رواية حواسي السبع الفصل الثالث 3 بقلم هاجر نور الدين
رواية حواسي السبع الجزء الثالث
رواية حواسي السبع البارت الثالث
رواية حواسي السبع الحلقة الثالثة
بصيتله وأنا هنفجر من الغيظ من بروده وقولت بعصبية:
_هو إي اللي جيتي بدري وجيت في ميعادي إنت مش قولتلي إني هلاقيك دايمًا هنا
رد عليا بنفس الهدوء وهو بيرفع حاجبه وقال:
= أنتي عارفة فرق العمر بيني وبينك كام عشان تعلي صوتك عليا بالشكل دا?
مش عارفة خوفت ليه من نظراته بس رديت عليه وقولت:
_والله حتى لو 20 سنة فرق إنت اللي غلطان
إتكلم وهو بيبتسم إبتسامة جانبية بسخرية وقال:
=ويمكن 3000 سنة فرق?!
بصيتله بإستغراب وقولت:
_أنا إبتديت أتأكد إنك مجنون، قال 3000 سنة قال
=لتاني مرة بتغلطي فيا!
إتوترت من نبرة صوته الحادة وهو بيقولي الجملة دي وغيرت الموضوع وقولت:
_أنا حاولت إني أتنقل للمكان التاني اللي بتنقل بيه إمبارح بس معرفتش ومش عارفة إي السبب كنت دايمًا لما ببقى لوحدي بروح حتى لو مش عايزة
=العهد اللي عملوه زمان كان هو اللي بيختار وهو اللي بيقرر مش إنتي اللي بتقرري، فـ هتلاقي دايمًا لو إنتي عايزة تعملي حاجة هو أصلًا المسئول عنها، فـ مستحيل تعمليها إلا إذا هو عايز كدا
بصيتله بعدم فهم وقولت:
_أنا مش فاهمة!
إتنهد وقعد على صخرة متغطية بورق شجر كتير وقال:
=هبدأ معاكي من الصفر الأول، إقعدي
قعدت قدامه وإستنيته يتكلم، إتكلم بعد ثواني وقال:
_إنتي مش بنت عادية زي آي بنت، إنتي يعتبر إفراج عن سجني، ولكن بعد حروب هتبقى صعبة جدًا، ولو إلتزمتي معايا في كل اللي بقوله فإحنا هنكسب وهنتغلب عليهم وأنا هعيش كـ بني أدم طبيعي من تاني
كنت بصاله وأنا باين على ملامحي الغباء، فـ إتنهد وقال:
= عارف إنك لسة مستوعبتيش ومش فهماني، هوضحلك أكتر، أنا نيكولاي من العصر الفرعوني، المصريين القدماء مش من العصر دا خالص، تقدري تقولي إني كان زماني أثار دلوقتي
ضحكت بتريقة على اللي بيقوله فـ بَصلي بصرامة خلاني أكِش في نفسي وسكتت، فـ رجع كمل:
=أنا كنت ملك لـ قبيلة في العصر الفرعوني، كُنت وقتها..للأسف كنت ملك قاسي جدًا على قبيلتي، كنت بس عايز أحقق التعايش في إستقرار لإن وقتها كنت بوزع عليهم أكل قليل في حين كنت أنا وعيلتي بتجيلنا أكثر كِمية، و وقعت في مرة مع سَحرَة ملعونين لَاعنين، وألقوا عليا لعنة الخلود، ودي أسوأ بكتير أوي من إنهم كانوا عذبوني أو قت*لوني وقتها
قاطعته وقولت بإستغراب:
_ هو إنك تبقى إنسان خالد وتعيش على طول دي حاجة وحشة!?
=إنك تبقي عايشة لوحدك دي حاجة وحشة، إنك تودعي كل عيلتك وإنتي وجعك بيزيد مع فراقهم ومش عارفة تعيشي كدا بكمية الوجع اللي بيكبر جواكي مع موت كل شخص من أحبائك، أنا شوفت كل المباني دي أيام ما كانت مجرد رمل وشوفت كل الشركات والأوتيلات دي أيام ما كانت مجرد طوب وخراب، حضرت تغيُر العُملات وكل حاجة من 3000 سنة، الحياة مُملة وأنا مش عايز أعيشها كل دا، عايز أعيش إنسان عادي بعيد عن كل دا
حسيت بالشفقة تجاهُهُ وحاولت أطبطب عليه بالكلمات ولكني ملقتش كلام أقوله فـ سكتت، كمل هو كلام بعد تنهيدة طويلة حسيت إنه بيخرج بيها كل وجع الأيام، أو بيحاول، وقال:
= هما المفروض إنهم هيغزوا الأشجار بعد 15 يوم من لُقايا ليكي واللي هي مسكني وأثاري المخفية اللي محدش يقدر يشوفها غيري، وغير لؤلؤ نهاية الخلود واللي هو إنتي، و وقتها هيتحدد هعيش إنسان طبيعي بمساعدتك ولا هما اللي هيفوذوا
سألته بعدم إستيعاب وقولت:
_ طب هو ليه أنا??
رد عليا وهو بيبُص في عيوني وقال:
=عشان إنتي اللي عندك الحواس السبع
رددت وراه بأستغراب وقولت:
_حواس سبع?!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية حواسي السبع)
