رواية اثبات ملكية الفصل الثاني 2 بقلم ملك ابراهيم
رواية اثبات ملكية البارت الثاني
رواية اثبات ملكية الجزء الثاني
رواية اثبات ملكية الحلقة الثانية
ضحك ضحكه خفيفه كدا واتكلم بتريقه على كلامي(حالك ايه اللي تروحيله في وقت زي دا، انتي ممسوكه في ايه بالظبط؟ )
هو يقصد ايه بممسوكه دي هو فاكرني ايه، دا لازم يعرف هو بيكلم مين كويس، خدت نفسي كدا براحه وقولتله(لا بقولك ايه انا مش بتاعت الكلام دا انا واحده سلاحي في الحياه هو شرفي وبعدين انت متعرفش انت بتكلم مين )
ضحك تاني واتكلم بتريقه(بكلم مين يعني؟)
بصتله بغيظ وقولتله بلا فخر(انت بتكلم احسن كوافيره في مصر)
ضحك تاني وحرك راسه كدا من غير ما يقول ولا كلمة، قرب مننا عسكري وحيَّاه باحترام وقاله (دخلنا المتهمين كلهم الحبس يا سيادة الرائد)
ينهار مش فايت رائد😮 دا انا شكلي هتعلق في القسم للصبح.
بصلي من فوق لتحت وفجأة ضحك وكأنه افتكر حاجه، اتكلم مع العسكري وهو بيبصلي وقاله(متأكد ان انتوا دخلتوا كل المتهمين الحبس)
رد العسكري باحترام (ايوا يا فندم)
ضحك اكتر وهو بيبصلي وقال للعسكري(بس في واحده من المتهمين لسه مدخلتش الحبس)
هو يقصد ايه بقى، معقول يقصدني انا.. بلعت ريقي بخوف ورفعت ايدي احيَّه باحترام زي ما العسكري عمل وقولتله( باشا مصر والله واللي مايعرفك يجهلك) ضحك اكتر وانا استغليت انه بيضحك وحاولت اهرب من قدامه، اتكلم بصوت قوي خلاني اتجمد مكاني(استني عندك) وقفت وغمضت عيني، معقول هيحطني في الحبس مع المجرمين؟.
قرب مني بخطوات هاديه ووقف قدامي ولقاني مغمضه عيني، اتكلم معايا بصوته القوي (فتحي عينك) حركت راسي بـ لا وانا مغمضه بخوف وقولتله (لا مش هفتح عيني، انت عايز تحبسني وتحطني مع المجرمين واول ما ادخل الحبس يلفو حواليا وهما بيغنو ياحلوه يا بلحه يا مئمعه وانا اعيط وبعدين يعوروني في وشي ويعلموا عليا) صوت ضحكته ملا القسم، كل العساكر والناس اللي موجودين بصو علينا وهما مستغربين، فتحت عيني بسرعه على صوت ضحكته، مش هقدر انكر ان ضحكته دي خطفت قلبي، بس طبعا مينفعش، دا ظابط شرطة وانا حتة بنت بشتغل في كوافير، فوقي لنفسك يا سارة وبلاش تحلمي حلم انتي مش اده.
وقف ضحك واتكلم معايا بابتسامه وقالي(انتي كنتي هنا في القسم لحد دلوقتي بتعملي ايه؟) اتكلمت بخوف وقولتله (والله انا معملتش حاجه، انا كنت مروحه من شغلي جعانه وامي عامله النهاردة مسقعة وانا بصراحه مش بحبها، قولت اشتري علبة جبنه وانا مروحه) بصلي بصدمة، فتح عنيه بزهول وهو بيسمعني وكأني بحكيله قصة تاريخيه، حرك راسه وقالي(وبعدين) كملت كلامي وقولتله(بس والحكايه بدأت من هنا، في حرامي ابن حرام ملقاش وقت يسرق فيه المحل غير وانا بشتري علبة الجبنه وصاحب المحل جبني معاه هنا عشان اشهد على المحضر وبقالي هنا اكتر من ٣ ساعات) استغليت الفرصه بقى واديته حته دراميه من عندي عشان اصعب عليه ويسبني اروح (هو دا كل اللي حصل وانا لازم اروح دلوقتي عشان اطمن على امي العيانه واديها الدوا) ضحك مره تانيه وصوت ضحكته كان مسمع القسم كله، خد نفسه من كتر الضحك وقالي(حكايه عبره بصحيح) حركت راسي بطريقه دراميه عشان اصعب عليه، اتكلم معايا بهدوء(طب انتي مش هينفع تروحي لوحدك في الوقت المتأخر دا، تعالي معايا انا هوصلك) وقفت متجمده مكاني، شاور بإيده قدام عيني وقال(ايه انتي روحتي فين) بصتله وقولتله(انا هنا اهو، بس ملوش لازمه تتعب حضرتك وتيجي توصلني، انا هعرف اروح لوحدي) اتكلم بصوت قوي خوفني منه تاني (مهو بصي بقى، يا اما تيجي معايا اوصلك لبيتك دلوقتي، يا اما هتشرفينا هنا في الحبس للصبح وترقصي على اغنية يا حلوه يا بلحه يا مئمعه لحد ما النهار يطلع) اتكلمت بسرعه(لا والنبي حبس ايه انا معاك يا باشا وصلني برحتك) ضحك وقالي(طب اتفضلي قدامي).
خرجت من القسم معاه ولقيته وقف قدام عربيه شكلها غالي اوي وقالي(اتفضلي اركبي) وقفت مصدومه وقولتله (اركب فين حضرتك، هو انت ناوي توصلني بالعربيه دي؟) بص للعربيه وقالي (مالها العربيه دي!! ) يا رب صبرني على الليله دي بقى اتنهدت بتعب وقولتله(العربيه دي حضرتك لو حد من اهل المنطقه شافني وانا نازله منها وش الفجر كدا اكيد تفكيرهم هيوديهم لحاجه تانيه خالص) بصلي بستغراب اوي وقالي (اومال المفروض هوصلك ازاي يعني في وقت متأخر زي دا، متقوليش ناخد تاكسي) بصيت حواليا وقولتله(اذا كان ولابد بقى يبقى توصلني بالبوكس ويبقى كتر خيرك) وقف مصدوم شويه كدا وقالي(ولما حد من اهل المنطقه يلاقيكي جايه في بوكس وش الفجر محدش هيقول حاجه!! ) حركت راسي بـ لا واتكلمت بفخر(مهو لو حد سأل هقول اني كنت في القسم مطلوب شهادتي في قضيه دوليه) ضحك ضحكته اللي تجنن، يخربيت جمال الضحكه دي بتخطف قلبي بجد، اتكلم وهو بيضحك (علبة الجبنه بقت قضيه دوليه) اتحرجت اوي من طريقته المرحه معايا، حاسه بحاجه غريبه اوي وانا معاه، خدودي لاول مرة تحمر كدا زي البنات، وقف بصلي شويه وبعدين اتحرك اتجاه عربية البوكس واتكلم مع العسكري وخد منه المفاتيح وشاور ليا عشان اقرب منه، قربت منه ولقيته فتحلي باب العربيه، مش عارفه ليه كنت حاسه انه بيتعامل معايا وكأني اميرة، اول مرة حد يتعامل معايا بالطريقه الحلوه دي، ااه هو بيفتحلي باب البوكس يعني مش طيارة ولا يخت ولا عربيه اخر موديل.. بس مجرد الاحساس ان في حد بيتعامل معاكي بالطريقه دي لوحده بيخليكي تحسي انك مبسوطه اوي وبدأت احس اني مش عايزه الليلة دي تخلص بعد ما كنت شيفاها من اسود الليالي اللي عشتها في حياتي.
قولتله علي عنوان بيتي وفضلت ساكته طول الطريق وانا بفكر في كل اللي حصل، كنت مكسوفه ارفع وشي وابص عليه، بصراحه مش عايزه اعلق نفسي بوهم، هو فين وانا فين، هو اكيد مش حاسس نفس احساسي، اكيد هو بيتعامل معايا بطبيعته، انا بس اللي عشان اول مرة يحصل معايا كدا حاسه بلي انا حساه دلوقتي، بس اكيد لما الليله دي تخلص وكل واحد يروح في حاله هنسى كل اللي حصل دا.
اتكلم اخيرا وقالي(مقولتليش اسمك ايه؟) قلبي هيقف بجد، انا ليه متلخبطه اوي كدا، حاولت اخرج صوتي بصعوبه وقولتله (اسمي ساره) ابتسم وقالي(مال صوتك بقى رقيق زي البنات كدا ليه) اتحرجت اوي، طب ارد عليه اقوله ايه دا، سكت شويه افكر في رد وبعدين قولتله (على اساس ان انا مش بنت يعني! ) ابتسم وكأنه كان منتظر ردي ده، اتكلم بابتسامه وقالي(مش عايزة تعرفي اسمي ايه؟) بصتله وانا هموت واعرف اسمه ايه، لكني حركت راسي بـ لا وقولتله(لا طبعا مش عايزه اعرف وهعرف اسمك اعمل بيه ايه يعني) ابتسم وهو بيقف بالعربيه وبيقولي(حمدلله على السلامه) بصيت حواليا لقيت نفسي قدام بيتنا، هو احنا ازاي وصلنا بسرعه كدا، ليه محستش بالوقت وانا معاه، اتكلم وهو بيبتسم وقالي(لو مش عايزه تنزلي دلوقتي ممكن نلف لفه كمان بالعربيه) اتحرجت انه خد باله اني مش عايزه انزل، فتحت باب العربيه بسرعه ونزلت وانا متوتره جدا، جريت على البيت ونسيت حتى اشكره، طلعت السلالم وانا بجري عايزه اطلع ابص عليه من شباك اوضتي قبل ما يتحرك، خبطت علي باب شقتنا وفتحتلي ماما ولسه هتزعق فيا سبتها وجريت على اوضتي افتح الشباك عشان اشوفه مع اني عارفه انه اكيد اتحرك بالعربيه اول ما انا خرجت منها، فتحت الشباك بسرعه واتصدمت لما لقيته واقف وبيبص على الشباك وكأنه مستنيني، اتكسفت اوي وقفلت الشباك بسرعه، بعد لحظات سمعت صوت العربيه بتتحرك وماما دخلت عليا الاوضه وهي قلقانه ومش فاهمه ايه اللي حصل وايه سبب تأخيري، قعدت معاها وحكيت لها اللي حصل معايا وطبعا مقدرتش احكي عنه، ماما رجعت اوضتها بعد ما اطمنت عليا وانا قعدت افكر فيه شويه وبعدين روحت في النوم..
****
بعد كام يوم فاتو عليا وانا بحاول اشيله من تفكيري، بقنع نفسي ان كل اللي حسيت به في الليلة دي كان وهم، جالي تليفون وانا شغاله في الكوافير، واحده جارتنا اتصلت عليا وقالتلي ان ماما تعبت وخدوها المستشفى، سبت كل حاجه وجريت على المستشفى، لقيت الدكتور بيقولي ان حالتها صعبه جدا ومحتاجه عمليه هتتكلف 30 الف جنيه، طب انا هجيب منين مبلغ زي دا وانا يدوب بصرف على البيت وادفع الإيجار واجيب الدوا لامي بالعافيه، وقفت في المستشفى وانا مش عارفه اعمل ايه واجيب المبلغ دا منين، وقفت ابص على امي وهي في الاوضه والاجهزه متوصله بجسمها، انا لازم اتصرف لازم اعمل اي حاجه عشان انقذ حياة امي، المشكله ان انا مليش حد استلف منه المبلغ دا، واعمامي يعتبر قطعو علاقتهم بينا من بعد وفاة بابا عشان خايفين نطلب منهم فلوس، وقفت وانا حاسه ان الدنيا بتلف بيا، لقيت البنات اللي بيشتغلوا معايا في الكوافير جم ومعاهم مدام سحر صاحبة الكوافير، سألوني عن حالة ماما وقولتلهم على العمليه والفلوس اللي لازم ادفعها، طبعا انا عارفه ان ظروفهم نفس ظروفي ومش هيقدروا يساعدوني، بس مدام سحر خدتني على جمب وقالتلي(بقولك ايه يا ساره، انا عندي طريقه سهله وبسيطه تقدري تجيبي منها المبلغ دا بسرعه)
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية اثبات ملكية)
