رواية تربية حواري الفصل السابع 7 بقلم ولاء حامد
رواية تربية حواري الجزء السابع
رواية تربية حواري البارت السابع
رواية تربية حواري الحلقة السابعة
رجعت حور البيت بعد يوم تعب وشقى كالمعتاد اتعودت عليه في 3 سنين خدو من عمرها ومن أنوثتها
حور : أما انتي فين
هدى: انا في المطبخ يا ضنايا ردت عليها هي بتمسح ايدها في الفوطه وطلعت ليها
حور : طيب هاروح استحمى على ما تخلصي لحسن هلكانه
هدى طيب وانا كده كده خلصت الأكل وزودت داخل على سوا اهو
حور : ماشي يا أما
هدى: الا بالحق سمعتي يابت يا حور اللي حصل في الحته انهارده قالتها هدي وهي رايحه المطبخ
حور برفعه حاجب : ايه اللي حصل
هدي بصوت عالي من المطبخ: البيت اللي كان مقفول اللي على يمة الشارع بتاع الجماعه المسافرين دول
حور رفعت اذان الاستشعار: ماله داه مقفول بقاله ياما محدش هوب نحيته
هدي: رجعو يا اختي انهارده من الكِويت من غير لا احم ولا دستور
حور بإستغراب: غريبه دي دول ليهم زمن بعيد عن الحته كنت انا لسه عيله موعاش ع الدينا
هدي مكمله: علمي علمك سمعت أم عبدو بتقول صفوا شغلهم مره واحده ورجع هو وجماعته
حور : جماعته مين
هدى : يابت مراته ومعاه جدع حليوه كده طول بعرض اللهم صلي على النبي وبت باين عليها في المدرسه
حور بمطة بوق: اممممم أم عبدو بوند
هدى بمحاوله فهم : مين
حور بضحك: يعني يخزي العين عنها او يفقعها عادي عارفه اخبار الحاره بيت بيت تقوليش دلاله بتلف البيوت
هدى بضحكه: الله يسهلها
حور: بس هي تسيب الناس في حالها وربنا هايكرمها من وسع
مر اليوم على الجميع
الصبح صحيت حور وهي بتتاوب ومنكوشه
هدى: يابنتي ابوس ايدك لمي كدشك لما بشوفك كده والله بتخض قطعت الخلف بسبك
حور بتلويه بوقها بحركه مشهوره: أما انتي قاطعه الخلف من زمان خلي الطابق مستور بلاش تجيبيها فيا الله يكرمك
هدى بخنقه: طيب يا اختي اغسلي وشك ولمي كدشك وانزلي هاتي فطار النهارده الجمعه اجازتك
حور : اوووف حاضر يا أما متأندله أهو
غسلت حور وشها ولبست عبايه سوده وطرحه سوده
حور من على باب الشقه : أما هاخد الشبشب بتاعك مش لاقيه شبشبي
هدى : ماشي بس متعوقيش شهلي الفرن هتلاقي عليه من كل العيش وشرب اللميه واستني دورك وبلاش تناقري مع حد يا حور وبلاش جر شكل يا حور فاهمه
حور بكشة وش: عنيا يا هدى سبيني بقى الله يكرمك علشان اللحق بدل رغي النسوان داه
هدي قلعت الشبشب وقبل ما ترميه على حور كانت قفلت الباب وطلعت بره في مدخل البيت جري
وصلت حور الفرن ولقيت عدد ماهووول حور في نفسها: امممم شكله هايبقى غدا يلا الله المستعان وقفت حور اكتر من ربع ساعه ولسه مجاش عليها الدور
جات واحده شكلها جديد على الحته لابس عبايه فخمه ولابس كميه دهب كتير جدا جدا في دراعاتها ومشمره الكم علشان يبان وزقت الموجودين بقرف ودخلت على الشباك وقالت للراجل عايز ب10 جنيه عيش بسرعه عايزه امشي مش طايق الريحه
حور رمت القفص اللي معاها اللي بتجيب عليه العيش وراحت شاده الست من ايديها حور: ايه يا حاجه هي زريبه تزقي الناس وتدخلي في دور ياأما مش على كيفك
الست بقرف من حور: ايدك يابتاعه انتي متخيله اني هاقف وسط القرف داه وريحتكم اللي تقوم البطن وتجيب مغص واستني انا بجيب من هنا بفلوسي يعني ليا الاولويه
حور بشهقه: نعم نعم يا ادلعدي لما احنا ريحتنا تجيب مغص انتي ريحتك تجيب ايه تطرش الكلب الجربان فوقي يا وليه لحسن وديني لفوقك وفلوس ايه يا ام فلوس مجبتيش ليه من الفرن الافرنجي لما انتي مستعجله يا عنيا
الست زقت ايد حور وزقت حور من صدرها لورا: انا يا معفنه يا مأيحه ريحتي تطرش الكلب بصي يابت في المرايا دانتي شكلك جايه تشحتي هنا وراحت مطلعه 5 جنيه فكه واديتهالها خديها لله وروحي اشحتي في حته تاني
حور بنار : وماله يا عين أمك انتي جايه تعيشي عليا هنا جو سيد انح وخديجه شلح وانا بعون الله كفاءه اوريهوملك يا عين أمك مره واحده هبدت الست في الارض ودرات خناقه للركب بين حور والست دي
لحد ما لقيت حور حد بيشدها من على الست كانوا الاتنين مقطعين بعض حور ضاربه ومضروبه
بصت لقيت شاب بيقوم الست: قومي يا ماما ونفض للست هدومها واتلفت لحور بغضب وقرب منها ورفع إيده يضربها
حور بغضب حجيمي مسكت ايده: اقسم بالله يا ننوس أمك لو كانت لمست وشي كانت هاتبقى آخر حاجه ايدك تملسها قبل ما اقطعها وعلقها في رقبتك تتحسر عليها عمرك كله وبزعيق خلى الشاب اتخض: فووووووق يااااض دانا حور عامر أسأل عني لو متعرفنش واللي يقل مني اخليه بعون الله يقعد من يومها ليوم الدين يدور على قطع غيار لكرامته وابقى عرف الست الوالده أن اللي يقعد هنا يحترم الكبير قبل الصغير واللي يقل من حد هنا وديني اخليه يمشي معارف وشه من قفاه
الشاب بعصبيه: وانا جبل همام واللي يدوسلي على طرف ادوسه تحت رجلي
حور بسخريه: يا جبل مايهزك ريح بس خلي بالك يا ننوس ماما لا الريح تكون قويه وتقلعك من أرضك
ادخل الناس لما لقيوا الموضوع اتأزم
أم عبدو: بص يا ابني الله وكيلك حور صحيح بتشاكل في طوب الأرض بس ربك والحق المره دي أمك اللي غلطانه غلطت في الكل وشتمت الكل
الست بغطرسه: وانا ايه اللي يوقفني وسطكم بأشكالكم دي وانا الحاجه ثريا مرات المعلم همام
حور: على نفسك واللي يخصك لو علينا مسعركيش في كعب شبشبي وبصتلها ببرود من فوق لتحت وكأنها بتقولها انتي حشره وسابتها ورجعت خدت العيش ومشيت ببرود
ثريا بشر: بقى انا ثريا يحصل فيا داه كله من حتت عيلة الله في سماه ماهعديهالك يابنت الكلب
رجعت حور البيت وهي عفاريت الدنيا بتتنطط في وشها
هدي: مالك يابت قالبه وشك ليه وخبطت على صدرها يالهوي ايه اللي عمل فيكي كده
حور: أما الله يسترك سبيني في حالي الله يسترك اللا انا مش طايقه حتى الهدمه اللي عليا
هدي بشك: مالك يا ضنايا اوعي يكون المخفي عمك اتعرضلك تاني
حور :اما عمي مين داه الله في سماه لو شفت وشه تاني ما هاشوفه تالت الا هو على البرش
هدي بمحايله أموميه: طيب مالك بس يا ضنايا
حور غمضت عنيها وافتكرت الخناقه وعرفت انها قدام واحده قويه وند قوي ليها مينفعش تستهين بيها
هدي بمحاوله علشان تفهم: يابنتي الله يرضى عليكي مالك بس طب طمنيني مين اللي عمل فيكي كده وبهدلك
حور: خناقه عند الفرن مع الناس الجداد
هدى بغلب: ليه بس يا بنتي ماشيه تقولي ياشر اشتر
حزر: يأما انا مكلمتهاش الست داخله تزق في خلق الله وتترسم علينا وتقولي انتي شحاته وتحط في أيدي 5 جنيه وتقولي الله يسهلك روحي اشحتي في حته تاني
هدى بشهقه: نعم نعم اما مرا ناقصه بصيحيح تصدقي يابت يا حور على قد ما ببقى هاتجلط من خنقاتك وعمايلك إلا أني بحس انك سندي يابت عكازي اللي بتعكز بيه في الدنيا
حور بإبتسامه: ربنا يخليكي ليا يا أما وباست ايديها
هدي: هاقوم اقلي الطعمية واعمل الفول بالزيت والطحيه زي ما بتحبيه وانتي قومي غيري هدومك المتربه دي
هزت حور رأسها بطاعه ومتنسيش الشطه ودخلت غيرت وطلعت
هدى بإبتسامه: وانا اقدر والشطه علشان حوريه قلبي
********************
في بيت الحاج همام
ثريا بقهره: اه ياني بقى حتت بت متسواش قرش تعمل فيا انا كده دانا مستعنهاش خدامه تمسحلي الجزم
جبل بمحايله: خلاص بقى يا ماما منتي كمان مسكتيلهاش والحق يتقال انتي غلطانه عماله تقوليلهم ريحتهم وحشه وتقوم البطن يا حبيبتي انتي هنا في حاره شعبيه مش لسه عايشين في الكويت ياريت تتاقلمي على المكان وطباع الناس
همام بتروي: ياثريا جو العنطزه الكدابه داه مش مع الناس هنا دي ناس كرامتها غاليه وبيحترموا العيش والملح ناس تعبانه وشقيانه ناس متعرفش النفخه الكدابه بتاعتك ياريت اللي حصل ميتكررش والا اقسم بالله ماهيعدي على خير وانتي عارفاني راعي بيتك وخلي بالك من بنتك واتلفت لابنه وانتا يا سبع الرجال منزلتش تجيب الفطار ليه ورايح تمد ايدك على ست دي مش رجوله هاقولك نصيحه لوجه الله ميزان الرجوله مربوط بإيد الراجل يوم مايرفعه على ست يوم ما تقل رجولته افتكر كلامي داه علشان هتحتاجه
عند حور
فطرت هي وأمها حور: بقولك يا أما أنا هانزل ساعه زمن وراجعه ورايا مصلحه
هدى برفعه حاجب: مصلحه إيه يوم الجمعه اجازتك من الشغل يا اختي
حور بتنهيده طويله: هاخطف رجلي لحد تاجر الخرده اخد منه حساب الشهر بتاع خارج الشهر من الورشه علشان الراجل داه عايز اللي واقفله على راسه ياكل مال النبي ي اما متقلقيش يا هدى دعواتك قعدالي ادعيلي بس وطمني قلبك بنتك بمية راجل
ضحكة هدى بخفه على بنتها وباست راسها ربنا يصلحك الحال وييسرلك كل أمر عسير يا ضنايا
دخلت حور ولبست بنطلون جينز واسع وعليه تونك طويل لحد تحت الركبه ولبست كوتشي ولفت حجابها
حور وهي على الباب: تقعدي بالعافيه يا اما مش هتأخر
هدى من المطبخ: الله يعافيك يا ضنايا
ركبت حور عربيه ابوها الله يرحمه ووصلت للحاج رجب
السلام عليكم ورحمة الله وبركاته يا حاج
رجب بكشه وش: وعليكم يا اسطى
حساب الشهر يا حاج
رجب: وماله بس انهارده الدنيا ضيقه
حور :حاج رجب الكلام داه مش معايا الفلوس تحضر وإلا يمين بالله ماهتاخد قشايه من الورشه تاني وتجار الخرده على قفا من يشيل واللي ميعجبكش يعجب غيرك وعلى رأي المثل اللي قادر على الكحل يتكحل واللي مش قادر طريق وسكه ويترحل ولا ايه يا حاج
رجب ناقص العياط عارف ان حور عضمه ناشفه كان فاكر انها بت صغيره وهايعرف يضحك عليها بس اكتشف انها مش سهله ولسانها أطول منها: تؤمري يا اسطى هاتصل بحد يبعت الفلوس من البيت على ما تاخدي واجبك
حور : تشكر يا حاج واجبك واصل خلينا ننجز ونتوكل على الله
ربع ساعه ووصل الفلوس الي حقك يا اسطى
حور مسكت الفلوس وبتعدها
رجب: ايييه يا اسطى حور هي وصلت تخونيني
حور ببصه ذهول: لا سمح الله يا حاج بس داه مال ولايا وكمان شريك وانا أمينه عليه وبيني وبينك احكم الحاكمين ربنا بضاعتك بتاخدها خارج اسبوع بإسبوعه يبقى فلوسي اطمن عليها لوكشه واحده ولا إيه وكملت عد الفلوس
واتعدلتله الفلوس ناقصه الف ونص يا حاج
رجب بمماطله: لا كده الحساب مظبوط
حور بسخريه : المظبوط داه في القهوه يا حاج وطلعت ورقه من جيبها داه حساب الشهر يا حاج كل كيلو خرده حديد وبلاستك ونحاس والمونيوم واتمونيا ورفايع خرج وصاج وتمن كل كيلو قدامهم حسب الإتفاق مش كده
رجب بصدمه: قراء الورقه واتصدم اه اه معلش شكلي اتلغبط وانا بعد الفلوس
حور بضحكه سخريه: معلش يا حاج العتب على السن بقى إيدك على الألف ونص
رجب بمماطله: ضفيهم على حساب الشهر الجديد
حور : يا حاج الحق ان بات مات وانا مبحبش حقي يبات بره حضني انتا عارف الحق غالي خلص خليني اتوكل على الله
رجب بإستسلام: طيب يا ساتر وقال بيقولوا عيله مين دي دي تهد المعبد وتبنيه من تاني وطلع الألف ونص وحطهم على الطربيزه خدتهم حور وبتعدهم
جمعه: ايه هاتعديهم كمان
حور بلوع: اومااال الا يكونو ناقصين ميه ولا خمسين اصل الواحد لازم يتمم على ايده بعديك اتاكدت حور وخدت الفلوس تشكر يا حاج ونصيحه بلاش تعمل ناصح على واحده مدعوكه في السوق وأسفلت الطريف كل من جلد رجليها رقات رقات وغمزتله بعينها سلام يا حاج
ومشيت حور بضحكه على الراجل اللي مهما كبر الا انه ضلالي
عند جبل
قاعد سرحان في اللي حصل عمره ما مر عليه حد بالشكل داه افتكر حور وجبروتها وهي بتقوله دانا حور عامر أسأل عني لو متعرفنش
ياترى يا حور حكايتك ايه اوووف ايه اللي بفكر فيه داه بس دي شلق بس الصراحه مزه يخربيت جمالها وتكه بنت الايه
بس مسترجله دانا كارجل اترعبت منها
وانا مالي هو انا هتجوزها انا بس مستغربه تركيبه عجيبه مش اكتر
قطع حبل شروده ابوه
همام: جبل يلا علشان العمال هايجهزوا المحل
جبل كش حواجبه: عمال ايه ومحل ايه
همام بتوضيح: المحل اللي تحت البيت انتا عارف ان مساحته كبيره ومقفول من زمن وانا مش هاقعد في البيت زي الولايا هاجدد المحل وافتحه أدوات منزليه وكهربائيه وقسم منه موبيلات واجهزه كمبيوتر والمنطقه هنا حيويه ومفيهاش محلات كامله زي اللي هاعمله
جبل بتفهم: تمام يا حاج وانا كده كده اتنقلت فرع البنك اللي هنا
همام: ربنا يقويك يا ابني
*********
طلعت هدى من المطبخ على صوت خبط الباب : ايوه ياللي على الباب استنى لبست طرحتها على رأسها وفتحت
ام عبدو: ازيك يا غاليه عامله ايه
هدي ببسمه بشوشه: نحمد الله يا أم عبدو ايه الشُقه الغاليه دي
ام عبدو قعدت على الكنبه: الله يعز مقدارك يا اختي لقيتك مبتسأليش قولت اطل عليكي
هى: فيكي الخير استني اصب الشاي ونقعد نرغي
ام عبدو: الا فين اسم النبي حارسها حور
هدى بإستغراب: بتحصل ايراد بتاع الورشه
هزت ام عبدو دماغها: ربنا يقويها
دخلت هدة ودقايق وطلعت بالشاي
ام عبدو: والنبي ومن نبى النبي نبي يا هدى بنتك كيفتني انهارده لما بركت اللي متتسما في الارض
هدى بتذكر: ايوه بقى ايه اللي حصل
حكت ام عبدو وكأنها رديو مفصلتش كل اللي حصل بالتفصيل الممل وبأدق التفاصيل والنبي يسلم دراعها ويسلم فُمها فشت غلى من المرا السو دي جايه ياختي تترسم عليا ولابسه ييجي كيلو دهب ومشمره درعاتها ال ايه بنت زوات اوي يا اختي بلا وكسه
هدى بضحكه: والله يا أم عبدو على قد ما بتضايق من حور والمشاكل الي بتعملها الا انها المره دي على حق
ام عبدو بتأييد: ايوه النبي ربنا يهديها يختي بس بردوا حور حنبليه وطبعها حامي
هدى : هاقول إيه ربنا يهديها ويعينها يا ام عبدو الدنيا بقت وحشه وربك والحق لولا حور كان الناس داسو علينا واحنا ولايا ملناش ضهر نتسند عليه انا بعتبر حور هي ضهري اللي ربنا عوضني بيها
ام عبدو :طيب متتجوزي يا اختي انتي حلوه ولسه صغيره والف من يتمنى ويرمح رمح كمان
هدى بشهقه من الخضه: تفي من بقك يالهوي انا اتجوز بعد عامر داه لا يحصل ولا يكون انا راجلي في الدنيا والاخره هو عامر ولا يملا عيني من بعده راجل ولا اشوف من بعده راجل عيني عميت عن صنف الرجال بعده ربنا يخليلي حور هي ضهري من بعده وافرح بيها دانا معايا عروسه على وش جواز وليه
ام عبدو بلويه بوق: يختي هاتترهبني يعني
هدي :ايوه هاترهبن لعامر اكتبت على اسمه في الدنيا وبدعي ربنا في كل ركعه اتكتب على اسمه في الآخره
ام عبدو: يا اختي انتي ادري بمصلحتك انا بس بنورك انك يكون ليكم راجل يحميكم وهو ضل راجل ولا ضل حيطه
هدى بحسم: راجلي عامر عايش وميت ومن بعده بنتي ربنا يحميها ويحفظها من كل شر
ام عبدو حست انها مبقاش مرغوب فيها: طيب افوتك بعافيه بقى الحق اجهز لقمه لابو عبدو والعيال
هدي : الله يعافيك يا حبيبتي وابقى كرري الزياره
مشيت ام عبدو وهدي قعدت على الكنبه ياساتر وليه بومه حاشره نفسها في اللي ليها واللي ملهاش على قولت حور وبصت على صورة عامر في الصاله ووقفت قصادها تمشي ايدها على ملامح وشه كإنها شيفاه قدامها يا سندي يا ضهري حي وميت ال اكون لراجل غيرك ال كداب اللي يقول ان في راجل بعدك كداب اللي يقول ان قلبي يدق لحد بعدك كداب اللي يقول اني اتكشف على واحد غيرك دانتا راجلي حتى لو كنت في قبرك وحشتني يا قلب هدي اللي مات معاك اوعي يا عامر حور العين ينسوك هدي هازعل منك لما اجيلك انتا جوزي انا وبس وانا مراتك وبس ماشي ومسحت دموعها وضحكت كإنها شيفاه قدامها
عند حور وهي مروحه فضلت تضحك في العربيه على الحاج رجب وفي نفسها: بردوا الراجل رجل بره ورجل جوه ومفيش فايده قطع ضحكها رنه التليفون طلعته
ايوه يا حاج وائل
وائل: ايوه يا حور انهارده اخر الشهر تحصيل ايراد الخرده هاروح اجيبه من المعلم رجب لأحسن داه راجل ضلالي وياكل مال النبي
حور: لا يا حاج وائل انا جبت الإيراد كامل ومروحه البيت اطمن وبكره بمشيئه المولي هتاخد نصيبك
وائل: عفارم عليكي بنت عامر بصحيح
حور :تُشكر يا حاج مع السلامه
قفلت حور ولفت نظرها حاجه غريبه على الطريق وقفت العربيه بحرص
……. يا ترى حور شافت إيه ؟؟؟؟؟
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية تربية حواري)
