رواية أميرة آخر الزمان الفصل الرابع والعشرون 24 بقلم ملك ابراهيم
رواية أميرة آخر الزمان الجزء الرابع والعشرون
رواية أميرة آخر الزمان البارت الرابع والعشرون
رواية أميرة آخر الزمان الحلقة الرابعة والعشرون
تحدثت اماني الي والدتها وزوجها قائلة لهم بفزع..
ـ مش اللي جاي علينا ده جمال اخويا ؟!!
نظرت اليه والدتها وشهقت بصدمه و ضربت على صدرها قائلة بفزع.
ـ يا قلب امك يا بني هما عملوا فيه ايه ؟!
ضحك فتحي بسخرية وهو يتأمل جمال وهمس بشماته قائلاً..
ـ دا شكلهم روقوا عليه جوه
اقترب منهم جمال والعسكري يمسك به، شهقت والدته وتحدثت اليه بفزع وهي تتابع حالته بثيابه المتسخ وشعره المشعث قائلة له بفزع.
ـ ايه اللي بهدلك كدا يا جمال هما عملوا فيك ايه منهم لله
نظر اليهم جمال يبحث بعينيه عن مروة ثم تحدث الي زوجته بفضول قائلاً لها.
ـ اومال مروة فين يا امي، مجتش معاكم ليه؟!
عوجت والدته فمها بسخرية قائلة له.
ـ مروة ايه بس، دي بهدلتنا خالص من بعد ما الحكومة خدوك ومن ساعتها وهي قافله على نفسها الشقه فوق وبتهددني ان مصاريفها تطلعلها ومفكرتش حتى تسأل عليك
رفع جمال حاجبيه بغضب وهو يستمع الي حديث والدته، تحدثت شقيقته اماني مع والدتها بلوم قائلة لها.
ـ مش واقته الكلام ده دلوقتي يا امي خلينا في جمال
ثم نظرت الي جمال بحزن وتحدثت اليه قائلة له.
ـ المهم انت عامل ايه يا جمال شكلك اتبهدلت اوي هنا؟
تحدث جمال بغضب قائلاً لهم.
ـ هو انا ادبهدلت بس دا انا اتنفخت
كتم فتحي ضحكته، اضاف جمال بغضب وقسوة قائلاً..
ـ بس وحياة امها ما انا سايبها علي البهدله اللي انا اتبهدلتها بسببها دي
ظهر صوت فريد من خلفه وهو يمسك بيده صورة من المحضر والتقرير الطبي لحالة أميرة قائلاً لجمال بغضب.
ـ هتعملها ايه يعني يا جمال اكتر من اللي انت عملته، دا انت كسرت ضلوعها
اتجهت كل الأنظار الي فريد والتفت اليه جمال ينظر اليه بسخرية قائلاً له.
ـ ايه ده هو المتر هنا كمان بنفسه وجاي يخرجني
تحدث اليه فريد بغضب وهو يشير بصورة المحضر والتقرير الطبي بيده قائلاً له.
ـ كان نفسي بجد اخرجك بس بعد ما شوفت المحضر والتقرير ده اقدر اقولك ان خروجك صعب جدا من غير موافقة أميرة وتنازلها
تحدثت اليه خالته بصدمة قائلة له.
ـ يعني ايه الكلام ده يا فريد، يعني جمال هيتسجن؟!
تحدث فريد بقلة حيلة قائلاً لها.
ـ للاسف اللي عمله فيها ده جنايه لان التقرير الطبي بيثبت ان حالتها صعبه جدا
نظر فتحي الي جمال بغضب قائلاً له.
ـ هو انت مش كنت طلقتها، ايه اللي يخليك تروح وتمد ايدك عليها؟!
تحدث اليه جمال بصوت مرتفع قائلاً له.
ـ اعمل فيها اللي انا عايزه يا جدع ولو في راجل في عيلتها يجي يوريني نفسه
نظر اليه فتحي بغضب وارتفع صوته هو الاخر علي جمال قائلاً له.
ـ يبقى تستاهل اللي هي عملته فيك ولو هي جدعه يبقى متتنازلش وتسيبك مرمي كده لحد ما تتعلم الادب
اراد جمال ان يتعارك مع فتحي قائلاً له.
ـ وانت محموء عليها اوي كدا ليه متكونش من بقيت عيلتك وانا معرفش
نظرت والدة جمال الي فتحي بغضب وتحدثت الي ابنتها اماني قائلة لها.
ـ خدي جوزك يا اماني وروحوا مش ناقصين وجع دماغ
تحدث اليها فتحي بعنف قائلاً لحماته.
ـ لا ياختي خلي بنتك جمبك انا مش عايزها
ثم نظر اليهم بشمئزاز قائلاً لهم.
ـ كتكم القرف عيلة فقر
ثم تركهم وذهب.
تحدث جمال بصوت مرتفع كي يسمعه فتحي قبل ان يغادر قائلاً له.
ـ بقى احنا عيلة فقر، طب وحياة امك انت كمان لاكون مربيك ومعرفك مقامك
فتحت والدة جمال عينيه بصدمة ثم نظرت الي ابنتها قائلة لها.
ـ ماله جوزك هو محروق عليها كده ليه؟!
بكت اماني وانسالت دموعها بصمت، تحدث فريد بغضب مكتوم قائلاً لخالته.
ـ اللي جمال بيعمله مع أميرة ده ميرضيش حد يا خالتي، هو خلاص طلقها وكمان حرمها من بناتها وخد كل حقوقها وهي سكتت وسلمت يقوم يروح يضربها في بيتها قدام اهلها ويكسر جسمها بالعنف ده وكمان عايزين تسوؤ سمعتها يبقى جمال كده اتخطى كل الحدود ولازم فعلا يتربى
تحدث جمال بوقاحه قائلاً.
ـ حتى حضرة المحامي اللي تاعب نفسه وجاي من اسكندريه مخصوص جاي يدافع للست أميرة
ثم اضاف وهو ينظر إلى فريد بسخريه قائلاً له.
ـ وانت بقى محموء عليها ليه انت كمان؟!
تحدث فريد بغضب قائلا له.
ـ انا بتكلم في الحق يا جمال ولا انت مسمعتش عن حاجة اسمها حق قبل كده، انت عايز تظلم تظلم واحنا نقف نشجعك
تحدث اليه جمال بسخرية قائلاً له.
ـ لا يا حضرة المحامي متقفش تشجعني وبرضه متقفش تتفرج عليا وانا هتسجن وتيجي تحاسبني انا عملت فيها اي ومعملتش فيها ايه انا عايز اخرج من هنا اتصرف يا فريد
اقتربت والدة جمال من فريد وتحدثت اليه برجاء قائلة له.
ـ فريد عشان خاطر خالتك يا حبيبي اعمل اي حاجه، مش جمال ده في مقام اخوك يا فريد، ترضى اخوك يتسجن؟!
نظر اليهم فريد بتفكير ثم تحدث بهدوء قائلاً لهم.
ـ مهو لو جمال عايز يخرج بجد يبقى يسمع كلامي وينفذ كل اللي اقوله عليه
ثم اضاف بتنبيه.
ـ حتى انتي كمان يا خالتي تعملوا كل اللي هقول عليه والكلام اللي انتي قولتيه في حق اميرة دا متقوليهوش تاني
حركت خالته رأسها بالايجاب قائلة له بلهفة.
ـ هنعمل كل اللي انت هتقول عليه بس تخرجه من هنا
نظر فريد الي جمال بطرف عينيه ينتظر رده هو الاخر، فكر جمال بمكر ان يوافقه مؤقتا علي كل ما يرده وبعد خروجه سوف يفعل ما يريد، انتظر فريد رده قليلا، حرك جمال رأسه وهو يحفض وجهه ارضا قائلاً له.
ـ ماشي يا فريد هعمل اللي انت عايزه بس تخرجني من هنا
تحدث اليهم فريد بهدوء قائلاً لهم.
ـ تمام هو دلوقتي مفيش اي طريقه تخرج بيها غير ان أميرة تتنازل، وانا هحاول اقعد معاها واعرف منها شروطها ايه مقابل التنازل وهحاول اوصل معاها لاتفاق
فتحت خالته عينيها بصدمة وتحدث جمال بانفعال قائلاً.
ـ هي الهانم هتقعد وتتشرط كمان اهو دا اللي كان ناقص
تحدث اليه فريد بغضب قائلاً له.
ـ حقها
نظر اليه جمال بغضب، تحدثت والدة جمال الي ابنها قائلة له.
ـ خلاص بقى يا جمال خلينا نخلص من الموضوع ده يعني عجبك رميتك هنا
تحرك به العسكري كي يدخلون غرفة الضابط، تحدث جمال الي فريد ووالدته برجاء قائلاً لهم.
ـ انا موافق اعملوا اي حاجه وخرجوني من هنا
دخل به العسكري غرفة الضابط، اقتربت والدة جمال من فريد مسكت بذراعه قائلة له برجاء.
ـ اعمل اي حاجه يا فريد وخرجه والنبي
حرك فريد رأسه بالايجاب وهو يقف ينظر أمامه بتفكير.
رواية أميرة آخر الزمان بقلمي ملك إبراهيم.
______________
عند الدكتور محمد وأميرة..
اخذ الدكتور محمد صورة من التوكيل الذي عملته أميرة الي المحامي طارق صديق الدكتور محمد.
اخذها الدكتور محمد بالسيارة هي واخيها ضياء وقام بتوصيلهم امام منزل والدة راندا وذهب هو الي صديقه المحامي كي يعطيه التوكيل ويذهب لمتابعة المحضر بالقسم.
_____________
في منزل والدة الدكتور محمد.
وقفت راندا تنظف المطبخ وهي تدندن بصوت منخفض.
دخلت والدة الدكتور المطبخ تنظر اليها بتفكير ثم تحدثت اليها بفضول قائلة لها.
ـ عاملة ايه راندا واخبار أميرة ايه؟
نظرت اليها راندا ووقفت باحترام قائلة لها.
ـ الحمد لله في فضل ونعمه شكرا لحضرتك
تحدثت اليها والدة الدكتور محمد قائلة لها.
ـ الدكتور محمد كان حكالي على مشكلة أميرة مع طليقها وبصراحة زعلت عشانها اوي، هي ايه حكايتها معاه بالظبط، ايه اللي يخليه يروحلها بيتها ويضربها ويهبدلها كده؟!
تحدثت راندا بعفوية قائلة لها.
ـ اصل طليقها ده لمؤخذه يعني واحد معندوش دم، يعني اتجوز عليها بفلوس عملية بنتها وكمان طلقها وخلاها تتنازل عن كل حقوقها قصاد الطلاق وحرمها من عيالها وكمان جاي يشك فيها وفي شرفها
عقدت والدة الدكتور ما بين حاجبيها بعدم فهم قائلة لها.
ـ يعني ايه بيشك فيها وفي شرفها؟!.
اجابتها راندا بعفوية قائلة لها.
ـ اصله عرف ان الدكتور هيساعدها في عملية بنتها وهو فكر حاجه وحشه بينهم يعني
فتحت والدة الدكتور عينيها بصدمة، حركت رأسها بالايجاب بعد ان حدث كل ما توقعته، نظرت الي راندا بهدوء قائلة لها
ـ تمام يا راندا كملي انتي شغلك
ثم خرجت من المطبخ وتركتها. تابعت راندا ما كانت تفعله.
خرجت والدة محمد تفكر بغضب ثم همست الي نفسها قائلة.
ـ يعني كل اللي انا قولته حصل اهو يا محمد واسمك هيدخل في المشاكل بينها وبين طليقها
ثم همست باصرار قائلة .
ـ بس انا مش هسمح ان اسمك يدمر بسبب البنت دي يا محمد ولازم ابعدها عنك بكل مشاكلها
رواية أميرة آخر الزمان بقلمي ملك إبراهيم.
____________
عند مروة في شقتها بمنزل حماتها.
جلست امام التلفاز وهي تشعر بالتعب، اخذت هاتفها وتحدثت الي والدتها بالهاتف قائلة لها.
ـ الو ايوه يا امي عاملة ايه
اجابتها والدتها بهدوء قائلة لها.
ـ الحمد لله يا حبيبتي انتي عامله ايه، مش بتيجي ليه يا مروة؟
تحدثت اليها مروة بغضب قائلة لها.
ـ انا زهقت هنا اوي يا امي، انا كنت فاكره اني هبقى مبسوطه بعد ما اتجوز بس زهقت وتعبت
تحدثت اليها والدتها بفضول قائلة لها.
ـ هو جمال والوليه حماتك مزعلينك ولا ايه؟!
تحدثت مروة بغيظ قائلة لوالدتها.
ـ جمال الحكومة جم خدوه
شهقت والدتها بفزع قائلة لها.
ـ خدوه ليه هبب ايه؟
تحدثت مروة بغضب وغيره.
ـ شكله لسه بيحب أميرة ومش قادر ينساها، الاستاذ بيغير عليها وراح ضربها وهي عملتله محضر وجم خدوه وهو نايم
شهقت والدتها قائلة لها.
ـ الله يخربيته هو جوزك ده عبيط ولا ايه، ازاي يسيبك انتي ويبص لاميرة بعد ما طلقها وعمل فيها اللي عمله ده كله
ثم اضافة والدتها قائلة لها.
ـ شوفتي بقى يا مروة لما قولتلك اللي زي ده ملوش امان ولازم تآمني نفسك معاه
حركت مروة رآسها بالايجاب قائلة لوالدتها
ـ انا برضه فكرت في كده يا امي بس هآمن نفسي معاه ازاي والبيت ده بتاع ابوه واخواته البنات ليهم فيه ومعندهمش حاجه تانيه غير الورشة
تحدثت اليها والدتها قائلة لها.
ـ انا مكنش ليا غرض للجوازه دي من الاول بس هنعمل ايه بقى النصيب
تحدثت اليها مروة قائلة بغضب.
ـ مهو انتي اللي كنتي عايزه تجوزيني بآي طريقه وكل شويه تقوليلي قطر الجواز فاتك وشوفي أميرة اللي اصغر منك متجوزه ومتهننه في بيتها ومخلفه وانتي أكبر منها ولسه قعده في وشي خلتيني مبقتش شايفه قدامي غير أميرة وحياتها وخدت منها كل حاجه دلوقتي واهو الاستاذ سابني وجرى ورا أميره تاني وخليه ماشي وراها بقى لحد ما تسجنه
تحدثت اليها والدتها بتأكيد قائلة لها.
ـ بصي سيبك من كل الكلام الفاضي ده، انتي دلوقتي حامل وممكن تجبيله الواد اللي نفسه فيه وساعتها تعرفي تضحكي على عقله وتخليه يكتبلك حتى الشقة اللي انتي فيها
تحدثت مروة بغيظ قائلة.
ـ طب وافرضي مثلا طلعت حامل في بنت هعمل ايه؟
تحدثت اليها والدتها بمكر قائلة لها.
ـ مش انتي زهقتي حماتك المرة اللي فاتت لما جت معاكي وحلفت انها مش هتيجي معاكي تاني؟
تحدثت مروة بالايجاب قائلة لوالدتها.
ـ ايوه انا عملت زي ما انتي قولتيلي بالظبط وطلعت عينيها
تحدثت والدتها ببساطة قائلة لها.
ـ خلاص يبقى مش هتيجي معاكي تاني وانا اللي هاجي معاكي ونبقى نقولهم انك حامل في والد لحد ما تخليه بشاطرتك يكتبلك الشقة باسمك
لم تفهم مروة حديث والدتها وتحدثت بفضول قائلة لها.
ـ طب لو طلعت حامل في بنت هعمل ايه؟
تحدثت والدتها بمكر قائلة لها.
ـ دا هيبقى علي حسب شاطرتك بقى انك تخليه يكتبلك الشقة قبل ما تخلفي قبل ما تلاقي نفسك مرميه في الشارع زي اللي قبلك
حركت مروة رأسها بالايجاب وهي تستمع الي حديث والدتها باقتناع قائلة لها.
ـ عندك حق يا امي انا لازم فعلا امن نفسي لان جمال ملوش امان وهو بنفسه قالي انه ممكن يعمل فيا نفس اللي عمله في أميرة وهو قليل الاصل وملوش امان
تحدثت اليها والدتها بتأكيد قائلة لها.
ـ ايوه كدا خليكي شاطرة وشوفي ايه الغلط اللي أميرة عملته و اوعي تقعي فيه
نظرت مروة امامها وهي تستمع الي نصائح والدتها وتفكر كيف تآمن نفسها مع جمال .
رواية أميرة آخر الزمان بقلمي ملك إبراهيم.
_____________
في قسم الشرطة ..
خرج جمال من غرفة الضابط والعسكري يمسك به.
وصل محامي أميرة ليتابع ماذا حدث في المحضر واصر ان يتحول المحضر للنيابة.
قابله فريد بالقسم و تعرف عليه و اخبره انه يريد التحدث معه بأمر هام.
اخذ العسكر جمال للحبس مرة أخرى وطلب فريد من خالته ان تذهب مع ابنتها اماني ويعودان الي المنزل.
جلس فريد مع المحامي طارق محامي أميرة وبدأ فريد حديثه قائلاً له.
ـ انا قبل اي كلام عايز اقول لحضرتك اني بكون ابن خالة جمال طليق موكلتك واني اكتر واحد عارف الظلم اللي اتعرضت ليه أميرة هي وبناتها
تحدث اليه المحامي طارق بهدوء قائلاً له.
ـ اعذرني في اللي هقوله بس لما حضرتك عارف ان موكلتي مظلومه ليه بتساند ابن خالتك في اللي عمله فيها، يعني اللي انا عرفته انه طلقها وخد كل حقوقها وكمان راح ضربها في بيتها قدام الناس كلها وطبعا حضرتك عارف خطورة الاصابات اللي اتسبب لها فيها
حرك فريد رأسه بالايجاب قائلاً له.
ـ انا مش بسانده ابدا بالعكس، انا كان نفسي اساعد أميرة تاخد حقوقها وهي نفسها رفضت مساعدتي ليها وطبعا هي معاها حق تخاف مني لاني ابن خالة طليقها ومستحيل هتثق فيا
حرك المحامي طارق رأسه بتفهم قائلاً له.
ـ حضرتك لازم تعذرها لان دا تفكير اي انسان طبيعي لان بالعقل كده حضرتك المفروض مش هتقف معاها هي ضد ابن خالتك
نظر اليه فريد بثبات قائلاً له بتأكيد .
ـ انا هقف مع أميرة ضد جمال
نظر اليه المحامي طارق بستغراب ثم اعتدل في جلسته قائلا له بفضول.
ـ ممكن افهم تقصد ايه بالظبط
تحدث فريد بهدوء قائلاً له.
ـ جمال استغل ضعف أميرة وانها لوحدها وقدر يخليها تتنازل عن كل حقوقها وحتى بناتها حرمها منهم مع انها حاضنه وهو مجبور يوفر لها سكن ونفقه شهريا تصرف منها علي بناتها
حرك المحامي طارق رأسه بالايجاب قائلاً له.
ـ مظبوط
تحدث فريد بثقة قائلاً له.
ـ دلوقتي أميرة جتلها الفرصه انها تاخد كل حقوقها من جمال
عقد المحامي ما بين حاجبيه بعدم فهم قائلاً له بفضول .
ـ ازاي؟!
تحدث فريد بهدوء قائلاً له.
ـ أميرة هتاخد من جمال بناتها وكمان هيوفرلها مكان للسكن وهتاخد نفقة شهريه تكفي مصاريف بناتها
تحدث المحامي طارق بستغراب قائلاً له.
ـ وايه المقابل ان جمال يديها كل حقوقها بسهوله كده؟!
ابتسم فريد بثقة قائلاً له بتأكيد.
ـ المقابل هيكون ان أميرة تتنازل عن المحضر
شعر المحامي طارق ان ما يقوله فريد ما هو اللي خدعة منهم كي تتنازل أميرة عن المحضر فقط ولا تأخذ أميرة اي من حقوقها بعد خروج جمال، نظر الي فريد بشك وهو يفكر بصمت.
فهم فريد نظراته وتحدث اليه بثقة قائلاً له.
ـ متقلقش انا فعلا عايز أميرة تاخد حقها وبعمل كل ده لمصلحتها، يعني انا دلوقتي قدرت اقنع خالتي وجمال ان الطريقه الوحيدة لخروجه هي ان أميرة تتنازل ومكمل معاهم عشان ميروحوش لمحامي تاني وطبعا حضرتك عارف الحيل اللي بيعملوها المحامين عشان يخرجوا الموكل بتاعهم من القضايا دي
حرك المحامي طارق رأسه بالايجاب ثم تحدث اليه بكل احترام قائلاً له.
ـ انا مع حضرتك جدا مع اني مستغرب موقفك بس برضه انا من حقي اقتنع عشان اقدر اضمن حقوق موكلتي
ابتسم فريد قائلاً له.
ـ طبعا دا من حقك وهو ده اللي انا عايزه، يعني لو هنحسبها بالقانون طبعا حضرتك عارف ان كل قضيه هي هترفعها هو هيرد عليها بقضيه، دا غير انه ممكن يقدم اثباتت بتأكد ان معندوش وظيفه ولا دخل ثابت وان مرتبه قليل جدا دا غير طبعا التنازل اللي أميرة وقعت عليه وهندخل في حبل قضايا مش هينتهي وفي الاخر الفلوس اللي هيتحكم لاميرة بيها هتكون مبلغ قليل ميستهلش كل الوقت ده
حرك المحامي رأسها بالايجاب وهو يستمع الي فريد بتركيز شديد.
ليتابع فريد حديثه قائلاً له.
ـ احنا بقى هنرجع لاميرة كل حقوقها من غير كل ده، انا هقولهم ان حضرتك قولتلي ان أميرة ممكن تتنازل عن المحضر وتخرج جمال بس بشرط
نظر اليه المحامي طارق بتركيز، ليتابع فريد حديثه بكل ثقة قائلاً له.
ـ اهم شرط ان جمال يكتب الشقه اللي كانت أميرة متجوزه فيها وهو اتجوز فيها دلوقتي بأسم أميرة وبناتها بيع وشرا… بقلمي ملك إبراهيم.
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أميرة آخر الزمان)
