رواية صوت من المجهول الفصل الرابع والعشرون 24 بقلم زينب ماجد

رواية صوت من المجهول الفصل الرابع والعشرون 24 بقلم زينب ماجد

رواية صوت من المجهول البارت الرابع والعشرون

رواية صوت من المجهول الجزء الرابع والعشرون

رواية صوت من المجهول الحلقة الرابعة والعشرون

ابتسمت وكتله : جرب وشوف وادلل
تركته ومشيت .. ردت ادخل للنادي لمحت بنية لابسة عباية البنية تباوعلي او مفتت وكفت اخذت فنجان قهوة باوعت بعد نص ساعة للمحاضرة وعندي امتحان .. فاخذت الگهوة مالتي ورحت ع الطاولة فتحت تليفوني وكمت اراجع
اجت البنية : صباح الخير
ابتسمت بوجهه : صباح النور
-اكدر أكعد !؟
– اي ياهلا تفضلي
– انت غفران صحيح
– نعم اسمي غفران تعرفيني
– اني وياج بالقسم
– صدگ ! مشايفتچ اول مرة اشوفج
– لا شايفتني بس اول مرة البس عباية وحيل مستحية وخجلانة منها ولإن انت لابستها اتقويت بيج
– ليش خجلانة منها !؟
– اني ما البس هيج ملابس كله بنطرون وقميص عريض بس اخوية حيل معقد لان شباب ويانا بالجامعة يومية يريد يبطلني من الجامعة بسبب اللبس يكلي لو تلبسين عباية لو تبطلين فلبستها بس اخجل ما احس يعني ما ادري شكولج
– شنو صارت بالعكس التلبس عباية وتتستر تستحي وتخجل ليش الستر بيه مستحه!؟ ، هو اخوج هم غلط لا أكراه في الدين المفروض يقنعج مو يفرض عليج بس ذولة الاهل بعد شنسوي يفتقدون لعنصر التفاهم والتقنيع ويملون للغة الضغط والفروض ظنا ان هالشي في مصلحتج .. ويمكن بيه مصلحتج لكن الطريقة غلط
-انت لابستها من كيفج لو احد فرضها عليج
-لا محد فرضها عليه جان لبسي عريض بس ملون وصلت لقناعة ان ربي يحب يشوف المرأة بهالصورة فرسمت نفسي بالصورة اللي ربي يحب يشوفني بيها لعل ننال رضاه وتوفيقه
-كلامج يريح الگلب وهيج ما اعرف احسج تفتهمين .. يعنيييي ما اعرف شلون اشرحلج بس حبيتج
ابتسمت : ما عرفت اسمج ؟
-اسمي زهراء
-سلام الله على السيدة الزهراء اسمج حيل حلو تدرين مقررين اذا صارت عدنا بنية إن شاءالله راح نسميها زهراء
-تصير عندج بنية ليش انت متزوجة !؟
-بلي متزوجة وحامل
-يا عمري بس ولا مبين عليج شو حتى حلقة ملابسة
باوعت لادية : تدرين اول مرة انتبه ناسية انو اني لازم البس حلقة حتى ناسية هي حلقتي وين .. يمكن يم امي
-شنو هاي ههههه
ضحكت : اي والله يمعودة الدنيا متلحك تصفن بيها حتى تدور روحك يمكن لما سويت عملية اسقاط وقتها نزعوني كلشي جنت لابسته ذكرتيني حتى كلادتي بيها سيف الإمام علي كلهن يم امي
-يا عيني اسقاط طفل
-اي والله جانت ايام حيل صعبة زوجي اتصوب واني سقطت والتهينا بعدين عمي انجلط راح من بالي ارجع اسال امي على حلقتي
-بس بعدج صغيرة ليش تزوجتي !؟ يعني احس الزواج مسؤلية جبيرة مو مال عمرنا نتخرج ونخلص دراستنا وبعدين الله كريم اني هيج اعتقد بعد ما اعرف انت شلون تشوفين
-اشوف مثل اللي انت تشوفي، ربج بعد واللي كاتبه النا والحمدلله على كل حال .
-الله يسعدج يارب اني حيل فرحانة لأنو حبيتج يعني لحد هسه ما صارتلي اي صديقة بالجامعة
—تسلمين حبيبتي اتشرف بيج عمري وهم زين اثنينا عبي تيم عباية مو ؟
ضحكت : اييييي
-وهسه صار وقت الامتحان خلي نگوم
– بعد ربع ساعة يولي
– اني احب ادخل القاعة اول الناس حتى اخذ المقعد الاول واركز ويا الأستاذ لإن اذا اكعد ورا انعس وهو يشرح
– اذا هيج تمام لعد
گمنا اني وياها رحنا للقاعة
كعدت اول كرسي والمكان اللي جنت احط بيه جنطتي كعدت بيه صديقتي الجديدة
حبيتها وحسيته بنية لطيفة ومحبوبة وهم فرصة تكون الي صديقة بالجامعة لإن الوقت بالجامعة كلش ممل اذا وحدي وماكو صديقات .
اديت امتحاني اللي زفتت بيه نوعا ما
وطلعنا من القاعة سوية ، كالت : تحبين نروح لمكان خارج الجامعة نتريك ؟
– والله ممجربة اطلع خارج الجامعة لحد الأن لكن بودي .. بس بالأول خلي اخابر زوجي لإن مكايلتله سابقا اذا يقبل او لا .
– تمام خابري لعد حتى نطلع
خابرت ايوب مرة مرتين ما رد
كلتلها : ربما عنده أجتماع ومدا يرد .. افضل نروح للنادي نتريك وغير مرة نطلع .. شنو رأيج ؟!
– يلا عادي ماكو مشكلة ولو الاكل بالنادي حشى نعمة الله مينبلع
– اتفق جدا بس شسوي لازم ناخذ الاوامر من الجهات العليا
– شمدري يمعودة
– مو انت ممتزوجة لو اني ممتزوجة مو مهم ماما تقبل بس الزواج غير شكل لازم اخذ موافقة من الوزير الاعظم والا اكون ملعوووونة
ضحكت وهي ضحكت
كالت : ملعونة اذا مموافق الوزير الأعظم شنو السلطان سليمان
– لا والله بس زوجي شوية عصبي ومرات ميتفاهم واني ما احب اسوي هيج امور تخرب بيني وبينه تروح تنلاص الوضعية وووو
– ههههههه عفية ، زوجج شيشتغل ؟
– عسكري
– ها شرطي لو جندي يعني
– امممم هيج شي
– تحبي ؟
– طبعا .. ابو البيبي مالتي شلون ما احبه
ضحكنا وهي تكلي : يا عيني ع الحب يا عيني اتزوجتوا على حب
– لا والله اني ما عندي سوالف الحب وهاي الامور تزوجنا تقليدي بس الحمدلله متفاهمين
– عكسج اني ما اتخيل نفسي راح اتزوج انسان بطريقة تقليدية يعني احب اتعرف عليه واحبه يلا نتزوج
– ما اؤمن بعلاقات الحب صراحة اؤمن برب العالمين يختار إلنا افضل من اللي احنا نختاره ونحبه
– انت حيل متدينة !؟
– والله يا حبيبتي اكره كلمة متدينة مرات صفة التدين تخليج بخانة التعقيد والناس تخليج بصورة المثالية اللي اي غلط منج ولو بسيط تكول شوووف هاي المتدينة .. اني ما اعتبر نفسي متدينة .. مجرد انسان عادي يغلط ويصيب وتصدر منه مختلف الأفعال كل ما بالموضوع اني انسانة احب رب العالمين واحب ابحث عنه
– تبحثين على رب العالمين استغفر الله ليش هو ضايع
-لا هو موجود بس احنا اللي ضايعين
صفنت بوجهي : حبيت الجواب احنا الضايعين
– طبعا والا تشوفين بكاتبه الكريم هو يطلب منه انو نبحث عنه ايات لقوم يتفكرون .. لازم نفكر باياته وخلقه وعجائبه حتى نلكاه
ابتسمت : احس راح استفاد من صداقتج هواية
– اني اللي راح استفاد بيج لان انت انسانة محبوبة ولطيفة
نسولف واحنا نمشي للنادي نشتري ونكعد
وبقينا نسولف لحد ردنا نرجع للقسم .. واحنا نمشي .. دگ التليفون باوعته هي لازمة ايدي كاتبة ( ايوب ) .. العفو : بس ارد على زوجي
مشيت ورديت : الو
ايوب : ها ابويه مخابرتني واني جوا .. كولي
– لا بس ردت اطلع اتريك وخابرتك اذا تقبل
– تطلعين وين جديدة هاي !؟
– هو لإن جديدة خابرتك حتى اعرف اذا تقبل او لا بس من ما رديت ما طلعت واتريكت بالنادي وهسه راح ادخل القسم
– تمام نحجي بعدين
– تجيني لو ارجع وحدي لما اخلص !؟
– ما اعرف هسه خل اخلص شغلي وعود اخابرچ
– تمام مع السلامة
رحت اني وياها دا اريد ادخل القسم
بس لعبت نفسي ، حجت : بيج شي
– لا بس من اكلت شوية تأذيت كامت تلعب نفسي
– خاف لان حامل عندج دوا
-اي عندي هذا شايلته ويايه بس خل نروح نجيب مي .. رجعنا اخذت مي وشربت
حجت بضحكة : انت مسمية زوجج بالتليفون ايوب
-هو اسمه ايوب
-لا يعني لا حبيبي لا شريك حياتي لا زوجي سر سعادتي لا هاي الأسماء مال الحبچية غير زوجج شبيييج
-اييييع ما احب هاي السوالف هههههه زوجي سر سعادتي وتلكيها مدمغ على راسها ولاعب بيها جولة
-هههههه اي والله
دخلنا المحاضرة اثناء المحاضرة ايوب اتصل انطيت رفض وكتبتله : اسفة اني بالمحاضرة
كتبلي : شكد وتطلعين !؟
– اقل الساعة
– راح اكمل واتوجه عليج من اتكملين خابريني
– ماشي
باوعتها لزهراء بصفي دا تتراسل اثناء المحاضرة
خليت تركيزي ويا الاستاذ ، لما كملنا كالت : غفو انت وين بيتكم
كتلها منطقتنا كالت : يا قريبة من عدنا شوفي مو بس نتشابه وحتى قريبين من بعض
-اي زين لعد عندج خط لو ترجعين هيج
-لا والله ارجع فورتات
-لعد امشي وياي اوصلج قريب من بيتكم
-عندج سيارة
-لا والله سيارة زوجي جاي بالطريق
-خاف عيب او ميقبل !؟
– يمعودة شكو .. دمشي
مشينا واني اخابر ايوب كال : بالباب
طلعنا هو وبلال .. فتحت الباب الورا وكلت الها اتفضلي
– انت فوتي استحي
صعدت وكلتلها : اصعدي يلا تعاي
صعدت هو باوع كتله : بس صديقتي على طريقنا نوصلها لمكان قريب من بيتهم
حجه ايوب : هلا بيها
داسلها بلال لحد ما وصلنا لشارع كالت : هنا انزل اني
كتلها : بيتكم هنا
-لا بس اركب كية بخمسمية تذبني براس الشارع مال بيتنا
حجه ايوب : لا ابويه ما يصير نوصلج للباب ان شاءالله بس دلي اخوج
واشر على بلال
كامت تدلي لحد ما دخلوا للفرع كالت : هنا تعبتكم
-حبيبتي تعبج راح
تباوسنا ونزلت .. بلال راد يحرك
ايوب لزم ايده وكام يباوع ع البنية لحد ما دخلت البيت .. كاله : امشي
طلعنا الفرع كاله .. اوكف
حجيت : شكو
حجه ايوب : ماكو شي شلونج بالامتحان !؟
-على الله
– على الله يعني ما بيج امل ؟
– والله شگلك هي الدنيا تنطينا مجال نقرا ؟
– الله يساعدج ابويه ان شاءالله تعوضيها .. صديقتج هاي جديدة ؟
-ويايا بالقسم خوش بنية
حجه ويا بلال : لوف وارجع لنفس الفرع واطلع منين ما اجينا
كتله : شكو
– ماكو شي بس انت مضيعة عنوانج صديقتج قريبة من منطقتنا مو منطقة اهلج لو تريدين نرجع للبيت !؟
– يا والله نسيت لا لا فدوة رجعني لبيت اهلي
لاف بلال ورجع انفس الفرع مال صديقتي ايوب ظل يباوع لبيتهم وطلعنا بنفس الطريق اللي اجينا بيه حجه ايوب : شنو سالفة الطلعة والصداقات شو سوالف جديدة غفران
-يعني حتى بنية لازم ما اصادق شنو السالفة ايوب والله ملل الجامعة الوقت ميمر اذا بس انتظر محاضرات
ضحكوا اثنينهم هو وبلال حجه : لا ابويه بس اتحذري اني شفت وضعها مبينة خوش بنية وحبابة
بلال : وهم صاحبة عباية مرتك تتخير اصنافها
حجيت : الصاحب ساحب ما احب امشي ويا اي انسان اذا ما يتناسب ويا افكاري وعقلي
ابتسم ايوب : عاشت ايدج ابويه بس شسالفة الطلعة وين تريدين تطلعين ؟
– ما اعرف بس الاكل بالنادي يلعب النفس فكلنا نتريك بمكان قريب بس انت ما رديت شسوي اكلنا بالنادي
– ويا صديقتج تطلعون
– اي
– اني اثق بيج واعرفج شنو اذا تريدين تطلعين تاكلين اطلعي بس اخذي حذرج ولد الحرام هواي
– استغفر الله شبيك ايوب اني اطلع ويا ولد ؟
– القصد اكو ناس هواية مو زينة يا بنتي اطلعي بس ديري بالج على نفسج
-ماشي
سكت شوية ورجع حجه : شلونها بطنج هم وجعتج
ندسته ، اندار يباوعلي .. خزرته واشرتله بعيوني على بلال
حجه بلال : عليمن تخزرين وتأشرين هو غير شفتج
كاموا يضحكون بصوت عالي
صرت بنفسجية من المستحى .. هي حتى مو بطني التوجعني معدتي بس ايوب الله كالبه الا يفشلني بطنج توجعج شنييية
وصلني لبيت اهلي ونزل وياي يسلم على امي
لكى امي طابختلنا مركة دجاج اصفر بالفطر وتمن برياني كالتله : والله ما تطلع تنزل ابن عمك وتتغدون
راح صاح بلال وكعدوا بالاستقبال صبتلهم وكعدت وياهم تسولف بلال انطلق ويا امي سوالف وضحك جان اخر شي كاللها : حجية عليش ما تاخذيني واني هالعبد الفقير الاداريج وخوس ازلمة ويومية تسويلي هيج اكل طيب من ايدج
ركعته امي بالقبق مال الجدر كاموا يضحكون بصوت عالي .. حجه ايوب كاللها : والله يا يمه كعدتج طيبة واكلج طيب وانت طيبة حتى امي تريد تجي هي والبنات يشوفنج بس ما عندي وكت الاجيبهم
حجت : لا عليك العباس جيبهم اسوي ثواب للمرحوم ويجن هنا ناكل ونتونس شو ما عدنا احد جيب البنيات عليك الله
خابر على امه
كالتله : علوا بس كون واحد يضل يم ابوك
كاللها : حضري نفسكم راح اجي اني اضل يم ابوي وانت والبنات يجيبكم بلال ويرجعلي ..
كالتله : ديلا راح اكللهن
سده من عدنا وكام سلم علينا وراح
ساعة اني وامي كاعدين بغرفتها سمعنا صوت علي وهو يصيح : يمممممه
صاحت امي : ها يمه هنا
اجا …راح الحجي
– اي والله يمه راح شني خبرك
– والله يمه ماخذيها اهلها وخابرني اخوها يمسلت بالحجي سديته بوجه وانعل ابوه لابوها
حجت : لا يمه ما اريد مشكلة بينك وبين مرتك رجع مريتك يمه واكعد وحتى غفران ترد الرجلها اني اضل وحدي هنا شعدي عود كل يوم اسيرلي على واحد منكم
علي : دخلي تولي لعبت نفسي منها ومن خلقتها اتوسل بيها اني
– ميخالف يمه .. رد مريتك يمه وكفكف على جهالك لا تخرب بيتك من وراي .. اني ما عدي شي بالعكس ابرد راس
حجيت : يمه انت مرة مريضة نعوفج وحدج شلون !؟ وكعتي اتخربطتي اتأذيتي صار بيج شي
– عساني جا هسه اني شني اخير من الماتو .. اهجم بيوت ولدي حتى اعمر بيتي ما اريد يكفيني كل واحد بيكم مستقر ومرتاح هاهية انا ارتاح من يمي .
– هذا مو حجي
– لا بتي طالت وشانت واخيج تأذى وانت تأذيتي هذا صاله اسبوع معارك ويا مرته وانت هادة زلمتج ومكابلتني .. شنية شبية شو هالاكوم واكعد والله مطيني حيل وصحة الحمدلله رب العالمين ما بحاجة احد يمه .. تمرضوني من تضلون هذا حالكم كل واحد منكم يرد لبيته وعوفوني
– اني بالنسبة اليه تعذريني ما اكدر
– غفران يمه لا تمرضيني رجلج خوش زلمة ويحبنا وزين وياج ليش نزيد الحمل عليه لحد ما نخليه اطك روحه من عدنا
– واتركج علىمود رجال !؟ احسب روحي ما اتزوجت واشيل هالسنة من راسي وارجع يمج
علي : دنجبي انت لا تدخلين بهالسوالف ولي لبيت وجلج وفكينا
غفران : ليش تغلط اني لا محاجيتك ولا جاية يمك احترم
– دكومي لا بالنعال والله طايحة الحظ
– يمه صيحي بيه هسه هو شعليه بيه
– يمه اخوج يريد مصلحتج رجعي لبيتج يمه
– وانت شمدريكم مصلحتي وين !؟
– جا تضلين هيييييج
– والله اذا بقيتي هيج اني ابقى هيج وطز بالدنيا لابو اهلها .
كام علي : هو منو الطز .. منو الطز
صاحت امي : هسه مو عليك يا يمه جا انت متعارك ويا مرتك تجي تذب حركتك بهالمكرودك ابطنها جاهل ميل عنها .. لو صار عليه شي شيفكنا من اهله .
وخر من عندي واني درت وجهي من عنده
لفد شوية هناك .. اجا بلال جايب خالتي ونجلاء و نبأ وسرى ..
امي فرحت بيهن ورحبت
وكعدنا سوالف وضحك والجو جان حيل حلو
حتى نجلاء حبت امي وانطلقت وياها بالسوالف وامي تكللها : خايبة دتعاي هنا كعدي عدي وعوفي امج خلي تولي
وخالتي تضحك وتكلها : بلاش الج بس فكينا
نجلاء : شفايتتلي خو اخير من حبستي هناك اقلها اتونس وياج سوالفج حلوة خالة
اندارتلي امي : ولج شنسوي العشا
حجت خالتي : طماطة تكلا وجاي لا اتعبين روحج ولا اتدزين عليج الحسين
– ياااا كلاب الدنيا جاياتني البنيات واعشيهن طماطة تكلاه والله الاحسن من الحسين لا ادزلهن على نص كيلو لحم ونص كيلوا معلاك ونطلع الفحم ونشوي شنو رأيجن
سرى : ااااااالله ونسوي حفلة شواء
خالتي : لا تكلفين روحج خية شني جايين نتونس وياج لو جايين نجربج
– يا تجربوني شني غير ناكل
– اندارتلي : اخيج عليوي وينه ؟
– ما ادري روحي شوفيه
ابتسمت .. هي فهمتني كامت على حيلها ومشت تطلع لكت علي وبلال واكفين يسولفون
خالتي حجت : والله امج ما تستاهل خطية انسانة طيبة
– يويل حظها ما طاحتلها بچنة بيها غير
– بعد مو كل الجناين مثل جنتج
ضحكنا وهي تكلي : يعاب حالج على حورج
– هاااااااه
ضلينا نضحك وهي غمتني بضحكة
اجت امي كالت .. وديتهم كومي وياي غفران خلي نطلع كونية الفحم فوك
صاحت خالتي : هاه خية ها شنهي الكومي غفران جا وابنا البطنها
– يا علي العباس نسيته متعودة هي ايدي وهي رجلي ولا ابالي هالغفيرة تكبر وتحبل
خالتي : هي الكعدة ما تكبر مثل حال سرى بس اني ما يطيني كلبي اسخرنها اكولن خطية
– الله يحفظها الج بناتي جا هسه يا هي التكوم منجن تعاوني انزل الكونية
كامت نجلاء : صدك جذب اصيرلج فاندام
سرى : اني جاية وياكم
راحن امي والبنات كامت خالتي : جا احنا المن كاعدين هنا دكوميلنا
تبعناهن هيج بس صعدنا امي اتعذرت منهن كالتلهن : الفوك مهجور جان لعلي والبنات بس من اتزوجوا انهجر الفوك كله ضل البيت الجوا النا وفريخات حميد ..
سكتت وكالت ليما انهجر كله .
كسرت عليها خالتي : كلنا مثل حالج انا لو ما ايوب يعرس لا ادري عن الفوك ولا اوصلة حتى بناتي ما يرضن ياخذن الغرفة الفوك كارصات بهالغرفة الجوا مدري شمالهن
نزلن كونية الفحم وطلعنا المنقلة
ونصبناه بالحوش .. اجا علي اعتذر منهم
انطا المسواك لامي انطتنياه اني ونجلاء وسرى
كصصنا اللحم والمعلاك وفلفل وبصل وطماطة وشيشنا وكمنا نشوي .. وحاطين الصوبة برا وكاعدين كارصين يمها من البرد ..
وحطينا السفرة ونصبناها اشكال والوان سوالف وضحك وشقا واكل .. برد الحو كلش نجلاء اخذت الصوبة ودخلوا جوا ..
واني وسرى وكفنا نسوي جاي
صاحتني امي اطلع الها القماش مالها من البوفية تشوفه لعمتي .. طلعته وكعدت اسولف ..
لشوية حجت خالتي : جا الجاي وين صار
كمت بسرعة للمطبخ .. لكيت الجاي مطفي وسرى ماكو .. لزمته الجاي دافي .. رجعت شغلته .. وطلعت اريد اصيح سرى .. سمعت حجي ناصي يم المرجوحة
باوعت .. سرى ع المرجوحة
وعلي منتجي ع الشجرة يسولف وياها
شافوني بسرعة سرى ركضتلي وطلع برا .. كتلها : شكو ؟
– ماكو هيج نسولف
– اذا تشوفج خالتي تكوم تحجي خلي نودي الجاي
– لا تحجين شفتيني وياه
– احجي لمنو
– حتى لأمج استحي
– انت عندج شي ويا علي
– لا والله ما عندي بس الصدك معجبة بيه وهو احسه همينه بس ما بيناتنا اي شي
– بس هو متزوج وعنده جهال !؟
دنكت : اعرف
– ابعدي هالامور من بالج ختولي وامشي خلي نروح نكمل كعدتنا .. اخذي الجاي بس خل اشوف بلال موجود !؟
لبست حجابي وحطيته على وجهي وفتحت باب الحوش شفت علي بالسيارة الجمسي مال ايوب … معناها بلال راح .. لمحني تخبل لان مادة راسي من الباب نزل يركض : طايحة الحظ انت شلون هيج تمدين راسج للشارع اكسر راسج هسه
-بس ردت بلال عبالي موجود
-دولي طبي لا ادفرج ومحمد
عفته ودخلت كملوا عيالي الجاي وخالتي كالت : تاخر الوكت بعد هم ياله نروح .. غفران تروح لو تضلين ؟
حجت امي : علي راح يبات يمي انت روحي لرجلج يمه
– خاف يرجع لشقته
– لا كال راح ابات بعد ما يرجع تأخر الوقت يوصلكم ويرد
لميت غراضي وبدلت وطلعت ويا عيالي .. خالتي ما رضت تكعد يم علي بالصدر كالتلي انت اكعدي يم اخوج واني والبنات ليورا
كعدت وهو مشغل اغاني ومنصي خفيف …
الاغنية مال معجبين وهنيالي وهنيالي ومدري هالسوالف حسيته جاي يلمح الها .. خليت وطفيت الاغنية
صاحت نبأ لا احبها
كتلها : عيب ميصير بيبي موجودة
حجت خالتي : العيب مني لو من الله غير حرام
-اذا اكول حرام هسه تصيحون اهووو المتدينة كمنا نخاف نكول احنا نخاف الله .. خلي الله بكلوبنا
حجت سرى : اي لعد دحطي الله بكلبح ورجعي الاغنية والله حبيتها
كرصتها خالتي وحجت : بطلي الخفة
واشرت على علي اباوعلها بالمرايا الجانبية
لما وصلنا .. دخلنا كلنا بجوكتنا ايوب كاعد ع التليفون كالهم : ها اجيتو
شافتي وراهم : ها انت هم اجيتي
حجت خالتي : علي راح يبات يم امه بعد شعدها ضالة
ايوب : اي هم زين … شلونها الروحه
خواته كامن يسولفله ونبأ سطرته سطر بالسوالف حتى العطسة اللي عطسناها مثلتها الها
كاللهم : هم زين اذا اتونستوا ديلا خلي اصعد انام جنت منتظركم غفران صعديلي غراضي وياج
حجت امه : شوف شوف صدك لو كالو من شاف احبابه نسى اصحابه صاله اسبوع ينام يمي ع القنفة هسه غفران صعديلي غراضي
صاح : تعبان يمه تعبااان
حجت : ادري تعبك شنهوه يمه روحي مهنى
ضل يضحك وهو يمشي واني وراه كاله : دمشي فشلتنا انت فضيحة
-عليمن فضيحة غير مرتي شنو حرام لو ناهبج
دخلت للغرفة لكيتها مهجورة رتبتها ونظفتها وهو ع التخم يباوع بموبايله .. ورحت سبحت ورجعت .. كعدت امشط بشعري هو بدل .. جر العشر راد يحطه كتله : هااااا يمعود
– شبيييج غير احط عطر
– تريد تموتني غير هسه اشرد من الغرفة كلها
– جا شلون نظل هيج بالله
– روح اسبح
– بتل بتل كبل شوية سبحت جا هي كلساع
– اي لعد هاهية نام
– نام شني هاي .. شو كمت اخاف منج شتريدين مني .. جايتني حامية
– حاميتيش انت غير ثلاجة بلادي
عفته ورحت للفراش اتمدد كال : عبالي اليوم راح اتعرض لاعمال العنف والتعرض .. ما بيج كل خير
– مأثر بيك الساتر هواي .. شو طفي الضوا وتعال
– تخوفين والعباس .. لا عمي اني رجال اخاف على روحي ارجع انام يم امي احسنلي
ضليت اضحك كعدت وحطيت رجل على رجل وكتله : فنك تفتح الباب وتطلع
– شبيه غشيم لو مضروب على راسي
طفا الضوا واجاني يعرج
ضليت اضحك واخذته بين اديه
ثاني يوم كعد مبتسم مزاجه عالي
ينغمش بوجهي بالكلينكس واني عبالي ذبانة كاعد انش هيج طخت ايدي بايده فتحت عيني ابتسم وكال : صباح الخير ام علاوي
– ومنين عرفت علاوي يمكن ام زهراء
– شيجي من الله نعم الله .. صباح الخير
ابتسمت : صباح النور
-شو متكعدين للدوام اليوم مو عندج دوام لو اني غلطان
-لا عندي بس ب١٠ اروح باجر امتحاني واليوم ما عندي محاضرات هواية
– باوع الساعة ٧ وربع
زين يعني يحقلي اخذ راحتي بعد
عصرت خشمه : انت شنو شنو متشبع
-مشتاقلج والله
حضنته والجو بارد مو مال واحد يداوم ولا يطلع من فراشه .. بقينا بفراشنا نضحك ونسولف لحد ما صارت ب٨ ونص كال : اني ب٩ لازم اروح عندي شغل بالشورجة
– لعد عوفلي السيارة اروح بيها بداعتي ما احب بهذلة التكاسي والفورتات
– اخذيها اصلا ما محتاجها
كام من عندي راح للحمام ..
اني نزلت حطيت الجاي على نار .. ووترستله الطاوله شنو يشتهي كلبه وزينت ورتبت .. لحد ما نزل كال : شنو هالدلال عمي صدك الزلمة بلا مرته يتيم
-سودة عليه دتريك خلي اروح اسبح
لزمني : وين تعاي كابليني ع الريوك وروحي
-اممم يصير .. يلا
كعدت تريكت وياه
كعدت خالتي كالت : خير شنو هذا ريوك مال نفرين لو عشرة شدعوة هالكد
حجه : الكم يمه الكم محتاجة شي يمه ؟
-لا يبعد گلبي سلامتك
باس راسها وكام انطاني فلوس وكال : يلا ديري بالج على نفسج مع السلامة .. اصدك كبل لا انسى عطر ما حطيت خفت تلعب نفسج بس اصعدي جيبيلياه الله لا يصغرج ابويه
صعدت ركض جبته واجيت كتله : حطه بالسيارة لتفوته بالبيت بعد
-ان شاءالله مع السلام
– الله وياك .. يحفظك ان شاءالله .
انداريت : خالة اسويلج شي غير الموجود لو اصعد
– لا شتسوين نعم الله كلها هاي حرام خوما تنذب .. ما تداومين اليوم
– لا هسه رايحة محاضرتي ب١١ لازم اطلع بعد ربع ساعة تقريبا
– دستعجلي لعد
صعدت ركض سبحت وبدلت واخذت السيارة ورحت للكلية لكيت زهراء موجودة فتحتلي اديها من شافتني : هلو غفو
– هلو زوزة شوكت اجيتي
-والله من الصبح اجيت
-ليش محاضرتنا ب١١
– اي بس جان عندي شغل
– شغليش
– يعني
ضحكت وكامت تميل راسها منا ومنا
: الشغل هذا شغل كلب لو عمل عمل
– اممم افتهمتيني
– صدك والله .. عندج علاقة بأحد
-بس مو تحسبيني ساقطة ومرتدة
-ها خير ليش اعتبرج هيج ترا كتلج اني مو متدينة ولا معقدة يعني ما راح اعتبرج فاجرة لمجرد تحبين شخص .. هذه جامعة وهالامور تصير عادي
-اي هم زين امشي لعد
اخذت ايدي بيدها وخر راسي ورفعت ايدي احذرها : -بس دوري افتهم كلشي حتى انصحج
– مممم متفقين
ضحكنا ومشينا للنادي اخذت اثنين كهوة رادت تدفع كتلها : هالمرة ضيافة مني حتى اسمع السوالف طلعيهن طلعيهن
-اوكييييي
ضحكنا واخذنا الكهوة .. وكعدنا
مر من عدنا ساري .. حجت : تعرفي ؟
– لا ليش
-مو حسيته يعرفج وانت انتبهتي من فات
-انسان كلش تافه لدرجة ميستاهل نحجي بيه عوفيني منه هسه سولفيلي منو شنو الوووو
– باعي هو طويل وضعيف واسمر وشخصية تخبل تخبل
-موجود ويانا بالجامعة
– اي مرحلة ثالثة بس منلتقي بالجامعة ابد اخاف احد يشوفنا ويعرف اخوية يكصون راسي
-صارلكم شكد تعرفون بعض ؟
-اسبوعين
– بس عبالي قصة حب عريقة
– ايييي اصبري تصير عريقة
– ويا ترى اذا صبرنا راح تصير
– شمدريج يمكن الله كاتبنا لبعض …
– شنو اسمه
– محمد بس يشبه بكر يموووت
– يا بكر !؟
– متابعين واتباد !؟
-لا شنو هذا الواتباد ما اعرفه
– برنامج كله كتب وقصص
-بيه كتب دينية
-ما ادري ما باحثة بس اتابع بيه قصص اني كلش حلو تابعي قصة حكاية سمر راح تموتين تموووتين عليها
– شنو هاي حكاية سمر شو اني ما اعرف اني بيا عالم
– اووو فاتتج والله تموت تموت انط من البحي على بكر وسمر ولج اتزوج غيرها ويغنيلها ردت انساك واخلص من كلام الناس .. ولج يغني ويبجي واني ابجي ويااااااه
– يعني تشوفي
– لا بس انت من تقرين القصة متدرين عبالج كدامج تتخيلي وتعيشين وياها
– ما اعرف والله مقاريتها
– تابعيها راح تموتين عليها حتى ع الفيس موجودة بس اكتبي حكاية سمر تطلعلج
– دزيلياها حتى اقرا وياج ولو احنا خلي نقرا امتحاناتنا بالاول وبعدين نحتار بالقصص دكومي خلي نروح راح تبدي المحاضرة
كمنا اني وياها وركملنا المحاضرة
كتلها : اليوم جايبة السيارة واخذت اذن من الوزير الاعظم كالي اثق بيج وين متريدين روحي بس ديري بالج
– يا فدوة يخاف عليج
– دمشي خلي نطلع
طلعنا اني وياها بالسيارة مشغلتلها : يلا شكرا للحشد والايدوه وهي تصيح هو هو هو هو
وكفنا يم مطعم اخذنا لفات بيبسي وكص وكعدنا ناكل بالسيارة ونسولف لحد ما كملنا .. وصلتها وخابرت ايوب كتله : ها موجود بالبيت
حجه : خابرتني امج
– علموديش ؟
– اترجتني نروح على مرت علي نرجعها تكول ما اريد اهجم بيت المرة
– وهسه راح تروح
– منتظرج علمود اخذ السيارة ونروح
-وصلت تقريبا اروح وياك
-اي عادي خوما بس امج تجي ويانا اقلها انت وامج واني وعلي
-خابرته لعلي ؟
-اي يم امج نروحلهم ناخذهم ونمشي
-ديلا لعد اني راح ادخل الفرع افوت لو تطلعلي
-لا ابقي بس حولي
صفيت بالباب طفيت السيارة وحولت هو اجا على عكازته انطانياهم حولتهم ورا .. وصعد كدام الستيرن .. ساق لبيت اهلي وخابر على علي
اني حولت ونزلت ورا وعلي كاله : حجي اني اسوق عنك
كاله : اصعد ما بيه حيل انزل بعد
صعدت ورا واجت امي سلمت عليها وبستها وصعدت يمي طلعنا لبيت اهل نسرين .. وايوب اتفق ويا امي انو هو اليحجي والكلام اليكوله ما ينكال فوكاه امي كالتله هاهية راية الله ورايتك ..
وصلنا اهلها استقبلونا وكعدت امها وابوها واخوها امها متنگة وابوها جاف بالحجي واخواها ما حجه ولا نطق بعد الضيافة والحجي
فتح الموضوع ايوب كاللهم ؛ الله بالخير
كالوله : الله بالخير
– خابرتني يمه وهي بمثابة امي ان شاءالله وعلي اخوي كالتلي مرت علاوي زعلانة واني ما اريد اهدم بيتها ورايدة رجعتها واردتني وياها حتى نشوف شنو اسباب زعلها واحنا اهل ان شاءالله ونحلها بالتراضي
وجايين نسمع منكم الاسباب واحنا بالخدمة
حجه ابوها : خوية احنا من اجوا وخطبوا كالولنا تكعد ويا عمتها !؟ بتنا رادت بيت وحدها
ايوب : انا ما حاضر بالخطبة هي شرطت بالعرس الا بيت وحدها
حجه علي : لا طلعتنا جان اتفاق بيني وبينها بالخطوبة نكعد وحدنا قدمت على بسمايا
حجه ابوها : اي بس من طلعت من بيتنا اخذتها من تكعد ابيت وحدها
ايوب : وهو صادك بيت ابوه محد بيه طابقين يصوصي ما بيه بشر
– لا شني مرة تهد بيتها وتروح تكعد ابيت ابوه
حجه ايوب : الانسان ينتقل من بيت لبيت للافضل احسن ما شقة وكاعدين بكن مال دجاج بيت ابوه جبير ويطارد بيه الخيل وبس الهم وبعد هم المستفادين يأجرون الشقة وحطون فلوسها ببطونهم ويكعدون ابيت احسن منه وواسع ونظيف
حجت امها : البنية تريد تاخذ راحتها تكعد تعرف بيتها الاثثته على ايدها وتروح تكعد ابيت مو بيتها ما يصير
-اي تحسبه بيتها وتأثثه وتاخذ راحتها وين المشكلة
حجت امي : خالة الحجي واضح يريدون يكولون ما نريد امه
حجه ايوب : خو لا بكيفها ولا بكيف احد انت ام مثل ما هي ام وعدها جهال وباجر يكبرون ترضى جهالها من يكبرون يذبوها
حجه ابوها : مخلفة هالخلفة شكثر ما ظل بس علي
ايوب : لو ترضى تعيش عدي مو فوك راسي لا والله ابطن عيني بس الام عليمن تميل اذا مو على ابنها
حجت امها ؛ وابنها الجبير وينه
ايوب : احسبي انطاج عمره يا عمي وما عدنا غير علي مطالبكم شنو هي ؟
حجت امها : ما عدنا مطاليب احنا النريدة تضل ابيتها ماخذة واحتها مو خذتوها شي وبعدين ها والله ما يناسبنا
ايوب : اي والله ما يناسبنا وماكو حال يضل ما يتغير الله بكبر عظمته يكول كل يوم هو في شأن تريدين حالنا يضل على وضعه .
كاموا يجيبوها منا يردوها منا
اخرها ايوب كاللهم : هي المرة وينها اني مثل اخوها خل تجي ونسمعها ليش تحجون عنها هذا رجلها وخل يتفاهمون خو احنا جايين نصلحهم ما رايدين خرابهم
اجت نسرين سلمت وكعدت .. كاللها : خوية شنهو مطالبج
كالتله : والله اني مطالبة شي ومن حقي اعيش ابيت وحدي واني ما ملزمة بأحد ولا اكابل احد الدين ما فرض عليا اخدم رجلي مو غيره تعاي لازم اني لازم اتحمل واتهجول من بيتي علمود غيري عمتي على عيني وراسي .. بس تعذرني يعني اني اني ما اكدر
حجت امي : خالة لا اني رايدة اعيش عدج ولا اعيش وياج ولا اذب حملي عليج بعدني بحيلي الله لا يعرزني لاحد واني جاية لخاطر هالفروخ ما اريد بيت ابني ينخرب
حجه ايوب : على حلكج نور يمه وهذا اليجرالها ما دام طالبت بحقها والدين ما يفرض عليها وما يحقها بخدمة ام زوجها بعد حقه احنا شنحجي خوما احنه احسن من الله ونتشرط ؟
ها يجرالج لبسي خوية وكومي ويا رجلج وارجعي لبيتج وما يصير خاطرج الا طيب .
ابوها اتشكر من ايوب وسلم عليهم وكاللنا : يلا كوموا
علي صفن بوجه ايوب : حجي و …
غمزله ايوب وكاله : يلا خوي
امها اترخصت من علي يبقيها يمهم يوم ثاني لان خواتها جايات بالطريق .. علي وافق وطلعنا
صعدنا بالسيارة .. اول ما صعدنا حجه علي : حجي ما حلينا شي اساس عركتنا اريد اشيل يم امي اني ما اكدر اعوفها هيج وحدها
حجه ايوب : خوية المرة ما تريد امك شني زور لو كوة
حجت امي : يمه ولا اني الرايدة اكعد عد احد انتم ليش حاطيني حمل تعلاوة هدوني وكل واحد يشوف حياته ترا ما صايرة هاي
صاح ايوب : لا ما يتركج امه وغصبا ما علييييه انت امه لا تكولين هدوني هالمرة كلتيها مرت الثانية اتزاعل وياج والله
علي : حجي اعوفهم جا اعوفهم بالشقة واجي اكعد ويا امي لو اعوف امي واجي اكعد بالشقة !؟
– هاي وهاي .. مرتك تحجي بالدين وهي كطعية لا تعرف الدين ولا تعرف اهله مو هاي اختك يوم الطكت براسي وردت اعوف امي واهلي كالتلي روح ولي لوحدك اني ما ارضى تعوف امك طلكني ولا تعوفهم ..
خوية المرة التحجي بالكطع والدين طبق الدين بيها وربك محلل اربع ولا خير البالزلمة الما يثني اعلى غمة .
سكتنا كلنا ..
حجت امي : ولو ما رضت مرته يثني هم ترد تتزاعل وتتخارب
– جا يطبها طوب مثل ما حقها بالدين تكعد لوحدها وما تتحمل احد حقه بالدين يتزوج الترضى تباري امه !؟
صفن علي بوجهه
حجه ايوب : شعدك ؟ شو بيت ابوك موجود وامك موجودة وعدها راتب ابوك مال الشهيد تساعدك بالمصاريف وتشيل عنك .. وبعد ضلت يمكم اني برأيي اشوف هذا الحل وبكيفكم
رجعنا للبيت ..
علي استغل المواقف كاله حجي : اني موافق اتزوج وعلى حجايتك لا اهدم بيتي ولا اغضب ربي واعوف امي .. من بعد اذنك حجي اذا تقبل اني طالب ايد رضيعتك المحروسة على سنة الله ورسولة وما الكى بيت ناس اخذ منه مرة احسن منكم
عقد حاجبه ايوب : ياهي التقصد من خواتي
حجه : اللي بكصة غفران اللي تدرس .. انت شاور الاهل وشوفهم وأسألهم وردي الجواب
حجيت اني : من كل عقلك تريد سرى شبييك سرى ممت…. قاطعني ايوب وكال …. اششش
– اسأل الاهل واشوف رأيهم ويصير خير
كام وكال يلا ..
كمت بس النار شاطت براسي
صعدت بالسيارة وياه كتله : انت من كل عقلك تسايره بسرى
– شنو بينه وبين سرى ؟
– شمدريني بس متناسبه ايوب
– اخوج لو ما اباله شي ما ينطينياها بالوجه ويقاطعني ويكلي شوف الاهل بالاول وردلي جواب لا ما متأكد اكو موافقة من الاهل ..
شايفة شي سامعة شي
-ايوب ميتناسبون سرى مو لعلي بعدها بنية ممتزوج تاخذلها رجال متزوج وعنده جهال ليش ؟
– جاي اسالج شايفة شي سامعة شي
-الشفت والسمعت لا حقي ولا من حقي اسولف .. بس ايوب ارفضها من يمك
سكت وضل صافن
رجع للبيت كعد ويا امه كاللها : يمه سرى عدها شي ويا علي
شهكت خالتي : اسم الله الرحمن شنهو البيناتهم لا ماكو .. ابد
– هسه اذا اكو خلي نفتهم الولد لا لاعب عليها ولا عينه زايغة الولد طلبها مني على سنة الله ورسوله وهاي مو عيب شوفي رأي سرى اذا موافقة هذا قرارها اني ما ادخل
حجاها وصعد جرتني : شنو علي شنو سرى
سولفتلها وكتلها : خالة ارفضي لا اتكسرين ابخت البنية بعدها منتزوجة تعيش معلعلة وزوجة ثانية
– انت شايفتها شايفة عليها شي تعرفين بينهم شي
– ما ادري خالة اني ما ادخل بهالامور لا اسم لا ارى لا اتكلم
-يعني شايفتها
-خالة مالي علاقة اني فدوة لعينج لتحطيني
صفنت بوجهي : بس تريدين الصدك خوش قسمة بيت ابوج فارغ وامج خوش مرة وهو عنده بيت ولاهي اا يلهيها عن دراستها ولا يمنعها من شغل ولا دادة ولا احد وياها يتنغصلها بالبيت
-خالة متزوج شنية
-هسه غير نسالها اذا رضت ورايده يطبها طوب بس علي اني احبه خوش ولد وامج زينة وتستاهل خوما يصل هذا حالها وجناينها كطعيات تاخذلها بنية من عدنا تباريها مثل ما اني ماخذه منها بنية اتباريني
-خالة صدك تحجين
-دسكتي انت وكومي صيحيها
دفعتني .. كمت من مكاني اصيح : سرى .. سرى
صاحت : عليج الله لتكليلي شغل والله ما بيه حيل
فتحت الباب : لا لعد ما نريدج جنة ما تناسبينا ولي
فزت ووكعت بالكاع : جنة شنو تعاي اني خوش بنية
ركضت وراي : شكو
اجن نجلاء : شكو شصاير
– تفضلن يم ست الخالة الخبر اليقين
اثنينهن تراكضن وكعدن يم امهن وكالتلها : يمه شكو
حجت خالتي : علي اخو هاي طالبج من اخوج على سنة الله ورسولة
حطت ايدها على حلكها وحجت : عزززززا
وضحكت
حجت خالتي : بربوك شعدج وياه
– يمه والله ما عندي شي هيج نظرات من بعيد لبعيد بس ابنج هذا يخلي حب يخلي صخام صاكرنا صكر
-يعني رايدته
حطت اديها على وجهه وضمت راسها ورا نجلاء
حجت خالتي : تعاي بربوك مستحية وانت حاطة عينج عليه
-يمه والعباس لا بيناتنا حب ولا كايلي احبج ولا كايلتله ولا سوالف حب ابد سلام عليكم وعليكم السلام وذاك اليوم من رحنالهم سالني انت بيا مرحلة بيا جامعة شتريدين تصيرين واجتنا هاي
(اشرت عليه ) واتطافرنا والعباس والحسين بس هذا الصار
اندارتلي ؛ وانت من شفتيها ما كتيلي ولج
– اسرار الناس الها حرمتها ما يحقلي اسولف الواجب عليه انصح وهاي كدامها نصحتج لو لا
-اي والعباس والحسين نصحتني ورزلتني بس يمه اني معجبة بيه
– خايبات ما تطني النعاااااال
صرخت – يمااااااا
وركضت لغرفتها كمنا نضحك والله مسودنة
حجت خالتي : جا ما طول الولد رايد وهي رايدة احنا شيضللنا نحجي ؟ اذا سالج ايوب كليله موافقة واذا ما سألج يجيني
صعدت لايوب هستوة مبدل وكاعد متلفلف بالبطانية ، كال : ها ؟
– شها موافقة
– سرى موافقة !؟
– ما بيناتهم شي بس شايفها وشايفته كم مرة وصاير بيناتهم نظرات وهسه خطبها وهي وافقت وعاشوا عيشة طايح حظها
– احسن يمعودة حمل وانزاح من ظهري ما طولها مرافقة الله يوفقها خل افتك من حمل وحدة علي خوش ولد وامن عليها بيه وهم منها اخلص من سالفة ضلتج يم اهلج وتنحل مشكلة اهلج
– والله ما ادري
– لا تدرين ولا تدخلين اطلعي من السالفة كلها هو الخطب وهي الوافقت
خابرتني امي طلعت اسولف وياها وحجيتلها سرى موافقة امي فرحت كالت : سرى حبابة وطيبة وخوش بنية تصيرلي ونيس بهالبيت
– يمه على احسابي .. اذا اخوي اتزوج الثانية واخذ حماتي هاني بعد شخلالي
– وانت شعليج قابل انت خاطبتها
– والله يمه ما ادري اني الوضع ما حابته ولا مرتاحتله
– الله كريم يمه بعد الكاتبه ربج يصير ..
سديت الأتصال منها ورحت دخلت للغرفة هو يباوع تلفزيون .. فتحت البطانية هو فتحلي اديه .. حجيت : ايوب تعبانة بس اريد انام
– نامي ابويه ما محتاج شي غير راحتج .. ارتاحي
حطيت راسي على صدره وهو يمسح على شعري .. ويباوع مراد علم دار … غفيت على هالوضع الجو بارد والغرفة مطفين الضوا ومدفين بالفراش وحضنه دافي .. راحة من العمر تجبرك تسكن وتغط بنومك
بعز نومتي .. سمعت صوت التوجيهات الدينية مال قناة كربلاء ايوب مطلعها لان صار المغرب .. فزيت من فراشي واتذكرت فتحت اللحاف وطلعت اركض : صاح شبييييج
صحت .. صلاة الظهر والعصر ما مصليتهاااااا نسييييت
رحت توضيت ومديت سجادتي وصليت فرض الظهر والعصر كبل لا يأذن المغرب .. افر السبحة بالأستغفار لما اذن .. انتظرت يكول حي على الصلاة كمت للصلاة واديت فرض المغرب والعشا
كتله : الم السجادة لو اتركلكياها
– لا خليها خل اكوم اتوضى
كمت من مكاني اريد ارجع لجربايتي وهو طلع وسد الباب وراي شفت التليفون مالته صامت ورسايل توصل حاطة ع الميز يمه .. سحبته الاشعارات على وجه الشاشة كاعد توصل
شيختهم وادز رسايل : مو كتلي اخلص شغلي واحجي وياج .. من ١١ الظهر لحد هسه ما خلص شغلك مو والله اشتاقيتلك
اني قريتها لو اشتعل راسي نار
دخل شافني لازمة تليفونه باوعتله : شكو شبيج
– منو شيختهم هاي اللي تراسلك !؟
من سمع الأسم اجا كبل كال : انت شنو تلزمين تليفوني
جريته ورا ظهري : منو هاي ايوب
-مالج علاقة منو انطيني
-اذا اني المالي علاااااقة منو اله علاقة غيري
-انطيني اكلج
– تفتحلي التليفون اشوف منو
– انطني لا راسج يتكسر
– اني الراسي يتكسر .. وحدة تكتلك كتلي بس اخلص شغلي واحجي وياج ومن ١١ ما راسلتني والله اشتاقيتلك .. منو التحجي وياها وتشتاقلك واني مووووووجودة
– مالج علاقة رجال وهاي امور تخصني
– رجال واني مو مرتك
– اي مرة الصارلج اسبوع هاجرتني علمود امججججججج اي مرررره ؟
– حسبت علييييه اسبوع تركتك ورحت لامي ما حسبت شهور انت مريض وتغلط وترزل وتصيح وتطلع كل المك بيه واني صايرتلك خادمة جوا رجلييييييك نكرت مني كلشي وجازيتني على ااااااااسبوووووووع
حجيتها وركعت التليفون مالته بالكاع
وهو تخبل ….

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية صوت من المجهول)