رواية عزبة فكه الجزء الثاني الفصل الخامس والعشرون 25 بقلم ريناد
رواية عزبة فكه الجزء الثاني البارت الخامس والعشرون
رواية عزبة فكه الجزء الثاني الجزء الخامس والعشرون
رواية عزبة فكه الجزء الثاني الحلقة الخامسة والعشرون
ناصر اخد شيماء وخالد عشان يوصلهم العزبه واثناء ما هما ماشيين في الطريق
ناصر:ام خالد عايز اقولك حاجه كده وياريت تعتبريني زي اخوكي وتتقبلي كلامي زي الاسطي يوسف مبيعتبرني اخوه الصغير
شيماء مردتش عليه وماشيه سرحانه وحتي مش سامعاه بيقول ايه
ناصر:انا عايز اقولك ان ربنا وحده هو اللي بيألف القلوب،، وان الانسان ضعيف واضعف من انه يفرض حبه علي قلب حد الا ماشاء ربه،، وانتي يا ام خالد لسه صغيره والعمر قدامك واكيد هتلاقي اللي يحبك ويقدرك ويعوضك
شيماءمع نفسها:ياااه اد ايه سنين من عمري راحت وانا بجري ورا وهم اسمه حب يوسف،، طفولتي ومراهقتي، وشبابي وعمري اللي راح كله،،
مكنتش شايفه غير يوسف دانا حتي عمري مكان ليه صاحبه ولا صديقه ولا اي حد غيره،،
كان هو كل دنيتي ومستغنيه بيه عن الدنيا كلها،، عملت زي التايهه في الصحرا ويوسف دا كان السراب اللي كل ما اقرب منه ملاقيهوش الاقيه بيبعد اكتر،،
ااااه يايوسف اااااه ياعمري اللي ضاع..
فاقت علي صوت ناصر:ام خالد ام خالد …
لا دا انتي مش معايا خالص،، ع العموم ربنا يصبر قلبك ويهون عليكي،، واحنا وصلنا العربيه اهي اتفضلي اركبي وركبو العربيه ووصلهم ناصر لغاية قدام البيت واطمن لما دخلو وقفل الباب وراهم ومشي
الكانو فضل ماشي في الشوارع لغاية ما وصل الكورنيش التابع لمنطقتة فضل قاعد سرحان في حاله وبيسأل نفسه ياتري ايامه الجايه هتبقي ازاي؟
كانو:هتبقي ازاي يعني هتبقي احسن ما كانت وهي هربانه منك،،
كان عندك امل انك هتلاقيها فيوم من الايام،،
مبطلتش تدوير عليها ولا سؤال يوم واحد،، لكن دلوقتي انا عارف مكانها وعارف كمان انها في حضن واحد تاني مبسوطه معاه يبقي خلاص عيش حياتك بقا وانساها ياكانو انسي سبب عذابك ووجعك
انسي؟ انسي عمري كله ازاي!!
ازااي بس،، وحط دماغه بين ايديه آآه ياوجع عمري يافكه،،
الكانو فاق علي صوت بنت جميل
البنت:الدره المشوي،، الزغاليل،، زغاليل يابيه زغاليل ياهانم هتندم ياللي مش هدوق الزغاليل
الكانو بصلها وراح واقف قداما
البنت بلعت ريقها بصعوبه :الباشا الكانو اهلا ياباشا وطلعت فلوس وادتهاله
الكانو تؤ مش عاوز فلوس
البنت :امال جنابك عايز ايه؟ اه عايز دره وادتله دره
الكانو:ولا عايز دره
البت بصتله بعدم فهم وبصت بعيد علي شاب واقف علي عربية ترمس كان مركز معاها لكن مرضيش يروحلها عشان عارف الكانو
البنت :امال عايز ايه ياباشا؟
الكانو :عايزك انتي،، هروح البيت ساعه وتكوني عندي ولو متعرفيش البيت الف مين يدلك علي مطرح الكانو
البنت بتبص حواليها باستنجاد :بس يابيه انا انا
الكانو بزعيق:طبعا مش محتاجه اقولك هعمل ايه لو مجتيش،،
وبص مكان مابتبص علي الشاب ..
هدبحهولك هو وكل اللي ليكي في الدنيا وبرضو هجيبك لو في قمقم
الكانو مشي واول مامشي الشاب جه جري ناحيتها
سالم :الكانو كان عاوز منك ايه ياصباح؟
صباح ودموعها نازله :عايز اللى كل بنت وست فى المنطقه بتخاف منه ياسالم
سالم قعد على الارض وحط اديه على دماغه :يامرارك ياسالم يامرارك ياسالم …
لكن لا لايمكن اخليكى تروحيله ابدا بموتى ياصباح
صباح :مهو فعلا قاللى بموتك وموت كل اهلى لو مرحتلهوش ياسالم
سالم :يعنى ايه هتروحيلو؟
صباح :يعنى قدامى حل تانى؟ كانت غيرى اشطر ياسالم
سالم وصباح حضنو بعض وفضلو يبكو بصوت عالى وقامت صباح بصعوبه من حضن سالم وقفلت العربيه بتاعتها وسالم متابعها بعنيه ودموعه نازله
صباح خلصت وماشيه من غير ماتبص لسالم عشان مش متحمله منظره
سالم :خلاص ماشيه
صباح ؛:على عينى ياسالم كان نفسى تكون انت اول راجل يلمسنى بس المكتوب ممنوش مهروب،، قالى ساعه وتكونى فى البيت والا هيعمل اللى قال عليه وانت عارف ده مبيرجعش فكلمته ياسالم
سالم جرى عليها وحضنها :استنى انا رايح معاكى
صباح :هيموتك ياسالم
سالم :هستناكى من بعيد مش هسيبك تروحى لوحدك
ومشيت صباح اللى كانت حاسه انها دبيحه وصا حبها واخدها على الجزار اللى هيدبحها وهى لازم تروح عشان مفيش مفر
وصلو بيت الكانو وصباح سابت ايد سالم
صباح :كفايه لحد هنا ياسالم وجريت منه عشان ميمسكش فيها والكانو يشوفه وخبطت على الباب فتحلها الكانو وكان قاعد ببنطلون وقالع التيشرت وماسك قزازه بيره بيشرب فيها
الكانو :اتفضلى ياعروسه
صباح دخلت وهى عنيها فى الارض وخايفه حتى تبصله،،
ودخلت صباح وسالم متابعها من بعيد وقلبه بيتقطع من القهر ومش قادر يتكلم حاسس انه متكتف مفيش حاجه حره فيه غير دموعه اللى مغرقه وشه .
الكانو قفل الباب وبص لصباح وشاورلها على اوضه عشان تدخلها وفعلا صباح دخلت الاوضه وقعدت على طرف السرير وهى بتفرك فى اديها وهتموت من الخوف
الكانو دخل وقعد جمبها على السرير ومد ايده ليها ومسك طرف الطرحه :
متفكى كده مالك ؟
صباح ماسكه فطرحتها وهى بتبكى وقالتله :
اعتقنى لوجه الله يامعلم الكانو ابوس ايدك
الكانو بزعيق :مبحبش اللوكلوك اخلصى وشد الطرحه من فوق راسها
صباح صرخت بزعيق :لاااا الحقنى ياسالم
سالم سمعها بتنادى عليه جرى لغايه الباب بتاع البيت لكن رجع تانى مقدرش يعمل حاجه وراح لاقرب حيطه وفضل يضرب دماغه فيها لغاية ماتعور
الكانو :سالم مين اللى بتندهى عليه ده ياقطه ومتخيله انه هيقدر يخلصك من ايدى هههههههه
صباح بصت للارض وبتشهق من كتر البكا
الكانو بصلها :سالم ده اللى كان بيبيع ترمس وكنتى بتبصيله وانا بكلمك؟
صباح شاورت بدماغها :اه
الكانو :ههههه طب وهو هيسمعك من هنا؟
صباح :مهمهو مهو جه معايه
الكانو باستغرااب :جه معاكى فين؟
صباح :بره مستنينى
الكانو فتح الشباك وبص لقى واحد رايح جاى فى الشارع حاطط ايد فى وسطه وايد على دماغه
الكانو :بيحبك؟
صباح شاورت بدماغها :اه
الكانو :وانتى بتحبيه؟
شاورت بدماغها :اه
الكانو بصله وبصلها .
وفضل فالشباك شويه وفجاة افتكر كلام شيماء..
لما تيجي تظلم حد حط نفسك مكانه وانت مش هتقدر تكمل ظلم،،
وفجاة تخيل نفسه مكان الشاب ده وحبيبته جوه مع واحد وهو مش قادر يتكلم ولا يدافع عنها ويخلصها من ايديه،،
وحس انها اد ايه صعبه علي اي حد،،
بص لصباح:قومي روحي
صباح بصتله ومش مصدقه اللي سمعته
الكانو :بقولك قومي روحي وقوليله الكانو بيقولك حافظ عليا وحطني جوا عنيك وفرحكم عليا
صباح بصتله بابتسامه.
الكانو:ايه هتقومي تروحيله ولا اغير رأيي؟
صباح اخدت طرحتها وخرجت جري وراحت اترمت في حضن سالم
سالم بعدها عنه وبيبصلها بتساؤل وهي شاورتله بدماغها .لا وابتسمت وسط دموعها اللي نازله
سالم شالها ولف بيها من الفرحه ونزلها ومسح دموعه :اييه اللي حصل؟
صباح:سألني لو بنحب بعض قولتله ايوه وقالي روحي قوليله الكانو بيقولك حافظ عليا وحطني جوا عنيك وفرحنا عليه
سالم مش مصدق اللي بيسمعه وبص للكانو اللي كان بيبص عليهم من الشباك ودموعه نازله و سالم ضربله تعظيم سلام
والكانو شاورله عشان ياخدها ويمشي
وسالم مسك ايد صباح وجريو وهما بيضحكو بصوت عالي
الكانو قعد علي السرير وحط دماغه بين ايديه وبكي بكي هستيري وهو بيكلم نفسه .
ياااه ياكانو كام واحده ظلمتها وظلمت حبيبها واهلها واخدت منها شرفها،،
كام واحد كان بيستني حبيبته وهو عارف انها معاك وبتعمل فيها ايه ومكانش يقدر يتكلم آآآآه يارب سامحني
وفجأه انتبه انه لاول مره في حياته يذكر اسم ربنا ويناديه!
الكانو استغرب نفسه:جاي دلوقتي تنادي علي ربنا،، بعد ايه معرفتش ليه طريق ربنا من زمان؟
ملقتش حد يعرفني طريقه ولا حد يخوفني منه لا اب ولا ام ولا اي حد
دا لما كنت صغير،،
طب ولما كبرت وعرفت الحرام من الحلال مبعدتش عنه ليه؟
كنت اتعودت وكان صعب..
وحتي دلوقتي صعب
-لا مش صعب،، هحاول وهخبط علي باب ربنا يمكن يقبلني،،
وبص علي ازازة البيره اللي في ايده وكسرها علي الارض وفضل يبكي بحرقه
اما عند يوسف في الشقه يوسف شغل اغنية مروان خوري .كل القصايد وحضن فكه وفضل يرقص معاها وهو بيغني كلمات الاغنيه وباصص لعيون فكه اللي تايهه هي كمان في بحور عنيه ومش بتتكلم بتسمعه بس وقلبها بيرقص علي نغم الاغنيه
خلصت الاغنيه
يوسف:انتي فاهمه الاغنيه بتقول ايه ولا اترجملك؟
فكه:عارفه وحاسه بس برضو ترجملي عايزه اسمعك وانت بتتكلم وحتي صوتك وكلامك وكل حاجه فيك وحشتني يا أغلي من حياتي
يوسف:انا بعشقك يا فتتي
فكه:يااااه وحشني الاسم ده منك اوي يايوسف،، وانا كمان بعشقك فوق العشق عشقين
يوسف شال فكه ودخل بيها اوضة النوم وقضو ليله من الف ليله وليله بكل الشوق اللي جواهم لبعض واخيرا البعد اتحول لقرب
الكانو فضل صاحي طول الليل واول ما سمع قرأن الفجر قام لبس هدومه وراح عزبة فكه،، راح عند الجامع لكن مقدرشي يدخل،، قعد من بره لغاية ما الناس صلو وخرجو وهو روح
تاني يوم الصبح شيماء صحيت من النوم الصبح بدري وأخدت خالد وقفلت الباب بالقفل وراحت ناحية الشادر إدت مفتاحه لحد من الرجاله الشغالين هناك وقالتله يديه لنواره بناء علي كلام فكه،، واخدت خالد وسافرت علي اسكندريه
عند فكه فتحت عينها علي وش يوسف اللي نايم جمبها وهي نايمه علي دراعه وابتسمت وباسته في كل حته فوشه وهتقوم يوسف ابتسم ورجعها لحضنه تاني
يوسف:سايباني ورايحه فين؟
فكه بصوت واطي:رايحه اعملك الفطار
يوسف:ومين قالك اني عايز افطر
فكه ابتسمت:امال عايز ايه
يوسف قرب جمب ودنها:انا عايزك انتي وبس،،
مش عايز اكل ولا شرب ومش عايزك تبعدي عن حضني ابدا وحضنو بعض بكل حب
الكانو قاعد في الموقف كعادته سرحان ومش بيتكلم فجأه لقي حد حط ايده علي كتفه من ورا.
الكانو التفتله واول ماشافه قام وقف
الكانو:عم الشيخ ايه اللي جابك هنا عايز حاجه؟
الشيخ:انا شوفتك في صلاة الفجر لما جيت عند الجامع وقعدت من بره مدخلتش مع انه كان باين عليك انك كنت جاي وعايز تدخل
الكانو:خوفت واتكسفت
الشيخ:من ايه؟
الكانو:خفت من ربنا ، خفت ادخل بيته وانا نجس ومش طاهر،، واتكسفت ادخل وانا سب الدين كأنه لبانه في بوقي
الشيخ:استغفر الله العظيم،، طيب ما تطهر
الكانو:معرفش ولا اعرف حتي اتوضا
الشيخ:طيب انت نفسك تعمل كده نفسك تطهر وتدخل الجامع؟
الكانو:هينفع!
الشيخ:اكيد ينفع تعالا معايا
الكانو:علي فين؟
الشيخ :مشوار هيريحك اوي
الكانو مشي مع الشيخ اللي اخده علي بيته ودخله الدور الارضي اللي كان عباره عن مصلي صغير وقعده عربي كان الشيخ بيلم فيها الناس ويعملو حلقة ذكر،، وحمام
الشيخ راح ناحية الحمام وقلع القفطان اللي بيتلبس فوق الجلابيه وقلع الجلابيه وقعد بالفانله والبنطالون وجاب ٣ حلل كبار وملاهم ميه سخنه وجاب طشت وكرسي خشب جواه وبص للكانو :اقلع هدومك يا ابني وتعالا
الكانو بصله باستغراب!!
الشيخ:هساعدك تغتسل وتتطهر انا زي والدك متتكسفش مني،، واحنا هنا محدش هيدخل علينا ومش هينفع تدخل الحمام لانك هتذكر اسم ربنا
الكانو سمع كلام الشيخ وبقي يعمل زي ما الشيخ بيوريه،،
خلاه توضأ واغتسل وطلب منه يتشهد مع كل مكان في جسمه يمشي عليه ايده مع الميه
وفعلا الكانو بيعمل كده ودموعه نازله بتختلط بالميه اللي بتنزل علي جسمه وحاسس انه ذنوبه بتنزل مع الميه دي،، والشيخ يشهد ويوحد وهو بيبكي ويستغفر ويطلب من الكانو يستغفر وبعد ما خلصو الشيخ مخلاش الكانو يلبس هدومه القديمه ولبسه جلابيته وطلع جابله غيار من فوق
الكانو:ليه ملبسش هدومي؟
الشيخ :لازم الهدوم تمر في الماء ثلاث مرات وده عشان تبقي طاهره يابني
الكانو حس انه واحد تاني،، نضيف طاهر خفيف،، ووقف ورا الشيخ اللي صلي قدامه بصوت عالي والكانو بيردد وراه ..
ولما خلصو الشيخ دعا ربنا انه يقبل توبة الكانو ويثبته علي طاعته وعبادته
ومسك مصحف واداه للكانو
الكانو بصله بإستغراب!
الشيخ:ده صديقك الجديد اللي مش هتلاقي اصدق ولا اقرب منه ليك،،، دا اللي هينجيك وهيجاوبك علي كل اسئلتك بدون كذب او مجامله
الكانو:بس انا مبعرفش اقرا؟
الشيخ:سيد الخلق لما نزل عليه القرأن والوحي ما كان بقارئ،، أتعلم استمع للقرأن حمله علي تليفونك لما يترد علي مسامعك هتحفظه وتفهمه مش مهم تكتبه المهم تسمعه وتحفظه وتردده بينك وبين نفسك
وقرب من الكانو وحضنه :انا فرحان بيك اوي يابني وربنا استجاب لدعاء بنتي فكه اللي كانت بتدعيلك ربنا يهديك وكانت بتاكدلي ان جواك نضيف،، مع كل العمايل اللي بتعملها دي وانك هيجي يوم وترجع عن الطريق اللي انت فيه ده
تعرف انها طلبت مني كتير اتكلم معاك وانا كنت بقولها لسه مأنش الاوان ومجاش الوقت
كانت بتقولي هتعرف ازاي لما يجي الوقت؟
كنت بقولها طالب التوبه بيبان فعنيه وشفت ده في عنيك المتعلقه بخوف علي باب المسجد النهارده
الكانو ابتسم:فكه دي احلي حاجه حصلت في عمري كله،، واتنهد
الشيخ :عارف انك كنت بتحبها اوي لكن لما تقرب من ربنا وتحبه هتعرف ان مفيش حاجه لازم تتحب اكتر من ربنا،،
ولما تترك كل شهاواتك وتترك النظر للمحرمات ربنا هيزيدك ايمان تجد حلاوته في قلبك
الكانو بصله
والشيخ شاورله بأبتسامه علي بره
والكانو اخد المصحف فى حضنه وخرج من بيت الشيخ وهو حاسس انه انسان تاني غير اللي دخل
وابتدا يبص للدنيا بنظره تانيه خالص
الكانو مرضيش يروح على بيته وراح على الجامع اللى فعزبه فكه وقعد جواه طول النهار يصلى زى ماعلمه الشيخ وسط دهشه واستعجاب كل اهل العزبه .
الشيخ راح الجامع بالليل واول مادخل الجامع شاف الكانو وابتسم وراح حط ايده على كتفه
الشيخ :الناس قالولى انك هنا من الصبح مروحتش ومد ايده بكام تمره واداهملو
الكانو اخدهم :ايوه مقدرتش اروح البيت جيت على هنا
الشيخ :ولحد امته؟
الكانو بصله :تقصد ايه مش فاهم ؟
الشيخ :لحد امته هتفضل معتكف فى الجامع؟
الكانو :مش عارف
الشيخ :انا عارف انك فرحان برجوعك لربنا وعايز تكفر عن كل اللى عملته بالصلاه لكن انتا برضو لازم ترجع تمارس حياتك طبيعى
الكانو بصله
الشيخ :بس من غير معاصى ولا بلطجه يعنى تشتغل وتكسب رزقك بالحلال،، اتجوز وخلف،، ولكن متخليش امور الدنيا برضو تلهيك عن عباده ربك
الكانو :اتجوز؟!
الشيخ :ايوه تتجوز عشان تعف نفسك وتصونها من المعاصى وكمان عشان تخلف اصل المال والبنون زينة الحياة الدنيا
قوم يابنى صلى الصلوات المكتوبه والنوافل وماغير ذلك فى اوقات الفراغ بعد الانتهاء من شغلك الحلال اللى هتشتغله عشان ربنا هيسئلك شبابك فيما افنيته
الكانو بص للشيخ ؟
الشيخ :ايوه ربنا هيسئلنا عن شبابنا ضيعناه فى ايه وحتى مالنا صرفناه فى ايه عشان كده لازم تغتنم شبابك قبل كبرك وصحتك قبل مرضك
الشيخ :قوم ياكرم يبنى الدين يسر وليس عسر
الكانو ابتسمله :كرم!
الشيخ :ايوه اسمك جميل ياكرم وذات معنى جميل اى كرم من عند الله
الكانو قام وصلى مع الناس وروح على بيته ونام،، ولاول مره ينام مرتاح البال مطمن ومش خايف من اى حد ولا خايف من الموت اللى كان دايما بيخاف منه.
تانى يوم الصبح الكل صحى على بداية حياه جديده .
يوسف وفكه صاحيين على بداية حياه سعيده مع بعض .
شيماء صاحيه على بداية حياه جديده لاول مره مفهاش يوسف
الكانو صاحى على بداية حياه جميله بقربه من ربنا برغم انها من غير فكه .
شيماء نزلت تفتح المطعم عشان لازم من هنا ورايح تصرف على نفسها لانها خلاص مبقتش ملذمه من يوسف ومش عاوزه تعتمد عليه فى اى حاجه فحياتها بعد النهارده .
الكانو صاحى وناوى انه يدورله على شغلانه جديده شريفه لكن مش عارف يبدا منين وازاى وخصوصا انه عمره ماتعب ولا بذل مجهود عشان يجيب فلوس
فى المطعم عند شيماء :
بريزه :الا قولى يلا ياخالد انتو روحتو مصر وطولتو ليه والاسطى يوسف ناوى يجى امته ؟
خالد :بابا مش هييجى هنا تانى عشان هو رجع اتجوز ماما فكريه تانى وهيعيش معاها فمصر .
ابله فكريه اللى ماتت من سنتين ؟
خالد :ايوه مهى طلعت عايشه واتجوزها تانى وطلق ماما شيماء
بريزه بيهرش فى دماغه :ازاى ده انا مش فاهم حاجه،، هو الميت بيصحى، اناهروح اشتغل احسن
عند بيت ابراهيم فى العزبه :
ام ابراهيم :هاه يانواره بقيتى احسن دلوقت؟
نواره :الحمد لله ياماما بقيت احسن وهنزل الشغل النهارده كفايه كده ليا ٤ ايام قاعده فى البيت مجبتش جنيه من بره والبيت عايز كل يوم مصاريف
ام ابراهيم :الشغل ماطارش يابنتى وبعدين لما تخفى كويس البيت مستور والحمد لله
ابرهيم دخل : السلام عليكم
الكل وعليكم السلام
ابراهيم :عامله ايه النهارده يانواره
نواره :الحمد لله احسن
ابراهيم :مش كنتى روحتى المستشفى وكشفتى
ام ابراهيم :والله بقولها تقولى كمان شوية برد هنروح بيهم المستشفى
نواره :دول شوية برد وهيروحو لحالهم ياهيما متقلقش . المهم مفيش اخبار عن ابله فكه انا قلقانه عليها قوى معرفتش هى فين ؟
ابراهيم :لا والله يانواره اول مره تعملها وتمشى من غير منعرفلها طريق واللى قالقنى اكتر تليفونها الغير متاح دايما ده اديلو اليوم التالت النهارده
نواره :ومين سمعك ياهيما انا قلبى واكلنى عليها اوى وخايفه تكون ضرتها دى دخلت عليها بالمحلسه وجرجرتها لحته وعملت فيهاا حاجه عشان يخلالها الجو مع جوز ها
ابراهيم :مظنش ان اللى كانت بتيجى لفكه دى ممكن تعمل حاجه ولا تقدر تأذى فكه دى باين عليها طيبه
نواره :ههه غلبانه انتا متعرفش دى عملت ايه فى ابله فكه على العموم ربنا يسترها واتنهدت وبصت لبعيد .
عند فكه عدو يومين عليها كأنها فى الجنه مع يوسف .
رن تليفون يوسف
يوسف :الوو ايوه ياناصر
ناصر :ايوه ياسطى اخبارك
يوسف :الحمد لله اخبارك انتا والشباب عاملين ايه
ناصر :انا والشباب مستنيين نشوف هتشتغل فين عشان نشتغل معاك كلنا .
يوسف :والله منا عارف ياناصر بس لازم اشوف شغل بسرعه عشان صرفت اللى ورايا واللى قدامى على الشقه والعفش وتقريبا كده بصفى .
ناصر :طيب انزل قابلنى وانا عندى الحل بأذن الله بعد ساعه على القهوه اللى تحت بيتك
يوسف :تمام توصل ورن عليا انزلك
ناصر :اشطه سلام
يوسف :فوفا بتعملى ايه
فكه :ايوه ياحبى انا فى المطبخ بحضر للغدا
يوسف :متسيبى الغدا لسه بدرى عليه وتعالى اقعدى معايا شويه
فكه ابتسمت وراحتله :ايه مزهقتش منى؟
يوسف :عمرى مزهق منك ابدا،،
انا ماصدقت لقيتك اصلا والود ودى افضل باصصلك كده طول عمرى ومتغيبيش عن عينى لحظه .الا لو انتى زهقتى بقا دى حاجه تانيه
فكه :اخص عليك انا ازهق منك دنتا عمرى كله يايوسف ربنا مايحرمنى منك يارب
يوسف :ولا منك ياقلب يوسف
فكه قربت منه وهو حضنها ونامت على صدره وسرحت لبعيد
يوسف :حبيبى بيفكر فأيه؟
فكه :ابدا بس اهل العزبه والعزبه وحشونى اوى
يوسف :من يومين؟
فكه :تصور ؟ اصل انتا متعرفش العزبه واهلها غاليين عليا ازاى دول اهلى اللى ربنا عوضنى بيهم عن اليتم اللى شوفته طول عمرى يايوسف وهما كمان بيحبونى اوى
يوسف :ربنا ميحرمكم من بعض ويديم المحبه مابينكم :طيب متروحى تزوريهم وتطمنى عليهم المسافه مش بعيده
فكه بصتله :ممكن؟
يوسف :طبعا ممكن
فكه بسعاده :ربنا يحرسك ليا وميحرمنى منك ابدا
يوسف :بس اول ماتوصلى تكلمينى فى التليفون تطمنينى عليكى ومتتأخريش هناك عشان هتوحشينى
فكه :هو انتا مش هتيجى معايه؟
يوسف :لا انا هقابل ناصر بعد ساعه على القهوه هنتكلم فى شغل
فكه :ناصر ده اللى عمل عروستك؟ احسن انك مش هتجيبو هنا عشان مقطمش زمارة رقابته على اللى عمله فيا يوم الفرح ههههه
يوسف :ههههههه دا ناصر طيب اوى لما هتعرفيه هتحبيه جدا
فكه :ربنا ديما يوقف فى طريقك ولاد الحلال الطيبين ياقلبى .
فكرتنى صحيح اقوم احط التليفون بتاعى على الشاحن اصلو فاصل من يومين وانا نسياه خالص
قامت فكه ودخلت الاوضه تجيب التليفون ويوسف متابعها بعنيه ومبتسم وحاسس براحه كبيره وهو شايفها قدام عنيه،، ومن كتر سعادته خايف يكون دا حلم وهيصحى منه.
ياترى سعادة يوسف وفكه هتستمر ولا فيه حاجه هتعكر صفو السعاده دى ؟
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية عزبة فكه)
