رواية سلف ودين الفصل الخامس والخمسون 55 بقلم لولو محمد
رواية سلف ودين الجزء الخامس والخمسون
رواية سلف ودين البارت الخامس والخمسون
رواية سلف ودين الحلقة الخامسة والخمسون
نور / مش مهم الناس قد ما المهم انت اللى مهمه
ندى / الحمد لله احسن كتير
نور / حسام رجع يشتغل مع هدايه
ندى / هو حر انا قولتله ما يعملش حاجه حرام و خلصت زمتى قدام ربنا و عملت كل اللى عليا الباقي يرجعله بقي
نور / يعني بجد مش بتضايقي مش مجرد كلام من باب الكرامه و خلاص
ندى / اقسم بالله يا نو ما بحس باى حاجه ناحيته هو كويس و بيعملى كل اللى عوزاه و مش ناقصنى اى حاجه و بطلب اى حاجه بيعملها
نور / طب امال ايه بقي
ندى / قلبي مات من كتر الوجع باين … لا ما ماتش لو كان مات ما كنتش اتوجعت بس انا لسه بتوجع
نور / حرام عليكي نفسك
ندى / مش قادره يا نور ما حدش حاسس بيا مش قادره
ندى تعيط
نور / لا اله الا الله يا بنتى انتى ناقصك ايه بس
ندى / الحمد لله … مش ناقصنى اى حاجه
ندى تمسح دموعها
نور / لما حسام يرجع من الشغل خليه يخرجك غيرى جو
ندى / انا هقفل عشان اقوم ابص على البوتجاز هتعوزى حاجه
نور / عاوزه سلامتك
ندى تبتسم و تهز راسها و تقفل و تاخد رجليها فى حضنها و تقعد تعيط
……………….
فى شقه أية تانى يوم
جرس الباب يضرب تروح تبص من العين تلاقي جارتها شايله صينيه عليها ٣ اطباق رز بلبن أية تفتح الباب
البنت / ازيك … عملت ده يارب يعجبك
أية / تاعبه نفسك اوى
البنت / لا مفيش تعب و لا حاجه احنا جيران و انا بصراحه مشهوره بالرز بلبن بتاعى فقولت ادوقهولك
أية تاخد الصينيه و هى مبتسمه و تفتح الباب
أية / اتفضلي اشربى حاجه
البنت تبتسم و تدخل
البنت / انا اسمى اسماء
أية / أية انتى العروسه الجديده صح
اسماء / ايوه بس انتى ما جيتيش الفرح مع ان شريف عزمكوا
أية تنكسف بحرج
أية / تشربى ايه بقي
اسماء / شاى بمعلقه و نص سكر
أية / ثوانى
أية تدخل المطبخ و اسماء قاعده مكانها
…………….
فى الشركه
هدايه / يعني ما بعتش اى حاجه تاني
حسام / صوت صرصور الحقل
هدايه / يعني ايه
حسام / يعني صمت تام صحرا
هدايه / انا كلمت واحد اعرفه شغال فى الشرطه علاقتى بيه كويسه
حسام / اهم حاجه العلاقات الكويسه دى
هدايه / من اول ما انت دخلت العماره لحد ما خرجت منها ما حدش غريب دخل
حسام / يعني ايه ؟ حد من الجيران ؟ انا ما ليش اى علاقه مع اى حد فيهم و بعدين هيستافيدوا ايه من كل ده و بعدين ما فى سطح و العمارات كلها من فوق مفتحه على بعض
هدايه / ما عنديش ادنى فكره عن اجابه اى حاجه من دول
حسام / انا ما عدتش فاهم حاجه
هدايه / هو مش قال هيكلمك من هنا لحد ما يكلمك هخليهم يبصوا على كاميرات البيوت اللى حواليك
حسام / و انتى بقي قولتى للظابط حبيبك ده ايه بالظبط على اللى بينا
هدايه / و انا مالى بالموضوع انا قولتله ان فى مجرم بيحاول يبتز واحد حبيبي و عاوزين نحل الموضوع ودى و من غير شوشره
حسام / لا واضح ان من كتر حبايبك لا حد بيعلق و لا حد بيستغرب
هدايه / انت فاكره عمل كل ده عشان سواد عيونى فوق يا سمسم ما حدش بيبربش عشانك حتى ببلاش
حسام / طب و دفعتى كام بقي للاخ ده
هدايه / هو اكل و لا بحلقه
حسام / على رايك المهم الموضوع ده يتحل بسرعه و بهدوء
هدايه / معاك جدا فى الموضوع ده
……………….
فى شقه أية
أية و اسماء بيضحكوا
اسماء / حكالى حكالى دا قعد اسبوع بينشر على كراسي السفره خايف يوقع عندكوا حاجه تانى
أية / انا ما قصدتش والله بس انا مش بحب الاختلاط و الحاجات دى
اسماء / و دى حاجه احترمك عليها جدا … انا القاعده الحلوه نستنى نفسي و اكيد جوزك زمانه جاى و انتى ما عملتيش غدى
أية / لا انا بخلص اللى ورايا بدرى بدرى ما تقلقيش عليا
اسماء / جدعه انا زيك كدا برده اصل الفيس ابن كلب بيسرق الوقت هوب الاقى الحكومه طابه عليا
أية / حكومه !!!
اسماء / شريف جوزى
أية / هههههههههه اه سورى فهمت
اسماء تقوم تقف
اسماء / ايه رايك نظبط يوم و نعرف رجالتنا على بعض و نخرج نتفسح سوا
أية / ما اعرفش بصي
اسماء/ هو مش انتى قولتى ما لكوش قرايب و لا صحاب فى اسكندريه انا بقي هوريكي اسكندريه عمرك ما شوفتيها و اوريكي قد ايه الاسكندرانيه جدعان و هعرفك على شله الفساد صحابنا هتحبيهم اوى
أية / مش عارفه يا اسماء والله
اسماء / انا هطلع دلوقت كلمى جوزك و ظبطى وانا هكلم شريف و اظبط و نبقي نشوف الموضوع فى قعدتنا الجايه
أية / ربنا يسهل
اسماء تمشي و اية توصلها للباب
………………
فى شقه ندى
حسام قاعد سرحان فى البلكونه ندى تدخل شايله صينيه كيك و شاى تحطها على الترابيزه و حسام سرحان مش مركز
ندى / اللى واخد عقلك
حسام / حبيبتي ايه الريحه الحلوه دى … لا دا احنا نفتحلك محل حلويات بقي بقيتي استاذه فى الكيكه ما شاء الله
ندى / الحمد لله فلحت فى حاجه
حسام/ انتى شاطره فى كل حاجه ما صينيه البطاطس امبارح كانت عالميه و الاكل النهرده كان حلو جدا تسلم ايدك و لسه بكره ياما هتبدعى
ندى / طب دوق و قولى رايك
حسام ياكل و يستمتع
حسام / احلى من كل مره تسلم ايدك
ندى / كنت سرحان فى ايه بقي
حسام / مشاكل الشغل ما بتخلصش بفكر ادور على شغلانه تانيه
ندى / هدايه ؟
حسام / و دى اخرها ايه يعنى يلا ما تشغليش بالك ياما دقت على الراس طبول قوليلى انتى البيت ناقصه حاجه حد فيكوا ناقصه حاجه ؟
ندى / و انت مخلينا ناقصنا حاجه
حسام يبتسم
ندى / فاكر المكتبه اللى جبتلى منها الكتب
حسام / تحبى اخدك تنقى ؟
ندى / ينفع ؟
حسام / ليهم موقع اونلاين على فكره تقدرى تنقى و الحاجه توصلك و لو عاوزه نروح نروح
ندى / اى حاجه اللى يناسبك
حسام / بعد الكيكه الحلوه دى كل حاجه تناسبنى
حسام ياخد حته كيك و ندى تبص على الشارع
……………….
فى النادى
نور قاعده مامه محب تدخل
الست / ممكن اقعد
نور / اتفضلي
الست / هو حضرتك منعتى يس يلعب مع محب
نور / الحقيقه اه
الست / بس دول اطفال يا مدام
نور / والله كان ممكن لو ما كانش اللى حصل حصل فنقصر الشر من اولها
الست / يعني تضربوا الراجل و كمان انتوا اللى تتقمصوا على العموم انا عملت اللى عليا و خليتنى الكبيره بس واضح انى اتسرعت
نور تبص للست باستغراب
الست / انا اللى هقول لمحب لو شاف يس فى حته ما يقفش فيها
الست تمشي و نور ما تردش ست تانيه تدخل
الست / ممكن اقعد
نور / اتفضلى
الست / انا وفاء مامه على معاكوا فى التمرين
نور / اهلا وسهلا انا نور … مامه يس
وفاء / غنيه عن التعريف دا النادى كله ما لوش سيره غيركوا و اللى جوزك عمله مع استاذ نبيل اصل حضرتك مش عارفه احنا ياما اتهرينا خناقات بسبب الموضوع ده
نور / معقول
وفاء / كلنا اصلا مانعين ولادنا يلعبوا مع محب بسبب الحوارات دى دا حتى مامته بتشتم العيال بالفاظ وحشه جدا
نور / و اداره النادى ازاى تقبل باعضاء من النوعيه دى
وفاء / ما هم بيعتزروا و الموضوع بيتلم و ناس بتتوسط و حاجات من دى و الموضوع بيخلص
نور / بس واضح ان الموضوع بيرجع يتكرر اهو
وفاء / ما هو بصراحه اول مره حد يعرف يرد عليهم تسلم ايده جوزك شفا غليلنا كلنا
نور / انا بصراحه ما كنتش موفقاه على اللى عمله
وفاء / انا جوزى فى الكويت و بينزل اجازه شهر فى السنه بنقضيه بقي يا بنزور القرايب يا مصيف فمش بنيجي التمرين خالص غير كدا كان مستحلفله
نور / لا واضح انهم محبوبين هنا اوى
وفاء / مش عاوزه اقولك استنى
وفاء تشاور لتلت ستات قاعدين على ترابيزه تانيه يقوموا يروحوا يقعدوا مع نور
……………….
فى اوضه نور
نور / و اتفقنا بقي نروح تمرينه الخميس بدرى و كل واحده تعمل اكله و نعمل ديش بارتى و العيال تقرب من بعض و الرجاله كمان يتعرفوا انا ما رضيتش اديهم كلمه الا اما اشوف ظروفك
على / و انا هعترض ليه خير و بركه
نور / بص انا لسه مقتنعه انك غلطان بس واضح ان ليك نظره فى الناس دا انت ما شوفتش الوليه مراته و هى بتتقنعر عليا
على / ههههههههه٧ سيبك منها
نور / بصراحه اكتر تمرينه انبسط فيها كنت ببقي زهقانه و انا قاعده لوحدى قعدنا نتكلم و نضحك ثوانى و لقيت التمرين خلص ما حسيتش بالوقت خالص
على / هى اللمه الحلوه ما تتعوضش و اهو تغيرى جو
نور / تعرف ايه احلى حاجه فى الموضوع
على / ايه
نور / و انا بقول انا مامه يس
على يبتسم
نور / احساسها حلو اوى يا على ربنا ما يحرم حد
على / امين
نور / تفتكر لو روحت للدكتوره هتقولى ايه
على / تقول اللى تقوله لا بايدها و لا بايدنا
نور / معاك حق بكره مفيش دروس ممكن تاخدهم معاك المحل اروح للدكتوره
على / ينفع من غير حجز و لا انتى حجزتى
نور / هدفع فورى و خلاص
على / تمام اللى تشوفيه و لو تحبى نسيبهم مع مامتى و اجى معاكى
نور / طب ايه رايك فى طنط منال
على / ظبطى انتى و انا مش معاكى فى اى حاجه
نور / انا هقوم اصلى ركعتين
على / قومى و انا هصلى معاكى
نور تبتسم و تقوم هى و على و يطلعوا بره
……………….
فى شقه ندى
ندى بتتكلم فى التليفون
ندى / يعني هتتاخر ؟
حسام / لا ان شاء الله قبل معاد سيشن عمى اكون وصلت السنتر
ندى / طيب هكلم بقي السنتر و اشوف عندهم عربيه و لا اوقف تاكس و لا اعمل ايه
حسام / بصي انا هشوفلك حد هنا يكون يعرف رقم عربيه ابعتهولك تمام
ندى / ماشي بس حاول ما تتاخرش
حسام / هعمل ايه بس اديكي شايفه الدنيا اتكربست فوق دماغى
ندى / طب بالراحه كل حاجه هتتحل انت بس حاول و ربنا يسهل
حسام / تمام تمام سلام دلوقت و هكلمك بعدين
ندى تقفل و تروح تفتح درج و تطلع شنطه صغيره فيها فلوس تاخدها و تحطها فى شنطه حبيبه و تشيل حبيبه والشنطه و تحط حبيبه جنب مصطفى قاعد لابس على كرسي بعجل
ندى / خلى حبيبه جنبك هنزل اشوف تاكس يساعدنا
ندى تروح تاخد المفتاح و تحطه فى الشنطه و تقفل الباب و تنزل الشارع تشاور لتاكس يقف ندى
ندى / لو سمحت والدى فوق قعيد لو تقدر تساعدنى ننزله عنده جلسه علاج طبيعي و انا لوحدى و مش عارفه اتصرف
الراجل / تقبريني هلا بصف السياره و بطلع معك
ندى / ميرسي جدا انا هديك الفلوس اللى تطلبها
الراجل / تكرملى عيونك والله من شان هالجمال يهون التعب
ندى تبصله باستغراب و ترجع لورا الراجل يركن التاكس و ينزلها
الراجل / البقلاوه ساكنه فى البنايه هايدى
ندى / حضرتك تقدر تمشي خلاص شكرا
الراجل / الحق علي يعني بدى اساعدك
ندى / شكرا مش عاوزه تقدر تمشي
الراجل/ شو هلا بتتلامنى على
ندى / انت لو ما ممشيتش هصوت و الم عليك امه لا اله الا الله
الراجل / عيطى و لمى الناس انتى اللى وقفتيني و طلبتى منى اطلع معك فوق و لا نسيتي
ندى / تصدق انك حيوان
شاب يدخل
شاب / شو بك يا زلمه روق شوى
الراجل / الواحد كان رايق و ماشي فى حاله وقفتوا و قعدت تتمايع علي و اطلع معى و مدرك شو و هلا بتشرشحلى
ندى / انت كداب و الله العظيم كداب
الشاب / خلاص يا عمى بلاها ولدنه و اتوكل على الله
ندى / دا كداب
الشاب / ستى بالله خلصنا انا شايف كل حاجه
ندى / انت شوفت ايه انت انا طلبت منه يساعدنى انزل والدى القعيد نروح مستشفي لقيته بيعاكسنى دا ايه البلد دى
الشاب / روقى اختى اقسم بالله شوفت كل حاجه
ندى تسيبهم و تطلع تقفل الباب و تتصل بالموبايل
ندى / ايوه يا حسام لو سمحت تعال دلوقت
حسام / انا لقيتلك رقم عربيه و اتفقت معاه هيعدى عليكي
ندى / انا لا هنزل و لا هركب عربيات انا بقولك اهو و لو سمحت تعال دلوقت
حسام / ليه بس هو فى ايه
جرس الباب يضرب ندى تروح تبص من العين تلاقي الشاب
ندى / بقولك تعال لازم تيجي تعال
حسام / طب فى ايه طمنيني بس
ندى تقفل الترباس و تفتح الباب
ندى / دا ايه البجاحه دى انت طالع ورايا لهنا كمان
الشاب / جبتلك تاكسي تانى و طلعت اساعدك
ندى تبصله و تسكت
الشاب / انا كان بدى الرجال يمشي و ما تكبر المواضيع و تصيرى سيره بينات الخلق
ندى / على العموم كتر خيرك انا هستنى جوزى يوصلنى
الشاب / على العموم انا غديى الميكانسيان اللى فى البنايه اللى جاركوا وقت البتغيرى رايك
ندى / كتر الف خيرك من فضلك انزل بقي
غديى يهز راسه و يمشي ندى ترد على التليفون
ندى / الو
حسام / هو ايه اللى الو هو ايه اللى بيحصل عندك
ندى / انا استاهل ضرب الجزمه انى جيت البلد دى دا مصر برقبتهم
حسام / طب ممكن تفهميني فى ايه بدل ما اتقلب بام العربيه دى
ندى / هو انت سايق ؟ انت سبت الشركه ؟
حسام / انا طاير على الطريق زى المجنون مش فاهم اى حاجه
ندى / خلاص اهدى اهدى كلو تمام هحكيلك
حسام / سامعك
………………………..
فى شقه سحر
سحر / و انت بقي يا سى يس مش عاوز تيجي لعمتوا خالص يعني ايه ما بوحشكش
يس / والله بتوحشيني بس انا يا فى الدرس يا تمرين يا نايم
سحر / يعني ما فيش تى فى خالص
نغم / لا فى يس بيقعد يتفرج على بن تن على اليوتيوب
يس / ما انتى بتتفرجى على ماى ليتل بونى
نغم / ماما نور وعدتنى هتجبلى يونيكورن دريس فى عيد ميلادى و تورته يونيكورن و هتجبلى كمان فايرى وينجز
سحر / كل ده !!!
نغم / قالتلى انى ممكن اعزم كل صحباتى فى النادى كمان
سحر / حلوه ماما نور بتعاملكوا حلو
يس / بتحبنا اوى و بتجبلنا كل اللى نفسنا فيه
نغم / و بتحكيلى ستورى جديده كل يوم قبل ما انام
يس / و بابا على كمان بيلعب معايا بلايستايشن و يحفظنى قران
سحر / يعني مش ناقصكوا اى حاجه بتاكلوا كويس يعني
يس / يوووووه دا ماما نور بتزغطنى بتزغطنى
سحر / ههههههههه و انا يا ولد ما كنتش بزغطك
يس / لا كنت بقولك شبعت خلاص لكن ماما نور لازم امسح الطبق و اشرب الكبايه كلها و الا مفيش سويتس و لا بن تن و بقول شبعت مليون مره و مش بتسمع الكلام
نغم / بس انا باكل طبقي كله لوحدى
سحر / شطوره
نغم / ماما نور بتروح للدكتوره عشان تجبلى اخت بنت اللعب معاها
سحر الحزن يبان على وشها
سحر / نغم يا قلبى انتى عارفه انتوا ليه عايشين عند ماما نور و بابا على
يس / عشان هم بيحبونا
سحر / طب ما انا كمان بحبكوا يا يس … بس ماما نور مش عندها عيال فانا سبتكوا معاها عشان هى زعلانه ان مش عندها عيال لكن لو عندها عيال
يس / هنرجع نعيش معاكى تانى
سحر / انت مش عاوز ترجع تعيش معايا خالص
يس / انا بحب اوضتى و بابا على وعدنى هيعملى اوضه لوحدى لما يلاقي حد يشترى الليفينج هى اصلا ما لهاش لازمه
سحر / ريحه الكيكه طلعت هقوم اطلعها من الفرن قبل ما تتلسع مين بيحب كيكه الشيكولاته بتاعه عمتوا
نغم / اناااااا
…………………..
فى السنتر
ندى / و انا اش عرفنى انه هيطلع زباله كدا
حسام / انا قولتلك هشوفلك نمره حد ممكن افهم انتى مستعجله على ايه خلاص يعني السشن بدا و انا ما عرفتش اتصرف
ندى / دا بدل ما تضايق ان فى حيوان عاكس مراتك بتغلطنى انا
حسام / ما انا بتكلم لانى مضايق و لا انتى الاستقبال عندك فيه مشكله
ندى / كل حاجه بسببى كل حاجه غلطتى اصلا لو كنت حضرتك بطلت رغى مع دى و دى فى الشركه و ركزت فى شغلك كنت خلصت فى معادك و جيتلى
حسام / يا نهار اسوح
ندى / لكن ازاى البيه يغير خطته فى اخر ثانيه و انا المفروض اتعامل معادى
حسام / انا ليا الجنه حدف على اللى بشوفه ده
ندى / ان شاء الله
حسام يبتسم ندى تستغرب
حسام / هو الراجل قالك يا بقلاوة
ندى / انت عاوز تجننى
حسام / اعوذ بالله اكتر من كدا على العباسيه وش
ندى / انا مش راده عليك تعرف انا اصلا مش هقعد جنبك فى مكان واحد
ندى تيجي تقوم حسام يقعدها ندى تبص على الناس
حسام / ما تبقيش قفوشه بقي انا بحاول افكك
ندى / انا مش عارفه اتعامل مع الناس انا قرفت من حياتى
حسام / الموقف ده ممكن يحصل مع اى حد و فى اى مكان فى العالم و انتى مزه هو بس كل اللى مستغربله انك ما تجيبيش بقلاوه خالص
ندى تبص لحسام
حسام / البقلاوه بتقرمش كدا فى البق انما انتى بسبوسه بالسمنه و القشطه تدوب فى البق
ندى تقوم و ه بتضرب كف على كف
…………….
فى العياده
نور بتعدل هدومها
على / الخميس الجاى ده علاطول
الدكتوره / لو يناسبكوا
نور / يناسبنا طبعا يناسبنا
على يبص لنور
نور / هو نسبه نجاحها قد ايه
الدكتوره / احنا هنعمل اللى علينا و الباقي على ربنا المهم من هنا للخميس تمشي على التعليمات اللى قولتهالك و العلاج
نور / لا ما تقلقيش خالص ان شاء الله هعمل كل اللى حضرتك قولتى عليه
الدكتوره / تمام … اشوفكوا باذن الله الخميس الصبح الساعه تسعه و نص
على / باذن الله
نور و على يطلعوا بره
نور/ انا خايفه اوى يا على
على /خايفه من ايه بس ما تسبيها على ربنا
نور / خايفه العمليه تفشل
على / الدكتوره قالت كدا كدا هتجمد بويضات و ربنا هيحلها من عنده ان شاء الله ما تشيليش هم
نور / و احنا معانا فلوس لكل ده
على / الحمد لله و بعدين مش دورك تفكرى فى الفلوس ربك بيرزق
نور / ايوه يا على بس احنا دلوقت ورانا مسؤليات
على / ما قولت ربك بيرزق ما تشيليش هم و الحمد لله الخير كتير يعني
نور تهز راسها و تركب العربيه و على يسوق
…………………..
فى شقه ندى
ندى / و انت تاخد و تدى معاه ليه
حسام / الراجل بيعتزرلى ان كان فى اى سوء تفاهم حصل و بيعرض خدماته
ندى / الله الغنى
حسام / انتى مش شايفه انك اوفر شويه
ندى / انا تعبت و اعصابى تعبت
حسام / كنتى عاوزه منه ايه يدخل يضرب سواق التاكس و يكبر الموضوع الراجل مشاه و راح جبلك تاكس تانى كتر خيره
ندى / ماشي
حسام / ممكن تهدى بقي عشان والله موقف و عدى و مفيش اى مبرر لكل العصبيه دى
ندى / انا داخله انام
حسام / بدرى كدا
ندى / تعبانه خلى اليوم ده يخلص بقي
ندى تدخل الاوضه حسام يدخل وراها
حسام / طب ما تيجي نشوف فيلم و لا اى حاجه هتنامى زعلانه كدا
ندى / انا مش زعلانه و لا حاجه انا مرهقه شويه و لما هنام هفوق
حسام / تمام نامى و انا هروح ابص على عمى يمكن يكون محتاج حاجه
ندى / يبقي كتر خيرك
ندى تستغطى و تدى لحسام ضهرها
……………….
فى اوضه يس
نور بتغطى يس
يس / يعني انتى مش هتسبينا
نور / ابدا ليه بتقول كدا
يس / عشان هيبقي عندك اولاد
نور / و انت عندك مشكله لو ليك اخ او اخت مع نغم
يس / انا بحبك
نور / و انا كمان بحبك اوى يا يس حبيبي انا مش عوزاك تخاف لو ربنا كرمنى باخ ليكوا دا مش هياثر على حبى ليكوا و لا حياتكوا
يس / بس هتحبيه اكتر مننا
نور / نام يا يس و ما تفكرش فى الحاجات الوحشه دى
على يدخل
على / انا اللى هحكى الحدوته النهرده
الكل يبص لعلى و نغم تقوم تقعد على يجيب كرسي
على / عارفين عموا عمر
نغم / انا عرفاه انا عرفاه
على / انا كنت صغنن كدا و شقى و فجاه لقيتهم بيجيبولى اخ صغير للحظه خفت انه ياخد مكانى بس ماما قالتلى ده اخوك الصغير تحميه و تاخد بالك منه تعرف لما كان حد بيضايقه فى المدرسه كنت بعمل فيه ايه
يس / كنت بتضربه
على / كنت بفرم اللى يقرب منه
نغم / بس عمو عمر بيلعب كراتيه
على / بالظبط لما كبر بقي بقي هو اللى بيدافع عنى
يس / و لو جت بنت
نغم / هلعب معاها
على / نغم هتلعب معاها و هتسرح شعرها و يبقوا صحاب و اخوات و انت بقي يا ياسو هتبقى راجلهم تحميهم و تدافع عنهم
يس / بس البيبيهات بيعملوا بيبي
على / و انت يعني ما بتعلمش ما انا بعمل بيبي
نغم تضحك و تغطى بقها بايديها
على / محسسنى انك انت اللى هتغيرله البامبرز مثلا و بعدين انا اعمل ايه ما كانش فى بامبرز زمان عمك عمر كان يستنى استحمى و اللبس هدوم نضيفه و يحميني بالبيبي
الكل يضحك
على / كنت ادخل استحمى تانى و برده ما كنتش احب انام غير و هو جنبى
نور / انا ياما بهدلت خالو حسام ما كانش يحلالى اعمل بيبي غير فى سريره
يس / ايووووووو
نور / كان بيتعصب جامد و دلوقت عنده بيبي اسمها حبيبه برده بتعمل عليه بيبي
نغم / برده
نور / برده شوفتوا بقي
على / خلاص الحوار اللى ريحته وحشه ده
نغم تضحك
على / احنا هنفضل نحبكوا مهما كان و هتفضلوا وسطينا مهما كان بس عاوز اطلب منكوا طلب لو عملتوه هجبلكوا كل الحلويات اللى نفسكوا فيها
نغم / هتجبلى كيندر
على / اجيب كيندر و كل اللى نفسكوا فيه بس بشرط تاخدوا بالكوا من ماما نور الفتره الجايه و ما تتعبوهاش خالص ممكن
نغم / ممكن
على يبص ليس
يس / ممكن
على / مهما حصل انت هتفضل راجل البيت ده من بعدى
يس يبتسم على يقوم يبوس راسهم و يقوم
نور / تصبحوا على خير
نور و على يطلعوا بره و يواربوا الباب
على/ ابقي خدى بالك من يس حبه زياده الفتره الجايه
نور / ربنا يستر زعلت عشانه اوى
على / فتره و هتعدى ما تقلقيش
نور تهز راسها على يبوس راسها و يروحوا بره
………………..
فى شقه أية
عمر / هروحلهم اعملهم ايه
أية / مش عمليه و واجب تقف جنب اخوك
عمر / و هى الحاجات دي بيتوقف فيها يا أية
أية / يا سيدي اعرض حتى تاخد العيال خميس و جمعه
عمر / و انتى هتقدرى عليهم
أية / يا سيدى ربنا يقدرنى
عمر / هتعملى ايه مع اسماء
أية / اسماء مين
عمر / يلاهوى جارتنا اللى فوق
أية / لا طبعا انت تعرف انى ليا فى التجمعات دى
عمر / ايوه بس دى فرصه كويسه و بعدين ما هى بتنزل تقعد معاكى اهو و تنزلك طبق و تطلعيلها طبق
أية / انت مستعجل على ايه ما تسيب الدنيا تمشي بوقتها
عمر/ و لا مستعجل و لا حاجه اللى يناسبك
أية / بص سيبها لله و ربنا يسهل تمام
عمر / تمام
………………….
فى شقه نور يوم الجمعه
نور نايمه فى السرير بتكلم ندى فى التليفون
نور / اطمنك ايه يا بنتى هو النتيجه هتبان فى يوم و ليله اما امرك غريب اوى
ندى / طب الدكتوره قالتلك ايه طيب
نور / والله ماشيه على علاج و حقن لما اتغربلت
ندى / بطلى دلع كلو يهون
نور / تفتكرى فى امل
ندى / و انتى السنه اللى فاتت كنتى تحلمى تبقي هنا دلوقت
نور / ابدا الحمد لله كنا فين
ندى / خلاص احمدى ربنا بقي و استحملى شويه
نور / انتى عامله ايه و عمى عامل ايه
ندى / بابا الحمد لله احسن كتير دلوقت بقي بيحرك ايديه بشكل طبيعي و الرعشه راحت خالص بس الدكتور قال ان رجليه هتحتاج شغل شويه بيقول حصلها دمور من القاعده
نور / ابدا والله انا كنت ببقي واقفه و هو بياخد الجلسات
ندى / ايوه بس واضح انه كان محتاج شغل عليها اكتر على العموم احنا كنا فين دا انا كنت بخاف اشيله حبيبه امبارح شلها و كان فرحان اوى
نور / ما تثقيش فى ايديه برده بدل ما يوقعها
ندى / واخده بالى خصوصا ان وزنها زاد ما شاء الله
نور / وحشتنى بنت الايه انتوا مش ناويين تيجوا اجازات خالص
ندى / هو احنا لسه استقرينا و بعدين كتير اوى مصاريف نزول و خروج دا احنا ما بنحوش حاجه خالص هنا
نور / انا مش عارفه هتفرق و لا لا بس الصيدليه الحمد لله شغاله كويس و امبارح على جاب طيار مخصوص يوصل الطلبات بقي عندنا دليفرى يا نونو
ندى / مبروك
نور / المهم الفلوس كلها بعد المصاريف انا بحطها فى حساب حسام فى البنك اهى مبلغ نوايه تسند الزير
ندى / والله انا لا بعرف اللى داخله و لا اللى خارج بس الشهاده لله على يدى بيصرف كتير ما بنطلبش حاجه الا و يعملها
نور / ربنا يصلحلكوا الحال و يهديهولك و يهديكي ليه
ندى / امال العيال فين مش سمعالهم حس
نور / العيال عند طنط منال من الصبح و على راح يجيبهم
ندى / أية قالتلى هتاخدهم
نور / هم عرضوا بس على ما رضيش أية حامل و العيال ما شاء الله اشقيه مش هتقدر عليهم
ندى / و انتى هتقدرى
نور / ربنا يقدرنى و بعدين انا مش لوحدى
ندى / قال يعني امك هتساعدك رضيت عليكي اخيرا و هتساعدك فى حاجه
نور/ الحمد لله على مش مخليني مستنيه مساعده من حد و انا و هو متفقين على كدا من الاول
ندى/ بس ليه ما بعتوش العيال لعمتهم
نور / بتشحن يس و تخوفه مننا
ندى / ايه الحيوانه دى طب هتعملى ايه ما انتى مش هتمنعيه عنهم
نور / هم فاكرينه اصلا
ندى / بتهزرى
نور / اخرها تكلمهم فى التليفون خمس دقايق تطمن و تقفل هى مشغوله بعيالها برده
ندى / ربنا يعين الكل بس ما شوفناهاش يعني و هى بتقول عيال اخويا و لا هو كان عند مع امهم بس
نور / و هو احنا قصرنا معاهم ما هى عشان كدا مطمنه عليهم
ندى / ما حدش بيربى عيال حد يا بنتى دول ما صدقوا
نور / ما انا بربى اهو يا ندى
ندى / ربنا معاكى انتى اصلا حاله لوحدك
نور / انتى فى حاجه مضيقاكى
ندى / لا بس حبيبه بتسنن و مقريفه ما بتنيمنيش
نور / قلبي انا
على يدخل شايل اكياس كتير و نغم و يس يجروا يقعدوا على السرير جنب نور
على / الفرارجى قابلنى تحت و جايب الفراخ دى … لمين دا كلو
ندى / طب هكلمك بعدين ربنا معاكى
نور / طب سلام يا نونو
نور تقفل و تقوم
نور / دى ماما كانت طلباهم
على / يعني انزلهم ؟
نور / حطهم فى المطبخ طيب و ارتاح من السلم و انا هكلمها و اشوف هعمل ايه
على / تمام
على يروح يحط الاكياس فى المطبخ و نور بتتصل بمامتها
………………
فى شقه أية
اسماء / هنروح نقضي اليوم فى المنتزه على البحر
أية / يا ستى ربنا معاكوا انا ما برتاحش فى التجمعات
اسماء / ليه طب والله هتنبسطى
أية / انتى ليه مصره انى اجى معاكم
اسماء / صعبانه عليا قعدتك لوحدك طول الوقت
أية / انا اصلى كائن بيتوتى ما ليش فى الخروجات و الحاجات دى
اسماء / اعوذ بالله انا بقي ما اطيقش البيت و لا اطيق سيرته
أية / ربنا معاكى
اسماء / بقولك ايه انا هطلع عشان يدوب اعلق على كفته الرز قبل شريف ما يجي
أية / اول ما الممبار يتسلق هحمرلك طبق تنزلى السبت تاخديه
اسماء / تكون الكفته استوت
أية / اما نشوف الكفته الاسطوريه بتاعتك دى هيطلع طعمها ايه فى الاخر
اسماء / عيب عليكي هبهرك
اسماء تقوم و أية توصلها
………………..
فى المحل عند على
ممدوح يدخل
ممدوح / صباح الخير يا استاذ على
على / اهلا اهلا و سهلا يا استاذ ممدوح اتفضل اتفضل تشرب ايه و لا نجيب فطار علاطول شكلك ما فطرتش
ممدوح / سبقتك من بدرى ربنا يكرمك
على / طب نجيب شاى بقي
ممدوح / يا راجل هو انا جاى اضايف دا انا صاحب بيت
على / طبعا طبعا بس برده الكلام ما يحلاش غير ببقين شاى ثوانى بس
على يشاور لواحد من اللى شغالين يوشوشه و يرجع بسرعه لممدوح
على / اؤمرنى
ممدوح / كنت جاى اطمن عليك انت و المدام عرفت من سحر ان مدام نور عملت عمليه
على / اه الحمد لله مش حاجه يعني
ممدوح / طب يا راجل كنت بلغتنا كنا وقفنا معاكوا فى المستشفي و لا بعتنا ورد و لا اى حاجه
على / والله مش عارف اقولك ايه دى عمليه تلقيح صناعى مش حاجه خطيره يعني و احنا ما بتناش حتى فى المستشفي
ممدوح / على خير باذن الله … بس انا كنت اصلي فاكر ان مدام نور ما بتخلفش
على / والله الدكاتره مش ماكدين حاجه بالعكس احتمال نجاح العمليه ضعيف بس ادينا بنسعى ادعيلها
ممدوح / ربنا يكرمكوا طبعا بس
على / لو حضرتك جاى تتكلم عن يس و نغم فى اللى بيحصل ده مش هياثر ابدا على يس و لا نغم باى شكل عاوزك تطمن
ممدوح/ انت عريس جديد يا استاذ على لا تعرف قرف الحمل و لا تعب الولاده
على / مش عاوزك تقلق خالص ربنا بيقدر و احنا مش لوحدينا
ممدوح / انا اهم حاجه عندى مصلحه العيال
على / يبقى متفقين
شاب يدخل بكبايتين شاى و طبق سندوتشات شاورما
على / لقمه خفيفه كدا تبلع الشاى
ممدوح / تاعب نفسك والله شبعان
على / لا ما دوقتش انت سندوتشات الشاورما السورى على الفحم الجديده بتاعتنا حاجه كدا وهم
ممدوح / ندوق مع ان سمعتك سبقاك
على / رايك يهمني اتفضل اتفضل
على يناول ممدوح ساندوتش
………………………..
فى شقه نور
نور / هو الناس دى طبيعيه
على / قلقهم منطقى
نور / خايفين نرجعلهم العيال مش اكتر
على / و طبعا ما نقدرش نكلم العيال على انهم ما ينقلوش الكلام اللى بيسمعوه هنا
نور / لا اكيد هتكلم معاهم بس مش دلوقت
على / انا هاخدهم انا بكره التمرين خليكي انتى اليومين دول مرتاحه فى البيت
نور / الدكتوره قالت اتعامل عادى
على / برده معلش حاولى ترتاحى على قد ما تقدرى
نور / حاضر يا على مع انى خايفه اغيب يسالوا العيال عنى و الاقى مصر كلها عرفت انى عملت عمليه و لا يا لهوى ليعرفوا ان يس و نغم مش ولادى
على / يا ستى ان حد سال هقولهم انك بتروقى الشقه
نور / هتكدب يعني
على / طب هقولهم انك بتزورى امك ابقي انزلى قضى الكام ساعه دول تحت و لا ابقي قوليلى اقول ايه وانا اقول
نور / انا بس خايفه ينبروا فى الحكايه انا عمرى ما شوفت كدا
على / انا هدخل اكلم يس و نغم
نور / قولت خليني انا اكلمهم احسن
على / جيتي فى جمل انا هدخل اعملكوا ساندوتشات كبده وسجق اسكندرانى تحلفوا بيها
نور / يا دلعوا يا شيف يا دلعوا
على / انتوا لسه شفتوا حاجه
نور تضحك و على يروح المطبخ نور تقوم تدخل اوضه يس بيلعب على الموبايل و نغم بتتفرج عليه
…………………….
فى الشركه
هدايه بتقلب فى ملف قدامها تلاقي نوته صفره ملزوقه
هدايه / مهله لم الفلوس قربت تخلص … ايه ده
هدايه تقوم و تطلع بره تلاقي حسام مش موجود هدايه توقف بنت معديه
هدايه / دكتور حسام زغلول وينه
البنت / مكتب مستر عدنان
هدايه تنفخ تلاقي الباب بيتفتح و حسام طالع من المكتب تروحله
هدايه / عوزاك فى كلمه
حسام / خير فى ايه
هدايه / لقيت ده فى ملف على مكتبى
حسام ياخد النوته و يكرمشها و يحطها فى جيبه و هو بيبص حواليه
حسام / و دى وصلتلك ازاى
هدايه / بقولك لقيتها فى وسط الورق
حسام / و زفت الطين ده وصل لمكتبك ازاى
هدايه / و انا اش عرفنى
حسام / مش فى كاميرات فى ام الشركه دى
هدايه / فى بس
حسام / حبايبك اللى مسيطرين على الدنيا بحالها خليهم يراجعوا كاميرات الشركه و اعرفى مين ابن ال…
حسام يبص يمين و شمال
حسام / اللى حطلك الورقه
هدايه / و لما اعرفه
حسام / نعم يا اختى ؟ايه؟ هيطلع مين يعني ؟ اكيد له سكه و لا مسكه
هدايه / دا انا هنسفه نسف هندمه على اليوم اللى فكر يلعب معايا فيه
حسام/ اقل واجب نعرفه بس
هدايه تسيب حسام و ترجع مكتبها و هو متابعها
………………….
فى النادى
على قاعد على ترابيزه لوحده نغم تجرى عليه
على / خلصتى
نغم / اه شوفتنى
على / شوفتك بس دا انا صورتك كمان عشان ماما نور تتفرج على الشطاره اللى كنتى فيها
ست تعدى معلها بنت صغيره
الست / الف مبروك البيبي يا استاذ على
على يبصلها باستغراب الست تعدى على يشيل نغم و هى بتضحك
على / هو ده اللى اتفقنا عليه
نغم / انا ما قولتش ان ماما نور عملت عمليه
على / امال قولتى ايه
نغم / قولت ان ماما نور هتجبلى اخت تتمرن معانا
على / كفيتي و وفيتي يا اختى يلا اما اروحك
نغم / انت زعلان منى
على / اكيد لا طبعا
نغم / يعني هتجيبلى كاندى
على / طبعا مش لازم نحتفل بالبيبي اللى لسه ما جاش ده
على يشيل شنطه التمرين على الكتف التانى و نغم على كتف و يمشي
……………
فى شقه ندى
ندى و حسام بياكلوا تليفون حسام يرن هدايه يبص و يبص لندى
ندى / رد
حسام / لما اخلص اكل
ندى / ليكون حاجه مهمه
حسام / بلا حاجه مهمه بلا نيله
ندى / براحتك
حسام يكمل اكل تليفون ندى يرن
ندى / نور
حسام / خير ردى ليكون فى حاجه
ندى تاخد التليفون و تقوم تدخل جوه توصل لحسام رساله يقراها
////////////
هدايه / عرفت مين اللى بيلعب بينا لازم اقابلك ضرورى
////////////
حسام يقوم يروح لندى الاوضه يلاقيها مسخسه من الضحك
ندى / احباب الله ايه بس
حسام / عندنا حاجه للحموضه
ندى / ثوانى يا نور … مش عارفه شوف فى درج الادويه
حسام يدخل يدور فى درج فى التسريحه
حسام / مفيش
ندى / طب ما تاخدلك خيارايه ساقعه و لا بق لبن ساقع
حسام / انتى بتصدقى فى الكلام ده … هنزل اجيب شريط من الصيدليه على ما تخلصى مع نور
ندى / تمام
حسام يمشي
ندى / ايوه يا نور معاكى
نور / هو فى ايه ؟ خير
ندى / شكل الاكل حمى على صدره نزل يجيب حاجه للحموضه مع ان الاكل خفيف والله
نور / مش عارفه بس بتحصل
ندى / هههههههههههههه انتى مصدقه انها حموضه بجد
نور / امال
ندى / دا انتى عسل اوى قبل ما تكلميني علاطول هدايه كانت بترنله و ما رداش يرد قدامى
نور / يمكن شغل ما تقعديش انتى بس تربطى الاحداث و تشغلى شارلوك هولمز بتاعك ده
ندى / يا بنتى انا مش فارق معايا هو كتر خيره اوى لحد كدا على اللى بيعمله معانا بس لازم تبقي النقط على الحروف
نور / ازاى يعني
ندى / انا … بتقرطس بمزاجى
نور / هههههههههههههه دا انتى مشكله
ندى / يا اختى بجمله المصايب اللى عندك
نور / دول ملايكه طب والله ما قدرت استنى للصبح و قولت اضحكك معايا
ندى / ياما بهدلنا الدنيا
نور / اتكلمى عن نفسك
ندى / ليه نسيتي لما روحتى قولتى لماما تشرب ميه كتير عشان مامتك بتقول ان دمها تقيل
نور / يا لهوى دا انتى قلبك اسود انتى فاكره الحاجات دى ازاى
ندى / مش بقولك بتقرطس بمزاجى
نور / ههههههههههههه مجرمه
………………..
قدام الصيدليه فى شارع حسام
حسام / قولتلك مش هينفع اجى خير
هدايه / ما انت لازم تتفرج معايا على الفيديوهات
حسام / و هو انتى ليكي عينيه اتنين و انا ليا عشره مثلا ما انا هشوف نفس اللى هتشوفيه
هدايه / باختصار يا حسام انا مش بالعه ان فى حد بيبتزنا
حسام / ثم
هدايه/ اصل انت ما فيش حد دخل البنايه بتاعتك و الاغرب الشقه اللى اجرتها نتقابل فيها
حسام / انا اللى ببتزك يعني
هدايه / و فى خط سير الملفات الملفات ما لمسهاش اى حد غريب او بره الشركه
حسام / يعني انا اللى ببتزك انا اللى بصورنى و ابعت الصور لمراتى عبيط انا صح انتى عبيطه يا هدايه
هدايه / لا مش عبيط و مش انت اللى بتبعت الصور لمراتك بس انت اللى بتبعت النوتس بتاعه الابتزاز و مصورنا سوا
حسام / و ليه مش انتى على الأقل تطيرى ندى و يخلالك الجو معايا انا لا شوفت كاميرات و لا تسجيلات و لا حتى الجوابات دى بخطى مش انتى واصله اوى كدا تعرضيهم على خبير خطوط
هدايه / انت حد ساعدك تلاقى شقتك دى
حسام / اللى انا ساكن فيها دلوقت اه انتى و دى نقطه تانيه كنت ناسيها انك الوحيده اللى تعرفى عنوانى الج …
هدايه / سكت ليه
حسام/ رامى حسون
هدايه / ماله
حسام / جابلى حاجات على البيت … و هو اللى ساعدنى اجر الشقه اللى اتصورنا فيها
هدايه / رامى هو اللى حط المايلز على مكتبى
حسام / عيشي بقي يا شارلوك هولمز عصرك و بعد كدا ابقي فكرى قبل ما تتهميني
هدايه / خلاص سورى بجد … حسام انا اكتر حاجه اكرهها الغدر
حسام / نبقي نتكلم فى الحوار ده بعدين بس فى حته مش فاهمها
هدايه/ ايه ؟
حسام / هو رامى كان يعرف اننا بنتقابل منين انا ما حكيتلوش
هدايه / اكيد كان بيراقبك عشان يطيرك
حسام / و يطيرنى ليه و هو اعلى منى
هدايه/ اكيد عشان انت ما تطيروش ما هو لو مشي انت هتترقى و تمسك مكانه
حسام / مش شرط خصوصا انى منتدب بره
هدايه / ما كنتش منتدب وقتها و دلوقت رجعت بالعكس رامى شخص منطقى جدا
حسام / بس لازم نتاكد برده حرام نظلمه
هدايه / ما تقلقش انا هعرف اتصرف
حسام/ ممكن بقي اروح و لا هفضل متزنب فى الشارع كدا كتير
هدايه/ هشوفك بكره
حسام / اكيد مش بنشتغل مع بعض فى الشركه
هدايه / اوك بيبي سي يو
حسام/ سلام
حسام يقفل و يمسح المكالمه من السجل و هو مبسوط
حسام / باى باى رامى و اهلا بالترقيه الجديده و ربنا يقدرنا على فعل الخير
…………………
فى شقه نور
صفاء بتدى ليس الدرس و نغم قاعده بتحل على يدخل شايل اكياس كتير
على / السلام عليكم
صفاء / و عليكم السلام
يس / جبتلى البلوتاك اللى طلبته
على / جبته ركز مع الميس و ما تتعباش و انا اديهولك … عامل ايه مع حضرتك
صفاء / حضرتى !! كويس الحمد لله يس شاطر و ذكى بس مش بيركز
على / ليه يا ياسو
نور تطلع من جوه
نور / انت جيت يا حبيبي … ادخل انت ريح و انا هشوف مع ميس صفاء مشكله يس
يس / والله بركز
نور / هو مش حضرتك يا ميس بتسمعيله كل حصه برده و بيجيب عشره من عشره و نجمه
صفاء / ايوه بسم الله ما شاء بس و انا بشرح بيقعد يبص يمين و شمال و يعاكس فى اخته و حتى و هو قاعد بيفضل يتحرك كتير و كل شويه يوقع حاجه و ينزل يجيبها
على / عيب يا يس الحاجات دى لو ميس صفاء اشتكت منك تانى
نور / ثوانى بس يا حبيبي هو بس يمكن عشان اكل حلويات كتير النهرده فهيبر منها انا هبقي اخد بالى بعد كدا و مش هاكله سكر قبل الحصه … مش دى برده اول مره يعمل الحركات دى يا ميس صفاء و لا حضرتك كنتى مستنيه باباه يجي تشتكيله
على يبص لنور نور ترفع حاجبها يسكت و يشيل الحاجه و يدخل جوه
صفاء / اكيد لا
نور / لو كررها تانى نادينى و انا هعرف ازاى اعاقبه .. مش هعطلكوا اكتر من كدا هسيبكوا تشتغلوا و اشوف اللى ورايا عن اذنك
نور تدخل تلاقي على واقف فى الطرقه تاخده و تدخل الاوضه و تقفل الباب
على / خير
نور / عاجبك يعني اللى هى عملته
على / عملت ايه
نور / ما تنقطنيش
على / نور
نور/ انا طيبه اه و بحبك اه بس
على / دى متجوزه
نور/ مطلقه
على يستغرب
نور / مطلقه يا على
على / و دا اللى خلاكى تنجنى اوى كدا
نور / انجن … تحب اوريك الجنان الحقيقي و اطلع امشيها
على / هو انا اللى جايبها
نور / و انا كنت اعرف انكوا معرفه قديمه
على / فى ايه يا نور مالك
نور / انا رايحه اشوف اللى فى الفرن لو الست هانم تهمك تقدر تطلع تعتزرلها
على / هى ما تهمنيش بس انتى تهميني
نور / لو كنت اهمك ما كنتش اخدت و اديت معاها
على/ انا !!
نور / انت اصلا جاى بدرى ليه انت مش عارف ان دا معادها
على / جيت اشوفها مثلا
نور تبصله
على / ما يمشيش معاكى انى تعبت مثلا و ما قدرتش اقعد
نور / تعبت تقوم تجيب كل الحاجات دى
على / هى دى سلامتك يا نور !!
نور / ايوه دور على اى حجه و هات عليا الغلط
يس يدخل
يس / المس مشيت و ما اخدتش واجب
نور / احسن روح اللعب فى اوضتك يلا
يس يجرى و نور تروح تقعد على السرير زعلانه
على / الحاجات دى كانت فى الليسته بتاعتك و مش انا اللى جايبها دا مسعد الطيار اديتله الورقه و راح ظبط و لما جه خدت الحاجه و على البيت بس واضح انى كنت فردت ضهرى فى المكتب ارحم
نور / براحتك
على يبصلها و يكتم جواه
على / طب فى غدى طيب
نور تبصله و تقوم
نور / فى ثوانى
نور تروح المطبخ و على يطلع بره يلاقي نغم بتكتب حاجات يروحلها
على / بتعملى ايه يا نونو
نغم / بعمل الواجب
على / امال ميس صفاء ليه ما ادتش ليس واجب
نغم / عشان حل مساله صعبه صح
على / و انتى ما حليتيش
نغم / انا ما اخدتش جدول الضرب
على / هههههههههههه انا اقصد على منهجك
نغم / لا ما ادتنيش بس انا هخلص بسرعه بسرعه و اللعب
على / تمام يا حبيبتي
على يلم الكتب و الادوات كلها فى جنب نور تحط صينيه عليها طبق رز و طبق ملوخية و ربع فرخه و سلطه
على / هاكل لوحدى و لا ايه
نور / الاولاد اكلوا قبل الدرس
على / و انتى !
نور / فارقه معاك يعني
على يسند كوعه على الترابيزه و يسند عليها خده
على / روحى اللعبى شويه يا نونو و بعدين ابقي كملى بعد ما اقوم لحسن اوسخ الكرسه الحلوه بتاعتك
نغم تمد ايدها و تاخد طمطمايه من طبق السلطه
نغم / اتوزعنا
نور / بنت عيب
على يضحك و نغم تدخل جوه
نور / عاجبك كدا
على يمسك ايد نور يقعدها
على / فى ايه بقي قافشه عليا ليه
نور / مفيش
على / اوعا دا الموضوع كبير
نور تبص الناحيه التانيه على يمسك ايد نور و يبوسها تبصله
على / غيره غير مبرره و الله
نور / انت
على / انا بحبك يا نونو والله كل ده ما ليه لزمه و يا ستى خلاص وعد منى هدخل على جوه علاطول دا لو كملت اصلا بعد اللى حصل
نور / مضايق عشانها اوى
على / يا لهوى ما تولع و انا مالى بيها
نور / يا سلام
على / بت اظبطى نكد الحريم ده انا ما ليش فيه ارجعى كدا نونو العقله بتاعتى
نور تبص الناحيه التانيه على يحط شويه سلطه على الرز و يحطها على بق نور تفتح بقها و تاكل
على / ايوه كدا قومى هاتى طبقك بقى و تعالى افتحى نفسي و نادى العيال دول يكون حد فيهم جاع
نور / والله لسه واكلين
على / و ماله ياكلوا تانى
نور / عنيا حاضر
نور تدخل و على يقعد يقلب فى الرز
…………………..
فى الشركه بعد فتره
حسام / طب لو حب ينتقم
هدايه / ينتقم من مين من مستر عدنان ما يولعوا ببعض
حسام / دا انتى قادره … بس لحقتى تسبكى الليله دى كلها
هدايه / اسبك ايه و احمر ايه
حيام يضحك و يكتمها
هدايه / انا هنا دورى انى امسك اخطاء على كل واحد
حسام / دا انا لازم اخد بالى بقي
هدايه / طول ما انت حبيبي هنضف وراك بس هخلى زبالتك عندى عشان لو يوم نسيت نفسك عليا افكرك
حسام / حقك طبعا بس انتى بتلحقى تعملى كل ده ازاى و امتى
هدايه / ما انا مش لوحدى كلكوا بتساعدونى مش انت برده بتساعدنى يا سمسم
حسام / يا نهار ابيض دا انا خدامك بس بالمناسبه بقي ماسكه عليا ايه
هدايه / ناوى تغدر
حسام / من باب العلم بالشئ يعني
هدايه/ انت ماسك عليا ايه
حسام / ان كنتى انتى مش لوحدك فانا وسطيكوا بطولى و مش بطولى بس دا انا جاى و شايل اهلى على كفى يعني خلصان خلقه
هدايه / تؤ مش مصدقاك
حسام / والله ما معايا حاجه حتى الكام صوره اللى لينا سوا ادانه ليا ندى لو شافتهم هتولع فيا
هدايه / انت بتديها اهميه عاليه اوى
حسام / حاولت والله كتير بس ادمان زعلها بيوجعنى و بعدها بيجننى و اللحظه اللى بتحن عليا فيها بالدنيا
هدايه / كدا هغير منها امال مين نور دى
حسام/ اختى الصغيره
هدايه / حلوه زيك كدا
حسام / و هو انا حلو
هدايه / لما تلاقى حجه تخلع بيها من ندى ابقي اقولك
حسام / ما بلاش مش كل مره تسلم الجره
هدايه / براحتك
هدايه تسيب المكان و تمشي و حسام متابعها
…………………..
فى عياده النسا
نور / يعني ايه بعد كل ده
الدكتوره / انتى عارفه ان احتمال الحمل من الاول كان ضعيف
نور / بس انتى اديتيني امل ما كنتى اختصرتى عليا اللفه دى زى غيرك و قولتى انى ما بخلفش
على / نور
نور / بلا نور بلا زفت
نور تعيط ياخدها فى حضنه
على / وحدى الله يا نور
نور / مش بعد كل ده
الدكتوره / انتى ما ينفعش تفقدى الامل من اول مره
نور تبصلها
نور / طبعا نكررها مرتين تلاته عشره و انتى خسرانه ايه
على / عيب يا نور مالك اهدى
نور / حد فيكوا اتوجع قدر حد فيكوا تعب قدى
على / دا رزق
نور / انا بصلى و بصوم و بطلع زكاه ما باذيش حد بساعد الناس ما بيرزقنيش ليه
على / لا اله الا الله حرام عليكي
نور تقوم و تفتح باب العياده و تمشي
على / انا اسف حقيقي اسف
الدكتوره تهز راسها على يطلع يجرى ورا نور يلاقيها ماشيه فى الشارع يحصلها
على / على فين يعني و بعدين ايه حركات العيال دى
نور / انا محتاجه ابقي لوحدى
على / مش هيحصل ما ينفعش اصلا اسمعى تعالى نروح نقعد فى مكان هادى على النيل … اقولك تيجي نروح نجيب لقمه و ناخد مركب و نقضي اليوم بعيد عن الناس فى النيل
نور / بقولك محتاجه ابقي لوحدى مخنوقه
على / و انا كمان والله مضايق بس مضايق عشانك
نور / كنت بدات احلم كنت بدات اصدق
على / قولنا هنمشي الطريق لاخره نجرب تانى و تالت
نور / ازاى بس
على / مش شغلك بقي ربنا هيرزق
نور تسيبه و تمشي يحصلها
على / مش هجرى وراكى فى الشارع ما تعصبينيش بقي
نور تمسح دموعها يمسك ايدها و ياخدها تركب العربيه
على / تحبى نتفسح لوحدنا و لا نجيب العيال
نور/ روحنى و خلاص
على يبصلها بحزن و يهز راسه و يسوق
…………………
فى شقه امانى
امانى / الدكتوره قالت ترتاح لكن ازاى ترتاح و هى شغاله داده لاولاد الشوارع
محمد / انتى من الاول عارفه ان نسبه نجاح العمليه ضعيفه
امانى / البت مقهوره على الاخر خايفه تعمل فى نفسها حاجه
محمد / انا هروح اجبلها حاجه حلوه و اطلع اقعد معاها
امانى / ما كنت قعدت انا انما دخلت قفلت على نفسها و ما رديتش ترد عليا
محمد / و انتى ما صدقتى سبتيها و نزلتى
امانى / لا طبعا بس عريس الهنا قالى انزل و هو هيفضل جنبها
محمد / ماشي
محمد يلبس
امانى / هتخرج برده
محمد / امال اقعد جنبك هروح اجبلها حاجه تغير مودها
امانى / هاتلها ورد و لا شيكولاته بتحبهم
محمد / على الله
محمد يمشي و امانى تقفل الباب وراه و تدخل المطبخ
………………….
فى شقه نور
نور نايمه فى السرير و واخده نغم فى حضنها
نغم / هو الدكتوره كتبتلك حقن تانى
نور / مش هاخد حقن تانى ما تخافيش
نغم / امال زعلانه ليه
نور / عملتى واجبك
نغم / انا ما اخدتش درس النهرده و الواجب مخلصاه امبارح انتى نسيتى
نور / كلتى
نغم / تيته منال عملتلنا جلاش و ساندوسه
نور تبتسم
نغم / حطت بسله مع اللحمه و فلفل احمر مع الجبنه و الزاتون انا مش بس الزاتون بتاعها كان وحش
نور / تحبى اعملك حاجه تاكليها
على يدخل شايل صينيه عليها حاواوشي
على / الحواوشي السخن اللى بيشر سمنه
يس يدخل يقعد على السرير جنب نور
نور / نغم اكلت ساندوسه
يس / يووووه انتى مش هتتعلميها بقي
نور / و انا صغيره كنت بقول عليها القطايف المثلثه
على يقعد و الصينيه على رجله
………………..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
