رواية البر التاني الفصل الرابع والخمسون 54 بقلم لولو محمد

رواية البر التاني الفصل الرابع والخمسون 54 بقلم لولو محمد

رواية البر التاني الجزء الرابع والخمسون

رواية البر التاني البارت الرابع والخمسون

رواية البر التاني الحلقة الرابعة والخمسون

فى فيلا فيرا
فيرا بتلعب هى و ادواردوا ويي ملاكمه و عمالين يضربوا بوكسات رشيد يدخل و يحط ايده فى وسطه و يروح يشد فيشه التليفزيون
فيرا / ايه انا كنت هكسب
رشيد/ وزعى الهلف ده عاوزين نتكلم
فيرا / رشيد لو سمحت
رشيد/ وزعيه بدل ما ابكيكي عليه
فيرا / ادواردو بياخد الحبوب و دخل حبايبك التلاته المستشفي و لا انت ما سمعتش اللى حصل
رشيد / انا غيرهم و لو تحبى تشوفى اوريلك
فيرا تبص لرشيد الغضب باين عليه
فيرا / جايم اوفر .. وايت فور مى ات ماى روم ( اللعبه انتهت استنانى فى اوضتى )
ادواردو يبص لرشيد و يمشي
فيرا / وزعته
رشيد / اللى عملتيه النهرده ده غلط انتى كدا بتلعبى …
فيرا / بالنار ادواردو كمان شايف كدا
رشيد / لا و انتى الصادقه بتلعبى غلط انتى مش بتوقعى بينهم انتى بتثبتيلهم ان عدوهم واحد و بيحاول يوقع بينهم بتصالحيهم على بعض
فيرا / معاك حق صدقنى انا معاك جدا فى اللى انت بتقوله بس اعمل ايه كنت محتاجه مصريين فى الميشن دى لازم الاكسنت صعيدى بس اعمل ايه اديك شايف نوعيه المصريين اللى مضطره اتعامل معاهم قمه فى الغباء قمه فى ال… اعمل ايه اجيب منين مصريين عندهم مخ
رشيد / صحيح هتجيبيهم منين يعني
رشيد يبص الناحيه التانيه
فيرا / انت زعلت يا حبيبي انا ما اقصدكش انت بس انا مش محظوظه ان يبقي عندى كتير منك عشان كدا بحافظ عليك على قد ما اقدر
رشيد / يعني عرفتى ان اللى معاكى عضلات من غير مخ يبقي قدامك حل من اتنين يا تعلميهم يستخدموا مخهم يا تجبيلهم مخ جاهز
فيرا / تعليماتى كانت واضحه بس هم مش بيسمعوا الكلام
رشيد / هو انا هفكرلك فى كل حاجه ؟ يا ستى اقفى على ايدهم ركبيلهم اير بيس فى ودانهم و اديهم تعليمات اول باول انما كدا انتى بتلبسي فى الحيط و انا هلبس معاكى الناس دى مش هيسيبوا حد فينا عايش مش هيرحموا حد انتى لا عتقتى حريم و لا عيال
فيرا / بس شوفت مختار كان هيتجنن ازاى على اخو مراته … بس تعرف الواد ده عجبنى يوم خناقه ادواردو فى الملعب ما استسلمش و لا حتى المرادى مع انه انضرب جامد يا حرام مش زى عرابى التافه من اول قلمين قال انا مش راجل
رشيد / انا طالع انام مش ناقص فقعه
فيرا / استنى عاوزه اوريك حاجه
رشيد يبص لفيرا تروح تفتح درج المكتب و تطلع ظرف و ترميه قدام رشيد يفتحه و يبص فيه صور لسمر مع شاب فى السرير
فيرا / اصلي شيفاك عامل حدود بينكوا يعني
رشيد يقطع الصور
رشيد / مش دا الظابط اللى كانت مخطوباله
فيرا / الله انت لحقت تسال عنها ؟ طب قالتلك كانت بتعمل ايه عشان تجيب حبوب لاخوها و لا ما قالتلكش اصل انا عارفه الاشكال دى بيحبوا اوى يلعبوا دور الضحايا
رشيد / تصبحى على …خير
رشيد يسيب فيرا و يمشي و هى متبعاه
فيرا / ما ينفعش تقنع القرد ان المانجو احلى من الموز
فيرا تتنهد و تطلع فوق
………………….
فى المستشفي
كوثر نايمه على كرسي جنب عباس الباب يتفتح و شاهين يدخل
شاهين / قومى ياختى روحى شويه ارتاحى و تعالى الصبح
كوثر / انا مرتاحه هنا
شاهين / قعدتك لا هتقدم و لا هتاخر
كوثر / و هى قاعده بنتك هى اللى هتقدم اوى سبنى فى حالى بقي
شاهين / طب قومى افردى ضهرك على الكنبه دى قومى عشان خاطرى قومى ما توجعيش قلبي عليكي انتى كمان كفايا اللى بيحصل
كوثر / انا مش مسامحه فى حق ابنى اللى عمل كدا فى ابنى و رقده الرقده دى
شاهين / هجيبه والله لاجيبه بس قومى يا اختى
كوثر / الزنايته مفيش غيرهم
شاهين / مش هم الزنايته حصل معاهم نفس اللى حصل معانا و ليهم عبد الله فى المستشفي
كوثر / ضربوه بالنار هو كمان ؟
شاهين / لا خطفوه و ضربوه هو و عرابى
كوثر / و انت صدقت مش كدا يقتلوا القتيل و يمشوا فى جنازته
شاهين / مش هم يا كوثر لو كان اى حد غير عبد الله كان فيها كلام بس ده لا
كوثر / ليه يعنى مش هو اللى اتخانق مع عباس و ضربه مش هو اللى الكبير وقف و قال بعلو صوته دا ابنى و اللى يمسه يمسنى لو الراقد ده كان ابوه عايش ما كانش ده بقي حاله
شاهين / ربنا يسامحك يا اختى من يوم ما مات و انتى ما بتعديش مناسبه الا اما تحسيسيني انى مقصر فى حق عباس بس ربنا العالم ربنا وحده العالم انى ما قصرتش و لا هقصر و بكره عباس يقوم بالسلامه و تشوفي بعينك و انا بجيبك حقك من عنين ولاد الكلب اللى عملوا فيه كدا
كوثر / و هتجيبهم ازاى و انت مغمى عينك عنهم ضربوا ابنك بالنار و ضربوا ابنهم بالاساتك فوق يا شاهين فوق يا كبير الجوارحه فوق بدل ما انت عمال تطاطى لما الزنايته ركبوك
شاهين / لو كان غيرك اللى قال الكلام ده كان بقالى شغل تانى بس انا هعمل ما سمعتش اللى قولتيه و هعمل خاطر للرقده اللى ابنك فيها بس قسما عظما يا بنت ابويا ان ما اتعدلتى ليكون ليا صرفه تانيه معاكى … العربيه بره هتوصلك السرايا روحى غيرى هدومك و كليلك لقمه و ارتاحى و بكره الصبح تجيبى معاكى غيار نضيف لعباس و انتى جايه
كوثر تبصله و تمشي و هو متابعها يبص على عباس و يتنهد و يطلع بره
…………………
قدام اوضه عبد الله
ناصر / روح انت هند طمن مراتك و الجماعه و انا هخليني معاه هنا
مختار / هم دخلوا ازاى يا كبير
ناصر / نطلع منها على خير و نشوف الحكايه دى
مختار / ايديها طولت يا كبير قولتلى ما نعرفش قوتها قد ايه و لا وراها مين ما نفتحش على نفسنا فواتيح و سبناها زى السرطان تعشش جوانا جدورها ما سابتش حاجه ما طالتهاش الحكومه و الدكاتره و حتى الفلاحين ما سابتش حد فى حاله و مش هتسيب بكره هنصحى على انها طالت حد مننا و جابت رجله
ناصر باصص فى الارض و ساكت
مختار / انت ادرى بابو فارس منى انت عارف ان ما يجبروش على كدا الا الشديد القوى الدنيا بتزيد سواد يا كبير و احنا واقفين نتفرج
ناصر / عاوز تعمل ايه عاوز تقتلها لم الرجاله و روح اقتلها اقتلها قبل ما يبقي فى ايدينا علاج للى الناس فيه و ساعتها مش رجالتها اللى هيقفولك اهلك و ناسك مش عشان سواد عنيها لا … عشان وجع عيالهم و اهاليهم … وقتها هتقعد هى فى بيتها معززه مكرمه تتفرج عليك انت و اولاد عمامك و انتوا بتدبحوا فى بعض لحد ما تخلصوا
ناصر يبص لمختار و الحزن مالى عنيه
بكره / بكره تنزل انت و الرجاله تقلب الصيدليات تانى بس مش هتاخد معاك الغفر مش هتقول لحد انك نازل هتنزل انت و رجاله الزنايته و الجوارحه حطه واحده على كل الصيدليات فى وقت واحد لو فيها حاجه لا هيلحقوا يداروها و لا يصرفوها
مختار يهز راسه موافق
ناصر / مفيش حد فينا مش هيشيل سلاح من اصغر صغير لاكبر كبير رجاله و حريم
مختار يهز راسه موافق
ناصر / و هتمرنهم نفر نفر بنفسك
مختار / تمام يا كبير
ناصر / لما نخرج من هنا هنلم كل الغفر و نحاسبهم نعرف اللى دخل البلد دخلها ازاى و خرج منها ازاى
مختار / تمام يا كبير
ناصر / روح لمراتك طمنها لو سالت على عبد الله قولها قاعد معايا على الترعه بنصطاد سمك عشان انا مخنوق من اللى حصل
مختار / حاضر يا كبير
ناصر / لو قابلت ام فاتن طمنها قولها اننا بخير و انى هرجع بالواد بكره
مختار / هترجع بيه ازاى كدا
ناصر / سبها لله من هنا للصبح اكون فكرتلها فى حاجه
مختار / تمام … هتعوز منى حاجه اجبهالك الصبح
ناصر / اللى له حرمه يروحلها و اللى مالوش يلفوا البلد جماعات الناس لازم تشوفنا صاحيين ان كانوا مننا نطمنهم و ان ما كانوش نرعبهم
مختار / هبلغ امين و الرجاله حاضر
ناصر / يلا اتوكل على الله و ابقي طمنى بالتليفون
مختار يهز راسه و يمشي
………………..
فى اوضه عباده
خديجه نايمه و عباده ممدد جنبها و هى مدياله ضهرها تتقلب تبص عليه تلاقيه صاحي و بيفكر
خديجه / اللى شاغله عقلك
عباده يبتسم و ياخدها فى حضنه
خديجه / مالك .. لسه بتفكر فى اللى حصل
عباده / و فى غيره افكر فيه
خديجه / مش عدت الحمد لله
عباده / لا يا خديجه ما عدتش دى حيالله بتبتدى
خديجه / ازاى يعني
عباده / لولا ان عبد الله اغم عليه ما كانش رجع كان ممكن يضربوه بالنار زى عباس بس ساعتها كنا هنزعل اه بس هنبقي عارفين مكانه انما هم قالوا يحرقوا قلبنا عليه عارفين غلاوته ولاد الكلب
خديجه / لا يا عباده غلطان هم عارفين ان عباس مش هينخ و كانوا فاكرين عبد الله عيل ما كانوش عاملين حسابهم انه يقاوم و يوصلهم لحكايه الكهربا دى
عباده يبصلها
خديجه / لو كان اللى بيعمل كدا فاهم هو بيعمل ايه ما كانوش ودوه المستشفي
عباده / اللى ضرب عباس بالنار كان قاصد موت
خديجه / لا كانوا ضربوا فى الدماغ
عباده / ما يمكن اللى عمل كدا ما كانش شاطر و العربيه كانت بتجرى بسرعه فجت مطرح ما جت و خلاص
خديجه / ممكن كل حاجه ممكن … بس انت شكلك بتحب عبد الله اوى

عباده / هو يتحب الشهاده لله بس الموضوع مش موضوع عبد الله مش عبد الله بس يعنى … انتى سرى يا خديجه صح ؟
خديجه / قسما بالله ما يطلع لتالت ولو على موتى … اتكلم
عباده / بعد الشر عنك و عن الحبايب يا ست العرايس من و انا عيل صغير ما كانليش فى الدنيا شغله الا انى انافس مختار و اتشاكل معاه على قد ما احنا اخوات على قد ما كنا ناقر و نقير بس حتى القط و الفار ما يقدروش يعيشوا من غير بعض البيه عمل كام حركه على كام نطه زغلل بيهم عين الحيه حطته فى دماغها و حلفت لتجيب مناخيره الارض مش هتقدر طول ما انا عايش بس هيحصل ايه بعد ما اموت
خديجه / اعوذ بالله ما تقولش كدا ان شاء الله هى و اللى يتشددولها ان شاء الله كل رجالتها و اللى يساعدوها
عباده / مش هتقتله كانت صريحه مع اخوكى هتقتلنا كلنا و تسيبه عايش بس مش هتسيبه يعيش هتحرق قلبه على حبايبه نفر نفر و اولهم مراته و مريم
خديجه / نجوم السما اقربلها
عباده / اخوكى كمان قالها كدا بس اديكى شوفتى حاولت .. حاولت و لا ما حاولتش ؟
خديجه / حاولت
عباده / و دلوقت بتحرق قلبه على عبد الله …و هتجرب على غيره على قد ما ربنا يقدرها
خديجه / لحد ما تحط ايدها على حبايبه و مين يوجعه اكتر مش كدا
عباده / انا و الكبير و مغاورى و الحج شاهين و انتى دلوقت نعرف نيتها انما مختار ما يعرفش ما نقدرش نقوله
خديجه / و انت مصدق انه ما يعرفش
عباده / احنا ما قولنالوش
خديجه / و هو اللى بيحصل محتاج حد يشرحه خصوصا لواحد ذكى زى مختار ابن عمك
عباده يبصلها و ياخدها فى حضنه و يتنهد
………………………….
فى جنينه الزنايته
مختار يدخل بالعربيه و يفتح ازاز العربيه
مختار / اقفلوا البوابه و ما حدش هينام الليله
جعفر / امرك يا سى مختار
مختار / لو دبانه عدت الله عليم
جعفر / عيب يا سى مختار برقابينا
مختار يهز راسه و يقفل الباب و يدخل يركن العربيه و ينزل منها و يعدل عبايته و يقفل العربيه هند تطلع من السرايا و تقف بعيد و تبتسم يبصلها و يبتسم و يروح ياخدها تحت عبايته
مختار / الدنيا بردت تعالى لتستهوى تعالى جوه
هند / انت جاى لوحدك فين الباقيين
مختار / ناصر كان مخنوق شويه فخد عده الصيد و طلع يقعد على النيل و عبد الله ما رضيش يسيبه
هند / و الباقيين
مختار / هيلفوا على البلد مع الغفر يشوفوا ولاد الكلب اللى ضربوا عباس دول دخلولنا من انهى داهيه تاخدهم … بقولك ايه انا جعان ما فيش لقمه و لا اى حاجه
هند / فى … طبعا فى … اطلع غير هدومك و اغسل ايدك و وشك و ثوانى و الاكل يكون عندك
مختار يبوس راسها و يقفل البوابه بالمفتاح و هند متابعاه
هند / هم مش راجعين خالص النهرده ؟
مختار / لا … الاكل بقى ابوس ايدك
هند / حالا حالا
هند تجرى على المطبخ و مختار متابعها و الحزن و التعب واضحين على ملامحه
…………………………
فى اوضه رشيد
رشيد نايم على جنبه و مدى لسمر ضهره و هى قاعده على الترابيزه بتتفرج على اليوتيوب و تاكل شيبسي و حاطه الهيدفونز على ودانها و فجاه تتنهد و توقف الفيديو و تقلع السماعات و تبص على رشيد و تقوم تروح تقعد جنبه و تبصله
سمر / طب لو ما اتحملتش الوجع … انا عايزه بس خايفه
رشيد يفتح عينه بس يفضل على وضعه
سمر / ساعات بحس ان الموت خساره فيا عشان مش مكتوبلى ارتاح
رشيد/ او يمكن لسه ليكي دور فى الدنيا
رشيد يلفلها سمر ترجع سنه لورا
رشيد / تساعدى حد مثلا او على الاقل تكونى سبب فى انقاذه
سمر / انا !!
رشيد / لو حاولتى و نجحتى هيبقي فى امل ان كل الناس دى تخف
سمر / فيرا مش هتسيبنى
رشيد / عندك ايه تانى تخسريه ؟
سمر تبص فى الارض
رشيد / انتى عاوزه ايه يا سمر
سمر / لو انت واثق اوى كدا ان ده العلاج ما تجرب فى نفسك بتجرب فيا ليه
رشيد / معاكى حق … فعلا … معاكى حق
رشيد يدى لسمر ضهره
سمر / اخويا جرب كل حاجه جرب المسكنات بأنواعها و المخدرات و المنومات جرب كل حاجه و فى الاخر بيرجع للحبوب تانى بسرعه
رشيد يقوم يقعد و يبصلها
رشيد / طب جرب يدمج كل دول مع بعض يعنى بدل ما ياخد حبايه كامله يقسمها و يعوض الوجع بمسكنات
سمر / لا … كان دايما يرميها عشان ما يرجعلهاش بس كان بيرجعلها برده
رشيد / طب نجرب لو ما قدرتيش الحبوب فى الدرج بس على الاقل نحاول
سمر / انا خايفه … انت مش متخيل … انت ما شوفتش اللى انا شوفته … انت مش مكانى
رشيد / انا ممكن اجرب فى غيرك بس انا محتاج حد يكون تحت عيني محتاج حد اقدر اتابعه عشان اسجل النواتج
سمر / بتتكلم كانك فاهم كانك دكتور مثلا
رشيد / انتى فاكره انى ماشي فى الدنيا بطولى انا قبل ما اقولك الطريقه كلمت دكاتره كتير صحابى … اه فى منهم شمال بس فى منهم يمين برده
سمر / لو فيرا عرفت
رشيد / لو مش هتقوليلها مش هتعرف و لو انتى ما خفتيش على مصلحتك ما تستنيش غيرك يخاف عليها
سمر / انت مش خايف على نفسك
رشيد / طب تصدقي و تؤمنى بايه ؟
سمر / لا اله الا الله
رشيد / انا عمرى ما خفت على نفسي انا لا عندى اللى ابكى عليه و لا اللى يبكى عليا … بس دلوقت خايف
سمر تبصله
رشيد / لو جرالى حاجه فى ناس هتاخدك .. ناس من طرفى هيوصلوكى لمكان امان و يوفرولك لقمه و سكن و كلو بالحلال بس مش هيوفرولك الحبوب
سمر تعيط
سمر / انت ليه بتعمل عشانى كدا انا ما استاهلش انا وحشه انا وحشه اوى
رشيد / و هو انا يعني اللى عدل ما كلنا متنيلين بستين نيله بس اهو يمكن لو عملت كدا يمكن لو قدرت اساعدك ربنا يغفرلى اى حاجه من البلاوى اللى عليا يمكن يكون سبب وجودى فى الدنيا و انى نجيت من كل ده عشان اساعدك مش يمكن
سمر / طب اوعدنى … لو فشلنا تقتلنى ماشي
رشيد / استغفر الله العظيم … سبيها لله ماشي
سمر / طب قول للجماعه بتوعك يقتلونى ماشي ؟
رشيد / اخدتى الحبايه النهرده
سمر تهز راسها
رشيد / بكره هنكسرها و نشيل منها حته صغيره و نشوف هتستحملى قد ايه و هنكمل بمسكنات تمام
سمر / و ان ما قدرتش
رشيد / احنا مش هندخل فى الغميق علاطول واحده واحده و انتى كمان هتساعديني تمام صدقيني لو نجحنا ليكي منى حاجه حلوه اوى
سمر / هتقتلنى
رشيد / ابو نكدك اخوكى ما انتحرش من الوجع اخوكى انتحر عشان يخلص من نكدك
سمر تبصله و عنيها كلها دموع رشيد يحس انه عك
سمر / حصل … كان فاكر انه لما يموت هينقذنى
رشيد يبصلها بحزن سمر تبص الناحيه التانيه و تعيط رشيد ياخدها قى حضنه و هى بتعيط
سمر / الحبوب الزفت دى ما بتوقفش وجع القلب ليه ما بتوقفش وجع الضمير ليه … يارب خدنى بقي يارب و ريحني انا تعبت و قرفت من نفسي بقي
رشيد / انا كنت بهزر ما كانش قصدى
سمر / اهرب … اقتلنى و اهرب
رشيد / هنمشي سوا هاخدك و نلف الدنيا روحتى بره مصر قبل كدا
سمر تبصله باستغراب يبتسم
رشيد / ما انا برده مش هاخدك لله و للوطن انا هاخدك تطبخيلى اصل اكل الخواجات ده بينشفلى بطنى … ما انتى بتعرفى تطبخى برده ؟
رشيد يمسح دموعها
سمر / بعرف
رشيد / خلاص يبقي اتفقنا انا لفيت الدنيا فى حتت بنت لذينه سبحان الخلاق جمالها ما يتحكيش تحبى تبتدى منين
سمر / انت بتعمل معايا كدا ليه
رشيد / مش عارف .. و الحق يتقال انا مستغربنى اوى
سمر تبتسم و تقوم من جنبه و تروح الحمام و تقفل الباب رشيد يتنهد
رشيد/ يا ترى ام الحكايه دى هتخلص على ايه ؟
…………………….
فى اوضه مختار
مختار بيصلى هند تطلع من الحمام شايله صينيه عليه اطباق و كبايات تروح تحطها على القطعه اللى فى الجنب و تبص لمختار
هند / هو انت بتصلى ايه بقالك ساعه ؟
هند تروح تنام فى السرير و تبص عليه مختار يسلم و يروح ينام فى حضنها هند تبتسم
هند / دعيتلى بقي فى كل ده ؟
مختار / دعيت
هند / حساك متغير
مختار /تعبان بس مش اكتر
هند / واضح ام فاتن كمان عيطت جامد النهرده كانت بتقول تعبت ربنا يعينها حملها تقيل و اللى حصل ما كانش شويه
هند تبص على مختار ساكت و دافن راسه فى حضنها
هند / انت نفذت وعدك بس … انا اصلي لما قلقت عليكوا كنت بحاول اخرج … قال يعني هلاقيكوا و كدا … يدرككم الموت و لو كنتم فى بروج مشيده
مختار يبصلها تلاقي عينه مليانه دموع هند تتخض و تتعدل
هند / مختار انت بتعيط !!! فى ايه مالك
مختار/ تعبت .. ايه حجر و لا ايه
هند / طب ليه ايه اللى حصل
مختار /خايف … عمال انفخ فى قربه مخرومه لما انقطع نفسي
هند / انا عارفه ان اللى بيحصل
مختار / انتى مش عارفه اللى بيحصل انتى مش عارفه كل اللى بيحصل يا هند …كنت بخاف تخافى … بس انا خايف … خايف و مرعوب … اللى بيحصل ده اكبر منى … اكبر من طاقتى
هند / خايف من ايه ؟
مختار / خايف اخسرك … خايف عليكي و على اهلى .. خايف على الناس … خايف ما اقدرش احميكوا و لا احميهم
هند / مش دورك لوحدك
مختار / شويه فلوس لا راحت و لا جت كانت راحت كان لازم يعني اتحمق و ارجعها
هند / انا مش فاهمه انت بتتكلم عن ايه بس صدقنى انت بتعمل اللى عليك و اكتر
مختار / مش كفايا ما طلعش كفايا
هند / هتستسلم يعني
مختار / بايدي ؟
هند / لو خايف علينا ما تخافش انت وراك رجاله انت مش لوحدك لو تعبت ارتاح شويه و قوم كمل
مختار / ارتاح !!! و شويه !!! كل ثانيه بتعدى هى بتتقدم علينا اكتر و موقفنا بيضعف اكتر كل ثانيه بتكسب فيها رجاله جداد بتزحف علينا من غير ما نحس قفلنا البلد و برده عرفت تدخل … طلعتلنا لسانها و اعلى ما فى خيلكوا اركبوه
هند / انا مش عارفه اقولك ايه بس صدقني انت مش لوحدك
مختار / ما دا اللى راعبنى … انا لو كنت بطولى ما كانش همنى لكن فى رقبتى كوم لحم و انتى اولهم
هند / و انا شويه و لا ايه طب يهوبوا منك كدا و لا من السرايا و انا افضي الرصاص اللى فى المخزن كله فيهم
مختار / لسه بتشوفى كوابيس
هند / لا … ساعات … بس فهمت فهمت ان قتلانا فى الجنه و قتلاهم فى النار و انى هدافع عن نفسي و اهلى لحد اخر نفس … انا اتعلمت ده منك
مختار ينام على ضهره هند تنام فى حضنه
هند / انا عارفه ان الحمل تقيل على كتافك و عارفه انك مش بتقولى كل حاجه بس انت ممكن تثق فيا على فكره انا عمرى ما هطلع سرك بره
مختار / ما بقولكيش مش عشان ما بثقش فيكي ما بقولكيش عشان بخاف عليكي … انتى طيبه اوى و بريئه اوى
هند / لا بس جامده اوى ما تنكرش
مختار يبتسم هند تبصله
هند / افتحلنا المران بكره و انا اوريك اما
مختار / مش فاضي بكره ورايا حاجات كتير اوى
هند / تمام
مختار / بس عباده هيمرنكوا على المران الجديد اللى ركب مكان الجيم تحت
هند / سمعتهم بيتكلموا عنه بس ما شوفتواش
مختار / هيديكى سلاح ما يفارقش ايدك تنسي موبايلك و لا تنسيهوش
هند / جوه السرايا ؟
مختار / جوه و بره ما حدش ضامن ولاد الكلب دول ناوينلنا على ايه تانى … و عاوز اطلب منك طلب
هند / خير
مختار / اوعديني ما تطلعيش من باب السرايا تانى مهما حصل
هند / ما طلعتش
مختار / كنتى ناويه .. رجلى على رجلك لاى مكان لو مين ما كان معاكى غيرى ما تروحيش معاه
هند / كلهم ؟
مختار / مش هطمن عليكى و انتى مع غيرى ما حدش هيخاف عليكي و يحميكي قدى
هند / انت مش حاسس انك بتبالغ شويه ؟
مختار / ريحيني ربنا يريح قلبك
هند / حاضر
مختار / و بلاش تقولى لحد انى كنت بعيط انا اساسا ما كنتش بعيط
هند / سرك فى بير محفوظ جنب سرك التانى
مختار / سر ايه ده ؟
هند / انى نفختك فى الجيم تحت
مختار / هههههههههههههههههه مسيري هرد هبتى
هند / لما ترتاح و تفوق من اللى حواليك هديك جوله تانيه
مختار / فى الشتا بقي و عليكي خير تكونى لابسه حاجه مستوره عشان اعرف اركز
هند / ههههههههههههههههه طب كويس انك قولتلى عشان اعمل حسابى و اللاعبك بقميص النوم العنابى اللى انت بتحبه
مختار / يا مرك يا مختار
هند / ههههههههههههههههههه
هند تحضنه اوى
هند / مش عيب انك تتعب بس العيب انك تستسلم خصوصا لو البلد محتاجالك
هند تبص لمختار
هند / انا واثقه انك هتعدى بينا الازمه دى انا واثقه انك الوحيد اللى تقدر
مختار يبوس رأسها
هند / و ما تخافش عليا انا ما عدتش لقمه طريه زى زمان .. لا دا احنا جامدين اوى
مختار يبتسم
هند / نام و ارتاح و ارمى حمولك على اللى خلقك
مختار / و نعم بالله مش عارف من غيرك كنت عملت ايه
هند / كنت دخلت فيهم بصدرك و لا همك انا اللى مكتفاك انا عارفه انا اه بخاف عليك و على اهلى بس مش هقبل اكون عقبه فى طريقك و يمكن لو انت كنت صريح معايا كنت هفهم انت بتواجه ايه و اقدر
مختار / تفتكرى
هند تسند على ايدها و تقعد نص قاعده
هند / بصراحه لا كنت هخاف عليك زياده بس انا بحاول اخفف عنك دلوقت فقدر المجهود يعنى
مختار يشدها فى حضنه و هى بتضحك بصوت عالى
مختار / تعالى هنا يا بت انتى جننتيني و طيرتى البرج اللى فاضلى اعمل فيكي ايه اعمل فيكي ايه
هند / ههههههههههههههههه
مختار / بحبك يا ست البنات
هند / و انا كمان بحبك اوى يا ابن الزيني
……………………….
فى اوضه رشيد
رشيد نايم سمر تطلع من الحمام تبص عليه و تروح تقعد جنبه يعمل نفسه نايم و مديها ضهره
سمر / انا معاك
رشيد يبتسم و ما يتحركش سمر تفضل قاعده واخده رجليها فى حضنها و الخوف و الحزن باينين عليها
رشيد / نامى يا سمر
سمر تبصله
رشيد / بطلى تفكير و اهدى
سمر تمدد فى السرير و هى بتبصله بحزن رشيد يغمض عينه و ينام
………………..
فى المستشفي عند عباس
خديجه تدخل تلاقي ماجده قاعده قدام باب الاوضه ماجده تشوفها تقوم تقف و يسلموا على بعض
خديجه / حقك عليا ما عرفتش اجى امبارح الدنيا كانت مقلوبه عندنا فى السرايا
ماجده / وصلنى اللى حصل عندكم .. ربنا يجيب العواقب سليمه
خديجه / هو عامل ايه
ماجده / على حاله مفيش جديد
خديجه / و ايه اللى مقعدك هنا ما انتش معاه جوه ليه
ماجده / عمتى معاه بتيجي بالنهار و ابويا بيمشيها بالليل و بقعد انا
خديجه / طب ما بتروحيش ترتاحى حبه ليه بالنهار ما دام عمتك هنا معاه
ماجده / لو كنت اقدر ما كنت مشيت مش قادره
ماجده تعيط
خديجه / للدرجادى !!! و بعد كل اللى عمله فيكي
ماجده / و هو كان عمل ايه يعني ؟ ما خلاص .. جالى بدل المره اتنين و تلاته نام فى الطل و راضانى … قالى هتغير و مش هعمل كدا تانى … و انا اللى مشيته … انا اللى اتبترت عليه
خديجه / ماجده
ماجده / طول الليل و انا بحايل و اراضي فيه مش راضي يسمعنى بقوله لو مش عشانى عشان عيالك … يا سيدى قوم و اعمل اللى انت عاوزه و ان كلمتك يبقي بحق .. ان شالله تصبحنى بعلقه و تمسيني بعلقه بس قوم … اتجوز عليا اتنين و تلاته بس قوم لعيالك … اعمل اللى انت عاوزه بس قوم
خديجه تاخد ماجده فى حضنها ماجده تعيط
…………………..
فى اوضه عبد الله
عبد الله بيقلب سلاح فى ايديه و ناصر قاعد جنبه
عبد الله / هو ده ينفع
ناصر / ينفع ينفع انا قولت ينفع يبقي ينفع
عبد الله / انا اه بعرف استخدمه بس مش هعرف مش هقدر
ناصر / هند ما كانتش تقدر برده بس وقت الجد قدرت و انت هتقدر
عبد الله / مش عارف مش حاسس انه صح
ناصر / على قد علمى انا الكبير هنا و انا اللى اقول الصح من الغلط و لما اقولك هتشيل السلاح يبقي تشيل و لما اقول تضرب اللى يقربلك يبقي تضرب
عبد الله يبص للمسدس تليفون ناصر يرن يطلعه من جيبه
ناصر / و تعمل حسابك لما تقوم بالسلامه هكتب كتابك على البت مريم
عبد الله يقعد و يتعدل ناصر يرد
ناصر / السلام عليكم … تمام … نفذوا
ناصر يقفل و يحط الموبايل فى جيبه
عبد الله/ انت كنت بتقول ايه يا كبير دلوقت
ناصر / الرجاله راحوا وقفوا قدام الصيدليات هيفتشوها تانى نوبه واحده قبل ما ياخدوا خبر اننا هنفتش او يلحقوا ينضفوا مكانهم
عبد الله / لا لا لا مش ده مش ده انا و مريم
ناصر / ايه مش عاوز و لا ايه
عبد الله / مش عاوز ايه لا طبعا عاوز انا اساسا بقيت زى الفل و ممكن اقوم اروح معاك دلوقت عادى
ناصر / و هتحط ايدك فى يدي قدام الماذون بخلقتك المشلفطه دى لما تخف شويه مش عاوزين نخضهم عليك
عبد الله / صح برده … طب و المهر
ناصر / المهر دين فى رقبتك تسده و بعدين دى حيا الله كتب كتاب
عبد الله / هسده يا كبير ما تقلقش والله العظيم هسده
ناصر / وقعت قلبي عليك يا ابن اللذينه
عبد الله / وربنا لو كنت اعرف انك هتعمل كدا لما اتخطف كنت اتخطفت من زمان
ناصر يبتسم
عبد الله / و ربنا انت كبير و انا بحبك
ناصر / و انا كمان بحبك يا عبد الله
عبد الله قاعد مبسوط
عبد الله / طب قولت لمريم و لا مفاجاه و لا ايه
ناصر / هبقي اقولها انا
عبد الله فرحان اوى و ناصر متابعه و بيضحك
………………..
فى الصيدليه
امين و تلت رجاله قالبين الصيدليه و بيفتحوا العلب علبه علبه يبصوا على الشرايط اللى جواها و الصيدلى واقف بره
الصيدلى / طب لو بتدور على حاجه قولى و انا اساعدك
امين / تسلم يا دكتور مش عاوزين نتعبك
الصيدلى / تتعبنى ايه بس حضرتك كدا بتبوظلى شغلى
امين / انت جديد علينا باين و ما تعرفناش ان كانت خسارتك جنيهات هنعوضهالك اللوفات بس احنا خسارتنا ارواح يا دكتور ارواح
الصيدلى / يا سيدى ما اعترضتش بس افهم بس
امين / طلعه بره يا جمال لحد ما نخلص هنا
راجل يدخل يشد الصيدلى بره و الرجاله تكمل تفتيش
الصيدلى / بالراحه طيب حاضر
جمال / حقك علينا يا دكتور بس الموضوع شكله كبير و اللى بيحصل معاك بيحصل فى كل صيدليات البلد حتى بتاعه التامين و الصحه
الصيدلى / و ليه كل ده انتوا مش لسه مفتشين قريب
جمال / الاحتياط واجب يا دكتور و اديك شايف الدنيا مش سالكه حوالينا
الصيدلى / طب انا هروح اقعد على القهوه لحد ما تخلصوا
جمال / ما تاخذنيش يا دكتور شايك و قهوتك هيجولك لحد عندك بس ما عنديش تعليمات انى اسيبك تمشي
الصيدلى / دا بمناسبه ايه ان شاء الله
جمال / بمناسبه ان الكبير قال كدا و كلمه الكبير ما لهاش تانى
الصيدلى يبص جوه امين و الرجاله بيفتحوا فى علب ازاز متبرشمه و يطلعوا الحبوب يبصوا فيها
الصيدلى / الادويه دى كدا كلها فى الزباله حرام عليكوا
امين يبص للصيدلى و يفضى الحبوب من العلبه فى الارض و يفتح واحده تانيه و يدور فيها راجل يطلع علبه من ركن مستخبى فيها شرايط الصيدلى شايفه يبلع ريقه و يبص يمين و شمال الراجل يودى الشريط لامين امين يقلبه فى ايده الصيدلى يطلع يجرى و جمال يجرى وراه امين و الرجاله يجروا وراه
امين / امسكوه ابن الكلب ده .. امسكوه
……………….
فى سرايا الزنايته
هند ماسكه المسدس و فى علامات بتطلع و تنزل بسرعه علامات تانيه بتتحرك يمين و شمال بسرعه على سيور و هى بتنشن و عباده متابع و هند معظم الطلق فى الهوا عباده يوقف السيور هند تبصله
هند / هى بتتحرك بسرعه مره فى مره هجيبها
عباده / عارف بس كفايا عليكي كدا النهرده و ادى فرصه لغيرك
هند / اخر مره يا عباده خمس دقايق بس
عباده / الجهاز مش هيطير ادى فرصه لغيرك
هند تبصله و تحط المسدس و تطلع بره تقابل فاطمه
فاطمه / عملتى ايه
هند / زفت طبعا هعمل ايه يعني
هند تروح المطبخ و فاطمه تروح وراها
فاطمه / زفت ليه هى اول مره تضربى نار و لا ايه
هند / لا بس عباده مخلى الحاجه تتحرك بسرعه اوى مش بلحق اجيب حاجه
فاطمه / عديتي حاجات العيال من زمان مره فى مره هتتحسنى
هند / لما يبقي يديني فرصه اتعلم هتحسن
فاطمه / هتكلم معاه بقولك ايه خدى صينيه الاكل و طلعيها لام فاتن ما نزلتش من اوضتها من الصبح و انا قلقانه عليها اوى
هند تهز راسها و تاخد الصينيه و تطلع
…………………
فى وسط البلد
الناس ملمومه و الصيدلى مربوط على فلكه و امين نازل فيه ضرب و الصيدلى بيصرخ
امين / وزعت على مين يا ابن الكلب انطق
الصيدلى / قسما بالله و لا حبايه الناس حتى البدايل ما بترضاش تاخدها
امين / بقالك وسطينا طول الوقت ده بتغفلنا يا ابن الكلب دا انا هقطع من لحمك نساير و اعمل منك عبره
الصيدلى / انا خدام لقمه العيش
امين ينزل فيه ضرب ناصر يدخل
ناصر / كفايا
الرجاله تقف
ناصر / باقي الصيدليات
مختار / نضيفه يا كبير
ناصر / حد مننا هيقف فى كل صيدليه بعد كدا … حد فاهم فى الصيدله
مختار يبص لناصر باستغراب
ناصر / اصلبوا الجدع ده على اول البلد خلى الكل يشوفه
امين يقرب من ناصر
امين / كدا الحكومه
ناصر يبص لامين امين يسكت
امين / امرك يا كبير … هاتوا الكلب ده و تعالوا ورايا
الرجاله تسحل الصيدلى فى الارض
ناصر / الفرجه خلصت يا رجاله اللى وراه حاجه يروح يعملها يلا
الغفر يفرقوا الرجاله مختار يقرب من ناصر
مختار / احنا ما عندناش رجاله كفايا بيفهموا فى الطب و الصيدله يا كبير
ناصر / يتعلموا يا مختار خديجه تعلمهم و كفايا انهم يعرفوا شكل الحبوب و يتابعوا اللى داخل و اللى خارج
مختار / الموضوع هياخد وقت
ناصر / يتشقلبوا و يتعلموا
مختار / اللى تشوفه يا كبير
ناصر يسيب المكان و يمشي
……………………
فى المستشفى عند عباس
كوثر قاعده بتقرا قران عباس يفتح عينه و يان كوثر تقفل المصحف و تقوم تبص عليه
كوثر / حمد الله على سلامتك يا سيد الكل
عباس / ماجده
كوثر / بره مستنياك دى قطعت روحها عليك من العياط ما استحملتش اللى صابك
عباس / ناديها يا اما
كوثر تجرى تفتح الباب تلاقي خديجه و ماجده و شاهين على الباب
كوثر / فتح عينه .. عباس فاق و فتح عينه … و بيسال عليكي
ماجده تجرى على جوه و شاهين يجرى بعيد
كوثر / على فين يا خويا
شاهين / هنادى الدكتور يطمنا عليه
كوثر / ربنا معاك ما تعوقش
كوثر تدخل تشوف ماجده ماسكه ايد عباس تطلع و تقفل الباب مغاورى يدخل
مغاورى / فاق صح ؟
كوثر / الحمد لله الف حمد و شكر ليك يارب
مغاورى / كنت نادر لما يقوم بالسلامه ادبح و افرق على الغلابه …و الله لاطلع دلوقت على الزريبه و انقى اكبر بهيمه فيها و ادبحها بايدي … اروحك يا خديجه فى طريقي ؟
خديجه / ماشي
مغاورى / هفرق اللحمه و ارجع هتعوزى حاجه يا عمتى
كوثر / خليهم اتنين تلاته دا الغالى ابن الغالى
مغاورى / والله ما يغلوا عليه عيني حاضر
مغاورى يمشي و خديجه وراه
……………………….
فى اوضه انتصار
هند تفتح الباب و تدخل انتصار تتعدل فى قعدتها
هند / ادخل ؟
انتصار/ تعالى يا ست البنات
هند / السرايا مالهاش حس من غيرك
انتصار / هو التمرين مش شغال و لا ايه
هند / شغال بس صعب … هو مش المفروض عباده عريس و كدا
انتصار / كنتى عوزاه يسيبها لمختار و لا ايه
هند / مننا و علينا و كدا يعني
انتصار/ ههههههههههههه تعالى يا هند اقعدى
هند / هو الكبير كلمك
انتصار / اه .. خير فى حاجه و لا ايه؟
هند / لا بس بايتين بره من إمبارح
انتصار / راحوا يفتشوا الصيدليات
هند / تانى ؟
انتصار / اه و المرادى لقوا
هند / يا مصيبتي بتتكلمى جد
انتصار / اه لقوا
هند / يعني
انتصار / لا لا … ما وزعش … الحمد لله اهل البلد واعين و الحمد لله ان الكبير كان علاطول بيجبلهم دكاتره يكلموهم عن اخطار العلاج من غير روجته و هم بيثقوا فى الكبير و بيسمعوا كلامه
هند تهز راسها
انتصار / فيكي من يكتم السر
هند / فى بير
انتصار / الكبير قالى انه قرر يكتب كتاب مريم و عبد الله
هند تقوم تقف بحماس
انتصار / لما الكبير يتكلم
هند تحط ايدها على بقها و تسكت
انتصار / انا كمان شايفه كدا ما لهاش لازمه الخطوبه تطول
هند / بس عبد الله مش جاهز للجواز دلوقت و ان كان على شغله فى الشونه فاكيد بكره الدراسه تبدا و يبقي الصبح فى الكليه و بالليل بيزاكر و هى كمان نفس الكلام
انتصار / عبد الله راجل و هيوفق مواعيده و اكيد الكبير مش هيسيبه يعني ما تقلقيش و بعدين دا حيالله كتب كتاب مش دخله يعني
هند / انا بجد فرحت اوى بالخبر ده
انتصار / و انا عشان عارفه انك اكتر واحده هتفرحى قولتلك حتى البت مريم لسه ما تعرفش
هند / بس انا مش فاهمه ليه
انتصار / لا ابوها اللى يقولها و فى الوقت اللى يشوفه مناسب هو ادرى بقي
هند / لا مش قصدى انا اقصد ايه اللى غير راى الكبير ليه الاستعجال يعني
انتصار/ و ليه التاخير دا جواز البنات ستره
هند تبتسم
هند / فكرتيني بمختار كان بيقولى الخطوبه رخمه زى اللى رقصوا على السلم
انتصار تبتسم بتعب
هند / مش واخده عليكي كدا دا انتى اللى سانده البيت ده و مدياله حس و لمانا مع بعض
انتصار / تعيشي يا ست الكل
انتصار تطبطب على ايد هند هند تبتسم
………………
على قهوه
ناصر قاعد و الرجاله حواليه خايفين
راجل ١ / دا انا ما كنتش بشترى غير من عنده
ناصر / مهو المشكله فى نوع واحد بس الحبايه اللى فى الشريط داهو مكتوب عليها بى كاى بالانجليزى اللى بياخد من الحبايه دى هو اللى عنده مشكله الباقي سليم
راجل ٢ / و انا اعرف منين ان كنت اخدت منها و لا لا
امين / انت اللى عارف انت اخدت ايه و ما اخدتش ايه
مختار / و بعدين الحبايه دى مش بتتاخد مره و خلاص دى لازم تتاخد كل يوم
ناصر / على العموم احنا كل شويه هنوريكوا شكل الحبوب و توعوا غيركوا و نقول تانى و تالت ما حدش ياخد اى دوا من غير روجته و لا اذن دكتور
مختار / احنا عمرنا ما اتاخرنا عن حد منكوا لا فى فلوس كشف و لا علاج احنا ما تهمناش الا صحتكوا
ناصر / انتوا اهلنا و عزوتنا احنا هنا عشانكوا
الرجاله / عشت يا كبير
عسكرى يدخل
العسكرى / لا مؤاخذه يا كبير
ناصر / اهلا يا ملوانى تعال اشرب شاى
الملوانى / عشت يا كبير بس سعاده بيه المامور عاوز يشرب معاك شاى على انفراد
ناصر / خليه مرتاح و انا هجيله لحد عنده
الملوانى / تسلم يا كبير
ناصر يقف
ناصر / لا مؤاخذه يا رجاله هروح اشوف سعاده البيه المامور و على العموم اخواتكوا معاكوا يحلوا محلى ان كنتوا محتاجين حاجه و لا ان كان حد فيكوا عنده اى مشكله … يلا بالاذن
ناصر يمشي مع الملوانى
………………….
فى اوضه عباس فى المستشفي
عباس / ما كانوش صعايده لابسين صعيدى بس خلقهم ما تقولش انهم صعايده
مغاورى / انت متاكد
عباس / انا ما قولتش اجانب … بس مش صعايده لا من البلد دى و لا من اللى حواليها
مغاورى / المهم حمد الله على سلامتك قلقتنا عليك يا ابن اللذين
عباس يبتسم و يبص على ماجده واقفه فى جنب
عباس / عرفتوا غلاوتى يعني
شاهين / ياض ما تخلينيش اتغابى عليك انت ما فيكش نفس لقلم
عباس / ههههههههههه عشت يا خال
شاهين / بقول نسيبك بقي ترتاح
عباس يبص لماجده
شاهين / اطمنتى عليه يا اختى
كوثر تبص لماجده
كوثر / فتك بعافيه يا ضنايا اجبلك حاجه معايا و انا جايه الصبح
عباس / تسلمى
الكل يمشي و ماجده واقفه و عباس متابعها
ماجده / اجبلك حاجه ؟
عباس / تعالى اقعدى جنبي
ماجده تقعد على طرف السرير بعيد عباس يبتسم
عباس / هنعيده من الاول و لا ايه امال كنتى بس فالحه تترمى عليا اول ما فوقت
ماجده / كتر خيرك
عباس / والله ما قادرلك تعالى قربى
ماجده تقرب
عباس / لما فتحت عيني و ما لقيتش حواليا الا امى قلبي وجعنى قوى ما سالتش غير عنك لما لقيتك بره روحى ردتلى
ماجده / قوم بالسلامه العيال ما بطلوش سؤال عنك احنا ما قولنالهمش بس اكيد حسوا ان فى حاجه
عباس / امهم مش فى البيت بايته جنب ابوهم و مش راضيه تفارقه و لا ترتاح
ماجده / على قد ما انا زعلانه منك
عباس / خلاص يا ماجده بقي كنت اموت يعني عشان ارضيكي
ماجده / بعد الشر عنك ان شاء الله هم و اللى يتشددلهم
عباس/ حرمت و تبت و ابقي عيل ان رجعت فى كلامى و لا بصيت لغيرك
ماجده / هتبص
ماجده تدمع و تبص الناحيه التانيه و ترجع تبصله
ماجده / لو عاوز تتجوز يا عباس
عباس/ عاوز
ماجده تتصدم
عباس / عاوز اتجوزك تانى عاوز اردك انا غلطت كتير فى حقك غلطت كتير فى حياتى بس اكبر غلط كان انى رميت عليكي اليمين
ماجده / انا كنت واخده عهد على روحى ان لو ربنا رجعك ليا و لعيالك تانى مش هزعلك مش هكلمك فى حاجه و لا اعاتبك على حاجه و تعمل اللى تعمله بس هقولك حاجه اخيره
عباس / سامعك
ماجده / افتكر ان الوضع ده ممكن يتعكس ممكن يجي عليك اليوم و انا اللى ارقد رقدتك
عباس / بعد الشر عنك يا جاموسة
ماجده / ما تستناش اليوم ده عشان تعرف قيمتي
عباس / عارفها … قسما بالله عارفها
ماجده تهز راسها
ماجده / ماشي ردنى .. و انا مسمحاك
عباس يبتسم و يشاورلها تقرب فى حضنه
ماجده / اخاف اضغط على حاجه كدا و لا كدا لما نروح بيتنا لما تقوم بالسلامه
عباس يهز راسه و هو مبتسم
ماجده / اعملك حاجه و لا اجبلك حاجه ؟
عباس / خليكي جنبي كدا و تسلمي على كدا
ماجده تبتسم و تبص الناحيه التانيه و ترجع تبصله
…………………………
فى القسم
ناصر يدخل الكل يحيه العسكرى يفتح مكتب المامور
العسكرى / الكبير وصل يا سعاده البيه المامور
المامور يقوم من مكتبه جرى و يستقبل الكبير و يحيه و يحضنه
المامور / منور يا كبير القسم نور و البلد منوره
ناصر / هههههههههههههه منور بناسه
المامور / ما تاخذنيش ان كنت جبتك كدا بس والله
ناصر / انت بس تؤمر احنا فى خدمه الحكومه
المامور / عشت يا كبير بس هو الحوار المرادى اكبر منى … الراجل اللى انت معلقه على اول البلد ده
ناصر / دا ما بقالوش كام ساعه
المامور / بس من ساعتها و انا تليفونى ما هديش يا كبير
ناصر / يبقي ينزل
المامور / ربنا يكرم اصلك
ناصر / تؤمرش بحاجه تاني
المامور / ما يؤمرش عليك ظالم
ناصر يقوم يقف المامور يقف
المامور / على فين انت لسه ما شربتش حاجه
ناصر / الجيات اكتر ان شاء الله
المامور / ما تاخذنيش يا كبير بس انت عارف
ناصر / ما تقولش كدا يا راجل … يلا فوتك بعافيه انا
المامور / نورت يا كبير نورت
المامور يوصل ناصر لباب القسم و اول ما ناصر يركب العربيه يشاوروا لبعض ناصر يمشي المامور يرجع مكتبه و يقعد على الكرسي و يطلع الموبايل و يتصل بحد
المامور / هينزلوه
فيرا / شاطر كدا انا مبسوطه منك
المامور يكتم غضبه جواه و يحط الموبايل على المكتب
………………….
فى فيلا فيرا
فيرا بتلعب شطرنج مع رشيد
فيرا/ دى تانى مره تكسبنى
رشيد / يا شيخه قولى كلام غير ده دا انتى اللى رايح و اللى جاى معلم عليكي جت على العبد لله يعني
فيرا / يعني ايه معلم عليكي
رشيد / يعني خسرانه من الكل
فيرا ترفع حاجبها
رشيد / ما تبصليش كدا الراجل بتاعك اتمسك و عباس فاق و عبد الله زى الفل و الزنايته و الجوارحه زى السمنه على العسل و يمكن اكتر و عملالى عصابه و دوليه
فيرا / و انت مين قالك ان مش ده اللى انا عوزاه
رشيد / هههههههههههههههه يا شيخه قولى كلام غير ده
فيرا / انت مش مصدقنى ؟
رشيد / طب اديني اماره
فيرا / دى حاجات ما تفهمهاش انت و اللى زيك
رشيد / طب معلش فهميني اهو ابقي فى الصوره
فيرا / فى سياسه اسمها انهاك الخصم هيفضلوا يلفوا حوالين نفسهم لحد ما يتعبوا و يفتحوا ثغراتهم ادخل انا
رشيد يسقف
فيرا / ثقتهم فى نفسهم هتتهز ثقتهم فى بعض هتتهز قدرتهم على التعافى هتقل هيخافوا و هيخوفوا بعض و كل ما خافوا منك اكتر كل ما ياسوا و ما قدروش يقاوموا و مش بعيد هم اللى ياخدوا الحبوب بايديهم
رشيد / بس انتى خسايرك جامده برده
فيرا / الفلوس بتتعوض يا رشيد بس الرجاله ما بتتعوضش
رشيد الابتسامه تروح من وشه فيرا تبتسم رشيد يلم نفسه
رشيد / انا هطلع اريح شويه
فيرا / سلملى على سمر
رشيد يبتسم و يمشي و فيرا متبعاه
…………………..
فى سرايا الزنايته
هند بتتمرن فى الجيم و مركبه كاتم صوت و مش بتجيب مختار يدخل و يتابعها يروح يطفى الجهاز كل حاجه تقف هند تتفاجئ و تبص تشوف مختار
هند / ما حستش بيك خالص … البتاعه دى صعبه اوى
مختار / عباده فعلا ظابط الاعدادات على اعلى مستوى
هند / ما حدش جاب حاجه خالص و ما نبنا غير كنس كميه الفوارغ دى كلها
مختار / تمام قفلى بقي و يلا نطلع ننام
هند / ما تجرب
مختار / بعدين مش قادر
هند / هو الكبير و عبد الله روحوا
مختار / لا … سمعتى عن حوار الصيدلى اللى اتمسك
هند / سمعت اه
مختار / الكبير و عبد الله قاعدين مع شويه رجاله بيفرزوا الصيدليه و ينضفوها و كدا يعني
هند / يعني هو مفيش حد تانى يعمل الشغلانه دى دول بايتين بره من امبارح كانوا على الاقل ريحوا ساعتين تلاته و رجعوا تانى الدنيا مش هتطير
مختار / مفيش كلام بعد كلام الكبير و عبد الله مش صغير و هو اللى اختار
هند / تمام خلاص مالك
مختار / قولتلك تعبان
هند / تمام خلاص اسفه اعملك تاكل حاجه
مختار / تسلمي عاوز انام بس
هند / تمام يلا
مختار يطلع هو و هند على السلم
هند / هو الرصاص اللى ضيعناه فى التمرين ده مش بفلوس ؟
مختار / بفلوس ليه ؟
هند / يعني ليه عباده يظبط على اعلى صعوبه و يخلينا نضيع الرصاص ده كله
مختار / ما اعرفش بس اكيد له حكمه فى التمرين و هو مش صغير و عارف بيعمل ايه
هند / اللى تشوفه
مختار يفتح باب الاوضه و يدخل يقعد على كرسي جنب الباب يقلع البياده و الشراب هند تاخدهم تحطهم فى جنب و تجبله غيار من الدولاب
هند / تفتكر انت هتعرف تعمل البتاع ده
مختار / ما جربتوش هجربه و نشوف
هند / تمام تحب تدخل تاخد دوش ؟
مختار / لما اصحى مش قادر … يلا تصبحى على خير
هند / و انت من اهله
مختار يدخل تحت الغطا و هند متبعاه
مختار / تعالى جنبى يا هند حتى لو مش هتنامى خليكي جنبى عشان اعرف انام
هند تبتسم و تجرى تدخل تحت الغطا جنبه يحضنها و ينام من التعب
…………………..
فى اوضه رشيد
رشيد قاعد على اللاب و عمال يكتب حاجات و سمر بتتقلب فى السرير يقفل اللاب و يروح جنبها
رشيد / الوجع زاد ؟
سمر / قادره استحمله
رشيد/ انا ما رميتش باقي الحبايه ممكن
سمر / قادره استحمله قادره استحمله
رشيد / تاخدى مسكن
سمر تمسك الملايه بايديها اوى و هى بتتالم
سمر / قادره استحمله
رشيد / اعملك حاجه تشربيها
سمر / اسكت يا رشيد اسكت و اطفى النور
رشيد يهز راسه و يقوم يطفى النور و يروح ياخدها فى حضنه
سمر / ابعد عنى
رشيد / خليني جنبك
سمر / هتعمل ايه و انت جنبى هتحس بوجعى يعني هتخففنى
رشيد / يمكن مش هقدر اخففك بس على الاقل
سمر / اسكت ارجوك
رشيد / طب انتى حاسه بايه
سمر / بموت عضمى كله واجعنى صداع رهيب عنيا ودانى كل حته كل حاجه
رشيد / استنى
رشيد يقيد النور
سمر / اطفى النور
رشيد يروح الحمام ياخد منديل من على المرايه و يفتحها يلاقي نص حبايه يروح يحطها على المكتب و يطلع مطوه من جيبه و يحط الحبايه تحتها و يحوط عليها بايده و يهرسها و ياخد منها شويه
سمر / اطفى النور ارجوك
رشيد / ما كانش المفروض نبدا بنص حبايه خدى دى
سمر / لا لا انا عاوزه اخف عاوزه اخلص
رشيد / سمر ما تجازفيش ما حدش عارف ايه اللى ممكن يحصلك انا مش دكتور و ما حدش هنا هيساعدنا
سمر / مفيش اسوء من اللى انا فيه مفيش اسوء من اللى شوفته
رشيد / اسمعى الكلام دى مش باقي الحبايه انا قسمتها انا كمان عاوزك تخفى بس مش بالطريقه دى
سمر تاخد وضع الجنين
سمر / مفيش طريقه تانيه
رشيد / خدى دى … دى حته صغيره
سمر تبصله رشيد يهز راسه و يحطهالها فى بقها و يسندها تقعد يسقيها ميه
رشيد / واحده واحده مش مستعجلين مش لازم تخفى بكره خدى وقتك
رشيد يبص على سمر يلاقيها مغمضه عنيها يجس نبضها و يفضل حاطت صابعه على النبض و بعدين يحطها على السرير و يغطيها و يروح يكتب على اللاب
………………….
فى اوضه عباده
عباده بيتقلب فى السرير و خديجه نايمه يقوم يفتح باب الحمام و يدخل يغسل وشه و يبص لنفسه فى المرايه و يطلع و يقفل الباب و يلبس العبايه و يقفل الباب على خديجه و ينزل يروح المران يفتح الباب يلاقي مختار مركب كاتم الصوت و عمال يضرب نار و يجيب معظم الاهداف
عباده / ايه الحلاوه دى
مختار يتخض و يبصله و يبتسم
عباده / مش جايلك نوم انت راخر و لا ايه
مختار / هند اتكلمت عنه كتير قولت اجربه حلو اوى
عباده / دافعين فيه الشئ الفلانى على الله يطلع بفايده

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية البر التاني)