رواية أمير وبتول الفصل الثاني 2 بقلم ميرنا ناصر

رواية أمير وبتول البارت الثاني

رواية أمير وبتول الجزء الثاني

رواية أمير وبتول الحلقة الثانية

= ها إيـه رأيك؟!
_ رأيى إيه يابتول .. منزلانى فى البرد ومقعدانا على الرصيف ، عشان تقولي لى إيه رأيك؟
= مفيش رومانسية خالص خالص! .
_ بتول الساعة تسعة، انتِ نزلتِ من البيت من غير ماتقولي لى.
= خناقة.. خناقة.. أغيثونا.. الحقونا.
_ بتول وطى صوتك احنا فى شارع.
= أمير ياحبيبى احنا ساكنين فى عمارة واحدة.. ونزلت اقابلك فى رصيف الشارع والجو رومانسى.
_ رومانسى..اه بتول انا نشفت والله بصى ركبى بتخبط فى بعض.
= عارف لما بكون مخنوقة بطلع فى البلكونة فى عز التلج وبتنفس بهدوء ببدأ وقتها بحس إنى مليانة أكسجين وإنى انا
_ انا سبت الشغل.
= ايـه؟!!
_ سبت الشغل يابتول، أكيد دلوقت هتفكرى فى حاجات كتير.. وعارف إنى كل الحاجات اللى هتفكرى فيها هكون غلطان فيها فعلا وهيكون معاكِ حق بس انا من الصبح مش عايز نتكلم ولا نتقابل عشان السبب ده.
= مع إنى لما بتحصلى كارثة اول واحد بجرى ليه إنت حتى لو مش بعرف احكى او مبحكيش فى وقتها، بس بجرى بسرعه برن عليك او اقابلك عشان صوتك بيحضن خوفى وبيهدينى.
_ أكيد مخنوقة وبتقولى عليا أهوج وفاشل ؟
=أمير، إيـه الحاجات الكتيـر اللى هفكر فيها وهتطلع غلطان؟.
_ إنى سيبت الشغل واحنا فى فرحنا بعد كام شهر، وعيد ميلادك بعد إسبوع، وان سبته ومرجعتش أخد رأيك .ودا غلط مش طبعنا فى العلاقة اللى بينا.
كل القرارات مشتركة بينا وبناخدها سوا.. انا غلطان فى كل ده انا عارف.
= أكيد عندك دافع قوى خلاك عملت كل ده.. انا مش زعلانه من أى حاجة من دول زعلى الحقيقى على حكمك عليا بإنى هشوفك فاشل وأهوج، مع إنى بشوفك أنجح إنسان فى الدنيا يا أمير.
_ النهاردة المدير إتعصب عليا جدا،انا فهمته إن البورصة يوم معانا ويوم عليا وإن أسهم شركة البن هتنقص وإن من الاحتياط نعمل خطوات معينة هو مقتنعش ولما حصل كان عايز يشيلنى الخسارة وان دا إهمال منى عشان منظره قدام الموظفين.. فـ إتعصبت وقولت له إنى هسيب الشغل وفى لحظه قالى وانا قبلت إستقالتك.
= إيه سكتت ليه، انا مسكت ايدك عادى كمل وايه كمان؟
_ انا فى لحظة إتغدر بيا، إتغدر بيا يابتول.. الفكرة إنه عارف إنى فرحى كمان كام شهر.. المدير دا يبقى صاحبى انتِ فاهمه الفكرة.. أيمن عارف إنى فى أمس الحاجة للشغل.
= مش صاحبك يا أمير دا مش صاحبك، دا بيغير منك فى كل حاجة، وبيحقد عليك، وبيتعب من نجاحك، وبيغير من نظرة الموظفين ليك فى نجاحك وتفوقك وإنك الأحق لمكان الادارة مش هو.. بس إنت دايما كنت بتقول جملة مهمة.. علمتنى بيها درس مهم جدًا.
_ جملة إيـه؟
= كله خير.. مليون مبروك ياروح قلبى.
_ انتِ عبيطة يابتول بقولك سبت الشغل،مش إتعينت.
= لا مش عبيطة.. اللحظة دى انا مستنياها من زمان..انت من حقك تفتح الشركة بتاعتك انت…وتكون انت المدير نبنيها وحدة وحدة..ونطلع كل سلم نجاح سوا.
_ تانى يابتول ؟
= وعاشر ، ليه خايف.. انت قدها، انت أصلا اللى شايل شركة أيمن دى كلها.
_ تعالى نفترض ان هعمل كدا، طيب منين..هبيع الشقه، ولا هنلغى الفرح ولا.. إيـه بس الوقت غلط جدا.
= بالعكس دا الوقت المظبوط.. الدهب سعره رفع جدا يعنى الدهب اللى معايا حاليا يفتحوا ليك شركة محترمة صغنونة قمر كدا شبهك.
_ لا طبعا دهبك؟! هبيعهولك من قبل مانتجوز؟!
= ياسيدى انا حرة.
_ يلا نطلع.. انا هقدم من بكره على شغل وهتتحل.
= لا مش هنكرر الغلط تانى.. ياسيدى عندى حل نبقى شركاء انا برأس المال وانت بالمجهود واتعلم وافهم منك ونكون سوا ونكبر بقا ياولا يا أمير.. ونبقى من الناس المهمين اللى بيلبسوا بدل دول.. موافق؟
_ بتول..
= عيونها.. موافق توكلنا على الله.. اما هدية عيد ميلادى بقا فى حتة هودى عندك فى الدولاب هموت عليه والله.. أظن جه الوقت اللى أخده بقا
_ الهودى وصاحب الهودى، وعيون صاحب الهودى.
= أيـه رأيك بقى فى رومانسية الجو.. إيه بتبص ليا كدا ليه؟
_ ‏ ‎مره صاحبة ومره حبيبة وألف مره وطن وأمان..بحبك