رواية البر التاني الفصل السابع والسبعون 77 بقلم لولو محمد
رواية البر التاني الجزء السابع والسبعون
رواية البر التاني البارت السابع والسبعون
رواية البر التاني الحلقة السابعة والسبعون
سمر / انت مش قولت انهم مش بيحبوك
رشيد / عدو بيتقى ربنا و لا صديق ما يعرفوش
سمر / يعني هتعمل ايه هتروح تساعدهم
رشيد يبتسم و ينام على ضهره و يبص للسقف
رشيد / لا هقدم و لا اخر لو على الرجاله حتى حريمهم رجاله و لو على الامكانيات عندهم احدثها و بيعرفوا يستخدموها
سمر / يبقي نمشي
رشيد/ هنروح فين
سمر / ارض الله واسعه
رشيد / و البلد دى ائمن مكان على وش الارض
سمر / ازاى بس
رشيد يعدى ايديه من على شعرها
رشيد/ عشان انا لفيت الدنيا و عرفت … انا عمرى ما هربت من البلد دى كنت دايما بهرب ليها
سمر تتنهد
سمر / هقوم اخش الحمام و اغسل وشي … انا عامله النهرده محشي هسخنلك تاكل
رشيد يبتسم و يهز راسه سمر تقوم و هو متابعها
…………………….
عند محامى
يوسف / حجر ايه لا ما توصلش للدرجادى
المحامى / حضرتك جيت تقولى عاوز حقى و دى الطريقه الوحيده اللى هتساعدك لان حضرتك ما عكش اى ورق يثبت ملكيتك لاى حاجه من ممتلكاتك اللى قولتلى عليها و والد حضرتك عايش يعني ما لكش اى جنيه فى ممتلكاته الا بعد ما يقابل وجه كريم و حتى لو حصل انت نصيبك هيبقي النصيب الشرعى كابن بعد ما نخرج نصيب والدتك و اخواتك البنات و دا مش هيكمل ربع التركه حتى
يوسف يفكر
يوسف/ يعني ما فيش اى حل تانى غير الحجر
المحامى / هو مش حضرتك بتعمل الكلام ده عشان خايف اجواز اخواتك يضحكوا على والدك و ياخدوا فلوسه
يوسف / خايف ايه دا بيصرف عليهم اكتر ما بيصرف عليا
المحامى / طب ما دا يتحجر عليه
يوسف / لا لا انا قلبي مش مطاوعنى مهما كان حجم الخلاف اللى بينا ما توصلش للدرجادى
المحامى / والله هو ده الحل الوحيد اللى عندى
يوسف / تمام شكرا و اسف جدا على الازعاج
يوسف يقوم و يمشي
……………….
فى اوضه شاهين
شاهين نايم و الستات حواليه فجاه الجهاز يزمر الكل يقفل المصاحف و يرتبكوا ممرضه تقوم تبص على الاجهزه
ام مغاورى / هو ماله يا بنتى
الممرضه تطلع بره خديجه تروح تقعد جنب ابوها و تبدا تتك على صدره
ام مغاورى / بتعملى ايه فى ابوكى يا بت
دكتور يدخل و يستلم من خديجه و يكمل مغاورى يقف على الباب و الدكتور عمال يضغط على صدر شاهين و الستات بتعيط مغاورى يشخط فيهم
مغاورى / مش عاوز نواح اطلعوا بره كله يطلع بره
الستات كلها تطلع بره مغاورى يبص على الدكتور يلاقيه بيغطى وش شاهين و خديجه ماسكه ايد ابوها و قاعده جنبه بتعيط مغاورى يقرب و الدكتور يجي يطلع بره يعدى جنب مغاورى
الدكتور / البقاء لله
مغاورى ما يردش و يروح يقرب من ابوه و يعرى وشه خديجه تبصله
خديجه / كان موصى انت اللى تغسله فاكر
مغاورى باصص لابوه ام مغاورى تدخل تجرى و تقف خديجه تبصلها
مغاورى / يا ريتني ما سمعت كلامكوا
ام مغاورى / و لكل امه اجل فاذا جاء اجلهم لا يستاخرون ساعه و لا يستقدمون
ماجده على الباب تدخل و تغطى ابوها مغاورى يبصلها
ماجده / اكرام الميت دفنه و ابويا عاش كريم و يموت كريم
مغاورى يبصلها و يبص لخديجه بتعيط و بتبوس ايد ابوها يسيب المكان و يمشي
ام مغاورى / انا هجهز الحاجه عشان الغسل اطلعوا بره سيبوه يرتاح
ام مغاورى تطلع البنات بره و تبعد الستات عن الباب و تروح تفتح درج من الدولاب و تطلع منه قماش ابيض ملفوف فى كيس بلاستيك
ام مغاورى / الله يرحمك ما كنتش سايب حاجه للظروف حتى كفنك كنت شاريه
ام مغاورى تعيط و ترجع تبصله و تعيط تانى
………………..
فى محل وسام
الشاب قاعد بيشرب شاى مع وسام
وسام / دا اخر جرد لكل البضاعه اللى فى المحل و كشف باسعار جملتها لو الراجل اللى عندك جاهز يجي يشيل من بكره
الشاب ياخد منها الورق
الشاب/ و انا و الشباب خلاص جهزنا العقود و اتفقنا على السعر اول ما اقبضهم هيمضوا علاطوا
وسام / طب مش كنا حطينا البضاعه دى فى المحل التانى بدل الخساره دى
الشاب / يا بنتى انا دفعت كل اللى معايا و محتاجين كل قرش عشان نخلعهم و بعدين المحل الجديد مردوم بضاعه يعني مش هتخسرى حاجه
وسام/ طب ما تشوفلى حد يشترى السيكشن بتاعى فى المول انا بجد كرهته
الشاب / اشوفلك بس هناك هيبقي تمن البضاعه بس انما التوضيبات احنا بينا عقد بس ممكن اشوفلك خلو رجل برده بس ما اوعدكيش يبقي مبلغ
وسام / الخساره القريبه و لا المكسب البعيد و اصلا كدا كدا ما كانش فيها مكسب دول نصابين شوفلى اى حاجه و خرجنى من المدعوقه دى
الشاب / تمام اعتبريه حصل
وسام / انا بجد مش عارفه من غيرك كان ممكن اعمل ايه
الشاب يبتسم وسام تفتح بونبونيره و تعزم عليه بشيكولاتايه ياخد واحده تبتسم هى
………………….
فى سرايا الجوارحه
مغاورى قاعد فى جنب لوحده فى الجنينه سماح تروح تقعد جنبه
سماح / امى بتقولك مش هتيجي تغسل ابوك زى ما وصى
مغاورى ساكت سماح تمسك ايده
سماح / انا والله حاسه بيك اوى عارفه انها صعبه بس انت قدها
مغاورى / انا كويس يا سماح انا بس محتاج اقعد لوحدى شويه دقيقتين بس و هاجى انا بس …محتاج ابقي لوحدى
سماح / حتى انا !!!
مغاورى يبصلها يلاقيها بصاله بحزن يشاور على قلبه
مغاورى / صدرى موجوع لسه مش مصدق أنه مات
سماح / سلامتك بس الموت علينا حق و البركه فيك تحيي سيرته و تثبت ان اللى خلف ما ماتش
مغاورى / كان دايما بيتكلم عن الموت انا هموت و انت هتكمل انا هموت و انت هتشيل بعدى لما اموت اعمل كذا و كذا اوعى لما اموت تعمل كذا بس عمرى ما خطر على بالى لحظه انى هعيشها بس اصعب حاجه انه يطلب منى ان انا اللى اغسله انا مش هقدر اعمل كدا صعبه اوى يا سماح والله العظيم صعبه
سماح / انت قدها و بعدين دى كانت وصيته و باذنك يارب باذنك يا رب لما تشوف وشه المنور قلبك هيرتاح و هتطمن دا كان حاجج بيت الله شوف كام مره و كان حافظ القران كله و صوته جميل فى ترتيله و اللى فى جيبه كان علاطول للغلابه ربنا يرحمه
مغاورى / ربنا يرحمه
سماح / اكرام الميت دفنه يا مغاورى قوم ما تسيبش ابوك مستني كلهم كانوا عاوزين يجوا ينادوك قولتلهم انا اللى هناديه قوم يا مغاورى بالله عليك قوم
مغاورى يهز راسه و يقوم
مغاورى / ربنا يخليكي ليا يا سماح و ما يوريني فيكي حاجه وحشه
سماح تبتسم و تطبطب على صدر مغاورى بالراحه يمشى تمشي وراه و يروحوا السرايا
………………….
فى البلد وقت الصلاه
عربيه نقل محروقات ماشيه فى البلد تركن جنب قنايه ميه و الناحيه التانيه غيط و محصول السواق ينزل و يبص يمين و شمال مفيش صريخ ابن يومين و ينزل خرطوم العربيه فى القنايه و يجرى هو و التباع فى الارض كل واحد شايل فاس يوسعوا للبنزين طريق يجرى جوه الزرع و عمالين يتنقلوا من مربع لمربع يحفروا مجارى بالفاس للميه تجرى فى كل الزرع و بعدين يرجعوا يركبوا العربيه و يمشوا
…………..
عند الترب
الناس خارجه من الدفنه ماشين و عمالين يعيطوا و الستات مسندين ام مغاورى خديجه تقع الكل يجرى عليها ماجده / اللحقونا يا ناس
عباده يجرى يشيلها ام مغاورى تصرخ
ام مغاورى / اللحقها على الدكتور ما داقتش الزاد خالص اللحقها بسرعه
عباده ياخدها و يجرى على العربيه سليمان يفتحله الباب يركب و يسوق و العربيات تجرى وراه و ام مغاورى تقعد فى الارض
ماجده / قومى ياما ما ينفعش نسيبها لوحدها
ام مغاورى / رجليا مش شيلانى ما عدتش قادره استحمل اللى انا فيه
الستات يسندوا ام مغاورى لحد اقرب عربيه ياخدوها و تطلع الرجاله و الستات ماشيين وراهم يعدوا من على القنايه راجل واقف و بيبص على القنايه راجل تانى يقف و يبص
راجل ٢ / فى ايه يا شافع مالك واقف كدا ليه .. ايه ده ايه ريحه البنزين ده يا سنه سوخه يا ولاد
راجل ٢ يقلع جلبيته و ينزل فى الارض و يقعد يسند الطين بايديه الرجاله تنزل و تفضل تسد بايديها و الستات تجرى تحاول تجيب ميه واحد فى وسط الزحمه يرمى عقب سجاره النار تمسك فى الكل و يحصل هرج و مرج و صريخ و نار عاليه و الكل بيحاول يطفى و نقذوا الناس اللى فى الارض
………………..
فى المستشفي
تليفون مختار يرن يرد
مختار / السلام عليكم
راجل / عليكم السلام استاذ مختار الزيني
مختار / ايوه مين معايا
الراجل / انا الدكتور احمد عبد السلام دكتور النسا و الولاده المدام كانت عندى و
مختار / ايوه ايوه اهلا و سهلا اؤمرنى
الراجل / المدام كانت طلبت منى اجى اشوف المستشفى اللى فى البلد
مختار / تنور تحب نبعتلك عربيه
الراجل / لا مفيش داعى انا بس حبيت ابلغ حضرتك انى اقدر اجى بكره لو عرضكوا لسه قائم يعني
مختار / و احنا فى انتظارك تانس و تنور
مختار يقفل
ناصر / مين
مختار / دكتور هند بتاع مصر عاوز يجي بكره
ناصر يهز راسه اتنين رجاله يدخلوا يجروا و دربكه فى المستشفي واحد من الرجاله يوشوش امين
امين / نهار ابوك مش فايت و انت لسه بتسالني هتعمل ايه
ناصر يقف
ناصر / فى ايه يا امين
امين / حريقه كبيره فى الغيط اللى يامه الترب و مش عارفين يطفوها
ناصر / خد الرجاله كلهم و روحوا اتصرفوا و كلموا المطافى و كلم سباعى يبعت فناطيس الميه
امين / تمام يا كبير
امين يمشي و رجاله كتير يجروا وراه منهم مغاورى و عباده
ناصر / مغاورى .. عباده
الاتنين يقفوا يبصوله
ناصر / خليكوا هنا لحد ما تطمنوا على خديجه و تروحوا الحريم السرايا
الاتنين يبصوا لمختار واقف ساكت و باصص فى الارض فاطمه تطلع من الاوضه
فاطمه / فاقت و بقت بخير الحمد لله و العيل بخير ما تقلقوش … مالكوا عاملين كدا ليه
ناصر / بقت بخير و هتخرج و لا هيخلوها تحت الملاحظه
فاطمه / هتخلص المحلول اللى فى ايدها و هتخرج ان شاء الله
ناصر / خير ان شاء الله خليكوا معاها جوه و ما تطلعوش من الاوضه و مختار و عباده و مغاورى هيقفوا على الباب لحد ما ارجع
عباده / اجى معاك يا كبير
ناصر / كلامى كان واضح عينك ما تغفلش عن الحريم اللى جوه …لو احتجت حاجه هقولك
عباده يهز راسه ناصر يمشى
مختار / حريقه فى عز الشتا لا و مش عارفين يطفوها و فى الغيط كمان
عباده / ما كانتش هتلاقى وقت احسن من ده الكل مشغول فى الدفنه و الصلاه
مختار / و احنا هنفضل ساكتين لحد امتى
عباده / نخلص عمليه السلاح الجايه دى و نفوقلها
مغاورى / هو احنا ليه بيحصل معانا كدا
عباده و مختار يبصوله
مغاورى / عشان يعني بنتاجر فى السلاح
مختار / عشان بنعرف نستخدمه زى الجيش على الحدود بالظبط
عباده / صح عشان احنا اللى نقدر نقف قصادها انما الغلابه بيداسوا و خلاص لا بيلحقوا يقاوموا و لا يحاربوا
مغاورى / زى الغلابه اللى ماتوا النهرده
مختار / مين قالك ان فى حد مات
مغاورى يبص لمختار
مختار / ان شاء الله اخرها هتبقي اصابات بسيطه
مغاورى / عيشتك فى مصر نستك قيمه الارض عند الصعايده دا لو هيموت و يلحق فسيله من المحصول هيلحقها
عباده / ربنا يستر
مغاورى / مش اول حادثه فى بلدنا و مش هتبقي الاخيره احنا مش عارفين نحميها
عباده/ عندك حد يقدر يحميها احسن مننا
مغاورى / ما كانش ده قصدى يا عباده انا اقصد اننا بنعمل حاجه غلط و لازم نصلحها لازم نفوق
مختار / احنا حاطين غفر فى كل المداخل و المخارج و حاطين كاميرات… الكاميرات اكيد هنقدر نعرف الحريق ده حصل ازاى لو راجعنا الكاميرات
مغاورى / ما ده اللى بقوله يا مختار احنا بنتحرك بعد الحادثه مش قبلها الكاميرات دى اتركبت عشان نحمى الناس و نلحقهم قبل ما حاجه تحصل مش اننا نعرف اللى حصل ده حصل ازاى
مختار / مهو لما نعرف اللى حصل ده حصل ازاى هنعالجه و نمنع انه يحصل تانى
مغاورى / مهى ما بتكررش نفسها و كل مره بتبلينا بمصيبه شكل نسدها من هنا تدخل من هنا نسد من هنا تدخل من هنا و حاوريني يا كيكا حاوريني
عباده / اهدى يا مغاورى انا مقدر انك تعبان بس لازم تهدى
مغاورى / و هى مديانا فرصه ناخد نفسنا حتى بنت الكلب دى
عباده / الكل كان فى الدفنه و ما كانتش هتلاقى وقت احسن من كدا الكل ملخوم فيه
مغاورى يتعصب و يزعق
مغاورى / و لو فضلنا نتلخم كدا كل يوم هيبقي فى دفنه كل يوم ميت و كل يوم عزا يا نفوق يا نموت
مختار / طب اهدى و اللى انت شايفه هنعمله بس اهدى
مغاورى يشوح بايده و يمشي لاخر الطرقه و يقف يبص من الشباك
عباده/ الله يعينه
مختار / بس معاه حق
عباده يبص لمختار
مختار / احنا ملخومين فى حياتنا و هى مفرغه روحها لينا
عباده / لسه عند رايي قطمه … احسن من نحته
مختار / هيحصل ظبطلنا انت السلاح الجديد و هنطلع طلعه واحده مالهاش تانى
عباده / ايدي على كتفك
……………………
فى الاستقبال تحت
امين واقف مع ناصر و سليمان
امين / الحمد لله طفينا الحريق و فتوح بيقول ان المكان ده كله اراضي زراعيه و ما فيهوش كاميرات كفايا للى حصل بس اللى طلعنا بيه نمره العربيه دخلت ركنت هناك شويه و بعدين رجعت لكن لا فى صور للحريق نفسه و لا للى العربيه دى عملته
ناصر / و انت محتاج تعرف ايه اكتر من كدا ما هى باينه غرقوا القنايه و المحصول بنزين و رموا فيها عود كبريت و لا عقب سجاره جبت رقم العربيه
امين / و صوره واضحه للسواق و التباع اللى معاه و اديتهم لزياد باشا و كام واحد من حبايبنا فى الدخليه
ناصر يبص لسليمان
ناصر / اصحاب الارض يتراضوا و الناس اللى اتصابت علاجهم علينا احسن علاج حتى لو حكمت يسافروا بره
سليمان / و الاتنين اللى ماتو
ناصر / مصروف محترم يوصل كل اول شهر لبيتهم و مصاريف عيالهم تعليم و اكل و شرب و خلافه ما تخليهمش محتاجين قشايه و لو فيهم حد مش متوظف وظفه كل اللى ناقصهم اعمله و لو حد ليهم ليه ام او اب طلعهم يحجوا
ناصر يسيبهم و يروح يقعد على كرسي و باين عليه التعب و الغضب مغاورى يروح يقعد جنبه يبصله و يستغرب
ناصر / انت بتعمل ايه هنا
مغاورى / نزلت اجبلهم لقمه ياكلوها من صباحيه ربنا و الحريم دول على لحم بطنهم مش ناقصين يقعوا مننا واحده ورا التانيه بس ما تخافش يا كبير بعت اربع رجاله مكانى فوق و بعت حد من الرجاله يجيبلهم الاكل
ناصر / خير ما عملت انا بقول نروحهم احسن شكل ليلتنا هنا طويله
مغاورى / بقولك يا كبير عشان ما تقولش ما قولتش و لا انى بتصرف من وراك انا هبعت بكره اجيب شويه سلاح لرجالتى لزوم الطلعه اياها
ناصر / الله يرحمه ابوك لما سالته قالى المخازن عندكوا مليانه
مغاورى / السلاح المرادى مختلف انا مش هجيب لا مسدسات و لا بنادق و لا حتى قنابل انا هجيب حاجه مخصوص لبوز الاخص
ناصر / اللى تشوفه الجماعه الروس اياهم
مغاورى / لا دول جماعه امريكان معرفه قديمه كنت بلقط منهم خفافى حاجات بسيطه لحسابى
ناصر / لو احتجت اى حاجه
مغاورى / خيرك سابق يا كبير
ناصر يبتسم مغاورى يقوم يقابل واحد ياخد منه اكياس و ياخدها و يطلع فوق
…………………….
فى سرايا الزنايته تانى يوم
مختار قاعد على الفطار مع العيله
مختار / لا انا اللى هروح استقبله بنفسى اول ما هيقرب من البلد هيكلمنى
امين / انا هقضى اليوم بطوله فى المستشفى
عباده / و الدفن
امين / الدفن بعد صلاه العصر على ما تخلص الاجراءات دا ان خلصت النهرده
ناصر / و ايه اللى هيعطلها
امين / دى جريمه يا كبير الحريق بفعل فاعل و التحقيق و كدا
عباده / ايوه بس
امين / والله انا هحاول اعمل كل اللى اقدر عليه و ان شاء الله ربنا يعمل اللى فيه الخير
عبد الله / هستاذنكوا انا عشان ما اتاخرش على الباص
شيرى / طب اعملك ساندوتش
عبد الله / فطرت يا ماما تسلمى .. سلام يا جماعه
ناصر / سلام يا حبيبي ربنا معاك
عبد الله يقوم و يمشي
ناصر / الواد ده خاسس و لا انا بيتهيألي
انتصار / لا خاسس و ممقوت يا حبه عيني من كت المزاكره
مختار / الامتحانات قربت و لازم يرفع راسنا و لا ايه يا مريم
مريم / هاه
مختار يبتسم
ناصر / اخبار المزاكره ايه يا مريم
مريم / و انا بعمل غيرها
ناصر / مش بكترها المهم التركيز و الاهم النتيجه
مختار/ مريم ما يتقلقش عليها يا كبير
ناصر يبتسم و يكمل اكل
…………………..
فى سرايا الجوارحه
سماح فى الحمام و فى ايدها اختبار حمل و مبتسمه الباب يخبط
مغاورى/ انا خارج يا سماح و احتمال أتأخر
سماح / استنى عوزاك
سماح تجرى تفتح الباب و فى ايدها التحليل ما تلاقيش حد تجرى تلبس الاسدال و تنزل تجرى على السلم و تطلع الجنينه تلاقيه مشي بالعربيه تضايق تدخل تلاقي الستات كلها قاعدين يقروا قران
ام مغاورى / الرجاله اللى هينصبوا الصوان جم يا سماح
سماح تهز راسها لا و تحط التحليل فى جيبها
سماح / اعملكوا حاجه تشربوها هعمل شاى
كوثر / اعملى و خلى السكر بره
سماح / ماشي
سماح تدخل المطبخ ماجده تقفل المصحف و تقوم تدخل وراها
ماجده / فى حاجه حصلت بينك و بين مغاورى امبارح
سماح/ حاجه زى ايه يعني
ماجده / نازل بيجرى و انتى بتجرى وراه و انتوا الاتنين مضايقين ليكون اتخانقتوا
سماح / ابدا انا بس طولت فى الحمام و ما لحقتش اسلم عليه قبل ما انزل
سماح تحط ايدها فى جيبها تمسك التحليل
ماجده / طمنتيني
الكاتل يطلع بخار سماح تصب الكبايات
سماح / مغاورى كان متعلق بابوه الله يرحمه اوى مش كدا
ماجده / ابويا الله يرحمه كان حنين بس مغاورى كان الواد يعني حاجه تانيه ضهره فى الدنيا و سنده كان بياخده معاه كل حته و هو اللى معلمه كل حاجه عشان كدا تلاقي وجعه زياده
سماح / و انتى يا ماجده
ماجده / انا خلاص خدت على الوجع تقريبا نحست
ماجده عنيها تدمع و هى مبتسمه تشيل الصينيه و تمشي تروح تحطها على الترابيزه و تلقمهم سكر و توزع و سماح متبعاها
…………………..
فى اوتوبيس الكليه
عبد الله قاعد سرحان فى الطريق و الاوتوبيس نصه فاضي بنت تقوم من ورا تتحرك ناحيه قدام الباص يطلع مطب تيجي تقع تمسك فى الكرسي اللى جنب عبد الله الكشكول يتنطر من ايدها تحت رجلين عبد الله
البنت / احم احم … لو سمحت … يا دكتور … عبد الله
عبد الله يبص
البنت / الكشكول بتاعى وقع
البنت تشاورله تحت رجله يوطى يجيب الكشكول و يديهولها عربيه نقل كبيره تخبط الاوتوبيس فى تقاطع من الجنب بسرعه تزقه و تخرجه عن الطريق البنت تقع تحت رجلين عبد الله يقوم يحاول يساعدها و الطلبه يصرخوا الاوتوبيس يقف عبد الله يبص من الشباك يلاقى مسلحين بيجروا على الباص عبد الله يصرخ
عبد الله/ البنات ترجع ورا
السواق يطلع رشاش من تحت رجله يضربوه بالنار و يفتحوا الباب و يشدوه تحت و ينطلوا فى الاوتوبيس و البنات بتصرخ و الشباب واقفين قدام
راجل ملثم / اسمعوا الكلام و احنا مش هناذى حد
الراجل يشاور على عبد الله
الراجل / انا هاخده و امشي
الشباب يحموه الرجاله تنشن عليهم
عبد الله / هاجى معاكوا
عبد الله يوسع الشباب واحد منهم يمسكه
عبد الله / روحوا البنات لبيوتهم
عبد الله يشد ايد زميله ينزلها و يمشي وراهم ياخدوه يركبوه عربيه فور باى فور و يطيروا الشباب ينزلوا يجروا من جوه الباص و هم ماسكين روسهم و مش مصدقين اللى حصل
…………………….
قدام سرايا الزنايته
الرجاله طالعه مع بعض و بيتكلموا
عباده / ارتاح انت يا مختار خلى الجرح يلم و انا هروح اجيبه
مختار / ما انت عارف ان الرقده دى مش بتاعتى و بعدين هتروحله انت و بعدين ما انا اكيد لازم هشوفه و اتكلم معاه
ناصر / مختار معاه حق خليه هو يروح و انت خلصلنا فى حوار السلاح يا عباده ما تخليش الحاجات اللى بتحصل فى البلد تاخر التسليم احنا محتاجين كل ثانيه انا خلاص جبت اخرى
تليفوناتهم التلاته ترن فى وقت واحد يبصوا لبعض و كل واحد يرد و عنيهم توسع
………………..
فى المستشفى
مغاورى يدخل يشوف امين واقف مع حد يروحله
امين / بسرعه بالله عليك
الراجل / على عيني والله
الراجل يمشي
مغاورى / ايه الاخبار
امين / ما تقلقش ان شاء الله على العصر نكون مصلين و دافنين بس فى واحد كمان من المصابين مات الفجر
مغاورى يبص فى الارض و يسكت
امين / بس فى حالتين بعتناهم مصر فى عربيتين اسعاف لمستشفي كبيره الدكتور بعت و قال هيعمل عمليه يخرجوا منها و لا كانهم اتلسعوا حتى
مغاورى / الحمد لله خبر حلو فى يومنا
امين / حقك بس المفروض انك خدت على الحاجات دى خلاص دا احنا ياما شوفنا
مغاورى و امين تليفونهم يرن فى نفس الوقت يبصوا لبعض و يردوا
……………………
على الطريق
عربيه فور باى فور ماشيه و فيها اربع رجاله و عبد الله قاعد فى النص ايديه مربوطه ورا ضهره و ساكت و كانه فى دنيا تانيه و باين عليه الخوف فجاه درون طاير يطير قدام العربيه و السواق ما يعرفش يشوف يبص للى جنبه و يحاول يفادى الدرون ما يعرفش و يفضل يخبط فى العربيات اللى جنبه يمين و شمال عبد الله يبتسم
عبد الله / كنت عارف انهم مش هيسيبونى انا لو منكوا اللحق اجرى
الراجل اللى جنبه يضربه بالكوع فى وشه مناخيره تجيب دم و العربيه عماله تمشي يمين و شمال و تخبط فى العربيات مش شايف العربيات تلف و تقف و تسد الطريق ورا العربيه الراجل اللى جنب السواق يفتح الشباك و يطلع مسدسه و يطلع يقعد على الشباك و ينشن على الدرون تجيله طلقه فى دماغه يقع فجاه الدرون ينفجر و الازاز القدمانى كله يتملى شروخ و السواق يضطر يفرمل
عبد الله / هتعرفوا تتشاهدوا ههههههه
الراجل اللى جنبه يطلع مسدسه و يحطه على دماغ عبد الله
الراجل / بتعرف انت
عبد الله عنيه توسع عربيه تيجى بسرعه من قدام تخبط كابوت العربيه العربيه تطير لورا المسدس يقع من ايد الراجل و فى ثوانى رجاله تانيه ملثمه تطلع تحاوط العربيه بمدافع رشاشه الاربع رجاله يرفعوا ايدهم لفوق واحد من اللى بره يفتح الباب و ينزلوا اللى جنب عبد الله وبعدين عبد الله ينزل
ملثم واحد / اركب
الراجل يركب يقفلوا الباب
الملثم / اجرى على الطريق جماعتك هتقابلك فى السكه
عبد الله يبصلهم يقطاعوله الافيز اللى رابط ايده
عبد الله / جماعتى !!!
الملثم / اجرى بقولك اجرى
الملثم ينشن على عبد الله عبد الله يجرى ناحيه العربيات اللى ساده السكه يسمع صوت انفجار يبص وراه يلاقي العربيه انفجرت و فجاه يشوف درون تانى طاير نحيته يجرى و الدرون يجرى فوقيه و عبد الله كل شويه يبص عليه و هو بيجرى
……………………
فى فيلا فيرا
فيرا بتصرخ
فيرا / انتوا لو ما عرفتوش مين اللى اتجرا و عمل كدا هموتكوا كلكوا انتوا فاهمين
رشيد يدخل
رشيد / اعصابك يا شابه الشوجر ما بيرحمش
فيرا تهدى و تاخد نفس عميق و تبصله
فيرا / انت ايه اللى جابك
رشيد يديها ورقه تبص فيها و تبتسم
رشيد / معاد و مكان التسليم
فيرا / اخيرا حد بيشوف شغله
رشيد / كان مالك بقي
فيرا/ ما تاخدش فى بالك موقف و عدى … هتبات و لا هترجع علاطول
رشيد / هبات
فيرا / تمام اطلع ارتاح
رشيد يبتسم و يمشي فيرا تدخل الاحداثيات اللى فى الورقه على التاب ادواردو يقرب يشوف المكان يبتسم
ادواردو / هى ديد ايت ( عملها )
فيرا / يو نيفر لايكد هيم ( انت عمرك ما حبيته )
ادواردو / وات ايفر اى تولد يو اى ويل كيل هيم ( مش مهم انا قولتلك انى هقتله )
فيرا/ دونت يو داير اى ليك هيم اند ايف هى هاف تو داى هى ويل داى ابروبريات ديث ( اوعى هو عاجبنى و لو لازم يموت هيموت موته تليق بيه )
ادواردو / تيل وين ( لحد امتى )
فيرا / تيل اى ساى ( لحد ما اقول )
فيرا تسيب المكان و تمشي و ادواردو يخبط على المكتب و هو متعصب يبص وراه يعملوا بيشتغلوا يسيب المكان و يمشي
………………………..
على الطريق
عبد الله بيجرى على جنب الطريق و العربيات بتتحرك جنبه و كل شويه يبص يلاقى الدرون متابعه يجرى اكتر لحد ما يقع على الارض و ينهج مش عارف ياخد نفسه يقعد و يفضل باصص على الدرون عمال يلف حواليه عربيه ناصر تعدى و تفرمل فجاه و ناصر ينزل يجرى عبد الله يقوم يقف و يجرى عليه عربيات كتير تفرمل و ينزل منها الزنايته و الجوارحه
ناصر / انت بخير جرالك حاجه عملوا فيك حاجه
عبد الله/ عطشان ميه
عباده يرجع عربيته يجيب ازازه و يديها عبد الله يشرب مختار يبص على الدرون الدرون يتحرك ناحيه مختار يطلعوا السلاح و يجوا يضربوه
مختار / ما حدش يضرب
عبد الله/ لا اضربوه دا بينفجر … مختار
الدرون طاير فى ارتفاع مختار يبص ورقه ملزوقه يفكها الدرون يطير بعيد مختار يقرأها يبتسم
ناصر/ ايه ؟
مختار / حبيبك بيمسي … يلا يلا … حمد الله على سلامتك يا عبد الله
عباده / كنا هنموت عليك يا جدع
عبد الله/ بس انا ما خوفتش على فكره
مغاورى يخبطه على ضهره
مغاورى / جدع ياض راجل من ضهر راجل
مختار / طب نرجع بقي و لا ايه
عبد الله / ياريت … صحيح انا حاجتى كانت فى الباص ما حدش لقاها
مغاورى / يا عم انت فى ايه و لا فى ايه دا انت انكتبلك عمر جديد
عبد الله / ما انا لو ما لقيتش المحاضرات بتاعتى هضيع و ساعتها الكبير هيموتنى
ناصر / ههههههههههههههه ان شاء الله نلاقيهم يلا يا رجاله وقفتنا هنا مش حلوه يلا يلا
الكل يركب العربيات و عبد الله يركب مع ناصر و مختار ورا ناصر يسوق
عبد الله / اقولكوا سر
ناصر يبصله فى المرايه
عبد الله / انا كنت هعملها على نفسي و كنت اتشاهدت لحد ما شوفت الدرون الاولانى كنت خايف ما تلحقونيش
مختار / بس مش احنا اللى لحقناك يا عبد الله … دا واحد كدا الكبير بيحبه اوى بيحبه لدرجه انه مانعه يدخل بلدنا
عبد الله يبص لناصر
ناصر / حد قالك قبل كدا انك غتت … دا كان زمان انما دلوقت اتجوز و ربنا صلحله حاله انت عارفنى ما حبش الحال المايل
مختار / ربنا يستر عليه بقي بعد اللى حصل
عبد الله / هو حد فى البيت عارف
ناصر / لا طبعا و مش هيعرفوا الاوتوبيس عمل حادثه و خلاص
عبد الله / تمام تمام
عبد الله يقعد مبسوط و مختار كل شويه يهوى بالورقه ناصر يشدها منه و يكرمشها و يحدفها من الشباك
مختار / هههههههههههههههههههه
………………………..
فى سرايا الزنايته
الغفر قاعدين بيضحكوا و خليفه قاعد وسطيهم ساند راسه على السور جنب البوابه و فى دنيا تانيه خالص تليفونه يرن يطلعه من جيبه و يبص فيه يتنفض و يقوم و يروح فى جنب والغفر واخدين بالهم
خليفه / الو الو
فيرا / عامل ايه
خليفه / ابوس رجلك ابوس ايديكي اطلبى منى اى حاجه غير دى والله ما هقدر و ان قدرت مش هعرف
فيرا / تمام مفيش مشكله هتاخد بعضك و تطلع على اول البلد هتقابلك ست منقبه لابسه اسود هتديك كيس فيه حبوب تحطها لعباده فى الشاى او الاكل او العصير او اى حاجه بتدخل بقه
خليفه / يا شيخه اتقى الله بقي مره فى عمرك
فيرا / يعني انت هتفرح لما بنتك الحلوه دى تتباع لواحد ابن كلب و ما تشوفهاش تانى عباده هينفعك ساعتها لما شرفك اللى يسوى و اللى ما يسواش يدوس عليه تفتكر بنتك هتستحمل اصلا و لا هتموت
خليفه يعيط و يمسح دموعه و يبص حواليه حد واخد باله و لا لا
خليفه / سى عباده مش بيقعد معايا و انا ما ليش دخول المطبخ دى شغله حريم السرايا
فيرا / متاكده انك هتقدر تتصرف
خليفه / مش هعرف هحتاج وقت
فيرا / اسبوع يا عباده يبلع الحبايه يا هبعتلك صور و فيديوهات للنوسه و هى بتدلع فى حضن رجالتى على كل موبايلات رجاله البلد اتفقنا
خليفه / قسما بالله هقتلك هقتلك
فيرا / كان اسيادك قدروا هم برده بيتنطتوا زيك كدا و هقتلك و تهديدات هبله زيهم
خليفه / هتستفيدي ايه لما تقتليه دا جدع طيب و ابن حلال و جايله عيل فى بطن امه
فيرا / مش هقتله ما تخافش انتوا مش لقيتوا العلاج هيخف دى بس قرصه ودن
خليفه / حسبى الله و نعم الوكيل فيكي يا شيخه حسبى الله و نعم الوكيل
فيرا / انت مش محتاج افكرك كل ما نفذت طلباتى اسرع كل ما بنتك روحت اسرع و الاهم من انها تروح انها تروح سليمه
خليفه / ربنا ينتقم منك و من اللى زيك
فيرا / ما تتاخرش سلام
فيرا تقفل خليفه يحط الموبايل فى جيبه و ضهره ينحنى و يسند على ركبه واحد من الغفر يشوفه يقوم يجرى عليه الغفير / خليفه مالك يا خليفه
خليفه / مفيش حاجه مالك فى ايه سرعتنى … بقولكوا ايه يا رجاله انا رايح اقضي مشوار للجماعه و راجع علاطول فتحوا عنيكوا كويس
الغفير ٢ / حاجه ايه دى خليك و انا اقضيهالك انا شكلك تعبان
خليفه / بلا تعبان بلا نيله بقي هو انتوا بتدوا فرصه للواحد يرتاح كل حاجه يا خليفه يا خليفه انا ماشي
خليفه يمشي و الغفر بيبصوا لبعضهم باستغراب
…………………..
فى الجنينه عند الجوارحه
راجل واقف مع عمال بينصبوا صوان ام مغاورى تطلع تبص عليهم
ام مغاورى / الله ينور يا رجاله الهمه عاوزين نخلص قبل المغرب
الراجل / خلاص يا ست الكل ساعه زمن بالكتير
مغاورى يدخل بعربيته امه تروحله
ام مغاورى / خير رجعت بدرى فى حاجه و لا ايه
مغاورى / لا بس شكلها مفيش دفنه النهرده قولت اروح اتشطف و اريح قبل العزا بالليل
ام مغاورى / خير ما عملت اطلع ارتاح
مغاورى / الله ينور يا رجاله
مغاورى يدخل على جوه
مغاورى / السلام عليكم
كوثر / و عليكم السلام يا حبيبي اجبلك لقمه
مغاورى / كتر خيرك يا عمتى امال سماح فين
ماجده/ فوق فى اوضتها
مغاورى يهز راسه و يطلعل
كوثر / تلاقيها عملت مصيبه و حد بلغه
ماجده /و هى هتعملها فين و امتى بقولك ايه يا عمتى سيبك من سماح ابوس ايدك و خلينا نخلص الختمه دى
كوثر / احسن برده
………………..
فى سرايا الزنايته
عبد الله يدخل المضيفه يلاقي اتنين شباب مستنينه
عبد الله / السلام عليكم قالولى انكوا مستنيني
شاب ١ / الاول حمد الله على سلامتك انا جبتلك حاجتك من الاوتوبيس
عبد الله / وربنا انت جدع تسلم ايدك … بس انتوا سبتوا الكليه عشان تجبولى الحاجه و عطلتوا نفسكوا
شاب ٢ / منهم لله بقي ما حدش راح يادوب روحنا البنات و جينا على هنا بس انت اتاخرت قوى قلقتنا عليك
عبد الله / اوعوا يكون حد من السرايا عرف حاجه من اللى حصل
شاب ١ / لا ما تخافش قالولنا على البوابه الاوتوبيس عمل حادثه و انت روحت مع الرجاله المستشفى تطمنوا على اللى اتصابوا و احنا جبنالك حاجتك
عبد الله / و انتوا ما كدبتوش انا فعلا روحت المستشفى مع الرجاله بصينا على الناس ما تقلقوش يعني المهم شربتوا حاجه ضايفوكوا
شاب ٢ / كلنا و شربنا وحلينا كمان هو فى اكرم من بيت الزنايته
عبد الله / ههههههههههههههه انا شخصيا ما شوفتش
شاب ١ / بقولك ايه انت شكلك راجع تعبان نسيبك ترتاح هتروح بكره
عبد الله / و الله مش عارف بس ان شاء الله يعني مهو مش هضيع الترم فى اخره يعني
شاب ٢ / تمام نتقابل بقى بكره عند الاوتوبيس
عبد الله / ان شاء الله
الاتنين الشباب يمشوا عبد الله يطلع يوصلهم يشوف مريم واقفه عند شجره بعيد يروحلها
مريم / حمد الله على سلامتك
عبد الله / وحشتيني
مريم / اتخضيت عليك اوى بس الحمد لله طلعت بسيطه اهى
عبد الله يحط ايده على مناخيره
عبد الله / اه دة خبطه بسيطه بس الحمد لله خير
مريم / اجبلك تتغدى انا ما عرفتش اكل لقمه من قلقى عليك
عبد الله / ليه بس مش انا كلمتك
مريم / برده
عبد الله / خلاص سخنى و ناكل سوا
مريم تبتسم و تمشي و عبد الله متابعها و مبتسم
……………………
فى اوضه مغاورى
مغاورى خارج من الحمام سماح واقفه على الباب بتفرك فى ايدها و التيست بينهم
مغاورى / مالك
سماح تديله التيست
مغاورى / و دا يطلع ايه ده يعني … استني انا
مغاورى يبصلها بعنين واسعه
سماح / عملته النهرده الصبح … انا حامل
مغاورى / بالسرعه دى
سماح / سرعه ايه احنا بقالنا قد ايه متجوزين و بعدين مهو فى ايدك اهو هو انا جيباه من عندى هو انت مش فرحان و لا ايه
مغاورى / لا لا لا فرحان فرحان جدا والله فرحان اوى انا بس مش مصدق
سماح / مش مصدق انى حامل !!
مغاورى / لا مش مصدق انى هبقي اب … انتى … انا … بصي انا ملخبط دلوقت بس والله فرحان انا مش مصدق نفسي انا فرحان بس هو بس انتى متاكده من البتاع ده مش هستحمل بعد ما تعشميني تخلى بيا
سماح / جبته من الصيدليه فى المستشفى امبارح كنت بتكلم مع هند و قالت فى وسط الكلام انها بتحلل كل يوم الصبح قولت اجيبه خصوصا يعني … انت عارف بقي ما تحرجنيش
مغاورى يبتسم
مغاورى / يقطع من هنا و يوصل من هنا الف حمد و شكر ليك يارب الف مليون حمد و شكر ليك يارب
مغاوى يدمع سماح تحط ايدها على خده
سماح / كان نفسي اسمى شاكر بس عباده اولا بيه منى هنسميه شاهين شاهين الجارحى الصغير يمكن يكونله نصيب من اسمه و يطلع زى جده
مغاورى يمسك ايدين سماح يبوسها و يشيلها و يحطها بالراحه على السرير و هى مشبكه ايديها فى ايدين بعض
مغاورى / انا عاوزك ترتاحى على الاخر و ما تشيليش قشايه و انا هبعت اجبلك الدكتوره تبص عليكي و لو ليكي علاج هجيبه لو طلبت اى حاجه هعملها بس انتى ترتاحى
سماح / انا اتخيلت الحظه دى كتير بس معاك احلى بكتير
مغاورى / قولتى لامى قولتى لحد
سماح / قولت اقولك اول واحد
مغاورى / طب خليكي هنا هنزل اقول لامى و اجيلك
سماح / استنى
مغاورى / ايه ؟ هى محتاجه ده اوى هتفرح و يخف عنها حزنها
سماح / لازم ابقي معاك ما تحرمنيش انى اشوف فرحتها بضنايا
مغاورى / مش عاوزك لا تنزلى و لا تطلعى سلالم و لا حتى تقومى من فرشتك
سماح / دا انا لو عيانه مش هرقد الرقده دى جرا ايه يا مغاورى بقولك ايه انا هنزل معاك و نقولهم كلهم مع بعض ايه رايك
مغاورى / اللى تشوفيه بس بالراحه
سماح / بالراحه ما تقلقش هو السلمتين دول هيتعبونى يعني و بعدين انت هتبقي جنبى هبقي اتسند عليك ايه رايك بقي
مغاورى / و ماله قومى يلا
مغاورى يمسك ايد سماح و يمشى جنبها بالراحه و هى بتضحك
………………..
فى اوضه رشيد
فيرا تفتح الباب تلاقيه نايم على السرير بيلعب على الموبايل
فيرا / قاعد لوحدك بتعمل ايه
رشيد / بلعب
فيرا تدخل تقعد جنبه و تتفرج عليه و هو بيلعب عربيات
فيرا / اول مره اشوفك بتلعب
رشيد / و انتى مرقبانى طول الوقت يعني و بعدين دا انا حياتى كلها لعبه
فيرا / و بتكسب و لا بتخسر
رشيد يقفل التليفون و يبصلها
رشيد / شكل الفراغ قاتلك ما تنزليلك جيمين و اتسلى
فيرا / تسمع عن الحاسه السادسه
رشيد / اه سمع الافكار
فيرا / لا توقع الاحداث
رشيد / ما علينا مالها
فيرا / بتبقى عاليه اوى عند الستات
رشيد/ لا يا شيخه
فيرا/ بس مشكلتنا اننا عاطفيين اوى ما بنصدقش او بمعنى ادق بندى فرص كتير اوى
رشيد / دا مش الفراغ بس اللى قاتلك دا فى لسعان كمان
فيرا / اوفر صح ؟
رشيد / اوى
فيرا / امممم بقالى فتره طويله محبوسه فى الفيلا هنا ما تيجي تخرجنى
رشيد / فين هى البلد دى فيها مكان يتراح اطلعى الساحل دهب السخنه سهل حشيش اقولك الاقصر فركه كعب و لا سفر و لا فرهده
فيرا / مين فى البلد دى بيبيع درونز
رشيد / كتير و بعدين النت مخلاش تقدرى تطلبيها اونلاين عاوزه كام واحد ؟
فيرا / تقدر تجبهالى ؟
رشيد/ انا اقدر اجبلك اى حاجه بس كلو بتمنه
فيرا / عاوزه واحد بينفجر
رشيد / دة سهله خالص اى درون عادى اللزقى فيه حته سي فور قد كدا و موبايل معفن و لا انتى بتتكلمى عن نوع معين كسلاح يعنى
فيرا / لا لا فكرتك حلوه و الماتريال عندى بدل ما ابعت و اجيب و اكلف و ما تقلقش حلاوتك محفوظه
فيرا تقوم تقف رشيد يكمل لعب فيرا تبصله
فيرا / مش هتسالنى هعمل ايه بالدرونز دى
رشيد / هتقتلى اكبر عدد من الزنايته و الجوارحه
فيرا / ساعات بنسي انك ذكى اوى
رشيد يبصلها
رشيد / تصدقى زعلت … لا دا انا اتاثرت اوى و حاسس انى اتهنت كدا … و لا انا مكبر الموضوع … بيتهيالى مكبر الموضوع
رشيد يكمل لعب فيرا تبصله و تمشي و تقفل الباب يبص على الباب
…………………..
فى سرايا الجوارحه
ام مغاورى تحضن سماح و تبوسها
ام مغاورى / لو كنا وقت تانى كنت زرغطت الف مبروك يا بنتى الف مليون مبروك ربنا يتملك على خير و يرزقك الزريه الصالحه
ام مغاورى توسع و البنات و الستات يحضنوها و يباركولها
ماجده / قسما بالله كانه لوح تلج و برد على قلبي الف مليون مبروك يا سماح مبروك يا خويا ربنا يتملكوا على خير و يتربى فى عزكوا
مغاورى يبوس راس ماجده و ياخدها فى حضنه كوثر دورها يجي يقفوا قدام بعض صمت من الكل
كوثر/ مبروك يا سماح
سماح / حاف كدا مش هتحضنيني و تبوسيني زيهم دا حتى هيبقي شاكر الصغير
كوثر تاخدها فى حضنها و الاتنين مبتسمين بافتعال و مش طايقين بعض
كوثر / معلش هو بس الواحد مستغرب على التوقيت
سماح / ربنا كريم ما رضاش مغاورى يبات زعلان حب يفرحه نعترض بقي على حكمه ربنا
ام مغاورى / و نعم بالله و الف حمد و شكر ليك يا رب
مغاورى / سماح هتبقي امانتك يا امى بقولها ترتاح مش راضيه و انتى عرفاها صغيره و حركتها كتير
سماح / الله يا مغاورى
ام مغاورى / فى عيني يا ابنى اطمن … اطلع انت اقف مع الرجاله و انا هقعدها جنبى مش هحركها من مكانها … صحيح ما حدش يجيب سيره الحمل فى العزا مش ناقصين مصايب بعنيهم اللى تفلق الحجر دى يلا كل واحده تشوف وراها ايه تعمله قبل الناس ما تيجي يلا
ام مغاورى تروح ناحيه المطبخ سماح تروح وراها
سماح / هتعملى حاجه اساعدك
ام مغاورى / تسلمى يا قلبي روحى ارتاحى انا بس هاكد لاخر مره على القهوه و الفناجين مش عاوزين الناس يقولوا علينا حاجه الله يرحمه كان محنتف مش عاوزه اسمه يتحط جنب اى حاجه مش مظبوطه كفايا اللى حصل امبارح و الناس اللى ماتت و الهم اللى هم فيه هيبقي ده كمان
سماح/ ان شاء الله كل حاجه هتبقي زى الفل بس انتى اهدى
ام مغاورى / اطلعى ارتاحى و لما الناس يجوا هقولك تنزلى
سماح تبتسم و تمشي
…………………..
فى اوضه مختار
هند / يعني مش هينفع
مختار/ انا ما فهمتش منه حاجه و محبتوش و اتكلمت بعد ما مشي مع الدكاتره كلامه هو راخر ما عجبهمش
هند / يبقي بناقصه
مختار / انا ما فييش دماغ لاى حاجه اقسم بالله و لولا الراجل كان فى بلدى ما كنتش حتى قدرت اسمعله بس دا ضيف و من المستشفى للعزا لما خلاص ورمت مش قادر
هند / الله يعينك
مختار / انا مش هسفرك مصر تانى حتى لو معاكى جيش انا مش مستعجل على الخلفه هتيجي لوحدها و لا ما تجيش انا مش عاوز كلام فى الموضوع ده تانى
هند / تمام
مختار / و انتى بطلى اللى بتعمليه ده ايه اللى هيتغير من امبارح للنهرده يعني
هند / خلاص يا مختار اقفل على الموضوع لو سمحت
مختار / انا بتكلم عشانك
هند / عرفت ان سماح حامل
مختار / ايه ده امتى ده
هند / عرفنا النهرده فى العزا قالتلنا فى الاستخبص كدا عشان الناس ههههههههه بطه كانت هتزغرط و ام فاتن لحقتها كانت هتفضحنا
مختار / ربنا يتملها على خير و يرزقها بالذريه الصالحه و اياكش ست ام عباس تهدى عليها و تريحنا و تريح روحها
مختار ينام فى السرير و يتغطى هند تنام جنبه و تبصله ياخدها فى حضنه
مختار / ما تحطيش حاجه فى دماغك عارف انهم اكيد ضايقوكى حتى لو ببصه من غير ما يقصدوا هههههههه تعرفى مغاورى لو ما كانش ابوه ميت و زعلان و مش فايق و كدا كان جه يغيظنى
هند تبتسم بحزن
مختار/ بس هو طيب طور شويه بس طيب و حنين على فكره و جدع
هند / اخدت بالى
مختار / الدور على امين بقي نشوفله عروسه حلوه كدا محامى قد الدنيا ما بحبش انا الجماعه بتوع الحقوق دول بخاف منهم
هند / ههههههههههههههههههههه اشمعن
مختار / اصل اخد الحق صنعه و دول الصنايعيه اللى على حق اللى بياخدوا حقهم و حق غيرهم و كلو بالقانون ناس وكلاها والعه مش احنا اللى قضينا عمرنا فى نباتات و حشرات
هند / الارض ما بتطلعش غير كل خير عمرها ما تاذى حد و لا تاخد حق حد تديه لحد تانى و لا تظلم حد
مختار / تكسبي فدى بقي معاكى حق
هند / هى الارض اللى اتحرقت باظت خالص
مختار / ما تقلقيش عديت عليهم و قولتلهم يعملوا ايه و قريب باذن الله هترجع خضره زى ما كانت و احسن بقولك ايه طفى النور ده لحسن انا هلكان
هند تمد ايدها تطفى النور اللى جنبها و مختار يمد ايده يطفى اللى جنبه هند تمد ايدها هى كمان مختار يبصلها ترجع تنام مكانها
مختار / ايديه تانى
هند تايد اللى جنبها
مختار / و اللى جنبى و لا انتى بتطفى بس
هند / نام يا مختار
مختار يروح يحضنها اوى
مختار / ما احنا هنام امال هنعمل ايه يعني
هند / ههههههههههههههه
………………….
فى سرايا الجوارحه
الرجاله متجمعه فى المضيفه مغاورى يدخل
مغاورى / لا مؤاخذه يا رجاله خليتكوا تستنونى
ناصر / كنا بنتكلم هنعمل ايه فى حكايه الدرونز دى
مغاورى / انا قريت كتير امبارح فى الحكايه دى
مختار / و وصلت لحاجه و لا اكتفيت بالقرايه
عباده / بقي كبير الجوارحه و مش هنعرف نتمالس عليه خلاص
ناصر / وقت لعب العيال هو
عباده و مختار يرفعوا ايديهم اعتزار و يبصوا لبعض الكل يضحك و اولهم مغاورى
مغاورى / على العموم انا لقيت حلول كتير و اتكلمت النهرده الصبح مع فتوح بس لازم اخد رايكوا فيها الاول
ناصر / خير قول
مغاورى / احنا هنحط كام غفير فوق المبانى العاليه زى مناره المسجد و الكنيسه و كام مبنى عالى و اى حد يرصد بتاعه من دول يبلغنا و الباقي بقي فتوح يشرحه عشان مش هتفهموا منى حاجه الصراحه
عباده/ اتحدى انك تكون انت فاهم اساسا
ناصر/ عباده
عباده/ تمام والله خلاص
فتوح / احنا هنحتاج نشوش على الدرونز دى بموجات المايكرووايف بس دى هتقطع كل الاتصالات عن البلد بس فى حل تانى بس ما عندناش الامكانيات او اقصد هنحتاج نجيبها من بره اننا نجيب بنادق الدرون دى بتشوش عليها وبتخلينا نتحكم فيها و ننزلها
عباده / يعني يا نخسر الاتصالات يا نفضل حاطين ايدينا على خدنا يا نلحق يا ما نلحقش
مختار / شبك صيد السمان و اليمام
ناصر / تعدى من فوقه عادى
مختار / الدرون اللى كان طاير ورا عبد الله ده من بتاع محلات الموبايلات اللى برمود كنترول حد بيجرى وراه من بعيد شويه و بيوجهه بالدراعات انما هى بتتحكم و هى هناك مش هتشوف الشبك بتاعنا
مغاورى / ليها عنين وسطينا احنا ما نعرفهمش ما تضحكش على روحك
مختار / يبقي نقطع الاتصال من المنبع بدل ما نشوش على روحنا نشوش عندها هناك
سليمان / ملعوبه
مغاورى يبص لفتوح
فتوح / هنحتاج نزرع اجهزه تشويش ارسال حوالين الفيلا بتاعتها بس هم اكتر من واحده
مغاورى / انا رأيي أنها هتبقي فكره حلوه
عباده / كان نفسي اتفق معاكوا بس احنا هنعتمد على حاجه مش تحت عنينا و تحت ايديها و يا عالم هى مامنه منطقتها ازاى
ناصر / معاك يا عباده ما ينفعش نرمى الاجهزه دى و نطلع نجرى لا هنعرف نجيب زيها و لا حتى هنلحق
مختار / يبقي نعمل زى ما مغاورى قال نحط الغفر فى اماكن عاليه تراقب الدرونز و اول ما يوصلوا ننشهم
عباده / مش غفر بقى
مختار / دى لعبتك انت بقي تظبطها براحتك
عباده/ عجبتنى الحكايه دى
مغاورى / قناصتك هيتعبوا ليل نهار من غير راحه
عباده / انا بقول كفايا احتراف بقي و نلم الشمل الفتره الجايه
ناصر / و انا موافق بس خلوا جهاز التشويش احتياطى خلونا نامن نفسنا باكتر من اتجاه
مغاورى/ على بركه الله
…………………..
فى محل وسام
الشاب بيدي وسام فلوس
الشاب / اتفضلى يا ستى خلو المحل و تمن البضاعه و كل اللى اتفقنا عليه
وسام تاخدهم و هى مبسوطه تحطهم فى شنطه
الشاب / مش هتعديهم
وسام / هعد وراك برده
وسام تدى الشاب الشنطه
وسام / الفلوس دى على اللى معايا كدا كملتلك الفلوس لاصحابك مضيهم بقي على العقد
الشاب / تمام اديني ساعه زمن امضيهم و اجبلك العقود تمضيها
وسام / طب ما اجى معاك و يبقي سلم و استلم
الشاب / منصور هيبقي موجود خلينا نمضى و ننجز يقولك كلمه يبصلك بصه نقفش و نبوظ البيعه
وسام / تمام الفلوس معاك اهى
الشاب / على العموم ان كنتم اخوات اتحاسبوا
الشاب يمد ايده ياخد ورقه و قلم و يكتب
الشاب / ايصال امانه
وسام / انت بتعمل ايه
الشاب / ما انا هاخده لما اجبلك العقد
وسام / انت بتعمل بينا تكليف ليه بس
الشاب / وسام بقولك ايه الحق ما يزعلش اتفضلي يا ستى
وسام / اللى تشوفه
وسام تاخد الفلوس و الشاب ياخد الشنطه و يمشي و يحدفلها بوسه و هو ماشي
………………………
فى جنينه الجوارحه
الكل خارج عباده و مختار وامين ماشيين جنب بعض و ناصر و مغاورى ماشيين جنب بعض
امين / لا و نازلنا متاخر و لابس عبايه ابوه قال يعني كدا بقي الكبير
مختار / الكبير غصب عن عين الطخين فينا
عباده/ ما طلعتش حلوه زى ما الواحد كان فاكر
مختار / مات الملك عاش الملك دايره و كلنا بنلف جواها
عباده / بتعيش عمرك تعمل كل اللى تقدر عليه عشان تبقي احسن واحد يليق بيها بس عشان تطولها لازم حد غال اوى على قلبك يموت
مختار / فى دى معاك حق
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
