رواية البر التاني الفصل السابع والخمسون 57 بقلم لولو محمد
رواية البر التاني الجزء السابع والخمسون
رواية البر التاني البارت السابع والخمسون
رواية البر التاني الحلقة السابعة والخمسون
عبد الله / هى الكاميرات دى فين
الكبير / حوالين الفيلا من كل ناحيه و على كل الطرق اللى بتوصلها
شاكر / و قريب اوى هنركبها على كل مداخل و مخارج البلد و فى كل الشوارع
عبد الله / ما شاء الله بس دى كدا هتحتاج ناس كتير بقى تتفرغلها
شاكر / ناوين على كدا ان شاء الله
ناصر / احنا لازم نواكب العصر و التكنولوجيا كدا احسن و امان لينا و لعيالنا بعد كدا
عبد الله يبص فوق على السطح يشوف هند واقفه بتبص فى المنظار
عبد الله / ما دام فى هنا كاميرات موقفينهم فوق ليه صحيح
ناصر / مهو للاسف التكنولوجيا سلاح ذو حدين الكاميرات دى ممكن تخترق و يعمونا
عبد الله / كبير يا كبير
ناصر / فى الحاجات دى جيلكوا الكبير و ما فى بعده كبير دا الواد فتوح الجرحى هو اللى علمنى الكلام ده اصله عقبال عيالك باشمهندس كومبيوتر قد الدنيا تخصص مش فاكر ايه كدا
شاكر / شبكات … بيقول على نفسه هاكر
ناصر / احنا ليه ما عندناش حد خالص دخل هندسه صحيح يا شاكر المفروض نبقى نهتم بالحاجات دى بعد كدا
شاكر/ هو بمزاجنا يا كبير دا مختار داخل زراعه على الحركرك
ناصر / على قولك يلا اللى فيه الخير يقدمه ربنا ما تصبلنا شاى يا عبد الله
عبد الله / حاضر يا كبير
عبد الله يقوم يشيل البراد من على قصعه فيها فحم مولع و يصبه فى كبايات و هو بيبرطم
عبد الله / والله اللى يشوفكوا فى هدوئكوا ده يقول الرجاله طالعه مصيف
ناصر / سامعك
عبد الله / حبيبى يا كبير والله احلى كبايه شاى عنب
ناصر / هههههههههههههههههههه اقعد اقعد
………………….
فى فيلا فيرا
رشيد نايم جنبه سمر فيرا تفتح الباب بسرعه رشيد يسحب المسدس من تحت المخده
فيرا / اتحرك ورايا بسرعه خمس دقايق و الزنايته هيهجموا على الفيلا
رشيد يبص لسمر و ياخد مسدسه و ينزلوا جرى ورا فيرا الرجاله كل واحد شايل سلاح
رشيد / لو هجموا
فيرا / اكتيفات ذا الليكتريك جايت (شغلى البوابه الكهربائيه
بنت / دن ( حصل )
فيرا / برينج از ماتش ويبن از يو كان ( هاتوا اسلحه على قد ما تقدروا )
رشيد يبص على اللاب مع واحده عربيات بتتحرك على الطريق
رشيد / انتى حاطه كاميرات على الشجر
فيرا / امال انت فاكرنى هستناهم لما يوصلوا للبوابه بتاعتى الاغبيه اخترقوا كاميرات الفيلا و ما خدوش بالهم ان فى نظامين للمراقبه
رشيد / صحيح ان كيدهن عظيم
ادواردوا يدخل
ادواردوا / ايفرى ثينج ايز ريدى ( كل حاجه جاهزه )
رشيد / احنا لازم نهرب احنا لو وقفنالهم هيشخرمونا
فيرا / تعال ورايا … ايفرى بودى فولو مى ( الكل ورايا )
فيرا تفتح باب المخزن مليان سلاح
رشيد/ الله اكبر لا شغل فنادق صحيح
صوت انفجار كبير سمر تصرخ و الكل يتفاجئ صوت انفجار تانى صوت انفجار تالت راجل يدخل يجرى
راجل / ذاى هير ( وصلوا )
فيرا / ههههههههههههههههه
فيرا تضربه بالنار و تصرخ فيه
فيرا / اى كان تيل ايديت ( انا عارفه يا غبى )
فيرا تشيل سجاده من الارض فى باب خشب ترفعه فى سلم
فيرا / امشى النفق لاخره يلا اتحرك
رشيد / و انتى ؟
فيرا / اكيد هاجى وراك بس لما اتاكد ان الكل مشى يلا اتحرك
رشيد / و السلاح ده كله
فيرا/ اتحرك بقولك
رشيد يمسك ايد سمر و يجروا فى النفق و الرجاله بسلاحهم يجروا وراه فيرا تبص لادواردوا و تنزل يمسك الباب و ينزل و يقفله وراه و يجروا فى النفق
رشيد / على فين كدا
الكل بيتحرك فى صمت لحد ما يوصلوا لباب راجل يفتحه يطلعوا يلاقوا عربيات و رجاله واقفه
فيرا / اركبوا
رشيد / و حاجتنا اللى هناك
فيرا / لو تحب ترجع تجيبها اتفضل
رشيد / خلقك بقي ضيق اوى
فيرا ترفع ايدها ماسكه جهاز تتك على زرار النفق ينفجر
فيرا / ما تقلقش على حاجتك هجيبهالك كلها بس مش داوقت .. ممكن بقي نتحرك و نروح مكان تانى يكون امان لحد ما نشوف هنعمل ايه
رشيد / ممكن … اركبى يا سمر
الكل يركب و العربيات بتتحرك
……………….
فى فيلا فيرا
مختار يضرب نار على باب الفيلا و يدخل و الرجاله وراه ينتشروا فى كل مكان يبص لعباده المكان فاضي كل واحد يروح فى ناحيه فجاه صوت انفجار الرجاله تنزل من فوق ناحيه الصوت امين اول واحد يوصل المخزن و يفتح الباب تراب كتير طالع منه الكل يغطى وشه امين يقفل الباب تانى مختار يصرخ بعصبيه
عباده / اهدى
مغاورى يدخل
مغاورى / مالهمش اثر فى المكان بس سايبين وراهم شئ و شويات
مختار / انت بتقول ايه انت
مغاورى / مهو مش عشان ما عرفناش نقتلها ما نعورهاش
مختار يبص لعباده
امين / معاه حق
مختار يبص لامين
امين / و المخروبه دى هنحرقها قبل ما نمشي هنجيب عليها واطيها
عباده / فتوح فين
عباده يطلع فوق يتحرك فى المكان و الرجاله وراه بيحملوا الحاجه على العربيات بسرعه عباده يلاقي فتوح قاعد قدام شاشات المراقبه
عباده / اللى حصل ده حصل ازاى
فتوح / انا هكرت كاميرات الفيلا كلها بس ما كنتش اعرف انها مركبه كاميرات فى الاماكن دى كلها دى حتى ليها كاميرات فى البلد عندنا
عباده / ازاى يعني
فتوح / اقسم بالله مش ده محل الواد حسونه ابو العنين
عباده يقرب من الشاشه
عباده / ما تقومش من كرسيك الا اما تعرفلى كاميراتها فين على قد ما تقدر و ان قدرتش صورهم و احنا ندور براحتنا فى البيت
فتوح / لا ما تقلقش انا هظبطها
عباده / نص ساعه بالكتير احنا ما نعرفش مخبيالنا ايه هنا
فتوح / تمام
عباده يطلع بره يلاقي الرجاله بتشيل صناديق و امين جايب جرادل جاز و بيكب على الستاير عباده يروحله
عباده / انت بتعمل ايه
امين / بولع فى المخروبه دى
عباده / افتح شنطه عربيتي و هات الصندوق اللى فيها
امين يبصله و يجرى مختار ينزل من فوق
عباده / كنت فين
مختار يقرب اوى من عباده
مختار / بجيب حاجه رشيد من فوق
عباده / رشيد صح
مختار / ما تحاولش خارج التغطيه واضح انها اى كان المكان اللى هى فيه مركبه فيه جهاز تشويش
مغاورى يدخل
مغاورى / لازم نمشي بسرعه حد بلغ البوليس و جايين على هنا
مختار / لا والله … ما ده اللى ناقص
مغاورى بعلو حسه
مغاورى / على العربيات كلو على العربيات
الرجاله تطلع تجرى و امين يدخل بالصندوق يحطه فى الارض عباده يفتحه يطلع منه قنابل صغيره
عباده / انا شوفت فيديوهات كتير للبتاعه دى و كنت هموت و اجربها
الكل يضحك و كل واحد يمد ايده و ياخد واحده و يروحوا يلزقوها على عمود من العمدان فتوح يطلع من جوه شايل شنطه لاب و هو بيجرى
عباده / خلصت ؟
فتوح / عيب عليك
عباده يبتسم و يطلعوا كلهم يجروا
مغاورى / هندخل البلد من البر التانى عشان ما نقابلش الحكومه
مختار / لا هنقابلهم
عباده / انت بتقول ايه
مختار / امين … نضف عربيتي
امين يفتح العربيه و يطلع منها السلاح كله هو و الرجاله
عباده / انت بتعمل ايه
مختار / بكسب وقت
عباده / هاجى معاك
عباده يفتح عربيته و يطلع منها السلاح و يعبوه فى عربيه مغاورى
مختار / اللى شايل سلاح مرخص بس اللى يركب معانا يا رجاله
العربيات كلها تتحرك فى اتجاه و عربيه مختار و عباده و عربيه نص نقل محمله رجاله ترجع و اول ما اخر عربيه تطلع من الفيلا عباده يطلع من جيبه جهاز فيه زرار احمر يبوسه و يدوس الزرار و هو مبتسم القنابل كلها تفرقع و المبنى يقع و التراب يملا المكان
……………….
فى عربيه فيرا
رشيد / احنا هنفضل ماشيين فى الصحرا لحد امتى
فيرا / ما تقلقش قربنا نوصل بس ما ينفعش نمشي على الطريق العمومى و لا انت مش واخد بالك ان النهار طلع
رشيد / واخد … واخد … بس انا مش فاهمك
فيرا / تقصد ايه
رشيد / اقصد ايه اللى حركهم فجاه كدا
فيرا / فعلا انا برده بسال نفس السؤال و ليه ما قتلكش الصبح
رشيد / ما بيجروش ورا ديول الافعه بيضربوا الراس علاطول
فيرا / الافعى دى انا !!!
رشيد / شويه عليكي حتى … نفق تحت الفيلا و شغل فنادق حاجه اخر حلاوه … لو كان قدامنا وقت كنا حطينا قنبلتين و اول ما دخلوا فجرنا المكان و بوووووم
سمر تبص لرشيد
فيرا / ههههههههههههههههه كان فى بس للاسف كان وسطيهم اول واحد داخل و اخر واحد خارج
الابتسامه تروح من وش رشيد
فيرا / ازاى هند تسمحله يروح مهمه خطر زى دى معقول ما بقتش تحبه زى زمان
صمت
فيرا / اعمل ايه اكتر من كدا عشان اخوفها دا مش ناقص غير انى اموت اخوها بقي … واد دو يو ثينك ادواردو شود وى كيل ذات هانسم كيد اى تواد يو ابوت ( ايه رايك يا ادواردو تفتكر المفروض نقتل الولد الوسيم اللى حكتلك عنه )
ادواردو / يو نو ( انتى عارفه … )
رشيد / ما يمكن ده السبب
فيرا / سورى .. بتقول حاجه
رشيد / رقدتى جوزها و اخوها و خطفتى اخوها و النهرده سورى امبارح جوزها راجع مضروب يمكن ده اللى خلاها تسمحله يروح يمكن ده اللى خلاها ما تقفش فى طريقهم يمكن ده اللى خلاهم يتحركوا
فيرا / وجهه نظر بس مش ده السبب من غيرى ما فيش حبوب الناس دى عرفوا حجمى الحقيقي لما سالوا عند ابو فارس الناس دى عارفه انهم من غير الحبوب الناس دى كلها هتموت
فيرا تبص على سمر فى المرايه
رشيد / ما يمكن خايفين توصليلهم كدا كدا اللى عمله ابو فارس قطع العلاقات بينهم و لولا حكايه راس الحيه اللى قولتلك عليها كانوا قتلوهم .. دى فيها حريم و لا مؤاخذه
فيرا / قصدك يضحكوا بالجزء المصاب قبل ما ينشروا المرض بينهم
رشيد / بالظبط زى الغرغرينا يا تقطعى الحته المصابه يا هتنتشر و تسمم الجسم كله
فيرا / وجهه نظر برده لما نروح بيتنا الجديد نقعد و نفكر فى كل ده على رواقه دلوقت نشوف مكان نفطر فيه
رشيد / انا هاخد اتنين سكلانس و واحد مسقعه
فيرا / وات ايفر ( اى يكن )
………………….
فى السرايا
هند تنزل من فوق تروح لناصر ناصر يقوم و يروحلها
ناصر / ايه اللى طلعك
هند / هنفضل محبوسين لامتى النهار طلع
ناصر / لحد ما يكلمونا و نطمن
هند تبصله بحزن و خوف
هند / و ان ما كلموناش
ناصر / استبشروا بالخير تجدوه هيتكلموا ان شاء الله
تليفون ناصر يرن ناصر يطلعه و هو مبتسم
ناصر / اهو ابن الحلال بيجي على السيره …. السلام عليكم
مختار / احنا راجعين فى الطريق
ناصر / الحمد لله طمنى
مختار / كلنا بخير عرفت اننا جايين و هربت قبل ما ندخل تقريبا فى نفق تحت الفيلا ما كناش نعرف حاجه عنه
ناصر / ازاى يعني امال سى زفت ده بيعمل ايه
مختار / اهو اللى حصل بقي
ناصر / المهم انكوا بخير
مختار / الحمد لله
هند تشاورله يديهولها ناصر يهز راسه لا
ناصر / ركز فى طريقك و تعال على هنا
مختار / اكيد .. سلام
ناصر يقفل
هند / ليه
ناصر / جاى فى الطريق كلهم بخير … هربت اصلا ما لحقوهاش
هند / هو الهاكر اللى معاكم ما عرفش يعطل الكاميرات
ناصر / لا كان عندنا نفق تحت الارض … لما يوصلوا نفهم كل حاجه ان شاء الله المهم طمنيني انتى .. عملتوا ايه مع الحريم اللى جوه
هند / زى ما حضرتك امرت … نزلت صحيتهم اتوضوا و صلوا و عملوا الفطار و اكلوا و قافلين عليهم جوه بيجهزوا للغدى ممنوع الخروج من السرايا و لا فتح باب او شباك
ناصر يهز راسه
هند / بس اللى مستغرباه ان ما حدش سال ليه ما حدش حتى استغرب دا حتى ماما
ناصر يبتسم
ناصر / هو يعني مش باين بالعين ايه اللى بيحصل يا هند لو كان اللى بيحصل فى احتمال واحد فى المليون انه يدارى عمرى ما كنت قولتلك
هند / ممكن تثق فيا علي فكره
ناصر / اكتر من روحى و ربنا شاهد بس احنا هنا بنخاف عليكي بزياده شويه
هند تبتسم و تهز راسها
ناصر / هو الغلابه اللى بره ما لهمش لقمه من الفطار بتاعكوا ده و لا ان ما كانش مختار ما حدش ياكل
هند تضحك
هند / حالا
ناصر / و قوليلهم خلاص طمنيهم خليهم يلموا الليله فوق كمان
هند / حاضر
هند تدخل جوه ناصر يرجع يقعد
شاكر / كلموك
ناصر / ايوه
شاكر / بلغت عنهم الحكومه انهم هجموا عليها فجروا البيت قبل ما يمشوا
ناصر / جدعان
عبد الله / بس خدوا سلاح كتير كمان … هى دى كدا اسمها غنيمه صح
ناصر / هههههههههههههههههههه حاجه زى كدا
………………….
فى مصر
حامد قاعد على قهوه يوسف يدخل
يوسف / صباح الخير يا عمى
حامد / صباح النور يا يوسف ايه اللى جايبك بدرى السعادى
يوسف / اعمل ايه بس ما انا مش عارف اوصلك من ساعه ما اشتريت التاكس ده و انت علاطول مش فاضى
حامد / اقولك ايه بس ما انت مش حاسس لسه بتنام على نفس فرشتك و بتروح تلاقى اكل مستنيك و ابوك مشغلك معاه انما انا نمت صحيت لقيت عليا ديون لطوب الارض بعت الشقه التمليك و نقلت لواحده ايجار و ياريت ايجارها رخيص و سددت الديون اللى عليا و الباقى اشتريت بيه حته التاكس الكحيان ده و ببدل عليه انا و اتنين تانين
يوسف / ما انا كمان بعت شقتى و عربيتي يا عمى
حامد / بكره ابوك يجيبلك غيرهم انما انا ماعييش اجيب لعيالى توكتوك حتى
يوسف / بكره تتعدل
حامد / دا حتى ابوك الواطى ما عدش بيدينى نصيبي من الارباح
يوسف / على فكره انا اتكلمت معاه فى الموضوع ده
حامد / و طبعا طلب منك تبعد عنى
يوسف / لا بس حكالى حضرتك عملت معاه ايه
حامد / عملت معاه ايه يعنى طلبت منه يساعدنى قبل ما اتحبس انا لو كنت حطيت ايدي فى ايد مختار بدل ايدك انت ما كانش ده بقى حالى
يوسف يبص فى الارض
حامد / بس انا اخترتك انت و لو عاد بيا الزمن هختارك انت برده عشان انت ابنى يا يوسف
يوسف / خلاص يا عمى سيره و اتفضت
حامد / عملت ايه مع وسام
يوسف / خلاص بقى يا عمى مفيش فايده
حامد / يعنى ايه
يوسف / يعنى جابت شهود قالوا انى استلمت شبكتى بالكامل
حامد / بنت الكلب و لا كان باين عليها خالص
يوسف/ بصراحه كدا احسن انا ما كنتش مرتاح انا قولتلها تاخدها ازاى بعد كدا ارجع فى كلامى
حامد / يعنى السكه دى اتسدت خالص
شاب يدخل حامد يقوم
حامد / اتاخرت ليه المفروض كنت تسلم من ساعه
الشاب / السكه زحمه
حامد / هات البونديره
الشاب يديله فلوس و المفتاح
حامد / ما تتاخرش بقى بالليل
الشاب / ان شاء الله بالاذن انا عشان مطبق و هلكان
حامد / بالسلامه يا حبيبى … هستاذنك بقى يا يوسف عشان اللحق اعملى بونديرتين تلاته قبل معاد الانصراف فى الشغل بتاعى
يوسف / هو انت مش هتقولهم انك سويت معاشك
حامد / عشان تزن عليا نحطها مقدم شقه و اتسحل انا فى اقساطها
يوسف / هو حضرتك قبضت الكافاه
حامد / لسه ولاد الكلب مطلعين عين امى
يوسف / طب فكرت هتعمل ايه بالفلوس دى
حامد / هعمل بيها ايه يعنى اللى يتلسع من الشوربه ينفخ فى الزبادى انا هحطها فى البنك و اخد الفايده كل شهر بادبى مش هجازف باخر مليم معايا اديك شايف المرمطه اللى بقيت فيها و لو لا قدر الله حصل حاجه اديك شايف ما عنديش اللى يمدلى ايده و اديك شوفت ابوك عمل معايا ايه
يوسف / ايوه يا عمى بس
حامد / بص يا يوسف انا بحبك بس انت ليه متوقع منى اعمل معاك اللى ابوك نفسه ما عملوش هو ابوك معهوش يفتحلك الكافيه اللى نفسك فيه طب الاول كان بيوضب المحل انما الحمد لله دلوقت المحل رجع زى الاول و يمكن احسن دا انا لسه مكلم حمدى امبارح قالى انه مسك فيه شيفت عشان يزود دخله
يوسف / ايوه عشان نحاول نقلل العمال لان المحل مش جايب
حامد / مش جايب ايه يا يوسف ما الحسابات قدامك راجعها و انت تعرف انه بيجيب كويس قوى كمان ابوك اللى بقى بيكنزهم على قلبه رزم رزم
يوسف / انت بتقول ايه يا عمى
حامد / ما بقولش انا ماشي عشان اللحق الشغل يلا اشوفك بعدين سلام
حامد يمشى و يوسف قاعد مضايق القهوجى يدخل
القهوجى / تشرب حاجه يا سى يوسف
يوسف / لا شكرا
يوسف يقوم عشان يمشى
القهوجى / و العشره جنيه
يوسف / عشره ايه
القهوجى / هو مش انت هتحاسب مكان الاستاذ حامد
يوسف ينفخ و يطلع العشره جنيه و يمشى
………………..
على الطريق
مختار سايق و راجع و جنبه امين و اتنين رجاله ورا وراهم عربيه عباده مليانه و النص نقل مليانه يقابلوا عربيه جيب سودا وراها بوكس الاتنين يفرملوا و العربيه السوده ينزل منها فارس و يروح ناحيه مختار مختار يفتح الازاز
مختار / فى حاجه يا باشا
فارس / انزلى ياله
امين يتعصب
امين / ياله!!!
مختار / اهدى يا امين مقامنا محفوظ كلمه الباشا مش هتقل منا
مختار يبص لفارس
مختار / و لا هتفرق معانا …خير اؤمر
فارس يخبط على العربيه و يزعق
فارس / انا ما بحبش اكرر كلامى انزل اما نفتش العربيه
مختار يبتسم و ينزل العساكر واقفين يبصوله يحيهم براسه يحيوه عسكرى يروح يوشوش فارس
العسكرى / يا باشا دا سي مختار الزيني و دول كبارات شباب الزنايته
فارس / حصلنا الرعب يا سيدى اؤمر
مختار / اتفضلوا يا رجاله فتشوا احنا خدامين الحكومه احنا تحت امركوا يا عم سباعى تسلم
العسكرى يبص لمختار و يشاور للرجاله تفتش العربيات
فارس / لف و اركن على العربيه
مختار / مش محتاج تفتشنى معايا سلاح
مختار يطلع سلاحه و يديه الظابط
مختار / و ادى رخصته اهو و عشان وقتك و وقت الرجاله كلنا شايلين سلاح … طلعوا سلاحكوا يا رجاله
الرجاله كلها تطلع سلاح
مختار / وروا الباشا الرخص
الرجاله كلها تتحرك و توريله الرخص و مختار و فارس عينهم فى عين بعض
مختار / نورت بلدنا يا باشا كنت قول انك جاى كنت قمنا بالواجب و لا اى حاجه
فارس / ما شاء الله كلكوا مسلحين انتوا تنظيم بقي
مختار / انت اول مره تخدم فى الصعيد و لا ايه يا بيه ؟ طب ما شوفتش افلام كمان
فارس / انت هتستظرف يا روح امك انجر قدامى على البوكس
فارس يزق مختار على البوكس الرجاله تمنعه و تحاوط فارس و العساكر واقفه بره ما بتدخلش
عباده / مش عشان حكومه تفتروا على الخلق
امين / انت اصلا مش من حقك تقبض عليه
فارس / و انت بقي اللى هتعرفنى شغلى كمان
امين / الماده رقم اربعين من قانون الاجراءات الجنائيه بتقول لا يجوز القبض على اى انسان او حبسه الا بامر من السلطات المختصه بذلك قانونا كما تجب معاملته بما يحفظ عليه كرامه الانسان و لا يجوز ايذائه بدنيا او معنويا
مختار يزعق
مختار / خلاص .. الباشا ضيف برضه
الرجاله توسع و يرجع فارس قدام مختار
مختار / الباشا غريب يا رجاله ما يعرفناش و لا يعرف عاداتنا بس ان شاء الله ان عشنا و كان لينا عمر هيتعلمها
فارس / انت لابس واقى رصاص ليه ياله
العساكر و الرجاله يبصوا لبعض
شاب / دى التالته كدا
فارس يبصله مختار يبتسم
مختار / اصلي مستهدف انت ما سمعتش اللى بيحصل فى بلدنا و لا ايه
فارس / اللى هو ؟
عباده / حرمه سعرانه بتربط الرجاله من رقابيهم باطواق و تسحبهم تحت رجليها زى الكلاب
مختار / بس ما تقولش رجاله
الكل يضحك
فارس / دمك خفيف اوى
مختار / لا و لسه لما تعرفنى هتحبنى اوى
فارس / ما احنا هنتعرف … انجر قدامى
فارس يزق مختار الرجاله كلها تهيج تانى و تتحرك ناحيه فارس فارس يطلع مسدسه و يضرب طلقتين فى الهوا
فارس / اللى هيتحرك هضربه بالنار و ما لوش عندى ديه
عباده / راجل اعملها و نشوف مين فينا اللى ما لوش ديه
امين / اساسا ما عدش ليك حمايا عندنا
مختار يزعق فيهم
مختار / خلاص
الرجاله تتلم فارس يبص للعساكر باصين فى الارض
فارس / قسما بالله لحاسبكم واحد واحد على الكلام ده
فارس يبص للعساكر
فارس / حتى انتوا يا غجر
مختار / وقتك يا باشا
فارس يبص حواليه مختار يروح يقف ناحيه البوكس و يركب جنب السواق و يخبط على الباب العساكر يروحوا يركبوا البوكس
مختار/ جاى يا باشا و لا نسبقك احنا
فارس يبص حواليه واقف لوحده وسط كل دول بيبصوله شظرا يروح يركب و هو عصبى جدا و يسوق و البوكس وراه
امين / احنا هنسكت على الحيوان ده
عباده / تبقي بعيبه
……………………….
فى محل الملابس
يوسف يدخل يلاقى حمدى قاعد على المكتب
يوسف / صباح الخير يا عمى
حمدى / الحمد لله يا يوسف عامل ايه
يوسف / امال بابا فين
حمدى / ابوك راح المخزن بيستلموا بضاعه جديده ربنا يحسن سوقها يارب
يوسف / هو انا ممكن اتكلم معاك
حمدى / طبعا يا حبيبي اقعد
يوسف يقعد
يوسف / هو المحل هنا شغال
حمدى / الحمد لله احسن من الاول بكتير
يوسف / طب و وضعنا المالى عامل ايه
حمدى / والله انا ما اعرفش انا اخرى بقفل حسابات المحل
يوسف / ما انا بتكلم عن المحل
حمدى / الحمد لله المخزن مليان على اخره و الشغل ما بيقعدش عندنا يارب بس تكمل على كدا
يوسف / طب و معانا فلوس نجيب الشتوى
حمدى / ما وصل يا يوسف امال ابوك بيستلم ايه
يوسف / وصل !!!
حمدى / امال ايه ابوك مجهز فرشه ما حصلتش الاوكازيون ده يخلص بس و هتلاقى المحل ده ما فيوش مكان تحط فيه فنله
يوسف يبص لحمدى و يبتسم و يبص الناحيه التانيه و يفكر
……………………………….
فى القسم
فارس يوصل القسم يلاقي تجمهر من الناس و المامور مستنيه على الباب
فارس / ايه اللمه دى قدام القسم فى حاجه و لا ايه
المامور / انت صحيح قبضت على
مختار ينزل من العربيه و الناس تحييه
المامور / الدنيا هنا ما بتمشيش كدا يا فارس بيه
فارس / مفيش حد فوق القانون ان كانت البلد دى ماشيه من غير ظابط و لا رابط فجه اللى هيظبطها
المامور / اعقل يا ابنى ما تقومش البلد علينا
قهوجى يدخل شايل صينيه و عليها شاى و يعزم على مختار
القهوجى / الشاى يا سي مختار
مختار / هشربه جوه مع فارس بيه
فارس يبصله تليفون فارس يرن فارس يطلعه و الناس عماله تزيد حوالين القسم
فارس / الو
المحافظ / ايه اللى انت بتعمله ده يا فارس
فارس / مين معايا
المحافظ / انا اللوا سعيد ابو العزم يامترى سمعت عنى
فارس / غنى عن التعريف معاليك
المحافظ / مختار يمشى و مش عاوز مشاكل مش من اول يوم هتجيلى تليفونات زى دى اعرف انت بتتعامل مع مين انت مش فى مصر يا حضره الظابط
فارس يبص لمختار مختار يبتسم
المحافظ / انت اصلا بتقبض عليه بتهمه ايه انت مش كنت واخد قوه عشان تحقق فى الانفجار اللى حصل فى الفيلا اياها ما روحتش و لا عاينت الموقع ليه
فارس / يا باشا الجماعه كانوا كتير و كلهم شايلين سلاح
المحافظ / انت فى الصعيد يا حضره الظابط اسال عن الصعيد قبل ما تطلب نقلك ليه … اسمع يا فارس مختار هيمشى و انا هكلم كبير الزنايته و هحل سوء التفاهم ده و انهى الموضوع بس تعمل حسابك اللى حصل ده لو اتكرر مش هعديها
فارس / تمام معاليك
فارس يقفل التليفون و يبص حواليه متحاوط بكميه رجاله مش شايف اخرها يبص فى الارض و يحاول يكتم جواه و يروح ناحيه مختار
فارس / روح بس ما خلصتش على كدا
مختار / الوقت اللى يناسبك يا فارس بيه
فارس / يزق الرجاله و يدخل القسم
مختار / خلاص يا رجاله ما نجيلكوش فى حاجه وحشه يلا كل واحد يشوف اللى وراه
الناس تمشى و بفضل الزنايته بس المامور يروح لمختار
المامور / ما تاخذناش فى اللى حصل يا سى مختار انت عارف الغربال الجديد له شده
مختار / و لا يهمك احنا خدامين الحكومه هستاذنك عشان مرهق شويه
المامور / طبعا اتفضل
مختار يمشى و يروح لعربيه عباده امين راكب جنبه مختار يفتح الباب امين ينزل يركب ورا و مختار يركب مكانه
عباده / ناوى على ايه
مختار / كنت مستنيه بس ما كنتش اعرف انه هيجي بالسرعه دى
عباده / كدا الحكومه ما عدتش فى صفنا
امين / و الاسوء انها بقالها رجل وسطينا و مش اى رجل دا المركز نفسه
مختار / حد كلم مغاورى ؟
عباده / لسه قافل معاه وصلوا و كان جاى قولتله ما لوش داعى
مختار / طب بينا على البيت زمان هند كلت دماغ الكبير
عباده يضحك و يسوق
………………………………..
فى فيلا تانيه اكبر و سورها اعلا
البوابه تتفتح و عربيات فيرا يدخلوا و يركنوا و الكل ينزل
رشيد / اللهم صلى على النبي ايه الحلاوه دى
فيرا / احلى من التانيه مش كدا
رشيد / صحيح رب ضاره نافعه
فيرا / لا و الاجمل ان ما فيش حوالينا جيران الفيلا دى كان عاملها واحد اسمه منصور الشيشاوى تسمع عنه
رشيد / عضو مجلس الشعب
فيرا / تعرفه ؟
رشيد / دا حبيبي دا اكبر تاجر بودره فى مصر و ياما اشتغلنا سوا
فيرا / كان بانى المكان ده عشان يصنع و يخزن فيه البضاعه اول ما طلبتها منه ادهانى هديه
رشيد / طول عمره فييس و ايده فرطه مع الحريم
فيرا / الفتره اللى فاتت طورت كتير من المكان ده كنت عارفه ان هيجي يوم و يهجموا فكان لازم اجهز مكان تانى اقوى و احسن و الاحلى بقي انه عندنا حصانه يعنى فى حما الحكومه
رشيد / ربنا يجعل كلامنا خفيف عليهم .. هستاذنك بقي اطلع ارتاح .. الا انا اوضتى فين
فيرا / اطلع نقي اللى تعجبك … سمر
فيرا تطلع حبوب و تديها لسمر سمر تاخدها و تحطها فى جيبها
سمر / شكرا
فيرا / لو احتاجتى فى اى وقت ما تتكسفيش تطلبى
سمر تهز راسها رشيد يمسك ايدها و يدخلوا جوه
فيرا / اى ريلى نيد تو هير اجود نيوز فيرى فيرى سون ادواردو ( انا بجد محتاجه اسمع اخبار حلوه قريب جدا جدا يا ادواروا )
ادواردوا / ايام وركينج اون ايت ( شغال على الموضوع )
فيرا تهز راسها و تدخل و الكل وراها
……………….
فى اوضه مختار
مختار نايم فى السرير و هند فى حضنه
هند / و قامت مطلعه صندوق و طلعت منه رشاش ضخم و ركبته لوحدها
مختار / و انتى عملتى ايه
هند / هعمل ايه يعني فضلت اعبى خزن و ابحلق فى المنظار طول الليل ما انت لو كنت بتعمل معايا زى عباده ما بيعمل مع مراته كان زمانى انا اللى قاعده على الرشاش
مختار/ يا نهار ابيض هى حصلت
هند / اشمعن هى بتعرف تتعامل معاه و انا اخرى مسدس انت عارف بيضرب كام طلقه فى الدقيقه تعرف انه ممكن يهد حيطه دا رصاصته قد كدا
مختار / مهو خديجه بتمسك المسدس ده من و هى لسه فى ابتدائي فالحمد لله كبرت و سلاحها كبر معاها انما انتى لسه فى كى جى وان
هند / كى جى وان فى عينك انت اللى مش بتعملنى على فكره خديجه قالتلى انى اتعلمت السلاح و المارشال كومباكت فى وقت اقل منها بكتير
مختار / اتعلمتى ايه
هند / الفنون القتاليه
مختار / كانت على ايامنا كومبات مش عارف كمباكوها امتى هههههه
هند / البتاعه اللى بحط عليك فيها … حلو الاسم ده
مختار / بحب اجيب لنفسي الكلام اوى
هند / ههههههههههههههه
باب الاوضه يخبط مختار يقوم يفتح الباب يلاقي ياسمينا يشيلها و يلفها
مختار / وحشتيني وحشتيني وحشتيني
ياسمينا / ماما بتقولكوا الغدى جاهز
مختار / ما تغيريش الموضوع انتى مستخبيه فيه الفتره دى
ياسمينا / بلعب مع العيال كلها بس منتصر لا
مختار / ليه .. عمل ايه الواد ده
ياسمينا / بيقولى ما بحبش البنات هو انا صراصير البلاعات يا ابيه
مختار / ههههههههه دا واد قليل الادب و سافل دا انا هنزل امده على رجليه
ياسمينا / اديله بالعصيان زى ما هنا بتقول
مختار / بتقول ايه هنا
ياسمينا / بتقول نضربهم بالعصيان … انت مش عارفها عشان انت صبيان
هند / الصبيان الصبيان يستهلوا ضرب العصيان
ياسمينا / ايوه صح … شوفت البنات عارفين حاجه البنات و الصبيان ينضربوا بالعصيان
مختار ينزل فى ياسمينا بوس
مختار / يا بت هاكلك يا بت يخربيت عسلك
ياسمينا / ممنوع ممنوع
مختار / هو ايه اللى ممنوع
ياسمينا / مريم بتقول البنات ما يبوسوش الصبيان و لا حضن و لا حتى سلامات كلو من بعيد لبعيد
مختار / الكلام ده ما ينطبقش عليا
ياسمينا / لا يا عم انت عاوز الكبير يعلقنى
مختار / ههههههههههههههههه كبرت امتى البت دى
ياسمينا / انا كل يوم بكبر يوم
مختار / لا مش قادر انا هبوس و نتعلق احنا الاتنين
ياسمينا / ما تشوفيلك حل فى جوزك ده هيضيعنا
هند / هههههههههههههههه كفايا يا جوزى لحسن بدات اغير
مختار ينزل ياسمينا فى الارض تطلع تجرى مختار يبص لهند تقوم تطلع عبايه مختار يقفل الباب
مختار / كبرت بقت لمضه اوى
هند / من يومها
مختار / يمكن عشان بقالى ياما ما شوفتهاش
هند / مهى معظم الوقت مع العيال و انت مشغول او نايمه
مختار يسند على السرير و هو مبتسم و ساكت هند متبعاه بابتسامه حزن و هو مش واخد باله فجاه يقوم و يبدا يلبس
مختار / انجزى خلينا ننزل قبل ما تقول للكبير انى بوستها و يعلقنى
هند / هتضيعنا هههههههههههههههههه
………………….
فى اوضه رشيد
رشيد بيكتب على الموبايل و سمر قاعده جنبه بتبص عليه
سمر / هو انا ممكن اتكلم معاك
رشيد يحط الموبايل جنبه و يبصلها
سمر / هو انت هتكمل مع فيرا علاطول
رشيد / اكيد لا خفى عشان نمشي
سمر / الناس اللى هجموا على الفيلا الناس اللى كنت عندهم صح
رشيد / واضح ان فيرا عملت حاجه جامده تزعلهم
سمر / الناس دول صحابك
رشيد / كانوا انا ممنوع ادخل البلد اصلا ما بيحبونيش
سمر / ليه
رشيد / عشان انا نجس عيل ابن حرام عايش فى الحرام نسوانجى و ليا فى الكاس و الكبايه الحاجات دى يعني
سمر / و انت كدا فعلا؟
رشيد / للاسف
سمر / انا معاك بقالى قد ايه ما حاولتش تمد ايدك عليا مره سترتنى اذاى تكون كدا ؟
رشيد / مش عارف
سمر / لما كل ده يخلص هترجع زى ما كنت ؟
رشيد / لا
سمر وشها ينور و تبتسم
سمر / بجد !!!
رشيد/ ايوه مش انا قولتلك هاخدك معايا و نلف الدنيا
سمر تهز راسها
رشيد / نقى اكتر مكان عجبك و نستقر فيه و نفتح مشروع حلال و نعيش منه
سمر / انا هبقي معاك ؟
رشيد / امال مين يطبخلى يعني ايه السؤال ده ؟
سمر تبتسم
رشيد / اقولك حاجه بتدور فى دماغى بقالها كام يوم
سمر تهز راسها اه
رشيد / كنت بفكر افرض البت دى خفت ايه اللى يضمنلى انها ما تهربش و تسبني ساعتها هرجع تانى لحوسه اكل الشارع
سمر / ههرب اروح على فين يا حسره
رشيد / و انا اش عرفنى بقي مش لازم اضمن نفسي انا دافع فيكي تلاته مليون دولار … على العموم انا لقيت طريقه اضمن بيها نفسي
سمر / ايه ؟
رشيد / احنا نتجوز
سمر / و انا اللى كنت فكراك بتتكلم جد خضيتني
رشيد / و انتى مين قالك انى بهزر
سمر تبص لرشيد فى صمت
رشيد / اليومين اللى قضيتهم بعيد عنك لاول مره فى حياتي احس ان فى حاجه نقصانى شكلى خدت على نكدك باين
سمر بصاله و مبتسمه و ساكته
رشيد / على فكره انا مش باخد رايك لتكونى فكرانى يعني مستنيكي تقولى موافقه انا قررت خلاص
سمر / بعد كل اللى عرفته عنى
رشيد / انا لسه قايلك انى مطرود من البلد دى عشان نجس مش يمكن ربنا حطك فى طريقي عشان نتوب احنا الاتنين
سمر تبتسم
رشيد/ بس انا فى حاجه قلقانى
الابتسامه تروح من وش سمر
سمر / ايه !!
رشيد / انا ما دوقتش اكلك مش يمكن تطلعى مقلب
سمر / ههههههههههههههههه
رشيد / لا دا انا ازعل اوى دا انا عشمت نفسي دا انا اروح فيكي فى داهيه … تتعلمى ما بتعرفيش تتعلمى
سمر / بعرف ما تخافش
رشيد / الحمد لله و اه تعملى حسابك لو خلفنا ولد هنسميه هارون … هارون الرشيد ….طب والله برنس زى ابوه
سمر تبصله و مبتسمه
رشيد / انا صحيح مفيش فى اسمى الف و لام بس نغيره كلو يهون عشان خاطر الواد ابن الكلب هارون
سمر / رشيد انت مش بتشتغلنى صح … رشيد انا مش هقدر احلم و ارجع افوق على كابوس تانى
رشيد / هو صحيح هيكلفنى بامبرز و لبن و اشى مصاريف مدرسه و اشي سبلايز و تيجي تقوليلى هديه عيد الام للمسات فى الفصل
سمر تبتسم و تحضن رشيد يبتسم
رشيد / انا شكلى حبيتك باين
سمر تسيبه و تبصله و عنيها تتملى دموع
رشيد / لما تخفى انا مش هفضل هنا ثانيه واحده بعد كدا مش هفضل فى حياتى دى ثانيه واحده بعدها
سمر تعيط
رشيد / تعرفى انا مش هستنى تخفى قمى بينا يلا
رشيد يقوم و يشدها
سمر / على فين
رشيد / على المازون امال احنا بنتكلم فين من الصبح
سمر / ههههههههههه بطل جنان يا رشيد
رشيد / انا عمرى ما كنت عاقل و انا لو كنت عاقل كنت دخلتك حياتى بس جنان بجنان بقي نتجوز
سمر / انا ما عييش بطاقه ما عييش اى اثبات شخصيه
رشيد يهرش فى ودنه
رشيد / و اكيد ما عكيش ضامن تطلعى بدالها … محلوله … نضربلك واحده
سمر / كنت لسه بتقول هنتغير
رشيد / دا وضع مؤقت لحد ما الموضوع ده يتحل
سمر / لما يتحل خدنى لاهلى قولهم انى مش وحشه اطلبنى منهم انا عارفه ان اللى بطلبه كتير بس
سمر تعيط
رشيد / و نعمل فرح و تلبسي فستان … انا عندى حته بدله سوده فى شقه مصر ببقي فيها مز السنين
سمر تبتسم و تمسح دموعها و تعيط تانى رشيد ياخدها فى حضنه
رشيد / هانت يومين تلاته بالكتير و هاخدك من هنا هعوضك عن كل ده هنسيكي اللى عشتيه و هنسي معاكى كل اللى عشته تعرفى يا سمر
سمر تبصله
رشيد / النهرده اول مره اخاف
سمر/ لما هجموا ؟ بصراحه كنت مرعوبه
رشيد / انا كنت بجرى ورا الموت بمنكاش اللى بيميزنى عن غيرى فى دنيتنا دى انى قلبي ميت ما ليش ايد بتوجعنى ما عنديش اللى ابكى عليه و لا يبكى عليا عايش فى الدنيا بطولى بس النهرده ما كنتش بطولى كنتى فى ضهرى
سمر / عشان كدا ما رضيتش تسبنى هنا
رشيد / انا بعتك المكان الوحيد اللى ابقي مطمن عليكي فيه مع انى كنت خايف ما يرضوش ترجعيلى كان احتمال ضعيف بس وارد بصراحه كان احسنلك و كنت هبقي مطمن عليكي اكتر
سمر / انت بتقول ايه مش هم دول اللى هجموا علينا ازاى هتطمن عليا و انا معاهم
رشيد / احنا الوحشين فى القصه دى يا سمر احنا الاشرار و تحالف قوى الظلام و الكلام ده كله فهمتى ؟
سمر تهز راسها
رشيد / يخربيت نكدك لسه ما اتجوزناش و قلبتى عليا المواجع
سمر تبتسم
رشيد / هانت
سمر تهز راسها و هى فى منتهى السعاده
…………………..
فى شقه يوسف
محمود / ما انت لو متابع الشغل و بتحلل القرش اللى جايلك منه تعرف انى جبت البضاعه دى كلها على المبيع و دفعت اللى معايا كله مقدم
يوسف / يعني ايه انا ما بفهمش فى الكلام ده
محمود / يعني هدفع تمنهم على دفعات هعرض الشغل و ابيعه و اسدد تمنه … و ليك حق ما تفهمش الكلام طول الوقت قاعد سرحان او ماسك الموبايل عمال تدور على محلات للايجار و اشى عروض على اجهزه البلايستايشن و ايشي ديكورات يا ابنى فوق لروحك و راعى لقمه عيشك
يوسف / انا من حقى احقق حلمى من حقي اسعى و احاول
محمود / حب ما تعمل حتى تعمل ما تحب
يوسف / بالمرتب العبيط اللى باخده
محمود / بديك اكتر من اى حد شغال مع ان غيرك فاتحين بيوت و متجوزين و مخلفين و عايشين عيشه زى الفل انت اللى خدت على الدلع
يوسف / انت اللى بتحاول تعاقبني بتحملنى كل الخساير اللى فاتت كانها كانت بمزاجى
محمود / اللى فات مات بس لازم نتعلم منه
يوسف / و اتعلمت هركز فى مستقبلى و هشتغل و هتعب بس فى الحاجه اللى بحبها
محمود / و انا مش معايا سيوله كافيه اديهالك و كمان عمرى ما هوافق على حكايه القرض دى يا ابنى دول حراميه هياخدوا تمن القرض منك مرتين
يوسف / طب اديني اى مبلغ ابدء بيه و كمل الباقي على دفعات زى ما هتعمل مع اصحاب المحلات
محمود / صاحب بالين كداب انا مش هقطع نفسي ابقي بحارب على جبهتين مش عارف ادى للراجل فلوسه و فى نفس الوقت مش عارف اديك تكمل توضيب و نبقي فتحنا على نفسنا فاتوحه ما نعرفش نلمها
يوسف / انت بتكرهنى كدا ليه انت ليه مصر تحبطنى ليه مش عاوز تساعدنى دا انا ابنك الوحيد انا اللى هشيل اسمك
محمود / ما عييش ما عييش انت اللى مش عاوز تفهم لو معايا ما استحسرش فيك بس دا اخر قرش معايا طلعت روحى عشان اجيبه و ما اقدرش اجازف بيه ما اقدرش ادخل فى اى مشروع الا اما مشروعى يقف على رجليه الاول
يوسف / بس دا مش راى عمامى فى المحل
محمود / انت رجعت تقابل عمك حامد تانى
يوسف / الوحيد اللى بيسمعنى و بيشجعنى
محمود / ما فتحش مشروع لابنه ليه و شجعه اولى مش راح اشتغل على تاكس و ممسكه فيه ورديه بعد الضهر … عمك اللى بيحبك اوى بيخلى ابنه يشتغل الصبح و بعد الضهر و انا بخليك تشتغل نص يوم هنكره و عاملك ريس فى الشغل
يوسف / عمى ما عهوش احنا ظروفنا احسن بكتير
محمود / ربنا وحده اللى عارف مين معاه و مين معاهوش انت عارف عمك بايع الشقه بكام و لا طالعله من تسويه المعاش كام
يوسف / انت عرفت
محمود / انا مخاصمه اه بس انا بعرف كل حاجه عن اخواتى فى الاول و الاخر انا اخوهم الكبير و تصبح على خير بقي عشان مش قادر اقف
محمود يدخل اوضته و يوسف واقف يفكر
………………………
فى المضيفه
عبد الله بيلعب بلايستايشن مع امين و مختار و عباده واقفين بيشربوا شاى على الباب
عباده / هههههههههههههههههه دا جنان رسمي
مختار / قولتله كتر خيره لحد كدا و ياخدها و يمشي
عباده / يا ابنى البت دى ملعوب من زفته الطين اشترى منى
مختار / رشيد مش ابن امبارح و مش حته بت اللى هتضحك عليه
عباده / لا يا شيخ طب دا نص مصايب البشريه سببها واحده ست يا ابنى ان كيدهن عظيم
مختار / يعالجها و نشوف
عباده / اسكت اهى دى لوحدها كانت مغرز جامد اوى يعني البت لسه ما خفتش
مختار / لما شوفتها كويسه كدا قولت خفت و فرحت بس طلعت جايبه حبوبها معاها دا كان قايلها تاخد الحبوب بس طلعت جدعه و اللتزمت بالجرعه
عباده / بس برده فى امل كدا فعلا الناس بتخف بالتدريج
مختار / ايوه بس لازم نستني اما تخف خالص
عباده / ليه ما نجرب
مختار / فى مين فيرا لو عرفت اننا وصلنا لعلاج هتحاصرنا و تحاصر الناس اكتر
عباده يهز راسه
عباده / هنعمل ايه مع ابن الكلب الظابط ده
مختار يبتسم
مختار / هنستناه هو مش هيعرف يقعد ساكت … على فكره رشيد كان عارف
عباده / بتهزر
مختار / فيرا قالتله بس ما لحقش يبلغنى
عباده / خليه يبعت الداتا فى اسرع وقت
مختار / لسه بيدرس المكان لما يظبط الدنيا هيبعتلى
عباده / بفكر ابعت اتنين تلاته يدرسوا المكان من بعيد
مختار / اوعى .. عرفنا مكانها بالسرعه دى منين كدا بتكشف رشيد
عباده / مش لازم ابعت حد من البلد حبايبنا فى كل حته
مختار / اى كان اللى هتبعته هيلفت الانتباه بلاش اجلها شويه معلش
عباده / تمام اللى تشوفه
امين / و جون و جون و جووووون
عبد الله / مره من نفسك
عباده و مختار يبصوا جوه
مختار / السهره شكلها صباحى
امين / مقطعه خمسه صفر لحد دلوقت
عبد الله / ما انا كاسبه المطشين اللى فاتوا
مختار / مع نفسكوا انا مش قادر يلا تصبحوا على خير
عباده/ و انا كمان يلا سلام
عبد الله / يا حكم يا حكم
امين / هههههههههههههههههه انسي خلاص
مختار و عباده يبصوا لبعض و يبتسموا و يمشوا
عبد الله / شوط بقي شوط
…………………
فى فيلا فيرا بعد يومين
ادواردو يدخل يديها ظرف تفتحه تبص فيه صور تتفرج و تبتسم
فيرا / واير اذ شى ( هى فين )
ادواردو / ات ذا بول ( على حمام السباحه )
فيرا تهز راسها و تقوم تحط الصور فى الدرج و تقفله و تروح تلاقيهم قاعدين فى جنب رشيد يشوفها
رشيد / كتير علينا والله اللى احنا فيه ده
فيرا / اهم حاجه تكونوا مبسوطين
رشيد / ميه و خضره و الوجه الحسن
فيرا / و فلوس
رشيد / اوباااااا دلع ده بقي و لا مش دلع
فيرا / فى طالعه رجالى و مش لاقيه حد مصرى معاهم … بمعنى ادق حد زيك
رشيد يبصلها بطرف عينه و يعوج رقبته
فيرا / فى بضاعه هتتسلم ادواردو و فريقه محترفين بس مش بيتكلموا عربى و المصريين بيتكلموا عربى بس يعروا و معظمهم ما بيفهموش انجليزي اصلا يعني مش هيعرفوا يترجموا اصلا بين ادواردو و الجماعه
رشيد/ ايه النظام اتكلمى
فيرا / سكه جديده بنحاول نفتحها زى ما بتسموها كرت ارهاب مكان مش عاوز يوزع بضاعتى فيه هنعمل شويخ قلق و تكسير و نمشي
رشيد / و دى شغلانه يعني و بعدين السكه دى مش سكتى و انتى عارفه
فيرا / انت هترجم و ادواردو عليه الباقي
رشيد يشاورلها بايده فلوس
فيرا / ميه الف جنيه
رشيد / هههههههههههههههههه
فيرا / ما تبقاش طماع الحكايه مش مستاهله و ما فيهاش مجهود
رشيد / ماشي بسيطه امتى
فيرا / النهرده بالليل
رشيد يبص على سمر
فيرا / انت لسه مش واثق فيا برده
رشيد / كدا كدا مش هعرف ارجعها عند مختار
فيرا / تقدر بس ممكن ما تقدرش ترجعها من هناك … ايه رايك تكسب فيها تلاته مليون دولار
رشيد / انسي
فيرا / فوق التلاته بتوعك يعني سته
رشيد / قولت انسى سمر مش هتلعب معانا
فيرا تبتسم
فيرا / كل المطلوب منها ترجع سرايه الزيني و تفتح عنيها و ودانها و تنقلنا
رشيد / انسي بقولك الناس ما رموش عليها السلام حتى رموها فى اوضه و بقوا يدخلولها الاكل و الشرب و يمشوا صباح الخير ما قالوهاش و اهى عندك اساليها
فيرا تبص لسمر و ترجع تبص لرشيد
فيرا / فكر فيها براحتك و ياريت تقوم ترتاح عشان حوار بالليل
رشيد يهز راسه و يقوم يمسك ايد سمر و يطلعوا فوق و فيرا متبعاهم بابتسامه
…………………..
فى الملعب
مغاورى و الشباب بيلعبوا فارس يدخل يقف يتفرج الرجاله تبطل لعب و الكل يبصله بتحفز مغاورى يروحله بورق
مغاورى / الملعب ده مرخص و اللى بنعمله فيه مرخص برده يا باشا
فارس / انا مش جاى بصفتى ظابط انا جاى بصفتى واحد من اهل البلد
مغاورى / كان بودى اضايفك بس اللى يغلط فى كبارات البلد ما يبقاش منها
فارس/ دا كان سوء تفاهم و بيتهيالي حليناه خلاص يا مغاورى بيه
مغاورى / الله !! كويس برده الواحد لازم يتعلم من اخطاءه خصوصا لو كان جاب اخره
فارس يبتسم
مغاورى / بس احنا هنطلع كرما معاك هنوريك قد ايه الصعايده رجاله … منور يا فارس باشا … كملوا يا رجاله
الرجاله تكمل و فارس يتفرج جنب مغاورى
فارس / انتوا هنا كل يوم
مغاورى / المكان شغال كل يوم بس احنا بنيجي تفاريح
فارس / بتلعبوا حلو ما شاء الله … انا لاحظت ان اهل البلد هنا ما شاء الله يعني لحسن تقول بقر و لا حاجه خصوصا الرجاله
مغاورى / مالهم يعني
فارس / مهتمين بصحتهم
مغاورى / من شر حاسد اذا حسد
فارس / انا قولت ما شاء الله مرتين
مغاورى / بقولك ايه يا باشا مبروم على مبروم ما يرولش انا عارف انت مين و مين اللى بعتاك … اصل لامؤاخذه احنا برده ما بنسبش غريب يدخل بينا
فارس / لا و بتتكلم بثقه اوى ما شاء الله
مغاورى / اؤمر يا باشا خير
فارس / لا خير طبعا ان شاء الله … هو انا ممكن اللعب
مغاورى / لا
فارس / ليه … اه عشان الحادثه بتاعه مختار و عباده و عبد الله و انت لوحدك و كدا
مغاورى يبتسم و يبص حواليه
مغاورى / بس انا مش لوحدى يا باشا
فارس / طبعا
مغاورى / لو لاعبتك تشيل على خاطرك منى
فارس / ابدا
مغاورى / تمام جهز نفسك
مغاورى يروح يزق اللى جوه يبطلوا لعب و يطلعوا بره و فارس بيقلع قميصه و يدخل يقف قدامه
مختار و الزنايته يدخلوا مختار لابس خاتم ازرق فى ايده
مغاورى/ البدايه عندك يا باشا
مختار / من غيرى كدا
فارس يبتسم و يبص لمختار
فارس / الواحد كان واخد فكره غلط خالص عن الصعيد
مختار يروح يقف قدامه
مختار / طب تسمحلى انا اصلحهالك
مغاورى / طب والله كدا عيب
مختار / انت الكبير يا ابو المغاوير
مغاورى / بالراحه على الباشا دا ضيفنا
مغاورى يطلع بره و مختار يقف قدام فارس
فارس / البدايه عندك
مختار يضرب بوكس فارس يصدها يلحقه بالتانيه يصدها يضربه بالرجل فى ركبته فارس يقع مختار يروح يحط ايده اللى فيها الخاتم على رقبه فارس فارس يبصله باستغراب
مختار / انت كويس يا باشا ؟
فارس بيبص لمختار و مش بيتحرك و مختار حاطت ايده على رقبه فارس
مختار / هى جت جامده و لا ايه ؟؟ باشا انت كويس
فجاه فارس يقع فى الارض مغم عليه
مغاورى / بالسرعه دى
مغاورى يحط ايده على كتف مختار مختار يحط ايده اللى فيها الخاتم على كتف مغاورى ينط من جنبه
مغاورى / بسم الله
مختار / هههههههههههههه
مختار يلف الخاتم فى صابعه
مختار / بتاع العيال الصغيره لما بيحبوا يعملوا مقالب فى بعض … بس الباشا ما بيحسش انه كان بيتكهرب … فوقوه و وصلوه لحد بيته و اطمنوا عليه على الاخر … دا برده الباشا بتاعنا
مغاورى / على فكره كنت هجيبه ارض من غير حاجه
مختار يلمس مغاورى يكهربه ينط
مغاورى / يا جزمه
الكل يضحك
……………………
فى فيلا فيرا
فيرا تفتح الباب سمر نايمه فى السرير تشوفها تقوم تقعد
فيرا / تعالى نقعد على البول سوا
سمر / لازم ؟
فيرا / تعالى
فيرا تمشي سمر تبلع ريقها و تبص حواليها و تروح وراها فيرا تروح تقعد على ترابيزه مليانه صور
فيرا / اقعدى
سمر تقعد
فيرا / تعرفى الست اللى فى الصور دى
سمر تبص فى الصور و تبص لفيرا بخوف
فيرا / تفتكرى بتعيط ليه
سمر / انتى عاوزه ايه
فيرا/ اصل يا حرام ابنها الكبير اتخطف
سمر تقف و تصرخ و هى بتعيط
سمر / قولى عاوزه منى ايه عاوزه ايه ارحميني و قولى عاوزه ايه
فيرا / انتى بتاعتى فاهمه و لا لا
سمر / فاهمه فاهمه بس ابوس ايدك سبيه دا يتيم ما لوش ذنب ابوس ايدك ارحميه
فيرا / ارحميه انتى و اتعدلى معايا
سمر / قوليلى عوزانى اعمل ايه و انا اعمل والله هعمل هعملك كل اللى انتى عوزاه بس روحى الواد لامه ابوس ايدك
سمر تحاول تبوس ايد فيرا فيرا تسيبها تبوسها و تقف تتفرج عليها و تناولها الحبايه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
