رواية المتعة الحرام الجزء الثالث الفصل الثالث عشر 13 بقلم عادل عبدالله

رواية المتعة الحرام الجزء الثالث الجزء الثالث عشر

رواية المتعة الحرام الجزء الثالث البارت الثالث عشر

رواية المتعة الحرام الجزء الثالث الحلقة الثالثة عشر

يسري : دلوقتي بتقول انت وسهام واحد !!! مش سهام دي اللي انت اتجوزت عليها اعز صاحبة لها ؟!!
سامي : احنا قفلنا علي كل المواضيع القديمة دي ودلوقتي احنا بنتكلم في موضوع الارض .
يسري : موضوع الارض ده شئ يخصني انا واختي انت ملكش دخل به .
سامي : ازاي مش ليا دخل به ؟ دي مراتي !!
يسري : يعني انت طمعان في فلوس مراتك ؟
سامي : انا مسمحلكش تتكلم معايا بالاسلوب ده .
قاطعتهم سهام : طيب خلاص يا جماعة بعد اذنكم كفاية ، انتوا هتتخانقوا ولا ايه ؟!! يا يسري يا اخويا احنا ظروفنا حكمت علينا نبيع جزء من الارض ، انت محكم رأيك ليه بقي ؟؟ لو مش عايز حد غريب يدخل الارض اشتريها انت .
يسري : انا قولتلك اني مش معايا فلوس .
سهام : طيب يا يسري انا برضو هرضيك علشان احنا اخوات واشوف خالك او اي حد من قرايبنا يشتري الأرض ويبقي مفيش حد غريب اشتري الارض .
انتهي الكلام الي هنا واتصلت سهام بخالها واخبرته بالمشكلة الواقعة بينها وبين اخيها بسبب بيع الارض .
وعرضت عليه شراء جزء منها .
وبالفعل استطاعت سهام الخروج من هذا المأزق وباعت جزء من الارض لخالها واصبح معها أكثر من اتنين مليون جنية !!!
بدأ سامي وشريكه مروان بالبدء في تأسيس مشروعهم الجديد .
وانشغل سامي لعدة ايام مع مروان في اعداد مقر الشركة الجديدة وعمل الدعاية والاعلان اللازمين لمشروعهم .
وذات يوم عاد سامي من عمله متأخرا ليلا ولكنه عندما دخل الي منزله فوجئ بالهدوء يعم المنزل بالكامل !!
تعجب بشدة ثم دخل غرفة اولاده ووجدهم نائمين في هدوء فعلم أن زوجته سهام بالتأكيد نائمة !!
دخل سامي لاعداد بعض الطعام لنفسه .
فتحت سهام باب غرفتها قليلا حتي لا يراها سامي وبدأت في مراقبتة وهو يعد الطعام لنفسه وظلت تضحكت وتبتسم في صمت !!
انتظرت سهام حتي انتهي من تناول طعامه ثم قام للدخول الي غرفته .
وبمجرد أن فتح سامي الغرفة اصابه الذهول !!!
لم يصدق ما تراه عينيه فقد كانت سهام في ابهي صورة لم يراها عليها منذ بداية زواجه !!
سامي : ايه ده ؟ ايه اللي انا شايفه قدام عينيا ؟؟ انا مش مصدق !!
سهام ابتسمت : فيه ايه ؟
سامي : انتي مين ؟؟ انتي سهام مراتي ؟؟
سهام : انت شايف ايه ؟
سامي : انا شايف اجمل ست في الدنيا .
سهام : بجد ؟؟ يعني انا كده عجبتك ؟؟
سامي : اكيد ، لازم تعجبيني طبعا .
سهام : يعني انا كده فعلا حلوة في عينيك ؟؟
سامي : يا بنتي انتي متسأليش سؤال زي ده .
سهام : ليه بقي ؟
سامي : بصراحة انا مش مصدق اللي انا شايفه ، قوليلي انتي عملتي في نفسك كده أمتي ؟؟
سهام : النهاردة .
سامي : ازاي ؟ انتي اتحولتي ١٨٠ درجة في أقل من ١٢ ساعة !!!!
سهام : انا كنت حاجزة في بيوتي سنتر من الاسبوع اللي فات ومن يومين وانا بروح هناك اعمل حاجات خفيفة كده وارجع بس انت مش اخدت بالك ، النهاردة بقي خلصت كل حاجة وبقيت زي ما انت شايف .
سامي : انتي يا حبيبتي حلوة من غير اي حاجة .
سهام : يا سلام !! ما انا كنت مش عجباك وكنت بتقولي اهتمي بنفسك شوية !!
سامي : ايوه فعلا قولتلك كده ، شوفي انتي دلوقتي ازاي وكنتي ازاي لما كلمتك !!! دا انتي كمان غيرتي لون شعرك للون اللي انا بحبه !!
سهام : يا حبيبي انا اعمل اي حاجة علشان ارضيك المهم مش تبص لست غيري .
سامي : يا حبيبتي ازاي تبقي معايا حورية جميلة زيك وابص لغيرها ؟!! بس قوليلي بقي ايه سر التغيير الرهيب ده بقي ؟؟
سهام : يا قلبي انا كان غصب عني مشغولة بالاولاد ، انا عارفة انك كان لك حق في كلامك لكن كان غصب عني .
سامي : ويعني هما الولاد كبروا ؟! ماهم لسه صغيرين !!
سهام : ايوه بس لما بقي فيه فلوس معانا كتير ليه مش نتمتع بيها ؟!!
سامي : اوعي يا سهام تضيعي الفلوس علي الكوافيرات والهدوم والحاجات دي !! استني شوية لما المشروع نكسب منه ونبقي نعمل كل اللي نفسنا فيه .
سهام : طيب كنت عايزة اخد رأيك في حاجة بمناسبة الفلوس .
سامي : قولي ، ربنا يستر .
ضحكت سهام : متخافش ، كنت عايزة اقولك اني نفسي انا كمان اعمل مشروع .
سامي : مشروع ايه ؟؟
سهام : كان نفسي اعمل مشروع خيري ، دار ايتام او مستشفي للفقراء .
ضحك سامي : انتي طيبة اوي يا سهام !! يا حبيبتي اللي بتقولي عليه ده محتاج فلوس كتير جدا اكتر من فلوسك بكتير .
سهام : ليه تحبطني كده يا سامي ؟!
سامي : يا حبيبتي مش بحبطك ولا حاجة انا بقولك الحقيقة .
سهام : انا كنت عايزة مادام ربنا وسعها علينا نعمل حاجة لله .
سامي : جميل جدا ، مادام عايزة تعملي حاجة لله نعمل حاجة في حدود امكانياتنا دلوقتي ولما ربنا يوسعها علينا اكتر نبقي نعمل اللي بتقولي عليه .
سهام : طيب هنعمل ايه دلوقتي ؟
سامي : ممكن تتبرعي بمبلغ لدار ايتام او لدار مسنين او للمستشفيات اللي بتحتاج تبرعات علشان تتوسع .
سهام : ايوه حلو اوي ده .
سامي : طيب نأجل الكلام ده للصبح ودلوقتي تعالي بقي علشان نعمل حاجة مهمة جدا .
سهام : هنعمل ايه ؟
سامي : اطفي النور وتعالي وانا هقولك .
وقبل طلوع الشمس بدقائق قالت سهام : انا بحبك اوي يا سامي .
سامي : وانا كمان يا قلب سامي بموت فيكي .
سهام : انا حاسة زي ما يكون انت كنت غايب عني كتير اوي واخيرا رجعتلي !!
سامي : يا قلبي ، انا جنبك علطول لكن انتي اللي كنتي مشغولة عني .
سهام : انا خلاص مذ هنشغل عنك تاني ، وانت كمان اوعدني انك مش تنشغل عني تاني ابدا .
سامي : يا قلبي مش هنشغل عنك ابدا ، انا مفيش في حياتي الا انتي والاولاد والشغل .
سهام : حتي الشغل مش يشغلك عني .
سامي : لازم انشغل بشغلي طبعا ، ولا انتي عايزة المشروع يفشل ؟؟
سهام : لا يا حبيبي ان شاء الله مش هيفشل ، اهتم بشغلك بس المهم شغلك مش ياخد كل وقتك !! يعني خلي ليا جزء كبير من وقتك مع شغلك علشان مفيش حاجة تبعدنا عن بعض تاني .
سامي : حاضر يا حبيبتي ، ننام بقي شوية .
سهام : ايه رأيك نعمل شهر عسل جديد ؟؟
سامي : والعيال هنعمل فيهم ايه ؟؟
سهام : مش عارفة !!!
سامي : يا حبيبتي احنا ممكن حياتنا تبقي كلها عسل في عسل مش شهر بس نهتم ببعض شوية .
انتهت الليلة السعيدة واستيقظ سامي قرب الظهيرة وتناول افطاره سريعا ونزل لمتابعة العمل في تأسيس شركته الجديدة .
واثناء وجوده في العمل فوجئ سامي بشاهي تتصل به اتصالات متتالية !!
تجاهلها وترك هاتفهه ثم وجد منها رسالة تقول ” كلمني ضروري جدا حالا ” !!