رواية البر التاني الفصل الثالث والسبعون 73 بقلم لولو محمد
رواية البر التاني الجزء الثالث والسبعون
رواية البر التاني البارت الثالث والسبعون
رواية البر التاني الحلقة الثالثة والسبعون
مختار/ علمناهم الشحاته بتعملى ايه هنا
هند / السما صافيه اوى و النجوم واضحه
مختار / بس انا مش شايف نجمه غيرك
هند تبصله و هى مبتسمه
هند / بتعمل ايه هنا كنت فاكره انكوا فى اجتماع مغلق
مختار / خدت نصيبي و الباقي ما ينفعش احضره
هند / فهمت
مختار / شوفتى اللى حصل مش الكبير طلب منى اعمل تحليل
هند / تحليل ايه
مختار / خمنى ؟
هند / ما تقولش .. بتهزر …و هتعمل ايه؟
مختار / هعمله طبعا
هند / بالبساطه دى
مختار / و ابسط من كدا كمان كدا كدا الدكتور بتاع مصر هيطلبه منى فاروحله بيه و انجز وقت
هند / هو احنا هنروح لدكتور فى مصر
مختار/ انا لو عوزانى اكون صريح معاكى مش شايف ان ده وقته بس لعله خير
هند / تفتكر ممكن يكون عنده اكتر من اللى الدكاتره اللى هنا قالوه
مختار / و ليه لا ما ناس كتير عملوا عمليات و ربنا كرمهم و بعدين احنا ما علينا الا السعى و فى الاول و الاخر دا رزق من ربنا
هند / بس انت شايف انه مش وقته عشان هنبقي بعيد عن البلد صح
مختار يبصلها و يبتسم
هند / هنروح امتى ؟
مختار / على ما التحاليل تبان اكون سالت و رتبت و نتكل على الله و نسافر
هند تفكر و تروح تسند على السور و تبص على البلد
مختار / كنت فاكرك هتفرحى
هند / تصدقنى لو قولتلك ان قلبي انقبض و خفت
مختار / انا هبقي معاكى و هامنك كويس
هند / لا مش كدا انا عارفه ده و صدقنى انا عمرى ما خفت و انا معاك حتى اليوم اياه انا ما خفتش على نفسي كنت خايفه عليك انت
مختار / امال خفتى ليه
هند / عشان دى هتبقي اخر سكه ليا انا كنت عامله حسابى انى هسيبها للاخر افرض
مختار / ما افرضش احنا احسن من غيرنا بكتير الحمد لله عندنا فلوس ممكن نجرب مره و اتنين و تلاته ممكن نسافر بره كمان ممكن نمشي فى اى سكه فيها امل و نمشي مره و اتنين و تلاته و طول ما فينا نفس هنحاول و اللى ربنا كاتبهولنا هناخده
هند / و ان ما كان
مختار يحط ايده على بقها
مختار / خلى ايمانك بربنا و كرمه اكبر من كدا انتى ما فيكيش حاجه و ان شاء الله انا كمان هبقي زى الفل و احنا ما عليناش الا السعى
هند / مهو السعى برده ممكن يكون بطريقه اسهل و اسرع
مختار / انى اتجوز صح
هند عنيها توسع مختار يبص فى الارض و يرجع يبصلها
مختار / مش هيحصل
هند / انا مش همنعك
مختار / و هو انا هخاف منك ؟ انا بخاف منك سعات مش هنكر
هند و مختار يبتسموا
مختار / بس انا مش هتجوز لانى اضعف بكتير من انى اعدل بينكوا حتى لو جابتلى الواد حتى لو جابتلى الف واد مش هعرف احبها قدك
هند / بقيت بتعرف تقول كلام حلو
مختار / بس دا مش كلام
هند / كلام يا مختار لو مش هتحبها هتحب ولادها ده سخن دا بيزن هى الحمل تاعبها لو مش هتعدل مش هتعدل عشان كفتى انا اللى مايله كفتها هى برده اللى هتميل
مختار / و انا مش هجادلك فى حاجه كدا كدا مش هتحصل اصل ما دام كدا مش هعدل و كدا مش هعدل هضحى باخرتى ليه
هند / عشان تبقي اب
مختار / انا ما طلبتش اتجوز على فكره و بعدين انتى ليه بتتكلمى فى حاجه سابقه لاوانها من الاساس
هند / عشان عمك ما كانش يقدر يجي على مراته عشان عيلتها لكن انا …
مختار / انا مش عمى انا مش عمى و اى كان اللى ملا دماغك بالكلام ده انا مش عمى دا اولا ثانيا بقي انا من الاصل موعاش على عمى فى الفتره دى ما كنتش اتولدت فمعرفش ان كان فضل باقي على مراته عشان بيحبها و لا عشان خايف من اهلها ثالثا بقي و دا الاهم انتى بجد لحد دلوقت مش حاسه ان كل العالم اللى تحت دول عيلتك نسيتي انهم وقفوا ضدى عشانك .. اقولك حاجه انزلى عيطي تحت قوليلهم مختار اللى من دمكم داسلى على طرف بخ فيا بس و اتفرجى يا هند و انتى تعرفى ان كانوا دول اهلك و لا اهلى
هند/ انا ما قصدتش كدا
مختار/ امال
هند / انا بتكلم انكوا … هتصبروا لحد امتى على فكره دا شرع ربنا ساعتها مش هتبقي بتعمل حاجه غلط هيقفوا قصادك ليه
مختار / مش هيقفوا
هند / شوفت
مختار/ انا عمرى قولتلك كلمه و ما كنتش قدها
هند تهز راسها لا
مختار / انا مش عاوز عيال لو ما كنتيش انتى امهم و تحرم عليا حريم الدنيا كلها طول ما انتى على وش الدنيا حلو كدا
هند / طب و بعد ما اموت ؟
مختار / ههههههههههههههههههه ناقص تقوليلى ما فيش حور عين فى الجنه كمان
هند / الحور دول انا هبقي ستهم انما
مختار / انما انا لو منك اتبت فى الدنيا بايديا و سنانى و ما ادينيش فرصه اتلفت كدا و لا كدا
هند / هو بايدي يعني
مختار / على فكره السيره دى بتوجعنى بصي يا هند بدل ما تفكرى فى الكلام اللى يوجع القلب ده ادعى ربنا يرزقنا و ما تخافيش ربنا عند حسن ظننا بيه هيرزقنا ربنا كان كريم معانا و خلانا نتقابل و جمعنا تحت سقف واحد هو الوحيد اللى يقدر يفرقنا و هو الوحيد اللى بايده رزقنا تعالى ننزل نتوضي و نصلى و ندعى اياكش تكون ساعه استجابه و تلفق
هند تبتسم و تهز راسها مختار ياخدها تحت باطه و ينزلوا
مختار / متكلفته انتى بالشال الصوف و سيبانى ارصرص
هند / هههههههههههههه
مختار / طب والله تستاهل
…………………..
فى سرايا الجوارحه تانى يوم
ام داوود تدخل
ام مغاورى / الله عاش من شافك يا ام داوود خير
ام داوود/ خير يا ست الكل الست سماح كلمتنى و قالت عوزانى سبت اللى ورايا و اللى قدامى و جيت جرى
ام مغاورى / اهى و ماله ما هى عروسه برده
كوثر تدخل
كوثر/ الله هى الوليه ام داوود هنا
ام داوود / ازيك يا ست كوثر
كوثر / بخير ياللى ما بتساليش هو يا وليه ان ما كنتش انا ابعتلك ما تساليش
ام داوود / والله على عيني انتى عارفه الدنيا تلاهى
كوثر / على العموم حصل خير رزقك فى رجليكى ما ورايش حاجه النهرده و فضيالك
ام مغاورى / ام داوود كانت جايه لسماح هى اللى طلباها
كوثر / شوفى ازاى
سماح تنزل على السلم
سماح / ما فيهاش حاجه يا اما خليها تشوف عمتى و تبقي تجيلى وقت تانى يا مكتر الايام
ام داوود / على العموم النهار لسه فى اوله اخلص و اجيلك
سماح / ما افتكرش هتلحقى يا ام داوود
كوثر / لا يا حبيبتي انا ما بحتاجش شغل كتير زيكوا
سماح / و احنا ما بنحتاجش شغل خالص يا عمتى احنا بس غاويين ندلع صحاب مزاج و الدلع عندنا غيه
ام مغاورى / جرا ايه يا ام داوود انتى هتقضي اليوم على الواقف كدا اطلعى يلا ما الحجه ام عباس عشان تنجزى يومك
كوثر / يلا يا ام داوود
كوثر و ام داوود يطلعوا
سماح / كدا عمتى هتنشغل عنى و اقدر اساعدكوا من غير قله مزاج
ام مغاورى / عمتك طيبه هى بس
سماح / من غير ما تقولى انا عشان خاطركوا اتحمل اى حاجه هاه اساعدك فى ايه
ام مغاورى / اطلعى زاكريلك كلمتين عشان ام داوود لما تجيلك بكره ما تبقاش عطلتك
سماح / لا انا هخليني وسطيكوا انا والله بحب قعدتك اوى زى امى بالظبط و ما بيحوشنيش عنك غير الشديد القوى
ام مغاورى / و زى ليه يا سماح ما انا امك برده اقولك تعالى نشرب الشاى فى الفرنده الجو النهرده حلو
سماح / هى ماجده فين تيجي تشرب معانا
ام مغاورى / ماجده فى المطبخ بتوضب للغدى مع الحريم
سماح / خلاص هدخل اتكلم معاها الاول اصل انا بصراحه كنت جايبه ام داوود عشان اعزم ماجده و اراضيها اصلى مكسوفه منها اوى و عيني منها فى الارض على الكلام اللى قولته
ام مغاورى / ماجده قلبها طيب زمانها نسيت
سماح / و ماله
ام مغاورى / خلاص اللى يريحك
سماح / اسبقيني و انا هعمل الشاى و اجيلك
ام مغاورى / ماشي هستناكى
ام مغاورى تمشي و سماح تدخل المطبخ
سماح / صباح الخير
الكل / صباح النور
سماح تروح تعلق على الكاتل
سماح / الله ينور انا كمان عامله محشي كرنب النهرده
ست ١ / و انتى ياختى هتفضلى فاصله كدا طول عمرك
سماح / على عيني بس نعمل ايه اهو على يدكوا دا انا والله نايمه قبل الفجر بساعه سهرانه طول الليل بلف الكرنبه و البوتجاز عندى عين واحده يعني تسلقي الكرنبه و تستنى تعملى الخلطه و حاجه مرار
بنت ١ / و على كدا بقي المحشي بتاعك احلى و لا بتاعنا
سماح / هو فى زى عمايلكوا انا على قدى
ماجده / سماح نفسها حلو هى اللى بتخاف من العين
سماح / هودى الشاى لامى فى الفرنده و اجى اعمل معاكوا
بنت ٢ / ليه موراكيش مزاكره و لا ايه
سماح / لا كنت مفضيه روحى لام داوود بس عمتى خدتها
ماجده / و انتى محتاجه ام داوود فى ايه و انا اعملهولك
ست ٢ / حقه البت ماجده شاطره اوى فى الحاجات دى عشان كدا ام داوود ما بتجيش هنا الا لو حاجه كبيره يعني
سماح تصب الشاى
سماح / ما انا شاطره برده بس كنت عوزاها ترسملى حنه على ضهرى مش هطول
ماجده / لو عوزانى اعملهالك اعملهالك انا بعملها حلو
سماح / تسلم ايدك بس دا انا كنت جيباها ليا و ليكي هديه يعني بحاول اعتزرلك على اللى قولته
ماجده / انا عارفه انك ما كنتيش تقصدى و لعلمك عباس اتغير فى اخر ايامه و مات طاهر
سماح / حقك عليا بالله عليكى ما تزعلى منى انا
ماجده / انتى زى اختى الصغيره و انا كنت واقفه و شايفه عمتى ضغطت عليكي ازاى انا عارفه انه كان غصب عنك
سماح / يعني مش زعلانه منى
ماجده / لا مش زعلانه و عشان اثبتلك هاخدك دلوقت و ارسملك الحنه و اهو اخلع من المحشي و قطمه ضهره
الكل يضحك
بنت ٢ / لو اتبقي حنه ارسميلى بعدها
ماجده / ابقي اجبلك مخصوص يلا يا سماح
سماح / اودى الشاى لامى الفرنده الاول
بنت ١ / هديه انا و اهو اخلع حبه
ست ١ / خمس دقايق الساته هقوم اجيبك من شعرك
بنت ١ / فوريره البنت تاخد الصينيه و سماح و ماجده يطلعوا الاوضه
…………………..
فى اوضه كوثر
كوثر حاطه رجليها فى طبق فيه ميه و ام داوود بتعملها بديكير
كوثر / انتى مين يا بت اللى قالك الكلام السخيف ده
ام داوود / كل البلد ما لهاش سيره غير الارض اللى جابها سى مغاورى لست سماح و السرايا اللى هتتبنى عليها
كوثر / كلام مفيش حاجه من دى حصلت تلاقيهم بيقولوا كدا عشان يغطوا على اللى حصل
ام داوود / و هو كان ايه اللى حصل يا ست ام عباس
كوثر / زى اللى بيحصل فى اى بيت بت عديمه الربايه و جوزها بيادبها
ام داوود / الكلام ده على الست سماح يا ست ام عباس ؟
كوثر / بت لسانها فالت و لا تعرف كبير من صغير دا لولا موت ابوها و انها لسه عروسه كانت رجعت لامها تكمل ربايتها
ام داوود / لا يا ست ام عباس دا سماح انا اشهدلها برقبتى البت نسمه ما بيطلعش منها العيبه
كوثر / ضحكت عليكي زى ما ضحكوا علينا و احنا لو عارفين انها كدا كنا خدناها بيتنا
ام داوود / و الست فاطمه عارفه الكلام ده
كوثر / الا عارفين دول جم هنا كلهم تانى يوم من اول فاطمه دى للكبير اللى اسمه ناصر و اتكلموا كتير اوى
ام داوود / لا اله الا الله
كوثر / كنتى تعالى يوميها و انتى تشوفى صوابع مغاورى و هى معلمه فى خدها صباع صباع بس تصدقي و تؤمنى بايه
ام داوود / لا اله الا الله طبعا
كوثر / البت من يوم ما خدت القلم و هى ماشيه على السيراط اصلها عرفت ان اهلها مش هيقفولها و هى غلطانه هترجع على بيت امها مع اول تكه فعدلت نفسها و قصرت الشر
ام داوود / انا الصراحه مش مصدقه خالص اللى بسمعه دا اللى بيدور فى البلد غير كدا خالص
كوثر / امال عوزاهم يقولوا بنت شاكر الزيني ساقت العوج فى بيت الجوارحه و جوزها ضربها و امها جت تستسمحنا نديها فرصه اخيره
ام داوود / دا اللى يشوف البت يقول غلبانه خالص
كوثر/ والله ما غلبان غيرك الله يرحمه ابوها احنا خدناها بس من وشه السمح بس تقولى ايه يخلق من ضهر العالم فاسد
ام داوود / لا اله الا الله لا اله الا الله
كوثر / يلا ربنا يهديها لسه صغيره برده و ما تفهمش حاجه
ام داوود / ربنا يهدى
ام داوود تبص لكوثر باصه الناحيه التانيه و ساكته ام داوود تكمل شغل فى رجليها
…………………….
فى شقه يوسف
اسراء بتحط الاكل و يوسف قاعد يتكلم مع محمود
يوسف / ما عمى و جوز اختى شغالين على عربياتهم دا مش بس كدا دا عمى كمان جايب اتنين سواقين و عاملين ورديات على نفس العربيه عشان يشغلها طول اليوم
محمود / مهو كدا هيهلك العربية بسرعه
يوسف / مهو هيبقي جاب تمنها و زياده المهم انا بقي فكرت لو عندى عربيتين تلاته و مشغلهم ورديات مش يكسبونى اكتر من الكافتريا
محمود / و ماله ربنا يفتح عليك
يوسف / المهم انا كنت كلمت شركه عربيات و قالوا هيدونى العربيات بخصم جامد بما انى هشترى اكتر من عربيه
محمود / و انت هتشترى اكتر من عربيه مره واحده كدا مش الاول تجيب واحده و تشتغل عليها و تتودك و تفهم الشغلانه و فى نفس الوقت تجيب كذا سواق يكون امين و تشوف هتعرف تسيطر عليهم و لا لا بدل ما تلبخ روحك فى كذا عربيه و السواقين يسرقوك
يوسف / يسرقونى ازاى ما كلو محسوب بالكومبيوتر
اسراء تقعد و يبداو اكل
محمود / بسم الله الرحمن الرحيم تسلم ايدك الاكل حلو اوى النهرده
اسراء / الف هنا
يوسف / قولت ايه يا بابا
محمود / فى ايه
يوسف/الله امال انا بقول ايه من الصبح
محمود / والله سالتنى رايى فى مشروعك و قولتلك رايى سبنى اكل بقي
يوسف / يعني هتديني تمن العربيات و لا ايه
محمود / تمن العربيات!!! طب على الاقل قول مقدم اول عربيه و انت هتكمل باقي الاقساط من شغلك
يوسف / يعني تشترى من جوز اختى عربيته التعبانه و تستخسر فيا تمن عربيتين تلاته امال لو ما كنتش ابنك الوحيد
محمود / هو كان عارف هو عاوز ايه انما انت هوائي كل يوم بدماغ امبارح كافتريا و النهرده عربيات
يوسف / ما انت ما وافقتش تساعدنى اعمل الكافتريا فدورت على مشروع تانى و لا انت مش ناوى تساعدنى خالص
محمود / انا لقيتلك شقه لقطه هدفع مقدمها و مقدم العربيه و انت تشتغل و تسد باقى الاقساط ايه رايك
اسراء / مش هيقدر يا محمود دا لو اشتغل الاربعه و عشرين ساعه مش هيجيب
محمود / و انتى مش عارفه ابنك لو اشتريتله العربيه على الجاهز مش هيحس بقيمتها و هياخدها و يقضل يتسرمح بيها هو و صحابه الصيع اياهم
يوسف / ما انا قطعت علاقتى بيهم كلهم من زمان
محمود / هدفعلك مقدم العربيه و مقدم الشقه و انت تكمل اقساط العربيه و انا هكمل اقساط الشقه و كدا تبقي اخدت منى حقك و زياده
يوسف / بس انا
محمود / و ليك عليا لو كملت اقساط العربيه هدفعلك مقدم العربيه التانيه و انت تكمل اقساطها و تكبر مشروعك اللى انت كنت عاوزه
اسراء / والله فكره مش بطاله و اهو يكون اتودك فى الشغلانه و حفظ حركات السواقين
يوسف / و عجزت و شعرى ابيض و انا لسه لا اتجوزت و لا خلفت
محمود / ليه بس ما انت على ما تكمل اقساط العربيه هكون كملت اقساط الشقه توضبها و تفرشها و نفرح بيك
يوسف / و كمان انا اللى هوضبها و افرشها
محمود / لو لقيتك عامل اللى عليك هبقي اساعدك
يوسف / انا لو كنت واحد من اجواز اخواتى كنت ساعدتنى عن كدا
محمود / ياريتك كنت زى اجواز اخواتك على الاقل كل واحد فيهم فاتح بيت و شايل مسؤليه مش عايشين فى وهم الغنا السريع
يوسف / يا سلام ما انا
اسراء / بقولك ايه يا يوسف ما تسمع كلام ابوك و تريحه ابوك عاوز مصلحتك
يوسف / ابويا عاوز يفضل معجزنى عاوز يفضل محسسنى انى فاشل بينتقم منى عشان حوار هند
محمود / و كل ما قول كبر و عقل
يوسف / اخدت منى شقتى و عربيتي و جاى تتكرم عليا بمقدم عربيه عمال توزع فلوسك يمين و شمال و جاى عليا انا و بتحاسبنى على القرش و السحتوت
محمود / انا حر فى فلوسي الشقه و العربيه دول انا اللى جبتهملك و كنت هجبلك غيرهم اهو بس انت اللى بايظ و اتعودت تاخد كل حاجه على الجاهز
يوسف / فين ده دا اللقمه بتحاسبني عليها
محمود / ما انت مش مهنينا عليها اهو
يوسف / سايبهالك و ماشي
يوسف يسيب المكان ويمشي
محمود / سكه السلامه
اسراء / ليه كدا يا محمود
محمود / يعني هتسبيني اكل و لا اسيبهالك و امشي انا كمان
اسراء / اتكتمت
محمود يكمل اكل و هو مضايق
………………
فى فيلا فيرا
رشيد قاعد على كرسي فيرا تدخل
فيرا / سورى اتاخرت عليك
رشيد / كنت مستنى ليفل اتنين بس شكلك نستيني
فيرا / رشيد رشيد رشيد انت ليه مصمم العلاقه بينا تبقي بالشكل ده
رشيد / انتى اللى اخترتى مش انا اديني الواد و انهى الموضوع بالحسنى
فيرا / انهو واد انت عارف شكله يعني لو جبته هتعرفه
رشيد / هعرفه لاند يا اذكى اخواتك ناسيه ان امه ليها صفحه على السوشيال ميديا و يا كبدى عليها نزلت صوره فى كل حته لما اتخطف منها
فيرا / و انت بتصدق كل اللى بيتنشر على السوشيال ميديا
رشيد / العيال الصغيره مش شاطره فى الكدب و سهل تجرجريها فى الكلام هاتيلى الواد وانا اقررهولك
فيرا / ماشي يا رشيد هديك الولد عشان بحبك
رشيد / و العبه بتاعتك
فيرا / شغاله
رشيد يرفع حاجبه
فيرا / انت الوحيد اللى هتقدر تجبلى اللى انا عوزاه هاتلى حاجه و هديك الولد
رشيد / و تطلع ايه الحاجه دى
فيرا / هند الجمل
رشيد / الاسم مش غريب .. مرات مختار نهارك اسود و انتى قد حاجه زى دى … دا انتى لو حافره قبرك بايدك مش هتطلبى حاجه زى دى انا مش قدهم و لا انتى
فيرا / انا كدا كدا هجيبها هنا سواء ساعدتنى او ما ساعدتنيش انا شوفتك و انت بتتحرك انا ما كنتش عاوزه اللعب معاك انا كنت بختبرك
رشيد / اللى انتى عملتيه كان ترتيب خايب من واحده خايبه انى ادخل وسط الزنايته و اخد واحده من حريمهم دا مش ليفل عادى فى لعبه دا ليفل الوحش … دا ليفل الوحش جنبه و لا حاجه دا البلد كلها تهيج علينا و ياكلوا لحمنا نى
فيرا / سلمهانى و انا ههربك
رشيد / انا مش هعرف اطلع بيها بره البلد من اصله انتى بتتكلمى فى ايه
فيرا / و ان طلعتهالك بره البلد هتعرف
رشيد / و دى هتعمليها ازاى دى بقي ان شاء الله
فيرا / فى حاجات كتير فى دماغى لسه مقررتش بالظبط بس نتفق الاول لو طلعتهالك من البلد هتعرف تجيبهالى .. فى اللحظه اللى هتسلمنى فيها البنت هديك الولد و فوقيها كمان
رشيد / و لا فوقيها و لا تحتيها الموضوع ده خطر و انا مش قده على راى سمر نستعوض ربنا فى الواد و نهرب اسهل
فيرا / براحتك زى ما قولتلك بيك او من غيرك هند هتيجي هنا … انا مش هقتلها … انا عاوزه الزنايته يتحركوا سكوتهم مش مريحني
رشيد / عوزاهم يقتلوكى عوزاهم يجروكى قدامهم انتى و رجالتك زى الفراخ زى المره اللى فاتت
فيرا / المرادى غير المره اللى فاتت انا جاهزالهم
رشيد / لما تبقى تطلعيها بره البلد يبقي يحلها حلال
فيرا / اتفقنا يعني
رشيد / اتفقنا
فيرا تبتسم رشيد يقوم
فيرا / على فين
رشيد / عاوزه حاجه تانى
فيرا / هتفضل واخد الطريق من هنا لاسكندريه رايح جاى كدا
رشيد / لا بس انا ليا بيت هنا و لا نسيتي
فيرا / لا هتفضل هنا تحت عيني لحد ما تخلص الشغلانه
رشيد / ههههههههههههههه خليني حتى تبقي انتى كمان تحت عيني
فيرا / و ماله
رشيد يمشي و فيرا متابعاه و مبتسمه
…………………..
فى اوضه سماح
سماح خارجه من الحمام لابسه البرنص و لفه شعرها و بتغنى و مغاورى ممدد على السرير
سماح / يا خارجه من باب الحمام و كل خد عليه خوخه مشيتي حافيه و خدتى زكام و رابطه راسك من الدوخه
مغاورى/ هههههههههههههه هو لسه فى حد بيغنى الكلام ده
سماح / طب قولى تحب اغنيلك ايه و انا اغنى تحب اغنيلك ياواد يا تقيل للست سعاد حسنى
مغاورى / و دا يطلع مين بسلامته الواد التقيل داهوه
سماح تغنى ومغاورى يقوم يقعد على ركبه و يقلدوا الاغنيه و الحركات
سماح / اكلمه بحراره يرد بالقطاره الرجل الغامض بسلامته متخفي بنضاره ويحي ازاى كده كده هو وينادى ازاى كده كده هو ويعادى ازاى كدهو ويقف ويقول انا اهو انا اهو اطول واحد فى الحاره
مغاورى / هههههههههههههههههههه بحب جنانك يا قمر انت يا طعم
سماح / و هو ده جنان طب دا انت لسه ما شوفتش حاجه
مغاورى / لا ابوس ايدك لحد كدا و كفايا مش همشي اكلم نفسي فى الشارع و يقولوا الراجل هبت منه
سماح تلف ايديها حوالين رقبه مغاورى و الفوطه تقع من على شعرها
سماح / ما عاش و لا كان اللى يقول نص كلمه على حبيبي سيد الرجاله الا صحيح ما قولتليش ايه رايك فى التاتو بتاعى
مغاورى / الشهاده لله ما ركزتش فيه اوى بيتهيالي محتاج ابص عليه مره تانيه عشان احكم بضمير
سماح / ههههههههههههههههه يا لهوى عليك … انت عارف مين اللى رسمتهولى
مغاورى / ام داوود مش محتاجه فكاكه يعني مش انتى قولتلي اتاخر عشان ان داوود جيالى
سماح / تؤ مش ام داوود دى ماجده ام داوود ما عتبتش اوضتي
مغاورى / ازاى دا انا شايفها و انا داخل السرايا
سماح / مهى جت فعلا بس عمتك حبت تكيدنى و شبطت فيها سبتهالها قوم ربنا يعوضنى و ماجده تعملى احلى مما كنت اتمنى
مغاورى/ تسلم ايديها ماجده … راضيتها يعني
سماح / دا انا اعتزرتلها قدام الكل ما صدقت عمتك طلعت فوق مع ام داوود و شميت نفسي فى السرايا دا انا كنت فى سجن والله يا مغاورى اهلك دول ما يتشبع منهم و لا قعده الشاى مع امى فى الفرانده دى قعدت تحكيلى انا و ماجده على حاجات و تفكرنا بحاجات كنت هموت من الضحك
مغاورى / طبعا فضحتنى
سماح / ما تخافش سرك فى بير و هو انا ما كنتش انا ابقي ستر وغطا عليك مين هتبقي
مغاورى يبوس ايدها
مغاورى / يخليكي ليا
سماح / طب اعمل ايه اجيب ام داوود لعمتك كل يوم اقولك حاجه
مغاورى/ قولى
سماح / على قد فرحتى انك هتبنيلى سرايا لوحدى على قد ما انا زعلانه انى هسيب السرايا هنا و امشي مش عوزاهم يحسوا انى فرقتك عنهم دى امك اللى مربيانى و ربنا يعلم غلاوتها عندى و لا ماجده لما عرفت زعلت يا حبه عيني و قعدت تسترضانى و كانى انا اللى عاوزه امشي
مغاورى / اعمل ايه يا سماح
سماح / والله ما اعرف ان كان عليا و على اهلك احنا سمنه على عسل هو احنا عشره يوم و لا اتنين دا انا متربيه فى السرايا هنا بس اعمل ايه فى عمتك اللى حطانى فى دماغها دى بس
مغاورى / مهى عمتى مش هتمشي
سماح / يا لهوى و انا اقدر اقولك حاجه زى دى و لا حتى تخطى على دماغى بقي الست بعد العمر دا كله تسيب بيتها طب دا ان ما شالتهاش الارض اشيلها فوق راسي
مغاورى / بنت اصول من يومك
سماح / انا بس نفسي فى طريقه تانيه انا مش عارفه هى كرهانى و قارشه ملحتى كدا ليه انا ما عملتلهاش حاجه انا والله ممكن انسي اللى حصل كله و افتح صفحه جديده بس هى مش هتديني فرصه
مغاورى / والله كل الكلام ده فكرت فيه يا سماح و من هنا لحد ما ربنا يفرجها من عنده هكمل فى بنا السرايا
سماح / انت عارف انا هقولك حاجه بس بالله عليك ما تزعل منى
مغاورى/ قولى يا سماح
سماح / عمتك مش مجنونه هى بس الفراغ قاتلها ماجده بتعملها كل حاجه و اكمنها كبيره حبتين فى السن ما حدش بيتعبها فى حاجه انما دى لو لقت حاجه تشغلها مش هتبقي فاضيه للحركات الخايبه دى دا غير انها هتنسي فيها وجعها و تقضي وقتها فيها
مغاورى/ هو كلام كويس و كل حاجه بس ايه الحاجه دى اللى هتشغل وقتها فيها
سماح / انا عارفه بقي انا اش عرفنى انا بفكر معاك بصوت عالى
مغاورى / على العموم هى فكره حلوه و عجبتنى انا هدورها فى دماغى و اكلم ابويا فيها و ان شاء الله ربنا يقدم اللى فيه الخير
سماح تبتسم و تقوم تقعد على التسريحه
مغاورى / طب و ليه قله المزاج دى طيب
سماح / هسرح شعرى قبل ما ينشف
مغاورى / ما ينشف و نبله تانى احنا ورانا ايه
سماح تقوم تروحله و هى بترقص و تغنى
سماح / ادينا بندردش ورانا ايه ورانا ايه بنحكى و نفرفش ورانا ايه ورانا ايه نحب نتعرف ورانا ايه
مغاورى / يخرب عقلك جننتيني
سماح / ههههههههههههههه
……………………
فى شقه ام داوود
ام داوود قاعده مع جوزها و ابنها و بنتها
الراجل / دى وليه كياده و عاوزه الدنيا تولع نار
ام داوود / انا برده قولت نداها ليا ما كانش طبيعي الا عمرها ما عملتها انا اللى حارقني انها ما لقتش غيرى دا انا لحم كتافى من خير الست ام عباده دا انا شغاله على حسها و حس حريم الزنايته من بعدها عاوزه تخسرنى لقمه عيشي دا انا ما بطلعش منها لا هى و لا من الجوارحه بجنيه الا كل فين و فين
البنت / انا بقول تقولى للست ام عباده و تكسبى عندها بونط
الراجل / اخرسي يا بت انا مش عاوز حد فيكوا يتكلم تانى فى السيره دى و لا كانكوا سمعتوا حاجه احنا لا قد الزنايته و لا الجوارحه و الوليه دى اخت سى شاهين الجرحى يعني ما حدش هيقولها تلت التلاته كام انما هيقدروا علينا احنا و يخلونا عبره للى يتكلم عليهم ان كانت عاوزه تنقل كلام بره السرايه تشوفلها واحده غيرك انتى فاهمه و لا لا
ام داوود / فاهمه يا خويا فاهمه امال ايه فاهمه
الكل يكمل اكل
…………………….
فى اوضه فاطمه
فاطمه قاعده بتقرا قران الباب يخبط تصدق
فاطمه / صدق الله العظيم … مين
مختار / انا مختار
فاطمه / مختار !! خير
فاطمه تقوم تلبس الطرحه و تفتح الباب
فاطمه / خير يا ابنى هند فيها حاجه
مختار / هند بخير الحمد لله نايمه انا اللى كنت قاصدك فى خدمه ما حدش يقدر يساعدنى فيها غيرك
فاطمه / قول يا ضنايا لو اقدر ما اتاخرش
مختار/ الاول لازم توعديني ان اللى هقوله هيفضل سر بينا احنا الاتنين و بس
فاطمه / على رقبتى قول قلقتنى
مختار / هند هتتخطف
فاطمه / يا لاااااهوى
مختار / شششششش مش بجد مش بجد
فاطمه / هو ايه اللى مش بجد انا مش فاهمه حاجه
مختار/ اسمعيني بس و انا هشرحلك كل حاجه و هقولك هتساعديني ازاى
فاطمه/ انت اتجننت يا مختار عاوزنى اساعدك ان البت اليتيمه دى تتخطف ليه دا انا لو بيني و بينها ايه مش هعمل فيها كدا
مختار يبتسم
مختار / يا عمتى اسمعيني بس هو انا برده هسيب مراتى تتخطف
فاطمه / انت اللى بتقول
مختار / مش بجد كدا وكدا اسمعيني بس و انا هفهمك كل حاجه
فاطمه ترفع حاجبها
فاطمه/ لا الحكايه شكلها كبيره و مش هينفع الكلام فيها على الواقف كدا اسبقي على تحت هنزل اعمل كبايتين قهوه عشان افوقلك و اعرف انت ناوى علي ايه و اساعدك ازاى بس من اولها اى حاجه من غير اذن الكبير
مختار / لما تسمعيني هتفهمى و هتقدرى انتى بس اسمعيني الاول
فاطمه / اسمعك بس لو كلامك ماعجبنيش هقول للكبير و لا كانى وعدتك بحاجه انا بقولك اهو
مختار / ماشي بس اسمعيني الاول
فاطمه / قدامى على المطبخ
مختار يهز راسه و يمشي فاطمه تقفل الباب وراها و تمشي وراه
……………………
فى السوق
الدنيا زحمه و الستات و الرجاله رايحين جايين بنت ام داوود قاعده بتقور بتنجان جنب الست بتاعه الخضار و فى اتنين ستات كمان قاعدين
ست ١ / دا بيقولوا جابلها طقم جديد فوق شبكتها و كل يوم والتانى يجيب اكل جاهز و يروح شايل و محمل
ست ٢ / عشنا و شوفنا الاكل الجاهز بيدخل بيت الجوارحه
ست ١ / دا انا سمعت ان اليوم اللى الزنايته راحوا يطمنوا فيه على بنتهم طلبلهم اكله سمك و جمبرى بالرز و السلطات ما خلاش حد من اهله يدخلوا المطبخ
ست ٣ / تلاقى سماح هى اللى شارت عليه بكده عشان ما تدبسش فى عزومه اهلها
ست ١ / ياختى طب دى و عزومه كبيره انما دا كل شويه ورقه لحمه فراخ مشويه سمك
ست ٣ / لا والله كذا مره يجي يشترى منى حاجات و شكلها على القد
ست ٢ / ههههههههههه عشنا و شوفنا مغاورى الجارحى بينقى الخضار من السوق
ست ٣ / دا مين ده اللى ينقى دا بيقف على اول السوق و يبعت اى حد انا انقى و اوزن و ابعتله الحاجه يحطها فى العربيه و يمشي
ست ١ / من يومها مرزقه
ست ٢ / و هى لو مش بنت شاكر الزيني اللى يتعملها كل ده و تتشال على الراس مين اللى هتتشال اسماء
البنت / و مالها اسماء ان شاء الله طب لعلمك بقي انا سيباكوا تتكلموا و كاتمه الضحك من بدرى
ست ٢ / لا يا شيخه
اسماء / امى كانت لسه امبارح فى سرايا الجوارحه و الست ام عباس قالتلها ان مغاورى كتب الارض باسم سماح عشان يراضي الزنايته بعد ما ضرب سماح لحد ما بقت تشلب دم ما رضيوش يخربوا على البت و هى لسه عروسه قالوا يلموا الليله
ست ٣ / طب وطى صوتك بدل ما حد يسمعك و تتعلقى على الكدب ده انتى و امك
اسماء / والله لو مش مصدقيني تقدروا تروحوا سرايا الجوارحه و تسالوا اى حد دا ضربها قدام الكل و اهلها راحوا كلهم بربطه المعلم يوم السمك اللى بتقولوا عليه الجوارحه ما رضيوش يضايفوهم عشان بيقولوا سماح قلت ادبها عليهم و بيقولوا بسبب قله ادبها دى ما بياكلوهاش عشان كدا بيجيبلها اكل جاهز
ست ١ / يا لاهوى امال الكلام اللى داير فى البلد دا ايه
اسماء / عاوزينهم يقولوا ايه سي مغاورى الجارحى ضرب مراته علقه موت و لا الجوارحه مش طايقين بنت شاكر الزيني و لا عاوزين الدنيا تولع بين الزنايته و الجوارحه
ست ٢ / حقه لو الكلام ده اتعرف دى هتطير فيها رقاب
ست ١ / ياختى و احنا مالنا احنا لا عرفنا حاجه و لا سمعنا حاجه و اديني اهو خلصت و مروحه يلا سلام
اسماء / و انا كمان خلصت يلا سلام
الستات يقوموا و تفضل الست ٣ قاعده تيجي ست بسرعه تقعد معاها
ست ٤ / ايه الكلام اللى سمعته ده صحيح سى مغاورى ضرب ست سماح علقه موت
ست ٣ / انتى هتفضلي طول عمرك كدا تلمعى اكر بقولك ايه انا ما ليش دعوه بحاجه و ما اعرفش حاجه و يلا قومى على فرشتك يلا دا مكان اكل عيش يلا هوينا
ست ٤ تقوم و تمشي و ست ٣ عماله تبص يمين و شمال
………………….
فى سرايا الزنايته
ام داوود تدخل و هى باصه فى الارض و متوتره
انتصار / صباح الخير يا ام داوود
ام داوود / صباح النور يا ست الستات ست فاطمه كلمتنى و قالتلى عوزانى سبت اللى ورايا و جيت جرى ما تعرفيش هى عوزانى ليه
انتصار / والله ما اعرف
فاطمه تنزل
فاطمه / ما بدرى يا ست ام داوود ده اللى مسافه السكه
ام داوود / طب والله جيت جرى
فاطمه / بقولك ايه بطلى رغى انا مش جيباكى عشانى انا جيباكى لستك هند
انتصار / الله الله دا انتى ما عملتيهاش عشانى
فاطمه / يا اختى احنا فيها تعالوا على اوضتى ندلع شويه
انتصار / يا اختى انتى رايقه انا ورايا هم ما يتلم
فاطمه/ عرفتى بقي انا ليه عمرى ما عملتها عشانك عشان انتى وش فقر يلا يا وليه على فوق عاوزين نلحق نخلص قبل ما جوزها يجى اتحركى
ام داوود تبتسم و تطلع فوق وفاطمه وراها فاتن تطلع من المطبخ
فاتن/ هى مش دى ام داوود
انتصار / تخيلى
فاتن / دا ما طلعتش بتتزوق عشان عمى شاكر بقي طلع زى ما كانت بتقول غيه
انتصار / لا دا تلاقيها جيباها لهند عشان حوار الكشف و التحليل بتوع امبارح
فاتن / مهى صبغتلها بايدها المره اللى فاتت
انتصار / و انتى مالك يا حشريه اللى غيران منهم ياختى يعمل زيهم
فاتن / انا ياما اخص عليكي طب دا هند عندى فى غلاوه مريم بالظبط
انتصار تبتسم
انتصار / يابت بهزر معاكى مالك كدا خدتى الكلام على صدرك يلا انجرى قدامى على المطبخ خلينا نشوف اللى ورانا يلا اتحركى
فاتن تبتسم و تمشي و انتصار وراها
………………..
فى المضيفه
عبد الله قاعد بيزاكر الباب يخبط يقوم يفتح يلاقى مريم واقفه بعيد يقفل الباب و يروحلها
عبد الله/ وحشتيني
مريم / باماره انك انت اللى جيتلى مش انا اللى جيتلك
عبد الله / و انا ايه اللى حايشنى عنك غير انى بسد فى مهرك دا انا فاحت نفسي مزاكره ليل نهار و كل ما اجى اريح اقول لا ما تقصرش دى مريم يا عبد الله الحب يا عبد الله
مريم تبتسم
مريم / و انا كمان
عبد الله / و انتى كمان ايه
مريم / و انا كمان بزاكر
عبد الله / هانت كلها حاجه بسيطه و نمتحن و ناخد اجازه نص السنه و افضالك تعرفى هاخدك انتى و مختار و هند و البت ياسمينا و نروح الملاهى فاكره لما روحنا الملاهى فى مصر و نطلع من هناك على السينما نشوفلنا فيلم رومانسي و افسحك فسحه تحلفى بيها
مريم / انت بس خد الاجازه ان شالله تفسحنى فى الجنينه الورانيه انا راضيه
عبد الله / احنا فيها تعالى نروح شويه
مريم / لا اخاف اعطلك انا والله بحاول على قد ما اقدر بس غصب عنى وحشتني
عبد الله يبتسم و مريم تقف مكسوفه
……………..
فى اوضه هند
هند بتكوى جلاليب مختار باب الاوضه يخبط تحط الطرحه و تروح تفتح تلاقى فاطمه و ام داوود
فاطمه / الحريم كلهم تحت مشغولين قولت اجى اتسلي معاكى وجبت معايا أم داوود لزوم القاعده ندخل و لا تكسرى خاطرى
هند/ ما عاش ولا كان اللى يكسر خاطرك اتفضلى
ام داوود وفاطمه يدخلوا هند تقلع الطرحه
ام داوود / دى عمايل ست ام عباده انا اعرفها و هى طايره
فاطمه / تعليم ايدك يا اختى بصي بقي يا ست الكل انا عوزانا نطلع من تحت ايدك عرايس سيبك بقي من المكياج و الكلام ده انا عاوزه كعوب رجلينا تبقي و لا العيل اللى لسه ما داسش الارض
ام داوود / عنيا
فاطمه / و ايدينا مش هوصيكي الايدين دى طول النهار منقوعه فى المواعين عاوزين سى مختار يدعيلك
هند تضحك و تكتمها
فاطمه / الشعر انا ظبطته بس انتى عارفه الصبغه و عمايلها عاوزه بقي جلسه من اياهم و جبتلك الفيتامينات و كل حاجه من المستورده انتى عرفانى
ام داوود / الغالى للغالى يا ست الكل
فاطمه / جهزيلنا بقي يا دودو كرسيين و طبقين بلاستيك لو عندك
هند / عندى بس هستاذنك هلم بس هدوم مختار انتى جيتي فجاه و كنت بكوى المهم ظبطوا الدنيا الاوضه اوضتكوا لحد ما اللم الحاجه
فاطمه / يا ختى جيتي فى جمل
هند / الاطباق جوه بعض فى الحمام جنب الحوض
ام داوود تحط الكرسين و فاطمه تدخل الحمام و هند تحط الهدوم فى الدولاب و تطبق ترابيزه المكوه
…………………….
فى ارض
مختار ساند على عربيه و جنبه عباده و مغاورى
مغاورى / بص انا مقدر والله بس هى يعني حبكت
مختار / هو بمزاجى دا كلام الكبير
عباده / و ماله و دى بقي هتامنها ازاى ان شاء الله
مغاورى / انت تطلع بالعربيه المصفحه بتاعتى فاميه و ما حدش هيشوف اللى جواها
مختار / حلوه
عباده / انت ما تطلعش بالعربيه بتاعته انت تطلع فى عربيه عاديه خالص اقولك انت مش هتطلع خالص
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
