رواية أواب خديجة الفصل السادس 6 بقلم آية أبو سالم

رواية أواب خديجة الجزء السادس

رواية أواب خديجة البارت السادس

رواية أواب خديجة الحلقة السادسة

-“هو إنتَ مينفعش تاخد النهارده إجازة.”
-“وده ليه إن شاء الله.”
-“حاسه إني متضايقه شويه كده و…”
-مستناش حتى أكمل وكان قام علشان يجهز وينزل
-“كُلنا متدايقين يا خديجة والدنيا فرمانا،إكويلي القميص ده على ما أخرج،بسرعه على ما أخّلص.”
-حسيت كلامه زوِّد من زعلي أكتر يمكن لإنه حتى مسألش ليه بس مش مشكله يمكن فعلاً علشان إحنا لسه الصبح وهو متأخر على الشغل.
_____________________________________
-“طيب هتعرف تجيبلي الطلبات دي وإنتَ جاي على العصر كده ولا انزل أنا.”
-رفع وشه بسرعه وبرقلي
-“لأ،بالله عليكِ لأ،نزول لوحدك لأ بتغرقي في شبر مايه وأنا وعُمير مش فاضيين نُهرش ومش هتصل بأبوكي أقوله روح هات بنتك يا عمي علشان تاهت عند السوبر ماركت اللي ناحية بيتها.”
-يمكن كلامه ضايقني،مش يمكن ده أكيد،لإنه من الأول وهو عارف إني كده وعلشان مش بنزل دايما مخدتش على المكان ف طبيعي أتوه والمنطقه المسافات بينها كبيره.
-“أنا هتصرف يا خديجة وهتصل بأمي تبعت حد من الشباب إختاتي يجيبلك اللي إنت عوزاه للبيت كله،بس لو إنت محتاجه مُستلزمات شخصيه سيبيها وأجبهالك أنا أو ننزل أنا وإنتِ.
-“حاضر،شكراً يا أواب معلش هتعبك.”
-بصلي باستغراب.
-“الشكر لله يا خديجة،أنا نازل يلا السلام عليكم.”
-بمجرد ما نزل حسيت إني هعيط بس خلاص ملهوش لازمه العياط غير إني هجهد نفسي على الفاضي،قرأت وِردي،صليت فروضي،روقت بيتي
_____________________________________
-“أهلاً يا طنط اتفضلي.”
-ازيك يا خديجة عامله ايه،لا ملهوش لازمه الدخول،محمد واقف تحت مستنيني انزله بورقة الطلبات بتاعتك علشان يجيبهالك.”
-“آه،آه،معلش يا طنط حقك عليا تعبتك معايا،طيب اتفضلي ادخلي.”
-“يا بنتي ده أنا طالعه من شقتي يعني مش جايه من مشوار،ادخلي بس هاتي الورقه يلا.”
-“اتفضلي يا طنط،واشكريلي الأستاذ محمد معلش هتعبه.”
-“ولا تعب ولا حاجه يابنتي،افتحي بس تليفونك علشان مش هقدر اطلع السلم تاني،علشان لما ييجي هيسيبهم قدام الباب وهينزل.”
-“حاضر،حقك عليا والله نسيته حاضر.”
_____________________________________
-“خديجة عندي ضغط في الشغل النهارده مش هعرف آجي أفطر معاكي.”
-كانت رساله منه شوفتها وأنا قاعده مستنياه على الفطار علشان نفطر مع بعض بس هو مجاش زي أغلب الأيام اللي فاتت اتنهدت وأنا بكتبله.
-“طيب ارجع خُد علبة أكل ليك ولعُمير وارجع تاني علشان تعرف تفطر حلو.”
-رد بعدها بفتره
-“لا خلاص طلبنا جاهز.”
-محستش إني عاوزه أكل لميت كل حاجه رجعتها مكانها وقفت صليت المغرب قرأت شوية قرآن وبالي مشغول من الوضع اللي وصلناله.
“ايه اللي حصل؟”
_____________________________________
-“اتأخرت كده ليه قلقتني عليك وتليفونك مُغلق وعُمير كمان،خُفت اتصل بماما تقلق هي كمان لو كانت نامت.”
-محستش بنفسي وأنا بقول كل اللي كان مخوفني وهو مش موجود بصّ كإنه اتفاجئ إنّي لسه صاحيه.
-“لسه صاحيه ليه،زمانك صدعتي يا خديجة ودماغك هتفضل وجعاكِ،ما إنتِ عارفه بخرج من الشغل ده على الشغل ده ونسيت التليفون،ده أنا حتى استغربت إنتِ إزاي متطمنتيش ده كله كنت هكلمك لقيت التليفون فصل.”
-اتنهدت وأنا بقعد تاني على الكنبه.
-“طيب الحمد لله كويس إنك بخير،الحمد لله على سلامتك،ادخل خدلك حمام وغيّر على ما احضرلك السحور وناكل.”
-رد وهو رايح الأوضه.
-“لأ كُلي إنتِ، أنا اتسحرت مع زمايلي في الشغل.”
-“بس أنا كُنت مستنيه نتسحر حتى مع بعض ونقعد…”
-“خديجة أنا يدوبك أنام دلوقتي وأصحى على صلاة الفجر أنزل أصلي واطلع،لو مصحتش ابقي صحيني.”
-مسكتش وقتها غير عشان أنا عارفه إنه بيفضل طول اليوم من ده لده ومن شغل لشغل لشغل لإني عارفه شغلهم عباره عن ايه،عُمير كان مطحون قدامي فيه وهو مسئول عن نفسه ف حد زي أواب شايل ده كله لوحده المفروض يعمل إيه،اتوضيت وصليت قيام وقبل الفجر .
-“أواب ممكن تصحى.”
-“خديجة أنا لو منمتش دلوقتي،مصر هتزعل سيبيني أنام يا خديجة.”
-“بس إنت لو مقومتش دلوقتي خديجة اللي هتزعل يا أواب هتسيب خديجة تزعل.”
-على ماستوعب الجمله قام وهو مش فايق.
-“خدت علبة الزبادي وبدأت أئكله في بوئه وهو مامض وبيبلع بس لإني عارفه إن معدته بتتعبه من الصيام وهو بيبذل جهده في الشغل ويطلع عينه علشان يجيب جنيه حلال.”
-“بدأت أشربه عصير وأي حاجه سهلة البلع.”
-فتح عينه وابتسم.
-“مُعاملة عيّل عنده سنتين وبيتفطم،بس على قلبي زي العسل،مش عارف أنا كنت هعمل إيه من غيرك والله.”
-طبطبت على كتفه.
-“شكلك كان تعبان لما جيت،وعارفه إنك زيي مبترتاحش مع أغراب فتوقعت إنك متكونش كلت كويس.”
-“والله يا خديجة أنا لو مُت اعرفي إن قلبي وربي راضيين عنك.”
-“طيب يلا ياعم الحاج،قوم اجهز عشان الفجر خلاص هيأذن ،وإنتَ لو نمت تاني مش هتصحى تاني بعدها،يلا قوم ربنا يراضيك ويرضى عنك.”
-“الشغل متعب أوي،عاوز آخد نفسي ومش عارف حتى ومخنوق وما يعلم باللي أنا فيه إلا ربنا بجد.”
-“معلش يا أواب معلش مسيرها يوم ربنا يفرجها وتتحل،معلش.”
-“أُمي قالتلي تليفونك كان مقفول النهارده وطلعتلك،احنا قولنا إيه على موضوع قفل التليفون ده.”
-“يا أواب والله بيعطّلني وبفضل قاعده عليه ف بقفله مش بعند معاك يعني،وإنتَ عارف إني دماغي مش صُغيرة علشان أعمل لعب العيال ده.”
-“طيب لو عليّا هقدر اتصرف وهطلع واتحرك،إنمّا بالنسبه للستّ الكبيرة اللي اضطرت تطلعلك دورين دي إيه وضعها،مش معقول كل ما حضرتك تحتاجي حاجه وتقفلي تليفونك تطلعلك وإنتِ عارفه إنها تعبانه أصلاً وبتمشي بالعافيه.”
-“أواب إنتَ أكيد عارف إن أنا مش قصدي والله فيه إيه لدخ كله طيب،مش هقفله تاني حاضر.”
-“قولتي كده قبل كده،مش عارفه تسيطري على نفسك يبقى نسحبه منك زي العيال الصُغيره ونجيبلك واحد صغير تستخدميه يدوبك نعرف نكلمك.”
-بيِجرح فيا وبيهِنّي!!! أواب بيِجرح فيا وبيهِنّي،ثواني ده ،أواب!!!!!
-طيب معلش يا أواب إنتَ دلوقتي متعصب ومش مركز ممكن نتكلم بعدين أنا هخرج أخرج الح…”
-وفعلا شلت الحاجه وكنت خارجه
-تعالي هنا هو إيه اللي متعصب ومش مركز هو أنا مجذوب ولا بشد في شعري أُقفي كلميني زي ما بكلمك.
-الصينيه وقعت من إيدي اتكسرت والحاجه بهدلت السجاده والأرضيه،وقفت قدامه وأنا بكتم دموعي اللي نجحت إني أعمل كده فعلاً المره دي،ووقفت بهدوء اسمعه.
-“نعم يا أواب اتفضل،أنا سمعاك.”
-“أنا زهقت من كُتر الكلام ما بيتعاد، يا خديجة لو سمحتي كده مينفعش علشان إنتِ..”
-“طيب يا أواب،لو سمحت بيعه وهاتلي تليفون عادي اتكلم منه أنا موافقه ولو على فلوسه الباقيه ف مش مشكله مش هعمل بيها حاجه ف براحتك ،أنا مش عوزاه أصلاً.”
-صوت واحد جوايا بيردد رُدي عليه خدي حقك متسكتلهوش،ساكته ليه،ليييه،ردي،فوقيه،عرفيه إن اللي بيعمله ده غلط،قوليله إنك عاوزه تعيطي من اللي بيعمله فيكِ.
-تجاهلت أي حاجه حواليا حالياً مش عاوزه أي حاجه غير إني أبعد اتوصيت ودخلت أوضة الأطفال صليت وأخيراً الفجر أذن صليت الفجر ودخلت أنضف الحاجة اللي وقعت في الأوضه لقيته شالها أصلاً.
-جهزت لبسه بهدوء شوفت إيه مش مكوي وكويت بسرعه علشان هيخلص صلاة ويرجع يلبس وينزل للشغل ودخلت سريري ونمت من التعب بس المره دي جسدي ونفسي.
__________________________________________
-“السلام عليكم ورحمة الله وبركاته يا أمي،عامله إيه،ممكن لوسمحتي تبعتيلي علبة تليفوني والضمان والفاتورة بتاعت الفرع مع عُمير هم في درج مكتبي بس بالله عليكِ يا ماما هنا على البيت ماشي،يلا سلام عليكم.”
-“عاوزه حاجه من تحت؟”
-كانت رساله منه.
-“لا شكراً،البيت الحمد لله فيه كل حاجه.”
-“إنتِ مش عاوزه حاجه من بتاعتك يا خديجة.”
-“لأ والله شكراً.”
-شوية وكان طلع في إيده كيس كبير من بتوع السوبر ماركت وأنا قاعده بلف السمبوسك وكمان جاي العصر يعني جاي بدري ساعتين.
-“دي سمبوسك إيه؟”
-رديت بهدوء
-“مكس جبن.”
-“بس أنا عاوزها لحمه مفرومه.”
-“حاضر.”
-مسكت كل اللي كنت عملته وبدأت افك كله ماعدا اتنين براحه تاني.
-جه قعد جمبي واستغرب.
-“بتفكيهم ليه،باظوا منك ولا إيه.”
-رديت بهدوء
-“لأ علشان مفيش غيرهم وجهزت الحشوه التانيه وإنت عاوز لحمه هعملك اللي إنتَ عاوزه.”
-“شكراً يا خديجة،و يعني أنااا بصراحه…”
-رديت عليه براحه وانا بلملم اللي مش هحتاجه
-“معلش يا أواب،هدخل أشوف اللي على البوتوجاز علشان ميبوظش وهرجع على طول ولو حابب غيّر هدومك.”
-ماشي.”
-“هتنقلي الأطباق أنقلهم معاكِ؟”
-“آه،كلهم على الصينيه دي.”
-“تعالي أنا هشيلها.”
_____________________________________
-“اتوضيتي؟”
-هزيت راسي بآه
-“هصلي المغرب هنا وهبقى أنزل أصلي العشاء والتراويح تحت في المسجد.”
-“لو هتعدي على مامتك ابقى إديها الطبق اللي في التلاجه ده ليهم تحت وقولها إني آسفه علشان تعبتها.”
-“حاضر يا خديجة.”
-“السلام عليكم ورحمة الله.”
-“السلام عليكم ورحمة الله.”
-“مش عاوزه تيجي تصلي معايا التراويح النهارده؟”
-“هزيت راسي لأ.”
-“ده أنا ما بصدق أئجز عشان ننزل نصلي ونتمشى بعد الفطار.”
-“معلش مش هينفع والله،علشان مستنيه حاجه.”
-“طيب يا خديجة براحتك،جهزي حاجة الجماعة أنا هلبس وأنزل.”
-“هجهزهالك على السفره جمب الباب،أنا هدخل المطبخ.”
-“طيب يا خديجة،طيب.”
_________________________________________
-“إنتِ بهتانه كده ليه يابت إنتِ،الواد ده بيعمل فيكي إيه.”
-كان عُمير وردود فعله الغير مُتوقعه أول ما فتحتله الباب
-“ياعم كويسه والله تعالى ادخل،عملاله بسبوسه من اللي بتحبها والشاي بلبن على النار.”
-“ده إيه الدلع ده،آه من أيام الدلع الجميل آه،سرقك مني والله.”
-“يابني ده جوزي يابني هو إنت بتتكلم عن حرامي.”
-“اقعد على الكنبه دي عشان إنت واحشني وقولي بما إنك مهندس ونبغه وعلامه إيه رأيك في الديكور العظيم ده.”
-“مش إنتِ اللي إختارتيه يبقى جامد بلا نقاش وياخد الأوسكار كمان.”
-“البسبوسه دي أنا عملتها مخصوص علشانك مشترتهاش جاهزه علشان عارفه إنك بتحبها من إيدي يا عُمير.”
-ابتسم بحنين
-“كانت أيام والله،كل ما كنت أفرح على حاجه أد كده متستاهلش الاقيكي داخله عملهالي وجابه تغني وتزقططي وتفرحي وتنطي جمبي طول عمرك حنينه.”
-“استنى هدخل اجبلك منها واجبلط الشاي بلبن تعالى معايا.”
-“دخلي علبة التليفون الأول بعيد عن المطبخ بس علشان متبوظش وأنا هروح على المطبخ،يلا.”
-دخلنا المطبخ وبدأ يعمل معايا وأنا بقوله على أماكن الحاجه.
-“ده الشغل ده مرار يابت ياخديجة والله ببقى عاوز استقيل واتجوز اقعد في البيت واشوف حد يبقى يصرف عليا أنا وهي بجد.”
-ضحكت وأنا بحاول أخرج منه بتفسيرات لتصرفات أيوب بس من غير ما أبينله إن في مشكله بيننا.
-” وده ليه ده كله،مصر كلها بتتعاقد مع الشركه اللي بتشتغلوا فيها.”
-“لأ يختي،الفروع بتاعتهم بتكتر ف بيختاروا الكفاءات يسفروهم،حتى جوزك كان هيسافر لولا حد وقفله فيها.”
-“هيسافر؟،هيسافر إزاي يعني؟”
-“أنا مخدتش بالي، إنتِ متعرفيش ولا إيه.”
-رديت وأنا بحاول أبررله.
-“أواب أصلاً بقاله كام يوم ياعيني مطحون من شغله هنا لشغله هنا وحاله يصعب على. الدنيا كلها وإنت معاه هنا ومعاه هنا وشايف وضعه،ربنا يرزقه الحمل تقيل عليه.”
-“ربنا يقويه ويقوينا يا دوجه،ممكن بأه نخرج ناكل الحاجات الحلوه بتاعتنا،علشان أمشي قبل ما جوزك يطلع علشان مش عاوز أشوف وشه.”
-“يابني بأه يابني،بلاش جو الإخوه الأعداء ده وإنت روحك فيه.”
-“أيوه بس مش هستحمل أشوفه تلت مرات في اليوم،ده أنا حمدت ربنا إنه مجاش غير اربع خمس ساعات ومشي.”
-“يلّا بطل تتكلم على جوزي كده يلا،كُل يلا بأه من الحلويات اللي عملهالك بفلوس جوزي وقولي إيه رأيك.”
-بصلي بقرف بعد ما داق
-“والله ميزتها الوحيده إن إنتِ اللي عملتيها وإيدك جت فيها يادوجه.”
-“إنت وحشتني أوي هو أما ممكن أعيط في حضنك.”
-بصّلي وحضني، ومع أول تربيته بدأت أعيط من غير ما أحس بنفسي وهو بس بيربت على كتفي ويحضني.
-“طيب ممكن تهدي بأه،مش أنا كنت عندك من أربع أيام واتطمنت عليكي وقعدت معاكِ في إيه بأه،إتخانقتي إنتِ وأواب طيب؟،طيب إنتِ كويسه؟،لو أواب مزعلك أنا هتصرف معاه والله متزعليش ومش هضايقه علشانك.،طيب هو إنتِ زعلتي علشان بهزر وأضايق جوزك طيب بطلي عياط ومش هضايقه تاني،قوليلي عاوزه إيه يا خديجة، تعبانه طيب اتصلك بماما؟.”
-بعدت شويه
-“لأ،أنا كنت متضايقه علشان حاجات كتير كانت فوق بعض بس مش أكتر.”
-“طيب وإنتِ ليه تسيبيها لحد ما تبقى فوق بعض وتضايقك يا خديجة،مش اتكلمنا في الموضوع ده قبل كده،مش قولتلك متقعديش تراكمي جواكِ كده عشان في الآخر بيتعبك إنتِ ينفع كده يعني،تعالي يلا خدي حضن تاني.”
-“والله ما عارفه يا عُمير أنا من غير حنيتك من وأنا صغيره كنت هكبر وأبقى كده إزاي.”
-ضحك وهو بيضمني أكتر.
-“كانو هيخلوكي تبيعي فُل في الإشارات.”
-ضحكت وكنت لسه هرد دخل أواب.
-السلام عليكم ورحمة الله وبركاته،يابني إنت ورايا ورايا حتى اليوم اللي أجزت فيه وبعدت عنك،آجي الاقيك حاضن مراتي.
-“وعليكم السلام ورحمة الله وبركاته،شوفت بأه مش هسيبهولك تهنى بيها لوحدك دي دوجه برضو.”
-رديت عليهم.
-“وعليكم السلام ورحمة الله وبركاته،تعالى يا أواب أقعد هحطلك بسبوسه وشاي بلبن إنت مكلتش منها قبل ما تنزل.”
-دخلت على المطبخ من غير ماستنى رد حتى،مش عاوزه اسمع حاجه قدام عُمير علشان مش عوزاه يفهم حاجه عن الموضوع علشان عوزاه يتحل بينا طالما ممكن يتحل بيننا.
_____________________________________
-“أنا هقعد معاكم ولا عاوزه أسمع تصميم مش عارفه إيه ولا تسليم إيه ولا إيه خارجي ولا أُفقي ولا رأسي،الحاجات دي لما بسمعها بتدايق وبصدع،افصلوا عنها شويه.”
-قولتها وأنا بحط الضيافه قدامهم وللحظه احتارت هقعد فين ف جبت كرسي وقعدت عليه قدامهم الإتنين.
-“والله يا أواب كنت لسه في إعدادي هندسه كانت تشوف ورقي تزغلل وتخرج تقول لماما عيني مزغلله هاتيلي القطره.”
-ضحكت على الذكرى اللي لحد دلوقتي كل مره يفكرني بيها وقولت بتمثيل.
-“أنا ست تَربويه فاضله ولسه بدرس وصغننه وفي ريعان شبابي ليه أروح أعقد نفسي،لا يفتح الله،انا مرتاحه مع تخصصي وهو مرتاح معايا.”
-“طيب بالرفاء والبنين يختي.”
-“يا عُمير بطل تريقه عليا.”
-“كل واحد وميوله يا عُمير،سيبها في حالها،اعتقها،إنت مش سايب حد في حاله خالص كده.”
-“ياعم ماشي ياعم.”
-“دوجه،أنا همشي وهبقى اجيلك كمان يومين كده ماشي.”
-حضنته كإني بخرج كل الطاقه السلبيه اللي جوايا.
-“ماشي يا حبيبي،ابقى طمني عليك،وإدي بابا وماما البسبوسه دي متقلقش مستئذنه أواب.”
-شد خدودي وأواب واقف يتفرج بس.
-“خديجة إنتِ متربيه أوي،مش عارف بجد عايشه مع الواد ده إزاي،بس ده ميمنعش إنه هو كمان طيب ومتربي وبن حلال زيك.”
-أواب سلم عليه بهدوء
-“نورت الحبه دول.”
-وكعادتي معاه وقفت على السلم
-“طمنا عليك لما توصل يا عمّوري وسلملي عليهم وخليهم ياكلوها مع شاي بلبن زي اللي أنا بعمله وبوسهملي.”
-شدني ورزع الباب.
-“صوتك يا ماما صوتك،الشباب كلهم زمانهم سمعوكي.”
-بصتله شويه بهدوء وسابتي ودخل وأنا لسه مكاني
-“معرفتنيش ليه إنه جاي.”
-قعدت قدامه
-“كان جاي يديني حاجه طلبتها من ماما تبعتهالي.”
-“حاجة إيه،إنت ناقصك حاجه!،ولما ناقصك حاجه مش المفروض تطلبي من جوزك!!”
-قومت وأنا بقول
-“ثواني يا أواب وجايه.”
-رجعت وأنا ماسكه الكيس بضهره علشان ميبانش،وانا عارفه إنه مش هيعملها بس عاوزه أعرف نهاية الموضوع ده هتبقى إيه حطيتهم في إيده وقعدت.
-“ده إيه ده كمان.”
-“اللي قولت لماما تبعتهولي علبة الموبايل وفاتورة الشراء وضمان المكان،هو لسه في الضمان.”
-“باظ يعني عاوزه تصلحيه؟”
-“لأ،هبيعه.”
-رفع حاجبه.
-“والله،وده منك لنفسك كده هتبيعيه ولا إيه.”
-رديت لهدوء كنت أقصد أمثله.
-“لأ بس إحنا اتفقنا إنك هتبيعه وتجيبلي تليفون صُغير عادي ،وباقي الفلوس معلش أنا هاخدها أرجعها لعُمير لإنه كان جايبهولي هديه،أو الأحسن هاتلي إنت تليفون صغير وأنا هعين ده علشان هديه منه وانا مش حابه أفرّط فيها علشان مبيهونش عليا أفرط في حاجه بحبها.”
-“آه وأنا إمتى قولت الكلام ده.”
-“إمبارح الفجر.”
-“وأنا وضعي كان عامل إزاي.”
-“يعني إيه عامل إزاي.”
-برّق وهو بيتنفض من على الكنبه ورجع قعد على الكنبه تاني.
-“يعني كنت متعصب يا خديجة،مش شايف قدامِ يا خديجة،عفاريت الدنيا بتتنطط قدامِ يا خديجة.”
-مقدرتش أقول غير خمس كلمات بالعدد.
-“إنت شايف كده صح طيب؟”
-“وإنتِ صح لما تشتكيني لأخوكِ من عير ما تقعدي تفهميني زعلانه مني علشان إيه ونقعد نفهم في بعض ونخلّي سرنا في بيتنا وبيننا.”
-حاولت اتمالك أعصابي.
-“بس أنا أصلاً مقولتش لعُمير حاجه ولا حكيتله حاجه،وقبل ماترد عليا أنا مش هكذب يا أواب،ومعرفش إنت متغير معايا ليه،ماشي مضغوط في الشغل أنا والله مقدّره ده،وبحاول أتجنب إني آجي عليك أنا كمان،بس أنا مش متعودة على مُعاملة الأيام اللي فاتت دي وخاصة منك إنتَ،وده مش شكل علاقتنا،ماشي،عارفه إنك مش دايماً هتكون نفس الإنسان بنفس الشخصيه وردود الفعل بس على الأقل خليك أواب اللي اتجوزته يا أواب.”
-قولت كل اللي في نفسي براحه وبهدوء معلّتش صوتي عشان معملش مُشكلة تانيه،مدايقتهوش بالكلام،مجرحتش فيه.
-“أنا عارف إني كنت ضاغطك الأيام اللي فاتت وجاي عليكِ فعلاً،وحاولت أصالحك والله،ولما جيت أصالحك سبتيني ورُحتي المطبخ ولما باجي أكلمك مش بتردي عليا حلو.”
-“أنا مبردش عليك حلو يا أواب أنا ،والله عمرها ما حصلت من يوم ما عرفنا بعض ولو كان فيه إيه بيننا،بس والله أنا فعلاً رُحت علشان الأكل كان هيبوظ وكان لازم أدخل أشوفه علشان ميعاد الفطار قرب،وأنا فعلاً مكنتش أعرف إنك بتصالحني.”
-“طيب خلاص كده اتصالحنا،صح يا خديجة.”
-أواب هو أواب.
-“آه يا أواب،بس متعاملنيش المعامله دي تاني لو سمحت ولا تقلل مني كده علشان بتدايق والله وبتصعب عليا نفسي منك ومن كلامك.”
-“أنا مبخدش بالي من كلامي يا خديجة ف لما تزعلي مني عرفيني ووالله حقك عليا أنا ميهونش عليا،ولما تزعلي تاني عرفيني تاني وتالت ورابع وهفضل أقولك حقك عليا يا خديجة والله علشان حقك عليا يا خديجة أنا طول عمري كده بس هحاول آخد بالي معاكِ حاضر.”
-“خلاص حصل خير.”
-“يلا قومي نجيب بسبوسه تاني علشان طعمها حلو.”
متنسوش تتابعوني ،أهم حاجه بس متتعطلوش عن العباده. لا تنسوني من صالح دعائكم.
-الحياة مش هتبقى كلها حنية ودلع وطبطبه بيننا وبين شُركاء حياتنا بتكون أيام وأيام أنا أشيل عنك حمل الأيام شويه إنت تشيل عني أيام تانيه شويه وهتعدي طول ما هيكون في عقل نلتمس بيه بدل العُذر مِيه.