رواية البر التاني الفصل الثالث والخمسون 53 بقلم لولو محمد
رواية البر التاني الجزء الثالث والخمسون
رواية البر التاني البارت الثالث والخمسون
رواية البر التاني الحلقة الثالثة والخمسون
فى المضيفه
الرجاله كلها قاعده و عباده مش موجود
الفخرانى / والله ما حصل و لا طلعت من بقي
عرابى / انا اساسا مشيت قبل الخناقه اللى بنقولوا عليها دى و ما قولتلوش يتخانق سى عباس هو اللى جه و احنا بنتكلم
عبد الله / لا والله !!!
الكل يبص لعبد الله عبد الله يبص الناحيه التانيه
ناصر / على العموم انا مش جامعكوا عشان انصبلكوا المشانق انا جامعكوا عشان ابلغكوا بحاجه و الحاضر يعلم الغايب ان كان عباده اتجوز فاللى بعده عبد الله
مختار يبص لعبد الله و عبد الله يبص لناصر و امين يبص فى الارض
ناصر / و مش عشان عبد الله خاطب بنتى و لا اخو مراه مختار زى ما اتقال لا دا عشان هو ابني و زيه زي مختار بالظبط و اللى يكسر كلامه كانه بيكسر كلامى و اللى يجى عليه كانه جه عليا شخصيا
صمت تام
ناصر / و اى حد اى حد هيجيب سيره عبد الله او اهل بيته بكلمه كانه غلط فيا و فى اهل بيتي بالظبط
شاهين / حقك عليا يا عبد الله عباس اخوك برده و ان كانلك حق عنده امسحها فيا انا
ناصر يطبطب على كتف شاهين
عبد الله / استغفر الله حضرتك على راسي
شاهين/ عشت و ان كان على الخناقه اللى حصلت
مختار / لا لو على الخناقه المفروض عبد الله اللى يراضي عباس على اللى سمعناه يعني
الكل يضحك و عبد الله يبص فى الارض و امين يبص لعبد الله
ناصر / احنا فى وقت صعب يا رجاله و اديكوا شايفين الحتت اللى حوالينا و اللى بيحصل فيها
شاهين / اللى هيقع يا رجاله مش هتقومله قومه
ناصر / يا نوقع بعض يا نتسند على بعض لحد الازمه دى ما تعدى
الرجاله تبص لبعض و يهزوا راسهم بالموافقه ناصر يقوم يقف
ناصر / الفتره الجايه مش عاوز اى مشاكل بينا من النوع ده او من اى نوع الفتره الجايه عاوز الكل يبقي ايد واحده
الرجاله تقوم تقف ناصر يحط ايده على ضهر شاهين
ناصر / و احنا قرايب و اهل فى الاول و الاخر و مصارين البطن بتتعارك بس فى الاول و الاخر احنا اهل
راجل / الله يفتح عليك يا كبير
شاهين / و الحاضر يعلم الغايب عشان ما حدش بعد كدا يقول ما كنتش اعرف
الرجاله تهز راسها و تقوم تسلم و تمشي
ناصر / امين
امين يبص لناصر
ناصر / عاوزك فى المكتب
امين يهز راسه و يروح مع ناصر و الرجاله تطلع بره المضيفه يفضل عبد الله و مختار عبد الله يقوم بحماس ناحيه مختار
عبد الله / انت سمعت اللى اتقال
مختار / و انت ما كنتش واخد بالك من غلاوتك و لا ايه
عبد الله / بس مش للدرجادى
مختار / مرضي يعني ؟
عبد الله / بتهزر صح ؟ طبعا يا ابنى .. بس اللى اسمه عباس ده
مختار / عباس الله يعينه على اللى هو فيه بيته اتخرب و كل حاجه فى حياته باظت بيدور على حد يفضي فيه همه اللتمس لاخيك سبعين عذرا يعني
عبد الله يهز راسه موافق مختار يطبطب على ضهره و يطلع الجنينه و يقفل الباب على عبد الله جوه يلاقي حريم الجوارحه واقفين بيضحكوا و يسلموا على بعض و عباده واقف وسطيهم هند تبصله يبتسم تروح تقف جنبه
هند / كان فى حاجه و لا ايه
مختار / مشاكل الفلاحين انتى عارفه
هند تبتسم و يبصوا على الجوارحه بيركبوا العربيات و يمشوا
هند / كنا فاكرينهم هيتغدوا معانا
مختار / عشان عباده يولع فيهم و فينا
هند / هههههههههههههههه
هند و مختار يبصوا الزنايته بيدخلوا السرايا عيد عباده تيجي فى عين مختار مختار يبتسم و يهز راسه اه عباده يبتسم و ياخد خديجه و يدخلوا
هند / انا هروح اشوفهم هيعملوا ايه و اساعدهم
مختار / ست البنات كلها
هند تبتسم و تمشي مختار يتابعها لحد ما تدخل السرايا مختار يدخل المضيفه
مختار / الناس مشيت حاول تدارى هنا على قد ما تقدر
عبد الله / اسبوع و لا اتنين مثلا ما اكيد هيعرفوا
مختار / يا عم فى عريس فى البيت مش ناقصين نواح و عياط انت يعني مش عارف الحريم
عبد الله / لا فى دى معاك حق طبعا … طب و مريم ايه وضعها
مختار يشوحله و يطلع بره و يقفل الباب و هو بيضرب كف على كف و عبد الله بيضحك
…………………..
فى المكتب
ناصر يدخل و امين وراه
ناصر / اقفل الباب و تعال اقعد يا امين
امين يقفل الباب و يروح يقعد قدام ناصر
ناصر / تتكلم انت و لا اتكلم انا
امين / اتكلم عن ايه يا عمى
ناصر يبتسم و يبص لامين بحب
ناصر / انت فاكر انى ما بحسش بيكوا و لا بفهمكوا يا امين دا انا اللى مربيكوا يا ولاد
امين / صح مربينا احنا و دى عارفينها
ناصر / امال ايه اللى مش عارفينه
امين / عبد الله
ناصر يبتسم
امين / عبد الله جدع و كلنا بنحبه بس مش لدرجه انه ياخد مكانى يا كبير و ياريته تعب قد ما تعبت انا فيه
ناصر / و انت شايف انك تقدر تشيل شيله عباده يا امين ؟
امين / و هو عبد الله يقدر يشيلها يا كبير ؟ ان كان عبد الله يقدر طاق فانا اقدر طاقين و ان كانت الشيله تقيله عليا طاق فهى تقيله علي عبد الله طاقين
ناصر / لا تقدر لوحدك و لا عبد الله يقدر لوحده بس انتوا الاتنين مع بعض تقدروا
امين يبص لناصر
ناصر / عبد الله ما يقدرش يسد فى شغلنا فى السلاح و الرجاله لكن يقدر يسد مع الفلاحين و الارض و المواشي قسموا الشيله بينكوا عشان تقدروا تشيلوها و افتكروا انكوا كتف واحد لو فارقت كتفك عن كتف اخوك الشيله هتقع
امين / صح
ناصر / عبد الله مننا و كرامته من كرامتنا و اهله هم اهلنا يرضيك حد يجى على حد من اهلك يا امين
امين / لا ما يرضينيش
ناصر / انت عارف غلاوتك عندى و مش محتاج اقولها قدام الناس بس هو كان محتاج
امين يهز راسه موافق
ناصر / انتوا اخوات يا امين
امين يهز راسه موافق ناصر يبتسم و يقوم
ناصر / شوفلنا الحريم حضروا الغدى و لا اطلع اريح شويه
امين يهز راسه و يطلع بره و ناصر متابعه
…………………
فى اوضه عباده
خديجه / ما روحتش وقفت وسط الرجاله لما راحوا المضيفه ليه
عباده / انا مش طرف فى اللى حصل و كلامى لا هيقدم و لا هياخر و هم كدا كدا هيحلوها مع بعض انا قعدت معاهم فى المكتب بس عشان اعرف الحوار بس الحمد لله حلوها
خديجه / الحمد لله بس شكله كان حوار كبير أبويا كان باين عليه هتقولى اللى حصل ؟
عباده / يعني اتنين عرسان يوم صباحيتهم يتكلموا فى مشاكل و لا يشوفوا حاجه حلوه يعملوها
خديجه / طمن قلبي يا عباده و لو كنت خايف انقل الكلام
عباده / كلام ايه اللى تنقليه يا ست العرايس دا انتى بقيتي تعرفى عنى اكتر من اللى امى نفسها تعرفه
خديجه تبتسم
عباده/ انا بس مش عاوز اضيع وقتنا فى كلام ما لوش لزمه
خديجه / طب ريحنى و قولى بجد شكل ابويا كان يقلق
عباده / عباس اتخانق مع عبد الله و ضربوا بعض و عباس قال كلام ما يصحش يتقال
خديجه تتنهد و تروح تقعد على السرير
عباده / و لما بعتوله يقعد فى القاعده ما رضيش يجي و قال اللى عاوزنى يجيلى
خديجه تبص بصدمه
خديجه / دا اتجنن و لا ايه
عباده / ما اعرفش بس هم الرجاله حلوها خلاص
خديجه / حلوها عندكوا بس اكيد الليله مش هتعدى عندنا فى السرايا عباس ده اتجنن خلاص الفتره اللى فاتت كل حاجه بيعملها نيله و احنا اللى بنتعك فيها
عباده / خلاص اتجوزنا و ما حدش له عندنا حاجه يعكوها بقي بعيد عننا
خديجه / و انت فاكر ان رجلك مش هتيجي فى الموضوع دى اختى برده يا عباده
عباده / طلقها خلاص
خديجه تبصله بطرف عينها و تعوج راسها
عباده / بعد كل اللى عمله
خديجه / ابو عيالها برضه و اللى أعرفه انه بينحت بايديه عشان يراضيها
عباده / و كان لزمته ايه من الاول
خديجه/ قولتلك اتجنن اتجنن
عباده / على روحه مش علينا
خديجه / شوفت بقي لما قولتلك هنتعك فيها كلنا
عباده / بقولك ايه كبايه قهوه من ايديكى الحلوه مش وقت نكد و هم ابوس ايدك
خديجه تمدله ايدها و هى مبتسمه يبصلها باستغراب يلاقيها مبتسمه اوى يبوس ايدها و يشدها عليه و يشيلها
عباده / تستنى القهوه
خديجه / هههههههههههههههههههههه
……………………….
فى السرايا
الكل قاعد بياكل
شيري / بكلم عبد الله ما بيردش
مختار / تلاقي فى زحمه شغل و لا حاجه امبارح كان اجازه و اول كان نص يوم و انتى عارفه
شيري / طب يرد و يطمنى
ناصر / ما تقلقيش يا ست الكل … بعتى اكل للغفر يا ام فاتن
انتصار / امال .. طبعا و بزياده كمان
ناصر / يدوم العز
فاطمه / بس هو ايه اللى حصل يا جماعه شكل الموضوع كان كبير
شاكر / ما تشغليش بالك الحوارات دى ما بتخلصش من البلد و بعدين اتحلت خلاص الحمد لله
انتصار / الحمد لله
فاطمه / ام مغاورى اتكلمت فى موضوع سماح عاوزين يحددوا معاد نقرا الفاتحه و نلبس الشبكه
ناصر / هو انتوا وافقتوا
شاكر / والله انا قولت هنشور البنت يمكن هم شاروها
سماح تبص للكل بارتباك
فاطمه / الست فتحت الموضوع فى وجود سماح و البت اتكسفت و سكتت الله خلونا نفرح
ناصر / ربنا يكتر افراحنا يا ام عباده بس الكلام عن اننا نبقي فى الصوره مش اكتر
انتصار / يا خويا انتوا الصوره و الاصل و بعدين كلنا موافقين نماطل عليه دا خير البر عاجله و لا ايه يا عمى
شاكر / انا عن نفسي مستعجل اكتر منكوا اجوز البت و ابقي عملت اللى عليا فى الدنيا و اعيش اليومين اللى فاضلينلى من غير هم
فاطمه / يديك طوله العمر يا خويا يومين ايه بس طوله العمر ليك
شاكر يطبطب على ايدها و يبتسم
سماح / و انا هم يابا
شاكر / احلى هم … هم انى اموت قبل ما اشوفك بالفستان و الطرحه و ازفك لعريسك بايدى و اطمن عليكي
انتصار / يديك طوله العمر و تفرح بيها و بعيالها
مختار / فى ايه يا جماعه مال القاعده قلبت على فيلم عربى قديم كدا ليه ما تصلوا على النبي كدا و تفكوها دا ناقص تخرطوا على قلبي بصل
شاكر / اه والله تصدق معاك حق هو فى ايه
ناصر / هههههههههههههههه شعب لو ضحك شويه يقول اللهم اجعله خير
ناصر يبص لامين امين يبص فى طبقه و ياكل فى هدوء
…………………….
على قهوه
عرابى / وقف و قال بعلو صوته الكلمه من بعدى لعبد الله و اللى يمسه كانه مسنى
عرابى يبص لعباس يلاقيه سرحان
عرابى / ايه يا عم بكلم مين انا من الصبح
عباس / عاوز ايه يا عرابى
عرابى / هعوز ايه يعنى عاوزك تساعدنى فى وقف الحال اللى احنا فيه
عباس / روح الشونه عندنا و خد اللى انت عاوزه
عرابى / و خالك هيدينا
عباس / قولهم عباس الجارحى باعتنى
عرابى / و انت ناوى تعمل ايه
عباس / مش ناوى هعمل ايه يعنى
عربيه مغاورى تركن الكل يقوم يقف مغاورى ينزل
مغاورى / عباس .. ابويا عاوزك
عباس يبصله و يبص للرجاله و يروح يركب العربيه مغاورى يسوق
مغاورى / انت بتعمل كدا ليه يا عباس كل ما نقول ربنا هداه ترجع تطينها ليه
عباس / انا و اخويا على ابن عمى و انا و ابن عمى على الغريب
مغاورى / و احنا معاك على الكل بس اللى انت بتعمله ده بيقلب الكل علينا
عباس / طظ فيهم كلهم
مغاورى / ما كبرتش كبيرك و جيت القاعده ليه كنا هنقف معاك
عباس / كنت فى البيت بعالج وشى انت مش شايف انا عامل ازاى
مغاورى / انت اللى بدات بالضرب و بعدين انت مالك بقيت خرع كدا ليه عيل زى ده يشلفطك كدا ادى اخره الجرى ورا الكاس و الكبايه حتى العافيه راحت منك
عباس / انت عاوز ايه يا مغاورى انا مش ناقصك
مغاورى / فوق لروحك مش عاوز غير مصلحتك لو مش عشان انك ابن عمتى يبقى عشان عيالك عيال اختى يا عباس هنعمل ايه اكتر من كدا عشان تفهم اننا عاوزين مصلحتك انت و باقين على خاطرك
عباس / سوق سوق خلينا نشوف اخرتها
مغاورى يبصله و يسوق
……………………………..
فى اوضه هند
هند بتكوى جلاليب و مختار قاعد على اللاب و ماسك الكتاب فى ايده
هند / هى اللعبه دى مش هتخلص بقى و لا هو الفراغ عامل ايه معاك
مختار / هههههههههههههههههههه مش احسن ما اقعد على القهوه ادينى بسلى روحى
هند / طب و الارض مش هتنزل تبص عليها يعنى
مختار / نازل بكره ما تقلقيش لما بيبقى فى حاجه بيكلمونى اروح ابص
هند / براحتك
تليفون هند يرن جنب مختار يبص
مختار / ماما
هند تحط الماكوه و تروح ترد
هند / السلام عليكم ايوه يا ماما
شيرى / هاتى مختار و تعالوا المضيفه
هند / فى حاجه و لا ايه
شيرى / ايه هو مختار ما قالكيش انتى كمان
هند تبص لمختار تلاقيه باصصلها
هند / قالى عن ايه ؟
مختار يبص الناحيه التانيه
هند / احنا نازلين حاضر
هند تقفل
هند / ماما عوزانا فى المضيفه
مختار يتنهد و يقوم يلبس العبايه
هند / انت عارف هى عوزانا ليه صح
مختار / عبد الله اتخانق مع عباس و ضربوا بعض هديتي كدا
هند / القاعده اللى حصلت كانت عشان اخويا يا مختار و انت كدبت عليا يا مختار
مختار / ما يعتبرش كدب حوار و خلص و مشاكل فى الشغل و الفلاحين ما بتخلصش و الموقف ده مش اول مره اخوكى يتحط فيه
هند / هو عبد الله انضرب قبل كدا كمان
مختار / لا لا انا ما قولتش كدا
هند / انت لسه قايل مش اول مره
مختار / الموقف مش اول مره بس المرادى اطور شويه و ضربوا بعض و لعلمك اخوكى مظبطه جامد يعنى ما تقلقيش
هند / ما اقلقش !!! و هو عباس هيسكت على كدا
مختار / الرجاله قعدت و اتكلموا و الموضوع خلص
هند / بس سمعه عباس ما تقولش انه هيلتزم بالكلام ده
مختار / مغاورى و الحج شاهين هما كباراته و ما دام قالوا الموضوع خلص هم بقى يتحكموا فيه براحتهم
هند / عباس ده طليق ماجده صح ؟
مختار / اه هو و ممكن يلا بقى عشان مامتك
هند تهز راسه و تلم شعرها و تلبس الطرحه و مختار يتنهد
………………………….
فى سرايا الجوارحه
شاهين / ازاى تصغرنا بالشكل ده قدام الناس ازاى اشيعلك و ما تجيش
عباس / اجيلك ازاى بمنظرى ده
شاهين / يبقى تعتزر بالادب تقول مش قادر اجى هروح المستشفى هروح لحكيم يبص على وشى كنا لمينا بعضينا و جينا مش تقول اللى عاوزنى يجيلى ايه يا عباس ايه اللى جرا فيك ايه ؟
عباس / بقى هم يكبروا العيل ده و يعملوا منه راجل و يكبروه على اهل البلد كلها و انت ابن اختك تجلده قدام الغفر و تقل منه و تخلى سيرته على لسان اللى يسوى و اللى ميسواش و تقولى جرا فيا ايه ؟
شاهين / عملت كدا من نفسى يعنى ؟ صحيت الصبح لقيت نفسى زهقان قولتلهم اصلبولى الواد عباس اما اتسلى عليه شويه ؟ العيل اللى انت مستشويه ده لحد النهرده ما طلعتش منه العيبه و ما حدش عارف يمسك عليه غلطه و الكل بيحبه ان كان هو و لا اهله امه و اخواته حتى المصراويه اللى كنا بنتمالس عليها وقت الجد وقف للرجاله و دافعت عن روحها و عن الحريم فى الدار و بيقولوا لولاها الله اعلم كان هيجرالهم ايه لحد ما غاورى و الرجاله يكونوا وصلوا
عباس / انفخوا فيهم كمان انفخوا فيهم و خلوهم يحسوا بروحهم علينا لحد ما نصحى فى يوم نلاقى نفسنا مش عارفين نكلمهم
شاهين / كلمه الحق بتضايقك صح
عباس / بقولك ايه يا خال انا مفيش فيا رجا مش فالح فى حاجه و اعر و جايبلكوا الهم و الندامه اتبروا منى اقولك اقتلنى و ريح نفسك و ريح العيله كلها من همى و روح شوف لبنتك واد مصراوى كدا من نوعيه عبد الله و هند ما دام النوعيه دى بتعجبكوا اوى كدا روح جوز بنتك لواد مصرواى يجيبلها فى ورد و دباديب بنتك هتحب الحاجات دى
شاهين يبص لعباس عباس يبص الناحيه التانيه
شاهين / كان جايلها
عباس يبص لشاهين
شاهين / كان جيلها المصراوى و الاسكندرانى و كان جايلها اللى هيعيشها فى الخليج الظابط و الدكتور و المهندس كان كلو على يدك عرسانها كانوا طوابير و اللى بيترفض منهم كان بيجي يتقدم تانى مره و اتنين و تلاته بس انت شكلك نسيت يا عباس نسيت لما رفضت كل دول و فضلتك على الكل نسيت لما كانت بترفض العرسان و الكل يلومها و انا اقولها معاكى حق ابن عمتك اولى بيكي ما حدش هيصونك قده ما حدش هيحبك قده انت بتنسى يا عباس
عباس يبص الناحيه التانيه
شاهين / افتح مكتبك و اتلهى فى شغلك يمكن لما تشوفلك حل فى الفراغ اللى انت فيه ده تفوق لروحك يمكن ساعتها تقدر تراضى مراتك دا ان كنت فعلا عاوز تردها
عباس يبص لشاهين
شاهين / الموضوع اللى بينك و بين عبد الله انتهى و ما يتفتحش تانى و يوم و لا اتنين هنروحلهم نطلب ايد سماح لمغاورى و نطلع على الصاغه نشترى الشبكه انا لو منك اللحق اللملى قرشين اجيب بيهم حته تقيله تملا العين تراضى بيها مراتك … معاك فلوس يا وله
عباس / معايا
شاهين / امال مالك بخلان كدا ليه انت مش لسه قايل بنتى بتحب الورد و الدباديب الا عمرك يا موكوس ما دخلت عليها بورده و لا حتى كيس قطن حتى مش دبدوب
عباس يبتسم و يبص الناحيه التانيه
عباس / بجمله قله القيمه
شاهين / و نومتك فى الطل قدام الغفر ما كانتش قله قيمه يا عباس و عمايلك اللى كل يوم و التانى تبهرنا بيها ما فيهاش قله قيمه انما انك تراضى مراتك بورده دى اللى هتقل منك ربنا يهديك يا ابنى والله انا تعبتلك سلف
عباس / تصبح على خير يا خال
شاهين / و انت من اهله يا عباس
عباس يسيب المكان و يمشى شاهين يمشى وراه لحد بره السرايا يلاقى عباس ركب عربيه و طلع بره السرايا خالص يتنهد و يضرب كف على كف و يدخل تانى
………………………..
تانى يوم فى مضيفه الزنايته
شيرى / لو سمحت يا عبد الله ما تروحش
عبد الله / يا ماما فى ايه يعنى لكل ده انتى مش اتكلمتى مع مختار امبارح و قالك ان الموضوع خلص فى ايه بقى
شيرى / يا ابنى انا خايفه عليك
عبد الله / ما تخافيش يا ست الكل و لو سمحتى بقى سبيني امشى عشان ما اتاخرش
شيرى / طب استنى مختار ماشى ياخدك فى طريقه
باب المضيفه يخبط و الباب يتفتح مختار يدخل
مختار / انا ماشى اخدك فى طريقى
شيري / ابن حلال مصفى لسه كنت بقوله يستناك
عبد الله / يالا يا ابنى يالا
عبد الله يمشى و مختار يبتسم لشيرى و يمشى وراه يركبوا العربيه و يمشوا و شيرى متبعاهم
…………………………..
فى المكتب
رجاله بتفرش المكتب و راجل بينضف و يكنس الارض و عباس بيشرف على الكل
عباس / الله ينور يا رجاله
اتنين رجاله يدخلوا
راجل 1/ اليافطه ركبت يا سى عباس
عباس / و النور
راجل 1/ ضهر
عباس يطلع فلوس و يحاسبهم
عباس / تشكروا
راجل 1/ انت بس تؤمر يا سيد الناس
عباس يبتسم الرجاله تمشى شاب يدخل شايل صندوق كبير
الشاب /ورق القواضى يا سى عباس
عباس / خش شوف شغلك و خلى بالك على المكتب لحد ما ارجع
الشاب / على فين ان شاء الله
عباس / هشوف بتوع الفراشه وصلوا لحد فين عاوزين البلد كلها تعرف ان المكتب فتح من تانى
الشاب / تمام يا رياسه
عباس ينزل و يطلع من العماره يشوف رجاله بتركب فراشه فى الشارع راجل يسلم عليه
الراجل / الف مبروك يا سى عباس
عباس/ الله يبارك فيك يا ابو عموا ابقى تعال اشرب شاى
الراجل / عشت يا سيد الناس
عباس يبص للراجل بتاع الفراشه
عباس / ايه الاخبار يا رجاله
بتاع الفراشه / ساعه زمن و كلو يبقى تمام
عباس / مصلحه على ما اغير و اتشطف و ارجع يلا بالاذن
بتاع الفراشه / اذنك معاك يا سيد الناس
عباس يروح ناحيه عربيته عربيه جيب تعدى بسرعه يطلع منها راجل ملثم يضرب عباس بالنار عباس يقع فى الارض سايح فى دمه و الناس تجرى عليه
………………………..
فى الشونه
مختار يركن العربيه
عبد الله / تشكر يا ابو نسب
مختار / لو اى حد حاول يستفزك كلمنى انا فى الارض جنبك هنا مش بعيد
عبد الله / و انا مش قدها و لا ايه ؟ يلا اشوفك على الغدى سلام
مختار / سلام
عبد الله ينزل و يروح يسلم على جابر
عبد الله / صباح الخير يا رجاله
الرجاله / صباح النور
جابر / اجبلك تفطر يا سي عبد الله
عبد الله / لو شاى يبقي كتر خيرك
جابر / عيني
جابر يروح يصب كبايه شاى و يرجع لعبد الله يكون عبد الله فتح الدرج و طلع الدفتر و بدا يسجل بيانات اول واحد و يعد الفلوس
عبد الله / تمام مظبوطين … هاتله الحاجات دى بسرعه يا جابر
جابر ياخد ورقه من عبد الله و يدخل الشونه
عبد الله / اتفضل يا حج على ما الحاجه تجهز .. اللى بعده
الراجل يروح يقعد و فجاه عربيه تعدى تضرب نار الرجاله تجرى و عبد الله يقلب الترابيزه و يتحامى فيها و الغفر يعدلوا السلاح و يجروا يضربوا نار ورا العربيه عبد الله يقوم و يروح على الطريق يبص ميكروباص يعدى و تفرمل جنب عبد الله و يتفتح الباب عبد الله يبص راجل يجرى من الناحيه التانيه يزق عبد الله جواها و الميكروباص يطير و يخبط واحد من الغفر و هم بيحاولوا يوقفوا الميكروباص جابر يتصل بحد بالتليفون بسرعه
جابر / اللحقنا يا سى مختار سى عبد الله اتخطف
……………………
فى المستشفى
ماجده داخله تجرى و شاهين وراها مش لاحق يحصلها ماجده تفتح باب اوضه تلاقي عباس نايم على سرير متركبله محاليل و متوصل باجهزه و فى دكتور و ممرضه جنبه
الدكتور / لو سمحتى بره ممنوع الزياره
ماجده / انا مراته
شاهين يدخل
الدكتور / لو سمحتى الحاله خطر و مش حمل هزار لو سمحتى اطلعى بره
ماجده تعيط
ماجده / والله ما هعمل حاجه و لا هلمس الاجهزه خلونى بس فى جنب هنهه بالله عليك يا دكتور ابوس ايدك
الدكتور يبص لشاهين
الدكتور / احنا كدا كدا عملنا اللى علينا هنا و الباقي على ربنا خليكي جنبه .. بس على مسؤليتك
ماجده تهز راسها و تروح تقعد فى جنب و تبص عليهم الدكتور و الممرضه يطلعوا بره الممرضه تقفل الباب
شاهين / طمنى يا دكتور
الدكتور / والله الحاله ما تطمنش ابدا يا حج شاهين فى طلقه منهم كانت على بعد نص سنتيمتر من القلب دا غير انه خسر دم كتير جدا على ما نقلوه هنا
شاهين / لو المستشفي ناقصها اى حاجه قول يا دكتور و نجيب و لو لازم يبقي ننقله مستشفى فى اى حته احنا ممكن حتى نسفره بره
الدكتور / صدقني يا حج مش هيعملوا اكتر من اللى عملناه و بعدين الحمد لله المستشفي هنا مجهزه باحسن الاجهزه و الكوادر الطبيه يعني مش عاوز حضرتك تقلق من النحيادى
شاهين / طب قولى اقدر اعمل ايه و انا اعمله
الدكتور / كل اللى نقدر نعمله اننا ندعيله اليومين دول يعدوا على خير
شاهين / ان شاء الله يقوم و يبقي زى الفل
الدكتور / ان شاء الله … عن اذنك امر على باقي الحالات
شاهين / اذنك معاك يا دكتور اتفضل
الدكتور يمشي و ناصر و شاكر و امين يدخلوا بيجروا
ناصر / ماله عباس ايه اللى جرا
شاهين / ضربوا عليه نار ولاد الكلب
ناصر / مين مسكتوهم مين اللى علها
شاهين / لا ما لحقوهمش اتلخموا فى عباس بس لقطوا نمره العربيه و مغاوري بيستعلم عنها فى المديريه
ناصر / اه يا ولاد الكلب
شاهين / انت قافل البلد كويس يا ناصر مش كدا
ناصر / دا انا قافلها بالضبه و المفتاح و كلو على يدك اكتر من كدا ايه
شاهين يبص فى الارض تليفون امين يرن يروح فى جنب يرد و يرجع يجرى
امين / اللحق يا كبير عربيه خطفت عبد الله و خبطت الغفير سويلم موتته
الرجاله يبصوا لبعض و ناصر يطلع يجرى و امين وراه
شاهين / هو ايه اللى بيحصل يا شاكر
شاكر / جيب العواقب سليمة يارب
شاهين يفتح الباب و يبص على ماجده قربت بالكرسي من عباس و ماسكه فى ايده و عماله تعيط جنبه
………………….
فى اداره حكوميه
مختار يدخل يلاقي مغاورى
مغاورى / عرفت باللى حصل
مختار / عرفت … عاوز اعرف بيانات العربيه دى لو سمحت
الراجل / ثوانى يا سى مختار عيني حاضر
مغاورى / عربيه ايه دى؟
مختار / العربيه اللى خطفت عبد الله
مغاورى / هى الحكايه كدا بقي … بس اللى عمل كدا غبى كان خلف الوقت انما كدا مفقوسه اوى يعني
الراجل يكتب حاجه فى ورقه و يديها لمختار مختار يبص فيها و يوريها لعبد الله
مختار / لا يا شيخ
مختار يسيب المكان و يمشى مغاورى يجرى وراه يوقفه
مغاورى / مسروقه قسما بالله مسروقه من الفجر و عملين محضر
مختار / ما تدافعش عنه
مغاورى / ابوه حلفلى راح يعمل المحضر ما رجعش و تليفونه مقفول و مش لاقينه هو راخر
مختار / عبد الله ان مابتش فى حضن امه و اخواته النهرده قسما بالله شوف قسما بالله
مغاورى / يبقي تدور عليه فى المكان الصح يا مختار
مختار يبصله مغاورى يوريله الورقه اللى معاه
مختار يبص فى الورقه و يبص لمغاورى
مغاورى / مش هو بس هجيبهولك برده هدور عليه و هجيبه بس صدقنى مش هو و لا يجرؤ يعملها اصلا
مختار يهز راسه و هو كاتم جواه
…………………..
فى المستشفي
الممرضه تدخل تغير المحلول لعباس ماجده تبصلها
ماجده / هو عامل ايه يا اختى احسن مش كدا
الممرضه / ان شاء الله يخف و يبقي زى الفل
ماجده تروح تفتح شنطتها و تديها فلوس
الممرضه / خيرك سابق يا ست الكل
ماجده / خديهم
الممرضه تاخدهم و تبتسم و تطلع بره و كوثر تدخل تبص عليه و تبص لماجده
ماجده / قالولى هيبقي كويس ان شاء الله
كوثر / كنتوا هتخبوا عليا لحد امتى
ماجده / ان شاء الله يقوم بالسلامه و يروح بيته
كوثر تروح تسند على السرير و تبص على ابنها و تبص على ماجده بتمسح دموعها
كوثر / عرفتى قيمته دلوقت قاعده تعيطي جنبه ما كان جنبك و طردتيه ادى اخره البتران
ماجده / ابوس ايدك يا عمتى انا ربنا وحده اللى عالم باللى بيا
كوثر / روحى لعيالك انا هخليني جنبه انتى حتى ما عودتيش مراته عشان تقعدى جنبه
ماجده / انا لسه فى عدته
كوثر / روحى يا ماجده روحى
ماجده تعيط
ماجده / حرام عليكي يا عمتى
كوثر / الدكتور قال واحد بس اللى هيفضل و انا اولى بابنى منك لو كنتى حافظتى عليه
شاهين يدخل يخبط بعصايته فى الارض
شاهين / كفايا … دى مستشفي … ماجده
ماجده تبص لابوها باستعطاف
شاهين / سيبي عمتك شويه و تعالى اقعدى معايا
ماجده تبص لابوها و تبص لعمتها كوثر تبص الناحيه التانيه ماجده تبص فى الارض و تطلع ورا باباها شاهين يقفل الباب
……………………….
فى اوضه رشيد
سمر نايمه فى السرير و مستغطيه رشيد يقوم يقعد جنبها على السرير و يبعد شعرها عن وشها بالراحه و يعدى بايده على شعرها تتفزع
سمر / انت عاوز ايه عاوز ايه
رشيد / اهدى عاوز اتكلم معاكي
سمر / تتكلم معايا فى ايه انت عاوز ايه
رشيد / يا بت عاوز اتكلم معاكى اهدى عاوزك فى حوار مهم
سمر / و اللى يعوز يتكلم مع حد يصحيه كدا
رشيد / امال يصحيه ازاى يصرخ فى ودنه يخرعه و لا يشوطه يقلبه من على السرير بتصحوا النايمين عندكوا ازاى
سمر / هو يا كدا يا كدا يعني ناديني قولى سمر خبط على كتفى اى حاجه
رشيد / المهم فوقي كدا عاوز اتكلم معاكى و اعدلى شعرك اللى واقف ده
سمر تعدى ايديها على شعرها تعدله
سمر / مفيش حاجه واقفه اصلا
رشيد / انتى مبسوطه بالوضع اللى انتى فيه ده
سمر / وضع ايه
رشيد / استغفر الله العظيم بت فوقيلى كدا قومى اغسلى وشك و فوقى عاوز اتكلم معاكى فى كلام مهم مش وقت سطلان يلا قومى
سمر تبصله و تقوم تروح الحمام
رشيد / طول عمرى ما بحبش اتعامل مع الحريم ينقطوا
رشيد يعوج راسه ناحيه الحمام
رشيد / مش ما بحبهمش اوى يعني نص نص كدا
سمر تبص و هى بتنشف وشها بالفوطه
سمر / بتقول حاجه
سمر تعلق الفوطه على اوكره الحمام
رشيد / تعالى يا قمر هنا اقعدى
سمر تروح تقعد قدامه
رشيد / انتى مبسوطه بقعادك هنا معايا بالوضع ده
سمر / ما اقدرش انكر ارحم بكتير من كل الاحتمالات التانيه
رشيد / يعني ده اللى انتى عوزاه مش عاوزه ترجعى بيتك
سمر تبص فى الارض
سمر / ما عدليش بيت … اصلا ازاى طول ما انا محوجه للزفت ده
رشيد / طب انا عندى فكره تبطلى بيها البتاع ده
سمر / ما فيش تبطيل يا رشيد مفيش كل محاولات اخويا فشلت مش هقدر استحمل ربع اللى استحمله انا اضعف منه بكتير
رشيد / احنا مش هنعمل زيه هنجرب حاجات اقل و لو ما استحملتيش الحبوب موجوده بس انتى لو عاوزه هتحاولى هتستحملى
سمر / مش هقدر
سمر تعيط رشيد يحط وشها بين ايديه و يخليها تبصله
رشيد / انا مش هعيشلك العمر كله ممكن تصحى الصبح ما تلاقينيش و تقعى تحت رحمتها
سمر / انت ليه بتقول كدا
رشيد / عشان فى شغلانتنا دى العمر مش مضمون انا سالت عن اخوكى كان راجل محترم الله يرحمه الكل كان بيشكر فيه و زعلوا عليه جامد
سمر تمسح دموعها
رشيد / و انتى كمان قالوا انك كنتى بنت زى الورد انا مش عاوزك تتوسخى هنا
سمر / اتاخرت اوى يا رشيد اتاخرت اوى
رشيد / لسه فى امل حاولى و انا معاكى بس استحملى و حاولى
سمر / فيرا لو عرفت
رشيد / حاولى يا سمر و سيبي فيرا عليا حاولى عشان خاطرى
سمر تهز راسها اه رشيد يبتسم
رشيد / اوعديني انك مش هتاخدى الحبوب دى الا منى و باذنى و بالكميه اللى هديهالك اوعديني انك هتستحملى و هتحاولى اوعديني انك مش هتتخلى عنى فى نص السكه
سمر / انت بتطلب منى … انت
رشيد / انتى قدها لو خرجتى من هنا هديكي فلوس تبني حياتك من اول و جديد كملى دراستك و افتحى مشروع و عيشي منه انسي اللى حصل و كملى حياتك عيشي لنفسك على الاقل
سمر / انت بتعمل معايا كدا ليه انت ليه بتحاول تساعدنى انت دفعت الفلوس دى كلها و لسه مستعد تدفع .. ليه ؟.. انت اصلا مجرم و بتتعامل مع مجرمين .. انت مش كويس
رشيد / خطيبك الظابط اترقي فى شغله
سمر تبص فى الارض
رشيد / لو حبيتي تتكلمى عنه هسمعلك
سمر تقوم و تدخل الحمام و تقفل الباب رشيد يتنهد
رشيد / حساس اوى ما شاء الله عليك يا رشيد .. ملك الاحساس
……………………..
فى اوضه عباده
عباده فى الحمام الباب يخبط خديجه تحط طرحه على راسها و تروح تفتح تلاقي هند
هند / انا اسفه على الازعاج بس انا مش عارفه اوصل لحد خالص من الرجاله قولت يمكن عباده يعرف يوصلهم
خديجه / فى ايه خير
هند / ما اعرفش ما حدش منهم رجع لحد دلوقت و لا بيردوا على التليفونات
عباده يفتح باب الحمام و يروح ناحيه هند
عباده / فى ايه يا هند تعالى ادخلى
هند / انا مش عارفه اوصل لحد لا مختار و لا عبد الله و لا الكبير و لا اى حد و جربت من تليفونات البيت كله
عباده / ثوانى
عباده يدخل يجيب التليفون و يتصل بحد
خديجه / خشي ارتاحى بدل ما انتى واقفه كدا
هند / يردوا بس و يقولوا انهم كويسين يردوا يقولوا اى حاجه
هند تبص لعباده
عباده / تمام تمام … ماشي
عباده يبص لهند
عباده / هكلمك بعدين … سلام
هند / رد عليك ؟
عباده / فى حوار كدا حصل فى البلد و غفير مات و عباس فى المستشفي
هند / و مختار و عبد الله و الباقين ؟
عباده / بخير الدنيا بس مدربكه مش عارفين يردوا على حد
هند / انت بتكدب عليا انا مش مصدقاك
خديجه / و هو هيكدب عليكي ليه يا هند بس
هند / عشان مش مرتاحه عشان حاسه ان فى حاجه … انا اسفه انا بجد اسفه … عن اذنكوا
هند تمشي
عباده / على فين يا هند … هند
عباده يدخل يلبس
خديجه / انا كمان مش مرتاحه
عباده / عشان انا فعلا بكدب
خديجه / يا لاهوى
عباده / خليكي هنا و ما تنزليش تحت و ان نزلتى انتى ما تعرفيش حاجه
خديجه / ما انا فعلا ما اعرفش حاجه
عباده يفتح الدرج و يطلع مسدس و يتاكد ان الخزنه مليانه و يجي يمشي خديجه تمسكه يبصلها تسيبه
خديجه / ربنا معاك
عباده يبتسم و ينزل يجرى
…………………..
فى بلد ابو فارس
عربيات كتير تدخل و ينزل رجاله بالسلاح الغفر يرفعوا سلاحهم ابو فارس يطلع من السرايا
ابو فارس / ما حدش يضرب ما حدش يضرب
ناصر / انا صبرت عليك كتير بس اللى يهاجم الحريم مش هيخطف العيال
ابو فارس / مش احنا والله ما لينا دخل باللى حصل و انا كنت جايلكوا المرادى قسما بالله ما لينا دخل باللى حصل
مغاورى / رقم العربيه اللى ضربت عباس من عندكم
ابو فارس / و العربيه اللى خطفت عبد الله من عندكم بس لا انتوا اللى خطفتوا عبد الله و لا احنا اللى ضربنا النار على عباس اقسم بالله ما احنا و لا لينا يد فى اللى حصل
ناصر / الواد ده لو ما ظهرش هجيب عليها واطيها
مختار / مش هم يا كبير
ناصر يبص لمختار
مختار / مش هم او على الاقل ان كان منهم ما قالوش لكبيرهم
مغاورى يبص لمختار مختار يروح يركب العربيه و يمشي مغاورى يشاور للرجاله يركبوا عربيات و يمشوا وراه ناصر يجي يمشي ابو فارس يمسكه
ابو فارس / مين باقي فى البلد يا ابو فاتن
ناصر يبصله و عنيه توسع و يشاور للرجاله و يركب العربيه و الكل يتحرك وراه
……………………
فى اوضه فى البدروم
عبد الله مربوط فى كرسي و حد نازل فيه ضرب لحد ما الكرسي يتقلب عبد الله يتف دم
الراجل / مين سيدك يا ابن الكلب
عبد الله / فكنى و انا اوريك مين فينا اللى ابن كلب يا جبان
الراجل يعدل عبد الله و ينزل فيه ضرب راجل تانى يدخل
راجل ٢ / كفايا هيموت فى ايدك
الرجاله تبص لبعض راجل ١ يروح يجيب جردل مايه و يرشه على عبد الله عبد الله يفوق راجل ١ يرمى الجردل فى الارض و يطلع بره هو و التانى و عبد الله عمال يبص يمين و شمال و هو بيحاول يفك ايديه
راجل ٢ / شكله مش هينخ بالساهل
راجل ١ / قولتلها نديله حبايه هينخ زى الجزمه ما رضيتش قالت لا عاوزه تكسره بس
راجل ٢ / لو الزنايته عرفوا يوصلولنا
راجل ١ / مش هيعرفوا هيفضلوا يلفوا حوالين ديولهم و مش هيعرفوا يوصلوا لنا
راجل ٢ / على العموم الجدع التانى نخ ارميه و لا استنى شويه
راجل ١ / كلم الست و اسالها
راجل ٢ يهز راسه و يمشي و راجل واحد يرجع لعبد الله
راجل ١ / خدت نفسك و فكرت و عرفت مين سيدك و لا لا ؟
عبد الله / خدت انت نفسك؟
راجل ١ يروح يجيب بطاريه و سلكين بيوصلهم بالبطاريه
راجل ١ / لا ما تشغلش بالك بيا انا كدا كدا مش همد ايدي عليك تانى
الراجل يوصل السلكين بمفكين
عبد الله/ انت فاكر انهم هيسيبونى انت فاكر انك هتعدى منها انا لو روحت هقولهم شكلك و هيجيبوك من تحت طقاطيق الارض
راجل ١ / لو روحت بقي
الراجل يلمس المفكات لعبد الله عبد الله يتكهرب
راجل ١ / مين سيدك ياله
عبد الله ما بيردش الراجل يحط المفكات على ترابيزه خشب و يروح يحاول يفوق عبد الله ما بيفوقش يحاول يفوقه ما بيفوقش يتخض و يطلع يجرى و ثوانى و يرجع مع الراجل التانى الراجل ٢ يحط صابعه على رقبه عبد الله
راجل ٢ / نهارك مش فايت دا قطع النفس
الرجاله تبص لبعض راجل ٢ يطلع الموبايل و يتصل بحد
…………………….
فى فيلا فيرا
العربيات تحاوط الفيلا و الرجاله ينزلوا يسحبوا الاجزاء البوابه تتفتح و تطلع منها فيرا
فيرا / طب كنتوا قولتوا انكوا جايين كنت فرشت الارض ورد
مختار يحط المسدس على دماغها الرجاله كلها تنشن على مختار رجاله مختار تنشن على كل اللى شايلين السلاح
مختار / فين عبد الله فين الواد
فيرا / مش هنا و لو تحب تفتش فتش
مختار / الواد لو ما باتش فى حضن امه الليله
فيرا / لو كنت عوزاه ميت كان مات من زمان زيك بالظبط … دونت شوت بوت يور جانز داون
رجاله فيرا تنزل سلاحها فيرا تقرب من مختار و السلاح بينهم و فيرا بتبص فى عين مختار
فيرا / هتقدر تضرب نار على ست
مختار بيبصلها بغل فيرا تبتسم مغاورى يحط مسدسه على دماغها
مغاورى / انا اقدر تحبى تشوفى
فيرا / الفيلا قدامكوا فتشوفها زى ما انتوا عاوزين عبد الله مش هنا
فيرا توسعلهم السكه و تشاور لرجالتها يوسعوا مختار يبص لمغاورى و يشاور للرجاله يدخلوا يفتشوا
فيرا / بتضيع وقتك يا مختار
تليفون مختار يرن فى جيبه و هو بيبص لفيرا
فيرا / رد
مختار يرد
ناصر / عبد الله و عرابى فى المستشفي اللى على الطريق السريع احنا رايحينلهم
مختار / احنا فى الطريق احنا كمان … لقوهم
مغاورى يصفر صفاره مقطعه
فيرا / نورت يا مختار
مختار / هرجعلك مسيرى في يوم هرجعلك
فيرا / هستناك اوعى تتاخر
الرجاله يطلعوا من جوه يركبوا العربيات و مختار واقف يبص لفيرا بغل مغاورى يشده يركبوا العربيات و يمشوا و فيرا بتابعهم بابتسامه ادواردوا يطلع من جوه
فيرا / دونت ساى اورد .. جست ليت مى انجوى ذا مومنت ( ما تنطقش بكلمه … سبني استمتع باللحظه )
ادواردو / زى ويل كوم باك ( هيرجعوا )
فيرا / دونت ذات ويل ماك يور داى ( و هو ده مش هيسعدك )
ادواردو / يو ار بلاينج ويز فاير ( انتى بتلعبى بالنار )
فيرا / نو ايام بلاينج ويز اهول تاون ( لا انا بلعب ببلد بحالها )
فيرا تشاورلهم يقفلوا البوابه
…………………..
فى سرايا الزنايته
هند بتتخانق مع الغفير
هند / قسما بالله ان ما فتحت
عباده / هند .. خشي جوه
هند / مش داخله و قوله يفتح البوابه بدل قسما بالله
عباده / خشي جوه قولت
هند / اخويا و جوزى فين يا عباده لما كلمتهم فى التليفون قالولك ايه مين اللى رد عليك
انتصار تطلع و الحريم وراها
انتصار / خشي جوه يا هند
هند / الكبير فين يا ام فاتن
انتصار / فى المستشفي مع الجوارحه عباس انضرب بالنار
هند / ما بيردوش على الموبايلات ليه
انتصار / صامت مش عاوزين ازعاج الراجل بيموت
هند / بتكدبى
انتصار ترفع ايدها و تيجي تضربها بالقلم فاطمه تمسك ايدها
فاطمه / انتى بتعملى ايه
انتصار / احنا اللى فينا مكفينا … عاوزه تمشي امشي افتح البوابه يا خليفه … امشي يا هند امشي … البلد كلها فى المستشفي و ما حدش عارف مين مستنيكي بره يلا خليهم يخطفوكى يمكن ترتاحى
فاطمه / اهدى يا انتصار مالك فيكي ايه البت قلقانه على جوزها و اخوها برده
انتصار/ و انا مش قلقانه ؟ ما كلنا قلقانين … و الهانم عاوزه تخرج بطولها الرجاله كلهم فى المستشفي و دى عاوزه تخرج بطولها فوقي يا هند فوقى الفرق بينا و بين الموت البوابه دى
عباده / اهدى يا ام فاتن مش كدا
انتصار / انا تعبت انتوا ايه ما بتحسوش
مريم تطلع من السرايا بتجرى و فى ايدها موبايل
مريم / عمى يا هند … عمى بيتصل يا هند
هند تجرى تاخد منها الموبايل
هند / انت فين و ما بتردش ليه
مختار / احنا بخير الحمد لله فى ايه
هند / هو ايه اللى في ايه انا هموت هنا و ما حدش بيرد عليا انتوا فين
مختار / شويه و جايين نطمن بس على الراجل
هند / عرفت باللى حصل لعباس بس مين اللى عمل كدا
مختار / بنحاول نعرف ما تخافيش و اهدى و خليكي فى البيت
هند / حاضر
مختار / هقفل و اكلمك بعدين
هند / خلى عبد الله يكلم امى هتتجنن من الخوف هى كمان
مختار / مش وقته يا هند
هند / امال امتى وقته
مختار / سلام يا هند سلام
هند تقفل و تبص وراها تلاقي الكل ملموم على انتصار قاعده بتعيط على كرسي
عباده / خلاص يا ام فاتن ما حصلش حاجه لكل ده اهدى
هند تروح لانتصار
هند / حقك عليا انا اسفه
انتصار / كل اللى بيطلع من باب السرايا ما ببقاش عارفه هيرجع و لا لا تعبت من الجرى ورا الكل تعبت من الخوف و القلق تعبت
هند تاخدها فى حضنها انتصار تعيط
انتصار / عمرى ما خفت قد اليومين دول عمرى ما تعبت قد اليومين دول
فاطمه / جرا ايه يا انتصار لما انتى تعملى كدا العيال يعملوا ايه ما تجمدى كدا امال هو فى ايه
شيري / لو كان جبل كان اتهد اللى بيحصل مش سهل على اى حد
فاطمه تقعد على ركبها قدام انتصار
فاطمه / و انتى مش اى حد انتى كبيرتنا اللى كلنا بنتسند عليكي احنا بنتحامى فيكي يا ام فاتن ما ينفعش
عباده / و هى بشر برده يا امى
فاطمه / فرجتوا علينا الرايح و الجاى يلا كل واحده تشوف اللى وراها يلا مش فرجه هيا … و انتى يا هند اطمنتى على جوزك و كلمتيه يلا روحى شوفي وراكى ايه اعمليه
هند تهز راسها و فاطمه و فاتن يسندوا انتصار و يطلعوها الاوضه
فاطمه / روحى ارتاحى يا فاتن انا هخليني جنبها
فاتن تهز راسها و تمشي و تقفل الباب وراها انتصار تقعد على السرير تعيط
فاطمه/ مالك بس يا اختى ايه جرالك شكلها عين جامده اللى تبهدلك كدا
انتصار / الواد هيروح يا فاطمه الواد الغلبان اللى لا له فى الطور و لا فى الطحين هيروح
فاطمه / واد مين اللى هيروح
انتصار / عبد الله … حته البلسم اللى ربنا كرمنا بيها هتروح
فاطمه / يا مصيبتي انتى بتتكلمى جد … ماله الواد ماله عبد الله
انتصار / خطفوه ولاد الكلب و قالبين عليه الدنيا مش لاقينه
فاطمه / يا مصيبتي يا مصيبتي يا مصيبتي … هو عباس الكلب هو ابن الكلب
انتصار / مش هو عباس راخر فى المستشفي بين الحيا و الموت
فاطمه / الله امال مين ؟ مين ؟
انتصار / ما اعرفش
باب الاوضه يخبط فاطمه تمسح دموعها و تلم نفسها و تروح تفتح تلاقي عباده
فاطمه / دريت باللى حصل ؟
عباده يهز راسه
عباده / ممكن ادخل ؟ هى عامله ايه دلوقت ؟
انتصار تتعدل و تمسح دموعها
انتصار / تعال يا عباده تعال يا ابنى
عباده يدخل و يقفل الباب
عباده / لقيوه يا ام فاتن لقيوه
انتصار / احلف بالله
عباده / انا لسه قافل مع الكبير عربيه رمته قدام المستشفي و كلهم فى الطريق ليه و ان شاء الله خير
فاطمه / الف حمد و شكر ليك يارب … قلبها كان حاسس البت من صباحيه ربنا بتفرك و تقول مش مرتاحه البت كانت حاسه
انتصار / الكل كان حاسس امه ما كانتش عوزاه يخرج الصبح
عباده/ انا هروح
انتصار/ ما انتش خارج
عباه يبص لانتصار باندهاش
فاطمه / خليك يا عباده ربنا يهديك ما تسبش السرايا فاضيه على الحريم
عباده يبص فى الارض و يهز راسه موافق و يمشي فاطمه تروح تاخد انتصار فى حضنها انتصار بتعيط
فاطمه / ربنا هينجيه ما تقلقيش هيقوم بالسلامه
انتصار تهز راسها و تعيط
………………..
فى المستشفي
مختار قاعد جنب عبد الله مش قادر خالص
عبد الله / قولتله اخرك هاته و بعد كدا ما شوفتش حاجه صحيت لقيت نفسي هنا
مختار / الحمد لله انها جت على قد كدا
عبد الله / وربنا ما هسيب حقى لو اخر حاجه اعملها برده مش هسيبه
مختار / فى العنايه … ضربوه بالنار الصبح … تقريبا فى نفس التوقيت اللى انت اتخطفت فيه
عبد الله يتفاجئ
مختار / انت اتخطفت فى ميكروباص عرابى … عرابى كمان اتخطف و انضرب واتبهدل و ما اتسابش الا اما قال انك سيده
عبد الله / انا !!!
مختار / اللى عمل كدا بيقلبك على عباس زياده و يقلبه عليك بس اللى عمل كدا كان اهبل
عبد الله / لو عباس جراله حاجه
مختار / ان شاء الله مش هيجراله سمعت ان حاله مراته … قصدى طليقته وحشه و عياله لسه ما يعرفوش حاجه ان شاء الله خير ان شاء الله يقوملهم بالسلامه
عبد الله / طب ليه ما عملوش فيا زى ما عملوا فيه
مختار / انت بتقول ايه يا ابنى الحمد لله قدر و لطف
عبد الله / ماما عرفت باللى حصل
مختار / لا هى فاهمه انك بتشوف عباس و بتعمل الواجب
عبد الله / كدا كدا هتعرف زى حوار الخناقه و زى كل حاجه تانيه … انا تعبت يا مختار
مختار / و مين سمعك بس احنا رجاله ياله نتعب اه بس ما ننخش
عبد الله يبص لمختار مختار يبتسم
مختار / تعرف توصفلى شكل العيال دى و لا ايه
عبد الله/ اطلعهم من وسط الف
مختار / حلو اوى انا هجبلك واحد حبيبي فى الداخليه هيرسملك العيال دى حسب مواصفاتك العيال دى لازم تتجاب
عبد الله / بس بالله عليك يا شيخ لما تجبهم ابو نسب ياخد حقه الاول
مختار / عيني يا ابو نسب
مختار و عبد الله يبتسموا
……………
فى اوضه انتصار
انتصار نايمه على السرير باب الاوضه يخبط انتصار تفتح عينها الباب يتفتح و هند تدخل
هند / ممكن ادخل
انتصار تتعدل
هند / انتى عامله ايه دلوقت احسن ؟ انا جايه اعتزرلك على اللى حصل تحت
انتصار / حبيبتي تعالى
هند تقعد جنب انتصار
انتصار / انتى عارفه غلاوتك عندى صح ؟
هند تبتسم
انتصار/ انتى ما تفرقيش عن مريم و فاتن و باقي البنات انتى بنتى زيهم بالظبط و ان كنت رفعت ايدي عليكي
هند / حقك انتى عليا انا ضغط عليكي جامد انا ضغط الكل جامد الفتره اللى فاتت بس والله غصب عنى
انتصار / حقك تعملى اكتر من كدا احنا كبرنا فى الهم ده و مش قادرين نتحمله و انتى من الدار للنار يا كبدى
هند تبص فى الارض
انتصار / روحى ارتاحى
هند / هستنى مختار
انتصار / كلمتيه ؟ قالك جاى ؟ الكبير هيبات هناك
هند / قال هيجي بس هيتاخر شويه … هستناه
انتصار/ تمام
هند / هسيبك ترتاحى
انتصار تبتسم هند تقوم و تمشي و تقفل الباب وراها
انتصار / جيب العواقب سليمه يارب ما لناش غيرك
……………….
فى المستشفي فى اوضه عرابى
عرابى / لا ما ادونيش حبوب ما ادونيش حاجه و لا حتى بق ميه ما شوفتش منه غير ضرب هاتك و فين يوجعك
مغاورى/ تعرف توصفلى العيال دول
عرابى / هم اربعه بس اللى كان بيضربنى كان واحد بس
مغاورى / الحكومه هتيجي تاخد اقوالك
عرابى / قالولى لو بلغت هيجيبوا ابويا و ابويا راجل كبير مش حمل بهدله
مغاورى / و احنا من امتى بندخل الحكومه فى مشاكلنا يا عرابى
عرابى / قولى عاوزنى اقول ايه و انا اقول يا سي مغاورى
مغاورى / لا شوفت و لا سمعت و لا بتتهم حد
عرابى / اللى تشوفه يا سي مغاورى
مغاورى / تمام يا عرابى تمام
………………….
فى فيلا فيرا
فيرا بتلعب هى و ادواردوا ويي ملاكمه و عمالين يضربوا بوكسات رشيد يدخل و يحط ايده فى وسطه و يروح يشد فيشه التليفزيون
فيرا / ايه انا كنت هكسب
رشيد/ وزعى الهلف ده عاوزين نتكلم
فيرا / رشيد لو سمحت
رشيد/ وزعيه بدل ما ابكيكي عليه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
