رواية الإكس أس 2 الفصل الثالث 3 بقلم فاطمة عبد الوهاب
رواية الإكس أس 2 الجزء الثالث
رواية الإكس أس 2 البارت الثالث
رواية الإكس أس 2 الحلقة الثالثة
سمعت صوت أنا عارفاه كويس بيقول : لسة فيكي عادة حب طلوع السطوح بالليل ؟
لفيت وقلت بصدمة : خالد بتعمل إيه هنا ..
دماغي عملت إيرور إيه اللي جابه وليه في السطح وفي لحظة افتكرت إني مش لابسة العباية الحمد لله الدنيا ضلمة كحل مش هيشوف حاجه ولبستها بسرعة ولبست الطرحة وبعدين فتحت الكشاف واتأكدت إنه هو ..
قال باستهزاء : طب وتعبتي نفسك ليه ما الجيران كلهم ممكن يشوفوكي جت عليا أنا
اتعصبت وقولتله : أولا الدنيا ضلمة كحل يعني استحالة حد يشوفني أنا أصلا عرفت إنه إنت من صوتك، ثانيًا العمارة عالية عن الباقيين يعني برضو محدش هيشوفني، ثالثًا أنا قاعدة في الأرض وفوقي سور مترين ورابعًا أنا جيت هنا مرتين قبل كدة وقعدت عالسطح وأكيد لو كنت أعرف إن حد هيشوفني من الجيران مكنتش هطلع بالشكل دا .
قال بهدوء : طيب تمام أنا قلت يمكن عشان قلعتي النقاب مبقاش يهمك حاجة..
اتعصبت أكتر وقلت : إنت عارف أنا قلعته ليه ولا عارف أنا حصل لي إيه ولا عشت إيه متتكلمش ومتحكمش عالناس من غير ما تعرف حاجة يا خالد عن إذنك ..
قال : استني طيب معلش حقك عليا فعلا مكانش لازم أحكم عليكي قبل ما أسمعك إنتي إيه أخبارك، أنا عارف من بعد ما فسخنا الخطوبة وكل واحد مشي في طريق ومعرفناش حاجة عن بعض..
قلت بعد ما هديت: مفيش بس الدنيا بتدي لكل واحد فينا كام قلم كدة عشان يفوق ويعرف إنها مش دايمة وإنها فانية ..
قال بعدم فهم : مش فاهم تقصدي إيه ؟
قلت : مش مهم إنت إيه أخبارك شفتك إنت والمدام وبنوتك نسخة منك ما شاء الله..
قال : أنا شوفتك برضو بس معرفتش آجي أسلم ..
قلت : لا ولا يهمك أنا مقدرة أكيد بس إنت بتعمل إيه هنا ؟
قال : لا مفيش أصل جميلة العروسة تبقا بنت خالة المدام فحضرنا الفرح وصممت نفضل هنا عشان طريقنا طويل فقلنا هنمشي الصبح وأنا مجاليش نوم فقلت أطلع السطح شوية واتفاجئت لما لقيت حد داخل السطح وبيدندن وعرفت انها إنتي من صوتك ..
لحظة لحظة يعني صحبتي جميلة تبقا بنت خالة مراته يا محااااسن الصدف
قلت : عمومًا صدفة سعيدة يا خالد أنا هنزل عشان لو حد طلع ولا كدة مينفعش حد يشوفنا مع بعض هتبقا منظرها مش لطيف..
قال : استني طيب محكيتيليش حاجة عنك، إيه اللي حصل في دنيتك في السنين دي ؟
قلت وأنا ماشية : حصل كتير بس عمومًا دا ولا وقت ولا مكان حكاوي وأنا مش حابة أسببلك أي مشكلة مع المدام فلو حصل مستقبلا واتقابلنا صدفة زي النهاردة كدة هبقا احكيلك لو متقابلناش تاني يبقا اللي حصل في حياتي الكام سنة اللي فاتو مش لازم تعرفه سلام .
ونزلت وسيبته، كنت حاسة إنه في كلام عاوز يقوله بس أنا نزلت وسيبته، عارفة إني عديته بفضولي زمان وإنه دلوقتي فضوله هيقتله وعاوز يعرف بس أنا مش هرضي فضوله دا حاليًا، خليه متعلق كدة أحسن ..
نزلت أوضتي الحمد لله محدش قفشني وأنا بتسحب عشان أطلع السطح ولا حد قفشني وأنا نازلة 😁 ولو حد قفشني يعني ماهي مش أول مرة أطلع السطح عندهم قبل الفجر عادي يعني 😌
قعدت أفكر شوية قبل ما أنام طب هو كان بيسأل على جوزي واولادي ليه فضول يعني ؟ دا أكيد عشان هو أكيد نسيني بقا ليه بيته وبقا عنده بنوتة كيوت، وأنا فضولي هيموتني عاوزة أعرف اسمها بس معلش هو كدة كدة هيقابلني تاني مش هيعديها كدة أصله فضولي وأنا عارفاه بس مسيرها الأيام هتبين المستخبي ..
قعدت أفكر هل أنا لسة بحبه ؟ لأ أنا محسيتش إن قلبي بيدق ولا اتوترت لما شوفته تاني مرة، طب وبالنسبة لأول مرة هل كان إحساسي وتوتري وقلبي اللي كان بيدق بغباء دا طبيعي ؟ طب دلوقتي يعني هل أنا لسة بحبه ولا هو عشان توتر أول مرة وخلاص ؟ مش عارفه مش عارفه بكرة الأيام هتبين
طب وعلي ؟ ااه بس منه، خطبت يا علي وفرحك قريب، نسيت كتب كتابنا يا علي، نسيت أول حضن بينا، أول رعشة سلام، الإحساس اللي قولتلي محسيتوش غير في حضني ومش عاوز تحسه مع حد تاني، نسيت كل دا بسهولة ..
لحظة لحظة هو أنا ليه أنانية ما أنا السبب وأهلي هم اللي بعدوني عنه، وبعد ما قعد كل الفترة دي من غير حب وجواز زي ما كان بيوصلني مستكترة عليه يتجوز ويعيش يومين بعد كل السنين دي، بعد ما سافر واتغرب عشان ينساني، وبعد التعب اللي تعبه ونومه في السرير شهور لما بعدت عنه مستكترة عليه يعيش يومين، ما انتي اتجوزتي مرة واتنين وتلاتة..
بس أنا محبيتش حد فيهم زيه، محدش خد المكان اللي هو خده..
وهو ماله حبيتي ولا محبيتيش المهم حصل وكان عندك ولاد وكان وكان مستكترة عليه دلوقتي يكون أسرة ويبقا عنده ولاد حلوين زيه كدة بطلي أنانية وقولي ربنا يسعده ..
طيب هو شكله كان مش مبسوط معاها أنا لاحظت عيونه كانت مختلفة، أنا متأكدة لسة بيحبني منسينيش نظرته ليا ولمعة عيونه قالتلي ..
حتى لو مبيحبهاش بس متكونيش إنتي سبب في خراب بيته قفلي عالموضوع هنا ونقفل الحب والكلام الفارغ دا دلوقتي، عندنا شغل وتارجت عاوزين نحققه واتمرقعنا كتير فالفترة اللي جاية جد وبس ..
وانتصر عقلي على قلبي ونمت وأنا مقررة إني مليش دعوة بحد فيهم تاني..
تاني يوم صحيت لبست وجهزت حاجتي وخرجت سلمت على عيلة جميلة ومشيت ..
وأنا خارجة قابلت خالد بيحط حاجته في العربية وماشي هو كمان، طبعا كان معاه المدام والبنوتة وشافني، مسلمش بس ابتسم لي وشاولي بصوابعه السبابة والوسطى علامة النصر وركب العربية
وطبعًا أنا فهمت إنه بيقولي بإشارته دي يعني تاني صدفة نتجمع أهو ..
مديتلوش اهتمام ومشيت ..
وطبعا دماغي مش بتعتقني في اي طريق طويل ..
حسيت خالد جبان أوي، يعني حتى مفكرش يعرف مراته عليا او يعرفني عليها بحجة حتى إني قريبته من بعيد أو أي حجة معملش كدة، عكس علي اللي مهربش وعرفني فعلا عليها ..
بدأت أقارن بينهم وطبعًا علي كسب المقارنة، بس كمان كانت لسة جوايا حتة متعلقة بخالد ..
وهنا كان السؤال هل ممكن الواحدة تحب شخصين بنفس الدرجة أو واحد حتى أقل من التاني بس تحبهم سوا ؟
سؤال أرقني وملقيتلوش إجابة ..
بس عشان أنا مقررة إني هبعد خلاص غيرت أفكاري للماء والخضرة والوجه الحسن😂 عشان أشتت نفسي يعني وبالفعل حصل..
وصلت بيتي بعد رحلة مرهقة وأنا مقررة إنه نو أمان لأي مان مهما كان، وهعيش لنفسي وأدلع نفسي وأحقق التارجت وبلا هم ..
وبالفعل حصل اشتغلت على نفسي شهر كامل وحققت مبالغ حلوة جدا غير إني حققت نص التارجت
عملت حفلة صغيرة عندي في الفيلا احتفالا بتعبي وإني بقيت شطورة وإني حققت نص التارجت العالي فدا إنجاز عظيم، وعزمت كذا صاحبة ليا في الشغل والكوتش والليدر بتوعي اللي كانوا مبسوطين مني أوي وجم حفلتي برغم انشغالهم بس عشان يشجعوني ويحسسوني إني مش لوحدي وإن عندي عيلة واخوات بيخافوا عليا وبيحبولي الخير ..
طلبت أكل ل٢٠ فرد و٣ تورتة كبار عشان الاحتفال
لبست دريس أبيض طويل وسيمبل ولطيف ومش أوڤر وطرحة لايقة معاه وميك أب خفيف أوي وكان شكلي في المجمل كيوت وبس ونزلت لهم كانوا اتجمعوا كلهم تحت. والشغالة كانت دخلتهم ..
حسيت وقتها إني مبسوطة جدًا وأخيرًا لقيت ناس أتكلم معاهم وأهزر معاهم بدون تكلف وبقلب صافي والضحكة تكون من قلبي بجد ..
خلصنا الغدا وباركولي كلهم بنجاحي وقطعنا التورتة واتصورنا صور لطيفة للذكرى ..
خرجت للحديقة برة الفيلا كان معايا مكالمة شغل خلصتها وبلف عشان أدخل لقيت الكوتش بتاعي ورايا
الكوتش دا حد شاطر وموهوب جدا وأصغر مني بسنتين بس ما شاء الله محقق نجاح حلو في الشغل تبعنا ..
قولتله : خير يا كوتش حسام في حاجة ؟
قال : أيوة بصراحة كنت حابب أكلمك في موضوع بس مش عارف أبدأ منين ..
قولتله : اتفضل يا كوتش
قالي : بصي يا ريتال أنا عارف إنك مطلقة وعارف إن حصلك حوارات كتير في حياتك عرفت كل دا من جميلة، ومش هاممني كل دا إنتي حد ناجح ودمه خفيف ويتحب وبتحبي الحياة والسفر والخروج ودي المواصفات اللي أي شاب يتمناها وبصراحة أنا حابب أكمل حياتي معاكي تتجوزيني ؟
قلت في نفسي يادي النيلة السودة هو كلكم مبتظهروش ليه غير لما أقرر إني أقفل باب الحب والجواز دا بجد إيه إحلويت فجأة جتكو وكسة ..
قلت: بص يا كوتش إنت حد كويس وأي بنت تتمناك بس مش أنا، أنا عشت حاجات بشعة كتير خلتني أقفل قلبي بالمفتاح ومفتحوش لأي مخلوق وكمان المجتمع والناس هترفض دا هيرفضوا إنك تتجوز واحدة أكبر منك بسنتين ومطلقة مرتين وإنت ماجوزتش قبل كدة
قال : سيبك من المجتمع والناس أنا مبيهمنيش كلام حد ولو على قلبك اللي اتقفل واحدة واحدة نحاول نفتحه مع بعض سوا ..
قلت : بص يا كوتش كان على عيني والله بس إنت زي عيالي يعني لو كنت اتجوزت بدري شوية كنت جبت قدك 😂
ضحك وقالي : ماشي إعتبريني زي عيالك، حبيني واحتويني وحني عليا أنا ناقص حنان وربنا 😂
قولتله : كان نفسي والله بس بجد مينفعش
قال : طيب انا كشخص بعيدًا عن المجتمع والناس والهري دا أنا كشخص كويس ولا لا
قولتله : إنت كشخص كويس مقدرش أنكر
قال : بااس هو دا اللي عاوز أسمعه
وركع على ركبته وطلع علبة فيها خاتم وقال : يبقا اسمحيلي أكون دوا لكل الجروح اللي فاتت ومتقلقيش من المجتمع والناس أنا أقدر أسكتهم كلهم بس إنتي توافقي ..
قلت في نفسي ياربي أفهمه إزاي دا بس إنه مينفعش
ولسة هرد لقيت التيم كله اتجمع في اللحظة دي وهووب تصفيير وكلام زي ايوة يا حسااام عااش يابا
وبعدين الكلام اتقلب ناحيتي وكله بقا يقول : وافقي وافقي وافقي وافقي ..
لسة بلف وشي الناحية التانية عشان أشوف مهرب منهم أو أي حجة عشان أخرج من الحوار بأقل الخساير لقيت اللي واقف ورايا ومعرفش واقف من إمتى ولا سمع إيه بس واضح من علامات الصدمة اللي على وشه إنه سمع كتير
قلت بصدمة : علي …
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية الإكس أس 2)
