رواية روح الشيطان الفصل الأول 1 بقلم محمود الأمين
رواية روح الشيطان الجزء الأول
رواية روح الشيطان البارت الأول
رواية روح الشيطان الحلقة الأولى
المكتوب علي الجبين لازم تشوفه العين.. والمكتوب مفيش منه هروب
ده كلام جدي العمدة اللي كنت دايما بسمعه قبل ما يموت ويسبني ادرس لوحدي العلم اللي سبهولي
ومش عارف ليه افتكرته دلوقتي.. وأنا واقف قدام سرير وعليه بنت في العشيرنات وعلي حسب كلام اهلها انها عروسة لسه مكملتش حاجة
نظرتها ليا كلها غضب حاولت تقوم تهجم عليا لكنها متكتفة.. مسكت كوباية المية وقريت عليها وشربتها منها بالعافية.. صرخت بعنف وبدأت ترجع حاجة زي دم بس لونه أسود.. قربت منها عشان اشوفها حصلها اي.. لكن شوفت اللي مكنتش اتوقعه
….
#روح_الشيطان
#الجزءالأول
أنا الشيخ سعدون المحمدي.. الشيخ المميز في مكان بعيد عن صخب المدينة ودوشتها
أنا عايش علي حدود السودان.. أبويا مصري وأمي سودانية
انا هكون صريح معاكم انا الناس بيقولوا عليا الشيخ هما اللي مطلعين عليا اللقب ده
بس بيني وبينكم.. لقب الشيخ ده يطلق علي واحد عارف ربنا حافظ كتابه وبيعالج بيه، أنا أه بعالج بالقرآن بس ساعات تانيه بعالج بالسحر وتحضير الجن
تقدروا تقولوا عليا معالج روحاني.. او دجال او ساحر شوفوا اللي يريحكم
أنا جاي أحكي حكايتي عشان خلاص أنا بيني وبين الموت ساعات قليلة.. أنا دلوقتي في الكهف بواجه مصيري اللي انا أخترته بايدي.. مصيري ده اللي خلي روح الشيطان تساعدني في كل خطوة كنت بعملها
..
كنت عيل يدوب مكملتش ال13 سنة.. بيلعب مع العيال في الشارع وحياته عادية جداً.. حياة طفل جميلة
بس الجمال ده كان بينتهي مع رجوعي للبيت.. وبالذات لما كنت أشوف ابويا وهو نازل من كهف الجبل وشه كان بيبقي عليه غضب ربنا.. وأول ما يشوفني يقولي
_ اي يا خلفة الهباب أنت بتبصلي كده ليه؟.. غور علي اوضتك انا مش طايق أشوفك ولا أشوف أمك البومة دي
من يوم ما اجوزتها والعيشة زفت وجات زودتها بخلفتك الهباب دي
الكلام كان بيتعب نفسيتي وبيخليني اكرهوا.. مش مصدق أن في أب بيكره أبنه كده
ولما كنت أسأل أمي هو بيعملنا كده ليه؟
كانت تسكت وتقولي بكرة مسيرك هتفهم.. الجملة دي أتعودت عليها منها من يوم ما وعيت علي الدنيا
..
لحد ما في يوم قررت أروح ورا أبويا كهف الجبل.. كل اللي أعرفه ان أبويا بيروح هناك وبيكسر حجارة شغال في محجر يعني.. لكن لاحظت ان مفيش حد بيروح هناك غيره
طلع اليوم ده كالعادة بعد الفجر وطلعت وراه من غير ما يشوفني.. ومشيت وراه لحد ما دخل كهف الجبل
وهناك شوفت اللي محدش يتوقعه.. شوفت ابويا ومعاه واحد شكله مش غريب عليا لابس جلبية قصيرة وعلي دماغه عمة بيضة وحولين رقبته سبحة كبيرة.. الاتنين قعدوا في دايرة وحواليهم شمع كتير
وكانوا بيتهزوا لورا ولقدام وبيقولوا كلام غريب أنا مش فاهم منه حاجة.. وفي اللحظة دي سمعت صوت تخين بيكلمهم وبيقول
_ أنا قولت اللي عندي العهد هيتم بدم أبنك يا محمدي.. أنت سخرتني عشان الاثار والمساخيط اللي مدفونة في الكهف وكنت فاكر ان التمن سهل… بس التمن ده انا اللي احدده يا محمدي مش أنت
رد عليه أبويا وهو بيترعش
_ أطلب مني أي حاجة.. بس بلاش أبني بلاش أنا مليش غيره.. مش هقدر
..
أبويا أترفع من علي الارض.. شوفته قدامي بيتخنق وجسمه بيتعصر وبيموت.. جريت نزلت اجري وانا ببكي من هول المنظر.. رجعت البيت صحيت أمي وأنا بعيط وحكتلها اللي حصل
أمي أنفجرت في العياط.. وقلتلي اني لازم اجهز هدومي بسرعة عشان هنمشي من البلد دي، لكن وهي بتكلمي لمحت كتاب أسود مكتوب عليه روح الشيطان.. أخدته من غير ما تشوفني ورجعت الاوضه جهزت نفسي ومشيت مع أمي لحد ما ركبنا القطر وأنا مش عارف أحنا رايحين فين؟
أمي أتكلمت وقلتلي
_ لازم يا ولدي تعرف اصل الحكاية.. الموضوع بدأ مع جدك اللي كان عمدة البلد وقتها سمع ان في كهف الجبل مدفون آثار.. وزي اي حد طمع طلع الجبل واخد معاه أبوك بس ملقيوش حاجة.. فلجأ لواحد أسمه عثمان.. وده معروف عنه أنه دجال
وكان المفروض أنه هيساعدهم لكن كل اللي عمله أنه حذرهم وقالهم
إن الكهف ده مفهوش آثار ده فيه روح شيطان محبوسة أتمردت علي العشيرة وحبسوها هنا.. واداهم كتاب عشان يصدقوا كلامه
الكتاب كان أسمه روح الشيطان.. وفي اليوم ده جدك صحي وقال أنه شاف شيطان في الحلم وقاله انه مستعد يديهم الاثار في مقابل تحرير روحه وده عن طريق طلسم جوه الكتاب
جدك وابوك فعلاً حرروا روح الشيطان.. بس للاسف مكسبوش حاجة، الشيطان خبيث وعمره ما كان صادق في كلامه
لكن المصيبة أن الشيطان طلبك انت من يوم ولادتك وقال عليك أنك طفل مميز ومعرفش يعني أي لكن انا كان لازم اخدك ونمشي عشان بعد موت ابوك اكيد كنت هتكون صيدة ساهلة ليهم
…
كلام أمي كان أشبه بحكايات ألف ليلة وليلة.. بس انا كنت صغير وقتها ومقولتش لأمي أن الكتاب معايا.. نزلنا القاهره وعشنا عند خالتي اللي كانت ارملة وأبنها في الجيش
ومرت الايام ونسيت الكتاب وحفظت القرآن الكريم وبقيت أعالج الناس من المس والسحر.. كنت بعالج وقتها بكلام ربنا وكتابه
والناس كانت بتلجأ ليا علي طول عشان احل المشاكل اللي عندهم.. لحد ما في يوم كنت نايم وحلمت بالكهف من جديد.. شوفت نفسي واقف في الكهف وحواليا شمع اسود كتير وواقف قدامي واحد لابس بدلة مهندم جداً وشيك وانيق وقلي
_ هربت مننا زمان.. بس خلاص هنتقابل تاني انا لسه عاوزك تكون معايا، أنت اللي هتكمل العهد يا سعدون
_ عهد اي أنا مش فاهم حاجه؟
_ عهد تحرير كامل روحي.. ابوك وجدك حرروا جزء وترجعوا
..
رجعت لورا وانا بستعيذ بالله من الشيطان الرجيم.. كلام أمي كان بيتكرر في عقلي ده الشيطان
ملامحه بدأت تتغير والبدلة الشيك تتقطع.. عينيه أتقلبت ابيض وشه بقي اسود عضمه برز وبقي شكله مقرف وقلي بصوت مخيف
_ هتحرر الروح يا سعدون.. هتحررها يا أما هتموت
..
صحيت من النوم باخد نفسي بصعوبة تليفوني رن.. مسكته ورديت وكان المتصل عمي طه البقال اللي المفروض هروح دلوقتي عندهم عشان بنته ممسوسة من الجن
قومت غسلت وشي واتوضيت وصليت وروحت علي هناك
في كلام كان بيتردد في عقلي
المكتوب علي الجبين لازم تشوفه العين.. والمكتوب مفيش منه هروب
ده كلام جدي العمدة اللي كنت دايما بسمعه قبل ما يموت ويسبني ادرس لوحدي العلم اللي سبهولي
ومش عارف ليه افتكرته دلوقتي.. وأنا واقف قدام سرير وعليه بنت في العشيرنات وعلي حسب كلام اهلها انها عروسة لسه مكملتش حاجة
نظرتها ليا كلها غضب حاولت تقوم تهجم عليا لكنها متكتفة.. مسكت كوباية المية وقريت عليها وشربتها منها بالعافية.. صرخت بعنف وبدأت ترجع حاجة زي دم بس لونه أسود.. قربت منها عشان اشوفها حصلها اي.. لكن شوفت اللي مكنتش اتوقعه.. فتحت عينيها كان لونهم ابيض تماماً مسكتني من رقبتي وهي بتقول
مهما هربت مسيرنا هنتقابل يا سعدون.. هنتقابل يا سعدون
وفجأة..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية روح الشيطان)
