رواية المدرسة الفصل الأول 1 بقلم إيسو ابراهيم

رواية المدرسة الجزء الأول

رواية المدرسة البارت الأول

رواية المدرسة الحلقة الأولى

كانت الميس طالعة حصتها، فجأة عالسلم لقيت ولد بيشد الدفتر منها والشنطة
اتخضت وقالتله: سيب يا عسل حاجتي
الولد: لأ يا مس أنا هاخدهم
الميس تشد والولد يشد
الولد: يا ميس بقى سيبي حاجتك خليني أطلعهم ليكي يلا
الميس باستغراب: لأ يا حبيبى سيبهم وأنا كدا كدا طالعة ليكوا
الولد: لأ هاتيهم هطلعم أنا
الميس: خلاص خد الدفتر بس، وخده منها وطلع جري عالسلم دخل الفصل وقال: الميس رودي هي اللي علينا يلا كلنا نطلع كتب الانجلش بسرعة عشان طالعة دلوقتي عالسلم ودفترها أهو
طبعا كل الطلاب صدقته لما شافوا دفتر الميس
دخلت الميس الفصل، بدأت الطلاب كلها تقف ألقت السلام وتحية الصباح وسمحت لهم بالجلوس
طبعا دي كانت تاني حصة لهم معاها فحاطة نظام للحصة، وكلهم عارفين النظام إيه كل حاجة باستئذان وممنوع الكلام والاستظراف
كان دا فصل ولاد بس، الميس رودي بدأت تكتب عالسبورة التاريخ والعنوان، والكل بيكتب وراها عشان خايفين تمسح السبورة زي المرة اللي فاتت وعاقبتهم عشان استهتروا بيها لأنها كانت لسه متخرجة وسنها صغير، لكن وقفتهم عند حدهم
وطبعا مش معهم وقت للكلام ولا المشاغبة مشغولين في الكتابة، حطت القلم كان الكل حاطط القلم قدامه ومنتبه ووشه للسبورة مستنين الشرح عشان هتسأل في اللي شرحته
بدأت تشرح والكل بيشارك معها وهي طبعا مبسوطة من دا ومخلي حماسها يزيد وبتشرح بكل ضمير ومفيش ملل ولا ضيق، لأن الطلاب قدامها مستمعين ومركزين ومتفاعلين، فدا بيشجعها تشرح بأفضل طريقة عندها
خلصت شرح بدأت تسأل بالدور سؤال صغير عالسريع، وبعدها قالت: اكتبوا يلا اللي شرحته عالسبورة وخمس دقايق وهمسح عشان نشوف التقييمات
الكل كان بيكتب بهدوء وبسرعة، عدى مدرس من قدام الفصل واستغرب إزاي الفصل دا ساكت كدا وبيكتبوا بدون صوت
دخل الفصل ألقى السلام كلهم ردوا والميس رودي كمان، وقفت له احتراما لسنه وإنه كمان كان أستاذها، فقال: ممكن لحظة برا يا ميس رودي
الميس رودي: تمام يا مستر
بقلم إيسو إبراهيم
طلعوا برا، وبردوا مستغرب إن حتى ولا طالب بص في اتجاه غير السبورة، فقال: في إيه العيال مش على عادتهم
الميس رودي باستغراب: ودا شيء مش كويس يعني؟
المستر بسرعة: لأ خالص دا كويس أوي كمان بس مستغرب إزاي
حكتله الميس رودي اللي حصل معها أول يوم، فاضطرت تستخدم الطريقة اللي عملتها ونفذتها قدامهم وبدأت تسأل في اللي شرحته وتحط درجات، فالعيال خافوا وإنها أصلا استغربت كمان وفرحت إنهم اتبعوا التعليمات
المستر بابتسامة: برافو عليكي يا ميس رودي، دول ماكانوش بيخافوا غير من المدير أو أي مدرس صارم معهم، دا معظم المدرسين مش بيستحملوهم وكل شوية واحد نازل للمدير
الميس رودي بابتسامة: ربنا يهديهم ويوفقهم
بعدها دخلت الحصة تاني، وخلت ولد يطلع يمسح السبورة وكان الكل خلص، وبدأت تقولهم يفتحوا صفحة كذا ويبدأوا يحلوا ويطبقوا الشرح، وقالت دا هيبقى عليه درجات، الكل كان بيحل وهي مبسوطة بالمنظر اللي قدامها
بعد ربع ساعة الحصة خلصت، وراحت عشان تشوف الحصة اللي بعد كدا، دخلت فصل أول مرة تدخله، وقالت التعليمات بتاعها للفصل وبصولها باستغراب، ولكن نفذوا اللي قالته
بدأت تشرح زي المعتاد وبعدها قالت خمس دقايق وهمسح، وفجأة وهما بيكتبوا ولد وقف وقال: يا مس في ولد رمى الورقة دي عليا
خدت الورقة منه وقريت اللي فيها وانصدمت قالت بغضب: مين دا؟
شاور عليه قالتله: اقف وتعالى هنا
الولد: هو اللي بدأ الأول يا مس قبل ما تدخلي الفصل رمى عليا الورقة دي، خدتها منه وشافت اللي مكتوب وقال بعصبية: أنتم الإتنين اطلعوا برا هنا عند السبورة، اتصلت عالمدير يطلع لها الفصل
الولاد بخوف: خلاص يا مس مش هنعمل تاني كدا، طبعا المس مطنشة كلامهم ودموعهم ولا بتبص ناحيتهم خالص
طلع المدير ورته الورق اللي رموه على بعض، وخدهم على تحت عشان يبعت لأهلهم
يا ترى إيه اللي حصل؟
وهل الطريقة دي هتنفع مع كل الطلاب؟