رواية المكيدة الفصل الأول 1 بقلم أمل عبدالرازق

رواية المكيدة الجزء الأول

رواية المكيدة البارت الأول

رواية المكيدة الحلقة الأولى

– عِز: بصي بقى يا ريم بما ان النهارده اول يوم ليكي في بيتي وبقيتي مراتي على سنة الله ورسوله، هتشوفي العذاب ألوان طول ما القايمه بالمبلغ دا، ما هو يا انا يا ابوكي
– ريم: عز انت بتتكلم جد، اكيد في حاجه غلط وانت بتعمل فيا مقلب صح
– عز: مقلب ايه انا استحملت كتير اوي عشان اليوم دا، انا تعبت اوي عشان اوصل لليوم دا، ابوكي كرهني في حياتي
– ريم بصوت مخنوق من صدمتها: بابا عمل ليك ايه عشان تعمل معايا كدا يا عز، قايمة ايه اللي تخلي جوزي يقولي كلام زي دا في أول يوم ليا في بيته
– عز: ابوكي عمل كتير اوي، شاف نفسه عليا وكتفني طول فترة الخطوبة، كان كل ما يشوف وشي يقولي بص يا عز انا مجبور عليك عشان اريح بنتي، بس انا لا بطيقك ولا بحب اشوفك ووجودك تقيل على قلبي، كان بيحرق دمي كل ما يشوف وشي، لو عرف اني كلمتك بيرن عليا يشتمني، لما جينا نتفق على الدهب قالي عايز ب ١٠٠ ألف، كان بيحاول يعجزني
– ريم: انا فاكره كويس اوي الكلام اللي قولته ليا لما جيت افسخ الخطوبة بسبب تحكمات بابا وتصرفه معاك، فاكر لما قولتلي استحمل اي حاجه عشانك، انا وافقت عليك لما اطمنت ليك يوم ما شوفتك في الرؤية الشرعية، عشان خاطري قول انك بتهزر ومتخليش يوم فرحي اللي هو أجمل يوم في حياتي يتحول لكابوس، ارجوك يا عز بلاش
– عز: انا فعلا استحملت عشانك وبحبك يا ريم، بس انا لازم أوري ابوكي اللي كان بيعمله فيا، لازم اعيشه مقهور على بنته وهو عاجز ومش عارف يعمل ليها حاجه، صوتك نفسه مش هيسمعه، تخيلي ابقى قاعد وسط الناس بكتب كتابي يقولي انا مشوفتش عيل مش عنده كرامه زيك، ويخلي القايمه بمليون جنيه، بزمتك ابوكي المحترم جابلك جهاز بمليون جنيه، والله هغيرها غصب عنه، هو كدا مفكر انه بيغليكي يعني ميعرفش انك بسببه هتشوفي الويل
– ريم: محدش قالك تقبل بكدا يا عز، كنت سيبني وشوف واحده غيري، انا قولتلك من الأول ان ابويا بيغير عليا انا و اخواتي، بيحبنا اوي لدرجة انه مش عايزنا نخرج من البيت أو نتجوز ونبعد عنه، بابا متعلق بينا اوي، هو طيب جدا وبيحبك مش قصده حاجه بكلامه، مشوفتش كان بيعيط ازاي في الفرح
– عز: هسيبك ازاي و انا بحبك واستحملت ذل ابوكي ليا عشان تبقي ملكي لوحدي وفي بيتي، عموما يا ريم لو عايزه ترتاحي في حياتك معايا انا هخيرك بيني وبين ابوكي، وشوفي بقى انتِ عايزه ايه
______
– عماد: البيت بقى مالوش معنى من غير ريم يا رحمه ، عز خدها مني وبعدها عني في الاخر، بنتي وحبيبتي راحت بيت تاني غير بيتي، انا مش طايق البيت من غيرها
– رحمه : وحد الله كدا يا عماد، بنتك اتسترت وراحت بيت عدلها، سيبها تعيش وادعيلها تفرح في حياتها مع الراجل اللي اختارها واختارته
– عماد: كنت اول ما ادخل البيت الاقيها في استقبالي، كانت حنينه اوي وملهاش صوت وفي حالها مش بتاعة مشاكل ولا ليها دعوه بحد، مش مسامح الواد اللي اسمه عز أبدًا و يا انا يا هو، لا يكون مفكر نفسه انه خلاص خدها مني كدا دا بعينه
– رحمه: خلي بالك يا عماد ان ريم بقت مسؤولة منه والكلمه كلمته هو دلوقتي، صدقني لو عمل ربع اللي انت عملته فيه مش هتستحمله، في حد يقول لعريس بنته قدام الناس في كتب كتابه يا ابني انا مش بطيقك ولا عايزك لبنتي، وكمان تخليه يمضي على قايمه بمليون جنيه، ينفع كدا يا عماد
– عماد: القايمه دِ عشان احفظ بيها حق بنتي، وبعدين الشاري مبيدورش وهو اللي اختار محدش قاله يجي يتجوز بنتي، والواد عينه كانت على البت طول ما احنا قاعدين وكل شويه يضحكلها ومش عامل احترام ليا فعصبني، الكلام طلع مني غصب عني، وبعدين أم عز دِ شكلها ست مش سهله وخايف على بنتي منها
– رحمه : لأ متخافش ريم طيبة لا بتهش ولا بتنش ومش بتاعة مشاكل ومطيعة وبتسمع الكلام، ريم حبيبة أمها جدعه وهتحافظ على بيتها وبكرا تشوف
_______
– ريم انصدمت من كلام عز وردت عليه وقالتله: انت بتقول ايه يا عز! انت مدرك للكلام اللي لسانك بيقوله، بيمر على عقلك قبل ما تقوله طيب، اختار بينك انت وابويا ازاي، دا ابويا وسندي في الدنيا انا لو ماليش خير في ابويا مش هيكون ليا خير فيك، و انت يا عز زوجي وشريك حياتي وحبيبي، اللي بتقوله غلط بجد كفايه كدا
– عز: لو كنت حبيبك كنتي فضلتيني على ابوكي، عموما يا ريم انا قولت اللي عندي، مش هطلقك والكلام الفاضي دا، انا هعلم ابوكي درس مش هينساه، يلا تصبحي على خير
– ريم: دا استقبالك ليا في بيتنا في أول يوم ليا فيه، القايمه مزعلاك اوي كدا، يعني انت ناوي تطلقني مثلا، ما خلاص اللي حصل حصل انا ذنبي ايه، تكسر بخاطري ليه، حتى طول الفرح كل ما عيني تيجي في عين مامتك تبصلي بقرف، ما انتو كنتو كويسين ايه اللي اتغير، كنت بتتمسكن لحد ما تتمكن يا عز
– عز: لسه مشوفتيش حاجه يا ريم، تصبحي على خير، الشقة قدامك اتفرجي عليها بقى وابقي غيري براحتك
ريم قعدت في الصاله بفستان فرحها ودموعها على خدها بسبب صدمتها في عز اللي كان طول فترة الخطوبة محسسها انه مش عايز من الدنيا غيرها فضلت عايشه تحلم باليوم اللي تكون معاه فيه لكنه خلاها تصحى على كابوس وفي يوم فرحها كسر بخاطرها وسابها واقفه في الصاله ودخل الأوضة وقفل الباب في وشها، فضلت ريم تعيط بسبب حزنها ووجع قلبها لحد ما غلب عليها النوم في الصاله!
_______
– عز: قومي يا ريم افتحي الباب لأهلك عشان وصلوا بالصباحية
– ريم ردت عليه بفزع : اهلي! اهلي فين يا عز
– عز: البواب رن عليا وقالي انهم تحت وطالعين
– ريم قالت لعز بتوسل: ابوس ايدك يا عز ما تحرجني مع اهلي، سيب المشاكل على جنب، انا لسه عروسة والنهارده صباحيتي مينفعش يشوفني بفستان الفرح ووشي متبهدل بسبب العياط، عشان خاطري يا عز بلاش تعمل معايا كدا
– عز خد باله فعلا من تغير لون وش ريم وبقى شاحب من الحزن والعياط وانها نايمه في الصاله بفستان فرحها فأشفق عليها وقالها: طب قومي ادخلي الأوضة و اقفلي على نفسك وهي فيها الحمام وكل حاجه هتحتاجيها، و انا هستقبل حمايا العزيز على ما تخلصي
– ريم: حاضر
______
– رحمه: صباحية مباركة يا عريس، ألف ألف مبروك يا حبيبي
– عز: الله يبارك فيكي يا حماتي، هاتي الحاجات عنك لأنها اكيد تقيله عليكي
– رحمه: لأ يا حبيبي انا هدخلهم المطبخ وهرتب الأكل في التلاجه، انزل بس ساعدهم وخد الحاجات من العربية لأن فيها حاجات كتير، حماك كان جاي معانا بس طلبوه في الشغل ضروري ان شاء الله متعوضه، قولي صحيح هي ريم فين
– عز بتوتر: احم ر ريم.. ريم بتاخد شاور جوا، هستأذنك انزل اشيل معاهم
_____
– نوال (والدة عز) : عز تعالى بسرعه عايزاك في كلمتين بيني وبينك
– عز: حاضر بس مش دلوقتي الناس في الشارع
– نوال بصوت منخفض: بقولك خد يا عز عايزاك في كلمتين مهمين
– عز: خير يا ماما في ايه
– نوال: اوعى تدي الناس دول وِش وحذاري تكون كلمت مراتك حلو لازم تقسى عليها وتعلمها الأدب وتحسسها برجولتك اللي ابوها مسح بيها التراب وهي كانت ساكته ومبسوطه، هما عملوا اللي في دماغهم و احنا سكتنا عشان الجوازة تكمل بس جه الوقت اللي نخرج فيه عن صمتنا وهما اللي يسمعوا، اوعى تكسر كلامي وإلا هتخسر امك حبيبتك عشان ناس زي دول، انا عايزه ارجع كرامتك، اوعى تضحك في وشها حتى
– عز: بس يا ماما ريم مش ليها ذنب في اللي حصل، يا حبيبتي عينيها وارمه و انا دخلت الأوضة وقفلت الباب في وشها وقولت هتدخل ورايا بس انا كسرت بخاطرها ونامت في الصاله بفستان فرحها، والله انا عيني ما شافت النوم من زعلي عليها بس نفذت كلامك، اكيد ريم مش هتنسى أبدًا اللي حصل معاها امبارح بسببي، وخلاص بقى اللي حصل حصل واللي استحملت كل دا عشانها بقت مراتي وفي بيتي، انا مش عايز وجع دماغ وتعب أعصاب انا عايز اعيش مرتاح مع اللي اختارها قلبي
– نوال عينيها وسعت وقالت لعز بتحذير: تعرف يا عز لو عملت اللي انت بتقول ايه دا هختفي من حياتك للأبد، و انت متعرفش تعمل اي حاجه من غير أمك، حتى لبسك انا اللي بختاره ليك، علمتك ودخلتك الجامعة وخليتك راجل، ناس زي دول يبعيوا ويشتروا فيك، والست هانم اللي فوق عاملاك زي الخاتم في صباعها ومش قادر على زعلها، فيها ايه يا اخويا لما تنام في الصاله ولا تعيط، خليها تحصد عمايل ابوها ، هتكسب غضبي عليك ليوم الدين لو مسمعتش كلامي ، يعني انا غلطانه عشان عايزه اخدلك حقك منهم!
– عز باس راس امه وقال: عشان خاطري اهدي يا ماما ومتزعليش نفسك، انتِ عندك حق انا لازم يكون ليا شخصية، بس اهم حاجه رضاكِ عني يا ست الكل واللي تقولي عليه هيتنقذ بالحرف
– نوال: طب ادخل يلا عشان نفطر مع بعض، مجهزه ليك فطار زي حلو اوي وكل الاكل اللي بتحبه انا عملته ليك، طبعا المحروسه اللي فوق مسألتش فيك ولا في أكلك ، يلا ادخل صحي ابوك عشان نفطر كلنا سوا
– عِز: ادخل فين يا ماما، الناس برا في الشارع ميصحش كدا
– نوال: و انت هتعملني بقى اللي يصح واللي ميصحش! قولتلك ادخل يبقى تدخل، وبعدين يعني هما ناقصهم إيد ولا رجل، ما يطلعوا حاجة بنتهم بنفسهم، انا عارفه حماتك بتحب البِدع شويه، قولي صحيح انا مشفتش حماك معاهم يعني
– عز: كان جاي بس طلبوه في الشغل، هيعوضها مره تانيه
– نوال: شايف الراجل مش عاملك قيمة ازاي، انت طيب وعلى نياتك، ازاي تصدق الكلام الفاضي دا قال يعني هو مش عارف يقولهم رايح بصباحية بنتي، بس هو مش طايقك ولا بيحبك طب دول احنا عارفينهم بس على الاقل يقدر جوز بنته
– عز كلام والدته أثر فيه و اتضايق جدًا وقال: طب تمام اوي انا بقى هقصر رقبة بنته قدام أهلها ومش طالع، هدخل اصحي ابويا
_______
لو عايزين تعرفوا هيحصل ايه في الفصل الثاني انضموا لجروب الكتابة الخاص بيا هتلاقوا رابط الجروب مثبت في حسابي الخاص، هتنروا الجروب و ان شاء الله ننشر الوعي بين الناس، اسفة على المقاطعة يلا نكمل
_______
دخل عز وساب نوال واقفه في الصاله فقالت بصوت واطي: ان ما علمتك الأدب يا عماد انت وبنتك مبقاش انا نوال، دا طار قديم اوي وجه وقت تصفية الحساب، مش هنسى أبدًا اللي عملته فيا زمان وكله هيطلع على بنتك اللي هي أغلى حاجه عندك، طول ما فيا نفس بنتك مش هتعيش يوم مرتاح، و ابني اللي بيحبها بكره يكرهها ويتجوز عليها، يا انا يا انتو يا عماد، اه لو اشوفك قدامي دلوقتي واخد حقي منك ب إيدي
– عز: مالك يا ماما واقفه تكلمي نفسك ومتعصبه كدا ليه، مين اللي عايزه تشوفيه قدامك دلوقتي وتاخذي حقك منه؟!
– نوال ردت بتوتر وقالت: اسكت يا عز بتاع البوفيه جنني امبارح قولتله من بدري يعمل كذا صنف كمان عشان الاكل يكون كتير بس معبرنيش ومشى اللي في دماغه، عشان كدا متعصبه بسببه…