه معنديش بكره كليه و هنروح نزور عمو محمد يعنى كمان مفيش شاورما
ثوانى و توصلها رساله تانيه
ندى / بتعرفى تعملى شاى !!! …. مالك يا على فيك ايه
ندى تروح تقف فى الشباك تلاقى على واقف فى البلكونه يشوفها يبتسم و يكتب رساله
ندى / انا جاى اشرب الشاى مع بابا بكره هاه بتعرفى تعمليه و لا هتكسفينا
ندى تنكسف و تحط ايدها على بقها و تقفل الشباك و تدخل تطلع الصاله تلاقى باباها و مامتها بيتودودوا يشوفوها يسكتوا
ندى / فى حاجه
مها / لا يا حبيبتى ايه جوعتى احطلك تتعشى
ندى / لا شكرا انا بس قولت امشى رجلى عن اذنكوا
مصطفى / ندى
ندى / ايوه يا بابا
مصطفى / فكرتى فى موضوع حسام
البسمه تروح من وش ندى
ندى / يا بابا انا اديتلك راى بتفتح الموضوع ده تانى ليه
مصطفى / بطمن خلاص اتفضلى خشى
ندى تدخل
مها / انا قولتلك
مصطفى / طب انتى مش كنتى وعدتى امانى انك هتتغدى عندهم بكره
مها / هتصل بيها دلوقت اعتزرلها
مصطفى / شوفى و ردى عليا لو كدا روحيلها انتى و سيبى ندى معايا نقابل الضيوف
مها / لا والله ما يحصل
مصطفى / مها
مها / يووووه سيبها لله هكلمها و نشوف
…………………………..
فى بيت حسام تانى يوم
حسام بيلبس و يتانتك ست تدخل عليه
الست / على فين كدا
حسام / نازل اشترى حاجه كدا
الست / ابقى عدى على اختك هاتها و انت جاى
حسام / و جوزها ما يجبهاش ليه
الست / جوزها مش جاى عنده شغل فهاتها انت و لا اقولها تركب تاكس
حسام / بالراحه طيب يا ست الكل بس انا اصلى كنت ناوى اعدى اجيب عمى
الست / عمك مش جاى
حسام / ايه ؟؟
الست / عمك مش جاى جايلهم ضيوف
حسام / ضيوف مين دول
الست / ما اعرفش ما انت عارف مرات عمك الكلمه بتطلع منها بكماشه
حسام / على كدا العزومه دى صفصفت علينا
الست / انا طبخت اللى مش هياكل هو الخسران عادى يعنى
حسام / ماشى انا نازل و هعدى على اختى اجيبها و انا جاى
الست / ماشى ابقى رنلى و انتوا فى الطريق
حسام / حاضر
…………………………………
فى شقه محمود
محمود يدى سمر ورق
سمر / انت متاكد من قرارك ده
محمود/ و الا ما كنتش عملته
سمر / على العموم اطمن باب البيت هيفضل مفتوح لهم لو احتاجوا اى حاجه
محمود يبصلها
سمر / يخيبنى انا بقول ايه يديك طوله العمر
محمود / اعمليلى قهوه
سمر / ما بلاش
محمود / مصدع يا سمر
سمر / اللى تشوفه
……………………………
فى مصلحه حكوميه مصطفى شغال حسام يخبط على الباب
مصطفى / اهلا يا حسام
مصطفى يبص لزميله فى الشغل
مصطفى / حسام ده ابنى البكرى صيدلى قد الدنيا تعال يا بنى اقعد اقعد
الراجل / ربنا يخلى يا استاذ مصطفى
حسام / انا كنت عاوزك فى موضوع كدا لو فاضى
مصطفى / يا خبر لو مش فاضى افضالك تعال تعال
الراجل / خليكوا خليكوا انا هعدى على مدام اخلاص اختم الورق ده خدوا راحتكوا
مصطفى / تعيش يا سيد
سيد يمشى
حسام / انا كنت جايلك عشان اعرف لو فى جديد فى موضوع ندى
مصطفى / والله يابنى انت عارف ان الحاجات دى قسمه و نصيب
حسام / سالتها
مصطفى / قالت انك زى اخوها و بعدين انت عارف انى مقرر انى ما اجبرش ندى على اى حاجه فى حياتها دى بنتى الوحيده و كلو الا دى يا بنى انت فاهم
حسام يمسك موبايله
حسام / و ياترى قالتلك اى سبب تانى للرفض غير اننا اخوات يعنى قالتلك ليه رفضت غير انى اخوها
مصطفى / مش فاهم تقصد ايه
حسام / هو حضرتك عارف صحاب ندى فى الكليه
مصطفى / حسام
حسام / انا روحت لندى مره الكليه و لما كلمتها قالتلى انها فى المحاضره
مصطفى / و فيها ايه
حسام يدى لعمه الموبايل بصوره على و ندى ماسكين ايد بعض
حسام / انها مكنتش فى المحاضره كانت مع الواد بتاع الشاورما
مصطفى ساكت
حسام / سبحان الله نفس الواد اللى انا شوفتها بتهزر معاه فى الشارع
مصطفى / انت اللى صورت الصوره دى
حسام / و محدش شافها غيرى ندى برده بنت عمى و سمعتها تهمنى و الا ما كنتش استعجلت و اتقدمت
مصطفى يبص لحسام
مصطفى / انا متاكد ان ندى …
حسام / ندى صغيره و فى سن خطر و ابن الكلب ده بيلعب عليها
مصطفى / ندى ما تعملش حاجه من ورايا ابدا ندى ما تعملش كدا ابدا
حسام / يمكن اتقابلوا صدفه بس ايه اللى يخليها تكدب عليا و هى معاه و تقولى انها فى المحاضره ايه اللى يخليها تسمحله يمسك ايدها بالشكل ده دا مروان ما مسكش ايد نور الا بعد كتب الكتاب و ندى ما تقلش عن نور فى غلاوتها و مش هسمح لواد زى ده يضحك عليها
مصطفى يقوم و يمشى و هو خارج يخبط فى سيد داخل
سيد / ايه يا استاذ مصطفى مستعجل ليه
مصطفى ما يردش و يمشى حسام يطبطب على كتف سيد بابتسامه و يمشى ورا عمه
……………………..
فى المحل
انور / يا على انت يا بنى
على يروح لانور
انور / هو انا هتحايل عليك يابنى سيب الشغل لاحمد النهرده و اطلع على الحلاق ظبط كدا و روش
على / كنت هخلص و اروح
انور / يابنى ما تضمنش الظروف الحلاق زحمه قافل الاحتياط واجب دا انت كان المفروض تحلق من امبارح
على / انت شايف كدا
انور / يلا اجرى ما اشوفكش الا و انت على سنجه عشره
على / تمام هطلع اغير و امشى
……………………………….
قدام بيت مصطفى
حسام يركن العربيه مصطفى يجى ينزل حسام يمسك ايده
حسام / بالراحه دى مش غلطتها
مصطفى يبصله و ينزل حسام يطلع بالعربيه مصطفى يدخل بيته
مها / مين … فى ايه يا مصطفى جيت بدرى ليه
مصطفى / ندى فين
مها / فى اوضتها بتزاكر
مصطفى يمشى و يدخل على ندى فى اوضتها مها تبص باستغراب و تدخل وراه
ندى / فى حاجه يا بابا
مصطفى / ورينى موبايلك
ندى / اتفضل
مصطفى / خلى ده معاكى يا مها
مصطفى يدى الموبايل لمها و يزقها بره الاوضه و يقفل الباب بالمفتاح
ندى / فى ايه يا بابا
مصطفى / عمرك طلبتى منى حاجه و انا قولتلك لا
ندى / لا
مصطفى / النهرده هطلب منك انك تكونى صريحه معايا
ندى / هو فى ايه يا بابا
مصطفى يورى ندى الصوره
مصطفى / انتى ايه علاقتك بالواد ده
ندى / بنحب بعض
مصطفى يضرب ندى بالقلم على وشها يوقعها فى الارض و يمسكها من شعرها و يشدها عليه و هى بتصرخ و يحط الموبيل قدامها تانى
مصطفى / هسال تانى ايه علاقتك بالواد ده
ندى و هى بتعيط على اخرها
ندى/ بنحب بعض
مصطفى يزقها فى الارض و يقلع الحزام و ينزل فيها ضرب و هى بتصرخ و مها ترزع على الباب
مصطفى / لاخر مره هسالك ايه علاقتك بابن الكلب ده
ندى تصرخ / بحبه بحبه بنحب بعض بحبه
مصطفى يحدف الحزام فى الارض و يبص على ندى فى الارض بتعيط من الوجع و يروح يفتح الباب و يدخل المطبخ مها تجرى وراه ندى تحاول تجرى بره باب الشقه
مها / فى ايه يا مصطفى
مصطفى يطلع من المطبخ و يلحق ندى قبل ما تطلع من باب الشقه يقفل الباب و يشدها على الارض و مها بتحاول تحوش
مصطفى / اما نشوف لما تبقى قرعه الكلب ده هيبص عليكى و لا لا اما نشوف
مها / اهدى يا مصطفى لا يا مصطفى البت يا مصطفى
ندى / بحبه لو ولعت فيا بحبه بحبه
مصطفى يرمى المقص و شعر ندى اللى قصه فى ايده فى الارض و ندى بتعيط و تصرخ و امها تحضنها مصطفى يمسك الموبايل
مصطفى / ايوه يا حسام انت لسه عاوز تتجوز ندى
ندى / لااااااا
مصطفى / كتب الكتاب و الدخله يوم الخميس خلص ورقك عشان تاخدها معاك
مها / ممكن حد يفهمنى فى ايه فهمونى يا ناس فى ايه
مصطفى يشد ندى من هدومها و يدخلها اوضته و يقفل عليها الباب و الموبيل يقع منه
مصطفى / بنتك ماشيه مع الكلب اللى اسمه على
مها / مستحيل
مصطفى / البت دى ما تخرجش من الاوضه ما تشوفش الشارع ما تكلمش حد لحد ما جوزها ياخدها عليا الطلاق يا مها لو كلامى ما اتسمعش لا انتى و لا هى هتلزمونى فى حياتى تانى انتى فاهمه
مها / اهدى بس صحتك
مصطفى / دى اخرتها يا ندى دى اخرتها يا ندى
مصطفى يقعد فى الارض مها تحاول تهديه
مصطفى / شوفتيها و هى بتبجح فى وشى شوفتيها
مها / انزل لانور قوله خليه يرفده
مصطفى / و افضح نفسى بايدى فى الشارع خليهم يجوا و انا هحطهم فى مقامهم صح اصبرى عليا … موبايل مصطفى يرن
مصطفى / ناولينى الموبيل
مها تقوم تروح الصاله تلاقى الموبايل فى الارض تلم شعر بنتها و هى بتعيط تسمع زعيق مصطفى من جوه
مصطفى / الموبيل يا مها
مها تجرى عليه و تناوله الموبيل
مصطفى / ايوه يا محمد ازيك… انا كويس ….انا كويس يا اخى … هو لحق يقولك ههههههههههه …… لا هنا ايه المكان هنا ما ينفعش انا هقابلكوا على القهوه اللى على الناصيه عندكوا كمان ساعه …. لا اصل مها هتجيلها صحبتها فمش هتبقى فاضيه هى و ندى ….يا سيدى ابنك اللى مستعجل ههههههههههههههههه ….. سلام سلام
مصطفى يقفل
مها / انت هتعمل ايه يا مصطفى
مصطفى / هجوزها و اسفرها مع حسام بره لما هتبعد عن الواد ده هتنساه
مها / و ندى هتقبل
مصطفى / مش بمزاجها انا مش هسيب بنتى الوحيده لكلب زى ده يدحك عليها
مها/ ربنا يسهل ادينى المفتاح
مصطفى / انا حلفت يا مها
مها / هات المفتاح ما تتخافش انا قبل ما افتحلها هتصرف
مصطفى / انا هنزل عشان اشوف هعمل ايه
………………………….
فى الكليه عند عمر
عمر بيلم حاجته و خارج
غاده / اوصلك
عمر / مش فى سكتك للاسف
غاده / يا سيدى انا ورايا أية تعال
عمر / براحتك يلا
غاده و عمر يركبوا العربيه و هما خارجين من باب الكليه
غاده / قريبتك جت النهرده كمان
عمر / مين أية
غاده / اه
غاده تركن العربيه و عمر قاعد مكانه يبص الناحيه التانيه و ينفخ و أية تبص على العربيه
غاده / امشى ؟؟
…………………
عمر يفتح الباب و ينزل و يروحلها
عمر / انتى بتلعبى صح فكراها تسليه مش كدا تكونيش عاوزه تلبسينى مصيبه هنا كمان قوليلى انتى عاوزه منى ايه
أية / انا فكرت فى اللى انت قولتهولى
عمر / و طلعتى بايه
أية / انا يمكن مش هعرف اغير اللى فات مش هقدر اصلح اللى انكسر بس لو ادتنى فرصه
عمر/ فرصه!!!! اهبل انا اديكى فرصه عشان تدمرى اللى باقى من حياتى انتى عبيطه
أية / انا ما قولتش لبابا حاجه ما تاخدنيش بذنب ماما ارجوك اسمعنى
عمر / دا مكان شغلى مكان اكل عيشى ما ينفعش تنطيلى كل شويه و الطلبه تشوفك و انتى بتعيطى كدا يقولوا عنى ايه
أية / طب قولى انت ساكن فين و انا اجيلك قولى على اى مكان و انا اجيلك
عمر / انا مش عاوز اشوفك تانى
أية / افتكر لى اى حاجه يا عمر حاجه حلوه واحده بس عمر انا ما صدقت لقيتك انا بقالى سنين و انا لا عارفه اكل و لا انام و لا ازاكر انا بقالى سنين
عمر / كويس عشان تفكرى مليون مره قبل ما تاذى حد
أية / عمر
عمر / ايه انا مش فاضى انا هوقفلك تاكس زى المره اللى فاتت و ياريت تكون اخر مره
أية / انا مش عوزاك توقفلى تاكس انا عوزاك تسمعنى انا مستعده اعمل اى حاجه اى حاجه عشان تسامحنى
عمر / تاكس
أية / بالله عليك يا عمر و حياه اغلى حاجه عندك
عمر يبص حواليه يلاقى الكل بيبص عليهم غاده تنزل من العربيه و تروح تمسك أية من ايدها و تركبها عمر يركب التاكس و يمشى
غاده / اللى انتى بتعمليه ده ما يصحش
تليفون غاده يرن
غاده / دا عمر ثوانى ….. ايوه … لا متقلقش … سلام …….. انا هوصلك البيت و فى الطريق نتكلم انا و انتى
أية / انا ما اعرفكيش عشان توصلينى انا نازله
غاده / أية عمر حكالى كل حاجه
أية / و انتى مين بقى ان شاء الله
غاده / انا و عمر اصدقاء
أية / مفيش حاجه اسمها صداقه بين ولد و بنت
غاده / بصى لما تكبرى
أية / انا مش صغيره
غاده / اى يكن دا مكان شغل عمر لو بجد يهمك عمر ما تجيش هنا تانى اللى عملتيه ده ما يصحش انتى كدا بتاذى عمر اكتر
أية / انا ؟؟؟
غاده / انا عارفه انك ما تقصديش انا عارفه بس
أية / انا كل اللى طلبته انه يسامحنى
غاده / مش بالبساطه دى
أية / انا ما عملتش حاجه ليه اتحاسب بذنب غيرى انا اصلا ما عملتش حاجه
غاده / ممكن تبطلى عياط و تهدى
أية / لو سمحتى وقفى العربيه و نزلينى
غاده / هتروحى فين
أية / ما لكيش دعوه وقفى بقولك
غاده تركن العربيه أية تنزل و تمشى و هى بتعيط غاده تمسك الموبيل
غاده / ايوه يا عمر … لا نزلت من العربيه … ما اعرفش راحت فين … امنعها ازاى يعنى هو انا خطفاها …. سلام … انا مالى انا بيتعصب عليا ليه الحق عليا ايه القرف ده
……………………..
فى القهوه عند حسام
محمد / انا بس بدى افهم انت قررت فجاه كدا
حسام / يا بابا انا من يوم ما نزلت و انا بتحايل على عمو مصطفى
محمد / الا عمرك ما جبتلنا سيره
حسام / انا خفت ما يحصلش نصيب يبقى فى حزازيات بينكوا و احنا عيله
محمد / والله يا مصطفى الواد حسام ده ما فى منه
مصطفى / انت هتقولى دانا هجوزه الغاليه
محمد / بس مش خساره الكليه
حسام / هبقى انزلها على الامتحانات و بعدين هى يعنى فى طب و لا صيدله عادى يعنى
مصطفى / جرا ايه يا محمد انت مش رايد البت و لا ايه
محمد / هو انا اطول دى الغاليه على قولك و مدام العيال مستعجلين خير البر عاجله
حسام / نقرا الفاتحه
محمد / الله مش لما نتفق
حسام / انا و عمى اتفقنا انى هحجز اسبوعين شهر عسل فى اى اوتيل و بعدين اخدها و نسافر و هسيب لحضرتك و لعمى مبلغ توضبولنا الشقه على زوقكوا من هنا لحد مرجع بقى
محمد / و الشبكه و المؤخر و المهر الله مش تفهمونى على الاقل امك لما تسالنى ما اطلعش قصادها حمار
حسام / الشبكه دى هديتى انا هنقى حاجه حلوه على زوقى للعروسه
محمد / يخيبك يا حسام هى مش العروسه اللى تنقى
مصطفى / يا سيدى لو ما عجبتهاش تبقى تبدلها بس زوق حسام حلو و هيعجبها
حسام / انا مستعجل يا بابا اجازتى كلها على بعض شهر و فات منها اسبوع وزياده خلونا ننجز بقى ابوس ايديكوا
محمد / شوفوا الواد
مصطفى / المهر و المؤخر احنا بنشترى راجل و هو يقدر عروسته
محمد / و احنا شاريين يا مصطفى يا اخويا… نقرا الفاتحه
التلاته يقروا الفاتحه
حسام / و لا الضالين
مصطفى / امين
محمد/ اما اقوم بقى افرح ام حسام بالبشرى الجامده دى عشان يلحقوا يجهزوا نفسهم ليوم الخميس
حسام / طب تمام يلا يا عمى بقى عشان ورانا احنا كمان حاجات نعملها
مصطفى / يلا يا حسام يابنى
…………………………..
عند البيت عند أية
أية ماشيه فى الشارع رجل ورا ورجل قدام ترفع عينها تلاقى عمر واقف ساند على عربيه اول ما يشوفها يتعدل و يجى يمشى تجرى عليه
أية / عمر عمر
عمر / تاكس
التاكس ما يقفش
أية / فكرت فى اللى قولتهولك صح ؟
عمر / تاكس
التاكس ما يقفش
عمر / جاكوا القرف تكوسه غم
أية / عمر
عمر / عاوزه ايه
أية / انت بتعمل ايه هنا
عمر / كنت جاى اشوف ابويا
أية / كداب
عمر يبصلها
أية / انت ما بتعرفش تكدب بيبان عليك
عمر / ليكى حق و انا اجى جنبك استاذه و رئيسه قسم فى الكدب و التلفيق
أية / حرام عليك يا عمر
عمر / تاكس
أية / ههههههههههههههههه
عمر يبصلها يلاقيها مبسوطه
أية / انت بتعمل ايه هنا يا عمر كنت جاى تطمن انى روحت صح
عمر يبصلها باستغراب
عمر / اه صح بس عارفه ليه
أية / عشان
عمر / خلينى اقولك قبل ما عقلك يلعب بيكى انا جيت عشان اطمن انك روحتى عشان الناس شافوكى عندى فى الكليه و مش عاوز حد يلبسنى بلوه بسببك لحظه تانى مش عاوز اتحط فى مشكله بسببك تانى و بعدين انتى ايه حكايتك ايه اللى خلاكى تنزلى من عربيه غاده ليه ما خلتيهاش توصلك
أية / ومين غاده دى كمان عشان توصلنى تعرفنى منين اعرفها منين مين هى اصلا عشان انت تركب معاها
عمر / و انتى مالك
أية / لا مالى و نص
عمر / تعرفى معاكى حق انا غلطت لما جيت هنا اسمعى يا أية ابعدى عن سكتى ابعدى عن شغلى مش عاوز اشوفك تانى دورى على حد غيرى تاذيه انتى فاهمه شيلينى من نفوخك زى ما شلتك من حياتى من سنين
أية / كداب
عمر يبصلها و يجز على سنانه و يمشى يلاقى طوبه فى الارض يشوطها بغل و يمشى و أية مبتسمه
………………………….
فى شقه ندى
مها تفتح باب الاوضه و تدخل تديها كبايه عصير لمون
مها / هدى اعصابك
ندى / انا بحب على يا ماما انتوا ليه مش قادرين تفهموا
مها / لو كان بيحبك ما كانش حطك فى الموقف ده ما كانش لعب بيكى بالشكل ده لحد ما اتفضحتى كدا
ندى / انتى بتقولى ايه يا ماما
مها / بقول الحقيقه ما كانش سمح لحد يبعت صورتك معاه لابوكى ما كانش سمح انى انا و ابوكى نطاطى راسنا كدا
ندى / انتى بتتكلمى كان جتلكوا صورتى و انا عريانه و لا ورقه جواز عرفى
مها / اقولك ايه ما احنا دلعناكى اوى انسى انسى اشربى اللمون ما اكلتيش حاجه من بدرى
ندى / مليش نفس
مها / اشربى قبل ما ابوكى يجى و يشوفنى اشربى ما اعرفش هقدر افتح باب الاوضه تانى امتى
ندى تبصلها
مها / قومى خشى الحمام و اشربى دى و كلى السندوتشات دى فى اى وقت
ندى / حاضر
…………………..
فى الصاله بعد شويه الباب يتفتح و حسام و مصطفى يدخلوا حسام يحط كيسه على ترابيزه
حسام / ايه الاخبار
مها / نايمه خدت العصير و نامت … مصطفى انا قلبى مش مطاوعنى على اللى بنعمله الواد لو كان نيته وحشه ما كانش قرر يتقدم ارفضه و خلاص
حسام / انتى بتقولى ايه يا عمتى
مصطفى / حسام … يا مها الكلام ده كان ينفع لو ما كانتش بجحت فى وشى بالمنظر ده لو ما لمتهاش ما اضمنش تهرب معاه و لا يعمل فيها حاجه فوقى يا مها انتى ما بتسمعيش عن البلاوى اللى بتحصل للبنات اللى فى سنها
مها / و كليتها و احنا ازاى هيطاوعك قلبك اننا نبعدها عننا
حسام / فتره بس يا عمتى فتره لحد ما الشقه تجهز و تنسى الكلب ده
مها تبص لحسام
حسام / اوعدك انى هاخد بالى منها هى لما هتعرف قد ايه انا بحبها هتنسى الواد ده خالص
مها / بنتى عنيده ما بتمشيش بالطريقه دى انتوا هتعرفوها النهرده
مصطفى / وريها الشبكه
مها / ندى مش هتوافق على الجواز مش هتوافق تروح تخلص الاجراءات معاكوا فوق يا مصطفى
حسام / احنا فكرنا فى كل حاجه ما تقلقيش انتى بس
مها / ربنا يستر من اللى بتعملوه
جرس الباب يرن
مها / مصطفى
حسام / خشى جوه يا طنط انا هفتح
مها تدخل و حسام يفتح الباب يلاقى انور و عمر و على
حسام / ايوه ؟؟
مصطفى / مين يا حسام يابنى … ينهار ابيض حج انور اهلا اهلا ادخل يا راجل ادخل
انور يدخل و عمر و على ورا شايل ورد و شيكولاته حسام يبصله من فوق لتحت و على يبصله باستغراب و يقعدوا كلهم
مصطفى / نورت يا حج انور ههههههههههههههههههه
انور / انا ما اتحطتش فى الموقف ده ايام ما روحت اتقدم لسعاد مراتى و حتى يوميها ما اتكلمتش فى حاجه البركه فى الحجه بقى الله يرحمها
الكل يضحك
على / احم.. انا الحقيقه جاى عشان ..زى ما بيقولوا يعنى.. طالب القرب من حضرتك
مصطفى / اممم الحقيقه انا مش عارف اقولك ايه انت داخل سخن اوى مش نتعرف الاول
على / انا اسف انا على
حسام / على حاف مفيش اب مفيش عيله
على يبص لحسام
على / على حقى
حسام / عندك شقه يا على
مصطفى / لا ما عندوش عايش فى شقه الحج انور عاملها للموظفين
حسام / ااااااه
على / بس انا هشوف شقه قريبه من هنا ايجار و ….
حسام / بتقبض كويس على كدا يعنى انت عارف احنا ما ينفعش ندى تعيش فى مستوى قليل
انور / فى ايه يا مصطفى بالراحه على الواد مش كدا على بيقبض كويس كل شهر و بيحوش و لا بيشرب سجاير و لا بتاع سهرات و لا دياوله يعنى المهيه هقبضها بنفسى لست البنات
مصطفى / هههههههههههههههههه ضحكتنى يا انور والله
حسام / معلش انا اسف بس هو عمى كان حكالى عنك حكايه كدا معلش يعنى
على / خير
حسام / انت لقيط
على يقوم يقف و عمر يمسكه
مصطفى / بس يا حسام انا قولتلك كدا برضه قولتلك ان ابوه و امه رمينه فى الشارع
عمر / يلا يا على نمشى
مصطفى / فى ايه يا دكتور عمر دا كان على سبيل المدح انك يعنى شاب عصامى بنيت نفسك من الصفر
حسام / انا اسف ما اقصدش بس لفت انتباهى انك ما لكش عيله لا جايب اب و لا ام و لا خال و لا عم و لا حتى … سورى انا اسف جبت اخوك الصغير معاك
انور / كفايا لحد كدا يا مصطفى لو رافض الجوازه جبتنا ليه يا اخى جايبنا تهينا
مصطفى / حقك عليا يا انور انت عارف غلاوتك عندى
على / انا بشتغل و اصرف على نفسى من اتناشر سنه لا مسنود على اب و لا عيله مسنود على نفسى و دى كفايا اوى تسند بلد
حسام / برافو
على يبص لحسام حسام قاعد حاطت رجل على رجل يشاورله بايده يقعد
حسام / اقعد اقعد
عمر / يلا يا على
على يقعد عمر يبص على الباب و يقعد جنب اخوه
انور / على واد زى الفل و انا ضامنه برقبتى
مصطفى / امكانياتك ايه يا ابنى غير انك ما عندكش شقه تقدر تجيب شبكه و لا ايه و ياترى هتجيب عفش و لا هتاجرها مفروشه بالمره
على / ندى يتجبلها الغالى كله
حسام / و انت ما عاكش تجيب لكن لو كان معاك اكيد كنت جبت و احنا بنشترى راجل و كمل كمل
عمر / هو فى ايه بالظبط
على يمسك عمر
مصطفى / شبكه بتلاتين كويس
على يبص لمصطفى
مصطفى / و العفش اوضه نوم و اوضه اطفال و صالون و سفره و ليفنج و احنا هنشيل المطبخ و النجف و السجاد و الاجهزه الكهرائيه ماعدا التليفزيون عليك على الاقل سته و تلاتين بوصه فلات
حسام / دا نفس الاتفاق بتاع اختى على فكره ما هو ما ينفعش البنات يبصوا لبعض
على / ماشى اللى تقولوا عليه
مصطفى / و بالنسبه للمؤخر فما يقلش عن خمسين الف و الماذون و الفرح عليك طبعا
على يهز راسه حاضر
حسام / ما سمعتش
على / حاضر كل اللى هتقولوا عليه حاضر
انور / استى يا مصطفى الواد لسه فى بدايه حياته و اللى بتطلبه بصراحه كتير
على / مفيش مشكله يا حج ندى تتاقل بالدهب و انا شارى
مصطفى / تمام و يا ترى هننزل نجيب الشبكه امتى بقى مانا لا مؤخذه مش هعزم الناس على قرايه فتحه كتيمى و تقعد يابنى داخل خارج كدا و الناس تشوفكوا سوا يقولوا ايه احنا عيله محافظه
انور / وقت ما تحب يا مصطفى ننزل نجيب
على يبص لانور انور يمسك ايده
انور / بكره لو تحب
مصطفى / خلاص نقرا الفاتحه
على / بسم الله
حسام / ثوانى يا عمى فى حاجه نسيناها
على ينزل ايده و يبص لحسام
انور / ايه تانى يا مصطفى فاضل ايه
حسام / راى العروسه يا عموا رايها مهم برده و لا ايه
على يبتسم و يهز راسه
مصطفى / اقوم اسالها عن اذنكوا
انور يطبطب على ايد على و على مبتسم و مبسوط ثوانى و مصطفى يرجع و هو زعلان
مصطفى / والله انا وشى منكوا فى الارض
البسمه تروح من على وش على و عمر و انور
على / ازاى
مصطفى / البنت رايده ابن عمها
حسام يعدل نفسه و يحط رجل على رجل و يبص لعلى و يحرك حواجبه فوق و تحت بابتسامه مستفزه
عمر / هو حضرتك معلش ممكن تنادى الانسه ندى تقول رايها ده قدامنا
مصطفى / و انا هكدب ولا ايه يا ولد
انور / ما يقصدش هو بس اصله
حسام / اسمحلى انا يا عمى
حسام يقوم يقف و يشاور لعلى بصوابعه يقف على يقف و يبص لحسام
حسام / انت ليه مستغرب انها ترفضك و توافق عليا هو فى حاجه بينكوا و لا ايه
على يبصله و يسكت
حسام / تفتكر ممكن ترفض دكتور شغال بره عنده شقه و عربيه عشانك انت
عمر / ايه الاسلوب ده ايه التمثيليه السخيفه دى
حسام / هى تمثيليه فعلا بس مش احنا اللى عاملينها البيه هو اللى عاملها مش كدا برده يا علوه
حسام يحط ايده على كتف على على يزقها حسام يبتسم و يطلع موبايله
مصطفى / ما كانش العشم يا انور ابدا
حسام يدى الصور لانور يبص عليها
مصطفى / دا ابن الاصول اللى انت ضامنه داخل البيت من الشباك بيروح يعلق البت … فاكرها ايه يا ابن الكلب هاه فاكرها سايبه
على / انا نيتى خير انا جاى اتقدم رسمى اهو و كل اللى طلبتوه وافقت عليه و بعدين احنا علاقتنا ما عدتش زمايل الكليه
حسام / ايه ده انت لسه بتدرس لا دى عيلت اوى يا عمى
على / احترم نفسك
حسام / انا محترم غصب عنك الدور و الباقى على اللى زيك على العموم ملحوقه مدام انت هنا بقى احب اعزمك على فرحى انا و ندى يوم الخميس ابقى تعال بس ابقى اللبس بدله نضيفه عندك و لا اسلفك
انور / على شاب محترم يا مصطفى هو غلط مش هنكر و ليك حق تضايق بس هما عيال و بيحبوا بعض و حرام تفرق بينهم
مصطفى / حرمت عليهم عيشتهم و ان كان على بنتى هى صغيره و مش ذنبها ان الكلب ده حاول يضحك عليها
على / اضحك عليها
انور / بس يا على … يا مصطفى لو لفيت الدنيا مش هتلاقى حد زى على انا ضامنه برقبتى مفيش حد هيصونها قده
حسام / يمكن مفيش حد هيصونها قده بس فى اللى هيصونها اكتر منه
على / انا اسف انا غلطت انا اسف بس ما تحكمش علينا بالاعدام ارجوك
مصطفى / انت جبت الشبكه يا حسام مش كدا
حسام يجيب الكيسه من على الترابيزه و يطلع علبه دهب
حسام / شبكه ندى بخمسين مش بتلاتين ايه رايك
عمر / يلا يا على هما الخسرانين
حسام / اسمع كلام اخوك عشان ننادى للعروسه تلبس الشبكه ما تضيعش من وقتنا اكتر من كدا
على يبص لحسام انور يمسك ايده و يشده و عمر يزقه و يتحركوا بيه لبره عمر يقف على الباب و يرفع صابعه كانه افتكر حاجه حسام يبصله عمر يرجع يضرب حسام بالدماغ يوقعه فى الارض مناخيره بتجيب دم
مصطفى / انت اتجننت
عمر / اعتبرها نقطه الفرح
عمر يزق اخوه و يمشوا و يشد الباب فى ايده و حسام بيضحك و هو بيمسح الدم
……………………….
فى الشارع انور و عمر يبصوا لعلى و هو ساكت
انور / ما تزعلش يا على هما الخسرانين
عمر / بس احلى حاجه انى ضربت الكلب اللى فوق ده هما بيبعوا و يشتروا فينا على ايه امال لو كانت بنت وزير بقى كانوا عملوا ايه
على يمشى بعيد عنهم عمر يحصله
عمر / هو اصلا يوم باين من اوله تعرف النهرده أية جتلى الكليه تانى لا و ايه بتقولى انت بتيجى عشانى انت عاوز تطمن عليا
على ما بيردش
عمر / هى فاكره نفسها ايه يعنى انا اصلا قولتلها تطلع من نفوخى بقى بس تقول ايه لزقه
على يمشى و عمر واقف ينفخ و يجرى وراه و يحصله
عمر / ما حدش بياخد اكتر من نصيبه
على / تفتكر عملوا معاها ايه لما شافوا الصور
عمر / ياربى يا على
على / تفتكر اذاها انا ما سمعتش حتى صوتها فوق
عمر / انساها بقى يا على و اياك تحاول تتصل بيها لو كنت بتحبها اكيد موبايلها مع ابوها دلوقت كفايا اوى الحكايه دى لحد كدا
على / انا عاوز اكون لوحدى
عمر / و انا عاوز اكون معاك
على / عمر ابوس ايدك
عمر / ما تحاولش احنا الاتنين ما لناش غير بعض و مش هسيبك لوحدك … بص هى اول مره بتبقى صعبه مش اول مره هنترفض فيها يعنى بكره ناخد تناحه
على / انت بتقول ايه يا عمر
عمر / ايه يا على بحاول اخليك تفك شويه
على / ما تحاولش
فجاه عربيه ميكروباص تكسر على على و عمر على يزق اخوه بعيد يقع فى الارض الباب يتفتح و ينزل اتنين بلطجيه يشدوا على جواها و تطلع تجرى عمر يجرى وراها ما يحصلهاش
………………………..
فى شقه أية
محمود قاعد مضايق أية تقعد جنبه و معاها طبق فاكهه
محمود / تسلمى يا ست البنات
أية / بابا هو انت كويس
محمود / الحمد لله يا حبيبتى خير
أية / عاوزه انزل اجيب حاجه ممكن تيجى معايا
محمود / هى امك …
أية / انا عوزاك انت ان شالله حتى من اول الشارع
محمود يبص فى الارض
محمود / هقوم اللبس
………………………
قدام بيت ندى
حسام بيفتح باب عربيته عمر يزقه يوقعه و الناس تتلم تحوش
حسام / انت مجنون ياله هو اكمنى عدتهالك فوق و لا ايه دانا احبسك
عمر / لو لمست شعره من على هقتلك انت فاهم هقتلك
مصطفى / و احنا مالنا و مال اخوك
انور يجى يجرى من الناحيه التانيه
انور / بس يا عمر فى ايه
عمر / على اتخطف
حسام / يا نغه اتخطف ليه هو عيل و لا ايه
عمر / احترم نفسك يا ابن الكلب انت
حسام / هو اكمنى ساكتلك و لا ايه
مصطفى / بس بس اسمع يابنى احنا ما لناش دعوه با اخوك روح اعمل محضر و لو عاوز احنا ممكن نيجى معاك
عمر/ مين له مصلحه ياذيه غيركوا
حسام / هو مين اللى له مصلحه ياذى التانى انا و لا هو
مصطفى / خلاص يا حسام خلاص
انور / يلا بينا على القسم يا عمر بلاش نضيع وقت
انور يشد عمر بعيد
حسام / كان عاوز يتجوزها ازاى ده و هو مش عارف يحمي نفسه
عمر يسيب ايد انور و يرجع لحسام الناس تحوشه قبل ما يوصله
حسام / عازرك يلا يا عموا عشان نتفق مع الماذون
حسام و مصطفى يركبوا و يمشوا
………………………
فى كافيه
محمود / ها يا ست البنات عاوزه تقولى ايه بعيد عن امك
أية / اوعدنى الاول انك مش هتزعل من ماما
محمود / امك وقفت جنبى فى الوقت اللى حتى اللى من دمى سابونى فيه
أية / ماما بتحبك اوى يا بابا و انا كمان
محمود / و انا كمان بحبكوا اوى يا أية بس انا عاوز اعرف ايه لزمته الكلام ده تكونيش خلصتى مصروفك و عاوزه تانى محلسنجيه زى امك ههههههههههههههههههه
أية / عمر يا بابا
محمود يبصلها بحزن
أية / عمر ما عمليش حاجه ماما كدبت و قالت كدا عشان اتخانقوا سوا لما اتكلمت عن على قالتلى انه هيطردنا من البيت لما يكبر فانا خفت و سكت بس
محمود / عارف
أية / عارف ؟؟؟ امال ليه
محمود / عشان هو كسر كلامى انا حلفت انه لو كلم على تانى ينسى ان له اب كان المفروض يجيلى انا كان المفروض
أية / يا بابا حضرتك طردته من البيت و هنته كان هيروح فين يعنى
محمود / خلاص يا أية
أية / حتى على يا بابا يوم المستشفى كان موجود يوم عمليه حضرتك ما مشيش غير عشان يجيب فلوس العمليه
محمود يبص ل أية
أية / على اللى دفع فلوس العمليه استلف من الراجل اللى شغال عنده عشان يكمل الفلوس
……………………………..
محمود / بس امك
أية / هما اتخانقوا مع ماما فى المستشفى عشان كدا سابتهم يدفعوا
محمود / بس هى ما قالتليش كدا
أية / ماما بتخاف تخسرك عشان كدا بتكدب ماما ما خلفتش منك و دايما تقولى اذا كان رمى ام ولاده مش هيرمينا
محمود / أية
أية / بالله عليك ما تزعل من ماما بس انا ما بنامش انا حاولت اقول لحضرتك كتير اوى حضرتك ما بتسمعليش و ماما كانت دايما بتغير الموضوع انا ما بنامش و لا عارفه ازاكر و لا اركز فى اى حاجه و عمر كارهنى دنيتى كرهانى يا بابا
محمود / و اشمعن دلوقت اتكلمتى
أية / عشان على محتاجك عشان عروسته تقف جنبه زى ما وقف جنبك يا بابا هو محتاجك
محمود / اشربى العصير عشان نروح يا أية
……………………….
فى مخزن
على يفتح عينه يلاقى نفسه مربوط بحبل و متعلق فى جنش يبص حواليه الدنيا ضلمه و مفيش غير نور القمر من شبابيك ثوانى و الباب يتفتح و حسام يدخل ووراه تلت رجاله كانوا فى الميكروباص
حسام / صح النوم يا وحش فى معادك بالثانيه
على / دا تمامك يعنى
حسام / لا لا لا ما تستعجلش احنا لسه ما بداناش انا بس هتكلم معاك كلمتين و بعدين هسيبك تمشى
على / طب قرب شويه عشان اسمعك كويس
حسام يقرب خطوه على يمسك بايده الجنش و يرفع نفسه و يحط رجليه حوالين حسام و يخنقه برجليه الرجاله تدخل و يفكوا على من حوالين حسام و ينزلوا فى على ضرب
حسام / يا ابن الكلب انت بتستهبل طب والله لندمك والله لعرفك مقامك يا ابن الجزمه
الرجاله يضربوا على جامد
……………………..
فى القسم
انور / فى جديد
عمر / ابدا مفيش
انور / ما تخافش على اخوك خاف على اللى خطفوه هههههههههه
عمر يبصله
انور / على مش لحمه طريه يا عمر ما تخافش صدقنى
عمر / قلبى واكلنى عليه اوى يا حج اوى هو اللى بقيلى كنت جنبه كنت جنبه و ما لحقتش اساعده
انور / قدر الله و ما شاء فعل ما تخافش ياله اجمد كدا الله
عمر يهز راسه
……………….
فى المخزن
على بيتف دم
حسام / كفايه … هاه هتسمع دلوقت و لا تحب يكملوا
على يتف عليه
حسام / بشوقك هقولك الكلمتين و هسيبهم يكملوا … انا مفيش بينى و بينك حاجه انت اللى دخلت حياتى و حاولت تاخد حاجه تخصنى و انا بحارب على حاجتى لاخر نفس
على يضحك حسام يمسكه من وشه و يخليه يبصله
حسام / انا بحب ندى من قبل حتى انت ما تعرفها
على / و هى بتحبنى انا
حسام / بيتهيالك الفراغ بيعمل اكتر من كدا و بعدين زى ما قولتلك بحسبه بسيطه كفتى تكسب اذا كان ابوك نفسه ما اختاركش ندى هتختارك طب على ايه … ابعد عن طريقى و خلى الحكايه تخلص على كدا
على / لو كنت واثق اوى كدا زى ما بتقول ما كنتش جبتنى هنا انت خايف منى و مرعوب لدرجه انك ممكن تعملها على روحك
حسام / ههههههههههههههههه
على / اضحك بس انت عارف انها بتحبنى انا عارف انها لو اختارت هتختارنى انا
حسام / اقعد قول الكلام ده لنفسك يمكن تصدقه ندى اختارتنى انا و هتيجى معايا بكره عشان تحاليل كتب الكتاب و مش بس كدا انا هخليك تيجى تشوفها و هى بترقص فى الفرح كمان هتشوفها معايا فى مكانها الطبيعى اللى يليق بيها انا ما كنتش ناوى ائذيك بس انت اللى قليت ادبك الاول انا كنت هكلمك راجل لراجل و اسيبك تمشى
على / هههههههههههههه اقعد قول الكلام ده لنفسك يمكن تصدقه اصلا انا و انت ما ينفعش نتكلم راجل لراجل لانك مش راجل اصلا
حسام / انا خلصت اللى عندى … يوووه كنت هنسى و انا صغير قولت لندى ان اللى هيحط ايده عليها هكسرهاله و انا راجل ما بيرجعش فى كلمته ….. اكسروله ايده اليمين و ارموه فى اى حته … سلام يا راجل
……………………….
فى شقه أية
محمود قاعد شايل الهم سمر تدخل تقعد جنبه
محمود / فاكره اول يوم عرفتك فيه
سمر / ههههههههههه و دا يوم يتنسى
محمود / اياميها البيت ده كان فيه تلت ملايكه بيجروا فى كل حته الدوشه ما كانتش بتتقطع منه ابدا مرستان
سمر / ههههههههههههههههههه
محمود / كنت مضايق طول الوقت انى ما بعرفش ارتاح و اهى الدوشه راحت و البيت بقى هادى اوى و برده مش عارف ارتاح
سمر / مالك يا خويا فيك ايه
محمود / خايف اموت اوى
سمر / بعد الشر عنك ايه السيره دى
محمود / مش عارف هقول ايه لربنا لما يسالنى
سمر / يسالك ؟؟؟ يسالك عن ايه
محمود / عن حنان و ليلي عن ولادى عنك و عن أية
سمر / و انت كنت قصرت فى ايه
محمود / قصرت يا سمر قصرت و ظلمت ظلمت ليلي لما اتجوزتها و هى بتحب واحد تانى
سمر / و انت كنت تعرف منين
محمود / لما حرمتها من عيالها
سمر / و كان عندك حق ما التانى طلع واطى و ابن كلب و اديك شوفت اللى عمله
محمود / ما انا اللى رمتله عيالى
سمر / انت بتقول ايه يا محمود على اللى خدهم انت نسيت
محمود يبصلها ترتبك
سمر / انت بتبصلى كدا ليه
محمود / انا عاوز اسيب ميراثى يتوزع بشرع ربنا يا سمر
سمر / اه و ماله نروح للمحامى و ارجعلك حاجتك و انا يعنى كنت طلبت منك تكتبهملى
محمود / انا مش عاوز عيالى يدعوا عليا
سمر / بكره نروح للمحامى عن اذنك انا داخله انام
محمود / سمر
سمر / ايه تحب نروح دلوقت
محمود / هو احنا ليه ما خلفناش
سمر / ماحنا عندنا أية
محمود / عارف اقصد
سمر / ما تكملش خلاص وصلت انا عشت معاك و انا مستنيه اليوم ده و بدعى ربنا انه ما يجيش مستنيه اليوم اللى هتعمل فيا زى ما عملت مع اللى قبلى
محمود / انتى بتقولى ايه
سمر / بقولك اللى انت مش عاوز تسمعه أية مش بنتك دلوقت بس افتكرت ان أية مش بنتك صح
محمود / أية بنتى و انا اللى مربيها
سمر / كنت مستنيه منك ايه انا اذا كنت اتبريت من اللى من دمك مش هتتبرى من بنتى
محمود / ايه الهبل ده
سمر / على العموم و لا يهمك احنا هنسيبهالك مخضره و حاجتك هترجعلك و كتر خيرك اوى لحد كدا
سمر تدخل اوضتها و تقفل الباب بالمفتاح و محمود يحاول يحصلها ما يقدرش يبص وراه يلاقى أية واقفه مخضوضه يروحلها
محمود / اوعى تصدقى البوليكه بتاعه امك دى انتى بنتى غصب عن الكل
أية تهز راسها
محمود / انتى بغلاوه عبير بنتى بالظبط و يمكن اكتر
محمود يحضن أية سمر تفتح الباب
سمر / يا راجل بزمتك امال عاوز ترميها فى الشارع ليه
محمود / ما عاش و لا كان اللى يرمى بنتى فى الشارع
سمر / و عيالك الرجاله لما هيدخلوا البيت هيسيبوها فى حالها هيخلوها تعيش هنا اول حاجه هيعملوها انهم هيرمونى انا و هى فى الشارع احنا ولايا و ما لناش حد
محمود / انا ولادى رجاله
سمر / دلوقت افتكرت انك خلفت رجاله كانوا فين الرجاله من كام يوم كانوا فين و انت بتطردهم من بيتك فى كل مره بيحاول حد فيهم يقرب منك
محمود / سمر
سمر / دلوقت افتكرت ان ليك عيال تلاقيك شايفلك شوفه تانيه و عاوز تخلص منى بالحداقه قولى افرحلك طب والله افرحلك انك لسه فيك صحه تبص على الستات
أية / ماما
محمود / انتى بجد عاوزه تفتحى السيره دى
سمر / اه و انا هخاف من ايه اصل خلاص يا محمود معدش عندى اللى اخسره
محمود / عمرك فكرتى لحظه انا ليه عمرى ما صدقت على لما كان بيقول انك بتضربيه عمرك
سمر / عشان هو كداب
محمود / عشان انا مش راجل
سمر تسكت
محمود / عشان انا ما كنتش قادر اقتنع ان العيب فيا انا كنت بقول فى عقلى التالته تابته مراتى الاولى خاينه و التانيه مهمله و التالته ايه قوليلى التالته ايه
سمر / انا ستهم كلهم وقفت معاك فى الوقت اللى الكل سابك فيه
محمود / فى الوقت اللى بعدتى الكل عنى
سمر / مش انا اللى طردت على من هنا و لا انا اللى طردت عمر و عبير لو كنت عاوز ترجعها كنت روحت و جبتها من عند امها بامر المحكمه اللى معاك بس انت اللى سبتهم
محمود / سبتهم عشان خفت عليهم منك
سمر / ما انت سبتلى عمر عملت فيه ايه ضربته و لا حرقته و لا حطيت الشمعه على ضهره و سبتها تسيح زى ما سى على كان بيقول عنى
محمود / اسوء افتريتى عليه
سمر / بجد والله و مدام انا شيطانه اوى كدا سايبنى على زمتك ليه ما تطلقنى طلقنى يا محمود و مش هتشوف وشى و لا وش بنتى تانى و ابقى خلى ولادك الرجاله ينفعوك
محمود / طبعا بتقوليها بقلب جامد مهو كل حاجه باسمك دلوقت
أية / كفايا بقى كفايا حرام عليكوا ارحمونى
سمر / أية حبيبتى
أية / بابا تعبان يا ماما بابا تعبان
سمر / شايف .. شايف اللى مش من دمك خايفه عليك ازاى
محمود / بطلى تقولى الكلمه دى عنها أية بنتى
سمر / قول الكلام ده للحكومه قوله لشهاده ميلادها اللى اسمك مش فيها
سمر تاخد أية و يدخلوا اوضه أية و يقفلوا الباب
محمود / انا مش هرمى أية انتى ليه مش قادره تفهمى
محمود يحط ايده على قلبه و يروح اوضته بالعافيه و ياخد الدوا و ينام على السرير و هو باين عليه الحزن و التعب
…………………………….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
