رواية النصيب الفصل السابع عشر 17 بقلم رحاب القاضي
رواية النصيب البارت السابع عشر
رواية النصيب الجزء السابع عشر
رواية النصيب الحلقة السابعة عشر
#النصيب
_الحلقه الـ 17
ـــــــــــــــــــــــــــــــــ
«للحُبِّ أهلٌ، ولسنا أهلهُ أبدًا
نحنُ الظلام الذي ما زارهُ قمرُ!»
_عدي يوم في التاني في التالت ورجعو اهل شهد القاهره، وراحت هي عندهم بعربيه خاصه، ووقف السواق قدام بيت شهد وقالها..
السواق
وصلنا يا شهد هانم… شهد هانم..
_كانت هي في عالم تاني وهي بتبص للمكان اللي اتربت فيه واللي كان شاهد علي كل لحظة حزن عاشتها، وردت علي السواق وقالت..
شهد
ايوه حاضر نازله..
السواق
هستني حضرتك ولا امشي؟..
شهد بهدوء
لا اتفضل ارجع انت معلش تعبتك معايا..
السواق بأبتسامه واسعه
لا تعب ولا حاجه انا تحت امرك..
_ نزلت شهد من العربيه وكانت لسه هتدخل البيت اللي فيه شقة اهلها، بس وقفت لما سمعت صوت دوشه واغاني بتقرب منها وعرفت ان في فرح في الحاره وقفت تاني عشان تتفرج وهي مبتسمه بهدوء، لكن اختفت ابتسامتها اول ما شافت سعيد نازل من العربيه قدام البيت ومعاه نسمه عروسته الجديده بفستانها الابيض..
_في الوقت ده شافها سعيد وهي واقفه وبتتفرج عليهم وعيونها كلها حزن، بس اول ما شافته بيبصلها ابتسمت بهدوء وهو ساب كل اللي واقفين وقرب منها والكل وقف وبصلهم بصدمه واولهم نسمه…
محمد بغيظ
يخربيت غبااء امك..
ام محمد بخبث
علي رأي المثل القديمه تحلي حتي لو كانت وحله..
نسمه بغيظ
نعمه تعالي طلعيني فوق.
نعمه
طيب اصبري تطلعي مع عريسك..
نسمه بغضب
انتي هتطلعي معايا ولا ارجع مع ابوكي وامك وان ما كانت ليله سودا علي دماغه ما ابقاش انا..
_اخدتها نعمه وطلعو فووق، وعند سعيد وقف قدام شهد وقال بهدوء..
سعيد
كويس اني شوفتك، كنت بتمني اشوفك تاني.
شهد بهدوء
مبروك ربنا يسعدك بعد اذنك…
سعيد
استني يا شهد، انا كنت عايز اشوفك تاني عشان انا اقولك انا اسف انا ظلمتك، وظلمتك اووي كمان بس والله ندمت وندمت متأخر كمان حقك عليا يا بنت النااس..
شهد بدموع
حصل خير، انا هطلع لاهلي بقي…
_وسابته ومشيت وهو رجع عند بيتهم وكان محمد اخوه وحمااه وحماته بيبصوله بعصبيه علي عكس امه اللي قالتله.
ام محمد
قالتلك ايه اطلقت ورجعت مش كده؟..
محمد
واحنا مالنا يا اماا ما تهدي كده وتخليكي محضر خير..
سعيد بهدوء
معلش يا عم فتحي بس انا مش عارف كنت هشوفها تاني ولا لا، بس كنت لازم اعتذرلها عن حاجات كتير غلطت فيها معاها، وانا هراضي نسمه ما تقلقش..
طبطب فتحي علي كتفه وقال
خلي بالك من نسمه يا سعيد، حطها في قلبك قبل عينيك هي متدلعه شويه بس قلبها طيب..
سعيد
اطمن يا عم فتحي ما تشيلش هم..
ومشي فتحي ومراته وقالت ام. محمد بخبث
واد يا سعيد مش انا شوفت عفريت في الشقه وجدتي متلبشه يا قلب امك وخايفه اناام لوحدي..
مسك محمد ايدها وقال
سيبي سعيد في حاله الواد نفسه يتجوز بحق وحقيقي..
ام محمد بغيظ
يا واد سيب ايدي، العفريت يا سعيد..
محمد سحبها من ايدها وقال
تعالي نطفشه سوا، اطلع لمراتك يا سعيد وانا هقفل عليها كويس ما تقلقش..
ام محمد بعصبيه
قفلو عليك قبرك يا شبخ وخلصت منك..
محمد بغيظ
ايه الشتيمه دي في ام تقول علي ابنها كده انتي ايه سلالتك ايه ما حملتيش فيا تسع شهور ولا ايه الحكايه..
_واخدها محمد وطلعو فوق وهما بيتخانقو، وضحك عليهم سعيد وطلع شقته واول ما دخل دور بعينيه علي نسمه بس ما كانش ليها اي أثر، فراح لاوضة نومه وجه يفتح الباب لقااه مقفول من جوه..
خبط علي الباب بهدوء وقال
نسمه انتي قافله الباب من جوه ليه؟..
نسمه بحده
بغير هدومي عايز ايه انت؟..
سعيد
مش هينفع اقول انا عايز ايه علي الباب كده، علي العموم خدي راحتك وانا مستنيكي اهوو..
_وراح قعد علي الكنبه مستنيها تخلص تغيير هدومها…
ــــــــــ #بقلم_الكاتبه_رحاب_القاضي ــــــــ
_وفي الوقت ده في بيت شهد كانت قااعده مع اخواتها اللي مبسوطين اووي بيها وانها رجعت عندهم تاني، وطلع صابر من اوضته وبصلها بحده وقال..
صابر
وانتي داخله وايدك فاضيه كده ليه، اوعي يكون جوزك بيمشيكي من غير فلوس..
شهد بتوتر
لا بيديني يا بابا بس انا نسيت اجيب حاجه معايا.
صابر
من هنا ورايح ما تجيش هنا غير وانتي شايله ومعبيه من اللي عند جوزك، وهتروحي امتي الوقت اتأخر؟..
شهد بحزن
أسر عنده. شغل ومسافر وانا اخواتي وحشوني اووي فهبات معاهم النهارده..
فاطمه
تنوري يا قلب امك البيت كله بيتك، ابوكي هيفتح محل بقاله كبير تحت البيت، عمك اداله مبلغ كويس بيساعدنا بيه..
شهد بسخريه
عمي برضو ولا ده تمن جوازي من أسر؟..
بصلها صابر بحده وقال
اومال انتي فاكره ايه انا هربي واعلم واخليكي زي الفل كده ببلاش، مش كفايه حتي ان انتي واخواتك بنات الا ما فيكم ولد يسندني لما اقع..
ملك
هو انت وقعت يعني يا بابا وما حدش مسكك، بس انت ما بتوقعش انت بتوقعنا بس..
ضحكت شهد وصابر ضربهم بالبرتقاله اللي في ايده وقال
غوري من وشي منك ليها بتفولو عليا…
_دخلت شهد وملك اوضتهم بسرعه وهما بيضحكو وكمان اخواتها كلهم وقالتلهم شهد بحماس..
شهد
تتعشو ايه يا عيال نفسكم في ايه تاكلوه انا هجيبلكم كل اللي نفسكم فيه النهارده؟…
ــــــــــ #بقلم_الكاتبه_رحاب_القاضي ــــــــ
_وفي شقة سعيد كان لسه قااعد مستني نسمه، وبعدين قاام خبط علي الباب وقال بهدوء..
سعيد
نسمه محتاجه مساعده ولا حاجه؟..
نسمه بحده
لا وروح شوفلك حته تانيه اتخمد فيها انا مش هفتح وبطل خبط علي الباب عايزه اناام..
سعيد
انتي بتستهبلي يا بت هو ايه اللي مش هفتح دي، اخلصي وافتحي الباب ده يلااا..
نسمه
قولتلك لا يعني لا واللي عندك. اعمله..
سعيد بغيظ
لا عندي كتير يا نسمه وهتشوفي..
_وراح عند المكتبه الصغيره اللي في الصاله وفتح درج منها وطلع نسخه من مفتاح اوضته وقال بخبث..
سعيد
والله انت بتفهم يا محمد، ده انت كأنك عارف اللي هيحصل وعملت نسخه تانيه لمفاتيح الشقه..
_وراح فعلا سعيد لاوضته هو ونسمه وفتح الباب وفي الوقت ده كانت هي نايمه علي السرير ولما شافته قاامت بسرعه قعدت وقالت بعصبيه..
نسمه
انت اتجننت ازاي تدخل عليا كده؟…
قفل سعيد باب الاوضه عليهم وقال
اومال ادخل ازاي علي مراتي، اعقلي كده واهدي وايه اللي لابسااه ده بجامه ليلة الدخله يا نسمه..
نسمه بحده
لا ما انت تنسي خالص الدخله والجو ده انت اكتر واحد عارف اني متجوزااك غصب عني..
سعيد بجمود
بطلي بس كلامك واحنا اهو اتجوزنا خلاص فنتعود علي بعض عشان تبقي حياتنا ساهله وانا مش هغصبك علي حاجه بالهداوه مع بعض…
نسمه بضيق
لو مش عايز تغصبني علي حاجه يبقي اطلع بره وسيبني في حالي…
قلع سعيد جاكيت بدلته ورمااه علي السرير وقال
هو ايه اللي اطلع بره يا بت ما تتلمي بقي..
بصتله بخوف وقالت بقلق
مش هتقربلي يا سعيد ومش هتحصل حاجه..
قرب منها سعيد جدا وقال بغضب
وريني هتعمليها ازاي…
ذقته هي جامد وقالت بدموع وحده
يا عم ابعد عني هو بالعافيه مش عايزاااك ومش طيقاااك افهم بقي…
اتعصب اكتر وقال
ومدام كده بقي كملتي ليه في الجوازه لحد دلوقتي؟..
نسمه ببكاء
عشان خلاص هبقي 30 سنه وانت بالنسبه لابويا وامي اخر عريس هيتقدملي، كلامهم كان صعب عليا وامي ما كانتش هتسمحلي اسيبك..
سعيد اتنهد بضيق وقال
واللي حصل خلاص وبقيتي مراتي فأعقلي يا بنت النااس وخلينا نعدي الليله دي علي خير..
نسمه بنفااذ صبر
يااربنااا قولتلك مش عايزااااك، وانت نفسك مش عايزني انا بالنسبالك جوازه وخلاص، انت كنت بتحب شهد بنت صابر وده شوفته بعيني تحت، فاللي انت عايزه يحصل بينا ده مش هيحصل ولا عمره هيحصل طول ما انت لا عايزني ولا انا عايزااك..
سعيد بحده
انا علي اخري اقسم بالله اكلم ابوكي يجي يشوف بنته بتعمل ايه…
نسمه بسخريه
ما هو ده اخرك تجيب ابويا، تجيب حد يحللك مشاكلك انما انت تبقي راجل وتعرف تحلها لوحدك لاا ما تعرفش…
_مسكها سعيد من دراعها جامد وطلعها بره الاوضه وقال بعصبيه…
سعيد
مدام منشفه دماغ امك دي خليكي بره بقي اتخمدي في اي مكان..
وقفل الباب في وشها وهي قالت بعصبيه
اااه يا قليل الذووق يا بجح، بس مااشي انا انام علي الارض في الحمام حتي ولا اقعد معاك في اوضه واحده..
_وراحت نامت علي الكنبه في الصاله، وهو جوه قعد علي السرير وابتسم بسخريه وقال..
سعيد
نفس اللي عملتو في شهد يا سعيد يوم فرحها، اديني دوقت من نفس الكاااس..
ــــــــــ #بقلم_الكاتبه_رحاب_القاضي ــــــــ
_وعند شهد بعد ما اخواتها نامو كانت بتتفرج عليهم وهما نايمين وعيونها مليانه دموع، وقالت وهي بتبوس راس اختها الصغيره اللي عندها 4 سنين..
شهد
انا هعمل اي حاجه بعد كده بس مش هخليكم تعيشو نفس نصيبي ولا ابويا يبيع ويشتري فيكم..
_وفي الوقت ده رن موبيلها فأخدته من جنبيها لقيته أسر اللي بيكلمها، اتنهدت بضيق وردت عليه وقالت..
شهد
نعم..
أسر
انتي فين؟..
شهد
في بيت اهلي جم النهارده الصبح وقولت اجي اقعد مع اخواتي شويه..
أسر
طيب بعد كده ابقي قوليلي يا شهد انك طالعه او داخله والحاجات دي، ما اعرفش من تياام ابن اختي عيب يعني..
شهد
حاضر…
أسر بقلق
انتي كويسه صوتك مش كويس؟..
شهد بهدوء
لا كويسه بس اخواتي نايمين جنبي ومش عارفه اتكلم كويس…
أسر
اااه طيب اا… هو طليقك ساكن جنبك مش كده؟..
شهد
ايوه بتسأل ليه؟..
أسر اتنهد بضيق وقال
انا ماكنتش عايزك تروحي هناك دلوقتي اصلا..
شهد
هو في ايه انت مالك اصلا بحاجه زي دي، أسر بيه انت متجوزني عشان تضحك بيا علي جوز اختك مش عشان تهتم بيا وبطليقي، تصبح علي خير..
أسر بحده
طيب فكري تقفلي في وشي كده يا شهد وانا اقسم بالله ما هيجي في بالك اللي هعمله، واهتم براحتي مدام قدام الكل انتي مراتي يبقي اعمل اللي انا عايزه..
شهد بغيظ
انت عايز ايه دلوقتي؟..
أسر بهدوء
زهقان يا شهد احكي معايا في اي حاجه..
شهد ابتسمت غصب عنها وقالت
هو انت بتعمل ايه يعني دلوقتي مش المفروض بتشتغل؟..
أسر
لا انا في الاوتيل نااايم بس انا مش جايلي نوم خلصت الشغل من ساعه كده..
شهد
وهترجع امتي؟..
أسر بخبث
ايه وحشتك ولا ايه؟..
شهد بغيظ
والله هقفل في وشك واللي عايز تعمله اعمله..
ضحك أسر وقال
ههههه خلاص يا حجه هرجع كمان يومين كده، انتي هتروحي الجامعه بتاعتك امتي؟.
شهد
مش جامعه ده. معهد خاص بس الشهاده بتاعته تعادل شهادة الكليه، وهروح الاسبوع الجاي ان شاء الله..
أسر
اوكي ربنا يوفقك….
شهد
انا هنام بقي تصبح علي خير..
أسر بهدوء
وانتي من اهل الخير، باي..
_وقفل معاها أسر اللي كان قااعد في البلكونه بتاعت اوضته في الاوتيل وفضل يقلب في موبيله، لحد ما رن عليه كارم..
رد عليه وقال بجمود
يا أهلاً..
كارم
ناسيني انت يا يا أسوره..
أسر
انت عايز ايه يا كارم مش فايقلك…
كارم
كلمت حبييك ووافق يجي السبااق هنا في مصر لما عرف الجايزه هتكون مبلغ اكبر من المبلغ بتاع السباق اللي بره وافق علي طول..
اتعدل أسر في قعدته وقال
تمام السبااق هيكون امتي بقي؟..
كارم
نتفق الاول يا حبيبي انا جيبتهولك بس في المقابل انت هتكسب السبااق ومش هتاخد الجايزه انا اللي هاخدها والربح كله ليا، اتفاقنا من الاول انه يجي واخد اللي عايزه وانا قبلت وهعملك السبااق في مصر اهو وبشكل قانوني..
أسر بجمود
متفقين طبعا السبااق هيكون امتي بقي؟..
كارم
امممم فين الفلوس اللي قولت عليها عشان نبدأ، انا مخلص كل حاجه ومستنيك..
أسر بضيق
هو انت قولت طيب السباق هيكون امتي؟..
كارم
كمان شهرين تلاته وهجيب نااس تقيله وحملة اعلانات وقنوات تلفزيون، بس طبعا انت نيتك حاجه تانيه غير السباق ووسط الدوشه دي ما حدش هياخد باله من اللي هتعمله وكمان هتكسب ازاي ما اعرفش..
أسر بحده
انت بترغي كتير ليه قولتلك هكسب وانا واثق من كده، وهتاخد الفلوس اللي انت عايزها، بقولك اعمل السبااق من عندك وانا هدفعلك بعد السبااق اللي انت عايزه..
كارم اتنهد وقال
اممم هفكر وارد عليك باااي…
_قفل معاه كارم وأسر ساب موبيله من ايده وقام وقف عند سور البلكونه وعيونه اللي كانت بتضحك من شويه وبتلمع بأمل جديد اتملت شر وغضب زي الاول تاني…
ــــــــــ #بقلم_الكاتبه_رحاب_القاضي ــــــــ
_وتاني يوم الصبح صحيت نسمه علي صوت خبط جامد علي باب شقتها الجديده، قامت من علي الكنبه اللي نايمه عليها وراحت بصت من عين الباب لقيتها ام محمد..
نسمه بغيظ
اممم بدأنا اهو….
وراحت دخلت عند سعيد اللي كان نايم وقالت بحده
قووم يا سعيد كلمني سعييييييد…
فتح عينيه بنوم وقال
عايزه ايه؟..
نسمه بحده
امك بتخبط. روح شوفها جايه عايزه ايه كده من وش الصبح..
اتنهد بضيق وقال بسخريه
تلاقيها جايه تطمن..
نسمه بنفس نبرته
علي خيبة ابنها مش. كده؟..
سعيد بغيظ
ما بلاش انا لحد دلوقتي ابن نااس معاكي..
_شوحت بايده ودخلت الحمام ورزعت الباب وراها، وهو قام فتح لامه اللي دخلت علي طول وقالت..
ام محمد
صباحيه مباركه يا قلب امك، مالك يا ضنايا وشك مخطوف كده ليه بقي ده منظر عريس، بس اقول ايه ما اهو انت متجوز كركوبه اكيد سدت نفسك..
سعيد بضيق
ايه يا اما اللي بتقوليه ده، صاحي من النوم هيبقي شكلي ازاي يعني..
ام. محمد
من اولها كده بتدافع عنها وجاي معاها عليا، بس اوعي بعد. كده تمشيك هي علي مزاجها..
اتنهد سعيد بضيق وقال
نعمم يا اما جايه عايزه ايه علي الصبح..
ام محمد
انت بتكلمني كده ليه ياولاااا، جايه اشوف نسايب الهم جابولك فطار ولا لا، بس طلعو جعانين هما كمان تعالي يا حبيبي نفطر سوا انا وانت..
سعيد
لا معلش يا اما انا تعباان وعايز انااام، لما اصحي هبقي اجي افطر معاكي..
ام محمد
هي لحقت تتعبك اللي ما تتسمي، تعالي بس معايا ونام عندي تحت خليك من الاول كده تقيل عليها…
سعيد بضيق
لا مش هنزل يا اما دلوقتي ولو سمحتي عايز انام…
بصتله امه بجمود وقالت
وماله يا سعيد نااام، هو انا يا ابني عايزه ايه غير راحتك..
_وسابته ونزلت وكانت متعصبه جداً، واول ما سعيد قفل الباب طلعت نسمه من جوه وقالت بحده..
نسمه
اقسم بالله دي اخر مره هعملك قيمه واسكت علي طولة لسان امك، انا لساني كمان ما فيش اطول منه…
سعيد
دي ست كبيره وانا اهو ما رضيتش اسيبك وانزل معاها رغم انك تقفلي اي حد منك..
نسمه بحده
لا ما هو ده اللي نااقص انك كنت تنزل معاها، هي كلمه يا سعيد امك ما تغلطش تاني فيا، انا ابويا مش دلعنا وهننا في بيته وتيجي امك تقول كلامها ده، كله الا ان حد. يغلط فيا..
زقها بأيده جامد وقال بغيظ
طيب غوري جهزيلي فطار اي حاجه اطفحها ولا دي كمان مش هتعمليها..
نسمه
لا عادي هطبخلك واجهزلك الاكل واغسلك واروقلك بيتك بس غير كده تنسي لحد. ما نخلص من الموضوع ده…
بصلها بسخريه وقال
كتر خير امك. بصراحه…
_وسابها وراح قعد قدام التلفزيون، وهي دخلت المطبخ ورجعت قالتله..
نسمه
اعملك شااي ولا اجيبلك حمام وكوارع تفطر، وفي بشاميل وفراخ تاكل ايه؟..
سعيد بغيظ
الله اكبر عليكي مش فالحه غير تطولي لسانك وبس، اتنيلي اعمليلي شاااي..
نسمه
قول بطريقه كويسه كتر الف خيري اني بجهزلك الفطار اصلا..
دخلت نسمه المطبخ وسعيد قال لنفسه بغصبيه
منك لله يا محمد علي التدبيسه دي..
ــــــــــ #بقلم_الكاتبه_رحاب_القاضي ــــــــ
_وفي بيت اهل شهد كانت شايله اختها الصغيره وبتفطرها وموبيلها رن برقم غريب..
ردت بهدوء وقالت
الو….
فؤاد
ازيك يا شهد عامله ايه انا فؤاد..
شهد
الحمد لله كويسه، حضرتك عامل ايه؟..
فؤاد بهدوء
حضرتي كويس الحمدلله، ايه بقي مشيتي ليه ولا هو عشان ما فيش أسر يبقي ما تقعديش معانا..
شهد
لا والله مش كده بس يعني اخواتي جم من البلد وقولت اقعد معاهم شويه…
فؤاد
برااحتك. يا ستي البيت بيتك وتيجي في ايه وقت. المهم بقي انا اخدت رقمك من هاله لسببين..
شهد بقلق
خير ان شاء الله؟..
فؤاد
الاول يا شهد انا مش عايزك. تزعلي من اي حاجه هعملها مع أسر الفتره الجايه، انتي بعيد عن اي حاجه بطلبها منه، هو ممكن يكون فعلا حبك زي ما بيقول وهتكملو مع بعض وبدأ يتغير فعلا بس ورثو وفلوسه دي امانه لو انا قصرت هبقي مش قد الامانه دي فاهمه يا شهد بتكلم في ايه؟..
اتنهدت شهد. بضيق وقالت
ايوه فاهمه..
فؤاد
وعلي فكره انتي اكتر حد. ممكن يساعدني نخلي أسر شخص جديد يقدر يحافظ علي فلوسه وفلوس اخته ويبقالك زوج كويس واب كويس لولادكم في المستقبل..
شهد بتوتر
ايوه طبعا ان شاء الله انا معاك طبعا يعني انا بتمني يكون كده..
فؤاد بتوتر
احمم والسبب التاني بقي، النهارده عيد ميلاد. هاله وهي مش بتحب الحفالات والجو ده، وانا ما بعرفش اعمل مفاجآت ولا اجيب هديه حلوه وما ينفعش برضو اقولها كل سنه وانتي طيبه وانا مش جايب هديه، وما اعرفش صحابها وانتي الوحيده اللي ممكن تساعديني بما انك قريبه منها الفتره دي وانا من لما بقيتي مرات أسر وانت معتبرك اختي الصغيره..
ابتسمت شهد بهدوء وقالت
دي حاجه تشرفني، انت عايزني اساعدك. تجيبلها هديه..
فؤاد
ياريت احسن انا بقالي كذا سنه بعمل نفسي ناسي وهي ما بتتكلمش بس بتزعل…
شهد
بص هي تقريبا متاح ليها تشتري اللي نفسها فيه وده اللي مخليك مش عارف تختار هديه، بس بما تبقي الحاجه جايه من حد بنحبه حتي لو كانت قدامنا قبل كده لا بتبقي من اللي بنحبهم مميزه، الفكره بقي في الطريقه اللي انت هديهالها بيها، هي هاله فين دلوقتي؟..
فؤاد بحماس
عندها اجتماع في النادي لمدة ساعتين تلاته..
شهد بخبث
انا هقولك تعمل ايه بس تنفذه من غير توتر ولا كسوف..
فؤاد
معاكي. خير بقي هعمل ايه؟..
ــــــــــ #بقلم_الكاتبه_رحاب_القاضي ــــــــ
_وفي الورشه بتاعت محمد كان واقف مع واحد من الزباين اللي عنده، وراحت نعمه هناك ومعاها ابنها الصغير كريم ووقفت قريب منه وندهت عليه واول ما شافها راحلها بسرعه وقال..
محمد
في ايه يا نعمه العيال كويسين؟..
نعمه وهي بتبص لبيت حنان
امم كويسين قولت اجي اطمن عليك فيها حاجه دي؟..
محمد
ااااه واطمنتي يا اختي يلا علي البيت..
نعمه بخبث
حاضر من عينيا بس كريم هيفضل معاك هنا..
محمد بغيظ
جايبه الواد عشان يتجسس عليا ياوليه انتي اتهبلتي..
_قبل ما ترد عليه نعمه عدت حنان من قدام الورشه وقالت لمحمد بأبتسامه لطيفه….
حنان
صباح الخير يا اسطا محمد..
ضربته نعمه علي كتفه وقالت
اتنيل رد يا اسطا محمد..
محمد بهدوء
صباح الفل يا حنان ما تتفضلي تشربي حاجه..
ضحكت حنان بهدوء وقالت
لا شكرا بعد اذنك..
محمد
اذنك معاكي وابقي سلميلي علي ابوكي…
مشيت حنان ونعمه بصتله بدموع وقالت
هو ده اللي ما فيش بينك وبينها حاجه..
محمد بغضب
اللي عايزه تفهميه افهميه وخدي الواد وعلي البيت يا نعمه يلااا..
نعمه بغضب
مااااشي يا محمد لولا بس اني خايفه علي اختي من امك انا ما كنتش هقعدلك في البيت دقيقه واحده يا بتاع حنان..
_قالت كلامها ومشيت ومحمد رفع ايديه للسما وقال بنفاذ صبر..
محمد
دي عمايل امي ياارب وانا مش عارف ادعي عليها اتصرف فيها بمعرفتك بقي..
ــــــــــ #بقلم_الكاتبه_رحاب_القاضي ــــــــ
_وفي النادي اللي فيه الاجتماع بتاع هاله، كانت قاعده في قااعه كبيره هي واتنين ستات تانين باين جدا انهم اكبر منها في السن، وقدامها عدد الكبير من البنات والستات والشيخوخات، ودخل في الوقت ده فؤاد وقعد جنب واحده من الحضور وشاور لهاله وهو مبتسم بهدوء..
اتفاجئت هاله من وجوده وقالت
ايه اللي جابه هنا؟..
الست اللي جنبيها
هو مين ده؟..
هاله بتوتر
لا مافيش حاجه يا مدام كوثر..
كوثر
الاستاذه فاتن مبدعه في كلامها عن حقوق المرأه اتمني تسمعيها كويس هتستفادي منها..
هاله وهي بتبص لفؤاد
ااه طبعا ده استاذتنا كلنا..
ومسكت موبيلها وبعتت لفؤاد
“انت بتعمل ايه هنا”..
مسك موبيله وابتسم بهدوء ورد عليها وقال
” جاي اتفرج عليكي، شكلك زي القمر وسط العواجيز دول “..
كتمت ضحكتها بصعوبه وقالتله
” لا وكلهم لسه آنسات انا الوحيده اللي متجوزه فيهم “..
ضحك بهدوء وكتبلها
” طيب انتي هتفضلي تتفرجي عليهم مش هتقولي حاجه؟ ”
هاله
“لا هقول بس انت قوم امشي استناني بره لحد ما اخلص عشان هتوتر ومش هعرف اتكلم قدامك”
رد عليها بخبث وقال
“ده انا بموت في شكلك وانتي متوتره، بتبقي زي القمر ومش ماشي من هنا غير لما اشوفك هتقولي ايه”..
وقالت فاتن اللي كانت بتتكلم في المايك
وطبعا مش هينفع نختم الاجتماع من غير ما نسمع كلمة المدام هاله ورئيها في الموضوع اللي بنتناقش فيه النهارده وهو” الجواز سجن المرأه “..
_ضحك فؤاد بصوت عالي اول ما سمع اسم الموضوع وكل الستات بصتله بحده، فتنحنح بأحراج وسكت وقال بصوت واطي لنفسه..
فؤاد
الله يخربيت افكارك يا شهد ده انا شكلي هروح في داهيه النهارده..
قامت هاله ووقفت مكان فاتن وقالت بهدوء
طبعاً النهارده يوم مميز بوجود اعضاء الجمعيه كلهم، طبعا حضراتكم عارفين اني متجوزه وكمان اتجوزت وانا صغيره كنت لسه بدرس في الجامعه، فردي النهارده عن الموضوع وان الجواز سجن المرأه هو ممكن يكون كده فعلا في بعض الاحيان..
_بصلها فؤاد بغيظ وهي كتمت ابتسامتها وبسرعه بصت للناحيه التانيه بعيد عنه وقالت..
هاله
بس لو الجواز سجن فالمفتاح بتاعه ديما في ايد الراجل، اوقات كتير بنشوف بنات زي القمر وكلهم امل وحيويه للمستقبل وبيتجوزو كل ده بيختفي وبيجي مكانه النكد وبتتهم علي طول انها نكديه، وعلي عكس بنات تانيه طموحهم واحلامهم بتزيد لما يتجوزو وكل ما تعدي عليهم السنين يصغرو، لو دورنا عن الفرق بين الاتنين هنلاقي الراجل هو السبب، في راجل يقدر مراته ويحترمها كل ما يعلي يخليها تعلي معاه، وفي راجل تاني اتجوز بس عشان يجيب واحده تخدمه تجيبله اولاد وتربيهم لوحدها وكمان تشتغل وتساعده في مصروف البيت، الراجل اللي بجد اللي ديما يخلي دوره في حياة مراته اكبر منها، يبقي هو السند ليها بعد ربنا يشارك في تربية اولاده ولو بتشتغل يشاركها في شغل البيت..
فؤاد بخبث
بس شغل البيت علي الستات يا مدام، مش معقول هنخلي راجل يروح يغسل المواعين مثلاً..
بصوله كلهم بحده وهاله قالت بسرعه
بالظبط كده لان ده اللي اتربينا عليه، وعشان كده احنا المفروض نربي ولادنا بطريقه كويسه يعني زي ما بتروح تشتغل في مطعم تغسل اطباق وده شغل حلال ما فيهوش حاجه عيب يعني لو عملنا الشغل ده في البيت برضو مش مشكله ولا عيب.. وزي ما هي بتطلع تشتغل برضو،نربي ولادنا انهم رجاله بجد عشان لعد كده نلاقي ابن كويس واخ كويس وصديق كويس وزوج كويس واب كويس، المفروض تبقي فعلا كل حاجه في الحياه مشاركه بين الاتنين زي ما جوزي بيعمل معايا بالظبط انا منه هو بقيت اتعلم اربي ابني عشان اخليه يبقي زيه..
فؤاد بأبتسامه واسعه
بس انا مش بغسل مواعين..
_ضحكو كلهم وهاله اتوترت جدا وهو قام وقف جنبيها وقال بهدوء..
فؤاد
بصراحه بجد انا مش بعمل حاجه في شغل البيت لان شغلي واخد كل وقتي، بس جايبلها شغاله بحاول لما اشوفها تعبانه اهون عليها لانها بجد تستاهل، هي لولا وقفتها جنبي بعد ربنا انا ما كنتش هوصل لحاجه من احلامي..
وطلع ورده من جاكيت بدلته وقال بهدوء
كل سنه وانتي طيبه يا حبيبتي..
هاله بدموع
انت بجد فاكر عيد ميلادي مش ناسي..
فؤاد
ولا عمري نسيته بس محسوبك جاهل في اختيار الهدايه بقي والجو ده، امسكي بس الورده..
اخدتها منه وهو قال
ما بتتشمش علي فكره شيلي الورق بتاعها كده..
بصتله هاله بعدم فهم وشالت الورق من علي الورده ولقيت خاتم شكله حلو اووي، مسكه هو ولبسه ليها وباس ايدها وقال..
فؤاد
كل سنه وانتي منوره حياتي يا حبيبتي..
هاله بدموع
انا بحبك اوووي يا فؤاد..
فؤاد بقلق
استني بس هما مالهم ساكتين كده ليه، مش المفروض يسقفو والجو ده..
هاله
انت جاي جمعية حقوق المرأه وتعمل جو رومانسي وعايزهم يسقفو يلا نمشي احسن..
كوثر
انا بقول كده برضو يا مدام هاله، ونتقابل الاجتماع الجاي ان شاء الله..
فؤاد مسك ايد هاله وقال
ان شاء الله يا حجه ربنا ييارك في اولادك..
كوثر
احمم انا انسه يا استاذ لو سمحت..
فؤاد بصدمه
ربنا يرزقك بابن الحلال ويكون بيغسل مواعين بعد اذنكم..
_واخد هاله ومشي وهما الاتنين بيضحكو علي الموقف اللي كانو فيه من شويه..
ــــــــــ #بقلم_الكاتبه_رحاب_القاضي ــــــــ
_وبالليل في شقة سعيد ونسمه كانت قاعده عندهم ام محمد وفتحي وناديه ومحمد ونعمه وعيالهم..
ام محمد
منورين والله يا جماعه..
فتحي
منور بصحابه يا ام محمد، عقبال ما تفرحي بعيالهم..
اتنهدت بضيق وردت عليه وقالت
امين يا اخويا..
وبصت لنسمه وقالت
ما تقومي يا اختي تجيبي لاهلك حاجه تانيه يشربوها ولا انتي عايزه تقوليلهم اني ابني بخيل..
ناديه بضيق
شربنا يا حبيبتي كفايه العصير..
قامت نسمه وقالت
لا يا ماما دقيقه واحده هعملكم شاااي..
قام سعيد هو كمان وقال
استني يا نسمه انا هساعدك يا حبيبتي..
ابتسمو كلهم ومحمد مال علي امه وقال
شوفتي ابنك حنين ورومانسي ازاي، ربنا يسعده قولي امين يا امااا..
ام محمد بغيظ
حل عني يا واد انت بتقل دمك ده..
_وجوه المطبخ كان سعيد واقف ماسك موبيله وبيقلب فيه ونسمه قالتله بسخريه..
نسمه
مش المفروض حضرتك جااي تساعدني..
سعيد بجمود
جيت عشان ما تزعليش من كلام. امي وابرد وشك قدام اهلك وبس..
نسمه
طيب اوعي كده من وشي..
سعيد
عايزه ايه؟..
نسمه
عايزه الشاي ورااك اهوو.
مسك سعيد الشاي وحطه قدامها وقال
اتفضلي خلصي اهووو..
نسمه بغيظ وصوت واطي
خلصت روحك انت وامك قادر يا كريم…
سعيد
بتبرطمي تقولي ايه؟..
نسمه ببرود
ما قولتش هتقولني بالعافيه كمان..
دخلت عندهم ناديه في الوقت ده وقالت
معلش يا سعيد اطلع يا ابني اقعد معاهم بره وانا هساعد نسمه هنا..
سعيد
حاضر يا ام. نعمه..
وبص لنسمه بخبث وقال
وياريت توصيها عليا شويه يا حماتي..
ناديه
وهي نسمه محتاجه وصايه علي جوزها برضو دي روحها فيك..
سعيد بابتسامه صفراء
اممم انتي هتقوليلي يا حماتي بعد اذنك..
طلع سعيد وناديه قالت لنسمه. بصوت واطي
ها. طمنيني كل حاجه تمام..
نسمه بتوتر
اا ايوه تمام..
دخلت عندهم نعمه وقالت
انتو سبتوني لوحدي مع حماتي بره ليه؟…
ناديه
بطمن علي اختك ومش راضيه تريحني..
نسمه بغيظ
ما قولتلك تمام يا ماما اقولك ايه تاني..
ضحكت نعمه وناديه قالت بشك
مش باين يا اختي لا عليكي ولا علي جوزك..
نسمه
عادي يعني يا ماما ما تقولي حاجه يا نعمه..
نعمه
يا ماما خلاص البت مكسوفه، روحي انتي بس اقعدي مع ام قويق اللي بره دي وانا هتكلم مع نسمه..
ناديه
والنبي لو قعدتي لبكره تتكلمي معاها مش هتتعدل، الناي خيبتها السبت وانا خيبتي في بنتي ما وردت علي حد..
قالت ناديه كلامها وطلعت ونعمه قالت لنسمه
في ايه يا بت مالك كده قالبه وشك ليه؟..
نسمه بقلق
يا جماعه ما فيش حاجه والله انا كويسه..
نعمه
ما بتعرفيش تلفي وتدوري في ايه مخبيه ايه؟..
_خافت نسمه تقولها انها رفضت سعيد تروح تقول لامها فعملت نفسها زعلانه وقالت..
نسمه
البيه ما رضيش حتي يخليني انام في اوضة النوم ونيمني في الصاله ونام هو في اوضة النوم وقفل الباب في وشي…
نعمه بصدمه
يا خيبته التقيله، طيب اوعي تكوني يا بت عملتي حاجه زعلته منك..
نسمه ببراءه
ابدا والله ده انا عملت زي ما انتو قولتولي بالظبط..
نعمه
طيب معلش اتحملي يمكن بس الموضوع القديم لسه شاغله، يا بت انتي حظك عامل ليه كده جاتك نيله..
كتمت نسمه ضحكتها وقالت
الحمد لله علي كل حال..
_وبعد شويه مشيو اهل نسمه وقعدت ام محمد وقالت بخبث..
ام محمد
يالهوي رجلي مش قادره اتحرك،بقولك ايه يا سعيد يا حبيبي هيدايقك لو نمت عندكم النهارده..
قبل ما يرد سعيد قال محمد
لا هيدايقني اناا تعالي يا اما انا هشيلك..
ام محمد
لا تشيلني ولا اشيلك انا بايته هنا….
سعيد بخبث
سيبها يا محمد خليها بايته هنا النهارده..
نسمه بغيظ
تبات فين وو وكده يعني ما ينفعش..
ام. محمد
وانتي مالك انتي دي شقة ابني وانا حره فيها..
نعمه
زعلانه علي ايه يا نسمه اهو شكله بيلاقي حجه يا اختي، يلا بينا يا محمد..
محمد بشك
هي ايه الحكايه انا مش فاهم حاجه..
نعمه
تعالي ننزل شقتنا وانا هفهمك، تصبحي علي خير يا نسمه وربنا يصبرك يا قلب اختك..
_طلعت نعمه ومعاها محمد ونسمه سابتهم ودخلت اوضتها هي وسعيد وقفلت الباب وام محمد قالت وهي بتمثل الالم..
ام محمد
بقولك ايه يا سعيد تعالي اسندني انام جوه في الاوضه التانيه دي..
سعيد
حاضر يا اما علي مهلك..
_ اخدها سعيد ودخلها الاوضه التانيه اللي جنب اوضته هو ونسمه، وبعدين رجع لاوضته ونسمه قالتله بحده..
نسمه
انت هتنام فين؟..
سعيد
هنا هنام فين يعني..
نسمه بغيظ
انت خليت امك تبات هنا عشان تلوي دراعي وتخليني اباات معاك في اوضه واحده..
سعيد بسخريه
علي فكره انا لو عايز منك حاجه هعملها غصب عنك بس انتي ولا فرقالي يا سكر، فأتخمدي بقي وما اسمعش صوتك..
نسمه بحده
بقولك ايه اتكلم معايا كويس ايه القرف ده.. وهتتنيل تنام فين برضو؟..
سعيد
هنا جنبك علي السرير..
نسمه بحده
بعينك يا سعيد انا هنام علي الكنبه دي اشبع بيه السرير..
_فجأه قرب منها خلاها اتوترت جداً واتنفضت لخوف وهو قالها بصوت واطي جداً..
سعيد
بصي كده تحت الباب هتلاقي امي واقفه تسمع احنا بنعمل ايه؟..
نسمه بتوتر وكسوف
امك دي بجد ست مش كويسه ومش محترمه، ابعد عني..
سعيد بخبث
والله انا مقرب خوف عليكي ، امي لو شافت اللي انتي عملاه فيا مش هتسكت..
ذقته جامد وقالت بحده
اوعي بقي انا مش هسكت لامك..
_وراحت فتحت الباب لقيت ام. محمد. واقفه وقالتلها بتوتر..
ام محمد
سمعتكم بتزعقو فقولت اجي اشوفكم مالكم..
راح سعيد قعد علي السرير ونسمه قالت بحده
عريس وعروسه يا حماتي هيكون مالنا، ومدام. يا طنط رجلك خفت اتفضلي لو سمحتي عايزين ناخد راحتنا في شقتنا..
ام محمد بعصبيه
انتي بتطرديني من شقة ابني يا قليلة التربيه..
نسمه بحده
لا قلة التربيه جايه لما افتح البلكونه واقول للناس كلها ان حماتي عايزه تبات معايا انا وجوزي تاني يوم دخلتنا وانا لا بتكسف ولا بخاف من حد…
سعيد بسخريه
انزلي يا اما دي مش شهد الغلبانه دي ما يقدرش عليها غير ربنا..
نسمه ببرود
اهو ابنك قالك يا طنط..
ام محمد بغيظ
طنط تنططك يا بعيده، بس انتي اللي جبتيه لنفسك وانتي لسه عودك اخضر مش قدي..
_مشيت ام. محمد ورزعت الباب وراها وقام سعيد قرب من نسمه وقال بخبث….
سعيد
اهي الشقه فضيت ايه بقي؟..
نسمه بعدت عنه بسرعه وقالت
تصبح علي خير يا جوازة الندامه، اشبع بالاوضه انا هنام في الاوضه التانيه..
_ونزلت ام محمد من فوق لقيت محمد. ونعمه قاعدين علي السلم ومحمد لما شافها قاال بصوت عالي وسعاده..
محمد
الله اكبر عااااش يا بت يا نسمه، لامؤخذه يا اما اصل انا والبت نعمه كنا متراهنين ان البت نسمه هتنزلك ولا انتي اللي هتمشي كلامك بس طلعت بت جدعه والله..
ام محمد بغيظ
اوعي من وشي ربنا ياخدك ويريحني منك..
نزلت ام محمد وقال هو لنعمه تللي كانت بتضحك
ما تقلقيش انا هبقي اكلم الواد سعيد واشوف مشكلته ايه، يلا بينا بقي علي شقتنا..
نعمه بحده
اوعي كده بس من جنبي انا اصلا مش بكلمك يا بتاع حنان..
_وسابته ودخلت شقتها وهو فضل قاعد علي السلم مدايق وطلع كريم ابنه بعد شويه وقاله..
كريم
يا بابا ماما بتقولك تعالي اتعشي يا بتاع حنان، هي مين حنان دي يا بابا؟..
محمد بنفاذ صبر
مرات ابوك بعون الله عشان امك ترتاح، قداااامي…
ــــــــــ #بقلم_الكاتبه_رحاب_القاضي ــــــــ
_وعدي يوم في التاني والتالت وكانت شهد لسه قااعده في بيت اهلها، وجه اليوم اللي ابوها بيفتح فيه محل البقاله البسيط بتاعه وكان مشغل اغاني قدام المحل والناس ملمومه عليه، وهي كانت واقفه في البلكونه بتتفرج من فوق، وفتحت موبيلها بفضول تشوف لو كان أسر كلمها او لا، وجات رحمه وقفت جنبيها وقالت..
رحمه
ابوكي طاير من الفرحه تحت وكأنه جايب المحل ده من فلوسه..
شهد بضيق
سبيه يفرح اهو يحل عني شويه..
رحمه
بس تصدقي اخواتك لما لبسو هدوم حلوه ونضفو كده طلعو حلوين الاول كانو شبه سوكه…
شهد ضحكت وقالت
ههههه حتي اخواتي ما سلموش منك..
رحمه
طيب سيبك من اخواتك اهم نضفو واهلك كلهم بانت عليهم الراحه انتي ايه بقي مرتاحه ولا لا وغلاوتي عندك بس ما تكدبي عليا واتكلمي بصراحه..
اتملت عيون شهد دموع وقالت
في مقوله بتقول “ربَّما كانَ الفَتىٰ باسِمًا، وكَان كُلُّ الهمِّ فِي قَلبه”.
رحمه
انزلي بالترجمه بقي..
ضحكت شهد وقالت
يعني مش معني اني ببتسم واني بقيت بلبس حلو او معايا فلوس اني كده ارتحت بالعكس ده انا ماشيه في سكه ضلمه ومش هلاقي فيها النور ولا لا..
رحمه
يعني انا كده فهمت، انا ما اتربتش اني سألتك علي حاجه يا شهد اسكتي..
_ضحكت شهد بهدوء وفضلت تتفرج علي اخواتها وهما بيرقصو ومبسوطين مع ابوها…
وفجأه قالت رحمه
ايه ده أسر جوزك جه اهوو هو كمان، انتي مش قولتي انه مسافر؟..
_بصتله شهد بسرعه وكانت فعلا قلقانه عليه لانه بقاله اكتر من يومين مش بيكلمها وحتي هاله اخته ما كانتش تعرف عنه حاجه رغم انه خلص شغله، وهو كعادته نزل من عربيته بهدوء وكاريزمه خاصه بيه وفي ايده سجارته اللي بيكتر من شربها لما بيكون مدايق، ولفت نظر الكل ليه في منطقتها، وسلم علي ابوها وامها ودخل العماره بتاعتهم..
رحمه
اهو جاي روحي افتحيله..
شهد بتوتر
لا روحي انتي..
رحمه
هو جوزي انا ولا جوزك انتي، وجاي عشانك ولا عشااني وبعدين انا وهو ما بنتفقش فتروحي تفتحيله وتاخديه وتمشي احسن..
_طلعت شهد وراحت تفتح الباب بس استنت لحد ما هو يخبط الاول، وكانت متوتره جداً ومش عارفه ابه سبب لهفتها انها تشوفه او توترها منه وقلقها عليه..
_ولما الباب خبط راحت فتحت واول ما هو شافها ابتسم بهدوء وبحركه مفاجأه ليها حضنها وهي اتخشبت مكانها ووشها قلب احمر وقال هو بهدوء.
أسر
وحشتيني اوووي يا حبيبتي..
وبصوت واطي
امك ورايا علي السلم فأهدي..
بعدت عنه شهد بهدوء وقالت
حمدلله علي السلامه، اتفضل…
دخل اسر وبصت شهد ورااه مالقيتش حد وقالت
اومال فين امي؟..
أسر بخبث
تحت بترقص مع ابوكي..
ضربته شهد علي كتفه وقالت
ومدام هي تحت بتحضني ليه؟..
اسر غمزلها وقال
ما بقولك وحشاني يا شوشو..
طلعت رحمه في الوقت ده من البلكونه وقالت
اهلا يا اسمك ايه انت؟..
أسر بضيق
البت دي بتعمل ايه هنا؟..
رحمه
هو كان بيت ابوك انت مالك؟..
أسر
بقي انتي يا شرشوحه تجيبي سيرة ابويا انا علي لسانك، ده لو كان شافك كان مش هستنضف يشغلك عندنا شغاله..
رحمه بغيظ
لا يروح خالتك ده لو كان شافني كان زماني مرات ابوك دلوقتي..
ضحكت شهد وأسر قالها بأبتسامه بسيطه
عجبتك اووي دي..
شهد
تستاهل عشان بترخم علي صحبتي..
أسر
طيب يلا بينا عشان عندنا مشوار مهم..
شهد
مشوار ايه؟.
أسر
حاجه خاصه لما نبقي لوحدنا هقولك عليها..
شهد
انا عايزه اقعد هنا كام يوم.
أسر
نفسي مره يا شهد مره واحده اقولك علي حاجه وتقولي حاضر علي طول من غير ما تتعبيني معاكي..
شهد
ما انا هاجي معاك اعمل ايه انا عايزه اقعد مع اخواتي.
أسر
هبقي اجيبك عندهم تاني يلا بينا بس دلوقتي..
شهد بضيق
طيب هجيب حاجتي من جوه وجااايه..
أسر بهدوء
حلو الفستان اللي انتي لابساه ده علي فكره..
ردت عليه وهي بتداري خجلها منه وقالت
شكراً…
_دخلت شهد اوضتها وأسر ورحمه بصو لبعض بحده وقالها هو ببرود..
أسر
هتاخديلي صوره ولا ايه يا انسه؟..
رحمه بسخريه
من حلاوة خلقتك ولا من عنقك اللي اطول من ركبتك ده..
أسر بغيظ
من حظك انك بنت ومش بحب امد ايدي علي ستات..
رحمه بخبث
لقيت فيك ميزه اهووو انك متربي..
أسر بغيظ
يا شهد تعالي يلا بسرعه قبل ما ارتكب جريمه في التلاجه دي..
_وطلعت شهد واخدته ونزلو وقبلو ما يطلعو من البيت دخل ابوها وقال..
صابر
استني يا ابو نسب عايزك. في كلمتين..
شهد
في ايه يا بابا خير ان شاء الله؟..
صابر
بص بقي يا بيه انا كنت مذنوق في قرشين زي ما انت شايف ببدأ مشروع جديد..
ادايقت شهد من تصرفات صابر وقالت
فلوس ايه دلوقتي يعني اا..
صابر بحده
بس يا بت انتي اسكتي هو انا وجهتلك كلام، وبعدين هو مبلغ مش كبير انا عايز 1000 جنيه بس..
أسر بهدوء
حاضر يا ااا عمي..
_وطلع فلوس من جيبه واداها لابو شهد اللي عيونها اتملت دموع بأحراج شديد، وأسر مسك ايدها بتملك قدام صابر واخدها وطلعو من البيت وخلاها سلمت علي امها واخواتها ومشيو، وكان سايق العربيه وهي قاعده جنبيه وشكلها مدايق جداً، فابتسم بهدوء وقال..
أسر
حساسه اووي انتي يا شهد، كبري دماغك عادي يعني انا بالنسبه لابوكي جوز بنته وزي ابنه فده عادي يعني مش مشكله..
شهد بدموع
ااه عادي ما حصلش حاجه،قبل كده برضو كان بياخد فلوس من جوزي الاولاني…
أسر بجمود
كنتي بتحبيه؟..
شهد
هو مين؟..
أسر
طليقك؟..
اتنهدت بضيق وقالت
لا هو بس اعتذرلي فخلاص ..
أسر
اعتذرلك امتي؟.
شهد
من يومين تلاته كده..
اسر بجمود
والله… وقفتو بقي اتكلمتو ولا كنتي قاعدين؟..
شهد بسخريه
لا كنا بنتمشي..
أسر بحده
كمان؟..
شهد
كنت داخله بيتنا وقفني وسألني عامله ايه، وبعدين اعتذرلي وقالي انه كويس انه شافني عشان يعتذرلي..
أسر بضيق
طيب..
شهد
هو احنا رايحين فين؟..
أسر بخبث
شقتي..
شهد بقلق
ليه ومش هنروح البيت ليه؟..
أسر بهدوء
لا انا قااعد هناك اليومين دول اصل بصراحه بوظت الصفقه لفؤاد ولو شافني هيولع فيا فقولت ابعد عنه اليومين دول..
شهد
طيب كنت سيبتني عند اخواتي ليه جايبني معاك..
أسر بهدوء
المطعم ده حلو اووي علي فكره..
شهد
اسمها عربية كبده قال مطعم قال..
أسر
طيب استني هجيبلنا كبده وجاي، ولا انتي اتعشيتي؟..
شهد
ايوه اتعشيت وما ليش نفس..
أسر
حاضر هجيبلك كبده..
_نزل من العربيه وهي ضحكت بهدوء ونزلت من العربيه ووقفت قدامها، وجه أسر بالاكل ووقف جنبيها وقاال..
أسر
بصي هو انا ما بحبش اقعد لوحدي، يعني كنت ببقي متخانق مع فؤاد وبرضو اقعد في البيت معاه عشان لما بكون لوحدي ما بكونش كويس..
شهد
مع ان هاله قالتلي انك كنت عايش بره مصر كتير لوحدك…
أسر بجمود
ما هو ده بقي كان عقااب بابا ليا، كان شافني مهمل ومستهتر هنا فقال يبعتني اعيش لوحدي عشان هو عارف اني مش بحب اقعد لوحدي في اي مكان وانه كده بيربيني يعني..
شهد
بتخاف يعني تقعد لوحدك؟..
أسر بأبتسامه ساخره
ياريت.. بس مش خوف قد ما بيكون تفكير سلبي بيخليني اعمل حاجات مش عايزها، بس اليومين اللي عدو دول انا ما كنتش بفكر في حاجه غيرك..
بصتله شهد بعدم فهم وقال
زي ما بقولك كده امسكي كلي وبطلي تتكسفي مني انا بقولك كلي مش هاتي بوسه عشان تتوتري كده..
_ابتسمت غصب عنها وبدأت تاكل معاه وهو بيلصلها بهدوء كل شويه وقال..
أسر
جيبتي حاجات الجامعه بتاعتك؟..
شهد
اسمه معهد ولسه ما جيبتش حاجه اصلا مش عارفه اجيب ايه…
أسر
طيب خلصي اكل ونروح نجيبهم سوا..
شهد
بجد؟..
أسر بهدوء
ااه..
عدي ولد صغير من جنبيه وقال
الشااااارع اللي وراااااه..
ضحكت شهد بصوت عالي وأسر قال للولد بهدوء
عيب يا ولد انا زي بابا..
شهد بضحك
ههههههه والله ولد لذيذ.. الله حلوه اووي الاغنيه اللي شغاله دي بحبها اووي..
أسر بهدوء
وانا كمان علي فكره اصلا بحب عبدالباسط حموده اووي..
شهد
بس اغنية حته تانيه دي جامده بجد..
أسر بهدوء
طيب ايه أكتر كوبليه بتحبيه فيها؟..
شهد
قول انت الاول..
أسر
“ده انا كنت بنام علي كوم احلام وفجأه صحيت علي بلة ريق”
شهد
“واتاريه واتاريه كل اللي انا فيه سلم مكسور قداامه السما اهي”
أسر كمل باقي الاغنيه وقال بنبره دراميه
“انا مش مجنون ده برااااح الكون بقي بيسعني”
شهد بتنهيده
“واكيد يا سنين هتضحكي بعدين”..
رفع أسر وشها ليه بهدوء وقال
” علي وشك اهو في لمعة عين “…
بعدت شهد ايده عنها وضحكت بهدوء وقالت
اغنيه معبره بجد..
أسر
هي حتة” ده مكانا في حته تانيه مش جنب الناس التانيه “دي لايقه عليكي اووي لان فعلا انتي لا مكانك لا مع ابوكي ولا عمك ولا في الحته اللي كنا فيها من شويه دي…
شهد
يمكن ده سبب اني وقعت في طريقك مثلا، عشان اشوف باقي حكايتي اللي مش مفهومه دي..
مد أسر ايده ليها وقال
ايه رئيك نبقي صحاب بدل ما احنا عاملين زي نتقر ونقير كده، لا نقضي الفتره دي واحنا صحااب وعلاقتنا كويسه..
حطت ايدها في ايده وقالت بهدوء
موافقه نبقي صحااب وانت تبطل تدايقني بتصرفاتك اللي بتستفزني..
أسر
وانتي تبطلي تقولي لا وتسمعي الكلام من اول مره اقوله..
شهد
اتفقنا.. سيب ايدي بقي..
أسر بسخريه
دي ايد انسه كبيره دي، دي بقي اللي غنالها بكار وقال يا ابو كف رقيق وصغير، بس حلوه..
ضحكت بهدوء وقالت
هههه طيب سيب ايدي طيب خليني اكمل اكل..
ساب أسر ايدها وقال
طيب بسرعه بقي عشان نلحق نجيب الحاجات بتاعت المعهد بتاعك..
_وفعلا بعد شويه كانو واقفين في مكتبه كبيره وأسر قالها بهدوء..
أسر
هاا انتي نفسك في ايه بقي؟..
شهد
مش عارفه.. بصراحه نفسي في كل حاجه يعمي القلام الملونه دي انا كان نفسي اجيبها من زمان..
مسكهم أسر وقال
اول حاجه جيبناها اهي، واختاري بقي كشكول محاضرات..
شهد
هاخد اللي لونه موف ده..
_وفضلت تختار معاه كل حاجه نفسها فيها وكانت مبسوطه جداً، وكأنها لسه طفله فعلاً…
ــــــــــ #بقلم_الكاتبه_رحاب_القاضي ــــــــ
_وفي المحل بتاع سعيد كان قااعد هناك وراحله محمد وقال بحده..
محمد
يا ابني انت مش لسه عريس ايه اللي منزلك من عند عروستك؟..
سعيد
عادي قولت اجي اشوف اللي ورايا..
قعد محمد جنبيه وقال بصوت واطي
انت تمام في حاجه معاك..
سعيد
ايوه تمام وامك اهي سيباني في حالي اليومين دول..
محمد
تلاقيها بترقدلك في مصيبه امي وعارفها، المهم انت ليه بتبعد مراتك عنك في حاجه معاك صارحني ونحلها سوا احنا اخوات وستر وغطا علي بعض..
سعيد
مشكلة ايه يا عم، وبعدين مين قالك اني ببعد مراتي عني..
محمد
بصراحه كده البت اشتكت لاختها، وشكلي وشكلك بقيو زي الزفت..
سعيد بغيظ
نسمه هي اللي اشتكت وقالت اني ببعدها عني؟!..
محمد
ايوه والله ولولا العيبه كنت خليت نعمه هي اللي تقولك، طيب انت ايه مشكلتك مع البت بالظبط هي مش كانت عجباك وبتقول البت حلوه..
سعيد بعصبيه
عارف مشكلتي ايه يا محمد اني طيب مع بت الجزمه اللي فوق دي، بس ورحمة ابويا لاوريها، اقفل المحل ده وخلي المفاتيح معاك هبقي اخدهم بعدين..
_قال كلامه وسابه وطلع بيتهم ومحمد ضحك بسخريه وقال..
محمد
اقسم بالله حلال فيك وفي امك اللي بتعمله البت نسمه ده..
ــــــــــ #بقلم_الكاتبه_رحاب_القاضي ــــــــ
_وقدام المكتبه اللي فيها شهد وأسر طلعو من هناك وهما ماسكين شنط كتيره وقالها هو..
أسر
مش هتحتاجي حاجه خالص لحد ما تخلصي دراسه اهوووو..
شهد بأحراج
جيبت حاجات كتيره انا صح؟..
اسر
عادي يا ستي فداااكي وما فيش بين الصحاب كده…
شهد
بس علي فكره هما نصابين جوه القلم هنا بعشرين وعندنا في الحاره بخمسه..
أسر
معلش نبقي المره الجايه نجيب من الحاره بتاعتكم..
شهد
انت بتتريق عليا طيب مش عايزه منك حاجه..
قبل ما يرد عليها وقف ادهم ورا شهد وقال
شهد..
_بصتله شهد بسرعه لقيته واقف وفي ايده بنت صغيره، ابتسم باتساع وقالها..
ادهم
عامله ايه يا شهد مبسوط اني شوفتك..
شهد بتوتر
كويسه، دي بنتك؟..
ادهم
ايوه بنتي..
قالت البنت بعفويه
دي طنط شهد اللي هتتجوزها يا بابا..
_برقت شهد بصدمه وبصت لأسر اللي اتحولت ملامحه السعيده من لحظات لغاضبه ووقف قدام شهد بينها هي وأدهم وقال بحده..
أسر
لو مش عايزني اقل منك قدام بنتك غور من قدامي وايااك تنطق اسم مراتي علي لساانك تاني..
أدهم بسخريه
معقوله يا شهد ترفضيني انا عشان الهمجي ده..
رمي أسر الاكياس اللي في ايده علي الارض وقال
انا بقي يروح امك هوريك الهمجيه بتبقي ازاي..
_تفتكرو ايه اللي هيحصل؟..
ـــــــــــــــــــــــــــــــــــــ
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية النصيب)
