رواية خدعة حب الفصل السابع 7 بقلم أمنية حاتم
رواية خدعة حب الجزء السابع
رواية خدعة حب البارت السابع
رواية خدعة حب الحلقة السابعة
كريم: اسمعيني للاخر ومتفهمنيش غلط
كارما: حاضر
كريم: انا كتبت اسمك في معسكر تدريبي للأضربات النفسيه
كارما بصدمه: نعم!!!!!
كريم: انتي كنتي عاوزه تاخدي خبره اكتر ف لما ليقت المعسكر ده كتبت اسمك ع طول
كارما بنرفزه: بس برضو كان المفروض تاخد رائي
كريم: قولت اعملك مفاجأة
كارما: ياريتك ما عملت يا شيخ
والمعسكر ده فين إن شاء الله
كريم: في إسكندريه
كارما: كده احلوت اوي
اسكندريه في الشتا!!!!
انا هسيب مهمه التهزيق دي ل ماما تقولهالك علي رواقه كده
كريم بضحك: انتي بعد كده هتشكريني علي السفريه دي….جهزي نفسك السفر بعد يومين
كارما: او هدعي عليك أيهما اقرب
اضايقت لأني مكنتش عامله حسابي علي السفريه دي…… بس بعد كده هديت شويه لأني هتعلم حاجه بحبها وهغير جو برضو
مازن: اي رأيك اوصلك وتديني الأجره علشان مش معايا فلوس وكده
كارما بهزار: طالما مش معاك فلوس يبقا لازم اكسبك طبعاً
مازن بضحك: يا سلام علي طيبه قلبك
يمكن لو كان قالي ممكن اوصلك عادي كده كنت هقوله لأ شكراً ومش عاوزه اتعبك
لكن طريقته وهزاره بيخلوني اوافق
ولا انا بستهبل وبحب وجوده وكلامه اصلا!!!
مازن: تحبي تسمعي اغاني يا فندم
كارما بغرور مصتنع: اه ياريت اغنيه هاديه كده
مازن: يارب بس في الاخر تديني تقيم كويس
كارما بضحك: اه طبعاً طبعاً
شغل اغنيه مدحت صالح وانا بحب صوته جدا” قلب واحد مش كفايه في حبي فيك،
ده انت محتاج الف قلب يحس بيك..
قلب يعشق بس صوتك، قلب يتأمل سكوتك،قلب تاني عشان عينك…..شوف بقا كام قلب لما يجي يوم والمس ايدك….”
كارما: حلوه اوي الاغنيه دي
مازن: طيب ممكن استغل اللحظه دي واخد رأيك في حاجه؟؟
كارما: اه اتفضل
مازن: في واحد صحبي بيحب بنت اوي بس مش عارف يعمل إيه علشان هي تفهم
كارما: طب ما يواجهه اسهل
مازن: ما هو خايف يخسرها او هي لما تعرف تبعد عنه… فهماني؟
كارما: اه فهمتك
بص احسن حاجه يلمحلها… فتره التلميح والأ*ستهبال دي بتكون حلوه
مازن: ايوه يعمل إيه بقااا!!
كارما: يفرحها…يهتم ب تفاصيلها… يقدر اي حاجه هي بتعملها… و مثلا يشغلها اغنيه حلوه كده…البنات بتحب التقدير والتفاصيل
مازن: اممممم، انتي متأكده ان هي كده هتفهم!!
كارما: اه طبعاً البنات بتفهمها وهي طايره كده
مازن: يا مشاء الله اومال انتي مش فهماها ليه
كارما: إيه!!
مازن: قصدي يعني هي… هي مش فاهمه ليه….خلاص سيبك من الموضوع ده
كارما بهزار: طيب خلاص وصلنا
ها عاوز كام بقا؟؟؟
مازن: ما انا اخدت حقي بالاستشاره دي
المهم حضرتك تكوني مبسوطه يافندم
كارما بضحك: والله ده احسن اوبر
هعطيك 5 نجوم كمان
__________________________
تاني يوم كان اجازه ف نمت براحتي
صفاء: انتي ياهانم ياللي نايمه،الساعه 2 الظهر
حتي يوم الاجازه مش بتقومي تساعديني
كارما: صباح الخير يا ماما
صفاء: صباح إيه!!!
نفسي مره تصحي بدري وتساعديني كده
كارما: خلاص صحيت اهو
صفاء: إيه الاوضه المبهدله دي والكركبه دي
كارما: انا مرتبه الكركبه بتاعتي
صفاء: ازاي يعني؟؟
بصي المكتب مبهدل ازاي والهدوم وقعه إزاي….اعمل فيكي اييه تعبتيني
كارما: انا هرتبها دلوقتي اهو
وبعدين انتي هترتاحي مني الايام إللي جايه
صفاء: ليه…هتأجري شقه وتقعدي فيها مع كركبتك
كارما بهزر: رغم أن انتي بتتريقي
بس هو ده إللي هيحصل
صفاء: انتي وحشك الضرب يعني ولا إيه
كارما: افهميني بس يا ست الكل
صفاء: اللهم طولك يا روح…سمعاكي اهو
كارما: احم احم، انا عندي معسكر تدريبي في اسكندريه
صفاء: ااا اه… اي ده فين يا عين امك!!!!
كارما: انا مليش دعوه والله
ابن اختك هو إللي كتب أسمي
صفاء: مااااشي يا كريم
بس عادي ممكن تشيلي اسمك
كارما بحذر: اصل.. اصل بصراحه كده اسمي اتقبل وهروح معاهم بعد بكره
صفاء: ياااااسلام!!! ده امر واقع يعني
كارما بتمثيل: للأسف يا ماما
ده شغلي وهيحصلي مشاكل لو مروحتش
صفاء: يعني ايه!!! هتسبيني لوحدي!!
هنام ازاي وانتي برا البيت؟؟
كارما بحنيه: هطمنك عليا كل شويه وهاخد بالي من نفسي والله…متخافيش عليا
وبعدين ابقي اقعدي مع خالتي
صفاء: ده انتي هتسافري بعقلي وقلبي يا بنتي انا مليش غيرك في الدنيا دي
دي اول مره فعلاً اسافر او ابعد عنها….رغم أنها كانت بتزعق من شويه لكن خوفها عليا ولمعه عيونها بالدموع وجعتني اوي
مفيش حد هيخاف عليا ولا هيحب مصلحتي قد أمي مهمها زعقت او اتخانقت معايا كل ده بيكون ل مصلحتي
فاطمه: عامله اكل ايه ياصافي
صفاء بضحك: ادخلي لحد ما احضر الغدا يا لمضه
فاطمه: هدخل ارخم علي بنتك شويه
كارمااااااااااا
كارما: انتي بتنادي علي واحده تايهه يابنتي
فاطمه بصوت واطي: مين القمر اللي كان بيوصلك امبارح ده هاا هاااا
كارما: اديني فرصه ارد طيب
ده دكتور مازن زميلي
فاطمه بغمز: زميلك بس برضو؟؟؟
كارما: اه احنا زمايل
بس هو شاطر في شغله وجدع ودمحترم
و…..
فاطمه: كده احلوت اووي
اشوف صورته بقا
كارما: هجبلك صورته منين دلوقتي!!!
فاطمه: من الاكونت بتاعه مش محتاجه ذكاء يعنى
كارما: اه صح
استني ادور عليه كده علشان احنا مش اصدقاء ع الفيس
فاطمه: عادي هتلاقيه بسرعه
وممكن يكون صديق عند كريم كمان
فعلاً لقيت الاكونت بتاعه بسرعه
كارما: اهي دي صورته
فاطمه: ايه ده ايه ده
دي عيونه عسلي وعنده دقن وجسمه رياضي
كارما: اهدي ياحبيبتي فيه إيه!!
فاطمه بضحك: قمرر والله بالدقن دي
وانا نقطه ضعفي الدقن
كارما: وبعدين بقا في إللي عاوزه تتربي من اول وجديد دي
فاطمه: ياستي انتي زعلانه لييه
ما انتو زمايل بس
كارما: ولو ولو متقوليش عليه كده
فاطمه بغمز: طب بذمتك مش قمر؟؟!
كارما بإبتسامة: بصراحه هو قمر ودمه خفيف كمان
فاطمه برخامه: ما تعرفيني عليه يا كوكي
كارما: امك بتنادي عليكي يا فاطمه
فاطمه بضحك: لأ مش مقنعه دي شوفي حاجه غيرها
كارما: اه صح دي خالتو فوق
خلاص قومي ناكل علشان جعانه
فاطمه: خلاص ماشيه اهو
كارما: بقولك إيه.. ابعتله ادد!!
فاطمه: لأ… استني لما هو اللي يبعت
كارما: لا انا قررت ابعته
اصل احنا زمايل ف عادي يعني
فاطمه: اومال بتسأليني ليييه لما انتي هتنفذي إللي في دماغك؟؟؟
كارما: عااادي هي دي اول مره يعني
بعتله الادد وفضلت ادور في الاكونت بتاعه وعرفت بيتابع إيه… والاكونت عجبني بصراحه و…. إيه ده ده بيحب عمرو حسن زيي!!!! يا محاسن الصدف
صفاء: يلا يا كارما الأكل جهز
______________________________
إسلام: صباح الخير يا عريس
إيه بقا هتعمل الخطوبه أمته
كريم: لسه محددناش المعاد
إسلام: مالك يا كريم
مش حاسك فرحان ليه!!
كريم بتنهديه: والله مش عارف مالي ومتردد
إسلام: متردد!!!!
ده انت كنت معجب رضوي من فتره وقولت إنك حبيتها
كريم: اه فعلاً حبيتها
بس هو الحب ده كفايه اني اكمل وافتح بيت؟؟!
إسلام: مش فاهم قصدك
كريم: يعني انا بحبها… بس الحب ده هيخلني اقدر اعدي إي حاجه في المستقبل!!
إسلام: انا هقولك رأيي وانت حُر
الحب لوحده مش كفايه ابداً…. لازم يكون فيه تفاهم بينكم… كل طرف فيكم متقبل عيوب الطرف التاني مش يكون بيحب المميزات وبس
يكون فيه تقدير واحترام هو ده اللي بيولد الحب
كريم: طيب ما انا ممكن احبها الاول وكل إللي انت قولته ده يجي بعدين
إسلام: معظم المشاكل إللي بنشوفها اليومين دول ومنتشره علي السوشيال ميديا سببها ان الراجل او البنت حبت ف اتجوزت وخلاص منغير ما تدي نفسها فرصه تشوف الشخص ده اخر حدود عصبيته إيه؟ هيقدر يستحملها ولا لأ؟؟
في زعله وخصامه هيحترمها برضو ولا لأ؟
ف بعد كده بنشوف خناقات ومحدش عارف يعدي غلط الطرف التاني وع_نف اسري وبيحصل وطلا_ق
والحب مش بيشفع و بيختفي كمان…
كريم: انا فهمت قصدك
وهاخد قرراري منغير تردد
إسلام: قرار ايه!!
كريم…………..
______________________________
كنت قاعده بخلص تقارير علشان اسلمها قبل ما أسافر وبجهز الشنطه لقيت مازن بيتصل بيا
مازن: فاضيه شويه؟
بصيت للورق إللي قدامي والشنطه بتاعتي والاوضه إللي مبهدله ورديت بكل تلقائية:
: اه فاضيه…فيه حاجه؟
مازن: ااا… يعني…كنت عاوز اقولك حاجه
كارما: قول
مازن: طيب إيه رأيك نتقابل ونتكلم شويه
كارما: تمام…انا كمان كنت عاوزه اشتري شويه حاجات
مازن: خلاص كمان نص ساعه نتقابل
قومت بسرعه واختارت فستان هادي بدل اللبس الكاچول بتاع كل يوم
مازن: زي الاميرات في الفستان
كارما بتوتر: ااا… اه تغير يعني
مازن: تعرفي أن صاحبي إللي سافر من سنتين كلمني إمبارح
كارما: والله كويس أنكم لسه علي اتصال مع بعض
مازن: اه احنا اصدقاء من زمان
وقالي ان فيه فرصه حلوه إني اسافر واشتغل هناك
مش عارفه ليه اتفاجأت واضايقت بس اتكلمت عادي
كارما:امممم وانت موافق بقا
قررت تسافر يعني؟؟؟
مازن: يمكن علشان كده حبيت اتكلم معاكي انهارده
كارما: اشمعنا!!!
مازن: انا عاوز اقولك حاجه مهمه
كارما: وانا كمان عاوزه اقولك حاجه مهمه
مازن: طيب يلا قولي انا سامعك
كارما: لا قول انت الاول
مازن بهزار: احنا نقول مع بعض
انا هسافر
انا مش هسافر
الاتنين بصو لبعض بصدمه…….
يتبع..
لقراءة الفصل التالي : اضغط هنا
لقراءة الرواية كاملة اضغط على : (رواية خدعة حب)
