رواية الملك النمر الفصل السابع 7 بقلم بيتر نيدفيد
رواية الملك النمر الجزء السابع
رواية الملك النمر البارت السابع
رواية الملك النمر الحلقة السابعة
استدارت صوفيا بحذر
ورفعت سيفها بحركة سريعة ، ووجهته نحو الشخص اللي واقف قدامها ، واتسعت عينيها من الدهشة لما شافت شخص قمحي البشرة عاري تماماً بدون اي ملابس ببنيان قوي وواقف بثقة وحامل قوسه على وضع اطلاق السهام ، وعلى وشه ابتسامة انتصار بعد صيده للغزالة من اول سهم ، بتخجل صوفيا من منظرة وبتداري وشها للحظات بعيد عنه ، لكن بتلتفت ناحيته تاني غصب عنها ، عشان تواجهه ووقفت قدامه كمحارب في ميدان حرب ولكن في حالة دفاع ، وتراجعت بخطوات للخلف لما اتحرك الشخص العاري ناحيتها وأقترب منها ، وقف عندها وكلمها بلغة مش مفهومه ولوح بايديه الاتنين كمحاولة تعبير عن السلام وانه مش ناوي على الشر ..
ومر من جنبها بهدوء وهي بتتبعه بعينيها ورافعه سيفها ، لتفادي اي محاولة هجوم منه ، وابتدا هرماس يمسك فيها اكتر بخوف ، فرفعت ايدها التانيه وطبطبت علي ايده برفق ، عشان يطمئن ..
بيوصل الرجل العاري عند الغزاله ، وبتتفرج عليه صوفيا وأبنها ، وبعدها رفع الغزاله على اكتافه وبيستعد انه يمشي بيها من المكان ، ولكنها بتتحرك بسرعة وهي رافعه هرماس على ضهرها
وبتقوله ” لاء دي بتاعت ابني ”
وبتفضل تلوح قدامه بالسيف وبحركات من راسها علامة رفض للي بيعمله ، وكان بيبصلها العاري باستغراب وهز راسه كعلامة لعدم فهم للي بتقوله …
وبتفضل تشاورله على الغزاله وعلى ابنها ، عشان يفهم انها بتاعت الطفل ، لكن بيتحرك العاري من قدامها وبيكمل طريقه ، وبتمشي وراه و هي بتكلمه وبتهدده انها هتقتله لو موقفش وساب الغزالة
لكن ماكنتش راضية تأذيه بسيفها
مشيت وراه طريق طويل وبقى يدخل من وسط اشجار ومناطق غريبة وهي مش سيباه ومصممه تفضل وراه لحد ماتاخد الفريسة بتاعتهم.، لحد مالاقت نفسها خرجت برة الغابة وماشية وراه في بحيرة وبيعدوا لارض تانية واسعة بعيدة عن الغابة …
وبمجرد دخول صوفيا للارض دي وهي ماسكه سيفها ، بتتفاجئ برجال ونساء واطفال وكلهم عرايا وباعداد كبيرة بيتحركوا ناحيتها وبيبصوا عليها باندهاش واستغراب ومجموعة منهم بتلف من حواليها وبتتفرج عليها هي وإبنها ، لكنها بتحط سيفها في جرابه وبترمي القوس عشان يفهموا انها مش قاصدة شر وبتنزل ابنها من ضهرها وبترفعه في حضنها عشان تحميه ..
*********
” لامك ”
سمع لامك صوت صهيل حصان مصدره من الغابة ، وراقب الغابة بعينيه ، واضطر يدخلها بعد لحظات من المراقبة عشان يشوف مكان الحصان اللي اصدر صوت الصهيل ، وبالفعل بيوصل لعنده وبيلاقيه مربوط في شجرة وبيعرف انه الحصان اللي اخدته صوفيا ، وبينتبه لجسم حيواني مرفوع على شواية بدائية ومتقطع منه اجزاء ولكن لحمه فسد وبالقرب منه شجرة كبيرة تجويفها مفروش باوراق الشجر وعلامات بتدل على إن صوفيا وابنها كانوا في المكان ده !
بيمشي بحصانه فى المكان وبيفصحه من كذا طريق وبيتفاجئ لما بيشوف قدامه راس لبؤة مقطوعه , وبيقول في نفسه ” أكيد كان في أشخاص مع الملكة صوفيا وهما اللي قتلوا اللبؤة وأكلوا من لحمها ! ، لكن مين هما ؟! معقول تكون مخطوفة فعلاً ”
ومع محاولات بحثه الطويلة اقتنع انهم استريحوا في الغابة لفترة ومشيوا من المكان ، ولكن ياترى راحوا فين بالملكة وابنها وايه الطريق اللي يوصله ليهم؟
رجع لامك عند حصان صوفيا وحرره من ربطته في الشجرة وخرج من الغابة بالحصانين ، وهو بيلتفت حواليه وبيفكر في الطريق اللي هيمشيه ويوصله لصوفيا ..
**********
“جبل الحياة ”
بيوصل هيرون بجنوده لجبل الحياة اللي كانت فيه الملكة ، وبينتبه لجثة جندي مقتول ومتعفنه وبيدخل يفتش في الكهف ، وبيفهم ان الملكة وإبنها كانوا في المكان بالفعل
وبيأمر جنوده تمسح المكان من حوالين الجبل ومحاولة تتبع اي اثار اقدام تدلهم على الطريق اللي سلكوه بعد محطة الجبل ..
ومع انشغال الجنود في البحث بيتحرك هيرون لمكان بيفهم منه ان الأحصنة كانت مربوطة فيه ، وبيلاحظ ٣ طرق متفرقة حسب اثار الاحصنة وبيكون الموضوع محير بالنسبة ليها ايه الطريق اللي هيختاره بينهم !!
بيمسك سيفه وبيرسم على الارض علامات توضح كل طريق كعلامه ودليل يرجعلهم في اي وقت
ومن بعدها بيأمر الجنود تجمع على احصنتهم ويتحركوا من المكان في طريق العودة للقصر ..
**********
في القصر الملكي
بيقف سيلمار قدام الملك وبيقوله :-
– الملكة لوفي بتعامل الكل بقسوة في القصر القديم يامولاي وماحدش قادر يسيطر على غضبها
= فى الاول بس هتكون عصبية ولكن بعد ماتتعود على الحياة في القصر القديم هتقبل الامر الواقع وهتكون طبيعية
– أعتقد أن جلالتك واجب تزورها وتطمنها انها مش منفية او سجينة هناك وانها هتفضل الملكة وابنها هو الوريث الشرعي الوحيد ليك
= في حاجات تانيه أهم ياسيلمار ، في غضب بين الأهالي عشان رفعنا الضرايب شوف طريقه تسيطر على غضبهم هما قبل مايشتعل بدل ما أنت بتفكر في غضب الملكة
– الشعب مهما نعمل هيفضل غضبان ولكنه بيكون غضب مؤقت وبينتهي بسرعة ، وانا من رأيي إنهم يتلهوا في حدث يشغلهم ينسيهم الضرائب اللي زادت
= حدث ايه ؟ هنقتل جنود تاني من رجالنا عشانهم ؟
– لاء يامولاي نعمل عروض ترفيهيه تكون قوية وصادمة وانها بالمجان لإسعاد الشعب
= عروض ؟! زي ايه عندك افكار ؟
– سمعت ان في مدينة عندها عرض شعبي لمصارعة الثيران الهايجة ، بيطلقوهم في مكان كبير وبيصارعوهم ، وفي ثيران بتموت وفي ناس من الاهالي بتموت ولكن بيعتبروا ده شئ ممتع جدا وبيلهي الشعب بالكامل وبيسعدهم
= موافق لكن عايزين نشوف حيوان غير الثور ، ونتميز احنا بعروضنا عن غيرنا
– الضباع يامولاي ، اقوى من الثيران في شراستها وتقدر تنهش لحم الكائن اللي قدامها حتى وهو حي وكمان اسرع واذكى
= الضبع ؟!
– ضبع واحد هيكون سهل التغلب عليه ، الضباع قوتها في اتحادها انهم بيكونوا مجموعة مع بعض وبتكون مقاومتهم صعبه حتى على الاسود
= ليكن ياسيلمار ، انا موافق على افكارك ابدأ فورا بعمل اللازم لتجهيز ساحة مصارعة كبيرة واماكن فرجة للأهالي على مصارعة الضباع وسرب الخبر ده بينهم من دلوقت عشان يكونوا منتظرين بلهفة الحدث ده ..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية الملك النمر)
