رواية البر التاني الفصل السابع والعشرون 27 بقلم لولو محمد
رواية البر التاني الجزء السابع والعشرون
رواية البر التاني البارت السابع والعشرون
رواية البر التاني الحلقة السابعة والعشرون
انتصار / شوفى لو الاوضه ناقصها حاجه قوليلى
شيري / كتر خيرك بس اهى حاجه تفى بالغرض لحد الجمعه و كدا كدا احنا مروحين
انتصار / اخص عليكي و نهون عليكي يبقي انتى لسه زعلانه من فاطمه على فكره هى كدا غشيمه و ما بتبقاش عارفه هى بتقول ايه بس طيبه
شيري / الموضوع مش موضوع زعل بس هنصبح على هند و نطمن عليها هنقعد ليه بعد كدا
انتصار / بقولك ايه انتى فاكره دخول الحمام زى خروجه الاوضه دى بقت بتاعتك انتى و ياسمينا و خلص الكلام احنا خلاص خدنا عليكوا و ما نقدرش نستغنى عنكوا دا مختار عمل المراجيح مخصوص عشان ياسمينا تقومى تاخديها و تمشي
شيري / انا مش عارفه اقولك ايه
انتصار / ما تقوليش احنا بنحب الزحمه بس الزحمه الحلوه زحمه الاهل هو احنا ما نقدرش نبني بدل السرايا اتنين بس لا بنحب دوشه العيال و زنقه الستات بنحب البيت يبقي علاطول مليان ناس كدا ربنا ما يكتب علينا ننقص ابدا
شيري / احلى لمه ربنا يديمها عليكوا نعمه
انتصار / انتوا خلاص بقيتوا مننا انتى و عبد الله و ياسمينا احنا ما نقدرش نستغنى عنكوا لو لينا غلاوه عندك ما تمشيش
شيري / لحد امتى
انتصار / هو احنا قعدتنا وحشه اوى كدا
شيري / بالعكس و ربنا يشهد بس … انا محرجه منكوا اوى انا ما اتعودتش حد يصرف عليا و على عيالي مختار هيصرف على مراته لكن احنا …
انتصار / مصاريف ايه اللى بتتكلمى عنها طب والله ازعل ياريتك قولتى همشي عشان زعلانه اهون
شيري / انتى مش مكانى يا انتصار
انتصار / مهو مفيش بينا الكلام ده … لا اله الا الله بصي يا ستى انا هتكلم مع الكبير و ان شاء الله يلاقيلك حل يريحك ماشي
شيري / سبيها لله خلينا بس فى الفرح
انتصار / انا مش عوزاكى تشيلى هم هند خالص اقسم بالله زى بناتى بالظبط و مختار جدع و ابن حلال و هيشيلها فى عنيه
شيري تبص فى الارض و تبص لانتصار
شيري / انا مش عاوزه من الدنيا اكتر من كدا و ربنا العالم
انتصار تطبطب على شيري
انتصار / شوفى كدا لو الاوضه ناقصها حاجه نلحق نكملها
……………………..
بالليل فى الجنينه
ماجد و هشام بيوصلوا السماعات
مختار / طب ما جوه كويس لزمتها ايه الفضايح دى
ماجد / بقولك ايه انت مش هتتجوز كل يوم ما تقول حاجه يا عباده
عباده / سبكوا منه دا نكدى احنا عاوزين نولعها
عبد الله / للصبح
عيل صغير يدخل و يشد عبد الله من جلبيته
العيل / سى عبد الله سى عبد الله
عبد الله / اؤمر يا سيد الكل خير
العيل / الكبير عاوزك فى مكتبه جوه انت و سى عباده
عباده / خير
العيل / ما اعرفش
مختار / تعالوا نشوف فى ايه على ما يركبوا البتاعه دى دا لو عرفوا يركبوها النهرده
ماجد / اهو ده اللى بناخده منك
مختار / ههههههههههههههه يلا يلا
مختار و عباده و عبد الله يدخلوا السرايا و يروحوا مكتب الكبير مختار يخبط
ناصر / ادخل
مختار يفتح الباب يلاقي سليمان و شاكر قاعدين يتخض
ناصر / تعالوا يا رجاله تعالوا
التلاته يدخلوا
عبد الله / قالولى ان حضرتك عاوزنى
ناصر / ما نتحرمش تعال اقعد
عبد الله يقعد و هو مهتم
ناصر / الحجه ام عبد الله مش مبسوطه معانا هنا و عاوزه تروح
عبد الله يبص لمختار
مختار / حد ضايقها تانى بحاجه
مختار يبص لشاكر
شاكر / بتقول انت تصرف على مراتك لكن هى و عبد الله و ياسمينا ما ينفعش
عبد الله يبص فى الارض
ناصر / انا فكرت يا عبد الله و لقيت حل كويس انت راجلهم دلوقت و احنا هنا ما عندناش اكتر من الشغل
عبد الله / و انا موافق
ناصر يبتسم
ناصر / طب مش تعرف هتشتغل ايه الاول
عبد الله / اى حاجه انا موافق … انا مش عاوز امشي
ناصر / انت على راسنا يا عبد الله حتى من غير شغل خالص و ربنا يشهد انت فى غلاوه مختار و عباده بالظبط
عبد الله / عارف بس انا فعلا مش صغير و عاوز اشتغل
ناصر / تمام هنعدى الفرح و عباده هيشوفلك شغله على قدك فى الشونه تلم بيها مصروفك لحد الدراسه ما تبدا و هيظبطلك فى الاجازات
عباده / ما تقلقش يا كبير عبد الله فى عيني
عبد الله يبص لعباده و هو سعيد مختار يطبطب على ضهره عبد الله يبصله
………………….
فى اوضه فاطمه
فاطمه بتقلع شاكر عبايته و تعلقها على الشماعه
فاطمه / و دا هيعرف يشتغل ايه ده دا لا ليه فى الشيل و لا الحط
شاكر / يتعلم مهو ما عدش صغير
فاطمه / و انت فاكر ان ناصر هيشغله بجد
شاكر / الواد راجل و هيسد
فاطمه / الواد مصراوى و طرى
شاكر / هو بس لسه ما لقاش فرصه يثبت نفسه
فاطمه / لتكون فاكر يا خويا اكمنه لبس الجلابيه و العبايه بقي صعيدي الواد طرى و مش هيستحمل شغل الشونه
شاكر / بكره نقعد جنب الحيطه و نسمع الظيطه اخبارك انتى ايه
فاطمه / على حطه ايدك من التليفزيون للموبايل للسرير
شاكر / و انتى كدا بتفرحيني يعني
فاطمه / مش بقيت بنت البطه السوده و ست شريهان الفرخه ام كشك
شاكر / ما انتى غلطتى يا فاطمه
فاطمه / و هى فى حد فى الدنيا بيغلط الا فاطمه
شاكر يبتسم و يشاورلها جنبه تروح تقعد
شاكر / و عشان خاطرى
فاطمه / كفايا تؤمر
شاكر / راضيها يا فاطمه
فاطمه / عيني حاضر
شاكر يبوس راسها تبتسم
…………………
فى اوضه مختار القديمه
شيري و عبد الله و هند قاعدين
عبد الله / عاوزه ايه تانى اكتر من كدا
شيري / يا ابني انت ايه اللى جرالك ما يصحش كدا
هند / ما انتى كمان يا ماما مش منطقيه عاوزه تمشي تروحى فين بس هترجعى البيت ازاى
شيري / يا ستى مش لازم ارجع البيت اجر شقه جنبكوا هنا البلد كبيره و واسعه و احول معاش ابوكى على هنا و اجر شقتنا و لا ابيعها و اجيب واحده تانيه هنا
عبد الله / يعني انتى كل مشكلتك اننا نمشي من السرايا يعني
شيري / مش هستحمل حد يعاير اختك بينا يا اخى خلى عندك دم
عبد الله / مش هيعملوا كدا بيحبونا و الود ودهم نفضل هنا العمر كله
شيري / يا ابني ان كان حبيبك عسل
عبد الله / انا مبسوط هنا
شيري / ما طبيعي تنبسط و هم بيشيلوك و يهننوك ليل نهار
عبد الله / من يوم السبت عباده هيظبطلى شغل و هثبت نفسي
هند / قالولك هتشتغل ايه
عبد الله / فى الاول هقعد على الدفاتر اشوف الحاجات اللى داخله و اللى خارجه و اسجلها بيقول حوار سهل
هند / عبد الله
عبد الله / ايه !!
هند / ما لكش دعوه بالسلاح
عبد الله / يا شيخه اتلهى
هند / عبد الله
عبد الله / ما تخافيش يا هند قال يعني هم هياخدو السلاح من مختار عشان يمسكهونى
هند تبص لشيري
عبد الله / انا هنزل اهيص مع الرجاله و خليكوا انتوا كدا فى نكدكوا ده
هند تحدفه بالمخده
عبد الله / عشان عروسه بس
عبد الله يمشي و يقفل الباب وراه
هند / انا هقوم اقعد مع البنات هتيجي
شيري / هنزل تحت اشوف لو فى حاجه تتعمل اساعدهم
هند / ما تاخديش الدنيا على اعصابك انتى تعبتى اوى الفتره اللى فاتت
شيري تبتسم هند تبوسها و تقوم
……………………………
يوم الحنه الصبح
فى فراشه منصوبه قدام السرايا و جزارين بتدبح و ناس بتفرق و ستات داخله السرايا بطشوطه مليانه لحمه ماجد يفتح باب المضيفه يشوف المنظر يقفل الباب تانى و يروح يصحي هشام
ماجد / هشام هشام انت يا بتاع انت جاى هنا تنام
هشام يفتح
هشام / عاوز ايه يا رزل انت مش مسهرنا طول الليل
ماجد / قوم يا عم الدنيا مقلوبه هنا بره
هشام يفوق
هشام / فى ايه خير
ماجد / ما اعرفش صحيت ما لقيتش غيرنا و بفتح لقيت دربكه و ستات رايحه و ستات داخله
هشام / اكيد بيوضبوا يعني اوعى اما اقوم اخش الحمام و اللبس و نطلع نشوف لو نقدر نساعد بحاجه
ماجد / طب قوم قوم يلا
هشام يقوم يدخل الحمام و ماجد يرتب السرير
……………….
فى السرايا
ست بترسم للبنات حنه
مريم / انتى مختاره رسمه كبيره اوى يا سماح كدا مش هنخلص
الست / الحنه كتير
انتصار تدخل
انتصار / و لو خلصت حالا نبعت نجيب تانى النهرده ما حدش هينام زعلان
فاطمه تدخل
فاطمه / السلام عليكم
انتصار / و عليكم السلام الحمد لله افتكرتينا و نزلتى تشوفى احوالنا
فاطمه / و هو انا كان حد سال عنى
انتصار / عامله ايه
فاطمه / والله زعلانه بس عندنا فرح و ان موقفتش جنب ابنى النهرده هقف امتى
انتصار / اصيله
فاطمه / امال فين ام العروسه
انتصار / فوق مع هند بتلبس
فاطمه / الله هتلبس قبل ما ترسم
انتصار / العروسه بترسم اول واحده
فاطمه / لو ما عندكيش مانع هطلع اباركلها و اشوف لو ناقصها حاجه … لو محتاجانى فى المطبخ
انتصار / لا ما تشيليش هم المطبخ البلد كلها هنا
خديجه و بنات الجارحى يدخلوا مريم و فاتن يجروا عليهم
فاتن / اتاخرتوا كدا ليه والله كنت هزعل منكوا
ست / والله من صباحيه ربنا بقولهم يجهزوا حاجتهم فاطمه / اهلا اهلا اتارى السرايا نورت اهلا بست الكل
الست / ازيك يام عباده ازيك يا ام فاتن
انتصار / لا تكلميني و لا تسلمي عليا اتصل بيكي اربع مرات عشان تيجي
الست / اقسم بالله انا جاهزه و لابسه من الصبح
انتصار / كنتى جيتي و هم لما جهزوا حصلوكى
الست / بقولك ايه حركاتك دى مش هتخيل عليا كل مره
انتصار / ههههههههههههههه العروسه فوق بتلبس و زمانها نازله اقعدى اشربي حاجه على ما ابص على الحريم فى المطبخ
الست / رجلى على رجلك و انا فى ديك الساعه لما اطبخ اكل حنه مختار بايدى
انتصار / نردهالك فى مغاورى
انتصار و الست يروحوا المطبخ
فاطمه / اقعدوا يا بنات … الهمه يا جماعه عاوزين نلحق نلبس … حد وصل السماعات هنا يا بنات
مريم / اه وصلوها و جربتها و شغاله زى الفل
فاطمه / هطلع ابص على العروسه ثوانى و جايه
خديجه / ممكن اجى معاكى
فاطمه / اوى اوى تعالى يلاهوى دا انتى تنورى
فاطمه و خديجه يطلعوا فوق و باقي البنات بترسم
………………….
قدام الدبح
مختار واقف مع الرجاله هشام و ماجد يدخلوا
ماجد / عريسناااااااا
مختار / صح النوم اخيرا
هشام / اقسم بالله مصحيني بالعافيه مفيش حته نشرب منها قهوه هنا
مختار / بس كدا تؤمر … خليفه قهوه و فطار للبهوات
خليفه / حالا يا سى مختار
خليفه يجرى على جوه
مختار / مش عاوزكوا تتقلوا فى الفطار عشان الغدى النهرده يستاهل
ماجد / واخد بالى واخد بالى
مختار / و اه السرايا النهرده منطقه محظوره الدخول باذن عشان مردومه جوه حريم تمام
هشام / بناقص يا عم
ماجد / بقولك ايه هو ما فاضلش غيرك تقف على الدبيح موراكش حلاق و لا اى مشوار كعريس يعني
مختار / يخربيتك دا انا لسه جاي من عنده هو مش باين عليا و لا ايه
هشام / لا مش باين
مختار / اصل لسه كان عندنا فرح الخميس اللى فات فكنت مزنجفها يعني بس لا والله الراجل ظبطنى فوطه ساقعه و فوطه سخنه يعني
ماجد / بغض النظر يعني انت هتتجوز بدقنك دى
مختار / منعوها و لا ايه
ماجد / لا مش الفكره يعني بس
مختار / هتاثر فى الجواز فى حاجه يعني
ماجد / دى ليله فى العمر يعني زنجف نفسك
هشام / سيبك منه انت كدا جامد ربنا معاك فين بقي القهوه
خليفه يطلع بيجرى
خليفه / الفطار يا بهوات
هشام / ابن حلال مش لسه كنت بقولك خليفه ده ابن حلال قولت انا و لا ما قولتش
ماجد / دا بيقول فيك شعر يا ابني
ماجد و هشام يدخلوا جوه و مختار واقف بيضحك
………………..
فى اوضه هند
شيري بتربط لهند رباط الفستان و هند لابسه عليه طرحه دهبى ستان لفه عاديه و مشغله اغنيه ابن الجيران نانسي عجرم و ياسمينا لابسه فستان احمر منفوش قصير و عماله تتنط على السرير
شيري / لو بوظتى شعرك مش هعدلهولك
الباب يخبط
هند / ادخل
فاطمه تفتح الباب
فاطمه / ادخل ؟
شيري / تعالى اتفضلى
فاطمه / بسم الله ما شاء الله الاحمر هياكل منك حته
خديجه / ازيك يا هند
هند / الحمد لله تمام ازيك يا خديجه تعالى ادخلى
فاطمه / تعرفوا الفستان ده ناقصه ايه … ناقصه تاج انا عندى تاج جوه تحفه هروح جرى اجيبه و اجى
فاطمه تمشي و هند تسلم على خديجه
خديجه / فستانك حلو اوى مين هيمكيجك
هند / مش عارفه بس تقريبا ام داوود باين
خديجه / هو مفيش فى البلد دى غيرها دى حتى ما بتجددش انا قولت هتجيبي واحده معاكى من مصر و لا حاجه
هند / هم قالوا كويسه و بعدين انا هخليها تحط حاجات بسيطه يعني مش هتافور
خديجه / طب مش ناقصك حاجه
هند / تسلمى
خديجه / هنزل استناكى تحت
هند / ما تخليكي
خديجه / مش عاوزه ازحم الاوضه على الفاضي مامتك لسه ما لبستش
ياسمينا / انا لبست
خديجه / قمر
شيري / خليكي انا مش هلبس دلوقت
فاطمه تدخل بتنهج و فى ايدها تاج دهب و فيه فصوص
فاطمه / دا بتاعى عملاه عموله بس تحفه اللبسيه كدا
شيري / حلو اوى عاملك ملكه يا هند
فاطمه / دا عيار واحد و عشرين كنت عملاه لسبوع عباده و بوديه الصاغه يتلمع و يتنضف علاطول
انتصار تدخل
انتصار / بسم الله ما شاء الله ايه الحلاوه دى … لا يا بطه التاج عامل شغل
فاطمه / ما بيطلعش غير للحبايب
انتصار / ام داوود بتسالك هتزوقك هنا و لا تحت
شيري / تحت على ما البس
هند / تمام يلا بينا
شيري / عشر دقايق و هحصلكوا
الكل ينزل ما عدا فاطمه و شيري
فاطمه / اوعى تكونى لسه زعلانه منى
شيري / موقف و عدى شكرا على التاج فعلا فرق اوى فى الفستان
فاطمه / الحمد لله لو عوزانى اساعدك تلبسي
شيري / تسلمى دى عبايه هحطها عليا و اعمل الطرحه و انزل
فاطمه / اللى تشوفيه .. عن اذنك
فاطمه تشد الباب فى ايدها و تنزل
……………………
فى الجنينه
عباده لابس جلبيه بيضه يجيب كرسي و يحطه فى وسط الجنينه و يقف على الكرسي
عباده / يا مختار يا ابن عمران الزيني يا مختار يا ابن عمى
امين يدخل لابس عبايه بيضه و شايل حله كبيره كلها حنه يرزعها فى الارض جنب عباده
عباده / يا عريس
مختار يدخل من بره
مختار / انسي
ناصر / ينسي ايه يلا تعال
مختار / مش هيحصل الكلام ده مش هينفع
ناصر / تعال بالزوق بدل ما اخليهم يجيبوك عافيه
مختار/ ما ينفعش يا كبير انا اخوك الصغير
شاكر / اخلص يا مختار ما تعملش زى العيال الصغيره
عبد الله / هو فى ايه
ماجد / اقسم بالله ما اعرف
عباده / يلا يا ابني الناس عاوزه تفرح
هشام / هو فى ايه يا جدعان
عباده / عاوزين نحميه بالحنا
مختار / انا ما كنتش عاوز اتجوز اصلا بسبب الحوار ده
عبد الله / احنا فيها يا عم لو مش عاوز الجوازه بلاها
شاكر / هاتولى الواد ده هنا … احنا هنتحايل عليك و لا ايه
الرجاله يشيلو مختار و يزفوه بالمزمار و السقفه و يرقصوا بيه هند و البنات يطلعوا يتفرجوا من البلكونات و يسقفوا و يزرغطوا مختار يشاور لهند و هو مبتسم تشاورله ينزلوه يقعدوه على الكرسي
هند / هم هيعملوا فيه ايه
انتصار / هيحموه بالحنه
هند / ايه !!!
انتصار / الحنه كلها فوايد و سنه
هند / بس مش لدرجه يحموه بيها يعني
مريم / بصي بصي
هند تبص تلاقي الرجاله عماله تلعب مع مختار بالحنه
مختار / بالراحه بدل ما اقوملكوا
عباده / يا عم بيوجبوا معاك
مختار / دا انتوا هتشوفوا منى احلى واجب بس افوقلكوا
عبد الله يكبش بايده و يلحوس مختار مختار يقومله و يكبش بايده و يجرى وراه و هم بيضحكوا و الكل يشترك فى اللعب و الضحك و هند و شريهان بيتفرجوا من فوق و مستغربين مختار يروح يفتح خرطوم المايه و يغسل نفسه
ناصر / ياض سيبها شويه تلحق تخرط
مختار / ربنا يباركلك انت كفايا كدا
عباده / فقرى
مختار / عيني حاضر انت يجي يومك بس و انا هظبطك
عباده/ ههههههههههههههههههههه
مختار يسيب المكان و يدخل المضيفه و هند و البنات يدخلوا جوه
هند / فكرنى بالافلام الهندى لما بيحموا العرسان بالكركم
فاطمه / الكركم مفيد برده بس الحنه افيد
مريم تشغل الاغانى
مريم / احنا هنقعد نرغى و لا ايه
الكل يقعد و مريم تشد خديجه مش عاوزه تقوم يزقوها تقوم و ترقص قدام مريم
…………………..
فى المضيفه
عبد الله و الشباب يدخلوا و هم بيضحكوا عبد الله يقلع الجلبيه مبهدله على الاخر و يروح يخبط على الحمام
عبد الله / انجز يا ميخا عاوز استحمى
مختار يفتح الباب و هو بينشف شعره بالفوطه عبد الله يدخل
مختار / نورت يا ماجد
ماجد / ما تقولوش ميخا تانى يا عبده لحسن بيزعل
مختار يبص لوشه فى المرايه
مختار / والله لو كنت بقعت كنت زعلت و زعلتكوا كلكوا
هشام / و احنا مالنا يا عم هو احنا اللى اخترعنا الحاجات دى احنا اول مره نشوفها
ماجد / بس جامده اقسم بالله انا انبسطت اوى مع ان هدومى اتبهدلت بس امين بيقول اللى ما يتوسخش بالحنه يبقي ما بيحبش العريس و انا كله الا العريس … دا انت حبيبي
مختار / حبيبي يا ميجو
هشام يخبط على الحمام عباده و امين يدخلوا و شعرهم مبهدل على الاخر
عباده / انت استحميت ليه يا بغل انت كنت سبها شويه
مختار / انا هطلع اشوف نضفوا بره و لا لا عشان نفرش قبل ما الناس تيجي
مختار يطلع بره و الكل يقعد يبصوا لبعض و يضحكوا هشام يخبط تانى على الحمام
عبد الله يطلع
عبد الله / دا احنا لو فى شقه مصيف و غرقانين رمل مش هنستعجل الحمام كدا
هشام / رمل البحر اهون والله
هشام يدخل و الكل يضحك
……………………
فى الجنينه بالليل
فرق مزمار و ربابه و طبول عماله تعزف و الرجاله بترقص مختار يدخل يرقص حصان يدوله رشاش يوجهه لفوق و يضرب نار و الرجاله ترد عليه عباده يركب عبد الله حصان تانى و يفضل ماسك الحصان و الحصان بيرقص بعبد الله و فى صوانى اكل مليانه طالعه من السرايا و صوانى تانيه فاضيه داخله و ستات واقفه على باب السرايا بتبدل الصوانى و الغفر بيوصلوها للناس اللى قاعده بتاكل
انتصار / مش عاوزه الصوانى بره تفضى الاكل جوه كتير
انتصار تروح ناحيه اوضه السفره ستات بتاكل و فاطمه و شيري بيخدمو عليهم
انتصار / فى حاجه ناقصه
فاطمه / لا كلو تمام روحى ارتاحى شويه
انتصار / حله اللحمه قربت تخلص ليه
فاطمه / لسه ربعها
انتصار / و لو حطى حته و اتنين و تلاته خلى الناس تشبع هنودى الاكل دا كله فين
فاطمه / اهدى انتى بس و ما تشغليش بالك بنحط و الكل بياكل و بيدعيلك و يدعى للعرسان
انتصار / هروح ابص على المطبخ اشوف الستات عاملين ايه تعبوا معانا جامد النهرده والله
شيري تدخل شايله حله فاضيه
شيري / السلطه خلصت
انتصار تاخد الحله
انتصار/ انا رايحه المطبخ هخليهم يملوها فتحى عينك يا فاطمه ما تخليش الحلل تفضي
فاطمه / حاضر اهدى انتى بس و كلو هيبقي تمام
انتصار تاخد الحله و تروح المطبخ تعدى من على البنات بيرقصوا و هند قاعده بتسقف و لابسه دهبها كله وسطيهم
…………………..
فى اوضه مختار القديمه
ياسمينا نايمه و شيري و هند بيعلقوا الهدوم فى الدولاب
شيري / انا ما كنتش متخيله انى هتعب اوى كدا …بس الصراحه انبسطت اوى برده
هند / بس اهم حاجه انك رجعتى التاج لفاطمه
شيري / طب والله كنت حاطه ايدي على قلبي انها تحرجك وسط المعازيم
هند / ما جاتش فى بالى خالص
شيري / الست دى مش سهله خالص يا هند و انا مش مرتاحالها هتعرفى تتعاملى معاها ازاى دى بس
هند / مش عارفه بس يعني ما حدش كامل يعني الحمد لله باقي الناس كويسين
شيري / الحمد لله
شيري تطلع على السرير و تنام و هند توارب الشباك و تقف تبص فيه
شيري / مش هتنامى
هند / تفتكرى نام
شيري / ما اعرفش كلميه اطمنى عليه
هند / فى المضيفه مع عبد الله و صحابه هكلمه فى وسط كل دول ازاى
تليفون هند يرن تجرى تبص عليه و تبتسم
هند / دا هو
شيري / انا نمت خلاص خدى راحتك
هند ترد و هى مبتسمه
هند / الو
مختار / نمتى ؟
هند / لا لسه نمت انت ؟
مختار / اه من بدرى ما انا بكلمك من الحلم اهو
هند / تصدق انك رخم
مختار / هههههههههههههههههههه
هند / النهرده كان يوم فظيع
مختار / فوق ما تتخيلي لسه ريحه الحنه فى مناخيري
هند / هههههههههههههههههههه شكلكوا كان مسخره بس انبسطتوا صح
مختار / هم انبسطوا انا كدا كدا كنت مبسوط تعرفي انا فين دلوقت
هند / تعرف انت انا فين دلوقت
مختار / فى اوضتى القديمه .. اصل انا دلوقت بلا اوضه مؤقتا يعنى لحد بكره بالليل
هند / و انا كمان زيك بلا اوضه المهم انت فين دلوقت
مختار / بتمرجح على المرجيحه المضيفه لحم فوق بعض دا حتى امين ساب اوضته و جه نام معانا
هند / و سبت عبد الله معاه
مختار / قال يعني عبد الله عدل فى نومته اوى ياختى داهيه لتكونى زيه تبقي ليلتى عنب
هند / ان كان عاجبك
مختار / عاجبني تعالى انتى بس و ما لكيش دعوه
هند / اجى فين
مختار / كلها ساعات و اقولك
هند / طب و انت مش هتنام لك كام ساعه منهم
مختار / هنام طبعا هقفل معاكى و اروح ادور على اى حته فاضيه ازنق نفسي فيها للصبح
هند / اوضتنا فاضيه اطلع نام فيها
مختار / لوحدى ؟
هند / هههههههههههههههههههه مش هرد عليك
مختار / روحى انا شكلى بهيس
هند / بحبك
مختار / و انا كمان و الله
هند / تصبح على خير
مختار / و انتى من اهله
هند تقفل و تحط الموبايل فى الشاحن و تدخل السرير تلاقي شيري صاحيه يبتسموا لبعض و يناموا
……………………
تانى يوم الصبح على قهوه
حامد / و انت عرفت منين
حمدى / من الفايس عبد الله مشير صور من الحنه امبارح
حامد / مش كان زمان الحال غير الحال دلوقت
حمدى / انا بكلمك فى ايه و انت بتكلمنى فى ايه
حامد / انت اللى بتكلمنى فى ايه عيال اخوك مليون فل و تمنتاشر احنا اللى شايلين الطين هنا
حمدى / مش هرد عليك .. عملت ايه مع اخوك
حامد / زى ما انت قولت قالى ما لكش حاجه عندى و اعلى ما فى خيلك اركبه
حمدى / و هتعمل ايه
حامد / والله المحامى اللى معايا ده شكله اى كلام و هيضيعني اديني بدور على واحد تاني
حمدى / فكك من سكه المحامين دى مش هيجي من وراها خير هتعادى اخوك على الفاضي
حامد / يا عم يزعل شويه و بعدين اراضيه و لا اتحبس انا و نزعل كلنا و لا انا مش هيتزعل عليا و لا ايه
حمدى / مفيش اخبار عن يوسف
حامد / و هى اخبار يوسف هتبقي عندى بتعمل ايه
حمدى / ابوه و امه هيتجننوا عليه
حامد / ادى اخره الدلع ما كل اللى احنا فيه ده بسبب سي يوسف هو الجواز بالعافيه يا ناس انا قايم ورايا شغل
حامد يشرب اخر بق فى كبايه الشاى
حامد / ابقي حاسب انت عشان ما عييش فكه
حامد يمشي و حمدى باصص فى الارض
……………………
فى شقه محمود
الباب يتفتح و يوسف يدخل اسراء تجرى عليه
اسراء / يوسف حبيبي مالك
يوسف يسيبها و يدخل اوضته و يقفل الباب اسراء تدخل تلاقيه بينام فى السرير بهدومه
اسراء / اجبلك حاجه تاكلها يا حبيبي
يوسف / مش عاوز
اسراء / طب
يوسف / يعني اطفش تانى عشان ترتاحى اروح فين يعني ما لو كان ليا مكان تانى و الله ما كنت رجعت سيبونى فى حالى بقي سيبونى لوحدى عاوزين منى ايه
يوسف ينهار و يعيط و اسراء تاخده فى حضنها و تهديه
اسراء / كل حاجه هتتصلح كل حاجه هترجع زى ما كانت و احسن
يوسف / مفيش حاجه هتتصلح كل حاجه باظت هند هتتجوز مختار و انا ما عدش ليا حد و ليا حلتى حاجه لا فلوس و لا عربيه و لا شقه و لا صحاب و لا حتى اهل انا ما ليش حد
اسراء / ازاى بس احنا كلنا حواليك يا حبيبي و بنحبك
يوسف / ما حدش بيحبنى الكل بيكرهنى الكل بيلومنى على اللى حصل ما حدش عاوز يسمعنى و لا يحس بيا ما حدش حاسس بيا
اسراء / اهدى يا حبيبي و صلى على النبي ما تعملش فى نفسك كدا منك لله يا هند انتى و امك
يوسف بيعيط و اسراء بتطبطب عليه
…………………..
فى السرايا
عباده واقف فى الجنينه مع عمال بتركب كهارب مع امين
عباده / يا عم انت هتكدبنى كان بيلعب امبارح غيرلى الفرع ده يبقي تغيرهولى و تزودلى فرعين كمان دا فرح مختار الزيني عارف يعني ايه مختار الزيني
الراجل / تحت امرك يا سى عباده
امين / امن على السلوك دى يا عم مش عاوزين حاجه تضرب على اخر اليوم
الراجل / ما تقلقش يا سي امين دى سلوك جديده كلها دا فرح الغالى
عباده / عشت … اخبار اللحمه ايه
امين / عبد الله واقف مع الجزارين و ان شاء الله خير
عباده / ما تسيبوش لوحده و طل عليه كل شويه ليكون محتاج حاجه
امين / تمام
امين يمشي و سماح تطلع من جوه عباده يشوفها يروحلها
عباده / فى حاجه و لا ايه
سماح / ضهرى اتقطم من تتقيه الرز و غيرى بيترقصوا مع العروسه فى اوضتها
عباده / و هى وقفت تنقيه الرز عليكي يعني و لا ايه دا الحريم اللى جوه اكتر من اللى باقيه فى باقي البلد
سماح / و هم دول فالحين غير فى الرغى اهو كلو بيهنكر و الاسم بيشتغلوا
عباده / طب امك فين تشخط فيهم
سماح / هتكون فين مع ابوك فى اوضتهم رجله شاده عليه من واقفه امبارح و بتدعكهاله
عباده / اه صح دا كان تعبان خالص الصبح
سماح / هى الناس مش كلت امبارح و خدت معاها و هى مروحه لزمتها ايه يعني المعجنه دى تانى النهرده
عباده / عقبال فرحك هنعملك المعجنه دى اسبوع بحاله
سماح / عقبال فرحى !!! دا لما يبقي يتبقي فيا صحه لفرحى بعد فرحك
عباده / تصدقى يا بت انا اللى غلطان انى سايب الرجاله و واقف باخد و ادى معاكى انجرى يا بت على جوه
سماح / بقولك ايه ما تخليك حنين و توقفنى مع الستات اللى بيفرقوا اللحمه بره
عباده / عاوزه تقفى فى الشارع و اللى رايح و الجاى يبص عليكي
سماح / عاوزه شغلانه سهله رقبتي وجعتنى الله
عباده / اللهم طولك يا روح خشي يا سماح و استهدى بالله و خلى اليوم يعدى على خير
سماح / عشان خاطرى يا عباده
انتصار تطلع
انتصار / انتى هنا يا سماح و انا قالبه عليكي الدنيا
سماح / دا هم خمس دقايق اللى قمت فيهم الدنيا لحقت تتقلب فيهم
عباده / ما تتكلمى عدل يا بت
انتصار / روح شوف شغلك يا عباده
عباده يمشي
انتصار / مالك يا سماح فيكي ايه من اول النهار و انتى مش مظبوطه
سماح / عاوزه الحق و لا ابن عمه
انتصار / الحق
سماح / زهقت من تنقيه الرز و شغل المطبخ هحضر الفرح ازاى انا بقشفي ده
انتصار / طب و ابن عمه
سماح تبص لانتصار انتصار تضحك
انتصار / و انتى كان حد غصبك عليه مش انتى اللى قولتى انا اللى هنقي الرز
سماح / كنت فاكره انه على قد لقمه الغدى مش ليله زى امبارح انا ضهرى وجعنى
انتصار تبتسم
انتصار / سلامه ضهرك خلاص يا ستى كفايا عليكي كدا اطلعى ارتاحى و لا روحى اقعدى مع البنات فى اوضه هند
سماح تبص لانتصار
انتصار / ايه و انا مش فهماكى و لا ايه
سماح تبص فى الارض
انتصار / لما جم يقسموا الشغل و قالوا مين هتنضف اوضه العرسان سكتى و لما لقيتي مريم خلصت الاوضه و فرشتها و انتى لسه ما خلصتيش الرز قلبتى وشك
سماح / كان المفروض تيجي تساعدنى مش تطلع تقعد مع هند و بعدين هى لحقت تمسح الاوضه و تفرشها دى تلاقيها كروتتها
انتصار / انا طلعت بصيت على الاوضه فله و متروقه و بعدين انتى هتفضلى تهرى و تنكتى فى ايه دا بدل ما تطلعى تنبسطى شويه مع البنات
سماح / لا انا هطلع انام قال يعني البنات كانوا سالوا عنى
سماح تمشي و انتصار بتضرب كف على كف
إنتصار/ ربنا يهديكى انتى و امك تعبين روحكوا و تاعبين الكل معاكوا
………………..
فى الفرح بالليل
هند قاعده بالفستان و البنات حواليها بيرقصوا و بره صوت المزمار و ضرب النار عالى ياسمينا تدخل بتجرى لابسه فستان ابيض منفوش
ياسمينا / المزنوق جه المزنوق جه
الكل يضحك انتصار تشيلها و تبوسها من خدها
انتصار / يخربيت عسلك يا شربات انتى
مريم / معاكى بطاقه يا عروسه و لا ايه
هند / خفه
مريم / هههههههههههه بطمن بس
فاطمه تدخل شايله مبخره و هى بتزرغط و تقعد تبخر فى هند و فى البنات حواليها عبد الله يدخل هو و ناصر و سليمان شايلين الدفتر
عبد الله / امضى هنا و هنا و هنا و هنا و ابصمى هنا و هنا و هنا و هنا
هند تبصله و تاخد القلم و تمضي و الكل بيزرغطوا عبد الله ياخد الدفتر و يطلع يجرى على بره
ناصر / الف مبروك يا عروستنا يجعلك قدم السعد علينا
هند تبتسم بخجل ناصر و سليمان يمشوا و الستات بتزرغط
……………….
فى الجنينه
الرجاله بترقص و مختار على حصان و فى ضرب نار جامد ناصر يرفع سلاحه و يضرب نار مختار ينزل من على حصانه و يبوس ايد اخوه
ناصر / عشت و شوفتك عريس يا وله عقبال ما اشيل عيالك
مختار / يديك طوله العمر و تشيل عيالهم كمان
ناصر / ههههههههههههههه كفايا عليك كدا خد عروستك و اطلعوا فوق
مختار يبوس ايده و المزمار يزفه لحد جوه الستات تعدل لهند فستانها و تنزل الطرحه على وشها و يزرغطوا و ياخدوا هند تحط ايدها فى ايد مختار و يطلعوا و هم بيرشوا عليهم الورد و الملح و يطبلوا على الدفوف لحد ما يوصلوهم اوضتهم هند تقعد على السرير و مختار واقف مع الكل عند الباب
شيرى / مش هوصيك عليها يا حبيبي
مختار / فى عيني يا امى
شيري تعيط
انتصار / جرا ايه يا اختى فى حد يعيط فى يوم زى ده
شيري / من فرحتى والله ربنا يسعدكوا يا ولادى
انتصار / امين … يلا يا جماعه نسبهم لوحدهم
فاطمه تدخل صينيه عشا كبيره تحطها على الترابيزه
فاطمه / لو ناقصكوا اى حاجه قولوا
مختار / كتر خيركوا
الستات يطلعوا بره و مختار يقفل الباب و يبص على هند الطرحه مغطيه وشها يروح يقف قدامها و هى بتفرك فى ايديها يقعد جنبها تستاخر يحاول يقرب تستاخر
مختار / الساعات عدوا
هند / ما انا جيت اهو
مختار يبتسم و هند باصه فى الارض مختار يشد كرسي التسريحه و يقعد عليه قدامها و يرفع الطرحه من على وشها تحول عنيها و تطلع لسانها يضحك تضحك و تبص فى الارض تانى
مختار / طالعه حلوه اوى
هند تبصله و تبص فى الارض
مختار / هنتوضي و نصلى ركعتين عشان ربنا يكرمنا
هند / ماشي
مختار / جعانه تاكلى لقمه
هند / تؤ … جعان ؟
مختار / لا
هند / تمام .. ايه ؟
مختار / ايه !
هند / يعني هنعمل ايه
مختار / احم اه مش هتغيرى و لا هتصلى بالفستان و لا ايه
هند / اه صح هغير … اممم طب ايه ؟
مختار / تانى ؟
هند / ههههههههههه يعني هغير فين انت واقف
مختار / اممم اه صح ..اااه … طب ما انا جوزك
هند /ههههه ايوه … يعني … بس
مختار / طب تدخلى الحمام يعنى
هند / ماشي
هند تقوم مختار يقوم هند توصل لباب الحمام و تقف
هند /اممم هو انت ممكن تساعدنى فى الرباط قبل ما ادخل
مختار / اه طبعا
مختار يروح يفكهولها و هند بتفك الطرحه
مختار / ريحتك حلوه اوى
هند / شكرا
مختار / اول مره اشملك ريحه حلوه
هند تلفله و تبرق
مختار / قصدى اول مره اشم ريحه حلوه اوى كدا
هند / والله
مختار / ما انتى مش بتحطى ريحه يعني اقصد فى العادى ما كنتيش بتحطى .. اصلها حرام اصلا يعني
هند تحط ايدها فى وسطها و ترفع حاجبها
مختار / لا مش وقته خالص ابوس ايدك انا مرتبك خلقه عدى الركعتين دول و بعدين حاسبيني براحتك خليكي انتى الكبيره النهرده اللهى ربنا ما يوقعك فى ضيقه
هند / هههههههههههههههه ماشي خلصت
مختار / لا بحاول مش عارف
هند / فك الفيونكه تحت و بعدين زى رباط الجزمه
مختار / بحاول اهو
هند تفك الطرحه و تفك شعرها
مختار / يا حلاوه
هند / ايه ؟
مختار / انا ما كانليش فى فك الرباط على فكره انا هدخل اتوضي و ربنا معاكى انتى بقي
مختار يسيبها و يدخل الحمام و هى واقفه مستغربه تروح تطلع عبايه من الدولاب و تحطها على السرير و هى بتضحك
…………………..
فى الجنينه
الكل بيرقص و فرحان عباده يروح يقعد جنب شاهين شاهين يبتسم
عباده / منور يا حج
شاهين / منوره باهلها يا عباده
عباده / ان شاء الله كنت عاوز ازوركوا بكره لو الوقت يسمح يعني عشان حوار خديجه زى ما اتفقنا
شاهين / هو فى حد بياخد الاذن عشان يجى بيته يا عباده
عباده / عشت يا حج ربنا يباركلك
شاهين يطبطب على كتف عباده مغاورى يقوم يضرب نار و امين يرد عليه و الرجاله بتضحك و مبسوطه و المزمار صوته ضايع فى ضرب النار
…………………
فى اوضه مختار
مختار نايم فى السرير و هند نايمه فى حضنه يبص عليها و هو مبتسم و يحضنها اوى
مختار / هند هنوده انتى نمتى ؟
مختار ينفخ فى ودانها تقشعر
هند / بس بقي يا مختار سبني انام
مختار / تنامى ايه بس فى يوم زى ده اصلا انتى عارفه تنامى ازاى فى الدوشه دى
هند / عندى اوفر دوس اوكسايتوسين عامل معايا احلى شغل سبني انام بقي
مختار / ههههههههههههههههههه … بالله عليكي ليكي نفس تسبيني و تنامى
هند تبتسم و تتعدل فى حضنه و تبصله
هند / و بعدين معاك بقي
مختار / معزور و الله استنيت اليوم ده كتير طب دا انا ما نمتش من امبارح بعد الساعات عشان تبقي فى حضني
هند / ما انا فى حضنك اهو
مختار / ما الانسان طماع كل ما تديله يعوز اكتر
هند دحكتها من الودن للودن
هند / و انت عاوز ايه دلوقت
مختار / طمعان فى كرم اخلاقك
هند / ههههههههههههههههه و الله ما قادره لك
مختار / يعنى كلهم يشوفوكى بترقصي و حبيبك ينام بلوشى
هند / بلوشي برده !!! مين فينا اللى قطه دلوقت يا سي مختار ؟؟
مختار / يا حزن الحزن هو بعد كل ده طلعت قطه طب استرى عليا و اديني فرصه تانيه يمكن اطلع اسد
هند / هههههههههههههههههه اقسم بالله انت مجرم
مختار / والزوجةُ الفضلى أبادلُها الهوى.. بوجودها فَرِحٌ وأسْعَدُ حالا … لا لَمْ أذق طعمَ الهوى من قَبْلها.. خِفْتُ الجليلَ ولَمْ أخَفْ عُذالا … مَنْ يَخْشَ حقا أنْ يَمَسَّ مُحَرَّما ً.. أعـْطـاهُ إيَّـاه الـكـريمُ حلالا
هند / يعني ايه
مختار / يعني صايم عن الحرام عشان بحب الحلال و ربنا كرمنى بيكي فزيدينى عشقا زيدينى بقي ربنا يفتحها عليكي و يا بخت من قدم شئ بيداه التقاه و هنيالك يا فاعل الخير و الثواب
هند / ههههههههههههههههههههههه و
ما نيل المطالب بالتمنى
مختار يقوم يقلع جلبيته
مختار / انما تؤخذ الدنيا غلابا
هند / هههههههههههههههههههههههههه
……………………..
تانى يوم فى مطبخ السرايا
فاتن بتحمر حمام و البنات بيساعدوها انتصار تدخل
انتصار / اخص عليكوا انتوا لسه ما خلصتوش
فاتن / ربع ساعه بس و الصينيه تكون جاهزه
مريم / هم يعني صحيو
شيري تدخل
شيري / صباح الخير بتعملوا ايه ؟ .. ايه ده دا انتوا ما شاء الله خلصتوا اهو .. طب كان حد صحانى
انتصار / و ايه لزومه التعب البنات قاموا بالواجب
عيل صغير يدخل
العيل / الكبير بيقولك هيروحوا الصلاه هتعوزى حاجه
انتصار / انا ريحاله اهو .. الهمه يا بنات
انتصار تسيب المطبخ
شيري / اساعد فى حاجه ؟
…………………..
فى الهول
عباده / لا انا هطلع من الصلاه على بيت الحج شاهين هو مستنيني
ناصر / ربنا يجعل فى وشك القبول
عباده / ما حدش بياخد اكتر من نصيبه
انتصار تدخل
انتصار / و انت نصيبك خير و زى الفل و انا دعيالك
عباده / يبقي احط فى بطنى بقي بطيخه صيفي يا ام فاتن
مختار ينزل من فوق
مختار / مع شقه عيش بجبنه تبقي اوضيت
ناصر / الله !! صباحيه مباركه يا عريس
انتصار / امال فين عروستك
مختار / فى سابع نومه قولت اللحق الجمعه ملاقيش فنجان قهوه من بتوعك يا ام فاتن
انتصار / بس كدا !! عيني
مختار / تسلم عينك
ناصر / عروستك لو صحيت ما لقتكش
مختار / سبتلها ورقه جنبها ما تقلقش و بعدين موبايلي معايا و دى الصلاه يعني مش ههاجر
ناصر / تمام هسبقك انا و اللحق باقي الرجاله فى المسجد هحجزلك جنبى على ما تشرب قهوتك
مختار / تسلم يا كبيرنا
ناصر / السلام عليكم
ناصر يمشي مختار يروح يقعد و يدعك فى عينه يبص يلاقي عباده مركز معاه يبتسم عباده يبتسم
مختار / رايح لعروستك هاه ؟
عباده / لسه ما بقتش عروستي
مختار / تبقي هبله لو رفضتك
عباده / مش كل الناس بتحب المانجه
انتصار تدخل و فنجان القهوه فى ايدها تديه لمختار
انتصار / انا بحبها و بموت فيها كمان هاتلنا قفصين و انت راجع
شيري تطلع من المطبخ و مختار بيشرب من القهوه يقوم يبوس ايدها
شيري / انا لما قالولى ما صدقتش افتكرتهم بيشتغلونى .. هند عامله ايه
مختار / زى الفل نايمه فى سابع نومه و الفطار جنبها و قبل ما تصحى ان شاء الله هكون صليت و رجعتلها
شيري / طب اطلع ابص عليها و لا ايه
انتصار / تطلعى فين هى لما هتصحى هتنزل ما ينفعش حد يدخل على العروسه كدا بعد الشر تتكبس
شيري / تتكبس !!
انتصار / بعدين بعدين هبقي اشرحلك كل حاجه دلوقت يلا على المسجد منك ليه ما عدش فاضل فى السرايا غيركوا و لا ناويين تصلوا مع الحريم
مختار ياخد بق من فنجان القهوه
مختار / يلا يا ابني جبتلنا الكلام
عباده / انا برده
انتصار / هترجعوا تلاقوا الاكل جاهز ما تتاخروش
عباده و مختار يمشي انتصار تبص لشيري و تبتسم
انتصار / اعملك لقمه على ما الاكل يجهز ؟
………………………….
فى شقه محمود
محمود يفتح الباب بالراحه على يوسف نايم يدخل يغطيه و يقعد جنبه
محمود / هتصلى يا ابني !!
يوسف / لا
محمود / قوم يا ابني اتوضي و صلى الجمعه و انطر الشيطان ده و فوق لنفسك
يوسف / روح شوف محلك و فلوسك و سبني فى حالى
محمود / يا ابني و هو المحل و الفلوس دول مش ليك فى الاخر
يوسف يتعدل و يقعد
يوسف / مش عاوزهم .. خليهملك يمكن تشبع بيهم
محمود / دا انا عمرى ما استخسرت فيك حاجه عمرى ما رفضتلك طلب
يوسف / عاوز منى ايه طيب
محمود / قوم اقف جنبي و اسندنى قوم و انسي اللى حصل و لو عاوز يعني نروح نشوف دكتور
يوسف يقوم من السرير و يزعق
يوسف / خلاص جننتونى خلاص ايه هيدخلوا عليا يلبسونى القميص بالمقلوب خلاص
محمود / بعد الشر يا ابني دا انت زى الفل
يوسف / و ما دام انت عارف انى زى الفل دكتور ايه اللى بتتكلم عنه
محمود / انا كنت اقصد حد يسمعك و يفهمك
يوسف / و الدنيا ضاقت بيا ما لقيتش اللى يسمعنى غير دكتور المجانين
محمود / يا ابني مش دكتور مجانين اقولك بلاش هى فعلا فكره مش تمام قوم اتكلم معايا انا .. انا هسمعك
يوسف / بقولك ايه يا بابا فكك منى و قوم اللحق الصلاه
محمود / طب اللبس و تعال معايا .. اسندنى
يوسف / اشتريلك عكاز انفعلك منى
يوسف ينام و يستغطى
محمود / ربنا يهديك يا ابني و يزيح عنك
يوسف / و يشفيني بالمره ما انا خلاص بقيت مجنون
محمود / و يزيح عنك الهم اللى انت شايله
محمود يسيب الاوضه و يطلع بره
………………….
فى شقه وسام
وسام / انا مش فاهمه حضرتك عاوزه تقولى ايه بالظبط
اسراء / بقولك ما حدش هيقدر يخرج يوسف من اللى هو فيه غيرك
وسام / غيري !! و دا باماره ايه ان شاء الله
اسراء / باماره انك خطيبته
وسام / كنت و دا كان زمان اوى يعني هو حضرتك لسه فاكره
اسراء / يا وسام انا عارفه انك بتحبيه اقفى جنبه و ساعديه
وسام / والله يا طنط كان على عيني بس اللى شوفته من ابنك ما كانش شويه و الحمد لله انها جت على قد كدا
اسراء / دى اخرتها يا وسام
وسام / اخرتها ايه و اولها ايه البيه كان بيتلكك عشان يفسخ بقاله شهور و سابني و جرى ورا هند و روحتله اقف جنبه حتى و هو فى القسم قابلنى اسوء مقابله و دلوقت لما هند اتجوزت جايين تفتكروا وسام ليه ان شاء الله
اسراء / مش بمزاجه والله اللى حصل ده ما كان بمزاجه … احلفلك بايه عشان تصدقي انها سحراله منك لله يا شيريهان انت و بنتك
وسام / انا مالى بكل ده ما تودوه لشيخ و لا تشوفولكوا فيه صرفه انما انا خلاص كدا دورى خلص فى حياته
اسراء / يعني دا اخر كلام عندك
وسام / حضرتك شايفه ان فى لسه كلام ممكن يتقال يعني
اسراء / على العموم انا عملت اخر محاوله للصلح و ما دام مصره بقي يبقي من الاولى ترديلنا شبكتنا و لا ايه
وسام / ايه يا طنط … شبكه ايه اللى حضرتك بتتكلمى عنها دا ابنك اللى سايب و حتى لو … ابنك فى القسم متفق معايا انى هاخدها
اسراء / بس دى مش من حقك
وسام / دا اقل تعويض عن الضرر النفسي اللى ابنك سببهولى
اسراء / يا سلام
وسام / بصي يا طنط انا والله كان نفسي اقعد مع حضرتك اكتر من كدا بس انا ورايا قطر و انا لسه ما لبستش اصل احنا عقبال عندكوا طالعين مصيف ما تيجو معانا تغيرو جو
اسراء / هى بقت كدا يا وسام … و ماله يا حبيبتي و ماله
اسراء تقوم و تسيب المكان و تمشي
وسام / قال شبكه قال على ما افتكرتوا جايين تتكلموا
…………………..
فى اوضه هند
هند نايمه باب الاوضه يتفتح و مختار يدخل شايل صينيه عليها اكل متغطى يحطها على الترابيزه و يرجع بسرعه يقفل باب الاوضه بالمفتاح و يقلع العبايه و يعلقها هند تفتح
هند / انت رايح فين
مختار / مش رايح .. راجع .. انا لسه راجع من الصلاه
مختار يلزق فى هند و ياخدها فى حضنه
هند / السرير واسع هناك
مختار / و اسيب القشطه دى كلها لمين
هند تبتسم و تفتح بالعافيه
مختار / بيسلموا عليكي تحت كلهم و بعتولك معايا اكله سخنه قومى بقي كدا اغسلي وشك و اتشطفي و تعالى افتحى نفسي لحسن انا واقع و ريحه الحمام مجننانى
هند تتعدل و تقعد و تتمطع مختار نايم على ضهره و عينه عليها تبصله تلاقي جنبه على الكومدينو كبايه عصير مسنود عليها ورقه تمد ايدها تجيبها مختار يحضنها فوقيه
هند / ايه ده اوعى
مختار / ما اتعودتش ارفص النعمه
هند / فيها ايه الورقه دى
مختار / اقريها
هند / طب سيبنى عشان اقراها
مختار / مش عارف الجاذبيه عاليه اوى هنا انما ايه الحلاوه دى هو انتى فى العادى بتبقي حلوه كدا و انتى صاحيه من النوم
هند تبتسم بخجل
هند / هنفضل على الوضع ده كتير
مختار يلف يخليها هى تحت و هو فوق
مختار / انا دايس فى اى وضع انتى بس شاورى
هند / يؤسفني ابوظ اللحظه دى بس انا مش قادره عاوزه ادخل الحمام
مختار يوسع هند تقوم و تلبس روب شيفون فوق القميص
مختار / و ماله دا حتى السخان مليان ميه سخنه
هند / هههههههههههههههههه دا انت مشكله
هند تدخل الحمام مختار يقوم و هو بيفرك ايديه يشيل الغطا من على الاكل و يروح يفتح التلاجه يطلع علبه عصير و يجيب كاسه تانيه و يصب فيها و يرتب الصينيه يبقي شكلها حلو و يروح يفتح الدولاب و يقلب فى قمصان النوم و يطلع واحد احمر
مختار / تعلالى يا غالى
………………….
فى سرايا الجارحى
عباده قاعد على ديسك تحت شجره كبيره و قدامه ترابيزه عليها عصير و فاكهه خديجه تدخل
خديجه / السلام عليكم
عباده يقوم يقف
عباده / و عليكم السلام اهلا و سهلا اتفضلي
خديجه / انا بعتزر لو كنت اتاخرت عليك
عباده / و لا يهمك انا اللى جيت بدرى و انتى اكيد تعبانه من السهر و الفرح امبارح و كدا
خديجه / اخبار العرسان ايه
عباده / كويسين الحمد لله مختار صلى معانا الجمعه
خديجه / بجد !! طب كويس الحمد لله
عباده / الحج شاهين قالى انك عاوزه تتكلمى معايا
خديجه / ياريت ده ما يكونش اداك فكره وحشه عنى
عباده / استغفر الله دا انتى ست البنات دا حقك
خديجه / شكرا .. بصراحه انت راجل ما يتعيبش
عباده / يكرم اصلك
خديجه / بس انا ما اعرفكش .. و لا انت تعرفنى
عباده / امال هم عملوا الخطوبه ليه … نتعرف .. اسالي و انا اجاوب لحد ما قلبك يطمن .. و عشان قلبك يطمن اكتر .. اى كان قرارك انا هحترمه و ما تقلقيش مش هياثر على العلاقه بينا و بين الجوارحه
خديجه / انت هتتجوزنى عشان العلاقه دى
عباده / بصي يا بنت الناس ان كان الجوارحه عيله كبيره فالزنايته اكبر و اكتر و احنا علاقتنا بيكوا مش محتاجه نسب يقويها و لا احنا لينا فى المصالح انا جايلك عشانك انتى و زى ما قولتى عنى انى ما اتعيبش فا انتى كمان جوهره تشرف العيله اللى هتاخدها
خديجه / انت عاوز تبقي الكبير ؟
عباده / بعد عمر طويل ان شاء الله
خديجه / هو صحيح مختار هيسيب تجاره السلاح
عباده / سابها خلاص
خديجه / و ان رجع
عباده / مش هيرجع و ان رجع مش هيبقي زى الاول ما فيش حاجه بترجع زى الاول … الحق يتقال كنت متوقع تسالى فى اى حاجه غير دى
خديجه / لو طلبت منك تسيب تجاره السلاح هتختارنى و لا تختار التجاره
عباده يبتسم و يبص الناحيه التانيه
خديجه / لو مش عاوز تجاوب
عباده / هختار التجاره
خديجه / هههههههههههههه
عباده / يمكن رأيي يتغير بعدين لو اتعلقت بيكي اكتر
خديجه / مش عاوز تسالني فى حاجه
عباده / تفتكرى حوار التعليم ده هيعمل فرق بينا ؟
خديجه / انا عاوزه اشتغل لما اتخرج هيجيلى تكليف و هشتغل هتسيبني اشتغل ؟
عباده / ما دام مش هتاثرى على بيتك همنعك ليه ؟
خديجه / و لو فكرت اكمل دراستى
عباده / العلم نور حد يكره
خديجه / مش هتدايق لو فى يوم بقيت دكتوره فى الجامعه ؟
عباده / ما انتى دكتوره من دلوقت تفرق ايه فى الاجزاخانه و لا الجامعه … ان اتجوزتك دكتوره و لا حتى من غير شهاده خالص اسمك انتى اللى هيضاف لاسمي مش العكس
خديجه / يعني ايه ؟
عباده / يعني انتى اللى هتبقي حرم عباده الزيني مش انا اللى هبقي جوز الست الدكتوره
خديجه تبتسم و تبص الناحيه التانيه و ترجع تبصله
خديجه / زى ما قولت اول كلامى انت ما تتعيبش بس زى ما انت عباده الزيني انا كمان خديجه الجارحى
عباده / ما ينفعش ديكين فى نفس العشه يا بنت الناس هيقضوها طول الليل مناقره
خديجه / و انا ما اتعودتش اعيش فى ضل حد
عباده يبص الناحيه التانيه و يبتسم
خديجه / ربنا ادانى عقل و راي هتسمعنى و تاخد بشورتى و لا هتعتبرنى ناقصه عقل و دين
عباده / هشورك و اخد برايك بس فى الاخر كلمتى من راسي
خديجه/ ماشي … انا كدا خلصت كلامى
عباده / اعتبر دى فرصتي انى اسال
خديجه / اسال
عباده / ها هتتجوزيني ؟
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
