رواية البر التاني الفصل الثالث 3 بقلم لولو محمد
رواية البر التاني الجزء الثالث
رواية البر التاني البارت الثالث
رواية البر التاني الحلقة الثالثة
شيري / انا اتكلمت مع هند و قالتلى ان فى حاجه انت بتعملها بتضايقها منك
يوسف / و ما اتكلمتش فيها معايا علاطول ليه
شيري / مهى خافت تتعصب عليها
يوسف / حاجه ايه دى اللى بتضايقها منى
شيري / انك مش بتسالها هى عاوزه ايه يعني انت النهرده خدتها محل الايسكريم من غير ما تقولنا و انت عارف انى هعمل اكل
يوسف / هو حضرتك اللى زعلانه و لا هند
شيري / انت حتى ما خليتهاش تطلب اللى هى عوزاه
يوسف / ايه التفاهه دى ما تقول لو مش عاجبها اللى انا طلبته ما تقول لا انا عاوزه كذا هو انا عارف ايه فى مخها شيري / يا ابنى انا بكلمك عشان اوفق بينكوا و نحل الموضوع
يوسف / و انا هاجى مخصوص عشان نحله مع السلامه عشان سايق
يوسف يقفل السكه
شيري / يوسف يوسف
شيري تبص على الباب تلاقى هند واقفه تتصل بمحمود
شيري / ايوه يا محمود ازيك
………………………
فى المحل
محمود / انا كدا كدا جايلك فى الطريق ما تقلقيش سلام
حمدى / فى ايه يا محمود
محمود / ست هند يا سيدى ما بنلحقش نخلص خلينا بقي كل يوم و التانى نسيب حالنا و مالنا و نجري نراضي في ست هند و زعل ست هند
حمدى / ما قولتلك يسيبها و الف من تتمناه و هى ربنا يوفقها مع اللى يستاهلها
محمود / قولتله و قالى انه مش رايد غيرها و بعدين هى هتلاقي احسن من يوسف فين دا بيتمنالها الرضا ترضا هى اللى من كتر الدلع اتمرعت
حمدى / انا جاى معاك اتحرك
محمود / خلى بالك من المحل يا ابني
حمدى و محمود يمشوا
………………….
فى شقه مختار
مختار و عبد الله بيلعبوا فيفا على اللاب و هشام و ماجد بيشجعوا و صوت اللاب عالى
عبد الله / هقطعك
مختار / الاحلام مش بفلوس
ماجد / اخيرا لقينا اللى ياخد تارنا
مختار / هو الاكل اتهضم و لا ايه
فجاه صوت حاجه بتتكسر و صريخ الاربعه يبصوا على الحيطه بين الشقتين و عبد الله يقوم يجرى و هما وراه عبد الله يفتح الباب و يدخل
هند / انت بتعمل كدا ليه الموضوع مش مستاهل كل ده
يوسف / انتى عاوزه تجنينينى
هند / انت مجنون خلقه
يوسف يحاول يلطشها بالقلم عبد الله يهجم عليه يجيبه فى الارض
عبد الله / ارحمنا بقي يا اخى ما سبتش مكان الا لما فضحتنا فيه
هند و شيرى يحاولوا يفكوا الخناقه
هند / سيبه يا عبد الله سيبه
مختار و صحابه يدخلوا يسحبوا الاتنين بره الشقه و هند و شيرى بيعيطوا
يوسف / انت فاكرنى مش هقدر عليك انا بس مش عاوز ائذيك
عبد الله / ائذيني لو راجل ائذيني
شيري / اسكت بقي ابوك و عمامك جايين
عبد الله / دا بيتهجم عليها فبيتنا عوزانى اسكتله
مختار / تعال عندى يا عبد الله لحد ما تهدى
مختار يشد عبد الله و هو بيصرخ
عبد الله / سبني عليه بقولك سبني سبني
مختار يزق عبد الله فى شقته و ماجد و هشام يقفلو الباب
يوسف / قسما بالله لو واحد تانى عمل الحركه دى
شيري / ليه يا يوسف ايه اللى وصل الدنيا لكدا ليه
يوسف / فاضل ايه اعمله ما عملتوش قوليلى فاضل ايه
هند / ما تعملش لو هتمن عليا بعمايلك ما تعملش
يوسف / شايفه بنتك
هند تدخل اوضتها و تقفل عليها الباب يوسف يجي يدخل مختار يشده و الجيران تتلم من فوق و تحت
مختار / ما تكبرش الموضوع الناس بتتفرج علينا تعال عندى شويه لحد ما الكبار يجوا
يوسف / مش قولتلك دى مسائل عائليه ما تحشرش نفسك فيها و لا انت ما بتفهمش و لا جنازه و تشبع فيها لطم و لا انت ايه حكايتك بالظبط
مختار يمسك يوسف من دماغه جامد و يخلى عينه فى عينه
مختار / لتانى مره بقولك انت اللى بتعمله ده بيسيئلك و يسيئلها اهدى كدا و ركز الدنيا حواليك والعه
يوسف يزق مختار مختار يزقه بقوه اكبر يقع فى الارض يقوم بسرعه يهجم على مختار عشان يوقعه من على السلم الناس تدخل و شيري تصرخ هند تطلع و عبد الله و ماجد و هشام يطلعوا و يفصلوا مختار عن يوسف محمود طالع يجرى ووراه محمد و حمدى
محمود / ايه اللمه دى في ايه يلا كل واحد يروح على بيته يلا
عبد الله / يوسف حاول يضرب هند بالقلم
محمود / نتكلم جوه نتكلم جوه
محمود يشد يوسف و يدخلوا جوه يوسف يبص لهند تبص الناحيه التانيه
عبد الله / انت هتسكت يا بابا لو انت هتسكت والله ما هسكت
محمد / معلش يا مختار يا ابني تخلى عبد الله معاك و تهديه شويه
مختار / تعال يا عبد الله
عبد الله / لا مش هسيبها لوحدها وسطيهم
مختار / تعال يا عبد الله ما تضيعش حقها بعصبيتك
عبد الله / كدا كدا ضايع هما هيضيعوه وسع
هشام / اهدى يا عبد الله مش كدا يجرالك حاجه
ماجد / تعال بس اهدى هما كبار و الموضوع هيتلم اهدى بس و تعال
التلاته يشدوا عبد الله يدخلوه محمد يروح ناحيه هند
محمد / تعالى
هند تدخل معاه و حمدى وراهم و الناس تتفرق
……………………..
فى السرايا
فاطمه قاعده فى اوضتها و معاها الماشطه بتعملها ضوافرها الباب يخبط و سماح تدخل
سماح / خالتى انتصار بتدور عليكي
فاطمه / بتدور عليا ليه هى يعني مش عارفه ان ام داوود عندى
سماح / لا قولتلها بس الناس بدات تيجي و ما فيش ستات كفايه فى المطبخ
فاطمه / نعم يا روح امك و انا مالى و هو يعني المره فى الشهر اللى بهتم فيها بروحى تعملولى فيها ليله و تنزلونى المطبخ قولى لانتصار انى فى الحمام
ام داوود / لو تحبى اجيلك بكره
فاطمه / احب تخليكي فى حالك
ام داوود تكمل شغل
فاطمه / مالك يا بت مسهمه كدا ليه ما تروحى تشوفي اللى وراكى
سماح / ما تشوفيلى حجه و تخليني معاكى
فاطمه / ادخلى الحمام و اقفلى عليكي و ان حد كلمك قوليله بطنك سابت هو انا اللى هعلمك دا ايه الجيل المنيل ده
سماح تبصلها و تمشي و تقفل الباب وراها
………………………
فى شقه هند
الكل قاعد و محمود متعصب
محمود / يعني الجدع يعملك ايه عشان يراضيكي الا ما فى مره كلمه شكرا
هند / انا ما قولتلوش يعملى حاجه
يوسف / انا ما كانش قصدى احدف الفازه انا ايدى جت فيها بالغلط و انا عصبى
هند / و لما كنت عاوز تضربني
يوسف / الموضوع ما كانش هيوصل لكدا انا عارف نفسي رفعت ايدي اه بس ما كنتش هنزلها
هند / و هى عادى انك ترفعها
يوسف / يعني انتى ما غلطتيش
هند / هى تلاكيك و خلاص انا كلمتك
يوسف / لا بقي نقعد و نتحاسب اول ما ركبتي العربيه قولتى ايه
هند / مش فاكره فكرنى
يوسف / قولتى الجو حر جدا حصل و لا لا
هند / مهو حر فعلا
يوسف / شغلتلك التكييف و خدتك جبتلك الايسكريم مش عاجبك تقولى مش تسكتى و تيجي تتقمصي و تعملى نفسك نايمه و تشتكيني لامك
شيري / والله ما اشتكت
محمود / يعني انتى اللى بتوقعى بينهم يا شريهان بقي احنا يطلع عينا عشان نوفق الدنيا و انتى تخربيها
شيري تبص لمحمد باصص فى الارض و ساكت
شيري / اخص عليك يا محمود بقي انا اعمل كدا
يوسف / لو سمحتى يا طنط بعد كدا لو فى اى مشكله عند هند معايا هى اللى تكلمني احنا هنتصالح و انتوا هتفضلوا شايلين
شيرى تبص لهند و تبص لمحمد هند تقوم و تدخل المطبخ
حمدى / اعمليلنا شاى معاكى يا هند
…………………….
فى شقه مختار
عبد الله قاعد بيفرك و ماجد و مختار قاعدين يهدوه
ماجد / كنت بقول ايه النهرده الصبح
مختار يزغر لماجد
ماجد / البيوت ياما بيحصل فيها يعني دا مصارين البطن بتتخانق يعني و لا ايه يا عبد الله
مختار / الشاى يا ابني
هشام يدخل شايل صينيه شاى
هشام / احلى شاي
مختار يناول عبد الله الكبايه
مختار / خد اهدى
عبد الله / هما اتاخروا اوى صح
هشام / صوتهم هدى يبقي اكيد الموضوع اتحل يعني
عبد الله يبص لهشام و يبص لمختار و يرجع يبص فى الارض و هو بيفرك
مختار / الا انت ما عندكش دروس النهرده و لا ايه
عبد الله / مش رايح كدا كدا ما فييش دماغ تفكر و لا تركز
مختار / ما ينفعش يا صاحبي مستقبلك ما فيهوش هزار و حرام تيجي فى الاخر و تضيع تعبك
عبد الله يهز راسه و مختار و صحابه بيبصوا لبعض
………………….
فى شقه محمد
شيري / الموضوع مش موضوع ايسكريم يا جماعه انتوا بتتكلموا فى ايه
حمدى / هو مفيش موضوع اصلا و كبر على الفاضي استهدوا بالله يا جماعه
يوسف / لا اله الا الله حقك عليا يا عمتى انى اتعصبت و ان شاء الله هجيبلك فازه احلى من اللى اتكسرت
شيري / فداك يا حبيبي عدن ياسمينا اللى كسرتها
محمود / علمى هند ان الاسلوب ده ما ينفعش فى حاجه مضيقاها تقول احنا مش هنعيشلهم العمر كله نحل فى مشاكلهم
شيري / ربنا يديك طوله العمر
حمدى / هى البت هند اتاخرت فى عمايل الشاى كدا ليه
شيري / هقوم اشوفها ثوانى و بالمره ابص على ياسمينا زمانها لزقه عينها فى الموبايل جوه
شيرى تقوم تفتح باب الاوضه تلاقي ياسمينا نايمه على السرير و ماسكه الموبايل تبتسم و تسيب الباب مفتوح و تروح المطبخ تلاقي هند فى الارض و السكينه جنبها قاطعه شرينها شيري تصرخ
شيري / بنتااااااااى
شيرى تجرى على هند و تحاول تفوقها يوسف يدخل يشوفها يتصدم و يبعد شيرى و ياخد هند و يشيلها عمامه يوسعوله
يوسف / اوعوا اوعوا هند ردى عليا يا هند
عبد الله يفتح الباب و يشوف المنظر يوسف شايل هند يشدها منه
عبد الله / ابعد عنها هاتها
شيري / سيبه يا عبد الله خلينا نلحقها اوعى
كلهم يجروا بيها على المستشفي و يسيبوا باب الشقه مفتوح و مختار و صحابه واقفين على السلم
ماجد / مسكينه
مختار يروح يقفل باب شقه محمد يسمع صوت من جوه يدخل
هشام / انت رايح فين يا ابني ما يصحش كدا
مختار يعدي على المطبخ و يبص على الارض و الدم اللى عليها بحزن هشام و ماجد يدخلوا وراه
ماجد / لا اله الا الله
مختار يروح اوضه هند اللى خارج منها الصوت يزق الباب يتفتح ياسمينا نايمه على السرير بتتفرج على الموبايل يروح يقعد جنبها و يلعب في شعرها تبصله و تبص للموبايل تانى
هشام يدخل ووراه ماجد
هشام / ايه ده هما نسيوها .. الحمد لله انك ما قفلتش عليها الباب دا كان زمانها اتفلقت من العياط
ماجد / بس هنعمل فيها ايه دى
مختار / هكلمهم اطمنهم عليها
مختار يسحب الموبايل من ايد ياسمينا تعيط و تقوم تحاول تاخده منه
ياسمينا / هات الموبايل بتاعى
مختار يرجعهولها و ينفخ
ماجد / فى ايه
مختار / معليهوش لا نمر و لا شريحه اصلا شكله موبايل قديم و سايبنهولها تلعب بيه
هشام / طب ما يمكن هى حفظاه ياسمين حبيبتي
ياسمينا/ اسمى ياسمينا مش ياسمين انا واحده بس
هشام / ايه البت اللمضه دى طب تعرفي رقم ابوكى او امك او اى حد من عيلتكوا
ياسمينا / طلع العيال دى بره يا مختار
مختار / ههههههههههههههههههه
ماجد / لا بنت عم يوسف فعلا
مختار / صحيح ما حدش فيكوا معاه رقم يوسف
هشام / و رقم الكائن ده هيعمل معايا ايه
مختار / بس ممكن نجيبه من على الفايس او جروب الدفعه
كلهم يطلعوا موبايلاتهم يدوروا على رقم يوسف
ماجد / مش فاهم انا ساكن جنبهم و ما عكش رقمهم
مختار / نقطنى بسكاتك و دور على الرقم
…………………..
فى السرايا
فاطمه خارجه من حمام اوضتها و لابسه برنص قصير و رابطه شعرها بفوطه باب الاوضه يخبط
فاطمه / مين
انتصار / انا انتصار يا فاطمه افتحى
فاطمه تشيل الفوطه و تفك شعرها ينزل مبلول على وشها و تروح تفتح
فاطمه/ بتخبطى من بدرى اصلى كنت باستحمى ما سمعتكيش
انتصار / جيت اطمن عليكي اصلك طولتى اوى النهرده فى اوضتك حتى بعد ما ام داوود مشيت ما نزلتيش قولت لتكونى تعبانه و لا حاجه
فاطمه / يادوب استحميت و لسه كنت هلبس و انزل اشوف لو ناقصكوا حاجه اساعدكوا
انتصار / كتر خيرك و جايه على نفسك كدا ليه ما تخليكي كمان شويه لتدوخى مننا و لا حاجه
فاطمه / كتر خيرك انا مش هرد عليكي عشان بحبك
انتصار / هو انتى ما كنتيش عارفه اننا عندنا ليله النهرده و دبيح و ناس هتيجي تاكل
فاطمه / ما انا كنت مرتبه مع الوليه و نسيت اقولها لقيتها طبت عليا اتحرجت اخليها تمشي بعد ما ضربت المشوار اصلها كانت محتاجه فلوس و انتى عرفاها نفسها عزيزه ما تقبلش الحسنه من حد دا انا حتى خليتها تعملى حاجات ما كنتش محتاجاها
انتصار / لا الشغل باين ما شاء الله ما تنسيش تطمنى على بنتك بطنها بتوجعها و تعبانه حبيت اقولك يعني بصفتك امها يعني عن اذنك
فاطمه / تسلميلي يا حبيبتي ما اتحرمش منك و لا من دخلتك عليا ربنا يتقبل منكوا و يباركلكوا فى مختار
انتصار / ربنا يبارك فى الجميع يا حبيبتي بالاذن
انتصار تمشي و فاطمه تقفل الباب وراها و هى مبتسمه
…………………………..
فى المستشفي
شيري واقفه بتتكلم مع الدكتور و محمود واقف جنبها
شيري / يعني هتبقي كويسه هتخف و تقوم بالسلامه ان شاء الله
الدكتور / الحمد لله اتلحقت فى الوقت المناسب بس ياريت تعرضوها على دكتور نفسي يشوف ايه اللى وصلها للحاله دى
شيري / حاضر
الدكتور / لازم حضرتك كمان تتكلمى معاها اللى حصل ده لو ما اتعالجش بشكل مناسب وارد جدا انه يتكرر
شيري / لا يا دكتور ان شاء الله لا
الدكتور / عن اذنكوا
الدكتور يمشي و شيري تعيط
محمود / الف حمد و شكر ليك يارب طب والله لادبح حاجه لسلامتها انا عارف بس ايه اللى كبر المواضيع بالشكل ده
شيري / كفايا بقي يا محمود ابوس ايدك البت كانت هتروح مننا العيال ما بيتفقوش
محمود / تقوم بالسلامه و اللى يريحها نعمله المهم تقوم
محمد يدخل هو و حمدى مسنده
شيري / عامل ايه يا خويا دلوقت احسن
حمدى يسند محمد و شيري تساعده يقعد
حمدى / ضغطه عالى الدكتور اداله حبايه تحت اللسان تنزله بس هو صمم يقعد قدام اوضه هند عشان يطمن عليها
محمود / الحمد لله يا خويا اطمن بقت كويسه و زى الفل امال الواد يوسف فين
حمدى / جاله تليفون تلاقيه مع عبد الله و ياسمينا فى الكافتريا فوق
محمد / كلمهم خليهم ينزلوا بدل ما يتخانقوا تانى
حمدى / حاضر
حمدى يطلع التليفون و يتكلم
………………….
فى السرايا
مريم قاعده جنب سماح نايمه فى السرير
مريم / عامله ايه يا حبيبتي احسن
سماح / احسن الحمد لله
الباب يتفتح و تدخل فاطمه و ست تانيه شايله كبايه ينسون
فاطمه / سلامتك يا حبيتي فيكي ايه
الست تناول سماح الينسون
الست / بطنها بتوجعها و اسهال و ترجيع
فاطمه / هو انتى يا مقصوفه الرقبه مش هتبطلى رمرمه و طفاسه بقي هتفشولى يا بنت الجزمه
سماح / والله ما كلت حاجه
الست / تلاقيه برد فى معدتها
فاطمه / طبعا مشغلالى التكييف طول الليل و نيمالى عريانه
انتصار تدخل و فى ايدها طبق فيه شوربه و حته فرخه
انتصار / ابقي اتعبى نفسك و طلى عليها بالليل و غطيها
فاطمه / و هى صغيره يعني على العموم احاول مع ان ابو عباده بيضايق اوى لما بقوم من جنبه وهو نايم
انتصار و الست يبصوا لبعض
الست / احسن دلوقت يا حبيبتي
سماح / الحمد لله تسلمي يا خالتى
انتصار / طب هنسيبك ترتاحى اكليها بقي يا فاطمه يلا يا رشا يلا يا مريم
رشا / لو لسه تعبانه ناديني
سماح تبتسم و رشا و انتصار و مريم يمشوا سماح تتعدل فى قعدتها و فاطمه تروح تقعد جنبها
فاطمه / يا باى من دى عيله .. جدعه يا بت
سماح تبص لفاطمه و مبسوطين
…………………
فى المستشفي
شيري مفزوعه و الكل بيحاول يهديها
شيري / يعني ايه
محمود / انا هاخد العربيه و اجرى على البيت اجيبها
حمدى / ما عبد الله راح
شيري / يا حبيبتي يا بنتي كان عقلي فين بس انا كنت فكراها معاك يا محمد ننسي البت ننسي ضنانا
محمود / طب ما قالش ليه كنت وصلته اسرع من المواصلات
شيري / يا حبيبتي يا بنتي زمانها مفزوعه لوحدها زمانها اتفلقت من العياط قلب امك يا ضنايا اعمل ايه اسيب الراقده جوه و لا اجرى و را التانيه احنا قفلنا الباب صح
الكل يبص لبعضه
شيرى / ما داهيه لتكونوا سبتوا الباب مفتوح و تنزل اااااااه يا بنتي اه لا انا مش هستني انا هروحلها بنفسي
شيري تقوم و لسه هتمشي تلاقي يوسف داخل و معاه ياسمينا شايله كيس حلويات فى ايد و بتشرب عصير بالايد التانيه شيري تجري تاخدها فى حضنها
محمود / عفارم عليك يا يوسف دا احنا ركبنا كانت بتخبط فى بعض
يوسف / من ايه بس ما انا اكيد ما كنتش هسيبها فى البيت لوحدها اخبار هند ايه فاقت اتحسنت
شيري / الف حمد و شكر ليك يا رب الف حمد و شكر ليك يا رب
حمدى / الحمد لله هى بس نايمه دلوقت
محمود / كلموا عبد الله بقي لحسن دا جرى على البيت افتكرنا نسيناها لوحدها هناك
يوسف / انا هكلمه اهو
يوسف يروح فى جنب و محمود يشيل ياسمينا
محمود / حلوه الحلويات اللى جبهالك ابيه يوسف
شيري / اه قولتله شكرا … ماما عاوزه اعمل بي
شيري تقوم و تاخد ياسمينا و يروحوا الحمام
حمدى / اهدى بقي يا محمد اهو الحمد لله ربنا اللهم يوسف و لحقها هدى نفسك بقي الدكتور قال ايه
يوسف يرجع
يوسف / ما بيردش بعتله رساله هعمل ايه يعني
محمود / كتر خيرك لحد كدا
اخوهم الرابع يدخل بيجرب
الراجل / فى ايه مالها هند فى ايه مالها هند يا محمد
محمود / بقت كويسه الحمد لله كبايه وقعت من الرشاقه اتكسرت و عورتها جامد فى ايدها بس هى بقت كويسه الحمد لله الحمد لله انها ما كانتش لوحدها
محمد يبص لمحمود و يوسف و يرجع يبص فى الارض
………………………
فى شقه عبد الله
عبد الله يدخل يلاقي المطبخ نضيف يروح يقعد فى اوضته الباب يخبط يتنهد و يقوم يفتح يلاقي مختار
عبد الله / اتفضل
مختار / انا اسف انا عارف انك اكيد مرهق و كدا بس
عبد الله / انا مش عارف هى عامله ايه انا و يوسف ما ينفعش نقعد فى مكان واحد
مختار / تقوم انت تمشي و هو يقعد
عبد الله يبص فى الارض
مختار / تحب تيجي تقعد معايا لحد ما يرجعوا
عبد الله / لا شكرا انا عاوز اقعد لوحدى
مختار / لو ما وراكش مزاكره تعال ننزل نلف بالعربيه شويه نغير جو
عبد الله يهز راسه لا
مختار / طب تحب اخليني معاك هنا يعني لو مش هتقل عليك
عبد الله / اتفضل بيتك و مطرحك
عبد الله يفتح الباب
مختار / هجيب الكتاب اللى كنت بزاكر فيه و اجيلك نشجع بعض على المزاكره
عبد الله يهز راسه و يدخل مختار يروح بيته بسرعه يجيب كتاب و يرجعله و يقفل الباب وراه
………………………
فى المستشفي
الكل ملموم حوالين هند
محمود / انا قولت هدبح حاجه لله بمناسبه سلامتك بكره الصبح ادبح و افرق
هند تبص لعمامها و ابوها و امها
هند / هو عبد الله فين
شيري / روح يزاكر ما استحملش جو المستشفي
هند تهز راسها
حمدى / عمتك كانت عاوزه تيجي بس احنا قولنا نخليهم يستنوا شويه لحد ما تشدى حيلك و تقومى بالسلامه
شيري / انا قولت بلاش لمه المستشفي يبقوا يجولنا بكره فى البيت احسن
هند تهز راسها
حمدى / انا بقول نسيبك احنا كمان ترتاحى
محمود / خليك معاهم يا يوسف يمكن يحتاجوا لحاجه معاك فلوس
يوسف / معايا يا بابا ما تقلقش
محمد / انت صاحي من بدرى يا ابني و اكيد
يوسف / خليني مش مشكله
الرجاله يسلموا على بعض و يشاوروا لهند يمشوا يوسف يشد كرسيه و يقربه من هند
يوسف / ليه كدا يا هند ليه تقلقينا عليكي كدا
شيري / خلاص يا يوسف
يوسف / انا والله ما هعمل كدا تانى هبقي اسالك فى اى حاجه قبل ما اعملها و لو عملت اى حاجه تدايقك قوليلي بس ما تعمليش كدا تانى
هند / انا اصلا ما اعرفش عملت كدا ازاى
شيري / المهم ما تعمليهاش تانى
هند تبص لمامتها بحزن
هند / ماما انا تعبانه و عاوزه انام
يوسف / انا هسيبك تنامى و هستنى بره لو عوزتى اى حاجه نادينى
هند / روح يا يوسف روح ارتاح و انت كمان يا بابا شكلك تعبان اوى روح ارتاح فى البيت ماما معايا
يوسف / و هى عمتى لوحدها هتعمل ايه افرضى احتاجتى حاجه افرضى ناقصك حاجه طلبوا حاجه
هند / ما تتعبنيش يا يوسف هتنام على الكرسى بره يعنى
يوسف / انام مالكيش دعوه هو انا اشتكيتلك
هند / براحتك انا مش قادره لجدال
شيري / بقولك يا يوسف لو مش هتعبك
يوسف / مش هتتعبيني
شيرى / تروح عمك و تخلى عبد الله يجيبلنا شويه حاجات لزوم البيات عبد الله هيقدر ينام هنا فى الاوضه و اهو لو احتاجنا حاجه اهو معانا
يوسف / تمام اكتبيها فى ورقه و انا
محمد / ما انا موجود يا شريهان
شيرى / انت مش شايف شكلك انت لازم تنام و ترتاح و تهدى احنا مش هنقدر نعيش لو جرالك حاجه
هند / روح ارتاح يا بابا عشان خاطرى
محمد / و هو انا هشوف الراحه فى بيت انتى مش فيه
شيري / دا سواد الليل يا محمد عدى اليوم بدل ما التعب يزيد عليك عشان خاطرى و عشان خاطر هند
محمد يبصلهم
يوسف / قوم يا عمى اروحك هاخد ياسمينا معايا
شيرى / لا خليها معايا مفيش حد بيعدل مزاج هند زى ياسو صح يا هنوده
هند تبتسم و تهز راسها يوسف يهز راسه و يروح يسند عمه و يمشوا و شيرى بتوصلهم للباب
شيرى / هبعتلك الطلبات على واتس عبد الله هيجهزها على ما تروح عشان ما يوقفكش
يوسف / تمام
يوسف و محمد يمشى و شيرى تقفل وراهم الباب و تروح تقعد جنب هند
شيرى / انا مش هعاتبك و مش هلومك انا اللى ضغطتك انا السبب
هند / كانت لحظه ضعف مش هتتكرر اوعدك
شيرى / مش عاوزه اكتر من كدا اسكتى مش احنا من لهفتنا عليكى كنا سايبين ياسو لوحدها فى البيت
ياسمين / ما كنتش لوحدى
شيرى / ايوه انا بتكلم لحد ما يوسف جه ياخدك
ياسمين / مهو عمو مختار كان معايا و هو اللى كلم ابيه يوسف يجى ياخدنى هو قاله لو عاوز افضل معاه بس ابيه يوسف صمم يجى ياخدنى
شيرى / ربنا يباركله من يوم ما سكن جنبنا و القران ما انطفاش من شقته و الصلاه فى وقتها فى المسجد و ابوكى حابه اوى تعرفى انه كذا مره يقولى ياريت عبد الله يطلع زيه
هند / و خد ايه مننا غير فضيحه و مشاكل فى الكليه و فضيحه فى العماره و مشاكل هو ما لوش اى دخل بيها
شيرى / كل دى حاجات احنا ما لناش ذنب فيها و لا هو له ذنب دا نصيب
هند / طب و انا يا ماما الكليه و الييت و الشارع
شيرى / ياما بيحصل فى البيوت كل بيت فيه حاجه بتعكر عليه حياته اللى عنده مشاكل فى الشغل و اللى عنده مشاكل فى الدراسه و اللى عنده مشاكل فى عيلته و اللى فى صحته و اللى فى اخلاقه كل واحد له نصيبه من المشاكل يا بنتى
هند تفرد نفسها و تغمض عنيها و تسكت شيرى تروح تبوس راسها و تفرد الكنبه اللى فى الاوضه سرير
شيرى / يلا يا ياسو معاد النوم تعالى نامى جنبى هنا
ياسمين تروح تنام على الكنبه و شيرى قاعده جنبها و هى بتبص على هند بحزن و بعدين تمسك الموبايل و تكتب
…………………………..
فى شقه محمد
عبد الله يطلع من اوضه هند و يحط شنطه على الارض
مختار / جبت كل حاجه
عبد الله / كل الحاجات اللى بعتتها بزياده
مختار / انا معايا عربيه تحب اروح اوديها
عبد الله / مفيش داعى يوسف بيه اللى هياخدها
مختار / المهم انها بقت كويسه و بكره هتروح فك الوش الخشب ده بقى
عبد الله / هتروح مؤقتا ما دام المعطيات واحده يبقى لازم تدى نفس النتيجه
عبد الله يدخل المطبخ و مختار يدخل وراه
مختار / تقصد ايه
باب الشقه يتفتح و صوت يوسف
يوسف / على مهلك يا عمى على مهلك
عبد الله و مختار يطلعوا يجروا يسندوا محمد و يقعدوه
يوسف / انت هنا بتعمل ايه
عبد الله / قاعد معايا فى بيتي
مختار / انا كنت قاعد مع عبد الله عشان ما يبقاش لوحده بس بما انكوا جيتوا اروح انام انا بقي صاحي من بدرى
عبد الله / خليك يا مختار
مختار / اخليني اعمل ايه بس انت لازم ترتاح و عمى ابو عبد الله كمان شكله تعبان اوى و محتاج يرتاح
عبد الله يهز راسه مختار يحط ايده على كتف محمد محمد يبصله
مختار / قدر و لطف عن اذنكوا
محمد يبتسم مختار يمشي عبد الله يجيب الشنطه و يديها ليوسف
عبد الله / اتفضل
يوسف / سلام
يوسف ياخد الشنطه و يطلع يقفل الباب وراه و يبص على شقه مختار و يروح يخبط عليه مختار يفتح
يوسف / هو احنا مش اتفقنا اننا عيله مع بعض ما تدخلش نفسك فى حوارات انت مش قدها
مختار / انا ما ادخلتش بس انا عاوز اسالك سؤال
يوسف / اتفضل
مختار / انت راضي عن نفسك و اسلوبك انتوا عيله مع بعض و العيله يعني سند لو كان جرالها حاجه
يوسف / ما كانش هيجرالها و تانى احنا بينا و بين بعض ما لكش دعوه اسمع يا مختار من الاخر اوعى تفتكر انى نسيت اللى حصل و لا حتى انى هنساه انا بس غمضت عيني عشان الم الموضوع بس لو تحب افتحه
مختار / الحقيقه احب صدقني ما كنتش عاوز بس لو انت تحب انا احب اوى قولتلك قبل كدا انا مش بتاع مشاكل بس لو المشاكل ليها شوق فيا اهلا و سهلا
مختار و يوسف يقفوا فى وش بعض عبد الله يفتح الباب و فى ايده كيس الزباله
يوسف / مره تانيه عشان مستعجل
يوسف ياخد الشنطه و يمشي
عبد الله / كان عاوز منك ايه ده
مختار / بيعتزر عن اللى حصل
عبد الله/ ما حدش علمك ان الكدب حرام
عبد الله يرمى الكيس فى باسكت على السلم
مختار / فى كدب حلال
عبد الله يبصله و يبتسم
عبد الله / انا بحبك على فكره
مختار / القلوب عند بعضيها
عبد الله يبتسم و يدخل شقته
عبد الله/ تصبح على خير
مختار / و انت من اهل الخير سلام
كل واحد يدخل شقته و يقفل الباب
…………………..
قدام العماره
يوسف خارج يركب عربيته و يمشي و فيرا قاعده فى عربيه بتبص على شقه مختار نور البلكونه ينور و مختار يطلع يقف و هى متبعاه و مبتسمه تسوق العربيه و تمشي
……………………
فى السرايا
ناصر نايم و انتصار قاعده تتقلب مش عارفه تنام
ناصر / واحده مكانك كانت نامت قتيله بتفكرى فى ايه
انتصار / مفيش حاجه اكمنى بس شربت فنجان قهوه مسهرنى
ناصر / ههههههههههههههه و القهوه دى اسمها فاطمه
انتصار / الله و ايه جاب سيره فاطمه بس
ناصر / ما انتى ما بتفركيش كدا الا اذا كان فى حد من العيال فيه حاجه يا اما فاطمه مطلعه عينك
انتصار تتنهد ناصر يتعدل و يقعد
ناصر / خليني اخمن طلعتلها بحجه جديده و ما حطتش ايدها معاكوا فى حاجه
انتصار / يا سيدى انا مش فارق معايا و هى من امتى ساعدت و لا استنينا منها حاجه انا بتكلم عن بنتها البت طول اليوم ترجيع و اسهال و هى البعيده ايدها فى الميه البارده و حتى لما اتنحررت راحت تهزق البت انها تعبت شوفتش كدا فى الدنيا دا القطه فيها حنيه على عيالها منها يا خويا
ناصر / قلوب
انتصار / و بعدين يعني انا مش قادره افهم عمى شاكر الصراحه دا عياله دول جايين بعد شوقه مش يوصيها عليهم
ناصر / و هو عياله دول بايتين فى الشارع و لا كانت حتى فاطمه دى مرات ابوهم مهى امهم و احن واحده عليهم انتى بس اللى مكبره المواضيع وواخده الدنيا على اعصابك و كدا غلط
انتصار / كتر خيرك هو ده اللى باخده منك
ناصر / شوف الوليه تصدقي انا الحق عليا انى سمعتلك من اساسه بقي انا ما بتاخديش منى حاجه
انتصار / انا اقصد فى المواضيع دى يعني
ناصر / و من امتى الرجاله بتدخل فى حوارات الحريم ان كنت بسمعلك فانا بسمع
انتصار / عشان انا ما اكتمش فى روحى و اطرشق كتر خيرك بس انا نفسي فى حل
ناصر / اللى فيه طبع يا انتصار و هى مش جديده عليكي
انتصار / معاك حق تلاقيني بس كنت متوتره و الدنيا جت ورا بعضيها فمش مستحمله حاجه
ناصر / بقولك ايه
انتصار / قول يا خويا
ناصر / ما تدخلى تكبى شويه مايه على جسمك كدا و تهدى و تيجي نشوف هنعمل ايه على رواقه
انتصار / هنعمل ايه فى ايه
ناصر / يا وليه انتى بقيتي جده و لسه مش عارفه هنعمل ايه فى ايه
انتصار / هههههههههههههههههه الله ما براحه
ناصر / يلا يا انتصار قبل ما الفجر يزنقنا
انتصار تبتسم و تقوم تدخل الحمام و ناصر متابعها و مبتسم
…………………..
فى الكليه قدام المدرج
مختار داخل يسلم على ماجد و هشام
ماجد / ايه الاخبار
مختار / مفيش جديد حجزتولى
ماجد / حجزنا على فكره هباب البرك ما جاش النهرده
مختار / طبيعي ما يجيش يعني هتلاقيه فى المستشفي بيكتبولها خروج
هشام / هو فى حد غيرنا فى الدفعه عرف باللى حصل
مختار / احنا شخصيا ما نعرفش اللى حصل و ما لناش دعوه انا بقولكوا اهو
فيرا تقف بعيد عامله ديل حصان من فوق و لابسه بنطلون جينز سليم كاتيد و عليه قميص جينز و نضاره شمس و بوت بكعب و مكياج سمبل تبص على مختار ترفع النضاره و تقرب منه
فيرا / مختار
مختار يبصلها
فيرا / ثانيه بليز
مختار يبص لصحابه و يروحلها
مختار / خير
فيرا / انا عارفه انك ما بتسلمش فمش همد ايدى انا فيرا
مختار / اهلا و سهلا مين يعني
فيرا / ايه ده هو عباده ما كلمكش عنى و لا ايه
مختار يبص حواليه على صحابه متابعينه باهتمام
مختار / دا لا وقته و لا مكانه
فيرا / تحب اجيلك البيت الساعه كام
مختار / بيت ايه و لا البيت
فيرا / هههههههههههههههههههه امال فين
مختار / سبيلى رقمك و انا هكلمك
فيرا تمد ايدها مختار يطلع موبايله و يديهولها تسجل رقمها
فيرا / ما تتاخرش عليا اجازتى فى مصر مش كبيره
مختار / ما تقلقيش هكلمك
فيرا تدى لمختار الموبايل يمشي يرجع لاصحابه
ماجد / مين الصاروخ دى
مختار / ما تاخدش فى بالك يلا نلحق المحاضره
هشام / لا بس زوقك عالى اوى ما كنتش اعرف عنك كدا يا نمس
مختار / يا اخى اتلهى هى نقصاك انت كمان
هشام / طب ياريت انا كمان والله ياريت
مختار / مش هنخلص بقي
مختار يسيبهم و يدخل المدرج يدخلوا وراه
ماجد / دى اداب صح تدى اداب والله
مختار / ما اعرفش
ماجد / طب اسمها ايه
هشام / طب عرفتها منين
ماجد / ما تحكى بقي يا اخى ما تبقاش سئيل
مختار / قسما بالله ما اعرفها لسه جايه من طرف ابن عمى عشان اساعدها فى حوار قولتلها مش فاضي دلوقت لما اخلص المحاضره هبقي اكلمها و نشوف الليله فيها ايه هديتوا
ماجد / انت جاحد يلا بقي مزه زى دى تتاجل لبعد المحاضره
هشام / التقل صنعه يا ميجز
ماجد / قدرات يا عم كان نفسي والله ابقي صنايعي بس مجموعى ما جبش
مختار / الله يحرقك يا فيرا مش هنخلص النهرده
ماجد / بالله اسمها فيرا شايف يا وله الدلع
مختار يبص لهشام و يدحكوا
………………………..
فى شقه هند
عبد الله و شيري مسندين هند و يوسف وراها شايل الشنطه و ماسك ياسمينا فى ايده
عبد الله / على مهلك يا هند على مهلك
هند / انا كويسه يا حبيبي
يوسف / زمان ماما شيري تعبانه انا هطلب دليفرى
تحبى تاكل ايه يا هند بسال اهو
هند تبصله و تبتسم و تبص فى الارض
عبد الله / ببتهيالي هيناموا الاول ما تشغلش انت بالك بينا تقدر تروح ترتاح
شيري / عبد الله انت مش عندك درس
عبد الله / مش رايح
هند / عبد الله عشان خاطرى انت الفتره اللى فاتت اهملت دروسك و دى ثانويه عامه عشان خاطرى
عبد الله / انتى وحشاني اوى
هند / هروح فين يعني روح الدرس و انا مستنياك … امال بابا فين
عبد الله / نزل من بدرى صحيت ما لقيتوش ممكن يكون راح الشغل
شيري / انا هكلمه اطمنك انك روحتى و انك كويسه و انت يا سي عبد الله ابوس ايدك قوم خد حاجتك و روح الدرس
عبد الله يبص لهند تبتسمله بحب يبوس ايدها المربوطه و يقوم يبص ليوسف بغل و يوسف عامل مطنش عبد الله يكتم جواه و يروح اوضته
يوسف / ها يا هند ما قولتيش عاوزه تاكلى ايه
هند / انا مش جعانه دلوقت ممكن انام شويه و بعد كدا نشوف
يوسف يبص لشيرى و يرجع يبص لهند و يبتسم
يوسف / هسيبك ترتاحى و هعدى عليكي بالليل
يوسف يروح لشيرى
يوسف / لو احتاجتوا حاجه كلمونى
شيري / تمام
يوسف يمشي و ياسمينا تطلع تنام جنب هند و شيرى تغطيها عبد الله يدخل
عبد الله / انا نازل هتعوزى حاجه و انا راجع اجبلك شيكولاته
هند / انت بتغريني
عبد الله يبتسم
هند / روح الدرس و انا لما اصحي هكلمك اقولك عاوزه ايه
عبد الله / ماشي يلا سلام
شيري تدى لعبد الله فلوس
عبد الله / معايا
شيري / خدهم برده خليهم معاك
عبد الله ياخدهم و يبتسم و يبوس مامته و يشاور لهند تشاورله و يمشي شيري تقعد جنب هند
شيري / قوليلي بقي تحبي اعملك ايه تاكليه
هند / اى حاجه يا ماما بس بجد عاوزه انام
شيري / تصبحى على خير
شيري تسيبها و تقوم و هند تاخد ياسمينا فى حضنها و يناموا
………………..
فى كافيه
مختار يركن العربيه و ينزل يلاقي فيرا قاعده على ترابيزه فى الشارع و قدامها فنجان قهوه يروح يسحب الكرسي و يقعد
مختار / اؤمرى
فيرا / تشرب ايه
مختار / بصي يا ست الكل مفيش كلام يمشي بعد كلام الكبير و ما دام قال لا يبقي لا
فيرا / و كمان عارف انا هكلمك في ايه … على فكره انا هكلمك فى حاجه تانيه خالص
مختار / مفتكرش ان فى بينا كلام
فيرا / فى حاجه على القميص بتاعك
مختار يبص يلاقي ليزر احمر على قلبه
مختار / هههههههههههههههههه تصدقي خفت
فيرا / انا عارفه انك مش خايف و انا مش هقتلك
فيرا تشاور على قميصه مختار يبص ميلاقيش الليزر
فيرا / اسمع يا مختار انا كنت ناويه اقتلك على اللى عملته مع رجالتى بس لما عرفت اللى حصل و لما عرفت انت عملته ازاى و بصراحه لما شوفتك كمان غيرت رايي
مختار / تشكرى مش عارف هودى جمايلك دى فين
الوايتر يدخل
الوايتر / تشرب حاجه يا فندم
مختار / لا شكرا
فيرا / واحد قهوه مظبوط مش انت بتشربها كدا برده
مختار يهز راسه الوايتر يمشي
فيرا / فى شغلتنا دى فى حاجتين مهمين جدا الفلوس و الهيومان ريسورسيز الرجاله يعني
مختار / حقيقي
فيرا / انا عوزاك تشتغل معايا يا مختار انا و انت ممكن نحقق كتير مع بعض
مختار / اسف
فيرا / فكر كويس
مختار / مش عاوز اضيع وقتك انا ما بشتغلش مع حد
فيرا / انا مش بيتقالي لا
مختار / هههههههههههههههههههههههه معلش استحملى المرادى عشان خاطرى
فيرا / عشان خاطرك ؟ تمام … عشان خاطرك هسيبك تفكر و يا ريت تسال عنى
مختار / ليه هناسبك
فيرا / ههههههههههههههههههههه حبيتك حقيقي حبيتك
مختار / الله يحفظك ممكن امشي بقي دا لو مش هيدايقك يعني
فيرا / خد بالك من نفسك اللى اسمه يوسف ده ناويلك على غدر
مختار / انتى كمان عارفه يوسف
فيرا / انا عارفه حتى عن فسحتك اللى وعدت بيها مريم بنت اخوك
مختار الابتسامه تروح من وشه
فيرا / قولتلك اسال عنى و بعدين فكر
مختار / اسالي انتى عن عيله الزيني و بعد كدا اللعبي معانا
فيرا / يعني تفتكر هعرف كل المعلومات دى عنك من غير ما اكون عارفه عيله الزيني من كبيرها لصغيرها
مختار يقوم يقف
مختار /فكرت
فيرا تتعدل فى قعدتها
مختار / لا
مختار يمشي و فيرا مبتسمه و هى بتابعه
…………………….
فى شقه هند
العيله كلها متجمعه حواليها
ست ١ / لا تبقي تاخدى بالك بعد كدا مش كل مره تسلم الجره
هند / ان شاء الله
بنت ١ / بس احنا عاوزين نحتفل بسلامتك ما ليش دعوه
ست ٢ / يا لهوى عليكي هو اى مصلحه و السلام
بنت ١ / و احنا بنعرف نطلع بمصالح فى العيله دى غير على حس هند و لا ايه يا يوسف
يوسف / هى بس تقوم بالسلامه و اخدكوا احلى فسحه و اهو بالمره نغير جو كلنا و نفك من توتر المزاكره ده و لا ايه يا عبد الله
عبد الله / و لا ايه يا عبد الله عن اذنكوا
عبد الله يسيب المكان و يمشي
حمدى / انتوا لسه قافشين على بعض
يوسف / انا والله حاولت اصالحه
شيري / هو مش زعلان منك هو الموضوع ان …
هند / قفش مع مستر الفيزيا عشان بقاله فتره ما بيروحش بسببى
ست ٢ / يا اختى انا عارفه المدرسين دول مالهم طالعين فيها كدا ليه
ست ١ / لا بس هو خايف عليه عبد الله شاطر و بكره يبقي
دكتور قد الدنيا و لا ايه يا شريهان
شيري / من بقك لباب السما
يوسف / بقولك ايه يا جماعه ما تيجوا اوصلكوا و نسيب هند ترتاح عشان عندها كليه الصبح
الكل يقوم
محمود / هبقي اكلمك بكره اطمن عليكي
هند / تسلملى يا عمى شكرا
الكل يسلم على هند و يمشوا
يوسف / هعدى عليكي الصبح اوصلك
هند / مش هقدر اروح يا يوسف خليني كدا ارتاح و بعدين لما اجى اروح هبقي اقولك
يوسف / طب انا هجبلك المحاضرات و اجبهالك بعد الكليه
هند / تمام
يوسف يبتسم و يمشي وراهم و محمد يوصلهم لحد الباب و يدخل اوضته هند تبص لامها و تدخل وراه تلاقيه بينام فى السرير
هند / بابا
محمد يتعدل و يبصلها
هند / هو حضرتك زعلان منى انا عارفه انى خضيتكوا عليا بس انا والله ما عارفه انا عملت كدا ازاى كانت لحظه شيطان وحشه اوى
محمد يفتح لهند دراعاته تروح فى حضنه
محمد / انا ما عنديش فى الدنيا دى اغلى منك يا هند لو كان جرالك حاجه
هند / الحمد لله ربنا ستر و انا مش هكررها
شيري تدخل
شيري / يااااااه الواحد تعبان اوى دا انا هحط راسي على المخده للصبح
شيري تنام فى السرير و تبص لهند
شيري / هو مش ليكي اوضه برده و لا انتى ناويه تنامى معانا
هند / ههههههههههههههههه شايف يا بابا ماما بتطردنى الله يسهلوا
شيري / امشي يا قليله الادب
هند تبتسم و تبوس ابوها شيري تقرب هند تبوسها هى كمان و تطلع بره و تقفل الباب وراها
محمد / انا هقول لمحمود بكره ان يوسف يبعد عن هند و اللى يحصل يحصل
شيري / عين العقل
محمد / حب يفك الشراكه و يديني حقى اهلا و سهلا ما ادانيش يبقي حسابه مع ربنا
شيري / ما تدايقش نفسك و لا تشيلش هم انا كمان هحاول الم ايدي فى المصاريف على قد ما اقدر و فى حتتين دهب كنت شيلاهم للعيال جهازهم و جوازهم خدهم بيعهم و اعملك بيهم مشروع لوحدك و كفايا بقى نضغط على البنت بالشكل ده هنستني ايه تاني لما نستلمها المره الجايه جثه
محمد / هو يوسف مش وحش بس اسلوبه و عصبيته هما اللى مبوظين كل حاجه
شيري / دلعهم فيه ديك البرابر الحيله يلا ربنا يهديه
محمد / امين يلا تصبحى على خير
شيري / و انت من اهله
شيري تعدل الغطا و تنام
………………
فى الصاله عند هند
هند قاعده بتقرا فى كتاب بتاع مختار جواه ورق و ملاحظات كتير جدا تسمع صوت فى البلكونه
صوت مختار / لا مش هرجع البلد دلوقت انا عندى محاضرات … اللى بيعمل ما بيهددش و مش على اخر الزمن هنخاف من دى … لا انت بس شوف مين دخل البيت و لا مين اتكلم مع حد غريب … ممكن برده فى الليله يكون حد غريب دخل وسط الناس
هند تلبس الاسدال و تطلع البلكونه و فى ايدها الكتاب
مختار / يا سيدي ما تقلقش … هاخد بالى والله حاضر
مختار يبص جنبه يلاقي هند بتشاورله على الكتاب يكمل كلام فى التليفون
مختار / بقولك الحته التسعه ملى اللى كنت وصيتك عليها
هند تدحك
مختار / ملهاش لزمه خلاص … ههههههههه دى حكايه طويله هبقي احكيهالك بعدين … دا من كرم اخلاقك والله … ههههههههههههههه سلام
مختار يقفل و يحط الموبايل فى جيبه
هند / الكتاب ده بتاعك صح
مختار / اسمي عليه يبقي بتاعى
هند / اصلي لقيته عندنا على فكره عجبتني الملاحظات اوى
مختار / خليه زاكرى منه و لما احتاجه
هند / انت بتعمل كدا فى كل المواد
مختار / انتى طمعانه فى الكتب كلها و لا ايه
هند / هههههههههههههههههه لا ما اقصدش انا اقصد اصورها انا كان ساكن جنبي كنز و انا مش حاسه انا كنت عارفه انك شاطر بس كدا طلعت دحيح
مختار / قل اعوذ برب الفلق هتقلب من هنا
هند / ههههههههههههه لا والله بعد الشر انا عيني مش وحشه و لا حاجه
مختار / هصورلك كل الورق بتاعى من عنيا حاضر
هند / انت هتروح الكليه بكره ابعتلك الكتاب دلوقت مع عبد الله او اسيبهولك دلوقت قدام باب الشقه
مختار/ لا مش رايح بكره انا ورايا كام مشوار هعملهم فمش هقدر انام بدرى
هند تبصله باستغراب
مختار / انا خارج دلوقت قصدى و هتاخر
هند / اه فهمت سورى مش عارفه عقلي بيفصل منى ساعات ههههههههههههههههههههه
مختار / عاوز اقولك حاجه محشوره فى زورى
هند / لو بخصوص اللى حصل
مختار / هو بخصوص اللى حصل بصي يا هند لو ينفع اقولك هند عادى
هند / امال هتقولى ايه يعني المهم ما علينا قول
مختار / ممكن اقولك يا بشمهندسه بس المهم انا بيعجبنى الانسان اللى ما بيخافش من الموت لو جاله بس دا مش معناه اننا ينفع احنا اللى نروحله على قد ما بنحب ربنا بس ما حدش فينا ضامن صحيفه اعماله يعني انتى جاهزه تقابلى ربنا و يحاسبك على اعمالك فى الدنيا مش تدى لنفسك فرصه تاخديلك كام حسنه زياده
هند / على فكره انا مش عارفه انا عملت كدا ازاى كل اللى فكراه انى كنت فى المطبخ بعيط و فجاه لقيتني فى المستشفي بيقولولى انى قطعت شراييني صدقني انا لما عرفت انى عملت كدا فى نفسي عيطت جامد اوى و ادونى حقنه مهدئه و نمت
مختار / المهم ما تكرريهاش مش عشانك عشان ابوكى و امك و اخواتك و الناس اللى هيزعلوا عليكي لو كنتى شوفتي منظرهم انا ما كانش قصدى اضايقك بكلامى على العموم انا هستاذن لازم امشي عن اذنك
هند تهز راسها و تبص فى الارض و مختار يمشي و هند تقف فى البلكونه و هى مضايقه
……………………..
على قهوه
يس / ما تلم الليله يا يوسف بدل ما توسع مننا
يوسف / اللى خايف ما يجيش بس الكلب ده هيتربى هيتربى
شاب 1/ عيب يا يوسف احنا برده مع بعض على الحلوه و المره
يس / و هو انا اعترضت انا بتكلم عليك انت بدل ما يروح يعيط لعمك و عمك يقول لابوك
يوسف / ما لكش دعوه بابويا يا يس انا هعرف اتعامل معاه انا اصلا لو قولتله هيبعت معايا رجاله المحل
شاب 2/ يا رجاله الواد ده فعلا لازم يتعلم عليه النهرده قبل بكره انتوا ما شوفتوش العيال بيبصولنا و يضحكو ازاى فى الكليه بعد اللى حصل
يوسف / و مين قالك اننا هنستنى لبكره
الكل يبص ليوسف يوسف يبتسم
……………………………………….
فى الجيم
مختار بيتمرن على بار و طالع نازل و فى شباب كتير بيتمرنوا حواليه يدخل شاب يجرى على تريدميل جنبه
الشاب / الامانه وصلت
مختار ينزل و يروح يشغل التريدميل اللى جنبها و يبدا يجري
الشاب / الكبير بيقولك خلى بالك من روحك
مختار / و الناس
الشاب / حصل
مختار ينزل من على التريدميل و يدخل الحمام و الشاب ينزل يروح لجهاز تانى ثوانى و اربعه رجاله بدى بيلدينج يدخلوا و ينتشروا واحد منهم يدخل الحمام و الباقي على الاجهزه
…………………..
فى عربيه يوسف
يوسف و صحابه راكنين قدام بيت هند
يس / انت متاكد انه مش فوق
شاب ١ / عربيته مش هنا
يس / ليكون رجع البلد الساعه داخله على اتنين بيعمل ايه بره كل ده
يوسف / دلوقت يروح هيبات بره يعني
شاب ٢ / النهرده شافوه كان بيكلم مزه صاروخ ارض جو ما يمكن
يوسف / ده !!! مختار ده !!!
شاب ٢ / يا عم شافوها بتاخد رقم موبايله البت كانت اوووووف يا جدع
يس / الا عمرنا ما شوفناه حتى بيكلم بنت ولا بيبص على واحده دا كان بيدخل المحاضره بتاعه ١٢ متاخر عشان بيصلى
يوسف / امال انتوا فاكرين ايه اللى زى دول ميه من تحت تبن
شاب ٣ / شكله مش جاى ما تيجوا نروح عندنا محاضره بكره و احنا صاحين من بدرى
يوسف / عاوز تروح اتفضل ما قوتلكش تيجي
يس / اهدى يا يوسف ما يقصدش
شاب ١/ بس للاسف معاه حق احنا هنبات فى العربيه للصبح و سي مختار بيدلع مع الصاروخ
يوسف / نص ساعه لو ماجاش هنمشي
…………………
فى الجيم
مختار خارج من الحمام يلم حاجته فى شنطته على بنج خشب يحس بحركه وراه يتحرك يمين بسرعه الراجل ينزل بعصايه حديد على البنج مختار يديله بالكوع فى وشه و يلف ينط يدوس برجله على ركبته و يطلع يقعد على رقبته و يلف نفسه يقلب الراجل فى الارض يكسر البنج و يقوم يقف باب الحمام يتفتح و يدخل خمس رجاله تلاته منهم يهجموا على مختار الاتنين التانين يساعدوا مختار و يضربوهم
الشاب / انت كويس
مختار / فين امن المكان ده الجدع ده كان بيحاول يسرقني حد يطلب البوليس
تلت عمال يدخلوا
مختار / فين مدير المكان ده هو احنا بنتمرن ببلاش هو اى حد كدا يدخل الجيم
عامل ١ / حقك علينا يا باشا احنا هنكلم البوليس
مختار / و انا لسه هستناكوا اما تكلموا البوليس انا مش جاى هنا تانى … كتر خيركوا يا رجاله مش عارف من غيركوا كنت هعمل ايه
شاب ٢ / اى حد كان ممكن يبقي مكانك قدر و لطف
مختار ياخد شنطته و يمشي و الكل بيبص لبعضه
……………………
فى شقه هند
هند قاعده فى البلكونه بتزاكر فى كتاب مختار عبد الله يدخل يخبط على باب البلكونه
عبد الله / انتى ايه اللى مصحيك لحد دلوقت
هند / بزاكر
عبد الله يروح يقف و يمسك فى السور
عبد الله / انا مش عارف اركز فى حاجه دماغى مليانه كلاب سعرانه بتنهش في بعضها
هند / طب ما تصليلك ركعتين
عبد الله / صليت .. انتى كويسه يا هند
هند / ايوه كويسه الحمد لله كانت لحظه وراحت لحالها
هند تقوم و تقف جنب عبد الله و تحط ايدها على دراعه
عبد الله / المشاكل بتزيد كل يوم عن اللى قبله
هند / كل البيوت فيها مشاكل يا عبد الله ما حدش مرتاح يعني و بعدين احنا احسن من غيرنا بكتير الحمد لله
عبد الله يبص فى الشارع
عبد الله / هى دى عربيه يوسف
هند / و هو يوسف هيعمل ايه هنا السعادى اكيد عربيه شبها هو اللى خلق عربيه يوسف ما خلقش غيرها يعني
عبد الله / و اللى اشترى عربيه زى بتاعه يوسف هيشترى كمان ساعه زى بتاعته وسعى
هند / عبد الله استني يا عبد الله تعال هنا يوووووه بقي
عبد الله ينزل يجرى على الشارع هند تدخل اوضه باباها نايم تروح تقعد جنبه بالراحه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
