رواية البر التاني الفصل الأول 1 بقلم لولو محمد
رواية البر التاني الجزء الأول
رواية البر التاني البارت الأول
رواية البر التاني الحلقة الأولى
فى احد الاحياء بيت خمس ادوار الدور شقتين الباب لزق فى الباب فى الدور التالت
شقه ١
ست تدخل تصحى بنت جميله نايمه
الست / هند هند حبيبتي اصحى عشان الجامعه يا حبيبتي المحاضره هتفوتك يا ماما اصحي
هند و هى نايمه / صحيت يا ماما
الست تمشي تروح اوضه تانيه تلاقي ولد نايم و الكتاب فى حضنه
الست / بيدو اصحي عبد الله عبد الله حبيبي اصحي
عبد الله يفوق و الست عماله ترتب فى الاوضه
عبد الله / يا ماما قولت مليون مره ما تغيريش مكان الحاجه برجع ادوخ عليها
الست / يعني هو انت كدا ما بتدوخش على الحاجه فى الكركبه دى
عبد الله / لا ما بدوخش انا عارف كل ورقه حاطتها فين ما تغيريليش النظام
الست / طب ممكن لو سمحت تظبط نظامك عشان منظره بيعصبني
عبد الله / لما اخلص امتحانات اوعدك ان شاء الله ان شاء الله انى هولع فى كل الكتب و الورق ده و اخليهالك فله
الست / طب ابوس ايدك تولع فيهم بره مش زى السنه اللى فاتت النار مسكت فى الستاير و كنت هتولع فينا كلنا
عبد الله / يادى الستاير اللى ماسكينهالى ما ياسمينا اللى فتحت البلكونه اعمل ايه يعني
الست / انت مش عندك درس ما تقوم تتحرك و تغسل وشك و تبطل رغي حكم انا عرفاك تفضل ترغى و ما تفصلش
عبد الله / كدا هى دى اخرتها ماشي يا ست الكل حقك حقك تعملى اكتر من كدا
عبد الله يقوم يلبس الشبشب و يقوم يلاقي هند بتعدى تدخل الحمام يحاول يسبقها ما يلحقش
عبد الله / عاجبك رغيك ده يا ست الكل كدا مش هندخل الحمام النهرده
الست تيجي تخبط على الحمام
الست / استعجلى يا هند
راجل يطلع من اوضه و الست تدخل المطبخ
الراجل / كام مره اقول اسمه بيت الراحه ما تخبطوش على اللى جوه
عبد الله / ما فى ناس تانيه من حقها تستريح برده يا بابا
الراجل / اصحي بدرى و ادخل استريح براحتك و اهو بالمره تنزل تصلى معايا الفجر
عبد الله / ماشي يا بابا … لم تخلصي ابقي صحيني بقي يا ست هند
مفيش صوت
عبد الله / طب والله بتكمل نوم جوه
عبد الله يرجع اوضته
الراجل / انا نازل يا شيري هتعوزى حاجه
صوت الست من المطبخ
شيري / لا يا حبيبي خد بالك من نفسك
الراجل ينزل على السلم يقابل شاب طويل و عريض و بدقن شايل كيس فيه سندوتشات و على الايد التانيه قميص و بنطلون من المكوجى
الشاب / صباح الخير يا حج ابو عبد الله اتفضل افطر
الشاب يطلع ساندوتش يديه للراجل
الراجل / سبقتك الف هنا يا مختار يا حبيبي الا ما شوفتكش يعني فى صلاه الفجر زى كل يوم من يوم ما سكنت طب دا انا كنت بانبسط اوى لما اشوفك
مختار / صليت فى المسجد اللى ورا عشان اللحق عم عرفه المكوجى عشان نسيت اعدى بالليل اخد الهدوم
الراجل / و رضي يفتحلك
مختار / والله روحت معاه البيت يجيب مفتاح الدكان و رجعت معاه الدكان دا انا كنت هعيطله على القميص و البنطلون
الراجل / الراجل ده كويس و رخيص بس عيبه المواعيد يفتح متاخر و يقفل بدرى و مش مهم الناس
مختار / على قد صحته برده يا حج
الراجل / ربنا يكملك بعقلك على العموم لو اتحطيت فى الموقف ده تاني ابقي هات الحاجه لام عبد الله تدوسلك عليها
مختار / ما نتحرمش هستاذنك البس قبل ما اتاخر
الراجل / بالسلامه يا حبيبي
الراجل ينزل و مختار يطلع يدخل الشقه اللى جنب شقه عبد الله لزق و بجرد ما يقفل الباب عبد الله يفتح الباب و يلبس الجزمه و شيرى واقفه جنبه
عبد الله / انتى تنسي الحبايه و انا اعملها على روحى ابقي ادخل الحمام فى الدرس بقي
شيرى / اتلم يا واد بطل قله ادب و بعدين ياسمينا ما بتطولش زى هند دلوقت تلاقيها خرجت
عبد الله / بابا يقول تضحكى انا اقول تقولى بطل قله ادب
شيرى / ابوك يقول اللى هو عاوزه الله مش ابوك
شيري تبص جوه
شيرى / ياسمينا خرجت من الحمام اهو
عبد الله يدخل بالجزمه
شيرى / الجزمه يا جزمه
عبد الله ما يردش و يجرى على الحمام
……………….
فى شقه مختار
مختار قاعد بيفطر قدام التليفزيون على الاخبار و جنبه كبايه شاى تليفونه يرن يبتسم و يرد
مختار / سلام عليكم
صوت ست / صباح الخير يا حبيبي فطرت
مختار / فطرت يا ست الكل و هقوم اللبس و انزل اروح الكليه اهو
الست / هتيجي بكره ان شاء الله
مختار / ان شاء الله حضريلى بقي لقمه طريه لحسن انا بطنى نشفت
الست / دا انا بجهز فى الاكل من امبارح
مختار / احلى انتصار دى و لا ايه
انتصار / ههههههههههههههههههههههههه اسكت البت مريم بقت مسكهالى فى الداخله و الطالعه
مختار / راحت المدرسه و لا لسه
انتصار / نزلت من بدرى كلهم نزلوا اللى راح مدرسته و اللى راح على شغله انا بس قولت اطمن عليك قبل ما اتلخم فى المطبخ
مختار / او فى مشاكل الحريم اللى ما بتخلصش
انتصار / و لا عمرها هتخلص خليك انت فى كليتك و سوق على مهلك و تعلالى
مختار / من عيني حاضر
انتصار / مع السلامه يا حبيبي
مختار / سلام
مختار يقوم يشيل الكيس و كبايه الشاى يدخلهم المطبخ و يفتح الباب و يلبس جزمته يلاقي شاب طالع
مختار / صباح الخير يا يوسف
يوسف / صباح الخير يا مختار عامل ايه عملت البحث
يوسف يضرب الجرس على شقه عبد الله
مختار / انا سلمته امبارح
يوسف / ايه السرعه دى يا ابني
مختار / انت لسه ما عملتوش
يوسف / هعدى النهرده بعد الكليه اعمله مع هند
مختار يهز راسه و يوسف يضرب الجرس تانى بعنف و مختار متابعه
مختار / انا هستاذنك عشان ما اتاخرش
يوسف / لو لقيت مكان احجزلنا
مختار / حاضر
مختار يمشي و يوسف يضرب الجرس تاني هند تفتح لابسه بلوزه حمره طويله على بنطلون جينز و طرحه حمره
هند / فى ايه تيت تيت تيت بظبط الطرحه فى ايه
يوسف / ايه القرف اللى انتى لبساه ده مش قولتلك مليون مره ما تلبسيش البلوزه دى
هند / و بابا قالى اللبسها هسمع كلامك و لا كلام بابا
هند تطلع و تقفل باب الشقه
يوسف / اسمعى الكلام يا هند و خشي غيرى بالزوق احسنلك
هند تسيبه و تنزل يجرى وراها و يشدها من ايدها
يوسف / ما تخلينيش اتغابي عليكي على الصبح
هند تشد ايدها
هند / قسما بالله لو الحركه دى اتكررت تاني ما هيحصل كويس و هقول لبابا يشوفله حل معاك
يوسف يشدها تانى عبد الله يفتح الباب و ينزل يزق يوسف هند تنزل و شيرى و عيله صغيره واقفين قدام باب الشقه
عبد الله / مش هنخلص بقي من هم كل يوم ده
يوسف / عاجبك اللى اختك لبساه ده
عبد الله / عاجبني و عاجب ابويا و امى ما لكش دعوه و بعدين انت مش بابا قالك ما تجيش تاخدها تانى
يوسف / الحق عليا انى مش هاين عليا بهدلتها فى المواصلات
عبد الله / احنا عاجبنا مش ارحم من بهدلتك فيها انت كل يوم يا اخى دى كرهت كليتها بسببك
يوسف / واحد غيرك كان غار على اخته مش انت يلا هنقول ايه
يوسف يسيب عبد الله و ينزل عبد الله يطلع شقته يجيب حاجته و ينزل وراه
شيرى / مش هنخلص بقي من هم كل يوم ده
………………
فى الشارع
مختار راكب العربيه و قاعد عينه على البوابه هند تطلع و هى بتمسح دموعها تحاول توقف تاكس التانى مختار يتحرك بالعربيه تشاورله
هند / ممكن توصلنى
مختار يهز راسه تجري تركب يسوق بسرعه قبل ما يوسف يطلع يبص عليها ما يلاقيهاش ينفخ عبد الله ينزل
يوسف / عاجبك عمايل اختك دى
عبد الله يسيبه و يمشي يوسف يركب عربيته و هو مضايق و يسوق
………………….
فى عربيه مختار
هند بتتكلم فى التليفون
هند / يعني احول من الكليه عشان اخلص يا بابا
الراجل / انا تعبت من الكلام معاه
هند / ايوه انا اعمل ايه
الراجل / انتى فين دلوقت
هند / فى الطريق
الراجل / انا هكلم عمك تاني و هكلمه بس ما بيسمعش دا ابوه المره اللى فاتت مهزقه و ماسح بيه الارض و اهو كررها اهو
هند / يعني اولع فى روحى عشان ترتاحوا
الراجل / طب ممكن تهدى انا همنعه يجي ياخدك الصبح خالص
هند / يا بابا هو حوار الصبح ما انا هروح اكمل الخناقه في الكليه
الراجل / طب اقفلى انا هكلمه و ان قرب منك فى الكليه هتشوفي انا هعمل فيه ايه
هند / ياريت والله
الراجل / اهدى بقي حبيبه بابا تهدى و شوفي بابا هيعمل ايه
هند تبتسم / سلام يا بابا
هند تحط الموبايل فى الشنطه و تبص لمختار
هند / شكرا على فكره
مختار / العفو
هند / هستاذنك تنزلنى بعيد عشان
مختار / عشان ما يعملش مشكله فاهم
هند / متخلف اصلا احنا فى انهى عصر هنا
صمت و مختار مركز فى الطريق
هند / قال ما تلبسيش احمر قال ؟ هو انتوا عندكوا فى البلد الستات ما بتلبسش احمر
مختار / مش محبوب يعني بس مش ممنوع بس فى ناس كتير مش بتلبسه
هند / نفس التخلف يعني الحمد لله
صمت و مختار يركز فى السواقه
هند / انا اسفه انا بس
مختار / مفيش مشكله هو انتى يعني شتمتيني انا
هند / هو انا ممكن اسالك سؤال
مختار / اتفضلي
هند / هو انتوا ما عندكوش كليه زراعه في بلدكوا
مختار / عندنا بس انا هنا عشان حاجات تانيه مش فى بلدنا
هند / و هى ايه دى بقي لو ممكن اعرفها
مختار / تجار بخصوص الشغل بدل ما بنروح و نيجي كل شويه انا بخلص الحاجات دى و انا هنا و حاجات تانيه على فكره مش انتى لوحدك اللى عندك مشاكل مع اهلك يعني
هند / انت كمان ابن عمك بيحاول يتحكم فى حياتك
مختار / نوعا ما
هند / ههههههههههههههههههه
مختار يبتسم بس مش بيبص عليها
هند / لا بجد
مختار / بجد احنا الوضع عندنا مختلف عن هنا احنا زى سرايا كبيره و العيله كلها عايشه فيها
هند / ازاى يعني هو لسه فى حد بيعمل كدا
مختار / احنا و الصعيد كلها كدا حتى هنا بيت العيله موجود
هند / انا عمرى ما اقبل اتجوز فى بيت عيله مشاكله كتير اوى
مختار / المشاكل فى كل حته
هند / على رايك انا المشاكل بتقطع مشوار ساعتين بالعربيه عشان توصلنى
مختار يبتسم من غير ما يبصلها
هند / المهم ابن عمك ده بيضايقك ازاى بيمنعك تلبس احمر برده
مختار يضحك من غير ما يبصلها
مختار / احنا مشاكلنا من نوع تاني ياريتها تيجي عالاحمر
هند / الله يعينك انا هنزل هنا لو سمحت
مختار يركن
هند / شكرا
مختار يهز راسه من غير ما يبصلها هند تنزل من العربيه و تقفل الباب و فى ناس كتير رايحه جايه فى الشارع مختار يمشي بالعربيه و هند تتمشي على رجليها
…………………………
فى محل ملابس دورين
ابو عبد الله قاعد مع تلت رجاله تانين
ابو عبد الله / يا محمود البت كرهت عيشتها
محمود / يا اخى الواد معاه حق انت مدلع البت على الاخر
ابو عبد الله / مدلع البت دا على اساس ايه ان شاء الله و يا سيدى مدلعها مدلعها بنتى و ما حدش له عندى حاجه
محمود / لا يا محمد ما تقولش كدا لينا فيها زى ما ليك بالظبط مين اللى ادن للبت دى مش انا و لا هى كانت بنتى لما كانت بتعملها عليا كل ما اشيلها و لما كبرت ما بقالناش فيها
محمد / يا سيدى انا ما قولتش كدا ما تحورش كلامى
راجل ١ / استهدوا بالله يا رجاله بص يا محمد من الاخر كدا يوسف المرادى ما غلطش
محمد/ لا غلط و مش هيجي ياخد هند من البيت تانى
محمود / يعني الواد يسيب الهندسه و يحول زراعه عشان ياخد باله من بنت عمه و فى الاخر نقوله ما لكش دعوه بيها
محمد / هو انا اللى قولتله يحول مش انا على يدك يا حمدى قولتله ما تحولش
حمدى / حصل بس الواد خايف على بنت عمه ما يعيبوش يعني و بعدين اديك شايف العيال فى الشوارع مش عاتقين دا احنا بقينا فى غابه يا اخى
محمود / دا بينزل من النجمه عشان يجي يوصلها مخصوص و فى الاخر برده مش عاجبك
محمد / و انا ما قولتش حاجه و كتر خيره بس هو اسلوبه مع البت وحش
محمود / انت اللى مدلعها و ما حدش بقي له كلمه عليها
محمد / بنتى و انا حر طول ما انا عايش هدلع فيها لما ابقي اموت ابقوا بهدلوهم
محمود / انا ببهدل بنتك يا محمد
الراجل / استهدوا بالله يا رجاله الله مش العيال اللى هتوقعنا فى بعضينا
حمدى / اسمع يا محمود ان كان محمد عاوز كدا خلاص كلم يوسف و لمه عن هند
محمود / احسن و الله ابقي ريحت الواد
محمد / و احنا تهمنا راحته
الراجل / ما تستهدوا بالله بقي يا رجاله الله امال لو ما كناش اخوات في ايه … هات شاى يا ابني
محمود و محمد يبصوا لبعض و كل واحد يبص الناحيه التانيه
……………….
فى كليه زراعه
يوسف واقف مع اتنين صحابه قدام المدرج و هو عصبي و كل شويه يبص في الساعه
يوسف / ماشي يا هند اما تيجي بس ماشي
شاب ١ / ما تهدى يا عم وترتنا
تليفون يوسف يرن يبص فيه و ينفخ
يوسف / اهلا بالحبايب لحقتي تعيطيلهم
يوسف يرد
يوسف / صباح الخير يا عموا حمدى ازيك
حمدى / انت اتخانقت مع هند تانى
يوسف / لا مين قالك كدا
حمدى / بقولك ايه يا يوسف انا و عمامك اتفقنا انك تبعد عن هند خالص لا تروح تجيبها و لا توديها اتفقنا
يوسف / و دا من ايه ان شاء الله
حمدى / احنا قولنا كدا مش كل يوم الرجاله هتمسك فى بعضها عشان خاطركوا لموا الدور شويه
يوسف / الحق عليا يعني
حمدى / يا سيدى سيبها تتبهدل احنا عاوزينها تتبهدل لما هتتبهدل هتيجي هى و ابوها يقولولك حقك علينا يا سيدى خليهم يعرفوا قيمه اللى بتعمله عشانهم
يوسف / انت بتقول ايه يا عموا
حمدى / اقولك ايه يعني اسمع الكلام و انت ساكت و لما هند توصل الكليه لا تكلمها و لا تروح ناحيتها اعتبرها واحده غريبه يا اخى
مختار يعدى يهز راسه ليوسف يوسف يحيه مختار يدخل المدرج اتنين صحابه يشاوروله يروح يقعد جنبهم
يوسف / ماشي يا عموا حاضر هبقي اشوفها بتتعاكس و ارفع الاريال حاضر تحب اعاكس معاهم بالمره
حمدى / لا اله سبحانك انى كنت من الظالمين لا يا يوسف ما تعاكسش معاهم خليك فى حالك ابوها يتصرف ابوها عاوز كدا اربط الحمار مطرح ما يعوز صاحبه
يوسف / خلاص يا عموا حاضر من عنيا
حمدى / تسلملى عنيك يا حبيبي مع السلامه
يوسف / سلام
يوسف يقفل الموبايل و يحطه فى جيبه هند تعدى من غير سلام و تدخل تسلم على صحباتها و تقعد وسطيهم
شاب ١ / حوار كل يوم برضه
يوسف / عيله متخلفه يا اخى ربنا يتوب علينا من الهم ده
……………………
فى المدرج
هند قاعده بين اتنين
هند / انا قرفت والله
بنت ١ / يا شيخه حرام عليكي بقي فى واحده تلاقي واحد يهتم بيها كدا و تتامر ما تحمدى ربنا
هند / الحمد لله على كل حاجه بس دا مش اهتمام يا وسام دا تحكم
وسام / لا على فكره بقي يوسف بيحبك جدا و الكل عارف و اللى بيعمله ده غيره مش اكتر
هند / و انتى مين قالك الكلام الفاضي ده
وسام / و هو فى ابن عم بيعمل مع بنت عمه كدا ما كانش حد غلب
هند/ اه فى عادى و من غير تحكم و عصبيه و افوره
وسام / فين دا بقي ان شاء الله
هند / انتى معايا و لا معاه
بنت ٢ / هههههههههههههههه يا بنات استهدوا بالله الموضوع مش مستاهل كل ده
وسام / طب ما تسمعينا رايك
البنت / للاسف انتوا الاتنين صح
هند / جديد الكلام ده ما شاء الله
البنت / والله انتوا الاتنين صح فعلا تصرفات يوسف معاكى تحكميه خنيقه
هند / شوفتى
وسام / بس
البنت / بس هو بيعملها عشان بيحبك و بيغير عليكي
هند / انتى عارفه لو بابا سمع الكلام ده هيقول ايه يا بنتي احنا اصلا اصلا ما عندناش جواز قرايب انا اصلا ما اقدرش اتجوز يوسف انا اساسا ما بحبوش
وسام / و دا من ايه بقي ان شاء الله دا حتى يوسف ما يتعيبش طول بعرض و وسيم و شيك و راكب عربيه حلوه و مهتم بنفسه على الاخر على فكره انتى مش وش نعمه
هند / تصدقي معاكى حق انا فعلا مش وش نعمه و هو يستاهل واحده احسن منى بكتير بعيد عنى بقي
وسام / ما تبقيش فقريه
البنت / ايوه بس تحكمه يخنق
وسام / الراجل لازم يكون حمش امال يكون عيل سيس زى اللى مغرقين الكليه دول
البنت / هو ان ما كانش كدا يبقي كدا
وسام / انتوا اصلا ما بتفهموش فى الحب الراجل لما بيحب بيبقي عاوز حبيبته ليه و بس بيغير عليها حتى من لبسها مش بيبقي عاوز حد يشاركه فيها و لا بيستحمل حد يبصلها
هند / دا على اساس ان ابهاتنا ما حبوش امهاتنا يعني
وسام / يا بنتي الحب بيبرد مع السنين باباكى و مامتك كدا بعد سنين جواز لكن فى الاول كانوا كدا
هند / يا سلام
البنت / على فكره المتحكم بيبقي متحكم طول عمره ما فيش الكلام ده
هند / صح
وسام / براحتكوا بقي انا تعبت
البنات يبصوا لبعض و يسكتوا
…………………..
فى المدرج ناحيه مختار
مختار / لا بكره انا فى البلد مش هنا لو عاوزين نقعد شويه بعد الكليه مفيش مشكله
شاب ١ / طب ما تنساناش من الزواده اللهى لا يسيئك
مختار / انا بجيب الزواده مخصوص عشانك اصلا ما بدوقهاش
شاب ١ / ما كانتش حته فطيره اللى خدتها منك
مختار / فطيره واحده بس
شاب ١ / يا عم انت هتعد عليا و لا ايه دا بدل ما تقول ما طرح ما يسري يمرى دى مش اخلاق الصعايده اللى نعرفها مصر غيرتك يا مختار
مختار / هههههههههههههههههههه لا ازاى مطرح ما يسرى يمرى طبعا و الف هنا و مش مهم انا خالص
شاب ١ / و انا و انت ايه يا مختار
شاب ٢ / ازازه و كبايه
شاب ١ / انت قد الكلمه دى
مختار / عاوزها دم يا رجاله ههههههههههههههه
شاب ١ / لا ما يهونش عليا لا
مختار / ههههههههههههههههههههههه
…………………
قدام المدرج
شاب ٢ / ما تاخذنيش يا يوسف انت غلطان
يوسف / نعم يا اخويا
شاب ٢ / يا ابني هند بنت عمك دى ما فيش فى تناكتها و ابوها مبوظها بدلعه فيها و اللى انت بتعمله ده و اهتمامك الزايد بيها بيمرعها اكتر و بيخليها تحس بنفسها اكتر فتتمرع عليك اكتر
شاب ٣ / للاسف يس بيتكلم صح
يوسف / يعني اعمل زي ما عمى بيقول و اسيبها تتبهدل ترضوها على حريمكوا
شاب يدخل
شاب ٤ / صباح الفل يا رجاله مش هتصدق شوفت ايه و انا جاى
يوسف / اشجيني مهو اليوم بيبان من اوله شوفت ايه
شاب ٤ / شوفت هند نازله من عربيه مختار الزيني
يوسف يمسك الشاب من هدومه بعنف
يوسف / نعم يا خويا
شاب ٤ / والله زى ما بقولك نزلها بعيد عشان ما حدش يشوفهم مع بعض
يوسف يبص على مختار قاعد جوه و بيضحك مع صحابه بيبص لكل واحد فيهم بغل
شاب ٤/ والله العظيم ما بكدب
يوسف يسيب صاحبه و يدخل المدرج و اصحابه يدخلوا وراه
……………..
يس / مش هنا يا يوسف
يوسف ما يردش و يطلع يروح يقف قدام مختار مختار و اصحابه يسكتوا و يبصوا ليوسف
يوسف / عاوزك بره
مختار / حوار مهم اوى يعني ما يستناش بعد المحاضره الدكتور زمانه جاى
يوسف / تمام اوى بص يا مختار انت جدع طيب و مش بتاع مشاكل
يوسف ينفض كتف مختار و مختار متابع ايده مع ابتسامه استهزاء خفيفه على وشه
يوسف / ابعد عن هند احسنلك
مختار / اعزل يعني ؟
يوسف بصوت عالى
يوسف / ما تستاهبلش
المدرج كله يبص على يوسف و مختار يقوم يقف هند تنتبه و تلف بجسمها كله و باين عليها الخضه
مختار / انا اه مش بتاع مشاكل بس لو المشاكل جتلى يبقي هى اللى جابته لنفسها بس نصيحه اللى انت بتعمله ده بيسيئلك و بيسيئلها قبليك فعيب
يوسف / بعد المحاضره
مختار / حبيبي تؤمر
يوسف / لم صحابك بقي
مختار / هههههههههههههههههههههههه
يوسف يسيب مختار مختار يقعد
شاب ١ / هو فى ايه
مختار عينه مع يوسف رايح ناحيه هند
يوسف / قومى معايا بره
هند / انت بجد عاوز تعمل مشكله فى الكليه
يوسف / قومى بالزوق بدل ما اطلع جنانى عليكي هنا قومى
هند تبص يمين و شمال عينها تيجي فى عين مختار مركز معاهم تبصله
يوسف / لاخر مره بقولهالك بالزوق
هند / مش قايمه و اعلى ما فى خيلك اركبه مش قايمه
مختار يقوم و يتحرك فوق البينجات بسرعه و يزق يوسف يوقعه في الارض صحاب يوسف و صحاب مختار كلهم يتحركوا يفصلوا بينهم
يوسف / انت مجنون يلا دا انا هبعتك لاهلك فى صندوق
مختار / تعال بره وريني نفسك
مختار يفك نفسه منهم و يطلع بره المدرج يوسف يبص لهند بغل
يوسف / ماشي
يوسف يطلع بره هو و صحابه
وسام / هو فى ايه
وسام تطلع بره وسط العيال الكتير اللى طالعه هند تطلع الموبايل و تتصل بحد
…………………
بره المدرج
مختار / تحب توريني نفسك هنا و لا بره الكليه خالص
يوسف / انا الاول كنت ناوى اتكلم معاك راجل لراجل بس دلوقت
يوسف يحاول يضرب مختار بالبوكس مختار يفاديه و يديله بالكوع فى ضهره يوسف يتوجع و يبص لمختار يلحقه بالبوكس فى مناخيره من تحت لفوق يوسف يقع فى الارض مختار يوطى عليه
مختار / عندنا اللى بيتشطر على حرمه ما بيبقاش راجل اصلا
واحد من صحاب يوسف يس يحاول يضرب مختار من ضهره مختار يحس بيه و يتقلب على جنبه و يقوم يقف و يروح يتزحلق و يلف برجليه يكعبل يس يقع فى الارض على وشه
مختار / و اللى بيضرب فى الضهر ما بيبقاش راجل برده
مختار يروح يمد ايده ليوسف
مختار / انا زى ما انت قولت مش بتاع مشاكل بس مش هفا
يوسف يضرب ايد مختار و يقوم يقف و الاتنين فوش بعض
شاب / الامن جاى
كل الطلبه تدخل المدرج و مختار و يوسف لسه عنيهم فى عنين بعض
يوسف / لسه مخلصناش
مختار / غدا لناظره قريب
يوسف و مختار يدخلوا المدرج و مختار عينه على هند بتعيط و يمنى بتطبط عليها يروح يقعد مكانه الدكتور يدخل
الدكتور / هو كان فى ايه بره
ما حدش بيتكلم
………………….
فى المحل
محمد / انا يا سيدة هقعدهالكوا من التعليم خالص يمكن ترتاحوا
حمدى / يا محمد اهدى اما نسمع من يوسف الاول
محمد / انا مش سامع دا انت لسه قافل معاه كان سمعلك كان عبرك هو انا ببعت البت تتعلم و لا تتقهر ان ما عيطهاليش فى البيت يعيطهالى فى الكليه البت كرهت الكليه عالتعليم هو فى ايه
حمدى / طب استهدى بالله يا محمد لما نفهم ايه الموضوع
محمد / اخر كلام يا محمود لو ابنك قرب من بنتى تانى بالخير و لا بالشر انا هبلغ عنه البوليس
محمود يقوم يقف
الراجل / لا يا محمد ما يصحش
محمد / لا يصح هبلغ عنه و اعمله عدم تعرض و ان قربلها بعدها هحبسه
محمود / تحبس مين يا محمد انت جرالك حاجه و لا ايه
محمد / هو بعد عمايل ابنك و مش عاوزه يجرالى
حمدى يشد محمد و يطلعوا بره
حمدى / تعال بس يا محمد كدا استهدى بالله
محمد / اشمعن هند اللى بيعمل معاها كدا اشمعن بنتي انا اللى بيحصل معاها كدا
حمدى / يا محمد بقولك استهدى بالله
محمد / لا اله الا الله بص يا حمدى يوسف الصغير على خمس بنات فما حدش بيزعله و لا بيرفضله طلب و قولنا ماشي عشان خاطر محمود اخونا الكبير و عمود العيله انما يتهجم على البت و يرعبها قدام زميلاتها و تكلمنى و هى يتتنفض بالشكل ده ليه ما لهاش اهل لما بيعمل كدا و انا عايش امال لما اموت هيعمل ايه
حمدى / انا عازرك بصراحه و مش عارف اقولك ايه بس نسمعله الاول يمكن فى حاجه هند ما قالتهاش يمكن فى حاجه حصلت فى الكليه بعد ما قفلنا معاه يمكن هى لسه قافشه من حوار الصبح فلما جه يكلمها يراضيها الموضوع كبر
محمد / اى كان يا حمدى الموضوع خلص انا ما فييش حيل للكلام ده اقولك انا مروح انا تعبان و مش قادر للمناهده سلام
محمد يمشي و حمدى يضرب كف على كف و يدخل
محمود / على الله تكون عقلته
حمدى / شكل الزعله كبيره المرادى
الراجل / يعملوها العيال و يقعوا فيها الكبار
……………………….
فى بلد مختار
مختار سايق العربيه يوصل لسور قصر كبير يمشي جنبه لحد ما يوصل للبوابه يضرب الكلاكس غفر يفتحوا الباب بسرعه يدخل بالعربيه مسافه طويله نخل و شجر و جنينه كبيره و عيال صغيره كتير تجرى ورا العربيه لحد ما يركن قدام قصر كبير ما تجبش اوله من اخره مختار ينزل من العربيه العيال تحضنه يشيل عيل منهم و يدخلوا جوه و هم بيزفوه
العيال / مختار جيه مختار جيه
مختار / ههههههههههههههههههه هو انا كنت مهاجر و لا ايه
ست تطلع من جوه
انتصار / امال انت فاكر ايه دا اليوم فى بعادك بميت مليون سنه
مختار / و انا برده اللى اتعلمت البكش على كبر
انتصار / كبر !!! اخص عليك يا مختار طب والله الف اخص
مختار / طب شوفيلى عندك لقمه فى السريع و انا اصالحك
راجل بهيبه ينزل من فوق
الراجل / لقيت دوشه و صوت عالى قولت يبقي مختار باشا نور البيت
مختار يوطى على ايد الراجل يبوسها الراجل يسحبها
الراجل / استغفر الله اخبار الكليه ايه رافع راسنا و لا هتزعلنا منك
انتصار / هو فى زى مختار و لا شطاره مختار
شاب يدخل
الشاب / الله دا مختار شرف
مختار / ازيك يا عباده
عباده / الحمد لله .. متاخذنيش يا ابن عمى كان نفسي احكى معاك و كدا بس انت عارف بقي كنت جاى عاوز الكبير فى كلمتين بخصوص بكره
مختار / هو فى حاجه بكره و لا ايه
الراجل / تعالو نتكلم جوه احسن
مختار / يلا
الراجل يمشي ناحيه اوضه فى جنب
انتصار / من الدار للنار كدا طب مش تاكل لقمه الاول
عباده / والله انا بقول كدا برده
مختار / معلش انا عاوز اطلع
عباده / يا ابني ما تخليك في مدرستك و طينك و زرعك و سيب الحاجات دى للى يعرف يمشيها
مختار / نتكلم جوه و نشوف مين اللى يعرف يمشيها
مختار يسيبهم و يروح ورا الراجل
…………………….
فى بيت هند
يوسف فاعد مع محمد و هند و عبد الله و شيرى و ياسمينا
يوسف / يعني ركبتي معاه فعلا
محمد / بقولك كلمنى انا هنا
يوسف / دا بدل ما تلطشها قلمين يا عمى
عبد الله / مين دى اللى تنضرب قلمين
يوسف / يعني اختك تركب عربيه واحد غريب و انت ساكت
عبد الله / مهى لو ما كانتش بتهرب منك ما كانتش اتطردت تركب معاه
يوسف / دا مش مبرر
محمد / تمام يا يوسف هند غلطانه بس دا ما يديكش الحق انك تكبر الموضوع
يوسف / انا اللى كبرته انا كنت هتكلم معاها فى جنب
هند / انهى جنب و انت جاى تكلمنى بالطريقه دى بعد اللى عملته مع مختار و بعدين هو بالعافيه بتزعقلى قدام زمايلي
يوسف / انتى عارفه موقفى كان عامل ازاى و هما بيقولولى انك كنتى نازله من عربيه مختار فى حته بعيد عشان ما حدش يشوفك
هند / اهو اللى ما شافش شاف او سمع و يعالم الحقيقه هى اللى اتعرفت و لا كل واحد حط التاتش بتاعه و سيرتى بقت على كل لسان
يوسف / ما انتى لو ماشيه عدل
محمد / اتعدل فى كلامك يا يوسف انا ما اسمحلكش
يوسف / ماشي يا عموا انا اللى غلطان لكن هو يصح ان بنتك تروح الكليه فى عربيه شاب غريب اى كان مين الشاب ده
محمد / لا ما يصحش و مش هتكررها تانى
هند /على فكره انت كمان شاب غريب
محمد / خلاص يا هند
هند تبص لابوها
محمد / تعمل حسابك انت وهند ولاد عم فى البيت بس انتوا زمايل فى الكليه لا تكلمها و لا ليك دعوه بيها
يوسف / ازاى يعني
عبد الله / زى الناس هو ايه اللى ازاى
محمد / ابعد شويه يا يوسف عشان الدنيا تهدى
يوسف / طب ما انا بوصلها بصفتى ابن عمها برده
هند / و بتدخل فى لبسي بصفتك ابن عمى برده
يوسف / امال ايه يعني انا راجل و دمى حامى مقبلش ان حد يبص عليكي
محمد / و انا بنتى متربيه كويس و كل حته فى دولابها بموافقتى و قبل ما تخرج من باب البيت انا و امها بنبقي موافقين على لبسها
يوسف / تمام اللى تشوفه يا عمى و ايه كمان
محمد / مفيش انت بس تصدق فى دول
يوسف / حاضر … طب بما اننا فى البيت هتعملى معايا البحث
هند / لا هعمله لوحدى
يوسف / تمام يا هند تمام اوى عن اذنك يا عمى عن اذنكوا
يوسف يمشي
محمد / مرضيه ؟
هند / اصلنا اول مره نقعد القعده دى عن اذنكوا ورايا مزاكره
……………………
فى المكتب
الكبير و اتنين شباب متجمعين حوالين عباده و مختار واقف وسطيهم بيبصوا فى خريطه
الكبير / انا بقول تامنوا الناحيه الغربيه دى وقت التسليم ما تعتمدوش عالجبل لوحده
عباده / فى تلاته قناصه متوزعين فى الجبل هيامنوا المكان كله مش عاوز يكون عندك فكر
مختار / و انا هكون فين ؟
عباده / الحته دى مش سهله و انت مش حافظها تتوه مننا و لا يتقبض عليك نروح كلنا فى داهيه
مختار / دا على انهى اساس ان شاء الله
عباده / على اساس انك بتيجي البلد فى الاجازات و بعدين انت دلوقت اربعه و عشرين ساعه العربيه تحت رجلك و الحته دى محتاجه حد خفيف و سريع
مختار يبص لعباده و يبتسم
مختار / تمام يا عباده اللى تشوفه
عباده / نكمل يا رجاله
مختار يبص للكبير يهز راسه بالراحه مختار يهز راسه بالراحه
………………
فى اوضه هند
هند / اللى كان قدامى بقي
عبد الله / اديكي ضيعتي حقك و بدل ما كنا بنتكلم الصبح بقوا هما اللى بيتكلمه و البيه بقي بطل و حمش و دمه حامى
هند / انت عارف كويس لو كان حصلنى فى الشارع كان هيعمل ايه
عبد الله / و انا كنت هسيبك يعني
هند / ربنا يخليك ليا
عبد الله / سيبك انتى انتى كويسه دلوقت
هند / مضايقه من نفسي اوى عملت لمختار مشاكل ما لوش ذنب فيها ماله هو بكل ده
عبد الله / بس فرحت في يوسف اوى و حبيت مختار اوى اوى اوى
هند / ههههههههههههههههههه دا بيقولوا ما خدش فى ايده غلوه بوم تك كام يوسف فى الارض
عبد الله / انتى عارفه ان يوسف مش هيسكت صح
هند / مهو ده اللى مضايقني
عبد الله / هما رجاله كبار مع بعض و هيعرفوا يتصرفوا ما لكيش انتى دعوه
هند / بس هو ما اتحركش غير عشان يساعدنى
عبد الله / ما تحطيش البنزين عالنار لمى الليله خليها تعدى ابوكى و عمك ماسكين فى بعض
هند / بقولك ايه ياله ما تنكدش عليا قوم زاكر
عبد الله / هى بقت كدا تصدقى الحق عليا اقعدى بقي افركى لوحدك
هند / خليك فى حالك
عبد الله / هخليني
عبد الله يقوم يوصل لباب الاوضه
هند / بيدو
عبد الله / الله اكبر
هند / ما تنزل تجيبلى شيكولاته
عبد الله / لا هزاكر
هند / عشان خاطر دودو حبيبتك
عبد الله / على حسابك عشان انا مقشفر
هند تروح تجيب شنطتها و تطلع فلوس
عبد الله / ما تجيبي عشره جنيه كمان اجيب كيسين شيبسى و نخربها
هند / عشرين اهى هاتلنا حاجه سقعه و لو ما كفتش كمل من معاك قال مقشفر قال دا انت مكنزهم
عبد الله / اعوذ بالله
عبد الله يمشى و هند تقعد على السرير مضايقه
…………………..
فى اوضه مختار
مختار قاعد مع بنت
مختار/ عجبتك الطرح
البنت / حلوه اوى بس مش انا قولت عاوزه طرحه برونزى
مختار / ما اهى يا بت انتى عميتى
البنت / دا جنزبيلى
مختار يشد الطرحه البنت تشدها منه
مختار / ادى ام الطرحه بناقصها
البنت / خلاص خلاص تمشي
مختار / انا اش عرفنى فالبرونز و الجنزبيلى انا انا قولت للبياعه عاوز طرحه ساده برونز ادتنى دى
البنت / ماشيه ماشيه خلاص شكرا كتر خيرك
مختار / انتى طالعه لمين يا بت انتى
البنت / طلعالك و كلهم بيقولوا كدا
مختار / بس انا مش بيفرق معايا البرتقاني من البتنجانى يعنى ماله الكحلى و الاسود يعني بيليقوا على اى حاجه و خلاص
البنت / بقولك ايه يا عمى
مختار / قولى
البنت / ما بلاش تروح معاهم بكره
مختار / مالك انتى بالكلام ده
البنت / سماح قالتلى سمعت عباده و هو بيتخانق مع خالتى فاطمه
مختار / ما لكيش دعوه بالكلام ده و قولى لسماح لو ما بطلتش تلمع اكر هى عارفه هيحصلها ايه
البنت / بس انا خايفه عليك
مختار / من امتى بقول الكلمه مرتين
البنت / خلاص مع انى بتكلم عشان
مختار / مريم
البنت / سكت اهو اتكتمت
مختار يبتسم و يمسك الطرحه
مختار / قولتيلى الطرحه دى لونها ايه تاني يا بت يا مريم
مريم / جنزبيلى
مختار يبص للطرحه باستغراب
مختار / جنزبيلى
…………….
فى شقه يوسف
يوسف نايم على السرير بيتكلم فى التليفون
يوسف / طب يعنى هو انا كدا غلطان
وسام / بصراحه لا يا يوسف والله انا اتكلمت معاها فى الكليه بس هى مدلعه اوى انا قولتلك ما تهتمش بيها اوى كدا هى بتحب الاهتمام ده و كل ما هتتقل عليك هتهتم اكتر و الدفعه كلها هتتكلم عليها اكتر فليه بقى تهتم بيك هى كمان
يوسف / دا الدنيا عندنا فى البيت ولعت و بابا مسك فى عمى
وسام / و طبعا هى و لا على بالها
يوسف / انا تعبت يا وسام تعبت و مش عارف اعمل لها ايه اكتر من كدا
وسام / والله يا يوسف انا لو اقدر اساعدك ما اتاخرش و انت عارف
يوسف / تعرفى ان ماما بتقولى نفس كلامك ده بس اميره اختى بتقول غير كدا
وسام / دى الصغيره صح
يوسف / اه اكبر منى بسنه
وسام / بتقولك ايه اميره بقى
يوسف / بتقول ان تصرفاتها طبيعيه جدا خصوصا اننا يعنى مجرد ولاد عم
وسام / انا قولتلها انك بتحبها قالت ان معندناش جواز قرايب
يوسف / هى قالت كدا ؟
وسام / والله حتى اسال يمنى
يوسف / ازاى يعنى و انا بابا متجوز بنت عمه يعنى طب دا احنا نص العيله متجوزه من بعض دا امل اختى الكبيره متجوزه ممدوح ابن عمى حمدى يبقى ازاى بقى ما بنتجوزش من بعض
وسام / ما اعرفش يمكن قالت كدا عشان نقفل الموضوع و ما تبينش حاجه مش عارفه ما انت عارفها
يوسف / انا فعلا بفكر اتقدملها و نحط حد للموضوع ده بقى ساعتها بقى
وسام / ما افتكرش انها فكره كويسه دلوقت يا يوسف ممكن تتقل او تعند او تحرجك دى طالعه فيها اوى و انت السبب
يوسف / ما انا بفكر اتقدملها بطريقه عمرها ما هترفضها
وسام / طب ما تقولى ناوى تعمل ايه
يوسف / و هيبقى سر بينا
وسام / و انت من امتى قولتلى حاجه و انا قولتها
يوسف / بصراحه طول عمرك جدعه تمام هقولك بس توعدينى تساعدينى
وسام / انت عارف لو اقدر ما اتاخرش عنك ابدا
يوسف / تمام هقولك
……………………..
فى البلد
مختار فى اوضته بيلبس سديرى واقى ضدد الرصاص و يلبس فوقيه قميص و يلبس ساعه و يحط موبايله فى جيبه و يلبس البياده و ينزل فى هدوء البيت كله نايم يلاقى عباده طالع من المكتب
عباده / لبست السديرى؟
مختار / لبسته
عباده / تاخد بالك من روحك الطين محتاجلك
مختار / لا ما تقلقش مهياش اول مره يعنى و لا ايه عن اذنك
مختار يمشى و عباده يبصله بغل و يمشى وراه يطلعوا يركبوا عربيات جيب مع رجاله ماسكه سلاح و يمشوا و انتصار واقفه فوق فى البلكونه بتابعهم الكبير يطلع يقف جنبها
انتصار / برده وافقت انه يروح معاهم
الكبير / و هى اول مره و لا ايه
انتصار / لا مش اول مره بس المرادى خطره و انت اللى قايل ده
الكبير / و عشان كدا صممت ان مختار يطلع معاهم عابد مغرور و واثق في روحه بزياده
انتصار / و هو عباده شويه
الكبير / لا مش شويه ما فيش زيني شويه بس اللى بنتعامل معاهم هما كمان مش قليلين و لازم نعملهم الف حساب الغلطه عندنا بموته و الرجاله دمهم مش رخيص
انتصار / ربنا يرجعهم بالسلامه
الكبير / و انتى كمان بطلى تعاملى مختار على انه عيل صغير
انتصار / راجل و سيد الرجاله بس غصب عنى بخاف عليه دا انا كنت فرحت لما لقيته شاطر فى العلام و كمل فى الجامعه و فرحت اكتر لما انت بعته يدرس فى مصر
الكبير / و هو عشان بيدرس فى مصر مبقاش ابن الزيني و لا ايه
انتصار / و الله ما اقصد
الكبير / انا عارف انى سلمتك مختار حته لحمه حمره و انك ربتيه لحد ما كبر و بقي راجل و عملتى معاه يمكن اكتر من اللى كانت امى الله يرحمها هتعمله بس لازم تفتكرى انه راجل مش هتقعديه زى البنات يطبخ و يمسح فى السرايا يعني
انتصار / و هى الارض شويه طب يسد فيها
الكبير / هيسد بطلى انتى تدلعيه و هو هيسد
انتصار / لتكون غيران منه
الكبير / ههههههههههههههه يا وليه مش وقتك
انتصار / يوووووه و هو انا قولت ايه
انتصار تدخل و الكبير واقف بيبص على السما و مبتسم
…………………….
فى الجبل
كل واحد من الرجاله ياخد مكانه و عابد متابعهم و يروح يقف جنب عربيه جيب كبيره مختار قاعد فيها و على رجله شنطه الفلوس
عباده / الجماعه الروس كانوا كلمونا من فتره على شحنه اسلحه جديده مكسبها مضمون بس الكبير مصمم ما يغيرش الدنيا كلها بتتقدم الا احنا لسه بنستخدم نفس البندقيه و المسدس دلوقت فى اسلحه حديثه و تكنولوجيا جامده اوى فى الحاجات دى و لا انت اتلخمت فى المدرسه و بطلت تتابع
مختار / هو احنا ناويين على حرب و لا حاجه
عباده / يا عم دى تجاره و ده سوق
مختار / مش اى سوق يا عباده و مش اى تجاره احنا مش مجرمين و لا ارهابيين و لا بنبيع لا لمجرمين و لا لارهابيين احنا صعايده
عباده / و هو فى صعيدى ما بيشيلش سلاح
مختار / بيشيل يا بندقيه يا مسدس انما هيشيل قنابل و مدافع و صواريخ ليه
………………………………
عباده يبص يلاقي نور عربيات كتير جايه يخبط على العربيه و يزعق
عباده / كل واحد فى مكانه
مختار يفتح الشنطه و يبص جواها عباده يبصله
عباده / خليك هنا مع الفلوس و خلى العربيه دايره لحد مشاورلك لو حسيت باى غدر اخلع و احنا هنتصرف بس على الله ما توهش
مختار يهز راسه من غير و لا كلمه عباده يروح يقف فى اول الرجاله عربيات كتير تقف و ينزل منها اجانب يقفوا و يطلع راجل من وسطهم يروح يقف قدام عباده و يتكلموا
الراجل / كل البضاعه اللى طلبتوها موجوده
عباده / و الفلوس اللى طلبتوها كمان موجوده بس اشوف البضاعه الاول
الراجل / اتفضل
عباده يطلع عربيه بوكس مليانه صناديق خشب يفتح اول واحد يلاقيه مليان قش و على الوش مسدسات يمسك اول واحد و يجربه و يسحب الاجزاء و يفكه و يركبه تاني
عباده / لا تمام
عباده ينزل و يشاور لمختار مختار ينزل من العربيه و يديها لعباده
عباده / الهمه يا رجاله عشر دقايق و تخلصوا نقل البضاعه
عباده يدى الشنطه الراجل يفتحها و يبتسم و يقفلها مختار يروح مع الرجاله كلهم يشيلوا الصناديق واحد يناول مختار صندوق يشيله و هو مضايق و يروح ناحيه عباده
مختار / عباده
عباده / معلش يا مختار بيه مشيلينك مش مقامك انا عارف بس معلش الطلعه الجايه نبقي نشوفلك شغلانه احسن
مختار يبتسم
مختار / هعتبر ده وعد
مختار يروح يناول الصندوق لواحد تانى و يروح ناحيه عربيات الاجانب و يلف حوالين واحده من العربيات
مختار / تجيلها بكام دى
عباده / انت جاى تحمل سلاح و لا تشترى عربيه
مختار / لا بس حلوه
مختار يبص تحت العربيه و الكل متابعه
عباده / ما تخلص يا مختار فى ايه مالك
مختار / خلاص خلاص اسف
مختار يروح ناحيه الراجل
مختار / تقيله و ثابته ما شاء الله تلاقيها عندنا بالشئ الفلاني دى
عباده / مختار
مختار / بنحكى يعني ما فيهاش حاجه و لا فيها
مختار ياخد الراجل تحت باطه عباده يشده بعيد
عباده / انا صبرت عليك كتير و ليا كلام تاني مع الكبير اركب العربيه دى لو مش هتساعدنا ما تعطلناش
عباده يزق مختار جوه العربيه و يقفل الباب و ينفخ مختار يبتسم و يطلع الموبايل يبص فيه
عباده / ايوه اللعب فى الموبايل اهو ده اللى انت فالح فيه
عباده يسيبه و يمشي و مختار متابع اللى بيحصل و مبتسم و يبص في الموبايل
…………………..
فى شقه يوسف
محمود / بكره الصبح هروحلهم
يوسف / تاخدلهم حاجه حلوه ماشي
محمود / و انا عمرى روحت بايدي فاضيه انت كمان و هجيبلها قفص تفاح من اللى هى بتحبه الاصفر الصغير داهو حاجه تانى
يوسف / ربنا يخليك ليا ربنا ما يحرمنى منك ابدا
ست تدخل تقعد و معاها طبق فيه تفاح تقشره و تقطعه ت تاكل يوسف
الست / بصراحه كدا يا ابو يوسف الموضوع طول اوى و مسخ
محمود / موضوع ايه
الست / موضوع ست هند ده
يوسف / جرا ايه يا ماما
الست / يا حبيبي ما هو مش كل يوم و التاني تغلط و تدب معاك خناقه و انت و ابوك تتكفوا على ملا وشكوا تراضوها و تغرموا شئ و شويات
يوسف / خساره فيا يا اما
محمود / يا حبيبي ما فيش حاجه خساره فيك انت بس تؤمر
يوسف / ائمر بقلب جامد يعني
الست / و من امتى ابوك استخسر فيك حاجه
يوسف / انا كنت بفكر يعني لو اخطب هند
محمود / دا يوم المنى بكره الصبح اطلبهالك
يوسف / لا لا لا مش القصد انا مش عاوزها خطوبه عاديه كدا بصراحه ليها صوره فى دماغى كدا و نفسي يعني تساعدنى احققها
محمود / اساعدك و ماله قولى نفسك فى اي ايه و انا اعمله
يوسف / لا ما تشغلش بالك انت انا بس هعوز خمس ست تلاف جنيه كدا
الست / و هى الست شريهان هتقبل بشبكه بنتها خمس ست تلاف
يوسف / شبكتها ايه يا اما مش مقامها اصلا ما تقول حاجه يا حج
محمود / بكره الصبح هجيبلك الفلوس اللى انت عاوزها
الست / يا راجل طب مش تفهم الاول عاوزهم فى ايه
محمود / هو مش قالك هيعمل حاجه نفسه فيها خلاص سبيه هو يعني هيصرفهم عالمخدرات و لا عالنسوان سبيه
الست / تلاقيه هيروح يجيبلها هديه يراضيها بيهم
يوسف / تصدقي يا اما كانت فيتانى بقولك ايه يا حج
محمود / ههههههههههههههههه ايه اقفلهملك بريزه
يوسف / ممكن يعني ؟
محمود / شكلك هتعملها مفاجاه عنب
يوسف / يا فاهمنى انت يا ابو يوسف
محمود / هههههههههههههههههه ما تجيبي حته تفاحه يا وليه الله
الست / بقطعلك اهو الله
………………….
فى السرايا
العربيات بتدخل ورا بعض و عربيه مختار مش فيهم انتصار و الكبير بيستقبلوهم و فى ست واقفه فى بلكونه فوق بتتفرج
الكبير / عفارم يا رجاله دخلوا الحاجه المخزن يلا
انتصار / امال مختار فين يا عباده
عباده يبص و يطلع موبايله
عباده / الله ..هو مجاش و لا ايه .. داهيه ليكون تاه و يدوخنا وراه انا قولت ما يجيش معانا
الكبير / رد عليك
عباده / لا … يا منصور منصور
شاب / منصور كان راكب فى عربيه مختار
عباده / ما تقلقش يا كبير منصور حافظ الطريق كويس هتلاقيهم جايين دلوقت تلاقي عجله نامت و لا حاجه فا اتعطلوا
عباده يتصل برقم تاني
عباده / ما بيرودش هو كمان … مين تاني كان راكب معاهم يا ابني
الشاب / تقريبا حسن و سليم
عباده يتصل و ينفخ و يتصل تانى
عباده / ما حدش فيهم بيرد
انتصار تمسك فى دراع الكبير
انتصار / الواد جراله حاجه يا ناصر الواد جراله حاجه
ناصر يبصلها تسكت و تدخل جوه تعيط
عباده / انا هاخد الرجاله و نطلع ندور عليه انا كمان بدات اتوغوش عليهم
ناصر / فى حاجه حصلت يا عباده الاربعه ما يتخيروش عن بعض و مستحيل يكونوا تاهوا
عباده / و الاربعه ما بيردوش انا كمان بدات اتوغوش
……………….
فى شقه فى اسكندريه
عبد الله / بصراحه احلى حاجه اننا جينا هنا النهرده
شيرى / طبعا مش هربت من الدروس و المزاكره
عبد الله / ما انا هشحن عشان لما ارجع بقي اكل الكتب
شيري / ايوه انا عارفه البقين دول كويس انا هقوم ابص على اختك فى البلكونه
شيري تقوم و تدخل البلكونه جنب هند واقفه بتتفرج على النجوم
شيري / اللى واخد عقلك
هند تبتسم
شيري / اعمل ايه اكتر من كدا عشان تفكيها بقي
هند / والله مبسوطه بس انا و انتى عارفين ان ما فيش حاجه هتتغير هنروح نلاقي يوسف و عمى جايبين زياره و الاقى يوسف برده بيوديني و يجبني و يتحكم فى حياتي و لا كان فى اى حاجه حصلت
شيري / كنت عاوزه اتكلم معاكى فى موضوع
هند / خير
شيري / يوسف
هند تبص الناحيه التانيه
شيرى / انا و انتى عارفين ان ان ما كانش النهرده يبقى بكره هيجى يوم و يطلبوكى
هند / ان شاء الله ما يجيش
شيرى / انا عارفه انه عصبى بس حنين و عمره ما رفضلك طلب
هند / حنين ؟ دا عنيف جدا و خنيق جدا
شيرى / طب فكرى فيها يا هند يمكن انتى يعنى لما تقربى منه تفهميه او يمكن تقدرى تغيريه
هند / بس انا ما بحبوش
شيرى / انا ما قولتش اتجوزيه انا قولت فكرى فى الموضوع هو لسه ما اتقدمش بس لو اتقدم هتديله فرصه يعنى فكرى فى الموضوع مش اكتر
هند / و لو ما ارتاحتش
شيرى / مش هتتجوزى الا اللى ترتاحيله و قلبك يختاره
هند / بس ساعتها عمى
شيرى / سيبيلى انا و ابوكى عمك احنا ما عندناش فى الدنيا اغلى منك و من اخواتك و مستحيل نضحى بسعادتك عشان اى حاجه تانيه يا هند
هند تبتسم مامتها تحضنها
………………..
فى السرايا
انتصار قاعده بتعيط و مريم بتطبطب عليها الباب يخبط و ست و بنت يدخلوا
الست / ادخل يا اختى
انتصار / تعالى يا فاطمه
فاطمه / هو مفيش اخبار عن مختار
انتصار / لا مفيش ما حدش فيهم بيرد
فاطمه / قلبى عندك يا اختى حاسه بيكي بس هنعمل ايه مهو انتى برده المفروض تكونى اخدتى على كدا هو انتى جديده يعنى
انتصار / مهو عشان انا مش جديده و عشان ياما رجاله راحت و ما رجعتش مش قادره اتخيلها
فاطمه / لا لا ما تقوليش كدا ان شاء الله يلاقوه تلاقيه تاه هنا و لا هنا
مريم / عمى عمره ما تاه اكيد جراله حاجه
انتصار تبص لمريم و تعيط زياده
فاطمه / والله عباده ياما اتحايل عليه و ياما قاله خليك طب دا حتى ما حطوش فى حته مكشوفه خاف تجيله طلقه كدا ولا طلقه كدا
انتصار / هقول ايه لامه لما اشوفها هقولها ايه ما حافظتش عليه شوفته و هو رايح برجليه و ما منعتوش
البنت / ما تقوليش كدا بس يا عمتى ان شاء الله يرجع بالسلامه
انتصار / يارب يا سماح يا بنتى يارب طب ندرا عليا ان رجع لعمل ليله و افرق على اهل البلد كلهم
فاطمه / طبعا امال ايه هو بس يرجع و لا ايه يا سماح
سماح / ربنا يرجعه بالسلامه يا ماما
انتصار / يارب
مريم بتطبطب على مامتها و فاطمه و سماح بيبصوا لبعض
…………………
فى بنزينه على طريق فوسط صحرا
عربيات الاجانب عربيه فخمه و اربع عربيات بوكس كبيره ورا بعض تقف تمون و عربيه مختار مرقباهم من بعيد و معاه تلت شباب
شاب 1/ مش هنلاقى فرصه احسن من دى
مختار يهز راسه الاربعه يطلعوا مسدساتهم و يشدوا الاجزاء و ينزلوا يتسحبوا و يحوطو البنزينه كل واحد فى اتجاه و مختار يتسحب يقرب من العربيات و يحط فوق العجل قنابل صغيره اول عربيه التانيه التالته واحد يحط مسدس على دماغه مختار يقف و يرفع ايده لفوق
راجل / مووف ( اتحرك )
مختار يمشى قدامه و يتحرك خطوه اتنين تلاته
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
