رواية عشق الجاسر الجزء الثالث الفصل الثاني عشر 12 بقلم مروة عبدالجواد
رواية عشق الجاسر الجزء الثالث الجزء الثاني عشر
رواية عشق الجاسر الجزء الثالث البارت الثاني عشر
رواية عشق الجاسر الجزء الثالث الحلقة الثانية عشر
في شركه المصرى .
جاسر بعصبيه : انت اتجننت دي متجوزه عقلك فين طيب مش خايف علي نفسك خاف عليها لو اتعرف انها لسه عايشه وانت باعلي صوتك وبكل غباء بتقولها مش هسيبك يا ارسيليا.
شريف بعصبيه : مش هسيبها لو كانت مع مين مش هسيبها تاني.
معتز : عمال افهمه من الصبح وهو علي الكلمه دي.
شريف : مش هسيبها برضوا .. و وقفت بادي جارد عند شركتها وعند الفندق اللي نازلين فيه وعرفت اسمها المستعار ولو فكرت تسافر هتلاقيني في المطار مستنيها.
جاسر بحنق : مش هتسيبها حتي بعد ما تعرف انها حامل من جوزها.
شريف بصدمه : مش هسيبها مهما حصل.
وبعيون امتلات بالدموع انا بس عايز اعرف سابتني ليه زمان .. نسيتني !! مبقتش تحبني ! احنا كنا كويسين ورايح اجيب الماذون وهنتجوز رسمي هربت ليه بعدت ليه !!
جاسر اقترب منه بحزن : فكر في حياتك اللي فات مات يا شريف.
شريف بدموع حضن جاسر : مامتش مامتش ياجاسر بحبها بحبها يا جاسر ومها اقول هنسي مبنساش مبنساش ياجاسر.
جاسر رتب علي كتفه بحنيه : اهدي اهدي ايه اللي حصلك.
شريف ابتعد قليلا وهو يبكي بحرارة : كل ما احاول انساها بواحده تانيه مبقدرش حاولت ادور عليها في مليون ست ملقتهاش اول ما شفتها كنت زي المجنون كان نفسي اخطفها واهرب بيها لابعد مكان ، ارسيليا وحشتني يا جاسر وحشتني قوي.
معتز : ومراتك وبيتك يا شريف.
شريف نظر لمعتز بحزن : بحب سمر او اتعودت عليها لكن عشقي كله لارسيليا يا معتز.
جاسر نظر لمعتز : اقلب الدنيا علي ارسيليا يا معتز.
معتز بدهشه : انت بتقول ايه.
شريف نظر الي جاسر بنظره امل : هتساعدني الاقيها.
جاسر نظر لشريف بابتسامه : انا قسيت عليك زمان لما حاولت ابعدك عنها لكن بعد الحاله اللي انت فيها دي وبعد السنين دي كلها هجبهالك لكن توعدني يا شريف وعد.
شريف : وعد ايه.
جاسر : لو ارسيليا فضلت جوزها عليك تبعد عنها وتلتفت لمراتك وبيتك وتسيبك من الهرجله والستات.
شريف : وانا موافق.
جاسر : تمام.
معتز : بس انا مش موافق ، انتوا نسيتوا سمر.
جاسر : معتز يلا علشان متتأخرش علي اللي قلتلك عليه.
شريف : بس انا عمرى ما هظلم سمر ولا هقصر معاها.
معتز : وانت بخيانتك ليها كل يوم مع واحده مبتظلمهاش ولا بتقصر معاها.
شريف : وحرماني اني اكون اب طول السنين دي علشانها مش ظلم ليا .. ان طفل يشيل اسمي من بعدي مش ظلم.
معتز : متنساش انك السبب في عدم خلفتها.
شريف : انا مكنتش اعرف ده كله واللي ارسيليا عملته واول ما عرفت بعدت عن ارسيليا وسيبتها وكنت هنساها.
معتز : ولما انت كنت ناوي تبعد عن ارسيليا عايز ترجعلها تاني ليه.
شريف : علشان سمر رجعتهالي تاني ولما قربت اكتر من ارسي مقدرتش انساها تاني بسهوله ، يمكن اول مره كنت اقدر لكن بعد ما قربت مني مقدرتش حاولت حاولت والله يا معتز مقدرتش.
جاسر : خلاص اللي حصل حصل كفايه يا معتز جلد فيه ويلا علشان ورانا ميتنج.
معتز بتذمر : بس انت كده هتساعده يا جاسر في ظلم سمر.
جاسر بحنق : معتز قلت خلاص ، يلا.
واخذ معتز وذهبوا … في السيارة
جاسر : يا عبيط وانت فاكر اني هظلم سمر بعد السنين دي كلها واساسا انا اللي قربتها منه.
معتز : اومال عايزني ادور علي ارسيليا ليه.
جاسر : وانت فاكر لما ندور عليها ونلاقيها وهي اساسا مختفيه منه بمزاجها وانت بنفسك قايلي انها اتجوزت اللي اسمه وسيم ده في واشنطن وكمان حامل منه هترجع لشريف تاني.
معتز : يعني ايه.
جاسر : يعني ارسيليا اكيد مش هتتخلي عن حياتها وجوزها واللي في بطنها علشان شريف.
معتز : وهو شريف هيسيبها.
جاسر : اومال انا خدت عليه العهد ليه انها لو قالته يبعد يبقي يبعد وينساها مش علشان اقطع عليه اي سكه واخليه يلتفت لسمر ويسيبه من شغل السرمحه دي.
معتز : ولو ارسيليا فكرت ترجع لشريف.
جاسر : مكنتش بعدت السنين دي كلها وكمان جايه حامل حتي لو كانت بتحب شريف مكنتش هربت من الاول واتجوزت وعاشت حياتها.
معتز : يعني ادور عليها بجد.
جاسر : طبعا وهنلاقيها وهنجيبها علشان نقطع علي شريف اي امل بفكر فيه ناحيتها.
★★★★★
عدي يوم واثنان واتي ميعاد طياره ارسيليا.
في الفندق في الجناح تحديدا .
وسيم يمسك شنطه السفر : يلا يا ارسي.
ارسيليا امام المراه تعدل شعرها : يلا يا حبيبي.
فتح وسيم الباب فوجد بعض الحراسه ويتوسطهم جاسر ومعتز.
وسيم : مين.
ارسيليا بدهشه : جاسر الحديدي.
جاسر مد يده وصافح وسيم وارسيليا : انا جاسر الحديدي صاحب شركات الحديدي.
وسيم نظر لارسيليا بتعجب.
ارسيليا : جاسر بيه معروف في السوق.
وسيم : عارفه ، لكن انت عايز ايه.
جاسر : ممكن نقعد نتكلم شويا.
وسيم : لكن احنا ورانا طيارة.
جاسر : مش هاخد منكم كتير ، انا بس كنت عايز اتكلم مع ارسيليا شويه.
وسيم : بخصوص ايه.
جاسر : موضوع قديم ولازم يتقفل.
ارسيليا نظرت لوسيم : جاسر بيه شخص محترم وانا اعرفه كويس.
وسيم مسح يده علي وجه بضيق : ماشي.
هبطوا جميعا لاسفل وجلس وسيم مع معتز ، وجلست ارسيليا مع جاسر بالاتجاه الاخر.
جاسر : انا مش هقولك انتي رجعتي في ايه ولا مسافر ليه ولا عايز منك حاجه انا كل اللي عايزه انك زي ما انتي عايشه حياتك ومتجوزه وعلي ما اعتقد حامل تسيبي شريف يعيش حياته هو كمان.
ارسيليا : انا مقربتش من شريف اساسا انا طول السنين دي كلها وانا بعيده محاولتش اقرب ولا مرة، لولا افتتاح فرع الشركة في القاهرة واصرار وسيم جوزي اننا نزل القاهرة مكنتش نزلت ولا فكرت انزل مصر.
جاسر : تمام وانا مش عايز اكتر من الكلمتين دول تقوليهم لشريف انك عايزه تكملي حياتك مع جوزك واللي في بطنك.
ارسيليا وضعت يدها علي بطنها بسعادة: ده الحاجة الوحيدة اللي هتعوضني عن حرماني من شريف وبنتي.
جاسر بصدمة : بنتك مين انتي معاكي بنت اقصد عندك اولاد.
ارسيليا : لا دي حكايه كده عليها سنين ، لكن حاضر هقول اللي انت عايزه لشريف بس وسيم جوزي…
جاسر : استني بس افهم بنت مين وفين دي..
ارسيليا: الله يرحمها بقت ذكرى زي ذكرى حبي لشريف ، لما سبت شريف كنت في بدايه حاملي ولما سافرت كملت حمل وولدت هناك لكن للاسف ماتت اول ما اتولدت.
جاسر : متاكده انها ماتت.
ارسيليا بدموع : ملحقتش اشوفها المستشفي دفنتها علي طول.
جاسر : هي كام سنه دلوقتي.
ارسيليا : ذكرى وافتها ال ٢١ كمان شهر.
جاسر : يعني مش ٢٢.
ارسيليا : لا ٢١ بس بتسأل ليه.
جاسر : ها لا ولا حاجة وشريف كان يعرف انك حامل.
ارسيليا : لا.
جاسر : طيب لو طلبت تقعدي كمان اسبوع في القاهرة فيها حاجة.
ارسيليا : لا انا اصلا كنت مستعجلة علي السفر علشان شريف ميشوفنيش وكمان الغول.
جاسر : متقلقيش انا هامنك كويس وموضوع شريف ده متقلقيش منه.
ارسيليا : هو حضرتك عايزني اقعد ليه في مصر .
جاسر : هتاكد من حاجه الاول وبعد كده لو عايزه تسافرى براحتك.
ارسيليا : وشريف.
جاسر : هتقابليه وتقوليليه انك عايزه تعيشي حياتك مع جوزك والبيبي.. لكن بصراحة انتي لسه بتحبي شريف.
ارسيليا هزت راسها بالتاكيد : وعمرى ما نسيته لحظه لكن كان لازم اوفي بوعدي لسمر.
جاسر : سمر.
ارسيليا : يوم جوازي من شريف ، سمر طلبت مني ابعد عن شريف .. انا توبت يا جاسر بيه واول حاجة صح اعملها اني اكفر عن ذنوبي وانا اذنبت في حق سمر وكان لازم اعاقب نفسي ببعدي عن شريف زي ما سمر طلبت مني وربنا حب يخفف ذنوبي بموت بنتي وحرماني منها وانا راضيه واتاقلمت علي حياتي وجوزي ، وسيم عوضني عن كل حاجة وحشة شفتها في حياتي وعن كل حاجه مريت بيها ، ثم نظرت لوسيم بابتسامه وهو يبعد عنها ببضع مترات يمكن مكنش حبيته قد شريف بس هو عرف ازاي يحببني فيه بحبه ليا واهتمامه وخوفه عليا معرفش حب او تعودت بس وسيم عوضني عن حاجات كتير.
جاسر : ربنا يسعدكم ، تمام انا همشي دلوقتي وهتصل عليكي نتقابل النهاردة علشان تقابلي شريف.
ارسيليا : حاضر.
ذهب جاسر ومعتز والحراسه.
وسيم : في ايه وعايزين منك ايه.
ارسيليا : حسابات حسابات ولازم تخلص علشان اسافر وانا مرتاحة.
وسيم : طيب يلا علشان هنتاخر علي الطيارة.
ارسيليا : لما اخلص الحسابات دي هناجل سافرنا اسبوع.
وسيم بضيق : علشان شريف.
ارسيليا : شريف كان في بيني وبينه خلافات زمان ولازم تصفي ويشوف حياته بعيد عني وجاسر بيه وعدني بكدة.
وسيم : يعني عايزه تقابلي شريف.
ارسيليا : انا قلتلك اني اطلقت من شريف بس الحقيقه انا هربت منه وده اللي كان مخوفني اني انزل مصر.
وسيم : هربتي منه ليه.
ارسيليا : قلتلك حسابات وكان لازم تتصفي ، جاسر بيه هيدخل ويحل المشكلة.
وسيم : احنا ممكن نسافر دلوقتي ومنجيش القاهره تاني ومش تشوفيه تاني.
ارسيليا : مش هيسيبني لو سافرت اخر الدنيا كفاية هروب علشان ارجع معاك وانا مطمنه واكمل حياتي بامان انا وانت وابننا.
وسيم بخوف : هترجعي معايا يا ارسييليا.
ارسيليا بحب مسكت يدها بيده : ومش هسيبك يا وسيم.
★★★★★
ذهب جاسر للفيلا .
انت يا زفت انت يا اللي اسمك ياسين.
ياسين هبط بسرعه من اعلي الفيلا : بابا في ايه.
جاسر : اقعد قدامي يا جلاب المصايب.
ياسين جلس : خير في ايه.
جاسر : هي البنت اللي عايز تخطبها دي ما تجيبها هنا اشوفها.
ياسين : ايه يا ميجو انت عينك زاغت عليها ولا ايه.
جاسر : اخرس يا حيون انا بس مش عايز احكم عليها من غير ما اشوفها واتكلم معاها.
ياسين : صلاه النبي احسن كنت متاكد انك هتوافق عليها.
جاسر : انا لسه موافقتش ومش موافق اساسا.
ياسين : الله انت بميه راي ما انت من شويا كنت بتقول هاتها الفيلا.
جاسر : ولا اقولك هاتها في اي مطعم اقعد معاها.
ياسبن : شويا شويا تقولي هاتها الشقة.
جاسر : اخرس يا حيوان شوف اي كافيه وظبط وقولي.
ياسين : اظبط واقولك اوعي تكون عينك زاغت عليها دي الحته بتاعتي اه.
جاسر تناول طفايه كريستال وخبطه بيها فتفاداها ياسين.
ياسين بضحك : بهزر بهزر خلاص هظبط واقولك.
اتصل ياسين علي چانيت.
ياسين : اذيك يا حته .. اقصد يا مزه .. يووه اذيك يا حب.
چانيت : تمام يا دكتره.
ياسين : علي فكره يا بت امك دعيالك الحج عايز يشوفك هتيجي الفيلا ولا الشقة.
چانيت : ايه.
ياسين : يوووه دايما فهماني صح كده ،اقصد هنتقابل في اي كافيه علشان الحج عايز يتعرف علي مرات ابنه.
چانيت : اوعي تكون ناوي تحطلي حاجه احمره.
ياسبن : اقسم بالله لو ينفع ما هتردد لحظه.
چانيت : علشان اقت*** لك.
ياسين : اهون عليكي.
چانيت بدلع : اه تهون قوي.
ياسين : طيب ماتجيبي بو**سه.
چانيت : لما اشوفك.
ياسين بضحك : هتديني يعني.
چانيت : اه طبعا باللي في ايدي في وشك.
ياسين بهزار: بس مش في وشي عايز تحديدا في بوقي.
چانيت : ايه ارجع في بوقك.
ياسين : يععععع.
چانيت بضحك : ما كان حلو دلوقتي.
ياسين : اخلصي يا بت اشوفك بالليل انا وبابا في كافية *****
★★★★★
تجلس منه مع سيلا .
سيلا : اه ياختي تقضوها انتي وادم والبس انا ف فهد.
منه : ده فهد حته سكره ثم انا شيفاه اليومين دول فرحان وسعيد ورايق وعلي طول بيسال عليكي.
سيلا : بجد يا بت فرحان طيب ايه اللي مفرحه.
منه : علشان وقع فيكي ياسولا وقع ومحدش سما عليه.
سيلا : ايه وقع بتقولي ايه انا وربنا ما قربتله.
منه : طيب بزمتك انتي كمان موقعتيش في حبه عادي ده خطيبك وبكره يبقي جوزك.
سيلا : ايه انتي اتجننتي جوز مين لا طبعا مفيش جواز احنا اتفقنا علي خطوبه بس ، وبسعاده هو عادي يعني مش حب ولا اعجاب حاجه كده مش مفهومه يعني ببقى مبسوطه لما بكلمه عادي يعني.
منه : عارفه عارفه ما هي بتبدا بكده.
قاطعهم دخول آدم.
ادم : هو ايه اللي ببدا بكده.
سيلا : والله انت جيت انتوا متفقين بقي وعاملني كوبرى.
آدم : وايه الجديد يا سولي هو في احلي من كده كوبري.
وسحب كرسيا وجلس بجوار منه.
منه بكسوف : اذيك يا آدم.
آدم : يالهوووي آدم زي الحصان. سيلا : طيب ياحصان هشوفك دلوقتي لما اتصل بفهد اخلي يجي يطب علي نفسكم وابقي وريني سرعتك.
آدم : يخربيتك فهد مين اهدي يا سوسو عليا دا انا حتي جايبلك الشكولاته اللي بتحبيها.
واخرج من جيبه شكولاته باونتي خد يا عسل.
فالتقطتها سيلا : ايوه كده احترم اختك التوام.
منه بضحك وانا مليش نصيب.
آدم : يالهوي عليا وانا اقدر.
واخرج من جيبه خمس شيكولاتات واعطاهم لمنه فاخذتهم بسعاده.
سيلا : نهارك اسود انت جايبلي واحده وجيبالها خمسه.
ثم نظرت خلفه ، فهد انت جيت.
آدم التفت بخضه خلفه فلم يجد احد : يخربيتك قطعت الخلف ، اتهدي بقي هجبلك محل شيكولاتات.
سيلا : انا هعديها المرادي بس وحيات منه لو مجبتليش لما نروح لاجبلك فهد يعصرك يطلع منك شيكولاته لما يعرف انك قاعد معانا.
آدم بتمتمه : روحي منك لله.
★★★★★
ذهب جاسر وياسين الي الكافيه بانتظار جانيت.
ياسين : ما تقولي يا ابو حجيج انت ناوي علي ايه مع البت.
جاسر : اقولك ايه يا متخلف انت ، قلتلك اني عايز اتكلم معاها.
ياسين : ربنا يستر.
دخلت جانيت عليهم وبعد السلام جلست.
جاسر بتمتمه : كلها ارسيليا.
چانيت : اذيك يا عمو.
جاسر : الحمدلله اذيك چانيت ال..
چانيت : جانيت الغول جدو يبقي الغول صاحب شركات الغول ..
جاسر : هو جدك ابو والدك ولا والدتك.
چانيت : ابو ماما الله يرحمها.
جاسر : اه وباباكي مش عايش.
چانيت : لا توفي قبل ماما اصل ماما ماتت وهي بتولدني وجدو هو اللي رباني.
جاسر : اه اومال ايه حكايه جانيت الغول دي اومال اسم والدك ايه.
جانيت : لا اصل جده معندوش ولاد غير مامي اللي يرحمها وملوش حد فكتبني باسمه علشان الميراث وكل حاجه تكون ليا ومحدش يشاركني.
جاسر : والله هو اللي قالك كده.
اتي الجرسون وقدم العصير.
جاسر : اشربي العصير.
وبداوا بتناول المشروبات
جانيت : اه اصل جده بيحبني قوي وكاتب كل حاجه باسمي بيع وشراء لكن انا عملاله توكيل علشان مبفهمش في شغله قوي.
جاسر : اه ، تمام.
قاطعه اتصال فرد ، اه .. تمام … تعالا هنتظرك.
وغلق الهاتف ونظر لياسين ، عمك معتز جاي لو عايزين تقوموا انتوا تمام لو عايزين تقعدوا براحتكم.
ياسين نظر لجانيت : هنقوم احنا.
جاسر لجانيت : سعيد اني اتعرفت عليكي ان شاء الله نتقابل تاني.
جانيت وقفت بابتسامه : انا اللي اتشرفت بحضرتك جدا.
وذهب ياسين وجانيت واتي معتز وبيده كيس وضع فيه كوب جانيت الفارغ واغلق علي الكيس.
جاسر : البنت دي مليون في الميه بنت شريف وارسيليا بس برضو ودي الكوبايه المعمل واعمل dna علي بصماتها.
معتز : وشريف هناخد تحليله ازاي.
جاسر .
فلاش باك.
(بعدما انتهي جاسر من مقابلته لارسيليا وشكوكه اتجاه جانيت ذهب الي شريف ليخبره بمقابلته لارسيليا.
شريف : بجد خشوفها هقابلها.
جاسر : لكن انا وعدتها اني مش هبوظلها حياتها كلمها زي ما انت عايز لكن لو طلبت تبعد وترجع لحياتها تنساها ولو حبت تكمل معاك هي حره.
شريف بسعاده : هتكمل معايا وهربي ابنها ومش هسيبها.
جاسر بتحذير : متنساش وعدك ليا.
شريف بسعاده : متقلقش.
جاسر لمح شعره علي كتف جاكيت شريف الذي يرتديه ، بحنق وضع يده الشمال علي كتفه ، اجمد للمقابله يا وحش.
وسحب الشعره من علي كتفه ومسكها ووضع يده في جيبه.
همشي انا واقابلك بالليل.
وعند خروجه و ضع الشعره في منديلا)
بااااك
جاسر اخرج من جيبه منديلا به الشعره : دي من شريف خلي المعمل يطابق العينتين.
معتز : وارسيليا.
جاسر : ما لو جانيت طلعت بنت شريف هيبقي اكيد بنت ارسيليا كمان.
معتز : اه فعلا.
★★★★★
صعدت منارللسياره وحدثت وائل .
— الحقني يا وائل ، جاسر قال لحور اني قت** لت طارق وحورصدقته تعالالي حالا … شغل ايه وزفت ايه سيب اللي في ايدك وتعالا ..
وصلت منار الي الفندق وصعدت الي حور فوجدتها تضع ملابسها في شنطه السفر …
منار بدموع : صدقتيه صدقتيه وكذبني مامتك اللي ربتك ، انتي بتلمي هدومك ورايحه فين ردي عليا ، اوعي تصدقيه صدقيني انا.
حور قاطعتها بدموع : انا صدقت عنيا صدقت اللي شفته من ٢٥ سنه ويارتني ماشفته ، حرمتيني منه ليه حرام عليكي انا مكنتش عايزه الا ابويا عملتي كده ليه علشان بتحبي جاسر ولا علشان الفلوس رحتي رميتي نفسك في حضن راجل غريب ليه.
منار صفعتها علي وجهها : علشانكم علشان جاسر وقعني في ابوكي زمان ودلوقتي بيوقعني فيكي غبيه غبيه زي ابوكي وهتفضلي غبيه في حد مبحبش الفلوس.
حور بدموع الانكسار : انا مش عايزه حاجه انا كان نفسي في ام ..ام تحبني وتحتويني ام تحس بيا وبوجعي ام ارتمي في حضنها لما احس ان الدنيا هتيجي عليا ، ام اطبطب وتداوي ام تريح مش توجع ، الزمن جه عليا وانتي جيتي عليا اوي يا منار يا عادلي.
ومسحت دموعها واغلقت شنطتها.
منار : استني رايحه فين هعوضك ماتسبنيش يا حور انا امك متبعديش عني يا حور رايحه فين.
حور ابعدتها : مش عايزه اشوفك مش عايزه اشوفك ولو صدفه في حياتي هسافر وابد من جديد لوحدي زي ما طول عمرى كنت لوحدي انتي هدتيني وهديتي كل امل في حياتي.
وتركتها وذهبت.
منار بصوت مرتفع مليء بالدموع : متسبنيش ياحور استني تعالي يا بنتي تعالي ….
ذهبت حور الي المطار بعدما كانت حجزت تذكره صباحا علي اول طايره مسافره الي دبي وجلست في الطياره والحزن يمليء عينيها.
وبدات الطائره في غلق ابوابها والاقلاع ولكن اتي شخص من خلفها و وضع يده علي كتفها وبحده.
— فاكره السفر بالساهل كده ….
التفتت حور بخضه ودهشه …..
#الكاتبه_ مروه _عبدالجواد #عشق_الجاسر #الجزء_الثالث.
ياترى مين الشخص اللي وقف حور ؟؟ .
وهل جاسر خلاص كده هيعرف ان جانيت بنت شريف ولا الغول له راي تااااااني ؟!
يتبع…
لقراءة الفصل التالي : اضغط هنا
الرواية كاملة اضغط على : (رواية عشق الجاسر)
