رواية المكيدة الفصل الرابع 4 بقلم أمل عبدالرازق
رواية المكيدة الجزء الرابع
رواية المكيدة البارت الرابع
رواية المكيدة الحلقة الرابعة
– نوال: و ايه اللي غير رأيك فجأة يا عز، دا انت حتى كنت متحمس وفرحان وبتقول دِ فرصة العمر وهتشتغل محاسب في شركة معروفه، ايه اللي جد بقى
– عز: هسافر يا ماما بس بعد شهر مش هتفرق يعني
– نوال: لأ هتفرق و اكيد هيشوفوا حد تاني غيرك يشغلوه معاهم
– عز: يبقى نصيبي و انا راضي بيه
– نوال: متحاولش تجيب اخري يا عز، ايه اللي غير رأيك فجأة
– عز: انا لسه متجوز ومكملتش يومين، هسافر آخر الأسبوع و اسيب مراتي لوحدها، دا حرام و انا اصلا ضد مبدأ سفر الراجل ويسيب بيته ومراته ويمشي، فأنا قررت استنى شهر واخدها معايا على ما ورقها يخلص والإفادة تطلع من الكلية وهتكلم مع المدير وهو راجل محترم وهيقدر موقفي، لكن اسيب ريم هنا لوحدها لأ
– نوال قالت لعز بنبرة صوت حزينه : خايف على مراتك مني يا عز، خايف عليها من أمك حبيبتك، طب انا كنت عايزه ارجعلك كرامتك انت مش فارق معاك كرامتك اللي اتهانت يبقى خلاص يا ابني انت حر، ومن هنا ورايح ريم مرات ابني وغلاوتها من غلاوتك، اكيد مش هزعلها ولا هدوس ليها على طرف
– عز: انتِ ببتكلمي جد يا ماما، يعني خلاص مافيش مشاكل وهنعيش بالنا مرتاح كلنا، ريم طيبه اوي لو اتعاملتي معاها هتحبيها، انا مش عايز حاجه من الدنيا غيرها لا فارق معايا قايمه ولا اي حاجه في الدنيا مش فارق معايا غير ريم وبس
– نوال حاولت تتماسك وقالتله بابتسامه: ربنا يهنيك بمراتك يا حبيبي، انا مش عايزه من الدنيا غير سعادتك انت واختك، وليك عليا ريم هشيلها جوا عيوني
– عز حضن نوال وقالها: ربنا ما يحرمني منك ابدا يا ست الكل، تصدقي انا كنت خايف اعيش في صراع بينك وبين ريم، انتِ غاليه عندي اوي يا ماما ورضاكي عليا بالدنيا، وريم مراتي وشريكة حياتي وعليا واجبات اتجاهها، كنت مش عارف هرضيكم ازاي، وبما ان النفوس اتراضت عايز اقترح عليكي اقتراح او اخد رأيك يعني
– نوال: طبعا يا حبيبي اقترح عليا وخد رأيي في اللي انت عايزه
– عز: بفكر اروح انا وريم اسبوع في مكان هادي يكون فيه بحر لأنها بتحب البحر اوي، زي دهب او الساحل اي مكان كويس يعني، حتى عشان اعرف أطيب بخاطرها واعوضها عن اليوم الصعب اللي عاشته بسببي
– نوال: طب دِ فكره حلوه خالص، انا اصلا كنت هقترح عليك تعمل كدا، خد مراتك وفسحها وخليها تفرح، ربنا يسعدكم يا حبيبي
– عز: ربنا ما يحرمني منك ابدا يا ست الكل، هطلع اقول لريم تجهز الشُنط عشان نسافر بكرا، انا قولت لواحد صاحبي يحجزلنا امبارح
– نوال: ماشي يا حبيبي يلا اطلع فرح مراتك
_______
– ريم: ما شاء الله باين عليك انك مبسوط
– عز: اول ما امي رنت عليا وقالتلي انزل قولت اكيد في مشكله واكيد هتكلمني في موضوع السفر ، لكن بالعكس يا ريم امي كانت كما لم أعهدها من قبل وكلمتني حلو اوي
– ريم: ايوه فعلا انت كنت نازل وانت متضايق، ايه اللي حصل بقى وفرحك كدا
– عز: امي قررت تحبك وتعاملك زي بنتها ووافقت على تأجيل السفر، لا وكمان وافقت اننا نروح بكرا نقضي اسبوع في دهب زي ما كنتي بتتمني
– ريم: طب وهي مامتك كانت عايزه تعاملني وحش ليه، انا عملت ليها ايه يعني، كانت كويسه طول فترة الخطوبة وكل ما تيجي تزورنا تقولي انتِ زي بنتي انا هشيلك جوا عيوني
– عز: قولتلك بتغير عليا يا رورو، كانت خايفه تاخديني منها، بس خلاص مافيش مشاكل تاني، وبعدين كبري دماغك وافرحي بقى، يلا بينا نجهز الشُنط عشان اخدك في المكان اللي كان نفسك تزوره يا جميل
– ريم: حاضر
– عز مسك ريم من ايديها قبل ما تمشي وقالها: ريم انتِ مبسوطه
– ريم: ايوه الحمد لله مبسوطه
– عز: بس مش باين عليكِ، انتِ لسه زعلانه مني
– ريم: لأ يا عز مش زعلانه منك بس قلبي مقبوض ومش مرتاحه
– عز: حبيبتي قولتلك متخافيش طول ما انا جنبك، وبعدين عايز اشوف ابتسامة حبيبتي الحلوه
– ريم ابتسمت ليه وقالت: ربنا يبعد عننا كل مكروه وسوء ويهدينا لبعض يا عز
– عز: اللهم آمين يا قلب عز، اطمني انا متفائل جدًا، مش عايزين نكد بقى ويلا نجهز شنطنا يا جميل
______
– هناء: اهدي يا ماما كدا هيجرالك حاجه وهتروحي فيها
– نوال قالت بغضب وهي بتضغط على اسنانها من الغل اللي جواها: راسي هتنفجر، الواد أجل السفر عشانها، وواخدها بكرا ورايح يقضي شهر عسل، اه يا حسرتك يا نوال، الواد دا اللي هيخلص عليا هو وابوه، مشوفتيش المحروس وهو بيتكلم عنها، سحرتله بنت رحمه، خدت اخوكي في صفها، اخوكي الخايب المايل بخته
– هناء: اهدي يا ماما اكيد في حل
– نوال: حل! حل ايه يا اختي، دا انا كنت هبوس رجله عشان يلغي السفر كان بيقولي لأ يا ماما انا عايز اتجوز بسرعه واسافر دِ فرصة العمر والفرصة مش هتتكرر تاني، واللي يضيع على نفسه فرصه زي دِ ميستاهلش ياخد فرص تانيه، ومسمعش كلامي جت البت اللي فوق في يوم غيرت رأيه، والله بعينها هي وامها، أمها كسرتني زمان وبنتها جايه تكسرني دلوقتي وتاخد ابني مني
– هناء: امها كسرتك ازاي يا ماما، هو انتِ كنتي تعرفيها
– نوال: مش وقت أسئلتك الغبيه، قومي اطلعي برا مش عايزه اشوفك قدامي
– هناء: حاضر يا ماما هطلع، كل ما تشوفي وشي قللي مني، كنت عايشه مرتاحه وجوزي شغال وبيجيب فلوس وكان كل يوم بيرجع بيته لمراته ولولاده فضلتي وراه لحد ما سافر، قال ايه عشان يأمن مستقبله، كنت عايشه مرتاحه معاه في بيت اهله وأمه كانت حلوه في حقي، فضلتي بردو ورايا لحد ما عزلت وكرهت الناس فيا، كان بيسيبني فوق لوحدي كأني منبوذه وينزل ياكل مع أمه واخواته ويقولي انتِ اللي اختارتي، انا تعبت والله، لو ليا وش ارجع شقتي اللي في بيت اهله كنت رجعت من زمان، بس للأسف بقى اسمي خرابة البيوت عشان سمعت كلامك يا ماما، نفسي البيت اللي بيتبنى دا يخلص واخد بناتي واغور من هنا، واخربي حياة عز براحتك، انا بقيت مش طايقه العيشه هنا ولا هم اللي انا عايشه فيه، دا انا مش بسمع صوت جوزي حرام عليكي والله
– نوال: كل دا ساكته وشيلاه جواكي يا هناء، وكل ما أسألك تقوليلي جوزي كويس، طب ما هو بيبعتلك فلوس علطول ولبستي دهب مكنتيش تحلمي تلبسيه وبدل الشقة اللي مزعلاكي هيكون ليكي بيت لوحدك وكله بفضلي، يعني انا غلطانه عشان عايزه يكون ليكي مستقبل وشخصيتك تكون قوية وجوزك يخاف منك
– هناء: انا مش عايزه جوزي يخاف مني، انا عايزاه يحبني مش يعمل كدا خوف من امي ولا مني، جوزي بقاله سنين برا انا نسيت شكله وصوته، وحشني يا ماما تعرفي يعني ايه وحشني، و يا عالم هيرجع امتى، بناته بيتربوا من غير اب وأبوهم لسه حيٌ يرزق
– نوال: شوفي مين لاعب في عقلك انتِ كمان، اطلعي عيطي برا متورنيش وشك خالص، انا فيا اللي مكفيني
– هناء: هطلع يا ماما ما انا متعوده منك على كدا، لا عمرك عرفتي تحضنيني ولا تسمعيني، هطلع واسيبك تخططي ازاي تخربي حياة عز، و اعرفي كمان ان انا جبت اخري ومش هشاركك في اي كلام فاضي ومخططات تخربي بيها حياة ابنك
– نوال قالت بصوت عالي: بقولك اطلعي برااااااااااا ومش عايزه اشوف وشك النهارده خالص
_______
– عز : اهلا وسهلا اتفضل يا عمي
– عماد: مشكور يا عز يزيد فضلك يا حبيبي
– ريم: وحشتني اوي يا بابا، نورتنا والله يا حبيبي
– عماد: البيت منور بيكِ انتِ وجوزك يا حبيبتي، معلش جيت من غير استئذان بس موبايلك مغلق وبصراحه انتِ وحشتيني اوي
– عز: انت تنورنا في اي وقت يا عمي، تعالى اتفضل اقعد في الصالون
– عماد: يزيد فضلك يا عز، بس ايه الشنط دِ انتو كنتو مسافرين ولا ايه
– ريم ردت بحماس وسعاده وقالت: هسافر بكرا مع عز وهنقضي اسبوع كامل في دهب
– عماد: ما شاء الله ربنا يسعدكم يا حبايبي
– رحمه: تقريبًا انا واقفه شفافه معاكم، كل الاحتفال بعماد ومافيش اهلا يا ماما نورتينا، امشي يعني
– عز: دا انتِ الخير كله يا ماما، وليه تاعبين نفسكم وجايبين الحاجات دِ كلها
– ريم: هو في أغلى منك يا نور عيني، بس بابا كان واحشني اوي، وبعدين فين اخواتي
– رحمه: منحرمش منكم أبدًا، وبعدين دِ حاجه بسيطة ومافيش اغلى منكم عشان نجيبله، واخواتك ان شاء الله هيعوضوها في زياره تانيه، وبعدين تعالي معايا الأوضة عايزاكي في موضوع
– ريم: بعد اذنك يا بابا هدخل مع ماما ثواني وجايه اقعد مع حضرتك انت اصلا واحشني اووووي
– عماد: ماشي يا حبيبة بابا
_______
– عماد: وصلني انك زعلان وواخد على خاطرك مني
– عز: لأ خالص يا عمي، حضرتك زي والدي
– عماد قام قعد جنب عز وحط إيده على كتفه وقاله: انا ربنا حرمني من الخلفة اول ٥ سنين جواز وبعد كدا رزقني بريم وبعدها اخواتها، بصراحه كنت طاير بيها من الفرحة وأول ما شوفتها كأني ملكت الدنيا كلها في ايدي يا عز، كبرت قدام عيني ودخلتها المدرسه والكلية وكنا عايشين مبسوطين وحياتنا هاديه، كان لما بيجي حد يتقدم ليها كنت برفض من برا برا من غير حتى ما اعرفها، مكنتش عايز حد ياخد بنتي مني، والله يا ابني البنت روح ابوها، كنت عايز بناتي يفضلوا حواليا، كنت خايف واحد ياخدها مني يكسر بخاطرها في يوم ولا يوجع قلبها، والبنات قلوبهم غاليه اوي يا عز وبتتراضى بكلمة وابتسامه، المهم انت جيت وكنت مُصر تاخدها مني وخدتها بالرغم اني حاولت كتير أصعب عليك الجوازه دِ او بمعنى أصح اطفشك، بس والله ما كنت مستقصدك، انت مش فاهم احساسي بس بكرا تكون اب وتعرف، انا جاي النهارده يا ابني عشان افتح معاك صفحة جديدة تكون صفحة بين اب وابنه، ومش هوصيك على ريم عشان عارف انك هتشيلها جوا عينيك، ريم بتحبك اوعى تظلمها او تكسرها في يوم يا عز، بنتي امانه في رقبتك
– عز مسح دموع عماد و اتأثر جدًا بكلامه وحضنه وقاله والدموع في عينيه: ريم دِ أغلى حاجه في حياتي كلها يا عمي، مش هكذب عليك واقولك مش زعلان، بصراحة كنت زعلان اوي لأنك قللت مني او بمعنى أصح كسرت نفسي يا عمي، كنت بفكر ابعد بدل المره ألف، بس معرفتش قلبي كان مع ريم ومعرفتش، كنت بسأل نفسي ليه بيعمل فيا كدا، بس دلوقتي فهمت، ومش زعلان منك يا عمي، و اوعدك اني هحافظ على ريم ومش هكسرها ابدًا
– عماد: طب انا بعيط عشان متأثر انت بتعيط ليه دلوقتي
– عز قاله بابتسامه: ما هو انا كمان اتأثرت
– عماد باس راس عز وقاله: حقك عليا يا ابني انا غلطان في حقك وقسيت عليك جامد، بس انت كنت راجل واستحملت، غيرتي مش مبرر أبدًا واحنا عايشين في الدنيا نتعلم
– عز: متقولش كدا يا عمي انا مش زعلان من حضرتك وكلامك فوق راسي، انت مش عارف فرق معايا اد ايه وأثره عليا عامل ازاي
– عماد: لا يا عز انا يعز عليا زعلك، انا نفسي ابطل الغيره الجامده دِ واستوعب ان البنت بيجي ليها يوم وتخرج من بيت ابوها لبيت جوزها، و انت ونعم الزوج يا حبيبي
– عز: تسلم يا رب يا عمي، والحمد لله انا نفدت بجلدي وفوزت بريم في الآخر، الله يكون في عون اللي لسه هيخطبوا بناتك
– ضحك عماد على كلام عز وقاله: عندك حق ربنا يستر
_______
– رحمه: الحمد لله يا بنتي، طمنتي قلبي دا انا كنت مستنيه الصبح يطلع بفارغ الصبر عشان اجي اطمن عليكي
– ريم: ربنا ما يحرمني منك ابدًا يا ماما، اكيد كلامك مع عز فوقه وبقى نفسه يرضيني بأي طريقه
– رحمه: الحمد لله ان ربنا صلح حالكم وهداكم لبعض، نزلتي لحماتك بصيتي عليها ولا لسه
– ريم: كانت عندنا امبارح طول الليل
– رحمه: طب كويس فيها الخير، بصي يا ريم الكلمة الحلوه بتريح القلب يا بنتي، اوعي في يوم تردي على حماتك وحش او تزعليها، اعتبريها زيي واتعاملي معاها كويس، وكلها شهر وهتسافري يعني مش باقي غير الكلمة الحلوه يا قلب يا ماما
– ريم : انا نفسي حياتي تكون مستقرة وهاديه، مستحيل اغلط في حماتي او ازعلها يا ماما
– رحمه: واثقه فيكِ وفي تربيتي ليكِ يا حبيبتي، وابقي انزلي بصي عليها انتِ وعز واي حاجه نجيبلك منها تنزلي ليهم منها، واي حاجه حلوه تعمليها في شقتك نزلي ليهم منها هيفرحوا بيكِ اوي، واكيد لما هي تفرح عز هيفرح وربنا هيرضى عنك لأنك ادخلتي السرور على قلب مسلم
– ريم: حاضر يا ماما
– رحمه: وبردو يا ريم لو حصل اي حاجه تكلميني وتقوليلي حصل كذا زعلني يا ماما، أو حماتي عملت كذا زعلني، اوعي تردي على حماتك بكلمة وحشه، عرفيني اللي حصل وليكي عليا هحللك المشكلة، إنما تغلطي فيها ممنوع لأنك متربية ومؤدبه يا ريم
– ريم: حاضر، ممكن اقولك حاجه، بصراحه كنت متردده بس بعد كلامك لازم اقولك
– رحمه: قولي يا حبيبتي متخافيش
_______
– مسعود: مالك بتتسحبي كدا ليه يا نوال
– نوال: يا اخويا نشفت دمي، لا بتسحب ولا حاجه، صاحبك ومراته فوق ومفكروش حتى يخبطوا على بابنا يسلموا علينا
– مسعود: الناس عندهم دم وبيتكسفوا وجايين يشوفوا بنتهم وبابك مقفول اكيد فكروا انك نايمه ومحبوش يزعجوكي
– نوال: طب انت رايح فين، هتطلع ليهم ولا ايه
– مسعود: ايوه هطلع اسلم على عليهم قبل ما اسافر، روحي إلبسي نقابك وتعالي سلمي عليهم
– نوال: لأ مش طالعه اللي عايز يسلم عليا ينزلي، والسواق اللي كان بيسوق ليك العربية بتاعتك تعبان ومش هيعرف يجي معاك سيناء عشان يوصلك
– مسعود: ومين قالك الكلام دا، الراجل مرنش عليا ولا كلمني
– نوال: اسكت مش انا رنيت على مراته عشان اديها حاجات لبيتهم كمساعدة مني يعني قالتلي ان جوزها تعبان ومش قادر خالص
– مسعود:. طب والحل الناس منتظرني و انا اصلا متأخر عليهم
– نوال: انا عندي فكره حلوه وهتخليك توصل بدري
_____
رحمه: انا مش عايزاكي تزعلي نفسك خالص، ممكن فعلا تكون غيرانه وخايفه انك تاخدي ابنها منها نخلص من ابوكي تطلع حماتك، ربنا يهديهم، المهم انها عرفت غلطها وفاقت وكلامها مع عز يبشر بالخير، بردو يا ريم عامليها كويس ووقتها هتطمن
– ريم: حاضر، بس نظراتها وكلامها ليا مخوفني
– رحمه: يا حبيبة ماما متخافيش، اي حاجه تزعلك رني عليا كلميني وانا هتصرف، بس اوعي تكلمي بابا؛ لأن بابا مش هيستنى هيسمع اللي حصل وهيقول للناس كلام يزعلهم
– ريم: حاضر يا ماما، تعرفي هناء بتتصرف تصرفات مش حلوه و انا بتكلم مع عز في المطبخ لمحتها واقفه تتصنت علينا، زعلت اوي، بس لما بصيت في عينيها لاقيتها مكسوره اوي وغصب عني صعبت عليا، بجد نفسي نبقى اصحاب ومحدش فينا يزعل التاني منه
– رحمه: ربنا يصرفهم عنك ويهديهم يا بنتي، قومي يلا اقعدي مع بابا شويه
_______
– مسعود: ايوه بس ابنك لسه عريس وبكرا مسافر مع مراته، عايزاه يجي معايا سينا ازاي
– نوال: يعني السفر مع مراته اهم من محصولنا المرمي في الأراضي، مش دا اللي معيشنا وفاتح بيتنا، عادي يروح معاك ولما يرجع يسافر مع مراته براحته، ولا يسيبك و انت عندك الضغط والسكر ونظرك ضعيف تركب مواصلات وتتبهدل ومن القاهره لسيناء المسافه مش سهله بردو
– مسعود: بصراحه مش عارف يا نوال
– نوال: انت لسه هتفكر، مافيش وقت للتفكير، مصلحتنا اهم من اي حاجه واكيد ريم هتتفهم دا، وعز مش هيرفضلك طلب
– مسعود: تمام انا هطلع اتكلم معاهم و أمري لله
_______
– عماد: اكيد عز مش هيقولك لا يا مسعود، والموضوع طالما مستعجل ومش هينفع يتأجل يبقى خلاص عز يوصلك اهو حتى تبقى مطمن بوجود ابنك معاك مش حد غريب
– مسعود: انا مكسوف من عز وريم اوي، يعني بكرا مسافرين يغيروا جو و انا جاي انكد عليهم
– ريم: لأ طبعا متقولش كدا يا بابا، مافيش اهم من حضرتك عندنا وعز اكيد موافق وهيروح معاك و ان شاء الله تبيعيوا المنجا وتيجيبوا ليا منها لأني بحبها اوي
– مسعود: فيكِ الخير يا ريم يا بنتي ودا العشم فيكِ بردو، واوعدك اني هعوضكم عن السفرية دِ
– عز: انا جاهز وهاجي معاك يا بابا، اكيد مش هسيب حضرتك تتبهدل في المواصلات او تجيب حد غريب يوصلك
– مسعود: تمام يا حبيبي، هنزل استناك تحت، جهز نفسك براحتك و انا في انتظارك
_______
– عز: حقك عليا يا ريم، خليتك تجهزي الشنط وفي الاخر مش هعملك اللي نفسك فيه
– ريم: يا حبيبي كلها يومين وترجعلي بالسلامه ونروح اي مكان عايزينه، بس انت خلي بالك من نفسك كويس
– عز: ربنا ما يحرمني منك يا حبيبتي ويكملك بعقلك يا زينة البنات، مش هتأخر عليكِ و اي حاجه تضايقك رني عليا عرفيني، ومتخرجيش من شقتك وخليكِ على تواصل معايا، اتفقنا يا رورو
– ريم: حاضر يا حبيبي، عشان خاطري متتأخرش عليا
– عز حضن ريم وقالها : كلها مسافة الطريق يا عمري، انا بحبك اوي يا ريم
– ريم: و انا بحبك يا حبيبي
– عز: خلي بالك من نفسك وكلي كويس، في رعاية الله يا حبيبتي
________
اليوم التاني
– نوال: قومي يا اختي نموسيتك كحلي
– ريم صحت من النوم مفزوعه وقالت: بسم الله الرحمن الرحيم، انتِ بتعملي ايه هنا
– نوال: ايه شوفتي عفريت ولا حاجه، وبعدين هو ايه اللي بعمل ايه، بقولك قومي مش فاضيين مافيش وقت للمرقعة بتاعتك، خلاص بقينا لوحدنا يا ريم
– ريم: انا عايزه افهم انتِ ازاي تدخلي عليا أوضة نومي وازاي اصلا دخلتي شقتي وجبتي المفتاح منين، هو انا عايشه قصة رعب ولا ايه، وبعدين عايزاني اقوم اروح فين وهو ايه اللي بقينا لوحدنا هتعملي ايه يعني…
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية المكيدة)
