رواية إعادة تأهيل معقدة الجزء الثاني الفصل الخامس 5 بقلم زهرة عصام

رواية إعادة تأهيل معقدة الجزء الثاني الجزء الخامس

رواية إعادة تأهيل معقدة الجزء الثاني البارت الخامس

رواية إعادة تأهيل معقدة الجزء الثاني الحلقه الخامسة

نوح بتبرير:-
مش قصدي بس
مكملش كلامه و لقي تمارة بتترنخ و بتقع على الأرض فصرخ:-
تمارة
ذكية بص عليها و عنيها وسعت و صرخت بإسم كمال ، كمال دخل جري لقي تمارة واقعة على الأرض و نوح بيحاول يقوم بس دراعة معجزه بص لـ نوح و قال:-
أنا آسف و جري شال تمارة نيمها على السرير تاني
جوري دخلت و هي مسنده لينا و صرخت بإسم تمارة ، قعدت لينا اللي عيطت تاني و جريت على تمارة مسكت ايديها و بتحاول تفوقها
نوح كتم غيظة من كمال جواه و قال في نفسه:-
مش مهم دلوقتي يا نوح المهم نلحق تمارة
بص ليه و قال بجدية:-

دكتوره بسرعة يا كمال و حُط تحت كلمة دكتوره دي ١٠٠ خط
كمال هز رأسه بتفهم و خرج بسرعة يشوف دكتورة ، ذكية زقت عجل الكرسي بتاعها لحد ما وصلت لسرير تمارة و بصت عليها بتمعن ، بصت لـ جوري اللي قلقانة عليها و لينا اللي قاعدة لا حول لها ولا قوه و رجعت نظرها تاني على تمارة و قالت جواها:-
إنتي اللي إمتلكتي قلب حفيدي بقي ، حلوة و صغيرة و إخواتك كمان حلوين
بصت على نوح و خوفه البادي على وشة و قالت:-
هيخرجوا من هنا على الفيلا يا نوح هيكونوا معانا بس لازم عشان يقعدوا نعمل حاجة و الحاجة دي هتفرح قلبك يا حبيبي اللي بقاله كتير مفرحش
مسكت إيد تمارة و بقت تدعك فيها جامد و بتحاول تفوقها
جوري بدموع:-
عشان خاطري قومي إحنا تايهين من غيرك يا تمارة
ميلت على رأسها و باستها و قالت:-
كل مره بتتعبي فيها بنحس إننا ولا حاجة من غيرك
لينا فوقت و جريت عليهم وقفت جنب جوري و هي بتقول:-
هي مالها يا جوري أنا مش عارفه هنخلص من الهم دا امتي بس ، كل ما أقول خلاص هنفرح تيجي مصيبة تانية تحل فوق دماغنا هو إحنا مش مكتوب لينا الفرح وإلا اية ؟
جوري أخدتها في حضنها و هي بتقول بانهيار:-

إحنا كل حاجة بتروح من ادينا بس لا هنفضل مع بعض للآخر محدش هيقدر يفرقنا
ذكية بصتلهم و سامعة كلامهم و صوت عياطهم بقي هو اللي مسمع في المكان ، لدرجة أنه وتر نوح اللي ما زال بيحاول يقوم فزعق و قال:-
في اية بطلوا نواح إنتوا شايفنها ما.تت قدامكم ؟ هي أغمي عليها مش أكتر اسكتوا مش عاوز أسمع واحدة فيكم بتعيط إنتوا فاهمين
جوري عقدت حواجبها و بصت ليه بغضب و لينا مسكت ايديها و بقت تبص ليهم بعيون مدمعة
ذكية بصت لـ لينا و قالت لها :-
تعالي يا صغيرة انتي
لينا بصت ليها و شاورت على نفسها و قالت:-
أنا يا طنط
ذكية هزت رأسها بايجاب و قالت:-
أيوة تعالي هو في حد صغير هنا غيرك ؟
لينا تقدمت تجاها و نزلت لمستوي الكرسي و قالت باحترام:-
نعم
ذكية رتب على كتفها و قالت بهمس:-
متخافيش منه هو متعصب بس لو عوزاني اشدهولك من ودنه عشان زعق ليكم هخليه يكون زي الكتكوت المبلول دلوقتي
نوح سمعهم و عقد حواجبه و قالت:-
إحنا في اية وإلا في اية دلوقتي يا نانا
لينا بصتله بغضب و بصت لـ ذكية و قالت بهمس :-
هتعرفي تعملي كدا وإلا هيزعق ليكي انتي كمان دا عاوز زي هُلاكوا أول ما يزعل و هو بيلعب مصارعه
ذكية ضحكت جامد على كلام لينا و قالت:-
إنتي مش عارفه قُدراتي لسة أنا نانا يا بنت
بصت لـ نوح و قالت بصرامة:-
أنا مش عوزاك تتكلم معاهم نهائي إنت فاهم ولا حتى تزعق ليهم هما يعملوا الي هُما عاوزينه و خصوصاً القردة الصغيرة دي إنت فاهم ؟

نوح بسخرية و قلق على تمارة :-
مكملتيش معاهم عشر دقائق و قلبتي ضدي أومال لما تقعدي معاهم علطول اية اللى هيحصل ؟
ذكية بسخرية:-
هنعمل حِلف عليك يا نونو
نوح برق من الكلمة و شه احمر و قال:-
نانا اية نونو دي ؟ اسمي نوح أنا الكينج يتقال لي نونو
جوري بسخرية في نفسها:-
معاك حق دا حتي الدلع خسارة فيك دا إنت عيل رخم
لينا حطت اديها على بوقها و كتمت الضحكة و ذكية بصت ليه و قالت بسخرية:-
على الناس كلها إلا أنا يلا
نوح حط ايدة على دماغه و قال في نفسه:-
كل ما بحاول أصلح و أبين برستيجي تيجي ذكية و تنزله لسابع أرض ، الله المستعان والله
نوح دخل عليهم و هو بينهج و الدكتور وراه و قال بصوت مُتقطع :-
قلبت المستشفى كُلها على دكتورة بس ملقاتشي جبتلك دكتور يمشي الليله
نوح بص ليه و حاول يكتم غيظة بس مقدرش فصرخ في وشه و قال:-
دكتور يمشي الليله اية ؟ هو فرح أمـك ؟
كمال خد نفسه و قال:-
مالك دلوقتي بأمي ما تسبها نايمة في تربتها مرتاحة تقلق منامها لية إنت

نوح ضغط على شفايفه و قال:-
إنت مُستفز و بارد على فكرة
كامل هز رأسه بايجاب و قال و هو بيهز حواجبه عشان ينرفزة أكتر:-
من بعض ما عندكم يا كينج
نوح جز على سنانة و قال:-
تعال قومني عشان نشوف الحُما ر اللي وراك دا هيتنيل يعمل اية
الدكتور عدل من نظارته و قال:-
هو مين دا اللي حُما ر حضرتك تقصدني أنا
قالها و هو بيشاور على نفسه فـ نوح بصله بسخرية و قال:-
و هو في حد واقف وراه غيرك ، أدخل فوقها من غير ما تلمسها
الدكتور ربع ايده و عقد حواجبه و قال:-
إنت بتتكلم كدا ليه ؟ على فكرة أنا دكتور هنا و إنت اللي محتاجني مش العكس ، لا و جبت الجُراة أصلا إنك تشتمني و تغلط فيا ؟
كمال بص ليه و حط ايدة على كتفه و قال:-
عدي يوم يا دكتور و أخلص و متعلقش على اللي بيحصل ولا أي كلمة تتقال ليك ، يعني لو عاوز تروح سليم ، وإلا إنت شكلك بتحب الملاهي وأنا همرجحك قريب
الدكتور بصله و عقد حواجبة بجهل و قال:-
بعيدا عن إني مش فاهم حاجه من ملاهي و مراجيح بتاعتك دي خلينا نخلص عشان عندي مرور
نوح بصله بغيظ و قال :-

إستني لما اجي أقف معاك مش هتلمسها غير تحت عنيا
جوري هبت فيه و قالت:-
في اية عمال تتحكم في البت و تهزق الدكتور من الصبح ليه ، هو مفيش حد قادر ليك وإلا اية ، سيب البت تتفلق عشان واحد مغرور زيك قال اية :-
دكتور و حط ١٠٠ خط تحت دكتور ، إنت عاوز تمشي الكون على مزاجك وإلا اية
لينا حطت اديها على بوقها و قال:-
يلهوي يا جوري دا هياكلك يا حبيبتي ، قولت هولاكو و بيلعب مصارعه و محدش صدقني
نوح يصلها و رفع حاجبة و قال برود:-
إقفي بعيد يا شاطرة و مش عاوز أسمع صوتك تاني لحد ما الزفت دا يخلص
بص لـ كمال اللي كاتم ضحكته و قال:-
خرجها يخويا لحسن تجبلك سكته قلبيه تعال قومني ياض
كمال ساعد نوح أنه يقوم و سنده لحد ما قعد على السرير جنب تمارة
نوح كان بيتالم من الجرح اللي أول ما اتحرك شد عليه بس كالعادة بيكابر بص للدكتور و قال له :-
خمس دقائق لا خمس دقائق كتير دقيقة و نص و تكون مخلص شغلك إنت فاهم ؟
الدكتور نفخ بضيق و قال في سرة :-
ميتين أم دي شغلانة يا جدع ، اية اللى كان دخلني طب بس

كمال همس ليه و هو ماشي و قال:-
نصيبك الاسود ، أكيد عملت حاجه في حياتك عشان ربنا يبتليك بالمهنة دي
الدكتور بص ليه و كمال هز رأسه بايجاب بإستفزاز
الدكتور مسك إيد تمارة و نوح حط ايده على كتفه فـ الدكتور بصله و قال:-
لا كدا مش هعرف أشوف شغلي بقي ، أخرج و ابعتلكم دكتور تاني أنا زهقت
ذكية بصت ليهم و ضحكت جواها و قالت بحدة :-
نوح ابعد ايدك عن الدكتور خليه يشوف شغله ، يُستحسن إنك ترجع على سريك دلوقتي
نوح ساب الدكتور و هو بيبرطم و قال في نفسه:-
ميتين أم دي شغلانة يا جدع
الدكتور كشف على تمارة و قاس ليها الضغط و قال:-
ضغطها واطي جدا
جوري رد عليه بلهفة و قالت:-
ايوة يا دكتور إتبرعت بالدم إمبارح و مأكلتش و إتعلق ليها محلول
الدكتور هز رأسه بتفهم و قام:-
أنا هعلق ليها محلول دلوقتي و باذن الله لما يخلص هتكون كويسة
كمال إستشعر اللهفة من نبرة جوري و جز على سنانه و قال في نفسه:-
أقسم بالله كلمة كمان و هيتمرجح على ايدي
نوح حط ايده على كتفه و قال بشماتة:-

تعيش و تأخد غيرها يا برنس
كمال بصله و عينه بدأت تحمر فنوح كمل :-
بتوجع مش كدا ؟ عشان تبقي تقف تضحك أوي
……..
صلاح كان واقف في صوان العذاء صامد مفيش دمعة واحدة راضية تنزل منه ، بس من جواه نار كفيلة إنها تنهي حرب و هتكون الخساير فيها هي جنود الطرفين ، بقي بيص على اللي حواليه و الرجالة اللي قاعده بتعزي و منم اللي بيسمع القارئ بانتباه و منهم اللي بيتكلموا من تحت لتحت بهمس و منهم اللي بيشرب القهوة
إفتكر منظر أمه و الد.م مغرقها و النار و الحقد اللي جواه بيزيدوا
إنتي اللي عملتي كدا يا فدية و كل دا عشان الكلب بتاعك ؟ ورحمت أمك ما هرتاح غير لما ابعتك ليها ، صبرك عليا إنتي و إبن الكـ ـلب التاني دا ، و الله لخليكم تتمنوا الموت و مش هطلوه و بعد ما أشفي غليلي منكم هبعتكم للرفيق الاعلي يحاسبكم يعني هتتحاسبوا مرتين مرة مني و مرة لما تتشوا في نار جهنم الحمره
القارئ خلص القرآن و الناس بدأت تقوم يسلموا على صلاح و يمشوا

صلاح بقي يسلم عليهم بجمود و مش بادي أي رد فعل أو تعبير على وشة سوي الجمود و اللا مبالاة
بعض الناس بعد ما خرجوا من الصوان بدأوا الهمز و اللمز فمنهم اللي قال:-
هو واقف كدا لية ؟ كأنه مش متأثر بمو.ت أمه ، وإلا يكونش كان مستني فعلاً موتها و يكون متفق مع أخته ؟
– متسئش الظن يا أخي ، الراجل مصدوم لسه و هياخد فترة على ما يفوق من صدمته و يرجع لحياته الطبيعة من تاني
= الله يكون في عونه اللي حصل مش صعب و خاصة إن والدته مامتتش موتة طبيه ، دي ماتت مقتو لة و بأبشع طريقة ممكن تشوفها ، لا و إلا قتلها كمان بنتها و أخته يعني بطارة دلوقتي عند أخته
فرد الراجل الأول و قال:-
أمه أصلا كانت بتاعت مشاكل كل الحارة دلوقتي إفتكرت فتحية و بناتها ، إنت مش متخيل البوستات على الفيس من الصبح نازلة ترف إن حق جوري و تمارة رجع أوي
– مش يمكن في حلقة مفقودة و يكون حرامي قتـ ـلها و خطف فدية ؟
= يمكن و يمكن برضوا زي ما بيقولوا قتـ ـلت أمها و هربت مع عشيقها ، آخر فترة أصلا كانت سريتها على كُل لسان و إنها بنت شمال ، و لما تمارة كشفتها أمها و أخوها عملوا فضيـ ـحة لـيها هي و أخواتها
– عشان كدا بوستات الفيس مكتوب فيها ” يمكرون و يمكر الله و الله خير الماكرين”
= لا خُد الجديدة بقي يا عم ” و عند الله تجتمع الخصوم ”
ضحك الراجل الأول و قال:-
الشعب المصري دا محتاج جنازة و يمشي فيها إلا من رحم ربي طبعاً شفتوا بيقولوا اية ” اية اللى بينكم و بين ربنا يا فتحية انتي و بناتك حتي يتذكركم أهل الحارة ”
= اي دا هي مش كانت ١٠٠ مليون بقت أهل الحارة
– اللي شهدوا على الواقعة يا عم

ضحك الثلاث رجال و كل واحد مشي في طريق
هي دي حال الدنيا كل مبتلي و المبتلي فقد هو اللي بيشيل الهم ، محدش بيحس بحد ولا بيقدر حُزنه ، كله مستني جنازة و يمشي فيها و اعرف دايما إن الناس هتتكلم سواء كان خير أو شر ،عندك مصيبة أو عندك فرح كله هيتكلم لأن ببساطة محدش بيسيب حد في حاله ولازم يتكلموا و ينظروا على كُل حاجة ، لأن الناس دي بتحس بسلام نفسي رهيب لما تعمل كدا ، يعني لو عدي موقف و متكلموش عنه و فصصوه مش هيعرفوا يناموا
……
عدي ساعتين و المحلول خاص و تمارة بدأت تفتح عنيها
حطت اديها على رأسها و قالت بصوت ضغيف:-
اممممم
رهف و لينا جريوا عليها و ذكية مكنتش اتحركت من قدمها كلهم إنتبهوا لـ جوري و هي يتقول:-
إنتي كويسة يا تيمو
تمارة في مرحلة اللاوعي فقالت :-
اممم اية اللى حصل و أنا فين ؟
لينا بصت ليها و قالت:-
أنا كدا إطمنت إنك كويسة يا تمارة ، انتي علطول لما يغمي عليكي بتفقدي الذاكرة
تمارة مش قادره تماطل معاها فقالت بهمس :-

أنا دايخة أوي يا جوري مش قادره أقوم
جوري:- أكيد عشان ضغطك واضي ثواني هنزل أجيب ليكي أكل
ميلت عليها و قالت:-
تمارة أنا مش معايا فلوس انتي معاكي
تمارة هزت راسها بايجاب و قالت:-
في جيب البنطلون
جوري رفعت الغطا من عليها شوية و دخلت اديها في جيب أختها و خرجت منه فلوس و قالت:-
هروح أجيب ليكي أكل

نوح شافهم و محبش يكسفهم فقال بصرامة:-
إنتي راحة فين مفيش خروج من هنا
جوري وقفت و حطت اديها في وسطها و قالت:-
و مين بقي اللي هيمنعني إنت ، لا إنت ملكش كلام عليا
نوح ضحك بإستفزاز و قال:-
متنسيش إني الواصي عليكم إدخلي إقعدي مكانك يا جوري
لينا :- بس يا أبيه تمارة دلوقتي لازم تأكل عشان تقدر تقف
ذكية لجوري:-
تعالي يا بنتي اقعدي بدل ما انتي واقفة كدا بدل ما يجيلك شلل مُبكر
نوح ضحك و قال:-
يا قلب أبيه إنتي يا صغننه الأكل زمانه جاي في الطريق ، شكلك جعانة يا سوسة انتي صح
لينا هزت رأسها بايجاب و قالت:-
ايوة جعانة أوي و لازم نمشي عشان نذاكر الامتحانات خلاص مفيش
ذكية بفضول:-
إنتي في سنه كام يا لينا
أنا في تانية إعدادي و جوري اولي ثانوى و تيمو في تانية ثانوى
فجأة قطع كلامهم الباب اللي خبط و اتفتح و دخل منه اللي عصب نوح و خلي ودانه تحمر
……
على الجهة التانة صلاح جاله تليفون فيعد شوية عن الصوان و فتح الخط و قال:-
ورحمت أمك لندمك على اللي عملته دا ، هبتعتك ليها بس الصبر يا بنت الصر’مة