رواية البر التاني الفصل الثاني والأربعون 42 بقلم لولو محمد
رواية البر التاني الجزء الثاني والأربعون
رواية البر التاني البارت الثاني والأربعون
رواية البر التاني الحلقة الثانية والأربعون
هند / كلمت ناصر
مختار / فى ايه ؟
هند / اللى اتكلمنا فيه امبارح
مختار / لا و زنانه كمان ما شاء الله متعدده المواهب
هند / دى اخرتها يعنى … مبسوط من حالته يعنى امال لو ما كانش جالك فى عز الليل يشكيلك همه
مختار يقوم يحضن هند تعمل مقموصه
هند / عاوز ايه انا مخصماك
مختار / انتى مش قولتى لما تبقى متوتره احضنك ادينى بحضن اهو هو مش شغال و لا ايه
مختار يحضن اجمد هند تبتسم
مختار / اشتغل اهو … هو بس الزرار بيعلق شويه فى الاول بس بعد كدا بيشتغل زى الحلاوه
هند تضحك و تبص الناحيه التانيه
مختار / حلااااوه
…………………….
فى الجنينه فى سرايا الجوارحه
مغاورى / كلهم فوق مستوى الشبهات بس لازم اخد احتياطى برده
شاهين / حتى الغفر معانا من سنين منهم اللى اتولد و كبر و اتربى على ايدينا
مغاورى / ربنا وحده اللى يعلم النار اللى جوايا بسبب الموضوع ده بس مش هتنطفى الا لما اتاكد بنفسى
شاهين / مش هتقدر تراقبهم كلهم فى وقت واحد لوحدك طول الوقت
مغاورى / و طول ما انا مش عارف مين
شاهين / انت عارف هتعمل ايه انت اللى مش راضى تريح نفسك
مغاورى / انا و اخويا على ابن عمى مش العكس
شاهين / الفاتحه على اللى يخون يا مغاورى
مغاورى يبص فى الارض و يهز راسه
شاهين / انا طالع انام و … اه بالراحه على خديجه امك قالتلى انك شديتها جامد
مغاورى / ما تقلقش يا ابا انا و خديجه الدنيا بينا حلوه
شاهين / الحمد لله … تصبح على خير
مغاورى / و انت من اهله
شاهين يدخل السرايا راجل فى اوائل التلاتينات يطلع منها
الراجل / السلام عليكم
مغاورى / و عليكم السلام .. خير ايه اللى مصحيك لدلوقت كنت فاكرك طلعت تنام من بدرى
الراجل / هنام من العشا زى الفراخ و لا ايه
مغاورى / امال على فين العزم كدا اجى معاك
الراجل / سمعت ان شباب الزنايته عاملين سهرايه فى الملعب اللى فى وسط البلد قولت اروح احط عليهم
مغاورى / لا على كدا بقى اطلع اغير هدومى و اجى اوجب معاك
الراجل / ههههههههههههههههههه متتاخرش عاوزين نلحق الحفله من اولها
مغاورى / هوا
مغاورى يدخل السرايا جرى
…………………..
فى اوضه هند
هند / لا مش مضايقه و لا معترضه انا بس مش فاهمه ماله الجيم اللى تحت يعنى اشتكى من ايه
مختار / احنا اخرنا نتمرن فيه فردانى انما نتجمع و نشجع و صوتنا يصحى الكل ازاى يعنى ؟
هند تهز راسها
مختار / و كمان اللعب مش بيبقى واقف على الزنايته بس دا بيبقى مفتوح للكل و البيوت ليها حرمه ما ينفعش اى حد يدخل و يخرج البيت طول ما فيه حريم
هند / خلاص تمام ما قولتش حاجه
باب الاوضه يخبط بالراحه
مختار / انا همشى انا بقى ما تستنينيش هتاخر
هند تهز راسها مختار يفتح الباب و يطلع بره ينزل تحت يلاقى عباده سابقه بكام سلمه يقف يكملوا سوا
عباده / مغاورى و عباس جوز اخته سبقونا على هناك
مختار / عباس !!
عباده / تخيل هههههههههههههههه
مختار يبتسم عباده يسبقه و مختار يحصله
………………………..
فى مبنى قديم ارضى و علوى واحد
الرجاله ملمومين و عاملين دايره كبيره و عمالين يزعقوا و يشجعوا و فى اتنين فى النص بيتصارعوا واحد يثبت التانى فى الارض لحد ما التانى يخبط بايده تلت مرات على الارض الاول يقوم و يمدله ايده يقومه و الاتنين بيضحكوا و الرجاله بتخبط الاولانى على كتفه تشجعه يروح يقعد و اتنين تانين يبداو مختار يدخل هو و عباده و امين و تلت شباب تانين
مغاورى / دا انا قولت مش جايين
مختار / امال مين يعلم عليك
مغاورى / بص فى المرايه و تعال اتكلم
عباده / جرا ايه يا رجاله الليله لسه فى اولها هدوا اللعب شويه
مغاورى / اهو كلو لعب
عباس / على قولك ما احنا جايين نلعب برده و لا ايه يا مختار
مختار / و لا ايه يا مختار !!! ههههههههههههههههه دا انت بتنسى بسرعه بقى
عباس / طب ما تيجي بعده
مغاورى / لا سيب مختار على جنب الجواز تقله
مختار / معاك حق عشان كدا انت عديت من تحت ايدى بشويه الكدمات البسيطه دى
عباده / لا اله الا الله يا رجاله دى شكلها مصارعه كلام يعنى و لا ايه
مختار / على قولك الرد فى الملعب
مغاورى / اوى اوى
عبد الله يدخل
عبد الله / اتاخرت و لا ايه
مختار يشوفه يتفاجئ
عباده / لا احنا لسه واصلين برده
مختار / انت بتعمل ايه هنا
عبد الله / عباده قالى ممكن اجى عادى هو فى حاجه و لا ايه
مختار / لا ما فيش بس الرجاله هنا ساعات بتتغابى يعنى
عباده يحط ايده حوالين رقبه عبد الله
عباده / و عبد الله شويه و لا ايه
مختار / ما انت مش هتقف قدام اخته لو اتخربش
عبد الله / خاف على روحك انت الاول و بعدين اتكلم
مختار / دا انا سمعتى بقت فى الارض خالص
الزنايته يضحكوا الرجاله تسقف
عباس / يا ابن الزيني جاى و لا ايه
مختار / جاى يا حبيبى اما نشوف مين فينا اللى تقل
عباس يقف فى نص الدايره و مختار يروح يقف قدامه و يلفوا حوالين بعض و هم واخدين وضعيه الدفاع
عباس / الا اخبار الجواز من مصراويه ايه
مختار / و بنت الجوارحه مش عجباك و لا ايه
عباس / لا بس اصلى بسمع انها كلمتها هى اللى بتمشى
عباس يحاول يضرب مختار بوكس مختار يفاديه و بايده التانيه يلفها حوالين رقبه عباس من قدام و يزقه لورا و هو بيكعبله من ورا برجله عباس يقع فى الارض مختار يمسك دراعه بسرعه و ينام فوقيه برجليه الاتنين بالعرض و هو بيشد جسمه يرفع وسطه لفوق و دراع عباس عباس يخبط على الارض تلت مرات مختار يسيبه و يقوم مغاورى يبص الناحيه التانيه مختار يمد ايده يقوم عباس
مختار / كان عندك احسن
عباس يزق ايده و يقوم
مختار / اه صحيح المصراويه بتلعب احسن منى فاحسنلك ما تجيبش سيرتها تانى على لسانك غير لما تبقى قدها
عباس / هو عشان ما رضيتش تروحلها تانى مضروب تفتكر نفسك كسبت بجد
مختار يبص لعباس
عباس / انزل تانى و نشوف
مغاورى / و انتوا ما فيش غيركوا و احنا جايين نتفرج و لا ايه … ما تيجي يا سيد الرجاله و لا انت جاى تتفرج من بعيد
الكل يبص لعبد الله
مغاورى / ما تخافش هبقى حنين عليك
عبد الله / ما دام كدا نجرب
عبد الله يقوم و يروح مختار يوقفه فى النص
مختار / كل حاجه مسموحه ما عدا العض و الضرب تحت الحزام و العنين
عبد الله / عباده قالى القوانين
مختار يهز راسه عبد الله يدخل و فى فرق واضح فى الطول و الحجم بين الاتنين الاتنين يبدوا يلفوا حوالين بعض و فى بينهم مسافه عبد الله يجرى و يهجم و يحاول يضرب مغاورى بكس مغاورى يمسكه يلحقه بالتانيه يمسكه و يشده يحضنه و يضغط بايديه الاتنين على ضهره و مختار و عباده و الزنايته واقفين مضايقين و متحمسين و عبد الله بيتالم مغاورى يتشقلب بعبد الله لورا
مختار / قدك ده
عباده / بس يا مختار قوم يا عبد الله
مغاورى يقوم بسرعه و يخنق عبد الله من ورا مختار يضرب كف على كف و يحاول يدخل عباده يشده بعيد
…………………….
فى مطبخ سرايا الزنايته
هند بتشوح كبده ناصر يدخل
ناصر / هو انتى يا هند
هند / نفسى هفتنى عليها قولت انزل اتسلى يعنى
ناصر / و عامله على قدك و لا فى زياده انا اصلى كيف كبده اوى
هند / كلو من بعد خيرك يا كبير
ناصر / ما نمتيش يعنى مستنيه مختار و لا ايه
هند / ما حضرتك برده ما نمتش فى حاجه و لا ايه
ناصر / البركه فى قهوه ام فاتن
هند تعبى ساندوتشات و تحطها قدام ناصر
ناصر / هاتيها و تعالى ناكل فى الفرنده الجو حلو و السما صافيه
هند / حاضر
هند تحط الحاجه على صينيه و تاخد كبايتين مايه و تمشى ورا ناصر
……………………..
فى الملعب
مغاورى بيخنق عبد الله و مختار هيتجنن بره و عباده و الزنايته بيشجعوا عبد الله و الباقى بيشجعوا مغاورى عبد الله ينزل بدقنه لتحت يمسك بايديه الاتنين فى كوع مغاورى و يشد جسمه و يرفع وسطه و هو بيزق براسه مغاورى لورا و يبقى واقف على رجليه بس و باقى جسمه فى الهوا
عباده / برافو يا عبد الله كمل كمل
مختار ينتبه و يركز و يسقف يشجع عبد الله و مغاورى بيقاوم عشان يفضل مكانه عبد الله يتحرك للجنب و بايد يحاول يدى مغاورى بوكسات بشكل عشوائى متتالى و مغاورى بيبعد براسه و عبد الله بيتحرك برجليه و جسمه فى الهوا يمين و شمال لحد ما مغاورى يقع على ضهره و عبد الله بيضرب بشكل عشوائى كلها تيجي فى مغاورى و لاتنين نايمين فوق بعض فى الارض و مغاورى تحت بيحمى وشه و عبد الله بيضرب بسرعه و الكل بيسقف واحد يدخل و يفك بينهم مختار يجرى يحضن عبد الله و عبد الله بينهج جامد جدا و مش عارف ياخد نفسه
عبد الله / فاجاتك صح
مختار يهز راسه و هو مبتسم
عبد الله / والله انا شخصيا فاجاتنى
مغاورى يقوم يسلم على عبد الله
عبد الله / انت جامد جدا على فكره انا كنت هموت فى ايدك اقسم بالله
مغاورى / بس انت راجل ما استسلمتش جدع تعجبنى مع ان شاكلك ما يجبش كدا خالص
مختار / انا يا بحلم يا مت ايه الروح الرياضيه دى يا مغاورى جديده عليك يعنى
مغاورى / مهو لما تتغلب على ايد قله اوى كدا
عبد الله يضحك و يبص الناحيه التانيه
مغاورى / يبقى يستاهل السلام
عبد الله / انت برده كنت حنين عليا
مغاورى / ما تاخدش على كدا … يلا يا عباس كفايا كدا
عباده / ايه يا عم انا ما لحقتش اللعب استنوا شويه ايه الاعب انهى خسران فيكوا
عباس / تعلالى يا حبيبى
مغاورى / لا تعلالى انا
عباده / و ماله
مغاورى و عباده يدخلوا فى النص و كل واحد بيحاول يثبت التانى و التانى مش مديله فرصه
………………………….
فى الفرنده
هند و ناصر كل واحد ماسك ساندوتش
ناصر / تسلم ايدك طعمها حلو اوى
هند / الف هنا
هند كل شويه تبص على ناصر يبصلها تلف وشها بسرعه ناصر يبتسم
ناصر / اتكلمى يا هند خير
هند / مفيش
ناصر / لا فى قولى ما تتكسفيش قولى
هند / عباده و خديجه يا كبير
ناصر / مالهم
هند / مش حرام اللى بيحصل ده
ناصر / والله انا روحتلهم البيت و اتكلمت مع اهلها و كدا كدا مش هينفع فرح الا على الاقل لما الاربعين بتاع اللى ماتوا دول يعدى
هند / ما ممكن غيرهم يموت
ناصر / ليه الفال الوحش ده على المسا
هند تبص فى الارض
ناصر / لما الاربعين يعدى هنتكلم و لو جد جديد يبقى يحلها حلال
هند تهز راسها و يكملوا اكل
…………………………………………
فى الملعب
مغاورى قاعد على ركبته و عباده خانقه
مغاورى / انا لو عليا ما اطلبش حاجه منك خصوصا فى الموضوع ده
مغاورى يمسك عباده من رقبته و يقلبه قدام عباده ينط فوق مغاورى و يثبت ايده و مغاورى نايم على بطنه و عباده تانى دراعه
عباده / حتى لو ما كنتش طلبت كدا كدا كنت هعمل كدا
مغاورى يضرب بدماغه لورا تخبط فى مناخير عباده يرجع لورا و تجيب دم يدوله فوطه و يكتم الدم
عبد الله / هو ده عادى
مختار / بتحصل اكيد ما كنش يقصد تبقى بالغباوه دى بس مع مغاورى توقع اى حاجه
عبد الله يوطى على مختار
عبد الله / انا غلبته
مختار / و بتقولها بصوت واطى كدا ليه
عبد الله / اخاف يتعصب و يضربنى
مختار / ههههههههههههههههههههه
عباده يطلع يلم حاجته و يمشى و هو متعصب
عباده / غبى و هيفضل طول عمره غبى
عبد الله و مختار و باقى الزنايته يجروا وراه
………………………….
فى اوضه خديجه
خديجه / المهم انت كويس دلوقت
عباده / اول مره تحصل يعنى و لا ايه و بعدين ما انتى عارفه لعب اخوكى الحمد لله انها جت على قد كدا
خديجه / بس انت بتقول ان عبد الله كسبه
عباده / كسبه اه بس مغاورى ما كانش مديله حقه اصل بصراحه مش هصدق حوار ان مغاورى كان مراعى ان عبد الله صغير و جديد و الكلام الفاضى ده مش مغاورى اللى يعمل كدا
خديجه / ليه يعنى على فكره مغاورى حنين اوى
عباده / امال ماله خشن معانا ليه
خديجه / عشان انتوا هتتقارنوا بيه انت و مختار معاه فى نفس الكفه علاطول الكل بيقارن بينكوا انما عبد الله لا الكل هيقول مغاورى كان مراعى انه صغير و جديد و الكلام الفاضى ده
عباده / يمكن
خديجه / و بعدين
عباده / فى ايه
خديجه / هنعمل ايه هتروح تقدم فى الجامعه هتلغى الحجز بتاع لبنان هتعمل ايه ايه اللى هيحصل
عباده / والله ما عارف انا مش فايق افكر فى اى حاجه انا جهزت كل اللى طلبوه بس مش فايق اعمل اى حاجه
خديجه / ما علش فتره و تعدى
عباده / هو انا لو قولتلك انى هلكان و عاوز انام شويه
خديجه / لا ابدا روح ارتاح و نتكلم فى اى وقت تانى بس بالليل انا بقيت بنزل تحت و اقعد معاهم
عباده / تمام يا ست البنات اكلمك بكره بالليل
خديجه / لا اله الا الله سلام
خديجه تقفل و تخبى الموبايل و تحط الطرحه و تفتح الشباك و تبص منه على السما صافيه و جميله تبتسم
………………………………
فى اوضه هند
مختار فى الحمام و هند قاعده فى السرير بتلعب فى الموبايل مختار يطلع و يرمى نفسه على السرير
هند / بالراحه
مختار / حقك ما الكبده كتمت على نفسك حقك
هند / بس يا بابا بس هبقى اعملك غيرها بعدين
مختار / بسيت
هند / المهم طمنى بقى رفعت راسى و لا اتحط عليك
مختار / لا يا ماما انا راجل اوى انا بلا فخر بلا فخر ما حدش عرف يحط عليا غيرك
هند / هههههههههههههههههه
مختار / ما شوفتيش عبد الله و هو بينفخ مغاورى
هند / بتهزر
مختار / بصراحه انا الواد ده داخل قلبى كدا و قاعد مربع و كل يوم عن اللى قبله بيكيفنى
هند / ههههههههههههههههه
مختار / الواد ده لو كان زيني عباده كان خاف ينافسه
هند / الحمد لله انه مش زيني
مختار يبصلها
مختار / افندم
هند / انت ناسى انت و هو كنتوا ازاى لحد ما المنافسه دى راحت لحالها انت بقى متخيل اخويا هيستحمل ربع اللى بتستحمله
مختار / عباده اكتر واحد النهرده كان واثق فى قدرات عبد الله و لعلمك بقى هو اللى قاله يجي و كان بيمنعنى كل ما كنت بحاول ادخل عباده مؤمن جدا بقدرات عبد الله و بيحاول يطورها و يشجعه
هند / اهم حاجه يبقى بعيد عن شغله
مختار / لا ما تخافيش لسه بدرى اوى على عبد الله
هند / بس فرق كبير بين حجم عبد الله و مغاورى كسبه ازاى ده
مختار / مش بالحجم و لا بالعضلات بالمخ و المهاره و عبد الله متمرن صح على ايد استااااااذ
هند / على يدى
مختار / بنت .. عيب
هند / هههههههههههههههههههههههههه
هند الضحكه تروح من وشها فجاه و تجرى على الحمام و ترجع و مختار واقف وراها مخضوض عليها يسندها تغسل وشها و تتمضمض تزقه و ترجع تانى لحد ما تقع فى الارض يسندها و يرجعها على السرير
مختار / انتى كويسه
هند مش عارفه تاخد نفسها و تهز راسها اه
مختار / فى ايه ؟ ايه اللى حصل
هند / مش عارفه معدتى قامت عليا فجاه
مختار / الكبده كانت وحشه و لا ايه اجبلك انتينال
هند / مش عارفه
مختار يهز راسه و يدور فى الادراج
هند / ما افتكرش عندنا و اصلا راحت خلاص انا بقيت كويسه دلوقت
مختار / متاكده اروح اشوف عند ناصر
هند / زمانه نام حرام عليك و بعدين هتقلقه على الفاضى انا بقيت كويسه
مختار / متاكده
هند / ان شاء الله تعال انت ارتاح انا بقيت كويسه خلاص
مختار يهز راسه و يبص حواليه و يروح جنبها
……………………..
تانى يوم على الفطار
انتصار / طب والله بلدى مش مجمده
شاكر / ايوه بس مش صابحه انا طول عمرى ما اعرفش اكل الكبده الا اذا كانت لسه طالعه و الدبيحه لسه مدبوحه قدامى كداهو غير كدا ما احطهاش فى بطنى
ناصر / انا كلت معاها منها ما فيهاش حاجه تلاقيكى خدتى برد فى معدتك من قاعده الفرانده
هند / ممكن برده
مختار / هى اصلا مش بتهتم بنفسها خالص
هند / انت اللى اوفر اوى … دا عاوزنى اروح لدكتوره
انتصار/ و ماله يا هند الحق عليه انه عاوز يطمن عليكي
هند / مش من شويه برد فى معدتى يعنى
فاتن / يا اختى روحى ما يمكن تطلع حاجه تانيه و نفرح كلنا
مختار و هند يبصوا لبعض
انتصار / طب دا يبقى يوم المنى يا لهوى طب والله لادبح و اوزع
مختار / هو ممكن ؟ يعنى اللى اعرفه ان اعراض الحمل بتبان فى التالت
انتصار / والله و ساعات من اول يوم
هند/ بس انا ما بدوخش
فاتن / مش كلو زى بعضه ما انا الحمل بتاعى ده طلع كدا مع انى قبل كدا كان بيجيلى بالنوم
هند/ اروح و اشوف
فاطمه / لو تحبى اجى معاكى انا فاضيه ما وراييش حاجه
هند / بيتهيالى الاحسن مختار يجي معايا لو فاضى طبعا
هند تبص لمختار
ناصر / و لو مش فاضى يفضالك هو احنا عندنا اغلى منك
هند تبتسم لناصر و ملامح القلق تبان على وشها مختار ياخد طعميتين و يحطهم قدامها تبصله يبتسملها تبتسم و تاكل
………………….
على الفطار فى سرايا الجوارحه
شاهين / لا انا اللى هروح بنفسى استلم التقرير و الجثث و هقف على الدفنه بنفسى
راجل / انا بقول اى كان ندى مبلغ لاهل كل واحد من اهلهم
شاهين / و انا كنت هستنى لما حد فيكوا يفتكر انا اديتهم فعلا من يوميها
ام مغاورى / ربنا يجعله فى ميزان حسناتك يا خويا
شاهين / عامله ايه يا خديجه
خديجه تهز راسها و تبتسم
شاهين / خلصتى ورق التكليف بتاعك و لا لسه
خديجه / دكتور منصور عملى كل حاجه و ان شاء الله اطلع فى حته قريبه
شاهين / لا ما تقلقيش انا هكلمهم النهرده هيحطوكى فى الوحده بتاعه البلد
خديجه تهز راسها
ام مغاورى / انا عارفه انه مش واقته بس انا مش عارفه راسى من رجلى فى موضعها هى و عباده
شاهين / ازاى يعنى
ام مغاورى / يعنى … اقصد
غفير يدخل
الغفير / لا مؤاخذه
الكل يبصله
الغفير / سى عباده بيستاذن يدخل
الكل يبص لبعضه
مغاورى / كنتى افتكريلنا مليون جنيه يا اما
مغاورى يحط لقمه فى بقه و يقوم خديجه تقوم مغاورى يشاورلها تقعد شاهين يقوم و الرجاله كلها تقوم وراه
شاهين / منور يا عباده اتفضل اقعد فطرت و لا نجيب فطار
عباده / فطرت ربنا يعزك
مغاورى / ايه اللى رماك علينا السعادى
شاهين / مغاورى
عباده / النهرده التقرير هيبان قولت نلحق اليوم من اوله و اهو يمكن مغاورى يهدى و يرتاح و نتمم الجوازه دى بقى
عباس / و حتى لو ما طلعتوش انتوا تفتكر احنا هنهدى الا لما نعرف مين اللى عملها
عباده / بقولك ايه يا حج انا صابر انا و اهلى عشان خاطرك و خاطر العيش و الملح و عشان انا شارى خديجه
شاهين / و احنا كمان شرينك يا عباده
عباده / تكرم يا حج … بس للصبر حدود و اديك شايف المعامله دا حتى فى القانون بيقولك المتهم برئ حتى تثبت ادانته و لا ايه يا متر عباس
عباس / و انت لو كنت متهم كان زمانك لسه واقف على رجليك
عباده / امال لزمتها ايه بقى المعامله دى … هستاذنك يا حج اشوف خديجه
مغاورى / تعبانه و نايمه فى اوضتها
عباده يبصله و يبص لشاهين
شاهين / خليها مره تانيه احنا هنطلع دلوقت نستلم التقرير مش انت برده جاى معانا و لا ايه
عباده / تمام يا حج اللى تشوفه
الرجاله تمشى و خديجه واقفه فى جنب مضايقه بنت اكبر منها تدخل
البنت / هو انتوا ما بتتكلموش خالص
خديجه تبصلها بحزن
البنت / والله حرام اللى بيحصل ده
ام مغاورى تدخل
ام مغاورى / حرمت عليكي عيشتك دا بدل ما تقوليلها كلمتين يعقلوها
خديجه / انتى ليه بتتكلمى يا اما كان الخطوبه اتفسخت
ام مغاورى / يعنى انتى ما لكيش عنين تشوفى اللى بيحصل يعنى
خديجه/ ليا و عشان كدا بقول مش هم يا اما و بعدين انتى عرفاهم اكتر منى عمرهم يعملوا كدا يا امى ؟
ام مغاورى / مفيش كلمه بعد كلمه ابوكى و اخوكى و هم شاكين فيهم
خديجه / ان شاء الله ربنا يظهر الحق
البنت / و لو التقرير هم يا خديجه ؟ دى هتبقى بحر دم ما لوش قرار
خديجه / التقرير مش هيقول مين اللى عمل التقرير هيقول اللى حصل حصل ازاى و احنا هنصدق اللى احنا عاوزين نصدقه و احنا عاوزين نصدق ان الزنايته هم اللى عملوا كدا و خلاص
ست كبيره تدخل
الست / مين غيرهم ليه مصلحه فى اللى حصل
خديجه / و هم ايه مصلحتهم بس
الست / يكوشوا على السوق و السلاح
ام مغاورى / لو كانوا عاوزين يعملوا كدا كانوا عملوا كدا من زمان ايه اللى جد
خديجه / ينصر دينك يا ست الكل قوليلهم
الست / دلوقت فى حد يشيل الليله
خديجه / ما يمكن العكس ما يمكن اللى الزنايته هيشيلوه الليله دى يكون صاحبها فعلا ليه لا
الست / يا خبر بفلوس بكره يبقى ببلاش
خديجه / المهم ساعتها مش الخبر بس اللى يرخص يا عمتى عن اذنكوا
خديجه تسيب المكان و تمشى
ام مغاورى / انا مش هكدب عليكوا انا عمرى ما هصدق ان الزنايته يعملوا كدا دا احنا ياما كلنا مع بعض عيش و ملح
الست / اه بس مغاورى و مختار من يومهم ناقر و نقير و عمرنا ما خلصنا من مشاكلهم و كل ما يكبروا مشاكلهم بتكبر معاهم
البنت / بس مختار كان معانا فى الحنه
الست / الله اعلم هو يعنى ما يقدرش يكرى حد يعمل كدا
البنت / مش عارفه … بس مختار ساب السلاح
الست / ما يمكن سابه كدا و كدا هو من امتى الحريم بيمشوا كلمتهم على الرجاله انا قولت من الاول مستحيل الزنايته يقبلوا بكدا
ام مغاورى / لا لا لا الكلام كدا كبر اوى و ممكن يشيل النفوس من بعضيها
الست / ما عدوك الا ابن كارك علموهالنا زمان و ادينا بنشوفها دلوقت انا هروح ابص على الحريم فى المطبخ
الست تمشى
البنت / ممكن يكون كدا فعلا يا اما
ام مغاورى / ربنا وحده اللى يعلم الحقيقه فين … ربنا يستر روحى بصى على عيالك شوفيهم فين و لا بيعملوا ايه مش كل يوم يعملولنا مصيبه
البنت / حاضر
البنت تمشى و ام مغاورى تبص لفوق
ام مغاورى / يارب
………………………….
فى عياده النسا
هند نايمه و الدكتوره بتكشف عليها بالسونار و مختار و انتصار واقفين متوترين الدكتوره تناول هند مناديل و تقوم تقعد على المكتب تكتب حاجه
الدكتوره / هو انا مش شايفه حاجه و دا طبيعي دلوقت فانا عوزاكى تعملى تحليل حمل دم و لو طلع فى حمل هتاخدى الدوا ده مرتين يوميا و تجيلى فى نفس المعاد الشهر الجاى
هند / و لو ما طلعش حمل
الدكتوره / على فكره لسه بدرى اوى على التوتر ده كله احنا ممكن نبدا نتكلم لو على الاقل فات على جوازكوا سنه من غير حمل
انتصار / بعد الشر ان شاء الله يحصل
الدكتوره / ان شاء الله
هند / بس انا ممكن اخد منشطات انا اعرف ان اللى حملهم بيتاخر بياخدوا منشطات
الدكتوره / ايوه يا حبيبتى بس لسه بدرى على المرحله دى ادى لنفسك فرصه الاول
مختار / تمام يا دكتوره كتر الف خيرك
هند تبص لمختار يبتسم تقوم و تطلع بره هى و انتصار
هند / كان لينا واحده قريبتنا الدكتوره كتبتلها حقن منشطه و حملت بعدها علاطول
مختار / طب ما نعمل التحليل دلوقت مش يمكن تطلعى حامل و نختصر الهم دا كله
انتصار / الله ما صحيح امال ايه بقى … هنعمل التحليل فين ؟
مختار / فى المعمل هنا فى السريع و احنا واقفين كداهو
مختار يروح الاستقبال و يتكلم مع الشاب اللى واقف يشاورله يمين يشاورلهم و يروحوا التلاته ما كان ما الشاب قال
…………………………..
على قهوه
عباس قاعد مع اتنين شباب
الاول / يعنى طلع مين فى الاخر
عباس / ما نعرفش قولتلك ميه مره ما نعرفش الحريقه مسحت كل حاجه
الاول / الله طب و بعدين
عباس / تصاريح الدفن خلصت و هيسلمونا الغفر بكره الصبح نصلى عليهم و ندفنهم و خلصت الحكايه على كدا
التانى /ازاى يعنى
عباس / يعنى الكبير قال كدا يبقى ما فيش كلام بعد كلامه
الاول / و تار الرجاله اللى ماتت
عباس / مش لما نعرف مين اللى عملها نبقى ناخد منه تارنا و بعدين فى ناس فى الاداره بتقول انه غالبا ماس كهربائى
الاول / و انت صدقت
التانى / جرا ايه يا نكدى يا ابن النكدى هى جنازه و تشبع فيها لطم ما خلاص … بقولك ايه يا عباس البت الشقرا
عباس يكتم بقه و يتنفض
عباس / اكتم انت هتفضحنا
التانى / ههههههههه خلاص يا عم هى اول مره يعنى
عباس / ان خدتك معايا فى حته بعد كدا ابقى تف عليا
التانى / و انت تعرف تروح و لا تيجي فى الحتت دى من غيرى الله يرحم سنيه ام شنب اللى كنت بتروحلها دا انت ما شوفتش النسوان اللى على حق غير على يدى
الاول / يا جدعان الرجاله هتدفن بكره انتوا بتتكلموا فى ايه بس
عباس / قوله
التانى / الحق عليا على العموم انا رايح الليله و كل واحد و كيفه بقى قال و على راى المثل الحى ابقى من الميت
التانى يقوم
عباس / طول عمره واطى
الاول / ما بلاش السكه دى يا عباس الكبير لو خد خبر
عباس / يا عم انت هتعملى فيلم و قصه دى حاجات تفاريحي كدا مش حوار يعنى
الاول / انت حر
عباس / عليك نور انا حر
عباس يشرب الشاى و هو بيتزهق
……………………
فى السرايا
هند تدخل وراها انتصار تضرب زغاريط هند تتخض و تضحك و الستات و البنات يتلموا
انتصار / انا ندراها والله لادبح و اكل الغلابه بنيه ربنا يتملها على خير و يقومها بالسلامه
مريم بمفاجاه و حماس
مريم / طلعتى حامل
هند / تخيلى
فاطمه / الف مبروك الف مليون مبروك عقبال ما يتملك على خير
هند / شكرا
فاطمه / امال مختار فين
انتصار / راح شغله بقى كفايا عطله بقولك ايه يا مريم ما تكلمى امين و لا عباده يجيبوا يقفوا على ايد الجزار انا كلمته و هيجيب البهايم و يجي كمان ساعه
فاطمه / و هو مش مختار كان اولى يقف حتى ينوبه من الثواب
انتصار / هو اه انتى طول عمرك كريمه و اللى فى ايدك مش ليكي بس ما تبقيش كريمه فى الحسنات يا فاطمه انا لو منك اطمع و اعبيها فى شكاير شكاير
الكل يضحك
فاطمه / بتتمالسى عليا يا ام فاتن ماشى حقك … بالاذن اشوف الطبيخ ما انا لو ما شوفتوش ما حدش هيشوفه
فاطمه تروح المطبخ
انتصار / اطلعى ارتاحى فى اوضتك و انا شويه و هحصلك … بت يا مريم
مريم / ايوه يا ست الكل اؤمرى
انتصار / اطلعى اقعدى معاها لا تخليها تشيل و لا تحط قسما بالله
مريم / من غير ما تقولى يا كبيره … يلا يا ست هند ما تجيبيلناش الكلام
الكل يضحك و يتفرقوا و انتصار تروح المطبخ تزغزغ فاطمه تركب الهوا
فاطمه / ما تبطلى حركات العيال دى بقى
انتصار / يا اختى و مالها حركات العيال انتى هتكبرينى ليه
فاطمه / مزاجك رايق طبعا
انتصار / و انتى ايه اللى معكر مزاجك يا بطوط
فاطمه / ابنى الحيله الواد اللى اتمنيته من الدنيا الفرحه اللى اتكسرت فى قلبه يا كبدى
انتصار تتنهد و تهز راسها
فاطمه / انا اللى تاعبنى انه متمسك بيها اتعلق بيها خلاص و هم ضاغطين عليه لا بيخلوه يكلمها و لا يشوفها و كل شويه يروحلهم و يرجعوه مكسور الخاطر يا كبدى
انتصار / فتره و هتعدى
فاطمه / لحد امتى انا بكره هرجع ادور على عروسه ان ما جوزته ست ستها
انتصار / يا فاطمه ما تقوليش الكلام ده
فاطمه / ما شوفتيش مناخير عباده و لا وش مختار مغاورى مش عاتق ما شاء الله
انتصار / عارفه مين اللى ظبط مغاورى
فاطمه / مين
انتصار / عبد الله
فاطمه / و انتى صدقتى
انتصار / عباده اللى حاكيلى بيقولى الواد كان واقف اسد لاخر ثانيه واحد غيره كان استسلم من اول تلت ثوانى
فاطمه / الا ما يبان عليه سهتون زى … و لا بلاش بتزعلى
انتصار / هزعل ليه اديها فى حسناتك اديها انتى اللى هتزعلى مش انا
فاطمه / يادى الحسنات انتى بتكلمينى كانى ما بعملش خير فى حياتى
انتصار / انا !!! ابدا دا انتى الخير كله هو احنا عارفين نقلدك حتى انتى بس بتعملى الخير و ترميه البحر ههههههههههههههههه طب والله حلوه
فاطمه تضحك و تبص الناحيه التانيه انتصار تزغزغها
فاطمه / ما تبطلى بقى يا ام فاتن الله
انتصار / شوفى انتى ما تتعاشريش
فاطمه تبرق انتصار تمسكها من خدوها
انتصار / بس بموت فيكي يا بطتى
فاطمه تسحب وشها و تسيب المكان و تمشى
فاطمه / الوليه اتجننت
انتصار / هههههههههههههههههههههههه ياختى خدنا ايه من العقل
فاطمه تطلع بره المطبخ و انتصار تبص على الاكل
………………………. فى سرايا الجوارحه
الستات قاعدين بيحضروا للاكل
بنت ١ / كانوا وزعوا على روح اللى ماتوا اولى
خديجه / ام فاتن كانت ندراها عشان ربنا يتم لهند على خير
ست ١ / انا لا بقيت طيقاهم و لا طايقه سريتهم
بنت ٢ / مش يمكن ظالمينهم
ست ١ / قلبي بيقولى هم
ام مغاورى / و انا قلبي بيقولى مظلومين
ست ١ / عشان خايفه على زعل خديجه بس طب لعلمك بقي يا بت يا خديجه انتى ربنا نجدك ليكي عندى حته عريس
خديجه / كتر خيرك من قبل ما تكملى انا مخطوبه عن اذنكوا
خديجه تقوم و توصل لباب المطبخ و ترجعلهم
خديجه / حتى لو الزنايته اللى عمولها انا مش هتجوز غير عباده
ست ٢ / خديجه
خديجه / انا هخرج
ام مغاورى / هتروحى فين ان شاء الله
خديجه / فى ستين داهيه تاخدنى يمكن ترتاحوا
خديجه تسيب المكان ام مغاورى تحاول تحصلها بنتها تمنعها
البنت / سبيها
ست ٢ / خديجه صوتها على ما شاء الله
ست ١ / لما يجي ابوها لينا كلام تانى معاه
البنت / معزوره برده مش كان زمانهم متجوزين دلوقت
ست ١ / و ربنا نجدها و فشكلها
ام مغاورى / اجلها
الكل يبص لام مغاورى
ام مغاورى / عن اذنكوا
ام مغاورى تسيب المكان و تمشي و الكل يبص لبعضه
………………..
فى اوضه هند
هند مربعه على السرير و قدامها طبق فاكهه من بتاع كفار قريش عماله تصور فيه و مختار نايم جنبها بيتفرج و يضحك عليها و كل ما يجي يمد ايده تحوشها و تكمل تصوير يضحك اكتر
مختار / دا للاكل مش للتصوير بس على فكره
هند تسيب الموبايل و تقشر موزه و تاكلها
هند / امممممم احلى موزه كلتها فى حياتي … تدوق
مختار / الف هنا لو مش هيضايقك يعني ممكن اخد واحده
هند تديله واحده يقشرها و ياكل
مختار / تعرفى مين اكتر حد فرحان بحملك
هند / ام فاتن انت مش شايف عملت ايه طب دا انا خايفه اخد على الدلع ده
مختار / العيال عزوه خصوصا البكرى
هند / اشمعن
مختار / جدر و اتمدلك فى الارض بتقوى بيه و عشانه حياتك كلها بتتغير بعد اول عيل
هند / بتتكلم كانك عارف
مختار / ما انا عارف كنت بشوف و اسال مره عمى شاكر قال لنا انه زمان كان خايف يموت يتنسي و ما يلاقيش اللي يترحم عليه دلوقت بقي خايف يموت قبل ما عباده يكبر و عوده ينشف و يطمن عليه
هند / فى الحالتين خايف
مختار / حتى الخوف انواع فى خوف يعجزك و خوف يشجعك يخليكي تتمسكى بالدنيا اكتر و تحبيها
هند / احبها !!!
مختار / ما انا ما حبيتش الدنيا الا لما دخلتى حياتي بقي عندى اللى اخاف عليه و عاوز اعيش عشانه
هند تبتسم
هند / دا الحمل طلع حلو اوى
مختار / مره سالت عمى شاكر ما دام كنت خايف تتنسي ليه ما اتجوزتش من بدرى قالى انه مش عشان يعيش يقتل زوجته الله يرحمها ما كانش هيبقي سعيد و هو فى حضن غيرها و هو واثق و متاكد انها زعلانه و مقهوره حتى لو ما بينتش ده قالى انها حكمه ربنا و هو راضي و انه مش عيب فيها و ان كان ممكن الوضع يتعكس و اكيد كان هيتقهر لو طلبت الطلاق لعجزه … بالحرف لعجز هو ما لوش اى ذنب فيه و لا فى ايده يغيره
هند / عظيم اوى عموا شاكر
مختار / صبر و ربنا عوضه
هند / فعلا و نعم بالله
رساله توصل تليفون مختار يحط قشره الموزه و يمسك الموبايل يفتحها
فيرا / مبروك البايبي فرحتلك من كل قلبي
مختار ينفخ و يكتب
مختار / الله لا يبارك فيكي
مختار يبعتها و يرمى الموبايل جنبه
هند / شغل
مختار / الا هو التفاح ده للفرجه و لا ممكن ادوق
هند تناوله واحده حمره
مختار / لا انا بحب الاصفر اكتر اديني واحده صفره
هند تناوله ياكلها و هو بيستطعم
مختار / هو ما جابوش مانجه ليه دا تسيب دا استهتار عاوزين الواد يطلع فى مناخيره منجايه
مختار يقوم يلبس و هند بتضحك
هند / انا اللى هتوحم هنا مش انت
مختار / بنت … عيب … احنا ما فيش بينا الفروقات دى انا اكل انتى تستطعمى
هند / هههههههههههههه يا مزاجوا شكلك رايق اوى
مختار / و فى حد يشوفك و ما يروقش انا هنزل اشوف فى مانجه تحت و لا لا لو ما فيش هبعت حد يجيبلك خمسه و جاى ارجع الاقيكي فضيتي مكان فى الطبق على ماجى مش هنعمل زحمه اطباق هنا
هند / هههههههههههههههههه انت مجرم على فكره
مختار يغمزلها و يمشي و يقفل الباب وراه و الضحكه تروح من وشه و الغضب يبان عليه و نفسه يعلا و يحاول يكتمه و يسيطر عليه و ينزل تحت يلاقي الكل قاعد بيشرب شاى و بيضحكوا
فاطمه / انا ضهرى اتقطم كنا وفرنا المجهود لما تولد
مريم / كدا احسن على الاقل لما يجي مختار الصغير يبقي فينا حيل نشيل و نهشك
فاتن / طبعا انتى اكتر واحده فرحانه
مريم / طبعا مش ابن عمى
فاطمه / عشان عمك برده و لا عشان عريس الهنا هيبقي رايح جاى على السرايا يجيب امه و يوديها
مريم / كدا يا عمتى طب والله زعلت منك
فاطمه تشد مريم فى حضنها
فاطمه / و انا ما اقدرش على زعل مريومتى الحلوه
مختار يدخل
مختار / فين المانجه يا ام فاتن ينفع كدا
انتصار / هههههههههههههههه نجيب مانجه بس كدا غالى و الطلب رخيص قومى ابعتى امين يا مريم يجيب مانجه و خليه يكتر و ينوع
مريم تقوم
مختار / امال الكبير فين على كدا
انتصار / فى المكتب مع عمك بيراجعوا الحسابات
مختار يبتسم و يدخل جوه المكتب و يقفل الباب
مختار / السلام عليكم
ناصر / و عليكم السلام تعال اقعد
مختار / ازيك يا عمى
شاكر / الحمد لله ازيك انت و ازى هند
مختار / بخير طول ما حضرتك بخير … بقولك يا كبير شوف كدا الرساله دى
مختار يورى ناصر الرساله ناصر يضحك
ناصر / يخربيت ردك يا اخى
مختار / هو ده اللى فرق معاك
ناصر / يا ابني هو بعد اللى ام فاتن عملته النهرده فى حد فى البلد او فى البلاد المجاوره ما عرفش ان مراتك حامل ما تكبرش المواضيع بقي
مختار / انت شايف كدا يعني
ناصر / بقولك ايه انا نفسي هفانى اوى على رز بلبن ما تخلى ام فاتن تعملنا دور و تطلع كدا ترتاح جنب عروستك و تسيبنا نشوف شغلنا
مختار / انا اللى بقيت بعطلكوا دلوقت يعني
ناصر / ما يبقاش خلقك ضيق كدا يا راجل خد من الواسع
مختار / عاجبك الكلام ده يا عمى
شاكر / والله انا كمان نفسي فى الرز بلبن اوى يا مختار و يا سلام بقي على شويه قرفه على الوش
مختار يضرب كف على كف و يسيب المكتب و يطلع بره و ناصر و شاكر بيضحكوا بصوت عالى
مختار / الكبير نفسه فى رز بلبن يا ام فاتن و شويه قرفه على الوش لعمى يا ام عباده
انتصار / عنيا يا حبيبي هعمل و ابعتلكوا انتوا كمان
مختار / مكسراتك بقي
انتصار / والله ما عارفه مين فى السرايا دى اللى بيتوحم … اما اقوم اعمل الرز بلبن
مريم / خليكي انا هعمله
انتصار / هساعدك
انتصار و مريم و فاطمه يقوموا يدخلوا المطبخ و مختار متابعهم يبتسم لفاتن و يطلع فوق
…………………..
فى اوضه عباده
عباده بيتكلم فى التليفون
عباده / طب اقسم بالله وحشانى اوى
خديجه / و انت كمان بس هانت مش كدا ؟
عباده / قوليلى فى جديد عندك
خديجه / مقسومين نصين نص بيقول تعملوها و نص بيقول لا
عباده / طب و بالنسبه للشغل مع فيرا
خديجه / الكل بيقول لا مفيش جدال
عباده / و الرجاله
خديجه / كل اللى سمعته قولته لو حد وافق يبقى هو اللى بينقل الكلام مش كدا
عباده / مش شرط دا الاغلب ان اللى بينقل هيبين كرهه الشديد لفيرا عشان ما يلفتش النظر
خديجه / الله امال بقى هتعرفوه ازاى
……………………….
فى سرايا الجوارحه تانى يوم
رجاله واقفه فى جنب و مغاورى واقف لواحده فى جنب بينزل ابليكاشن و بيفعله و ياخد الموبايل و يرجعه لواحد منهم
مغاورى / الف شكر
راجل 1/ العفو … ها رد عليك
مغاورى / لا … شكله فهم انى هكلمه من رقم غريب
راجل 2 / و لا عنه ما رد بكره هو اللى يتحوج لينا و يجى يجرى ورانا زى الكلب عشان ياخد شغل جديد
مغاورى / و احنا هنسيب حقنا عنده لحد ما يجى يطلب تانى و لا ايه انا بكره الصبح اروحله
راجل 1/ اقل واجب و لو عصلج فى الدفع كلمنى و انا اجى اظبطهولك
مغاورى / شايلك للتقيله عن اذنكوا
مغاورى يسيبهم و يدخل السرايا يقابل عباس
مغاورى / عباس
عباس يروحله
مغاورى / معاك موبايلك
عباس يطلعه و يديهوله
عباس / خير فى حاجه و لا ايه
مغاورى / موبايلى فاصل و كنت عاوز ارن على عبد الرؤؤف يجيبلى حاجه و هو مروح بصراحه مكسل اخرج تانى
عباس / انا خارج اؤمر
مغاورى / دا انا اروح اجيبها اسهل من انى استناك انت فيك و لا الصبح بسهراتك الصباحى دى
عباس / ما تيجي
مغاورى / متاكد انك عاوزنى اجى ؟
عباس يبص الناحيه التانيه
مغاورى / هتدينى الموبايل و لا ايه
عباس / ما يغلاش عليك
مغاورى ياخد الموبايل و يعمل بيرن و يسطب البرنامج و يحط الموبايل على ودنه
عباس / على فكره احنا مش بنعمل حاجه من اللى بالك فيها احنا يعنى بنفك عن روحنا
مغاورى / انا مش هتحاسب بدالك انا مالى و ان كان على اختى …
مغاورى يبص الناحيه التانيه و يتنهد
عباس / مالها اختك بس طب بالله عليك انا مش شايلها على راسى و بعاملها احسن معامله و اللى بتؤمر بيه بنفذه من غير كلام و قال على راى المثل يلف لفته و يرجع لفرشته
مغاورى / اللهم طولك يا روح انا مش عارف ابويا و امى ايه اللى مصبرهم عليك قسما بالله لولاهم انت عارف انا كنت عملت فيك ايه و بعدين احنا بنتكلم فى ايه ما انت عارف هى اول مره بس اقول ايه ديل الكلب يتصلح حالك شهر و لا اتنين و ترجع ريما لعادتها القديمه
عباس / ربنا يسامحك انا مش هزعل منك اقولك انا مش خارج خالص النهرده
مغاورى / لا يا خويا اخرج … اخرج و انبسط على راى امى صحيح مهى اسيا كانت متجوزه فرعون
مغاورى يبص فى الموبايل و يديه لعباس
مغاورى / خد يا خويا موبايلك ربنا ما يحوجنا
مغاورى يدى الموبايل لعباس و يمشى
عباس / فرعون !!!
عباس يتنهد و يمشى
……………………..
فى اوضه خديجه
مغاورى يدخل و يقفل الباب خديجه تقفل اللاب و تقوم تقف
خديجه / عملت ايه ؟
مغاورى يقفل اللاب و يحطه فى الشنطه خديجه تاخده و تحطه فى الدولاب و هو يروح ياخد موبايلها من على الكومدينو يحطه هو و موبايله فى الدرج و يقف خديجه تروح تطلع الموبايل الصغير من تحت المرتبه و تديهوله مغاورى يتصل بعباده ما يردش
خديجه / ايه ؟
مغاورى / لما هيشوفه هيرد
خديجه / عملت ايه ؟
مغاورى / ادينى بور زى النحله من الصبح على موبايلات الجوارحه موبايل موبايل
خديجه / و انا كمان حطيته على كل الموبايلات حتى موبايلات العيال بس تفتكر هتفلح
مغاورى / اما نشوف اخر افتكاسات المحروس
خديجه تبص الناحيه التانيه و تضايق مغاورى يقعد و يضحك
مغاورى / خلاص يا ام بوز افتكاسات سيد الرجاله على الله تفلح
خديجه / افرض بيتكلموا من تليفون زى بتاعى ده
مغاورى / انا اللى خايف منه اكبر من كدا بكتير
خديجه / ايه ؟
مغاورى / يكون ركب اجهزه تسجيل و ميكروفانات و كاميرات فى السرايا
خديجه / لا ما يجرؤش
مغاورى / على العموم لازم نلاقى حجه نقلب بيها السرايا فوقانى تحتانى لحد ما نطمن
خديجه / ااوووووف بقى انا تعبت حتى البيت مش هنرتاح فيه
التليفون يرن مغاورى يرد
مغاورى / السلام عليكم
عباده / ايه الاخبار
مغاورى / الاخبار عندك انت
عباده / النهرده لميت شويه من الحبايب و سخنتهم عليكوا ما تقلقش حطيناكوا فى دماغنا
مغاورى / على الله ما تقلبش نكد
عباده / اكدت عليهم مهما يحصل ما يحتكوش بيهم لو حصل حاجه هيبقى الغلط عليكوا يا ابن عمى
مغاورى / اقولك ايه و انا مهما كانت النتيجه الغلط هيبقى علينا برده حسبى الله و نعم الوكيل فى اللى عمل فينا كدا احط ايدى عليه بس و انا اسلخه صاحى بايدى
عباده / نزلت البرنامج
مغاورى / عملت زى ما انت قولت بالظبط
عباده / كدا اى مكالمه تليفون هتحصل من اى واحد منهم او تجيلك هتتسجل و تتبعتلك على موبايلك
مغاورى / تمام
عباده / هتقدر على الحوار ده بطولك
مغاورى / مجبر اخاك لا بطل ممكن خديجه تبقى تساعدنى و ان شاء الله الموضوع ده ما يطولش كتير
عباده / تمام انت مش ناوى تروح تقول للحج شاهين على المستجدات و لا ايه
مغاورى / لا مش ناوى اتوزع انا النهرده
خديجه تبص الناحيه التانيه و مغاورى متابعها و مبتسم
مغاورى / و لو ليك شوق فى حاجه يا خويا تعال وريني روحك
عباده / شكلى انا اللى هسلخه صاحى ابن الوارمه ده ماشى يا ابن عمى نبقى نتكلم بعدين سلام
مغاورى يقفل و يرجع الموبايل مكانه و يقوم يضحك
مغاورى / انتى من ناحيه و اختك من ناحيه تصدقى و تؤمنى بايه
خديجه / لا اله الا الله
مغاورى / نفسى يطلع عباس و لولا انى خايف عباده يحط عينه عليه و يسيب ابن الكلب الحقيقى يفلت من تحت عنينا كنت نبهته ليه
خديجه / اشمعن
مغاورى / نفسى اطخه
خديجه تبص فى الارض مغاورى يمشى
……………………
فى اوضه هند
شيرى / والله ناس زى العسل
هند / بيفرحوا بالحمل اوى
شيرى / و مين ما بيفرحش بالحمل يا هند
هند / لا يا ماما هنا الوضع مختلف بيحبوا العيال و الخلفه مختار بيقولى حوار عيلين و اقطع ده بيبقى لظروف خاصه غير كدا زى ما انتى شايفه كل واحد عنده خمسه سته
شيرى / هما اتنين و التالت بيجي غلطه غير كدا ما لكيش دعوه بالكلام ده
هند / طب بس ما تقوليش غلطه
شيرى / بتسال عن ابوكى … وحشها
الاتنين عنيهم تتلمى بالدموع
شيرى / عاوزانا نرجع مصر يوم الجمعه عشان فاكره اننا سايبينه هناك
هند / انتى مش كنتى اتكلمتى معاها
شيرى / اتكلمت و اتكلمت تانى بس عيله عندها كام سنه عشان تفهم يعنى
هند تمسح دموعها و تحاول تغير الموضوع
هند / اخبار الحضانه ايه
شيرى / الحمد لله الناس بتوضب فيها و كتر خيره مختار ان كان هو و لا عبد الله متابعين الموضوع
هند / يعنى هتفتحى على امتى لما تبقى وسط عيال تانين هتتلهى بتشوفيها هنا ازاى
شيرى / ممكن اول الشهر
هند / بالتوفيق ان شاء الله اخترتوا الاسم
شيرى / عبد الله بيقول بيبي كاير
هند / حلو صحيح بمناسبه الاسم مش انا قعدت انا و مختار امبارح ننقى فى الاسامى
شيرى / هههههههههههههههه
هند / مختار قالى نقى للبنت الاسم اللى تحبه زى ما انتى عاوزه بشرط يبقى معناه مفهوم لاى حد بلاش الاسامى الغريبه دى و الولد خير الاسماء ما حمد و عبد مفيش جدال
شيرى / و ماله حلو برده
هند / بس انا نفسى فى بنت اوى نفسى اسمى رحمه
شيرى / ربنا يتملك على خير و تقومى بالسلامه بعد كدا الاسم ده بيجي لوحده العيل بيتولد باسمه
………………………….
فى الجنينه الورانيه
العيال عماله تلعب و عبد الله و مريم بيمرجحوهم و هم بيبصوا لبعض و مبتسمين
عبد الله / حتى السيلفى !!!
مريم / ما ليش فيه عشان اوحشك و تيجي تشوفنى
عبد الله / ما انتى وحشانى والله من غير حاجه و بعدين ما انا كدا كدا الفتره الجايه هبقى هنا كتير عشان ماما و هند عقبالنا بقى
مريم / اتلم عيب
عبد الله / هو ايه اللى عيب انا اقول عقبالنا انتى تقولى امين
مريم / ان شاء الله
عبد الله / انا عاوز اسمى محمد على اسم ابويا الله يرحمه
مريم / هو فى زى اسم محمد دا حتى اسم النبى
عبد الله / عليه الصلاه و السلام
مريم / امى مره جابتلى سلسله مكتوب عليها محمد هى لبسه و ما لبستهاش تانى
عبد الله / ليه
مريم / العيال استلمونى فى المدرسه مين محمد ده مين محمد ده قولت ما بدهاش بقى كدا بقى ارجع اللبسها تانى بقى ان شاء الله و اهو
عبد الله / انتوا بتلبسوا دهب فى المدرسه
مريم / انا كنت صغيره كنت لبساها تحت المريله و من فرحتى بيها طلعتها وريتها للبنات فى الفصل
عبد الله / ما تتجدعنى بقى و تعالى ناخد صوره سوا معقول خطيبتى و لحد دلوقت ما عييش صوره ليكي
مريم / بكره الدراسه تبدا و كل واحد فينا يتلخم فى مزاكرته و دروسه و انت تكتفى بالصوره و انا يطلع عينى هنا ما تنساش انى ثانويه عامه و بصراحه انا نفسى اوى ابقى دكتوره انا كمان
عبد الله يطلع المحفظه و يطلع منها صوره و يديهالها
مريم / ايه دى ؟ ما تنفعش
عبد الله / عاوزه واحده اكبر ؟ اعملك كارت ؟
مريم / انا مش هتكلم مع صوره انا ما اتجننتش للدرجادى يعنى … لسه شويه
عبد الله / انا بقى اتجننت و عاوزه تشوفى الجنان يا مريم اصبرى عليا
عبد الله يسيب مريم و يمشى تمشى وراه بس ابطئ و هى مبتسمه عبد الله يروح يلاقى ناصر واقف بيضحك مع اتنين من الغفر عبد الله يروح يناديله
الغفير / دا انا سميته ناصر على اسم جنابك يمكن ينوبه من الاسم جانب و يبقى زى جنابك كدا
ناصر / بكره ربنا يكرمك فيه و يبقى سيد الناس كلها ان شاء الله
عبد الله / بعد اذنك يا كبير
ناصر يبص لعبد الله و يبتسم
غفير 1/ بالاذن احنا يا كبير
غفير 2 / ازيك يا سى عبد الله
عبد الله / الحمد لله تسلم
الغفر يمشوا
ناصر / خير فى حاجه و لا ايه
ناصر يبص على مريم واقفه بعيد و بتابع يشاورلها تيجى تهز راسها لا يبتسم
عبد الله / انا خاطب مريم صح
ناصر / والله على قد علمى
عبد الله يبتسم و ياخد نفس و يتشجع
عبد الله / انا عاوز صوره ليها و هى مش راضيه تديهانى
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
