رواية البر التاني الفصل الثامن والعشرون 28 بقلم لولو محمد
رواية البر التاني الجزء الثامن والعشرون
رواية البر التاني البارت الثامن والعشرون
رواية البر التاني الحلقة الثامنة والعشرون
خديجه / مش هتدايق لو فى يوم بقيت دكتوره فى الجامعه ؟
عباده / ما انتى دكتوره من دلوقت تفرق ايه فى الاجزاخانه و لا الجامعه … ان اتجوزتك دكتوره و لا حتى من غير شهاده خالص اسمك انتى اللى هيضاف لاسمي مش العكس
خديجه / يعني ايه ؟
عباده / يعني انتى اللى هتبقي حرم عباده الزيني مش انا اللى هبقي جوز الست الدكتوره
خديجه تبتسم و تبص الناحيه التانيه و ترجع تبصله
خديجه / زى ما قولت اول كلامى انت ما تتعيبش بس زى ما انت عباده الزيني انا كمان خديجه الجارحى
عباده / ما ينفعش ديكين فى نفس العشه يا بنت الناس هيقضوها طول الليل مناقره
خديجه / و انا ما اتعودتش اعيش فى ضل حد
عباده يبص الناحيه التانيه و يبتسم
خديجه / ربنا ادانى عقل و راي هتسمعنى و تاخد بشورتى و لا هتعتبرنى ناقصه عقل و دين
عباده / هشورك و اخد برايك بس فى الاخر كلمتى من راسي
خديجه/ ماشي … انا كدا خلصت كلامى
عباده / اعتبر دى فرصتي انى اسال
خديجه / اسال
عباده / ها هتتجوزيني ؟
خديجه تبتسم و تقوم تقف عباده يقف
خديجه / ربنا يقدم اللى فيه الخير … عن اذنك
خديجه تسيب عباده عينه عليها و هى بتمشي ناحيه السرايا
عباده / لو بصت تبقي وافقت
خديجه تبص عباده يبتسم و يمشي
………………….
فى المطبخ
انتصار و شيري بيرتبوا صينيه اكل
شيري / هم لحقوا يخلصوا صينيه الغدى دا تلاقي المواعين فوق بالكوم
انتصار / جرا ايه يا شيري مش عرسان ياكلوا و يتغذوا
شيري / ما قولتش حاجه الف هنا انا اقصد قبل ما نطلع دى نشوف جعانين و لا لا بدل ما نطلع دى و تتركن فوق تبرد و لا تحمض
انتصار / معاكى حق ما انا مش عاوزه اخبط عليهم كتير و ازعجهم
شيري / انا هكلم هند فى التليفون هرن نص رنه و اقفل فتحت او اتصلت بيا تمام ما كلمتنيش ابقي ارن تانى كمان ساعه ايه رايك
انتصار / فكره حلوه رنى
شيري تطلع موبايل و تتصل و ثانيتين و تقفل و تبص لانتصار
شيري / قفلت بسرعه ؟
التليفون يرن فى ايدها تتخض
شيري / بيرن بيرن
انتصار / هو هينفجر !! ما تردى
شيري / ايوه صح … الو … صباح الخير
مختار / صباح الخير يا امى ازيك
شيري / الحمد لله يا حبيبي هند صحيت و لا لسه
مختار / فى الحمام يا امى بتعدل الطرحه قدام المرايه
شيري / بتعدل الطرحه !!
مختار / اه احنا نازلين انا لسه قافل مع ناصر اخويا و قايله هننزل نتعشي معاكوا و نقعد معاكوا شويه
شيري / بجد و الله … هينزلوا ياكلوا معانا هينزلوا دلوقت
انتصار / بجد … بت يا فاتن اجرى يا بت رصي الاكل ده على السفره هند و مختار نازلين
فاتن تشيل الصينيه و تجرى على بره
شيري / ماشي يا حبيبي مستنياكوا … يلا سلام
شيري تقفل
شيري / نازلين نازلين
انتصار / انا هطلع اجيب حاجه من اوضتى بسرعه و انزل معلش هتقل عليكي تكملى باقي الحاجه
شيري / مفيش مشكله مفيش مشكله
انتصار تطلع تجرى
……………..
فى اوضه مختار
مختار واقف عند باب الاوضه بيلبس الجزمه
مختار / خلاص يا هند و لا لسه
هند تطلع من الحمام لابسه عبايه استقبال مطرزه بيضه فخمه جدا و طرحه بيضه
هند / شكلى ايه
مختار / و الله انا بقول ننام خفيف بلا عشا بلا بتنجان و خير البر عاجله انا لسه هستني اما نطلع من تحت
مختار يروح يحضن هند تزقه بالراحه
هند / مختار بس بقي
مختار / يتمنعن و هن الراغبات
هند تبرق مختار يلعب حواجبه تضحك
هند / هو الجواز بيغير اوى كدا انت ايه اللى جرالك
مختار / الجواز بيحلى الجواز بيشيل كل الحواجز و كلو بيبقي حلال و اعطنى حريتي اطلق يدي دا انا هموت على البت ديه
هند / هههههههههههههههههه بس بقي .. لا بجد حلوه العبايه دى و لا اغيرها
مختار / تغيرى ايه انتى كدا فله ننزل نسلم و نحضن و نبوس عشر دقايق على الاستوب واتش و نطلع علاطول عشر دقايق و سنتين مش مسؤل عن اللى هيحصل
هند / ههههههههههههه و جاى على نفسك ليه
مختار / مبذر هعمل ايه يلا بقي الوقت بيعدى
هند / اتفضل
مختار يفتح الباب بالمفتاح و يطلع يفضل ماسك الباب و هند تطلع يقفل الباب بالمفتاح
مختار / جنتل مان و ماسكلك الباب اهو
هند / ههههههههههههههههههه
………………………
فى الهول تحت
العيله كلها متجمعه عبد الله و الرجاله يدخلوا
عبد الله / جيت اهو هى فين بقي
شيري / نازلين نازلين
مختار و هند ينزلوا على السلم و هند وشها احمر و مكسوفه الستات تزرغط انتصار تنزل وراهم بتجرى و فى ايدها علبه قطيفه زرقه تزرغط و هى نازله
عباده / طب اضرب عيارين و ابوظ السقف و لا اعمل ايه
مختار يسلم على الرجاله و يحضنوا و يبوسوا و هند الستات تهريها بوس و احضان كل واحده بالعشرين بوسه قبل ما التانيه تشدها و الستات تزرغط
مختار / مريم
مريم تروح لمختار يديها المفتاح و هو بيوشوشها
مختار / فى الاوضه فوق على الترابيزه الصينيه عليها حاجات اطلعى لوحدك و اقفلى الباب وراكى
مريم تهز راسها و تطلع تجرى
انتصار / لولولولولولولولولولى بت يا فاتن اجرى هاتى المبخره يا بت رقيتك من كل من شافك و لا صلاش على النبي بدر منور
الكل / عليه افضل الصلاه و السلام
انتصار تفتح العلبه و تطلع سلسله دهب عريضه و فى اخرها مصحف تلبسها لهند
انتصار / الف مليون مبروك يا ست العرايس عقبال عوضك
هند تبتسم
هند / دى كتير اوى
ناصر يطلع رزم من جيبه و يديها لمختار
ناصر / نقطتك يا عريس
مختار يوطى على ايد اخوه يبوسها الكل يطلع فلوس و يديها لمختار و عبد الله واقف بيتابع و فى جنب هند تحضن شيري جامد
شيري / الف مبروك يا حبه عيني
شيري تعيط
هند / ليه كدا بقي ينفع يعني
ناصر / طبعا انت يا عريس الود ودك تاخد عروستك و تطلع تانى
مختار / لا ازاى بس دا انتوا واحشينا خالص
ناصر / طب قول كلام تانى اصدقك
الكل يضحك و مختار يبص فى الارض
ناصر / العشا يا ام فاتن
انتصار / محطوط يا اخويا محطوط
الكل يدخل هند تشوف عبد الله تروح تحضنه
عبد الله / انتى حلوه اوى احلى عروسه فى الدنيا
هند تدمع عبد الله يمسحهالها و عنيه كلها دموع
عبد الله / لا لا لا العنين الحلوه دى تضحك بس
هند / تعال نتعشي
فاتن تدى لمختار كيس يحط فيها الفلوس اللى لمها و تاخدها تعينها فى جنب مختار يروح يحضن عبد الله جامد
مختار / انت ما جتش تسلم عليا ليه ما لحقتش اوحشك من الصبح امال انت وحشتني ليه هاه
عبد الله / بكره هنزل الشغل مع عباده اول مرتب هقبضه هتبقي نقطتكوا
مختار / ما تشفعش النقطه دى بص يا ابن الناس انا نقطتى كرنيه الطب و زى ما اتفقنا ليك منى ساعتها اللى تطلبه
عبد الله / ادعولى
هند / باذن الله خير
شيري تدخل
شيري / الاكل يا جماعه
مختار يبوس ايد شيري تبتسم
مختار / مسلمتش عليكي فى الزحمه معلش
شيري / ربنا يباركلى فيك يا ابني و يهديكوا لبعض و يسعدكوا
مختار و هند يبتسموا و الكل يدخل يقعدوا و انتصار بتغرف و تحط فى طبق هند و حمام كتير قدام مختار و فى اطباق كتير على السفره مليانه حمام
عباده / ما كفايا يا ام فاتن فى ناس تانين معاكوا على السفره
مختار / اتجدعن و انت تدلع زيي
عباده / عشلك يومين عشان انا مش ناوى اطول
مختار يسقف
مختار / ايوه بقي و هنتقم دا انا معبي
عباده / ههههههههههههههههههه حقك بصراحه رخمت عليك كتير
امين / ما تجيب يا خالى الحمامه دى عشان عيني فيها
سليمان / ما تاكل من اللى قدامك يا تحش انت
امين / لا انا عينى فى الحمامايه دى عمتى بتنقيله الحاجات الحلوه
انتصار تشيلها من طبق مختار تحدفهاله و تحط لمختار اتنين تانين
انتصار / لحسن تزور يا ابني
عباده / هموت و ارخم يا جدعان يرضيكوا اموت
الكل يضحك
فاطمه / انتى ما بتاكليش ليه يا هند
هند / باكل اهو
فاطمه / و هو دا اكل انتى عروسه و محتاجه تتغذى و لا تكونيش خايفه تطخنى
انتصار/ تطخن و تربرب ما تقول حاجه يا مختار
مختار / اصل احنا برده اكيد ما لحقناش نجوع يعني انتوا بسم الله ما شاء الله متوصيين بينا جامد
شاكر / مش عرسان امال ايه
هند / والله يا عموا انا مليت كل علب التلاجه اللى فوق اكل دا التلاجه فيها اكل يكفينا اسبوع
فاتن / و تعيني و تبقي ليه ما تاكلوا صابح سخن و يفتح النفس نزلى العلب دى و كلوا صابح بصابح
فاطمه / و اى حاجه ناقصه برنه تليفون تطلع لحد عندكوا فى ثوانى يعني مش حوار
مختار / صحيح الاوضه عندنا ناقصها شويه حاجات
ناصر / حاجات ايه دى
مختار / تليفزيون و كاتل و سبرتايه ذ
عباده / بكره بالكتير تكون عندك ابعتلى اللى ناقص كله فى رساله عشان ما انساش حاجه و انا هتصرف
مختار / تسلم
فاطمه / هو انتوا مش هتنزلوا تانى و لا ايه
شاكر / ما فيهاش حاجه ما احنا عندنا تليفزيون فى اوضتنا
فاطمه / بس ما عندناش مطبخ فى الاوضه
هند / اصل مختار بيحب يشرب شاى و قهوه كتير
فاطمه / اه طبعا و انتى مش هتفضلى طالعه نازله هاتلها بوتجاز من ابو عين واحده اللى بيشتغل بالكهربا يا عباده بلاش السبرتايه مش هتعرف تتعامل معاها و لا نجيهولك بعنتين
هند / لا عين واحده كويس
انتصار / و اى حاجه نقصاكوا قولى علاطول
هند تبتسم
عبد الله / هو انتوا هتسافروا امتى
فاطمه / انتوا هتسافروا ؟
مختار / لسه مقررناش بس لما نحدد هنقولكوا
فاطمه / بلاش الجونه حر اوى و العروسه مش هتستحمل و تفرفر منك اسكندريه جوها حلو اوى الفتره دى
مريم / ما تروحوا تركيا بيقولوا جوها تحفه
فاطمه / تركيا ايه لا طبعا … دى بره مصر و اكيد محتاجه تاشيره و اجراءات و دول عرسان مش هيضيعوا وقتهم فى اللف على الورق مره تانيه ان شاء الله الجايات اكتر
مختار / انا ليا واحد صاحبى فى مصر عنده شركه سياحه هخليه يظبطلنا برنامج كويس
مريم / بقولك يا عمى هو اللاب بتاعك شغال
مختار / اه عوزاه فى حاجه
مريم / لا بس ممكن تاخد السماعات بتاعتى توصلها علي اللاب بدل التليفزيون لحد ما يجيبولكوا واحد
فاطمه / و هى يعني خلاص قفلت على الليله من الصبح و لا هم يعني متجوزين عشان يتفرجوا على التليفزيون
مختار / انا شبعت
مختار يبص لهند
هند / و انا كمان
مختار / تمام كملوا انتوا و احنا هنستاذن بقي
ناصر / طلعيلهم باقي منابهم اوضتهم يا انتصار
مختار / ملوش لزوم و الله شبعنا
انتصار / خليه يمكن تجوعوا فى السهره اطلعوا و خمس دقايق و هنحصلكوا و اهو اخد العلب اللى فى التلاجه حرام ركنتها
هند / تمام هجهزهالك
هند و مختار يمشوا و الكل بيبص على فاطمه و بيبصوا لبعض و ياكلوا
………………..
فى اوضه مختار
هند لابسه قميص نوم روز طويل بروب و بتعلق العبايه على شماعه
هند / بس فاطمه مرات عمك دى يا صعبه اوى يا هبله اوى لسه ما حددتش
مختار / اختصر عليكي الوقت و المجهود و اقولك صعبه اوى لانها ابعد ما تكون عن الهبل و اقولك الكبيره سماح نسخه منها
باب الاوضه يخبط مختار يبص لهند تجرى على الحمام و تقفل الباب مختار يفتح الباب يلاقي انتصار شايله صينيه يشيلها منها بسرعه و يدخل مريم تدخل شايله سماعاتها تحطها فى الارض و تدى لمختار فلاشه و انتصار تروح تاخد علب التلاجه من التلاجه
مختار / دا انتى ما كنتيش بتهزرى بقي
مريم / الفلاشه دى عليها شويه افلام عربى على اجنبي عنب و لسته الاغانى بتاعتى
مختار / ماشي يا ستى تتردلك فى فرحك
انتصار / لو عاوزين حاجه قول
مختار / لا كلو تمام تسلمى
انتصار تبتسم و تمشي هى و مريم مختار يقفل الباب بالمفتاح هند تفتح باب الحمام بالراحه و تطلع
هند / ايه ده جابت السماعات بجد
مختار / اصل البت مريم دى بت محترمه و بتحبني
هند / مش لوحدها على فكره
مختار / قولى و الله
هند / و الله
مختار / اثبتى
هند / والله !!
مختار يفتح اللاب و يوصله بالسماعات و يشغل الاغانى و يعلى الصوت
هند / ما شافوهمش و هم بيسرقوا هيسمعوهم و هم بيرقصوا و لا ايه وطى
مختار يشغل اغنيه سلو و يقوم و يشد هند فى حضنه و هى مستغربه و مبتسمه
هند / الاسلو مش لايق خالص مع الجلابيه
مختار / اقلعها ؟
هند / حاسه بنبره خبث فى سؤالك
مختار يلف هند و يشدها فى حضنه تانى
هند / انت مين
مختار / جوزك
هند / ما كنتش اعرف ان الصعايده بيحبوا يرقصوا
مختار / ليه دا احنا ولعناها فى الفرح و بعدين هو انا متحزم و برقص دا انا بدلع مع مراتى حلالى اصل انا بحب ادلع اوى
هند / ههههههههههههههههههه
مختار يلف هند تانى و يرجعها فى حضنه
هند / هاخد على الدلع ده
مختار / طول ما بابنا مقفول علينا مش هنبطل دلع
هند / يارب المفتاح يضيع
مختار / ههههههههههههههههههه
………………….
على قهوه
حامد قاعد مع يوسف
حامد / مهو لو كانت حبستك فى اوضتك هتغير حاجه من اللى حصل انا ما كنتش اتكلمت لكن فوق لنفسك و بص حواليك يا ابنى الدنيا لا بتقف لحد و لا بتقف على حد
يوسف يبص لحامد
حامد / ابوك عاوز ياخدك لدكتور نفسانى
يوسف / ابويا مش حاسس بيا
حامد / ابوك محتاجك جنبه خصوصا ان علاقتك باجواز اخواتك البنات مش حلوه
يوسف يبص الناحيه التانيه
حامد / مهو مش بعد دا كله فلوس عيله الجمل تروح للغرب
يوسف يبص لحامد
حامد / ابوك مش هيعيشلك العمر كله يحوش عنك و الناس بقت زى الديابه بتشوف الفلوس تتسعر و ابوك باع كل حاجه عشان يجدد المحل و وقت الجد مش هيقولوا دا جدده بفلوس شقه و عربيه يوسف هيقولوا لينا حق فيها
يوسف / دا باماره ايه يعني
حامد / تقول لمين هو يعني اخواتك البنات ما عاهمش دهب يسندوا بيه ابوك فى ازمته تعرف ان امل باعت دهبها و ادته لممدوح يعمل بيه مشروع بعد ما اترفد مش كان اولى ادته لابوها على الاقل مشروع ابوها مضمون و لينا اسم و خبره فيه مش مجزفه مش مضمونه زى بتاعه جوزها
يوسف / هو اللى شاريهولها
حامد / امال مضته على وصل امانه ليه و لا الاولى انت زعلان ان ابوك باع الشقه ليه ما هو اللى جبهالك
يوسف / ما عدش فى حاجه فارقه معايا
حامد / ازاى بس دا لازم يفرق معاك لازم تفكر فى نفسك و فى مستقبلك لو مش عشانك عشان اخواتك البنات
يوسف يبصله
حامد / قولتلك ابوك مش هيعيشلكوا العمر كله و لو فى يوم جراله حاجه على الوضع ده اجواز اخواتك هينهشوك و بعد كدا هيضيروا على بعض و يا عالم مين فيهم هيطلع ابن اصول و مين الفلوس هتغيره
يوسف / شرع ربنا ما عليهوش خلاف
حامد / و الدكتور النفسي اللى ابوك هيوديهولك انت عارف انهم ممكن يحجروا عليك و ياكلوا حقك
يوسف / انت بتقول ايه اخواتى ما يعملوش كدا
حامد / اخواتك لو كان عندهم دم كانوا قالوا لابوك يكتبلك نصيب فى المحلات بفلوسك انما هم قبلوها على نفسهم هم كل واحده تتجهز من الالف للياء و انت تطلع من المولد بلا حمص لا شقه و لا حتى حته عربيه و مع ان للذكر مثل حظ الانثيين ممكن يتفقوا عليك و يتكاتروا و المركب اللى ليها ريسين بتغرق
يوسف / انت بتقولى الكلام ده ليه هعملهم ايه يعني
حامد / يا ابني انا مش بوقع بينك و بينهم انا بفوقك لحقك و اوعيك لمصلحتك اخواتك انت سندهم فى الدنيا دى لو يوم واحده فيهم جوزها غدر بيها لازم تبقي قوى و ضامن حقك عشان تعرف تحميهم و تحمى نفسك
يوسف / احمى نفسي !!! يا عمى انا
حامد / انت محتاج تروح لدكتور نفسانى عشان تعدى اللى حصل فى الفرح بس انا خايف من بكره يا ابني لازم تعتمد على نفسك و تعدى المرحله دى و ترجع ثقتك فى نفسك تانى
يوسف / ازاى
حامد / اكتر حاجه هترجعلك ثقتك فى نفسك هى انك ترجع حقك تخلى ابوك يكتبلك نصيبك فلوس التوضيب دى حقك و لازم يرجعلك
يوسف / انا و بابا الفتره دى
حامد / ابوك ما عندوش اهم منك ما فيش حاجه فى الدنيا هتغير ده انت سنده فى الدنيا الا بقي
يوسف / الا بقي ايه
حامد / لا خلاص
يوسف / لا يا عمى و الله لا انت قايل
حامد / الا اذا لقي حد غيرك يثق فيه اكتر و يعتمد عليه بس برده ما حدش بياخد مكان الابن يعني و لا ايه
يوسف يبص لعمه و يبص فى الارض
حامد / اشرب الشاى و روق و ليك عليا اتكلم مع محمود بنفسي فى موضوعك و اهو اشيل عنك الحرج
يوسف / لا يا عمى انا اللى هتكلم معاه
حامد / اجى معاك اسندك
يوسف / انا مش محتاج حد يسندنى شكرا
حامد / اللى تشوفه على العموم انا لازم امشي لو عوزتنى فى حاجه كلمنى
يوسف / تمام ماشي
حامد يقوم يطلع فلوس من جيبه
حامد / مفيش فكه … معاك فكه
يوسف / اه معايا
حامد / طب تفكلى احاسب على الشاى قبل ما امشي
يوسف / مفيش مشكله يا عمى انا هحاسب على كلو قبل ما امشي
حامد / معاك فلوس لو مش معاك قول
يوسف / معايا ما تقلقش
حامد يبتسم و يحط الفلوس فى جيبه و يمشي
…………………….
فى السرايا
عباده و ناصر و شاكر قاعدين فى المكتب
عباده / مش من اولها يا كبير
ناصر / هو قدها
عباده / مش عاوزينه يضايق دا برده ضيف
ناصر / عبد الله مش ضيف عبد الله واحد مننا و يقدر يعمل فوق اللى انت متخيله عشرين مره هو بس محتاج فرصه اديهاله خليه يثبت لروحه انه راجل و كبير هو ده اللى هو محتاجه عشان يعدي اللى حصله
عباده / و مختار رايه ايه فى الكلام ده
ناصر / على حد علمى انا الكبير و مفيش كلمه بعد كلمتى مش فاكر الوضع ده اتغير امتى
عباده / ما تاخذنيش يا كبير ما قصدش انا بس خايف ياخد على خاطره
ناصر / ما تخافش
عباده / حاضر
ناصر / شوف حد تبعنا و ياريت تكون واحده ست تاجر شقه هند اللى فى مصر بس ايجار صورى يعني
عباده / سهله دى محلوله ان شاء الله
شاكر / بخصوص نومه عبد الله فى المضيفه
ناصر / هو مرتاح هناك و بعدين الشباب مش سايبينه يعني جوه السرايا حركته هتبقي متقيده و على العموم يا عباده ابقي اتكلم معاه فى الموضوع و اعرض عليه
عباده / تمام يا كبير
ناصر / اخباره ايه صحيح فى ضرب النار
عباده / عاوز يتمرن كان الحرب هتقوم بكره الصبح لو عليه مش هيسيب منطقه الرمايه لا ليل و لا نهار بس الشهاده لله جايب نتيجه عاليه و بسرعه و اتفق مع امين كمان ينزل مع الكابتن عاكف عشان يتعلم يدافع عن نفسه
ناصر يفكر
شاكر / الحكايه دى هتزعل هند ما تقولش انى ما قولتش
ناصر / لا دى محلوله ان شاء الله عباده بس يشد عليه فى الشغل و هو هينساها من التعب
عباده / بخصوص الماهيه يا كبير بفكر اعرض عليه على الاقل نص شهر مقدم
ناصر / لا ما تجيش منك خلي مجدى يتكلم معاه
عباده / تمام يا كبير
……………………..
فى اوضه هند
هند قاعده قدام المرايه بتسرح شعرها و مختار نايم هند تحط برفيوم باب الاوضه يخبط هند تبص على مختار و تروح تلبس روب و طرحه و تروح تفتح الباب متوارب تلاقي سماح
سماح / ازيك
هند / الحمد لله ازيك انتى
سماح / امى بعتانى اقولك تجهزى على المغربيه عشان الناس هيجوا يباركولك
هند / تمام
سماح / اجبلكوا حاجه
هند / لا شكرا ما تتعبيش نفسك
سماح / تمام عن اذنك
هند تقفل الباب بالمفتاح مختار يصحى
مختار / مين
هند / سماح بتقول فى ناس هيجوا يزورونا المغربيه كدا
مختار / يانسوا و ينوروا
مختار يقوم يقعد و يتمطع
مختار / مش واخد انا على عيشه الاكل و المرعى و قله الصنعه دى
هند تروح تقعد جنبه و تبصله و هى مبتسمه
مختار / هى حلوه … حلوه اوى كمان … بس مش انا
هند / مهى مش هتدوم يومين تلاته و تسبني و تنزل تلف طول النهار على الاراضي و ترجعلى اخر الليل مهلوك تاكل و تنام
مختار / مهو ده مش انا برده انا بدى لكل حاجه حقها يعني ما تقلقيش هتاخدى حقك كامل و مكمل و بعدين دا ده الحق الوحيد اللى ما افرطش فيه ابدا
هند تبتسم
مختار / مش عاوز افكرك بحاجه تضايقك بس الفتره اللى بعدتى فيها عنى
الابتسامه تروح من وش هند
مختار / عرفتنى قيمتك جوايا غاليه قد ايه انا كنت بموت فى الثانيه الف مره و ربنا العالم كنت بدارى من الناس و اعيط
هند تقرب من مختار و تحضنه
مختار / اوعى يا بت تتهبلى و تقولى الكلام ده لحد
هند / ما تخافش
مختار / انما ايه الريحه الحلوه دى مين اللى زوقه يهبل اللى نقهالك دا اكيد حد ما حصلش
هند / هههههههههههههههههههه هو من حيث محصلش فهو لا حصل و لا هيحصل
مختار / قولى و الله
هند / والله
مختار / بتحبيه يعني
هند / جدا ربنا يقدرنى و اسعده
مختار / لا من حيث كدا ما تقلقيش انتى بس بصيله بعنيكي الحلوه الكحيله دى و هو هيبقي مبسوط
هند / ابصله بعيني بس يعني مفيش حاجه تانيه كدا و لا كدا اقدر اسعده بيها
مختار يقوم و هو بيتكلم و هند متبعاه يروح يشغل اللاب على السماعات على فيلم و يعلى الصوت
مختار / انتى هنا بقي جيتي للنقطه الصح حطيتي ايدك على مربط الفرس طرف الخيط انا عاوزك بقي تتبتى ايدك جامد كدا و تكرى باقي البكره
هند / انت معلى الصوت كدا ليه وطى شويه
مختار / فى العادى صوتك العالى دليل على ضعف موقف انما فى الحالات اللى زى دى
مختار يطلع جنب هند فى السرير و يشدها فى حضنه
مختار / بيبقي الحيطان من ورق و انا بحب اخد راحتى
هند / وربنا مجرم
مختار / انتى لسه شوفتى اجرام
هند / هههههههههههههههههههه
……………………..
فى الشونه
عبد الله واقف ماسك دفتر و عمال يعد و رجاله عماله تنزل شكاير من على عربيه نقل راجل عجوز بدفتر يدخل راجل تانى يجرى عليه و يحطله كرسي
الراجل / اهلا اهلا يا حج مجدى نورت اهلا و سهلا اهلا و سهلا
عبد الله / الله ينور يا رجاله العدد مظبوط
الراجل / دا الاستاذ عبد الله الجمل سى عباده قال انه هيمسك الشونه من النهرده
مجدى / اهلا و سهلا يا ابني تعال اقعد الكبير كلمنى و ضميت اسمك فى كشوف المهيات
الراجل / عم مجدى ده اللى ماسك الحسابات بتاعه الشونه و الارض و كل حاجه تخص عيله الزنايته معاهم من سنين ربنا يديله الصحه و طوله العمر
عبد الله / اهلا و سهلا
مجدى / انا واخد الشغلانه دى ابا عن جد الله يرحمه الحج عمران الله يرحمه ما كانش بيثق فى حد قد ما كان بيثق فينا
عبد الله / الناس الطيبه بتبان برده
مجدى / عشت و الف مبروك على الله تكون مبسوط معانا
عبد الله / بصراحه كنت متخيل حاجه اصعب من كدا شويه
الراجل / ما تتغرش يا سي عباده فى ايام بتبقي الشونه دى لحم فوق بعض اشى داخل و اشي خارج
عبد الله / و ماله ربنا يوسع رزق الجميع … تشرب ايه الاول يا حج
مجدى / و لا اى حاجه يا ابنى اصل انا مش هينفع اطول فهخش فى الموضوع على طول
عبد الله / اتفضل يا حج
مجدى / اى حد بيشتغل معانا جديد بنصرفله نص شهر مقدم
عبد الله / لا لا لا يا حج انا مش هاخد جنيه الا اما اخلص شغل مش يمكن ما اكملش
مجدى / يا ابني ما تقولش كدا تفائلوا بالخير تجدوه
عبد الله / اهو يبقي اخد مهيتي ببركتها احسن معلش انا الحمد لله مش محتاجهم
مجدى / ربنا يوسع عليك يا ابني و يزيدك بس دا حقك انت لسه شاب صغير و ليك مصاريفك برده
عبد الله / معلش يا حج انا هبقي مرتاح اكتر لما اخد مرتبي اخر الشهر على قد تعبى الفلوس هيبقي ليها طعم
مجدى / اللى تشوفه يا ابني على العموم لو احتاجت اى حاجه اسال بس على الحج مجدى فقوس و مليون من يدلك
عبد الله يبتسم عربيه تركن محمله شكاير و السواق ينزل
السواق / السلام عليكم حاجه الحج شعبان الفيومى
الراجل / اخيرا فينك يا عم … حملوا البضاعه دى يا رجاله … سجل الحاجات دى يا استاذ عبد الله
عبد الله / تمام حاضر
عبد الله يقوم يمسك الدفتر و الرجاله تحمل و هو يعد
………………….
فى اوضه سماح
سماح بتتكلم فى التليفون
سماح / طب و المفروض اعمل ايه
عصام / انا اعمل ايه انا حتى حضرت الفرح و الحنه و ما شوفتكيش
سماح / و هو انت يعني غريب عن البلد و لا واخد ان بنات الزيني بيترقصوا فى الافراح وسط الرجاله
عصام / ما اقصدش بس من ساعه ما الامتحانات خلصت و انا ما شوفتكيش انا ما بقيتش بقدر على بعدك يا سماح
سماح / و انا بايدى ايه اعمله اصلا انا مش المفروض اتكلم معاك فى الحاجات دى انت عارف لو حد من عندنا شم خبر انى بكلمك هيجرالى و لا هيجرالك ايه
عصام / ما عدش بيفرق معايا يعملوا اللى يعملوه
سماح / انا ما كنتش متخيله ان الدنيا هتوسع مننا كدا انت كدا بتعملى مشاكل
عصام / سماح انا بحبك
سماح / انت بتقول ايه اللى بتقوله ده ما ينفعش انت فاكرنى ايه
عصام / لا يا سماح ما تفهمينيش غلط انا بحبك و عاوزك فى الحلال انا عاوز اتجوزك
سماح / برده الكلام فى الحاجات دى ما يبقاش معايا انا يوم ما كلمتك كلمتك على انك استاذى و كلامنا كان مسائل و انك تساعدنى اهلى لما دخلوك البيت كان عشان انت استاذ محترم و واثقين فيك
عصام / انا النهرده هقابل ابوكى و اطلبك منه
سماح / و ان رفض
عصام / و يرفض ليه انا عندى شقه و بشتغل فى الحكومه غير الدروس اللى بديها انا بقبض كويس ليه يرفضنى
سماح / انت بتتكلم كانى بنت اى حد انا سماح الزيني بنت شاكر الزيني
عصام / برده هكلمه و اللى يحصل يحصل
سماح / انا هقفل و مش هرد عليك تانى
سماح تقفل
سماح / و اخرتها يا سماح هو ده مقامك يعني و لا انتى ناويه على ايه
………………….
فى المضيفه
عبد الله يدخل و يقفل الباب و يرمى نفسه على السرير بهدومه ثوانى و يقوم يفتح الدولاب و يطلع غيار و يدخل الحمام و يعلق الهدوم على الشماعه الباب يخبط يروح يفتح يلاقي شيري يبتسم
شيري / اخبار اول يوم شغل ايه
عبد الله / ضهرى واجعنى جدا مع انى لا شيلت و لا حطيت
شيري / هو الشغل كدا يا ابني
عبد الله / عرضوا عليا نص شهر بس انا رفضت بصراحه انا وشي بقي فى الارض اللى بيحصل ده ما ينفعش
شيري / هنعمل ايه يعني قولتلك ننزل مصر و نفتح المحل
عبد الله / انا محوش مبلغ فى الدولاب اهو يسند
شيري / و انا كمان و عاينه حتيتين دهب بس كل ده فى مصر
عبد الله / هنزل اجيبهم يوم الجمعه الجايه و اجيب هدومنا و حاجتنا
شيري / هنفضل هنا علاطول يعني
عبد الله / لينا مين هناك احنا هنا جنب هند
شيري / انا هاجى معاك
عبد الله / اقولك سر
شيري / ليك غيرى ؟ قول
عبد الله / انا تعبان اوى يا ماما من امبارح
شيري / سلامتك يا حبيبي مالك
عبد الله / زعلان انى ما نقطتش هند بحاجه شوفتى اهل مختار كانوا بينقطوه بايه دهب و فلوس دا ما كانش عارف يشيلهم و انا حتى الهدمه اللى عليا هم اللى جايبينهالى
شيري تتنهد
عبد الله / اى كان المرتب اللى هقبضه ما انا برده بشتغل عندهم و برده مش هقدر اشتغل فى الدراسه هعمل ايه
شيري / و ان رجعنا مصر هتعمل ايه
عبد الله / انا مش عاوز ارجع مصر انا بقيت بكره مصر انا عاوز اعيش هنا انا بحب هنا
شيري / احنا هنا قليلين اوى اهو فى مصر مداريين
عبد الله / احنا مش قليلين يا ماما
شيري / يا ابني انا ضهرى بيتقطم فى المطبخ كل يوم من يوم ما جينا و مش قادره اتكلم
عبد الله / ليه يا ماما هم
شيري / هم زى الفل و الود ودهم ما حطش ايدي فى حاجه بس انا ما اقدرش اهو بقول بعمل بلقمتى انا و بنتى و انت اهو هتشتغل و تجيب مصروفك
عبد الله / و معاش بابا الله يرحمه و ايراد المحل
شيري / فى مصر كل حاجه فى مصر
عبد الله / هرجع اجيب كل ده يوم الجمعه
شيري / هاجى معاك اساعدك و اقفل الشقه
عبد الله / ماشي و لما نجيب الفلوس ناخد شقه ايجار على قدنا حاجه اوضتين و لا حتى اوضه انام فى الصاله مش مهم
شيري / مش هيرضوا يا ابنى
عبد الله / هكلم مختار بس الاول يبقي معايا فلوس اقدر اتكلم
شيري / تمام … اجبلك لقمه تاكلها
عبد الله / والله ما قادر انا هاخد دوش و انام و لما اصحى ابقي اكل
شيري / ماشي يا حبيبي لو عوزت حاجه رنلى
عبد الله يبتسم شيري تبوسه و تقوم و تقفل الباب وراها و عبد الله يدخل الحمام
………………………
فى السرايا
رجاله عيله الجارحى قاعدين مع الزنايته و بيضحكوا
ناصر / ههههههههههههههههههههه المهم وافقت
مغاورى / ابويا ما سبهاش الا اما نطقتها تقوله اللى تشوفه يقول اسمعها بودانى
شاهين / الله مش اطمن و بعدين هو انا مش عملت كدا مع اخواتها برده ما تجيش واحده تقولى بعدين انت اللى اخترت و لا انكسفت
شاكر / لا الحاجات دى ما فيهاش كسوف دا جواز مش لعب عيال
شاهين / اهو ما قولتش حاجه انا
عباده / طب يعني نقرا الفاتحه و نحدد معاد الدخله و لا ايه
شاهين / شوفوا الواد مستعجل ازاى
شاكر / ما له حق يستعجل العروسه تستاهل ادب و اخلاق دا كفايا اصلها الطيب
شاهين / عشت يا حج شاكر
ناصر / قسما بالله ان كان هو مستعجل قيراط انا مستعجل اربعه و عشرين
مختار يدخل الكل يقوم يسلم عليه و يحضنوه
مختار / انا اسف جدا على التاخير
شاهين / حقك تتاخر زى ما انت عاوز مش عريس
مختار / لا والله مش حكايه عريس بس القهوه اندلقت على عبايه هند
ناصر / و هى كويسه اوعى يكون
مختار / لا لا القهوه كانت بردت باقي فنجانى هى بس وسخت العبايه فاضطرت تغير و ما رضيتش انزل و اسيبها هتنكسف تنزل لوحدها
شاهين / دا فال خير دلق القهوه خير
عباده / كنا لسه بنتكلم فى معاد الفرح
شاهين / ههههههههههههههه جرا ايه يا عباده كنا لسه بنقول قرايه فاتحه خليتها فرح نوبه واحده والله فهمنا انك مستعجل بس مش كدا يا راجل
مختار / و ماله يا حج هو الفرح يستنا
شاهين / على قولك ربنا يجعل كل ايامنا هنا و فرح
شاكر / و بعدين ما فيش اى سبب ناجل عشانه احنا جاهزين و شاريين و اللى تؤمروا بيه
شاهين / ما يؤمرش عليكوا ظالم احنا فى بينا الكلام ده دى بنتكوا
ناصر / و عباده ابنكوا يبقي نقرا الفاتحه
شاهين / و انا ما اقدرش انزلك كلمه نقرا الفاتحه
الكل يقرا الفاتحه
……………………
عند الستات
هند لابسه سلسله رحمه و دهب كتير فى ايديها ست تقوم و تلبسها سلسله تانيه تقيله
انتصار / تعبتى نفسك يا اختى
الست / تعب ايه ما تقوليش كدا دى الغاليه مرات الغالى
ست ٢ / و بعدين مختار طول عمره صاحب واجب و مجامل الكل طب دا الحج شاهين مستني اليوم ده عشان يردله
انتصار / و انتوا بتردوا بالدهب احنا طماعين و عاوزين الاغلى من الدهب عاوزين العروسه
انتصار تبص لخديجه
الست ١ / زمان الرجاله بيتفقوا على الحاجه جوه
فاطمه / مقضيه ان شاء الله
عيل صغير يدخل
العيل / الكبير بيقولكوا اقروا فاتحه الست خديجه على عباده
فاطمه تزرغط و الستات يزرغطوا وراها
هند / الف مبروك يا خديجه
خديجه / الله يبارك فيكي
فاطمه / انا فرحانه اوى ان علاقتكوا ببعض حلوه اصلي بترعب من شغل السلايف
الست / لا خديجه ما لهاش فى الكلام ده
ست ٢ / و بعدين الاتنين متعلمين و دماغهم كبيره سيبى الحاجات دى للستات اللى دماغها فاضي
فاطمه / والله الست ست مهما كانت شهادتها
انتصار / احنا اساسا مفيش عندنا الكلام ده كلنا هنا عيله واحده و زى ما الرجاله عاشوا طول عمرهم على قلب بعض حريمهم كمان قلوبهم هتبقي على قلوب بعض
فاتن / و بعدين هى مين اللى هتشيل هند فى عياها مش الدكتوره و مين اللى هتسند خديجه و تراعيها و تفتحلها قلبها و تفضفضلها مش هند
الست / ربنا يديم المحبه و يجعلها جوازه الهنا
انتصار / امين نقرا الفاتحه بقي
الكل يقرا الفاتحه
…………………..
فى شقه يوسف
اسراء تدخل تلاقي يوسف بيلعب فى الموبايل
اسراء / اعملك تتعشي
يوسف / تعالى يا ماما عاوز اتكلم معاكى
اسراء تدخل و تروح تقعد جنبه على السرير
يوسف / اخبار بابا ايه
اسراء / والله يا ابني ما تسرش تعبان و شايل الهم و لولا اجواز اخواتك شايلين عنه توضيب المحل كان زمانه وقع مننا … ايوه كدا فوق لنفسك و اسال عن ابوك و اقف جنبه اثبتله انه خلف راجل
يوسف / بابا عاوزنى اروح لدكتور نفسي
اسراء / ما انت حالتك بقت صعبه اوى يا يوسف
يوسف / انتوا فاكريني حجر انا حزين بسبب اللى حصل
اسراء / يا ابني هيفيد بايه البكا على اللبن المسكوب بص لبكره انت لسه صغير و فى عز شبابك
يوسف / موضوع الشقه فرق معايا اوى
اسراء / بكره نجبلك غيرها و بعدين انا قولتلك لو تحب نكتبلك دى نكتبهالك
يوسف / لا انا عاوز نصيبي فى المحلات
اسراء / مش فاهمه
يوسف / المحلات بتتوضب بفلوس شقتى و عربيتي و البضاعه اللى هتيجي كمان يعني تمن الشقه هيضاف لراس المال يبقي يتكتبلى بيه نسبه عشان اضمن حقى
اسراء / انا ما افهمش فى الكلام ده يا يوسف انت عاوز ابوك يوزع ورثه و هو عايش
يوسف / لا طبعا انا بس عاوز اضمن حقى مش كل واحده من اخواتى خدت حقها فى جهازها و جوازها انا حقي كان الشقه دى و دلوقت الشقه اتباعت و اتحط فلوسها فى المحلات و بعد عمر طويل اخواتى و اجوازهم هيورثوا بشرع ربنا و دا ظلم لانهم هيورثوا فى شقي فى حقي
اسراء / ابوك عمره ما بخل عليك بحاجه انا هقوله و نشوف
يوسف / تمام هو فين دلوقت
اسراء / خرج من الصبح مع اجواز اخواتك و لسه ما رجعوش بيلفوا على المصانع يشوفوا هيعملوا ايه فى البضاعه و هيسستموا الدنيا ازاى انت عارف الفلوس على القد
يوسف يبص لاسراء و يهز راسه
…………………
فى المضيفه
مختار / طب و دا ينفع يعني يا عبد الله
عبد الله / انا ما كنتش ناوى اقولك الا ما ارجع من مصر و يبقي معايا قرشين بس انت اللى فتحت الكلام
مختار / ايوه يا عبد الله بس الكلام ده اصلا كله غلط
عبد الله / انا مش مرتاح و لا ماما مرتاحه
مختار / انتوا اللى واخدين الدنيا بحساسيه زياده اوى يا عبد الله ما عدش فى فرق بينا ليه مصرين تعملوا تكليف
عبد الله يبص لمختار و يبتسم
مختار / تمام انت ايه اللى يريحكوا تمشوا
عبد الله / احنا مش هنبعد هنشوف مكان قريب ناجره
مختار / و هتروح الشغل و تسيب مامتك و اختك لوحدهم يا اما يجوا هنا يا هند تروحلهم صح طب ما هم هنا بدل المشوره
عبد الله / تفرق
مختار / انا مش عاوزك تمشي انا مبسوط انكوا هنا هند كمان مبسوطه و ياسمينا مبسوطه انا مطمن عليكوا وسطينا كلنا بنحبكوا و فرحانين بيكوا اقسملك بالله يا عبد الله كلنا فرحانين بيكوا
عبد الله / و انا
عبد الله يبص فى الارض بحزن
مختار / انت ايه
عبد الله / انا كمان مبسوط
مختار / انت ايه اللى جرالك يا عبد الله دا انت ما كنتش بتبطل تنطيت و حركه ايه اللى مزعلك اوى كدا
عبد الله يبص الناحيه التانيه و يعيط مختار يحضنه
مختار / حقك عليا انا حقك عليا
عبد الله يمسح دموعه
عبد الله / و هو انت اللى كسرتنى
مختار / ما عرفتش اجبر بخاطرك
عبد الله / انت عملت اللى عليك و زياده كلكوا عملتوا بصراحه ما حدش قصر بس فى حاجات لما بتتكسر ما بتتصلحش
مختار / بس احنا مش ازاز و لا خشب يا عبد الله احنا بشر بنمر بازمات و مشاكل احنا ما بنتكسرش احنا بنكبر بناخد خبره و ننضج و انت لسه صغير و لسه ياما الدنيا هتحط عليك فمش من اولها كدا
عبد الله يبص لمختار
مختار / اوعى تفتكر ان اللى حصل الفتره اللى فاتت جرحك لوحدك هند و انا عيله الزيني كلها اتاثرت باللى حصل بس الحمد لله اتجوزت هند و سايبها لوحدها فوق و زمانها نامت و سابتنى
عبد الله يبتسم
مختار / احنا ما بنتكسرش يا عبد الله و انت راجل بجد اكبر و اثبت لنفسك قبل الكل انك قد الدنيا دى
عبد الله يبص لمختار
مختار / ايه !
عبد الله / جمله خليني قد الدنيا
مختار / ما احنا مش هنفصل دنيا على قدنا يبقي نكبر و نبقي احنا قدها تعرف زى بالظبط احلامنا انا بكره جمله احلم على قدك دى يعني ايه قدى انا احلم زى ما انا عاوز و اكبر انا و ابقي قد احلامى مش اصغر حلمى و اعيش جنب الحيط
عبد الله / صح
مختار / روح مصر يوم الجمعه زى ما خطت و لما ترجع نكمل كلام و انا هطلع انام
عبد الله / تصبح على خير
مختار يطبطب على ضهر عبد الله و يقوم يمشي
…………………
فى شقه يوسف
محمود / انتى بتقولى ايه يا اسراء
اسراء / دا حقه
محمود / حقه !! ليه و انا مت عشان تقولى حقه
اسراء / دى شقته
محمود / انا اللى جايبهاله هو فى ايه
اسراء/ هو معاه حق انت جوزت اخواته
محمود / و هجوزه يجيب العروسه و هجوزه مع ان لو عاوز يتحاسب بقي يشوف انا كنت بصرف عليه كام و صرفت على اخواته كام يشوف جبتله شبكه بكام لست وسام اللى اتجوزها عند مع انى قولتله بلاش و لا القته المحلوله اللى عايش فيها دا انا كنت بصرف عليه و على صحابه
اسراء / انت بتقول ايه يا محمود
محمود / بقول ان فى الوقت اللى هو كان نايم فيه طول اليوم و مشغل التكييف اجواز اخواته كانوا بيلفوا معايا على المصانع فى الوقت اللى ابنى الوحيد اللى طلعت بيه من الدنيا عاوز يورثني بالحياه اللى مش من صلبي كان كل همهم يوقفونى تانى على رجلى
اسراء / وطى صوتك ليسمع
محمود / ياريته يسمع ياريته يفوق انا عشت عمرى اتمنى واد اتسند عليه ضحيت بكل عزيز و غالى عشانه ياريته يحس باللى عملته و اللى بعمله
اسراء / طب اهدى بس دلوقت و ان شاء الله بكره الصبح
محمود / بكره الصبح ينزل يقف مع العمال ينزل يشوف انا بتعب قد ايه عشان يحس بقيمه الفلوس عشان يقدر ان المحل ده هو مستقبله
اسراء / يا محمود
محمود / مش بيقول خايف من بعدى اجواز اخواته ياكلوه ينزل يتعلم الشغل و يعرف راسه من رجله عشان يعرف يدافع عن حقه و حق اخواته
اسراء / طب اهدى انت بس
محمود / انا قولت اللى عندى و مش عاوز اسمع كلمه تانى
صوت باب الشقه بيترزع اسراء و محمود يبصوا لبعض
اسراء / ليه كدا يا محمود
محمود / لازم اقسي عليه لازم يفوق عشان مصلحته لازم
……………………
فى اوضه هند
مختار ممدد على السرير و هند نايمه جنبه بتبص عليه و هو سرحان
هند / اللى واخده عقلك
مختار يبصلها
هند / كنت سرحان فى ايه
مختار يتعدل فى نومته و ياخد هند فى حضنه
مختار / فيكي
هند / انت ما تعرفش ان اللى بيكدب بيروح النار
مختار / بس دا كدب حلال
هند / هههههههههههههه يعني بتكدب فعلا و ما كنتش بتفكر فيا
مختار / مين فينا اللى مجرم دلوقت
هند / ههههههههههههههههههه انت عارف انا بقالى قد ايه بتفرج عليك انت بجد كنت سرحان فى ايه و ايه اللى صحاك بدرى كدا
مختار / تعرفى يا هند انى بحبك اوى
هند / و دا برده من الكدب الحلال
مختار / دا الصدق بعينه
هند / و انا كمان بحبك بس برده مش هتضحك عليا كنت بتفكر فى ايه
مختار / فى عبد الله
هند / النهرده كان اول يوم ليه فى الشغل و ماما بتقول كان راجع مرهق و نام انا ما عرفتش اشوفه
مختار / عبد الله لسه متاثر باللى حصل … و اللى بيحصل
هند / قصدك على رجوعهم مصر يوم الجمعه
مختار / عاوزين يسيبوا السرايا
هند / هيبقي افضل لو خدوا شقه ناحيه الجامعه انا سالت مريم و قالت انها بعيده عن هنا
مختار / يعني انتى موافقه انهم يمشوا
هند / لا بس تهمنى راحتهم انا مش هقدر استحمل ان حد يقولهم كلمه تانى
مختار / ما حدش هيقول
هند / المره اللى فاتت الكلام ما اتقالش فى وشنا بس يشاء ربنا ان ماما تسمع اللى هيتكلم عمره ما هيتكلم فى وشك
مختار / ما حدش له عندكوا حاجه و اللى بيتكلم فى الضهر جبان و خسيس
هند / الحقيقه بتوجع بس دا مش معناه انها مش حقيقه دا مش بيتهم
مختار / و ازاى اخليه بيتهم
هند / انت ليه مش عاوزهم يمشوا اوى كدا
مختار / عشان بحبهم اهلى زى ما هم اهلك
هند / لو ما كانش يوسف عمل اللى عمله كنا اتجوزنا و هم لسه عايشين فى مصر دلوقت فى نفس البلد هيبقي سهل برده يروحوا و يجوا علينا
مختار / انا خدت على وجودهم جنبى اشقر عليهم فى اى وقت اطمن ان مش ناقصهم حاجه بحب اهلى يبقوا تحت عيني
هند تبتسم و تحضن مختار اوى
هند / بحبك اوى اقسم بالله
مختار / و انا كمان بحبك والله
هند / المهم خلينا فى المهم عملت ايه فى حوار الهانيمون
مختار / عدى بس الاسبوع ده عشان الناس اللى بتيجي و هاخدك و نطلع الساحل الشمالى نقضي اسبوع بحاله
هند / طب خليهم اتنين و انا احبك
مختار / هههههههههههههههههه طب لو شهر تعملى ايه
هند / لا لو شهر بقي يبقى اقوم اشغل السخان
مختار / نقطه ضعفى
هند / ههههههههههههههههههههههه
…………………….
تانى يوم على القهوه
حامد / لا يا يوسف غلطان انا قولتلك تقرب منه مش تبعده عنك
يوسف / يعني انت عاجبك كلامه
حامد / يا سيدى ابوك مضغوط اديك شايف الوضع
يوسف / هو مضغوط و انا ايه و بعدين دا حقي
حامد / حقك ما اعترضناش بس مش بالطريقه دى و قال على راي المثل اخد الحق حرفه
يوسف / يعني اعمل ايه دا عاوزنى انزل اقف مع العمال
حامد / و ماله انزل و اقف و افهم كل قرش داخل ازاى و خارج ازاى دى فلوسك و لازم تبقي تحت عينك امال تسيبهم يسرقوك
يوسف / مش هو اللى فضلهم عليا
حامد / انت اللى سبتلهم السكه فاضيه لازم تتعلم من اين تؤكل الكتف و بعدين انت كمان ناسي حاجه مهمه
يوسف / ايه
حامد / شبكتك اللى عند وسام دى كانت بالشئ الفلانى انت عارف الدهب زاد كام فى الفتره دى شوف انت بقي جايب كام جرام و احسب
يوسف / انا ما اقدرش اقول لوسام هاتى الشبكه مش هترضي تديهانى
حامد / اعفن محامى يرجعهالك
يوسف / لا ما توصلش للدرجادى
حامد / انت هتفضل طيب لحد امتى البت حتى ما وقفتش جنبك فى محنتك تسيبلها الفلوس دى كلها ليه
يوسف / انا اللى سبتها مش هى اللى سابتنى
حامد / الله هى مش جتلك القسم و فسخت
يوسف / انا كنت بقالى فتره بزن على حوار الفسخ و كنا بناجل بسبب ظروف عيا ولدتها
حامد / شوفت بقى انها بنت كلب شوفت انها ما تستاهلش انت قدرتها و قدرت تعب ولدتها و هى ما صدقت لهفت الشبكه و ادى وش الضيف يا ابني انت فى عرض كل جنيه
يوسف / ما ماما كلمتها و ما رضيتش ترجعها اعمل ايه يعني
حامد / ما تعملش انت ما تعملش انا هاخدك دلوقت و نطلع على المحامى بتاعى واد عقر هو اللى هيخلصلك الموضوع كله و انت فى مكانك
يوسف / طب اكلمها اخر مره مش عاوز حوار المحاكم ده
حامد / انت بضيع وقت على الفاضي بص خلينا نتكلم مع المحامى الاول و فى الاخر القرار قرارك
يوسف / اللى تشوفه
حامد يقوم و يطلع فلوس من جيبه
حامد / معييش غير متين مجمده هيقعد سنه بقي لحد ما يفكهالى معاك عشره جنيه فى السريع
يوسف / معايا
حامد / طب حاسب على الشاى على ما افك عشان نلحق المحامى قبل ما اضطر اسيبك و اروح الشغل
يوسف / تمام ما فيش مشكله
يوسف يطلع فلوس و يحطها تحت كبايه الشاى و يمشى مع حامد
يوسف / ناخد تاكس
حامد / مش مستاهله دا خطوتين من هنا نتمشاها و اهو الحركه بركه برضه و الجو حلو
يوسف / تمام
يوسف و حامد يتمشوا
……………………
فى السرايا
مختار و عباده بيوصلوا التليفزيون و هند و مريم بيطلعوا البوتجاز من كرتونته و طقم الكانك و الفناجين
مريم / الترابيزه دى بقي شكلها وحش اوى كدا مكركبه و مليانه حاجات الاول كان الميكرويف بس و اربع كبايات و اربع اطباق و كام علبه تلاجه فوق التلاجه و الدنيا ماشيه انما دلوقت بقوا كتير اوى و برطمانات سكر و شاى و قهوه و نسكافيه دا بقي و لا بتوع النصبه
عباده / بسيطه نجبلها تقفيله خشب صغيره تحط فيها الحاجه و تحط فوقيها الميكرويف و البوتجاز الاعور ده و تحط جواها المواعين الترابيزه ما كانتش فكره عمليه من الاول
مختار / تخلصلى الحوار ده فى قد ايه
عباده / النهرده اكلم النجار يفنشهولك و لو لقيت حته جاهزه عنده متر اجيبها وقتى
مختار / ما اتحرمش
مختار يمسك الريمود و يقلب فى القنوات
مختار / الله ينور مليون فل
مريم / كدا اخد السماعات بتاعتى بقي و لا اللى بيروح ما يرجعش
مختار / يا بت دا انا اللى جايبهالك
مريم / و هى الهديه بتترد يا عمى و لا ايه
هند / خديها احنا كدا كدا ما عدناش محتاجينها قامت بالغرض و زياده
عباده / السنين دى كلها مع سماح و ما اتعلمتيش حاجه لو سماح كانت سابتهالكوا و زنت على واحده جديده احدث و اكبر
مريم / انا الجديد ما يفرقش معايا السماعات دى كانت هديه نجاحى فى الاعداديه و غاليه على قلبي دا كانه امبارح
هند / ما تقلقيش حافظنا عليها بس سيبي الفلاشه و لا الفلاشه كانت غاليه برده
مريم / لا خليها ما تغلاش عليكي
مختار / طب مش هنجرب النصبه دى و لا ايه عاوزين ندوق عباده قهوتك
عباده / لا عباده ايه تسلم ايديها مقدما يا بخت من زار و خفف و انتوا عرسان و احنا طولنا قوى يلا يا مريم
مريم / لا انا لسه هنضف تحت التليفزيون اسبقني انت
هند / هاتى الفرشه و الجاروف و انا هعملها انا … مختار ينفع جردل صغير و شرشوبه و مقشه و فرشه و جاروف نحطهم فى ركن فى الحمام
مريم / مش عاوزه نجبلك غساله اطفال بالمره و نركبلك منشر على الشباك
هند / انتى بتالسي عليا
عباده / انا هجبلك اللى انتى عوزاه سيبك منها و شوفى ايه تانى ناقص و انا اجيبه
هند / لا كدا تمام اوى
مختار / و على كل لو لقيتي اى حاجه ناقصه فى اى وقت قولى عادى ما تخافيش عباده مش هيزهق
عباده / بنقدم السبت
مختار / سبت ايه دا انت لاهف منى الاسبوع كله و ان كنت نسيت اللى جرا سيديهاتك معايا
عباده / دى اخرتها يا ابن عمى ماشي ماشي يلا بالاذن انا عشان ورايا شغل
مختار / نورت
مريم / هجيب حاجه التنضيف و اجى
مختار / ما تتاخريش عشان عاوز انام
مريم / انت مش لسه صاحى يا عمى
مختار / تعرفى تخليكي فى حالك ؟
مريم / استاذه و رئيسه قسم
مختار / احبك يلا بسرعه هاتى الحاجه
مريم تجرى مختار يبص لهند يلاقيها مبتسمه اوى
مختار / سمو الملكه ليها اى طلبات تانى
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
2 تعليقات