رواية البر التاني الفصل السادس عشر 16 بقلم لولو محمد
رواية البر التاني الجزء السادس عشر
رواية البر التاني البارت السادس عشر
رواية البر التاني الحلقة السادسة عشر
قدام العنايه
الكل قاعد ممرضه تطلع
الممرضه / المريض محمد الجمل
الكل يتلم عليها و شيرى قاعده ماسكه فى ايد هند مش قادره تقوم
الممرضه / البقاء لله الحاله اتوفت عن اذنكوا
الدموع تنزل من عبد الله مختار ياخده فى حضنه الممرضه تمشي و شيري مش مصدقه تبص لهند بتعيط تعيط هى كمان هند تحضنها اوى
شيرى / لا يا هند … لا
عبد الله / انا لله و ان اليه راجعون انا لله و ان اليه راجعون
عبد الله يبعد عن مختار اللى الحزن باين عليه و يوطى يحضن امه بتعيط فى حضن هند و هند بتعيط ناصر يدخل و وراه محمود يلاقى اخواته بيعيطوا
حمدى / البقاء لله يا محمود محمد مات
محمود يبص لحمدى و يبص لعبد الله و هند و هم فى حضن شيري بيعيطوا على اخرهم
هند / هنقول ايه لياسمينا هنقولهالها ازاى
ناصر / اجمدى يا بنتى الاول عشان تقدرى تطمنى الصغيره
هند / مش قادره
ناصر / عباده
عباده / اؤمر يا كبير
ناصر / ساعد الجماعه يخلصوا اجراءات الغسل و الدفن اكرام الميت دفنه
عباده / حاضر
عباده يروح ناحيه محمود
عباده / البقاء لله
محمود يمسح دموعه و يبصله
عباده / اكرام الميت دفنه
محمود / كتر خيركوا الميت يخصنا و احنا هنعمل اللازم
عباده / اللى تشوفوه
عباده يرجع يقف جنب مختار
حمدى / انا هخلص الاجراءات
محمود يهز راسه و الكل بيعيط
…………………..
فى الشارع بتاع هند
صوان بيتنصب و مختار و عباده واقفين عليه و هند واقفه بتبص عليهم من البلكونه و الحزن ماليها تدخل جوه و تروح اوضه عبد الله تلاقي عبد الله بيصلى تقعد على السرير يسلم تنزل تقعد على الارض جنبه
عبد الله / الرجاله شغالين تحت ؟
هند تهز راسها اه
عبد الله / انا هنزل اقف معاهم
هند / هو احنا هنقول لياسمينا ايه و لا مش هنقولها ما هى اكيد هتسال
عبد الله / ما اعرفش
هند / ماما كمان مش فى وعيها من ساعه ما رجعنا من الدفن و هى قافله على نفسها الاوضه و انا قلقانه عليها اوى و مش عارفه اعمل ايه
عبد الله / انا كمان يا هند مش عارف اعمل ايه مع انى كنت ممهد نفسي و عارف من الاول ان ده هيحصل و كنت مستنيه و كنت فاكر نفسي هقدر عليه و مستوعبه الوجع طلع اكبر بكتير حياتى معاه كلها عماله تيجي فى دماغى
هند / راح عند اللى احن من الكل
عبد الله / مش قادر اصدق انى مش هشوفه تانى
عبد الله يعيط هند تحضنه و تعيط هى كمان جرس الباب يضرب عبد الله يروح يفتح يلاقي مختار شايل اكل
مختار / الجماعه عاملين ايه
عبد الله يمسح دموعه و يبص فى الارض
مختار / لقمه تصلبوا طولكوا
عبد الله / شكرا انا جاى معاك عشان
مختار / خليك معاهم يا عبد الله هم محتاجينك الباقي امره سهل احنا هنخلصه
عبد الله يحضن مختار و يعيط
مختار / انت مؤمن يا عبد الله بلاش كدا
عبد الله يمسح دموعه و ياخد الحاجه من مختارو يهز راسه بحزن و هو باصص فى الارض
مختار / لو عوزت اى حاجه كلمنى
عبد الله يهز راسه مختار ينزل و عبد الله يقفل الباب
……………………
فى شقه محمود
محمود قافل على نفسه الاوضه و عمال يعيط الباب يتفتح و اسراء تدخل عفاريت الدنيا بتتنطت قدامها
اسراء / عاجبك كدا بقى انا اقف بالساعات اعمل فى طفح
يوسف يدخل يشد مامته بره
يوسف / مش وقته يا ماما بابا مش قادرلك
اسراء / يعني انا اللى قادره اقف اعمل الاكل دا كله و فى الاخر ارميه عشان البهوات جالهم دليفرى
محمود / عبيه و يوسف هيوصله
اسراء / يعني ابعت تعبى يترمى
محمود / ما ترحميني بقي يا اسراء مش قادرلك الله
اسراء / بالسم الهارى
اسراء تمشي و محمود يبص فى الارض و يكمل عياط
يوسف / و اخرتها يا بابا
محمود يمسح دموعه
محمود / عمك عمل ايه فى موضوع العذا كلم الناس بتوع الفراشه
يوسف / كلمهم و كلم عبد الله نسايب الهنا نصبوا الصوان خلاص و جهزوا كل حاجه تحت بيتهم هناك و جبولهم اكل كمان
محمود يهز راسه
محمود / لما امك تعبى الاكل خده وصله و مهما حصل ما تخليهمش يستفزوك الراجل لسه ما بردش فى تربته
يوسف يهز راسه و يطلع بره و يقفل الباب
…………………..
فى شقه هند
جرس الباب يضرب عبد الله يفتح الباب يلاقي يوسف واقف شايل اكياس كبيره
يوسف / ماما عملتلكوا الاكل ده
عبد الله / مش انا قولتلك عندنا اكل
شيري تفتح باب اوضتها و تبص ليوسف
يوسف / ازيك دلوقت يا طنط احسن ؟
شيري / ادخل جوه يا عبد الله
عبد الله / ماما انا
شيري / قولتلك ادخل جوه
عبد الله يبص ليوسف و يدخل اوضته و يرزع الباب شيري تروح ليوسف
شيري / عاوز ايه يا يوسف
يوسف / انا جبت اكل
شيري / اللى كان رابطنا بيكوا مات اللى كانتوا بتضغطوا عليه عشان نستحملكوا مات احنا لا عايزين نعرفكوا و لا عايزين نشوفكوا تانى و روح قول لابوك ان لو فضل يعيط على اخوه مليون سنه مش هنسامح فى حقه
يوسف / ليه كدا يا طنط احنا عملنا ايه لكل ده
شيري / و لو قعدت اللى باقي من عمرى بعيد و ازيد فى اللى عملتوه ما هتفهموا ابعدوا عننا يا يوسف ابعدوا
يوسف / انا هقدر ان حضرتك لسه مصدومه من اللى حصل كلنا مش قادرين نستوعب
انتصار تطلع السلم و تاخد شيريهان فى حضنها شيريهان تعيط على اخرها و يدخلوا و يقفلوا الباب فى وش يوسف يوسف يبص وراه يلاقي مختار واقف يوسف يرمى اكياس الاكل فى الارض و يمشي و هو كاتم جواه
…………………
فى اوضه هند
هند بتعيط و ياسيمنا حضناها و مش فاهمه حاجه و بتطبطب عليها انتصار تفتح الباب هند تقوم تجرى تترمى فى حضنها
انتصار / البقاء لله يا قلبي
هند / مش قادره اصدق
انتصار / حاسه بيكي كلو الا الاب يا بنتي
هند / اتفضلي
انتصار تروح تحضن ياسيمنا و تبوسها و تفتح شنطتها
انتصار / بصي جبتلك معايا حلاوه بس تغسلى سنانك لحسن تقع
انتصار تطلع كيس حلويات من شنطتها ياسمينا تاخده و تقعد على السرير و هند متابعه و مبتسمه و الحزن مالى وشها
هند / مفيش شكرا يا ياسو
ياسمينا / شكرا
هند تشاور لانتصار يطلعوا بره و يقفلوا الباب على ياسمينا
انتصار / قولتولها
هند تهز راسها لا
هند / هى فكراه فى المستشفي لسه خلاص اخدت على بياته هناك مش اول مره
انتصار تهز راسها بحزن
هند / مش عارفه هتفهم و لا لا
شيري تطلع من المطبخ عامله شاى
انتصار / تعبتى روحك انا مش ضيفه اقعدى ارتاحى
شيري / تعبينك معانا جيتي السكه دى كلها
انتصار / ما تاخذينيش انى جايه بايدي فاضيه اول ما ناصر قالى انه تعبان جيت لكن فاطمه و فاتن جايين فى الطريق و معاهم
شيري / ما لوش لزوم يا حجه ما تتعبيهمش
انتصار / تعبكوا راحه طب والله ما عارفه اقول ايه الحمد لله على كل حال راضيين
شيري / راضيين والله و صابرين ربنا يهون مهما وصفتلك ربنا ما يكتب احساسي لا عليكي و لا على حد
انتصار / انا مش عيزاكى تشيلى هم احنا هنبقي جنبكوا علاطول انا عارفه ان مهما عملنا مش هنملا مكانه الله يرحمه كان طيب و امير و هو الموت كدا بينقى
شيري / الله يرحمه انتى تعرفى اننا جواز عن حب
انتصار تبتسم
شيري / بابا الله يرحمه كان مديره فى الشغل و هو كان لسه متعيين جديد علاقتهم ببعض كانت كويسه و فى مره روحت لبابا الشغل عشان كنت محتاجه فلوس و نسي يسبلى و كانت دى اول مره اقابله و بعدها بقينا نتلكك يا اما يجيلى الجامعه يا اما يجيلى البيت قال يعني هيشرب فنجان قهوه مع بابا و يطمن عليه او اروح انا الشغل لبابا باى حجه حتى لو عملاله فطار
انتصار تطبطب على شيري مبتسمه و الحزن مالى وشها و هند متابعه بحزن
شيري / كل ده و ما اتكلمناش اخرنا عيونا بتتلاقي و نبتسم و كل واحد يروح لحاله فمره من المرات كان بيشرب القهوه مع بابا لقيته بيقوله انا بحبك و عاوز اناسبك و اتخطبنا و اتجوزنا كنت بساله ليه عمرك ما كلمتني ليه تضرب المشوار دا كله للكليه عشان بس تشوفني قالى كنتى بتوحشيني اوى
هند / الله يرحمه
انتصار / الواحد بيروح و ما بيفضلش غير الذكرى الطيبه
هند تبتسم و تطلع البلكونه تلاقي مختار واقف فى بلكونته باصصلها تبتسم بحزن
مختار / عامله ايه كويسه
هند تهز راسها لا بحزن مختار يبص فى الارض و يرجع يبصلها هند تشاور على قلبها
هند / واجعنى اوى
مختار / يا ريت كان فى فى ايدى حاجه اقدر اعملهالك
هند تبتسم بحزن
مختار / انا هنزل ابص على الناس قولى لعبد الله يلبس
هند / انت مش هتسيبنى صح
مختار / لا طبعا ايه السؤال ده
هند / مفيش عن اذنك
هند تدخل و هى بتمسح دموعها و مختار متابعها بحزن
………………………
فى العزا
عبد الله واقف و جنبه محمود و حمدى بياخدوا العزا و عبد الله كل شويه يبص لمختار قاعد وسط اهله متابعه محمود يوطى على عبد الله
محمود / حق ابوك فى المحل محفوظ و هيوصلكوا كل اول شهر زى ما كان عايش بالظبط
عبد الله يبصله بغل و يكتم جواه و يرجع يبص قدامه محمود يطبطب على عبد الله عبد الله يحرك كتفه و يبعد ايد محمود عنه محمود يبص فى الارض و يوسف متابع عبد الله بغل يوطى على ابن حامد
يوسف / و احنا المفروض نفضل مستحملين دلعهم ده لحد امتى
الشاب / ربنا يصبره ما حدش حاسس بالوجع اللى جواه
يوسف / النهرده بجبلهم الاكل طردونى و دخلوا اهل عريس الغبره
الشاب / معلش يا يوسف خليك انت الكبير المرادى عديها عشان خاطر عمك الله يرحمه
صوت صريخ فى شقه هند الكل يطلع يجرى و اولهم عبد الله شيري واقعه فى الارض مغم عليها و هند ماسكه ايدها و الكل مرعوب
………………………
فى المستشفي
هند تطلع من باب اوضه و معاها الممرضه الممرضه تمشي و هند تروح ناحيه عبد الله و مختار و عباده واقفين
هند / نامت
عبد الله / خشي ارتاحى جنبها
هند / انا قلقانه على ياسمينا اوى من الخضه دى
مختار / انتصار معاها
هند / مش عارفه مش كفايا
عبد الله / هخليني انا مع ماما و انتى روحيلها
هند / مش هتعرف يا عبد الله افرض احتاجت حد يساعدها تروح الحمام و لا تغير روح لياسمينا انت
عباده / محلوله انا اخطف رجلى اجبلكوا ياسمين لحد هنا
هند / ينفع
عباده / مسافه السكه حاضر اجبلكوا حاجه معايا و انا جاى هدمه و لا لقمه
هند/ ياريت … عبد الله معلش هات غيار لياسمينا و لماما و الحاجه بتاعه كل مره
عبد الله يهز راسه و يشاور لعباده يمشوا هند تقعد على اقرب كرسي مختار يقعد جنبها
مختار / خشي ارتاحى على ما يرجعوا
هند / استفزوا بابا لحد ما مات و دلوقت الدور على ماما
مختار / هو فى حاجه حصلت فوق و لا ايه
هند / ابدا بس انا ما كانتش بتشيل عينها من عليهم مرتات اعمامى و بناتهم فضلت بصالهم لحد ما وقعت فى الارض
مختار / جوزها برده لازم تقدرى حزنها
هند / طب ما هو ابويا انا كمان اموت و اروحله و احرق قلبها عليا
مختار / هى كويسه الدكتور طمنى عليها ما تقلقيش و بعدين الدوا اللى الدكتور كتبهولها ده هيهديها و يخليها تنام
هند / تفتكر الوجع ده هيروح يا مختار
مختار / مش هيروح بس هيدارى انا ما اعرفش حزن الاب و الام بيبقى ازاى عشان ما اوعاش عليهم و ربنا كرمنى بناصر و انتصار عوضونى بس انا جربت وجع ناس كتير اوى من بعدهم الموت ما لوش عزيز و ما لناش عليه سلطان كل اللى بايدنا نصبر و نحتسب و ندعى
هند تهز راسها
هند / بابا هو اول حد عزيز عليا يموت ما اعرفش ازاى اتعامل مع الفراق فكره انى مش هشوفه تانى رعباني
هند تعيط
مختار / الدنيا متفاته و قصيره ما حدش عارف هيموت امتى و لا حبايبه هيموتوا امتى
هند تمسح دموعها و تبص لمختار
مختار / ليكي حبايب عايشين عيشي معاهم قبل ما حد فيكوا يروح اشبعى منهم و خليهم يشبعوا منك ما بقولش تنسوا اللى راحوا لا ادعولهم بس ما تضيعوش عمركوا فى بكا لا هيشفعلهم و لا هيرجعهم
هند / معاك حق الخطوبه دى حاجه غلسه جدا
مختار يبتسم
هند / انا داخله جنب ماما
مختار يهز راسه و يقوم هند تقوم و تمشي ناحيه الاوضه بصعوبه تمسك الاوكره و تبص لمختار بحزن و تبتسم و تفتح الباب و تدخل و تقفل الباب مختار يقعد مكانه و يتنهد
………………….
فى الشارع عند هند
يوسف / يعني هنسيبهم لوحدهم يا بابا
اسراء / وقفنا فى الصوان لحد ما اخدنا العزا و قفلنا الليله نشوف حياتنا بقي و لا احنا ما وراناش غيرهم
محمود / انت عندك حق يا يوسف بس برده مش انت اللى هتروح المستشفي لمرات عمك
يوسف / امال مين حضرتك و عمامى مطبقين و مهلوكين و مش هتقدروا
عربيه عباده تركن و عبد الله ينزل منها يجرى على فوق ناصر يروح لعباده
ناصر / ايه الاخبار
عباده / كلو تمام هناخد بس ياسمين و كام غيار و نرجع
ناصر / كفايا عليك انت كدا النهرده و خلى امين اللى يوصل عبد الله و اخته انت تعبت جامد اوى
عباده / ما تقلقش عليا يا كبير انا تمام
ناصر / بشوقك بس انا لو منك اسمع الكلام
عباده يهز راسه و يبص على يوسف متابعه بغل
…………………
فى شقه هند
ياسمينا قاعده بتعيط و انتصار بتحايل فيها عبد الله يدخل
انتصار / اهو جه اهو
ياسمينا / انا عاوزه ماما
عبد الله يحضنها
عبد الله / ماما كويسه يا حبيبتي هى نايمه بس تعالى نروحلها
ياسمينا تحضنه اوى و تعيط
عبد الله / كتر خيرك تعبناكى
انتصار / هى عامله ايه
عبد الله / كويسه الحمد لله انهيار عصبى ادوها مهدئ نيمها بس ان شاء الله خير
انتصار / مش ناقصكوا حاجه
عبد الله / انا جاى اخد كام غيار و راجعلهم
انتصار / انا هساعدك تعال
انتصار و عبد الله يلموا الحاجه
…………………..
فى الشارع
عيله الجمل يركبوا العربيات و محمود عينه على ناصر العربيه تتحرك و يوسف سايقها
محمود / اوقف
يوسف يوقف محمود يفتح الباب و ينزل يروح ناحيه ناصر الرجاله تتاهب ناصر يشاورلهم محمود يوصل
محمود / كتر خيرك تعبت نفسك انت و الرجاله
ناصر / الله يرحمه كان يستاهل اكتر والله
محمود / معاك حق اسمع يا حج ناصر انا و اخواتى اولا باخويا من الغريب شوف دفعتوا كام فى الليله دى
ناصر يطبطب على كتف محمود و يبتسم
محمود / اسمع يا حج ناصر ان كنت عملت كدا عشان فاكر ان محمد غلبان فانت غلطان
ناصر / استغفر الله
محمود / الحمد لله محمد الجمل من عيله
ناصر / انا عملت كدا عشان
محمود / و ان كنت عملت كدا عشان الفاتحه اللى بينكوا فاحنا فضيناها
ناصر / اللى بينا و بين المرحوم ما كانش فاتحه المرحوم مات و هو بيحدد معاد كتب الكتاب
محمود / كل شئ قسمه و نصيب و احنا ما عندناش بنات للجواز
ناصر / ربنا يديها طوله العمر الحجه ام عبد الله لسه ما ماتتش روحلها المستشفي اتخانق معاها يمكن تموت هى كمان و ساعتها هتبقي انت المسؤل عن هند ساعتها ابقي تعال كلمنى
عباده / ليه يا كبير هى هند قاصر و لا ايه
ناصر / تصدق صحيح دا هند مش قاصر
محمود / انا قولت اللى عندى
ناصر / و انا كلامك ما دخلش زمتى بصاغ
محمود يبصله من فوق لتحت و يمشي يركب العربيه
محمود / اطلع على المستشفي
………………….
فى المستشفى
هند تفتح باب الاوضه مختار يتعدل فى قعدته و يبتسم
هند / هو انت مش هتروح
مختار يهز راسه لا
هند / انت تعبت اوى من امبارح لما عبد الله يجى روح ارتاح
مختار / انا مرتاح هنا
هند تروح تقعد جنبه
مختار/ جعانه اجبلك حاجه تاكليها
هند تهز راسها لا
هند / شكرا انك معايا بحاول اتخيل لو ما كنتش فى حياتى كان ايه اللى حصل
مختار / ما تتخيليش عشان خلاص انا امر واقع
هند / الحمد لله
مختار يبص يلاقى محمود و يوسف جايين من بعيد
مختار / و طبعا ما ينفعش اليوم ينتهى بسلام
مختار يقوم يقف هند تبص وراها تلاقى عمها جاى
محمود / ما لحقتش جته ابوكى تبرد فى تربته و انتى قاعده مع البيه فى الكوريدورات
هند / انا مش هرد عليكي
يوسف / اتكلمى عدل
محمود / بس يا يوسف … اسمع يا جدع انت انا لسه متكلم مع اخوك الخطوبه دى فسخناها و حاجتك هتاخدها كامله و اى جنيه صرفته
مختار / اخويا مين ده اللى قال الكلام ده
محمود / احنا اللى قولنا
هند / دا بصفتكوا ايه بقى ان شاء الله
محمود / لما الكبار يتكلموا تسكتى … انت لو اخر واحد فى الدنيا مش هناسبك
مختار / هو حضرتك ما بيحلالكش الخناق الا فى المستشفيات
هند / سيبه مهم ناويين يخلصوا علي ماما هى كمان
محمود / اتلمى يا بت بدل ما
مختار / بدل ايه انا اخر كلامى مع الحج محمد الله يرحمه انه عاوز يكتب الكتاب بسرعه و باذن الله اول حاجه هنعملها بعد الاربعين اننا نكتب الكتاب و لولا حرمه الميت لكنت اخدتها للماذون دلوقت
يوسف / دا انت بتتحدانا بقى
مختار / اعتبرها زى ما تعتبرها و ما تجبرونيش انادى الامن
يوسف / يخربيت بجاحتك يا اخى انت اللى هتناديلنا الامن ؟؟
مختار / شوفت ازاى
هند / لو سمحت يا عمى كفايا بقى لحد كدا على الاقل حضرتك اعمل حساب لبابا
محمود / اعمليله حساب انتى يا اختى اعمليله حساب و لمى روحك
هند / ماشى هلمها و هدخل جوه و مختار هيمشى و انتوا كمان هتمشوا بس لو سمحتوا الوقت اتاخر و ماما مش هتستحمل التوتر ده
عبد الله و عباده يدخلوا عبد الله شايل شنطه و عباده شايل ياسمينا
عبد الله / انتوا بتعملوا ايه هنا
هند / ماشيين كلهم ماشيين مش كدا يا مختار
مختار يبص لهند
هند / عشان خاطرى عبد الله معايا اهو
محمود / اللهم طولك يا روح
عبد الله / يا اخى اياكش تطلع و تخلصنا
يوسف / ما تحترم نفسك يا له انت ما لكش كبير و لا ايه
عبد الله / كان ليا اتنين بس البركه فيكوا واحد مات و التانيه راقده جوه
مختار / خلاص يا عبد الله خلاص
محمود / ايوه يا خويا ايوه اتمسكن لما تتمكن يا حبيبي خليك انت الطيب الحنين و انا دراكولا ابو نياب يا وله
هند / كفايا بقي ابوس ايديكوا كفايا انتوا ما بتحسوش
هند تاخد ياسيمنا و تدخل الاوضه
مختار / احنا هنمشي يا عبد الله لو احتاجت حاجه
محمود / هيكلمونا يا خويا
عباده / يا جدع انت
مختار / بس يا عباده بس يلا بينا سلام يا عبد الله
مختار يبص لمحمود بقرف و يشد عباده و يمشي عبد الله يبص لمحمود
عبد الله / افندم
محمود / لو احتاجت اى حاجه
عبد الله / ربنا ما يحوجنا و يكون فى علمكوا انتوا لو اخر ناس على وش الارض مش هنطلب منكوا حاجه و اتفضلوا بقي بدل قسما بالله اناديلكوا الامن
يوسف يمسك عبد الله من قميصه
يوسف/ ما تتكلم عدل ياله و لا اكمننا ساكتينلك
هند تفتح الباب و تحوش
هند / سيبه يا حيوان سيبه ربنا ياخدكم
هند و محمود يفصلوا بين عبد الله و يوسف و هند تاخد عبد الله و يدخلوا الاوضه
محمود / قولتلك ما تخليهمش يستفزوك اهم هيسيبوا كل اللى عملوه و هيمسكوا فى اللى انت عملته يلا بينا
يوسف / انا مش ماشي
محمود / هتقعد هنا تعمل ايه
يوسف / ما انا مش اهبل عشان تخيل عليا التمثيليه دى يلفوا شويه بالعربيه و يغفلونا و يرجعوا و نتختم احنا على قفانا
محمود / اقصر الشر يا يوسف
يوسف / روح انت يا بابا انا بايت هنا
يوسف يقعد على اقرب كرسي محمود يتنهد و يقعد جنبه
محمود / اما نشوف اخرتها مع عيالك يا محمد يا خويا
……………………
فى شقه مختار
انتصار بتفتح باب الاوضه تلاقي مختار واقف عند البلكونه و عباده قاعد ناصر يطلع من الاوضه وراها
انتصار / انتوا هتفضلوا قاعدينلى كدا يلا واحد فيكوا يتحرك يوصلنى
مختار / على فين السعادى
مختار يبص لناصر
انتصار / هروح المستشفي ابات معاهم انتوا عاوزيني اسيبهم لوحديهم هناك
عباده / هما اللى قالولنا روحوا مش بمزاجنا يعني و انتى عارفه غير كدا ما كناش
انتصار / انتوا لسه هترغوا يلا حد يوصلنى
مختار / تعالى
مختار يروح يشد مفاتيحه و ينزل و انتصار تقفل الباب وراها
عباده / و هى هتبات هناك فين و عبد الله موجود
ناصر / خليها تروح محتاجين حد كبير جنبهم ياخد باله منهم ربنا يعدى الايام دى على خير
عباده / الجدع اللى اسمه محمود ده و ابنه مش هيجيبوها لبر و سكوتنا بيتفهم غلط
ناصر / الميت ليه حرمه
عباده / و اهل الميت نفسهم مش محترمين الحرمه دى نعمل ايه احنا و بعدين دا نسب يا كبير يعنى ما ينفعش يمشي كدا
ناصر / البت تستاهل و اهلها ناس طيبين
عباده / بس عمها مش هيسكت و اللى فهمته ان باقي اهلها زى قلتهم و امها مقطوعه من شجره يعني احنا اللى هنتصدر لهم
ناصر / و احنا شويه و لا ايه
عباده / لا يا كبير استغفر الله بس انت فاهم قصدى
ناصر / تانى بقولها البت تستاهل و هى اختارت مختار
عباده / عرفتوها حقيقته قبل ما تخيروها قبل ما تخسر اهلها دلوقت عرفت الحقيقه و قالت مش عاوزه مختار تروح لمين هي
ناصر يبص لعباده
عباده / حقك عليا يا كبير لو كنت عديت حدودى بس انا بتكلم كلمه حق اتحاسب عليها قدام ربنا ما دام احنا ما بنعملش حاجه غلط نداريها ليه
ناصر / انت شايف الظروف تسمح للكلام فى حاجه زى دى
عباده / حقك عليا يا كبير فى اللى هقوله بس الظروف عمرها ما هتسمح
ناصر يبص لعباده و يدخل اوضته و يرزع الباب و عباده واقف متابعه يتنهد و يطلع يقف فى البلكونه و يبص على السما
……………………
فى المستشفي
محمود نايم و هو قاعد و يوسف قاعد جنبه بيلعب فى الموبايل يفصل منه ينفخ
يوسف / كملت دا اللى كان ناقص
يوسف يقوم يفتح الباب بالراحه و يدخل النور مطفى و عبد الله نايم على كرسي و ساند براسه على سرير هند و ياسمينا نايمين عليه و شيري نايمه على سرير لوحدها يوسف يروح يدور على شاحن هند تقلق و تتفزع تعدل الطرحه على شعرها و تبص على عبد الله و تتكلم هى و يوسف بهمس
هند / انت !!!
يوسف / موبايلي فصل بدور على شاحن … ما تبصليش كدا مش هتهجم عليكي يعني
هند تفتح الدرج و تطلع الشاحن و تديهوله
هند / اطلع بره و ياريت لو تروح تشحن فى بيتك احسن انت لسه هنا بتعمل ايه
يوسف / عوزانى اسيبك لوحدك فى الظروف دى
هند / عوزاك تسبني فى حالى و ياريت تاخد بالك انك لو كنت سبتني فى حالى من الاول ما كناش بقينا فى الظروف دى
يوسف / دا الكلام اللى مختار بيه غاسلك بيه دماغك بس بكره ربنا يكشفهولك على حقيقته و تندمى على الهبل بتاعك ده
هند / انا حره حياتى و انا حره فيها ما لكش فيه
يوسف / يعني ايه ما ليش فيه
هند/ انت مش كنت عاوز الشاحن و اخدته مستني اما عبد الله يصحي و تمسكوا فى بعض
يوسف / انا ان كنت بسكت فمش عشان حاجه غير عشانك انتى
هند / سبنا فى حالنا و ابعد عننا ما لكش دعوه بيا
يوسف / مش هيحصل
يوسف يطلع بره و يقفل الباب عبد الله يصحي يبص على الباب و يبص على هند باستغراب
هند / مفيش حاجه مفيش حاجه تيجي تفرد ضهرك مكانى شويه
عبد الله يهز راسه لا و يكمل نوم زى ما كان هند تقوم و تروحله
هند / قوم افرد ضهرك انا صحيت خلاص هقعد اللعب فى الموبايل شويه
عبد الله يقوم ينام مكانها تغطيه و تروح تاخد الموبايل و تقعد تلعب فيه
…………………..
على باب الاوضه
يوسف يقفل الباب و يبص على فيشه ما فيش يجي يفتح الباب تانى يحس بحركه يبص على يمينه يلاقي انتصار و مختار داخلين يبص فى الارض و هو بيحاول يكتم غيظه و يروحلهم بعيد قبل ما يوصلوا الاوضه
يوسف / خير ايه اللى رجعك تانى
مختار / مرات اخويا جايه تبات مع هند
يوسف / بمناسبه ايه ان شاء الله
مختار / من غير مناسبه و خف و خلى اليوم يعدى
يوسف / و ان ما خفتش هتعمل ايه هتتخانق معايا و لا هتطلبلى الامن انتوا ايه لزقه ما تبعدوا عننا بقي و تسيبونا فى حالنا
محمود يصحي
انتصار / اسمع يا ابن الناس اللى جوه دول حالنا زى ما هم حالكوا بالظبط فبالله عليك يا شيخ بلاش مشاكل
محمود / يعني نكلمكوا باللوندى عشان تفهموا خلاص يا جدعان اللى بينا و بينكوا كلمه و فضيناها
هند تفتح الباب تشوف الصوت جاى منين
مختار / بص
انتصار / استني انت يا مختار … بص يا ابن عمى من الاخر كدا اللى بينا و بينكوا ما كانش كلمه و اتفضت الشهاده لله اللى بينا و بينكوا ما كانش حاجه خالص و لولا انكوا واقفين لنا كدا ما كناش عرفناكوا انما الناس اللى فى الاوضه دى
انتصار تبص تشوف هند واقفه
انتصار / دى بنتى و الراقده جوه دى اختى
محمود / يا ست انتى بلاش استفزاز ما تخلينيش
هند / عموا محمود
الكل يبص لهند
هند / انتوا لسه هنا بتعملوا ايه
هند تشد الشاحن من ايد يوسف
هند / احنا مش قولنا كفايا مشاكل و فضايح
يوسف / ليه و انتى فكرانا هبل و لا مختومين على قفانا … انا قولتلك ايه يا بابا هيلف شويه بالعربيه و يرجعوا
هند / و انت مالك يا بارد يرجع و لا ميرجعش
يوسف / اتكلمى عدل بدل ما اعدلك
مختار / طب ابقي قرب منها
يوسف يتنهد بعنف و يبص لمختار
يوسف / افضل استفزنى كدا
محمود / بس يا يوسف … تمام يا بنت اخويا انتى اللى اخترتى و اللى تشيل قربه مخرومه
هند / لما اجى اعيطلكوا اقفلوا بابكوا فى وشي
محمود / تمام يا هند تمام … يلا يا يوسف
يوسف / هو ايه اللى يلا
محمود / قولت يلا سبهم يتفلقوا ببعض و لينا كلام تانى مع امها لما تقوم بالسلامه فى الاول و الاخر احنا فى مستشفي
هند / الحمد لله افتكرتوا اخيرا
عبد الله يفتح الباب و يطلع
عبد الله / هو ايه اللى بيحصل هنا بالظبط
مختار / مفيش حاجه يا عبد الله كانوا ماشيين
يوسف / طب تصدق
محمود / يلا يا يوسف يلا
محمود يشد يوسف و يمشوا و يوسف بيبص لمختار بغل
عبد الله / انا مش فاهم الناس دى جنس ملتهم ايه انا تعبت
انتصار / حقك عليا يا ابني كل عيله فيها اللى فيها يلا يا بنتي انا هبات معاكى و انت يا مختار خد عبد الله يرتاح فى البيت شكله يا كبدى خلصان على الاخر
مختار / خليني معاكوا يمكن تحتاجوا لحاجه
انتصار / لا ما تقلقش انا معاها لو احتاجنا هكلمك
مختار يهز راسه انتصار تاخد هند و يدخلوا الاوضه
عبد الله / خلينا ليرجعوا
مختار / انتصار هنا اقلق على عمك و ابنه لو فكروا يرجعوا هههههههههههههه
عبد الله يبتسم و يمشي مع مختار توصله رساله يطلع موبايله يبص فيه
///////////////
هند / لو مش هتنام كلمنى
//////////////
مختار يبتسم و يحط الموبايل فى جيبه
عبد الله / فى حاجه و لا ايه
مختار / لا ما فيش يلا بينا
عبد الله يهز راسه و يمشي مع مختار و هم مبتسمين
…………………
فى الاوضه
هند بتشيل ياسمينا تحطها جنب مامتها
انتصار / سبيها انا كدا كدا غفلتلى ساعتين فى البيت
هند / و انا كمان تعالى جنبي نتكلم
انتصار تبتسم و تنام و تاخد هند فى حضنها و تبوس راسها
هند / ربنا يخليكي
انتصار / ربنا يخليكي و يسعدك و يهنيكي
هند / بدات اشك انها مكتوبالى
انتصار/ لا اله الا الله ليه كدا يا بنتي
هند / كل ما اجى افرح تحصل حاجه انا كدا طول عمرى ساعات بقيت اخاف افرح
انتصار/ لا ما تخافيش ربك كريم و ما بياخدش منك الا عشان يديكى
هند / و نعم بالله
انتصار / ما فيش عيله فى الدنيا ما فيهاش مشاكل و كل عيله غير التانيه و كل واحد غير التانى بس لازم تفهمى ان نصيبك من الدنيا اربعه و عشرين قيراط هتاخديهم هتاخديهم و انتى ما شاء الله جميله و ذكيه و بعدين هو مختار ده مش نصيب حلو و لا ايه
هند تبتسم
هند / دا الاربعه و عشرين كلهم مختار
انتصار / هههههههههههههه بتحبيه يا هند
هند تهز راسها و هى مبتسمه
انتصار/ و هو كمان بيحبك تعرفى ياما جبتله عرايس اشكال و الوان ما كانش بيستعنى يبص حتى و يضحك عليا و يقولى انا مش بتاع جواز ما تشيلينيش حمل فوق كتافى و فجاه اسمك رن فى السرايا و قلوبنا كلنا دقت معاه
هند تبتسم
انتصار / لما كلمته فى الاول قال لا بس عنيه كانت بتلمع قولت استني لقيتهم بيكلمونى و يقولو لى تعالى هنقرا فاتحه مختار جيت طايره اقسم بالله
هند / انتوا ناس طيبين اوى و ربنا وحده اللى يشهد انا بحبكوا قد ايه
انتصار / لو بتحبينا بصحيح اقفى على رجليكي و اسندى امك و اخواتك انتى مش ضعيفه انتى هتبقي مرات مختار الزيني انتى اللى هتمسكي مكانى من بعدى
هند / مش فاهمه
انتصار/ النظام يا بنتي هو اللى بيضمن ان الدنيا تمشي عدله و النظام لازمله كبير يحكمه و مختار هو اللى هيبقي كبير العيله من بعد اخوه بعد عمر طويل يعني و انتى هتبقي مراته يعني لازم تبقي قويه تسنديه و تشورى عليه لازم ما تسمحيش لحاجه تكسرك
هند / ما اعرفش
انتصار / لا تعرفى و هتعرفى ما حدش فينا اتولد كبير و كلنا بنتعلم
هند تتعدل و تقعد انتصار تقوم و تقعد
هند / ماما كانت بتخوفنى من عيشه الصعيد و بيت العيله و مختار كمان كان بيقولى انا مش هغشك الموضوع مش سهل
انتصار / ما جريتيش ليه و قولتى يا فكيك امال
هند / اجرى اروح فين انا عشت عمرى كله بدعى ربنا ياخدنى ما اتمنتش اعيش الا لما مختار دخل حياتي اقوم اسيبه
انتصار تبتسم
انتصار / يبقي لازم تعيشي
هند تبص لانتصار
انتصار / الدنيا دى بتيجي على الضعيف و طول ما انتى مطاطيه راسك الف من يركبك انما لما تقفى و تصلبي طولك الكل يعملك الف حساب
هند / يعني اعمل ايه
انتصار تبتسم
انتصار / انا اللى هقولك تعملى ايه !! ما حدش يعرفك قدك دورى جواكى على اللى يقويكي حطى هدفك قصاد عنيكي و اسعى و ما تخافيش انتى مش لوحدك كلنا معاكى و انا متاكده انك هتوصلى
هند تبص لانتصار و تبتسم
……………….
فى شقه هند تانى يوم
عبد الله يسند شيري تنام فى سريرها
انتصار / حمد الله على السلامه نورتى بيتك
شيري / منور بيكي تعبتي نفسك معانا اوى يا حبيبتي
انتصار / بلاش الكلام اللى يزعل ده بقي
فاطمه تدخل شايله صينيه عليها فرخه و شوربه
فاطمه / و ادى احلى اكل
شيري / مش جعانه
فاطمه / ازاى بقي و انتى كان رقدك الا قله الاكل قومى كليلك لقمه عشان تصلبي طولك دا يا قلبي البت الصغيره اتفلقت من العياط عليكي امبارح
انتصار/ عدى الحمد لله خلينا فى اللى جاى
فاطمه / عليكي نور يا اختى نركز فى اللى جاى
شيري / مهما حكيت اللى جوايا ربنا ما يكتبها عليكوا حاسه انى تايهه و خايفه مش عارفه هعمل ايه من بعده
فاطمه / ربنا هيقدرك
انتصار / و بعدين احنا مش هنسيبك
شيري / كفايا تعبكوا معايا
فاطمه / تعبك راحه يا اختى طب والله لو كنت اعرف ان انتصار هتجيلك المستشفي امبارح كنت جيت بس احنا كنا فى الشقه التانيه و انا كنت مطمنه يعني اكمن عباده معاكوا فى المستشفي و كدا
شيري / كانك جيتي و زياده انا حتى كنت واخده منوم ما حستش بيها الا الصبح
فاطمه / امال هند فين صحيح
هند تدخل
هند / انا هنا عاوزين منى حاجه كنت بشغل الغساله
انتصار / ما نتحرمش يا قلبي خشى انتى بقي زاكريلك كلمتين عشان تعوضي اللى فات و زى ما اتفقنا امبارح
هند تبصلها و تبتسم و تبص لمامتها
شيري / روحى يا حبيبتي زاكرى انا كويسه لما اعوذ حاجه هناديكي
هند تبتسم و تمشي
فاطمه / و احنا مش هنخليكي تعوزى اى حاجه
فاطمه تبتسم و تمسك ايد شيري و تطبطب عليها
…………………..
فى شقه مختار
ناصر / مش دلوقت مش دلوقت انا عارف هيبقي وقته امتى هتقولها امتى
مختار / البنت لسه ابوها ميت و امها تعبانه هكلمها بس لما الوقت يسمح اديك شايف الدنيا و بعدين انا حاولت اكلمها يوم ما كنت فى الشارع و عباده طلع سيحلى و قولتلك الكلام ده اعمل ايه يعني
ناصر / انت ناوى تقولها يعني
مختار/ طبعا
ناصر / يبقي قطمه احسن من نحته
مختار / مش بالبساطه دى مش هتفهم الا لما تعيش
ناصر / و ان ما قبلتش هتعمل ايه
مختار / هتقبل هتفهم و هتقبل هند ذكيه و واعيه
ناصر / يبقي تخاف من ايه ما تقولها
مختار / مش هنا فى البلد لما تشوف بعنيها لما تفهم الناس عندنا ماشيين ازاى و سلوهم ايه اللى يسمع غير اللى يشوف
تليفون مختار يرن
ناصر / هند ؟
مختار يهز راسه
ناصر / انا هروح اقعد على القهوه كلمها يا مختار النهرده احسن من بكره
ناصر يسيب المكان و يمشي و التليفون بيرن فى ايد مختار يرد
هند / كنت نايم و لا ايه
مختار / لا كنت بتكلم مع ناصر معلش ما قدرتش اكلمك امبارح قولت هستني عبد الله يغفل و اكلمك غفلت قبليه
هند / ربنا يعينك تعبت جامد اوى امبارح ربنا ما يحرمنى منك
مختار / و لا يحرمنى منك بقولك يا هند كنت عاوز اكلمك فى حاجه
هند / انت اتكلمت مع عبد الله امبارح فى حوار كتب الكتاب
مختار / اه عبد الله بيقول ان دى كانت رغبه المرحوم بس انا شايف ان الاصول نستني على الاقل الاربعين هو والله على عينى بس
هند / انا معاك يا مختار انا مش عارفه ازاى هفرح و هو مش جنبي بس انا لازم افرح انا محتاجه افرح
مختار / ان شاء الله تفرحى
هند / اتكلمت طول الليل مع طنط انتصار صدقني كلامها غير حاجات كتير جوايا نظرتى للدنيا اختلفت ليك حق تبقي كدا و واحده زى دى اللى ربتك
مختار / اتكلمتوا فى ايه
هند / انا الفتره الجايه هنزل التمرين مع دينا تانى
مختار / دا عبد الله هيهيص
هند / عبد الله بس ؟
مختار / عيب عليكي المهم قررتوا ايه تانى
هند / هلتفت لمزاكرتى اكتر و هتعلم كل يوم اكله جديده
مختار / احلى قرار ده اقسم بالله بس بقولك ايه بالله عليكي يا شيخه تتكى على الاكلات بتاعه البنيادمين دى و بلاش الاكل العجيب بتاع اليومين دول
هند / و لا كانى سمعت حاجه
مختار / ماشي ادلعى براحتك ليكي يوم
هند / من النهرده انا هبقي واحده تانيه واحده احسن انت كان معاك حق الدنيا دى صغيره اوى مش هسمح لحد يعيشها على قفايا
مختار / جدعه اللى ميكسرناش بيقوينا
هند / معاك حق … صحيح انت كنت تقريبا بتقول عاوز تكلمنى فى موضوع صح
مختار / انا بقول ناخد يومين فى البلد تغيرى جو انتى و الجماعه الخضره و الشجر هيفرقوا معاكوا فى النفسيه و كدا يعني خصوصا عشان خالتى ام عبد الله
هند / دى فكره حلوه جدا هشوف عبد الله و دروسه و نرتب
مختار / على بركه الله
هند / انا هروح ازاكر ايه رايك تزاكر انت كمان و نبقي نراجع مع بعض
مختار / موافق
هند / تمام مع السلامه
مختار / سلام
مختار يقفل و هو مبسوط تليفونه يرن الابتسامه تروح من وشه
مختار / افندم
فيرا / ايه نستني و لا ايه
مختار / والله نفسي انساكى بس للاسف مش مديانى فرصه
فيرا / هههههههههههههه ليه بس يا مختار دا انا بحبك
مختار / الله الغنى عن دا حب خير اؤمرى هتبليني بايه تانى
فيرا / البى كاى جاهز على الحدود و الموزعين مستنين جوه مش فاضل غيرك
مختار / و العموله
فيرا / هديك خمسه فى الميه من الارباح
مختار / و لا خمسه و لا عشره انا مش شريكك و نفتح لبعض الدفاتر و نقعد نتحاسب عمولتى قبل التسليم و كاش
فيرا / مفيش حاجه تغلى عليك يا مختار دخل البى كاى مصر و استلم عمولتك قبل ما توصل للموزع
مختار / كام يعني
فيرا / انا كلى ليك يا قلبي
مختار / ما تاكلش عيش حاف دى انجزى عشان مش فاضيلك
فيرا / اتنين مليون كويس
مختار / دولار !!! … تؤ ما تجيش هم المشوار
فيرا / ما تبقاش طماع
مختار / انا بسم اهل بلدى بايدى محتاج رقم ينيم ضميري
فيرا / اتنين و نص
مختار / احنا لسه هنطلع بالنص خمسه مليون دولار
فيرا / موافقه
مختار يستغرب و يسكت
فيرا / مالك سكت ليه
مختار / التسليم امتى
فيرا / انا جاهزه شوف انت جاهز امتى
مختار / هتحضرى التسليم
فيرا / للاسف لا مع انك واحشني اوى بس انا لسه مش قادره انسي انك خونتنى و روحت حبيت واحده تانيه
مختار / يا شيخه بقي
فيرا / ههههههههههههههههه مع انهم بيقولوا المصريين ولاد نكته و دمهم خفيف بس على العموم انا مقدره ظروفك حماك اتوفى و عندك مشاكل مع اهل مراتك على العموم لو حد زعلك
مختار / احنا فى غنا عن خدماتك
فيرا / ههههههههههههههههههههه تمام يا مختار تمام على العموم انا جاهزه بالبضاعه و الفلوس شوف انت تحب امتى و جهز نفسك و كلمنى
مختار / تمام استنى منى تليفون
فيرا / تمام
مختار يقفل السكه و يتصل بحد
مختار / الاتفاق تم و العموله خمسه مليون دولار و لو كنت طلبت اكتر كانت وافقت
……………………..
بعد يومين فى الجيم
هند نايمه فى الارض بتنهج دينا تروح تناولها ازازه الميه هند تقوم تقعد دينا تقعد جنبها
دينا / بس انتى المرادى احسن كتير عن المره اللى فاتت
هند / شكرا مع انى مش قادره اتحرك خالص
دينا / عشان مش متعوده على التمرين مره فى مره نفسك هينتظم و ادائك هيتحسن
هند / المعاد التانى امتى
دينا / نفس المعاد لو يناسبك
هند / يناسبني انا عاوزه اكثف التمارين لو ينفع اجى كل يوم
دينا / انا كنت بقول نفس المعاد الاسبوع الجاى
هند / لا يا كابتن ما ينفعش انا ما عنديش وقت
دينا / خلاص تمام رتبى فى الريسبشن تحت و هم هيظبطولك جدول مواعيد بس ما تنسيش الريكوفرى اللى قولتلك عليه عشان العضلات
هند / تمام
دينا تقوم و تمد لهند ايدها تقومها و يروحوا الحمام
……………………….
فى شقه يوسف
يوسف بيتكلم فى التليفون
يوسف / بتهرب منك ايه يا وسام ما بلاش الاسلوب ده بقي انا اتخنقت
وسام / مهو فى الاول عمك اتوفى و مشغول فى العزا دلوقت ايه حجتك بقي ان شاء الله
يوسف / مش فاضي ما ليش مزاج و بعدين انتى كدبتى الكدبه و صدقتيها و لا ايه انا مش مجبر اصلا اكلمك و لا افضيلك نفسي احنا كل اللى بينا يا ماما تمثيل
وسام / و الصداقه اللى بينا يا يوسف كانت تمثيل برده كنت بتكلمنى عشان تعرف اخبار هند و بس
يوسف / يا بنتي انتى اللى كنتى بتكلميني عشان تنقليهالى و بعدين بصراحه يا وسام اللى بينا ما عدش ينفع يبقي صداقه الاصدقاء ما بيخنقوش بعض كدا و بعدين انا قولتلك اتشقلبي و شوفيلك حل و فضيها سيره بقي انتى اللى مصممه تماطلى و انا عشان ابن اصول
وسام / انت محسسني انى راميه نفسي عليك
يوسف / بصراحه اه و انا نفسي اخلع و مش عارف كل شويه امك تكلم امى يوسف ما بيكلمنيش ليه يوسف ما بيجيش ليه هو حد فهمكوا انى ابن امى مثلا انا كلامى و افعالى من دماغى و ما حدش بيجبرنى على حاجه مش عاوزها
وسام / و ما دام كدا ما فسختش الخطوبه ليه
يوسف / عشان انا عامل حساب للعيش و الملح اللى بينا و التضحيه اللى قدمتيهالى و لامك العيانه و انك ما لكيش غيرها فخليها تيجي منك احسن
وسام / تمام انا فسخت الخطوبه النهرده تقدر تقولى هتعمل ايه هتخطب هند مثلا ما هى مخطوبه
يوسف / الموضوع ده انتهى
وسام / دا باماره ايه ان شاء الله
يوسف / بكره تشوفي و تتاكدى بنفسك
وسام / تمام يا يوسف يوم ما هند تقلع دبله مختار من ايدها انا هقلع دبلتك حلو كدا
يوسف / موافق
وسام / ممكن بقي لحد ما اليوم ده يجي تكمل جميلك و تيجي تتغدى معانا
يوسف / لا اله الا الله
وسام / اعمل حساب للرصه اللى قولتها من شويه انا شكلى بقي زفت قدام ماما
يوسف / ماشي هكمل جميلى بس افتكريها
وسام / ما تقلقش يا يوسف انا عمرى ما هنساهالك
…………………………
فى شقه مختار
مختار بيتكلم فى التليفون
مختار / انا حضرت الشنطه خلاص هقفل الشقه و مسافه السكه و اكون عندك
ناصر / انا كلمت الجماعه و جهزت كل حاجه
مختار / تمام هقفل معاك و اكلمها
ناصر / اوعى تغلط
مختار / ما تخافش
ناصر / سلام
مختار يقفل و يتصل بفيرا
فيرا / حبيبي
مختار / بكره يناسبك
فيرا / قولتلك الفلوس و البضاعه جاهزين على الحدود
مختار / لا يا ست الكل انا بتكلم عليكي انتى محتاجك فى حوار
فيرا / انت !! محتاجنى انا !!!
مختار / اهو ايه اللى رماك على المر
فيرا / ههههههههههههههههه اخص عليك
مختار / المهم يا اه يا لا
فيرا / مش لما اعرف الاول مش يمكن ما اقدرش اساعدك
مختار / تبقي نفخه على الفاضي و ما لهاش لزمه الشغلانه معاكى
فيرا / خمسه مليون دولار مش شويه برده
مختار / الحوار اللى عاوزك فيه يساوى اكتر بكتير
فيرا / كدا لفت انتباهى سمعاك
مختار / فى التليفون برده !!! هشرحاك كل حاجه وقت التسليم
فيرا / بس انا مش هحضر هحاول اعدى عليك بعدها
مختار / لما تبقي مصلحتك قضيت يعني
فيرا / ليه بتقول كدا ما الحاجه هتبقي معاك لحد ما تسلمها لرجالتى فى مصر
مختار / انا قولت اللى عندى بكره فى اللوكايشن اللى هبعتهولك
فيرا / نزولى مصر مش بيبقي بالبساطه دى يا مختار فى احتياطات امنيه لازم اعملها
مختار / مش بقولك شكلك فى الاخر هتطلعى بق و داخله الشغلانه دى بالبركه
فيرا / هههههههههههههههههههههههه هكلمك بكره نشوف
مختار / تمام
مختار يقفل و يتنهد جرس الباب يضرب يبص حواليه و يروح يفتح يلاقي هند مبتسمه و شايله صينيه اكل
هند / قولت تاكل لقمه قبل ما تسافر عمايل ايديا على فكره
مختار / تسلم ايديكى اخبار التمرين ايه
هند / مش باين عليا و لا ايه دا ماما بتقولى خسيت النص
مختار يبص لهند ثوانى
مختار / دا باين جدا يا خبر
هند / ههههههههههههههههههههه يا راجل
مختار / امال عوزانى اقول مش باين عشان تتقمصى و تقولى مش مركز معايا و مش مهتم و حركات الحريم دى لا دا انا صحيلك اوى
هند / هههههههههههههههههههه لا مفتح
مختار / عشان تبقي فاهمه بس انا مزاكر كل حاجه
هند / شاطر يلا اسيبك بقي تاكل و هو سخن لو كان عبد الله و لا ماما فى البيت كنت قولتلك تعال كل معانا بس مش مشكله متعوضه
مختار يبتسم هند تشاورله و تدخل بيتها و هو متابعها و مبتسم ياخد الاكل و يدخل و يقفل الباب
……………………..
فى شقه يوسف
يوسف / انت مش قولت هتستني كام يوم لحد ما امها تشد حيلها
اسراء / يا جماعه ما تنسوهم بقي اللى بيشيل قربه مخرومه
يوسف / مهو لو كانوا غرب كنت قولت ماشي لكن احنا هنغرق معاهم ما تقول حاجه يا بابا
محمود / انا مش ساكت انا مستني اما الجدع اللى اسمه مختار ده يرجع بلده و هروح اتكلم معاهم مش عاوزينه يدخل و يعمل بطل و منقذ على قفانا
يوسف / بقولك يا بابا ما تشوفلنا حد من حبايبك فى الداخليه يجاملنا فى الحكايه دي
اسراء / بطل اوهامك دى علاقتهم واصله لمحافظ بلدهم و جه و حضر الخطوبه عندك انت حد فوق المحافظ
يوسف / يووووووه بقي انا زهقت انا سايبلكوا البيت و ماشي
اسراء / ما تنساش و انت خارج تعدى على خطيبتك و خدلهم حاجه فى ايدك
يوسف يبص لامه بغضب مكتوب و يمشي و يرزع الباب وراه
محمود / بقولك ايه يا اسراء شوفلنا طريقه كويسه و فشكلى الحكايه دى
اسراء / حكايه ايه
محمود / الربطه العبيطه اللى ربطنا بيها الواد
اسراء / و هو احنا اللى ربطناه مش هو اللى سحبنا فى ايديه و خدنا للناس دول و لا دخول البيوت بقي عادى كدا
محمود / عملها عند و انا و انتى ما كانش المفروض نطاوعه و باينه انها مش ماشيه
اسراء / طول ما انت معشمه فى بنت اخوك و عمال تجريله على فسخ خطوبتها عمرها ما هتمشي خليها تتجوز و تغور يمكن يلتفت لحياته و مستقبله
محمود / تتجوز اى حد تانى غير الجدع ده
اسراء / ليه ربنا بعتلك بقره ترميها و لا تحلبها و تشرب من لبنها
محمود / انتى بتقولى ايه يا وليه انتى
اسراء / بقول اللى فيه المصلحه
محمود / العيب على اللى يسمعلك انا نازل
محمود يمشي
اسراء / العيب على اللى تكلمك اصلا
……………………..
فى شقه هند بالليل
جرس الباب يضرب هند تروح تبص من العين تلاقي عمها تتنهد و تفتح الباب بالراحه
هند / حضرتك معاك حد اللبس الطرحه
محمود يبتسم
محمود / لا انا لوحدى
هند تفتحله الباب يدخل
هند / ماما لسه فى المحل و عبد الله فى الدرس بس زمانهم جايين يعني حضرتك تشرب ايه
محمود / و لا اى حاجه اقعدى انا عاوز اتكلم معاكى كلمتين
هند تقعد و تبصله
محمود / الفتره اللى فاتت كانت كلها خناق و مشاكل لا احنا فاهمينكوا و لا انتوا فاهمينا و الحكايه قلبت بعند و الدنيا بتكبر مننا و احنا فى الاول و الاخر اهل
هند تهز راسها اه
محمود / حوارك مع يوسف انا فاهم ان هو اللى شعلل الدنيا بس مش معنى انه اتقدماك و انتى رفضتيه و راح خطب غيرك كدا انه ما بقاش ابن عمك و لا انه ما بيخافش عليكي
هند تبص فى الارض
محمود / العلاقه اللى بينكوا بقت حساسه زياده عن اللزوم و نقلتوهالنا
هند / حضرتك
محمود / اشترى منى للاخر و بعدين ردى
هند تهز راسها
محمود / انتى ما بتحبيش يوسف و مش عاوزه تتجوزيه حقك و احنا مش هنجبرك عليه بس يا بنتى ما تروحيش ترمى نفسك فى التهلكه و اى جوازه و السلام
هند / ممكن ارد دلوقت
محمود / العيله كلها مش موافقه على مختار اى عريس تانى هنبقي فى ضهرك و نجهزك و نسلمك لباب بيتك كمان
هند / مش مهم انا عاوزه مين يعني المهم العيله عاوزه مين
محمود / احنا اكبر منك و نفهم فى الحاجات دى عندك
هند / بابا الله يرحمه كان بيحبه و موافق عليه
محمود / قولتلك بسبب المشاكل كل واحد كان بيعند
هند / هيعند على حساب مصلحتى يعني
محمود / يا هند افهمى هتروحى هناك بلد فى اخر بلاد المسلمين و تعيشي فى الارياف و بيت عيله و تكنسي و تمسحي و تنضفى ورا البهايم … ليه يا بنتي ما دام ممكن تاخدى اللى يستتك و يسكنك جنب امك
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
2 تعليقات