رواية رجل في مهمة مستحيلة الفصل الثامن 8 بقلم عادل عبدالله
رواية رجل في مهمة مستحيلة الجزء الثامن
رواية رجل في مهمة مستحيلة البارت الثامن
رواية رجل في مهمة مستحيلة الحلقة الثامنة
واثناء ذهابي لمكان اقامته مع زوجته الثانية ( اللي هي غالبا نجلا ) لقيت موبايلي بيرن بصيت فيه لقيت رقم شهاب بيتصل .فتحت عليه علشان ارد …..لقيت شهاب بيرد عليا وهو بيبكي وبيقولي الحقني يا بابا ………….
: ايوه يا شهاب فيه ايه ؟
: الحقني يابابا دنيا انتحرت .
:: انت بنقول ايه ؟
: بقولك دنيا انتحرت يابابا .
جسمي كله بينتفض ومش قادر اسيطر علي اعصابي .
وقفت بالعربية حتي اتمالك اعصابي .
رجعت علي القاهرة وحسيت ان الطريق طويل جدا ومشفتش اي حاجة في الطريق وكأني اصيبت بالعمي .
معرفش رجعت ازاي .وروحت علطول للمستشفي واول ما دخلت المستشفي وبسأل علي دنيا …..
عرفت انها حاولت الانتحار ولكن الحمد لله الاطباء نجحوا انهم ينقذوها .
طلبت اني اشوفها علشان اطمن عليها ولكن طبعا كان ممنوع .
اكيد كانت عاوزة تموت علشان مش قادرة تواجهنا .
كنت عاوز اطمن عليها بأي طريقة .
ازاي دنيا عاوزة تموت نفسها !! انا مقدرش اتخيل انها تضيع مني .انا ملحقتش افرح بيها .مش كفاية كبرت وبقيت عروسة وانا بعيد عنها .
سألت في المستشفي عن حالة امي في العزل .الدكتور قالي ان حالتها مش مستقرة .وان مقاومة جسمها للفيروس ضعيفة .وان الفيروس اتمكن من الرئتين .وانهم هيحاولوا بكل الطرق مقاومة الفيروس والسيطرة عليه .
اتصلت بهشام علشان اعرفه بمرض امنا .هشام اول ما عرف قالي انا جايلك حالا .وفعلا في نفس اليوم كان هشام معانا في المستشفي .
هشام كان عاوز يشوف ماما باي طريقة ولكن مقدرش .
قعد هشام والدموع في عنيه وقالي كنت بسمع عن الفيروس ده ومش مصدق انه خطير بالشكل ده .كنت بقول انهم مزودنها شوية . وسبحان الله امي وبنت اخويا يتصابوا به ! ربنا يقومهم بالسلامة .انا خايف علي امي اوي .
هشام اصر انه يفضل جنب ماما لحد ما يطمن عليها .
قلت في نفسي يبقي لازم اوصل لرؤوف في اسرع وقت .
ركبت العربية وسافرت رغم ان الليل كان جي وقلت انسب وقت اني اروحله بالليل علشان يكون موجود ومش يهرب مني .
وصلت للعنوان اللي اخدته من اهله وطلعت البيت وبمجرد ما فتح رؤوف الباب أصابه الذهول لما شافني ومكنش عارف يعمل ايه .
قالي اهلا وسهلا انت عرفت مكاني هنا ازاي ؟معلش سامحني مش هقدر اقولك اتفضل علشان فيروس كورونا انت عارف مش بندخل حد في البيت .استني انزل معاك .
ضحكت وزقيته ودخلت وقلتله : متخافش دا انت الكورونا تخاف منك .
: استني بس .انت بتتهجم علي بيتي كده ليه ؟
: بتهجم ايه يا راجل ! دا احنا حتي نسايب متقولش الكلام ده .
: اللي بيني وبينك ايه ؟ مش اختك بردو ؟ هطلقها ومتتهجمش علي بيتي كده .
: لا اللي بيني وبينك مراتي .
: مراتك مين ؟ انت اتجننت ولا ايه ؟ ولا الغيبوبة اللي كنت فيها لسه مأثرة عليك ؟
: دا انت اللي باين عليك لسه فاكرني في غيبوبة .مراتي نجلا اللي اخدتها من المستشفي وهي فاقدة الذاكرة وفهمتها ان اسمها ياسمين .
: لا انت كده مجنون فعلا .
: لا .دا انت لسه مشفتش حاجة من جناني . تخطف مراتي وتسرق فلوسنا بعد ما اختي امنتك عليها !!
: انا مش سرقت حاجة .ده تعبي وشقي عمري معاكم في الشركة .
: تعبك ايه بس يا حرامي !! تعمل شركة باسم امك وتسرق شغلنا وفلوسنا ؟!!!!
: هو انتوا عاوزين الفلوس تاخدوها علي الجاهز وانا يفضل يطلع عين اهلي وافضل شغال عندكم زي ما انا .
: طيب ما انت تاخد حقك وحق تعبك بما يرضي الله .هو لازم تسرقنا وتسرق فلوسنا !! دا انا حتي اول ما رجعت قلتلك اني هحافظ علي وضعك في الشركة وهنقسم الادارة بينا .يعني مش بنسرق مجهودك علشان تعمل كده .انما هقول ايه بس .الواطي هيفضل واطي .
وهنا خرجت نجلا من احدي الغرف لما سمعت كلامنا .
رؤوف قالها : ايه اللي خرجك ؟ ادخلي جوه .
قالتله : ايه الكلام اللي انا سمعته ده ؟
قلتلها : ايوه يا نجلا انا طاهر جوزك .والحيوان ده ضحك عليكي .وانتي فاقدة الذاكرة وهو ضحك عليكي وفهمك ان اسمك ياسمين .
: ايوه انا عارفة اني فاقدة الذاكرة من سنين .
وهنا جري رؤوف ونزل من الشقة .حاولت اني الحقه قبل ما يهرب ولكني مقدرتش .
نجلا قعدت مذهولة ومش بتتكلم .
سألتها : مالك ؟
: حاسة اني تايهة ومش فاهمة حاجة او اني بحلم .
: لا مش بتحلمي .هي دي الحقيقة .انتي مراتي انا .هو اتجوزك عند مأذون ؟
: لا .هو فهمني اننا اصلا متجوزين من قبل الحادثة .وبعدين تعالي هنا قولي لما انت جوزي سبتني ليه الفترة دي كلها معاه .
: لا .ده موضوع طويل هشرحهولك بعدين .يلا بينا نروح بيتنا .
: بيتنا ايه بس !! انت عاوزني اصدقك وامشي معاك ازاي !! مش يمكن تكون بتضحك عليا ؟ ايه اللي يثبت كلامك ؟
: خدي يا ستي شوفي …ادي صور فرحنا وادي قسيمة جوازنا وادي صورنا مع اولادنا …..صدقتي كلامي ؟
سكتت نجلا شوية وبعدين قالتلي. : ايوه صدقت .بس صبرك عليا شوية استوعب الكلام ده .
بعدها نجلا بكت وقالتلي : يعني انا من عشر سنين وانا عايشة مع الراجل ده في الحرام ؟!!!!!
رغم ان النار كانت بتاكل قلبي من جوه ولكني حاولت اخفف عنها وقلتلها : انت ملكيش ذنب في حاجة .هو اللي انسان سافل وحيوان وانا مش هسيبه .لازم انتقملك منه .
بعدها اخدت نجلا ومشينا علشان نرجع القاهرة .
رجعنا القاهرة ودخلت البيت …اول ما شهاب شافها جري عليها وحضنها وبقي فرحان اوي برجوعها .
طبعا كنت قلتلها في العربية واحنا راجعين ان مادام انها لسه مش متأكدة من كلامي رغم الأثباتات اللي شافتها اننا هنعيش في بيت واحد ولكن منفصلين لحد ما ترجع لها الذاكرة او انها تطمن لصدق كلامي تماما .
لما سألتني عن حياتنا وكنا عايشين ازاي وايه اللي حصل قلتلها اقعدي مع شهاب ابنك وهو هيحكيلك كل حاجة ولو في حاجة شهاب مش قالها ابقي أسأليني عليها .
وقلتلها بلاش تحكي لحد تفاصيل ملهاش لازمة زي مثلا ان رؤوف كان عايش معاكي علي انك مراته والكلام ده .
دخلت انام انا وسبت نجلا مع شهاب يحكلها ويشبع من امه لانها اكيد وحشاه اوي .
ودلوقتي انا خلصت اول مهمة ليا اني ارجع مراتي .لكن لسه لازم اخلص اختي من رؤوف وبعد كده ارجع فلوسنا و انتقم منه .
ده طبعا غير مصيبة دنيا بنتي اللي لحد دلوقتي مش عارف هتصرف فيها ازاي .ومرض امي وشركتنا اللي علي وشك انها تفلس .
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية رجل في مهمة مستحيلة)
