رواية عزبة فكه الجزء الثاني الفصل الرابع والعشرون 24 بقلم ريناد
رواية عزبة فكه الجزء الثاني البارت الرابع والعشرون
رواية عزبة فكه الجزء الثاني الجزء الرابع والعشرون
رواية عزبة فكه الجزء الثاني الحلقة الرابعة والعشرون
بعد مايوسف خرج من عند فكه قعدت وغمرت وشها وسط رجليها فى حالة بكا هستيريه
خرجت شيماء شافتها كده واتلفتت حواليها ملقتش يوسف راحت قعدت جمب فكه وحطت ايدها على كتفها وهى مش عارفه تواسيها بأيه ولا لاقيه كلام تقولهولها
شيماء :بصى يافيفى انا حاسه بيكى وعارفه ان قلبك قايد نار ومفيش ولا اى كلام فى الدنيا هيخفف اللى انتى حساه دلوقتى .
وشيماء بصت بعيد وهى بتفكر :انا مش مصدقه اللى بيعمله يوسف ده منين من كام يوم كان هيموت عشان بس يعرف هى مدفونه فين ودلوقتى هى قدامه وسايبها وراح لوحده تانيه؟ انا مش داخله دماغى دى!
حب يوسف لفكريه ولا مليون واحده تنسيهولو وبصوت عالى وهى بتهز دماغها تؤ تؤ تؤ تؤ،، بت يافيفى فيه حاجه غلط
فكه :هو ايه اللي غلط ياشيماء بالظبط؟
شيماء :يوسف مش ممكن يحب وحده تانيه غيرك ابدا
فكه بضيق :يختى اتنيلى بلا مش ممكن طب انتى تعرفى طلب منى ايه دلوقتى
شيماء :اييه؟
فكه :انى اروح بنفسى اجهزله اكله وشقته يوم فرحه واقف معاه هو وعروسته عشان ملهمش حد تخيلى؟
شيماء برقت :ايه ده قالك كده بجد؟
فكه :تصورى!
شيماء :على فكره انا شاكه فحاجه
فكه :شاكه فأيه؟
شيماء :ان يوسف لما شافك حيه قدامه حصلتله صدمه واتجنن ومبقاش عارف بيعمل ايه ولا بيقول ايه؟
فكه : بس ياشيماء بطلى هبل يعنى اللى كان قدامك دا من شويه وبيتكلم بذمتك مش عاقل؟
شيماء بتفكير :بصى انا بصراحه مبقتش فاهمه اى حاجه فأى حاجه خاااالص
طب انتى هتروحى تعملى زى ماقالك
فكه بصت لبعيد :
هاروح ياشيماء وانتى كمان هتيجى معايه وهنعمل معاه احلى واجب ونرقصله كمان .. دى فرحة يوسف ياشيماء
شيماء :اما اقوم اعشى خالد واتخمد بدل مامخى يوقف من كتر التفكير ومشيت وهى بتكلم نفسها :
بس برضه فيه حاجه غلط
تانى يوم الكانو راح العزبه عند فكه وشيماء
لقى الاتنين قاعدين مهمومين قرب من فكه وقعد جمبها لكن متكلمش ولا هى اتكلمت قعدو شويه ساكتين وبعدين فكه اتنهدت
فرحه بكره ياكانو
الكانو :اه عارف مهو عزمنى
فكه :طب ابقا عدى عليا بدرى شويه عشان تودينا شقته نجهزهاله ونجهزله اكل انا وشيماء
الكانو بأستغراب :انتى يافكه؟
فكه بسرحان :ايوه ياكانو دا طلبه عشان اثبتله انى يهمنى سعادته اكتر من اى حد فى الدنيا واكتر من نفسى كمان .
الكانو :تعرفى ان انا حاسس بنفس احساسك دلوقتى وانتى بتساعدى يوسف يتجوز غيرك
فكه بصتله بعدم فهم لكن سكتت متكلمتش
الكانو فسره :عارف ان الوجع فى قلبك كبير اوى يافكه،،
وصدقينى انا لو اقدر اخده منك كنت اخدته،، واتنهد،،
بس انتى وجعك كلها ساعات وينتهى لكن انا وجعى ده هيفضل باقى عمرى،، واتنهد وقام مشى عشان مش مستحمل يشوف فكه فى الحاله دى
وهو ماشى بص لشيماء اللى لقاها هى كمان فى دنيا تانيه ومش سامعه حتى ابنها اللى بيكلمها
وخرج وفضل يلف فى العزبه وجاله اتصال من يوسف..
الكانو :ايوه يايوسف
يوسف :ايه الاخبار عندك؟
الكانو :بص يايوسف ممكن ميفضلوش عايشين لبكره فكه هتموت مقهوره الاول وبعد منها على طول شيماء
يوسف :هههههه لا هيعيشو متخفش المهم
طبعا هتيجى بكره
الكانو :اكيد لازم اتفرج
يوسف سكت شويه :متشكر اوى ياكانو
الكانو :بتشكرنى ليه؟
يوسف :عشان كل حاجه عملتها عشانى
الكانو :بس انا معملتش اى حاجه عشانك انا لو عملت حاجه عملتها عشان فكه
يوسف :برضه متشكر حتى لو عشان فكه عشان اللى بيسعد فكه هيسعدنى انا فمتشكر ياكانو فعلا
الكانو:العفو ياسيدى ربنا يسعدكم
يوسف :ويسعدك انت كمان وتلاقى اللى تنسيك فكه وتاخد مكانها
الكانو سكت بس كان نفسه يقوله مفيش وحده هتقدر تعمل كده
ويوسف كأنه كان عارف هو عاوز يقول ايه :
هتلاقيها ياكانو،، هتلاقيها بس انتا افتح قلبك عشان حب تانى يقدر يدخله
الكانو فسره كنت فتحت قلبك انت بعدها
يوسف :سلام ياكانو اشوفك بكره
الكانو :سلام يايوسف
يوسف بعد ماقفل مع الكانو اتنهد :ربنا يصبر قلبك ياكانو انت وشيماء كمان
تانى يوم الصبح بعد ليل طويل اوى عدى على الكل ومحدش نام فيهم ابدا الكل قام وهو عارف ان اصعب يوم فى حياته كلها النهارده
شيماء وفكه قاعدين مستنيين الكانو عشان يوصلهم شقة يوسف عشان يوضبوها
يوسف نزل اشترى كل حاجه ممكن يعوزها بيته الجديد،، واشترى ادوات وحجات للمطبخ والنيش كأنهم حاجة العروسه اللى هتوضبها فكريه ورن على الكانو عشان يجيبها ويروحله،، وراح كمان اتفق مع المأذون يجيله المغرب
الكانو راح اخد شيماءوخالد وفكه اللى كانت عامله زى المحكوم عليه بالاعدام ورايح ينفذ الحكم،، ووصلو الشقه ورنو الجرس ويوسف فتحلهم واتفاجئو بجمال الشقه والعفش اللى كان بالالوان اللى بتحبها فكه
يوسف اتفضلو ادخلو وبص لفكه اللى مش بتبص ليوسف وعنيها بتهرب منه
انتو اكيد طبعا عارفين هتعملو ايه اتفضلو مش هوصيكم طبعا،، انا فرحان اوى انكم جيتو انا كده فرحتى اكتملت
خالد جرى على باباه :الله يابابا البيت ده حلو اوى
يوسف :عجبك ياحبيبى؟
خالد :اوووى
يوسف :هتعيش فيه احلى ايام عمرك اوعدك
فكه حابسه دموعها وهو شايفها وخرج بسرعه وهو شايل خالد :انا هاخد خالد وننزل شويه عشان تبقو براحتكم وشاور للكانو
الكانو :احمم طب اسيبكم انا وارجعلكم كمان شويه تكونو خلصتو
الكانو ويوسف نزلو ويوسف قعد على القهوه والكانو استأذن منه يعمل كام مشوار وراه كده ويرجعله تانى
يوسف :كانو انتا هتكون شاهد على جوازى اوعا متجيش
الكانو :جاى متخفش
يوسف اتصل على ناصر هاه هتكمل جميلك النهارده معايا ولا ايه؟
ناصر :رقابتى ياسطا اعمل هند تانى ولا ايه ههههههه
يوسف :لا المرادى حاجه تانيه هتلبس عروسه
ناصر برق :نعمممم
يوسف :متخفش هتغطى وشك ومحدش هيشوفك خالص
ناصر :ازاى ياسطى يوسف لا انا مش هاعمل كده مستحيل طبعا
يوسف :ناصر
ناصر :متحاولش
يوسف :ناصر
ناصر :ابدا
يوسف :نصورتى
ناصر :ياسطى مهو بس
يوسف :حبيبك انا يانصوره
ناصر :طب مشوفلك وحده تعمل عروسه!
يوسف :وحده مين ياعم هيقطعوها وبعدين انا عاوز اول مأتشيل الطرحه يشوفو شنبك اللى زى شنب الصقر ده
ناصر :انتا خليت فيها صقر بعد اللى هتخلينى اعمله ده،، دنا فضيحتى هتبقى بجلاجل
يوسف :متخفش محدش هيكون قاعد غيرنا
ناصر :طب الفستان عاوزه مكسم كده على جسمى ويدارى الديفوهات هههههه
يوسف :احلى فستان تنزل تختاره بنفسك اشوفك بالليل و متتقلش مكياج احسن لو احلويت فعينى هتجوزك بجد
ناصر وهو بيقلد هند رستم :دانتا مش هتقاوم جمالى سلام ياسونه ياخاين
يوسف :سلام يامايصه ههههههه
فى الشقه شيماء وفكه بيجهزو الاكل ويرتبو الشقه ودخلت فكه على اوضه النوم عشان تفرشها واتفاجأت ان يوسف جايب شموع شكلها حلو اوى وورد،، وكمان فيه روب حرير سيمونى مثير وبيجامه حرير
فرشت السرير وحطتهم عليه ورشت عليه الورد وهى دموعها نازله زى الشلال وخرجت بعد ماخلصت وراحت عند شيماء فى المطبخ وهى حاسه ان الدنيا بتلف بيها وعنيها مزغللين
يوسف فتح باب الشقه ودخل فى الوقت ده سمع صرخه شيماء وهى بتلحق فكه قبل ماتقع على الارض مغمى عليها يوسف اتخض عليها وجرى شالها ودخلها نيمها على السرير وبص لشيماء :مالها
شيماء بصتله بنظره هو فهما يعنى مش عارف هى مالها
شيماء :ابدا اصلها ماكلتش حاجه من امبارح الصبح
يوسف بخضه :طب وانتى ازاى تسيبيها من غير اكل كل ده؟..
وجرى على التلاجه جاب علبه عصير وجاب قزازه برفان من فوق التسريحه عشان يفوقها
خالد :هى ماما فكريه ماتت تانى ولا ايه ياماما؟
شيماء حضنته :لا ياحبيبى هى بس تعبانه شويه وهتقوم دلوقتى وتبقا زى الفل
يوسف راح قعد جمب فكه وفوقها بالبرفان
فكه بضعف بصت حواليها :ايه ده ايه اللى حصل؟
يوسف بصلها بحب :الى حصل انك وقعتى من قلة الاكل ومدلها العصير
فكه دورت وشها الناحيه التانيه :مليش نفس
يوسف بأصرار :عشان خاطرى
فكه بصتله :خايف عليا؟
يوسف : اه طبعا خايف عليكى انتى عايزه تجرالك حاجه وتبوظيلى الفرح؟
فكه خطفت منه علبة العصير :خايف على الفرح!! متخافش مش هبوظهولك ومسكت العصير وشربته مره وحده ورمت العلبه على الارض
متخفش فرحك مش هيبوظ هقوم اكملك الاكل
يوسف قام ووقف قدام التسريحه بيسرح شعره :ابقى عدلى السرير اللى نعكشتيه ده طيب..
فكه بغيظ :حاضر
وشيماء واقفه وبصالهم ومش مستوعبه تصرفات يوسف ابدا منين هيموت من الخضه عليها لما وقعت ومنين هيتجوز غيرها؟
فكه خرجت وشيماء واقفه مكانها متنحه
يوسف :ايه متروحى تعمليلك حاجه انتى كمان واقفه ليه العروسه زمانها على وصول
شيماء :هاه منا رايحه اهو وخرجت،،
يوسف بيغنى بصوت عالى مسموع
النهارده فرحى ياجدعان عايز كله يبقا تمام
وفضل يعيد ويزيد فى الجمله وفكه وشيماء بصو لبعض وكل وحده اتعصبت على الحاجه اللى فأديها وهو سامع الخبط وبيضحك مع نفسه
خلصو كل حاجه ويوسف اتصل بناصر اللى قاله انه جاهز،، ورن على الكانو فهمه كل حاجه،، وطلب منه يجيب ناصر ويجيله على الشقه
الكانو راح بعربيه جاب ناصر اللى مغطى وشه خالص بالطرحه ولابس فستان فرح جميل اوى والكانو اول ماشافه ضحك اوى
ناصر شال الطرحه وبصله بنص عين :بقولك ايه انتا هتفضحنا ياجدع انتا ولا ايه؟ يوسف قالى انك راسى عالفوله
الكانو :ايوه عارف بس مش قادر بصراحه شكلك حلو اوى بالفستان
ناصر غطى وشه وهو بيقلد صوت ست،، اوه ميرسى
الكانو :ههههههههه
وصلو البيت والكانو مسك العروسه من ايدها وطلعها الشقه اللى فى الدور التانى ويوسف فتحلهم وفكه وشيماء جم جرى من المطبخ يشوفو العروسه
ويوسف مسك ايدها وباسها :اهلا بالنجفه اللى هتنور حياتى كلها
ناصر عمل نفسه مكسوف وبص الناحيه التانيه بخجل
يوسف :والله انا بموت فى خجلك ده ودخلها قعدها على الكنبه وفكه وشيماء بيبصولها وعنيهم بتطق شرار
شيماء :ايه العروسه الفرعه اوى دى وليه مغطيه وشها كده؟
فكه :انا عارفه يختى؟
الكانو كاتم ضحكته بالعافيه
يوسف مال على ناصر :ايه الحلاوه دى وبص لصدره انتا عملت دول ازاى بالون ولا كاوتش ولمسهم يشوفهم
ناصر بدلع :اه ياقليل الادب اههههههاى
شيماء وفكه اتخضو وبصو لبعض :ايه ده؟
فكه :اكتر حاجه بتعجبه فيها خجلها!! دى باين عليها خبره يامه
الكانو هيقع من طوله من كتر الضحك ويوسف بيتهز كله وكاتم ضحكته
جرس الباب ضرب وفتح الكانو وكان المأذون
يوسف قام جرى عليه :اهلا اهلا سيدنا الشيخ اتفضل
المأذون :مبارك لكما اين العروس،، اااه ها هى وأين الشهوود؟
الكانو :انا يامولانا واداله البطاقه
المأذون :نحتاج لشاهد آخر ولبطاقه العروووس او وكيلهااا
يوسف :حالا نجيب شاهد تانى يامولانا
يوسف نزل تحت وشيماء وفكه راحو ناحية العروسه وقعدو جمبها وبيحاولو يشوفو وشها وهى تبص الناحيه التانيه
شيماء رمت التليفون تحت رجليها ونزلت عملت نفسها بتجيبه وبصتلها من تحت الطرحه لكن ناصر حط ايده على الطرحه تحت دقنه ومخلهاش تشوفه
شيماء رجعت بغيظ وبتكلم نفسها :لا منا هشوفك يعنى هشوفك النهارده
يوسف طلع،، قلت لواحد وراح يجيب بطاقته وجاى ورايه يامولانا
المأذون :بطاقتك ياعروس لناخذ البيانات
العروسه :معيييش
يوسف :ليه ياحبى فين بطاقتك؟
العروسه :اصلى مبخافش ومقطعه البطاقه أه هههههه
المأذون :العب
فكه وشيماء بصو لبعض
يوسف :متهزريش ياقلبى طلعى البطاقه
العروسه :مفيش داعى انا اسمى ياسيدى نوره الاموره اكتب ياعم الشيخ
المأذون :لا يجوز يجب ان نأخذ بيانات البطاقه
العروسه بغضب:انا محدش يقولى فين بطاقتك انتو فاهمين؟ وعلفكره انا كل الناس تعرفنى واسألو عنى ومستعده اجبلكم اى ظابت من اى قسم يقلكم انا مين
شيماء وفكه متنحين
فكه :احيه دى سوابق
شيماء :وبتقولك مشهوره ونوره الاموره
والاتنين بصو ليوسف
يوسف :ايه مالكم على فكره انا عارف كل قاذوراتها،، ومش مهم ماضيها الوسخ المهم انى بحبها وهى بتحبنى
المأذون :بارك الله فيك وجعلك سببا فى سترها وتوبتها عن المعاصى
العروسه :لاااا توبة مين انا مش هتوب دلوقتى احنا متفقناش على كده يايويو
يوسف :قرب منها :وانا مقدرش احرمك من حاجه بتحبيها ياروحى ابدا
العروسه :بجد يايوسفى؟
يوسف :بجد ياروح يوسفى
فكه وقفت وصرخت :لااااااا أ كده كتير كتير اوى،، اوى اوى،، ركبت امتا الاريال يايوسف ؟
العروسه :وانتى مالك انتى ياوليه ياغياره
فكه بصتلها بغيظ :بت انتى انا مش مطمنالك من ساعت مادخلتى من الباب وبعدين انتى مغطيه وشك ليه هاه ليه وهجمت عليها متورينى جمال طلتك كده
ناصر بيتفادى فكه بكل الطرق ويجرى منها فكل مكان وهى وراه زى التور الهايج
الكانو ويوسف هيموتو من الضحك
المأذون :ياساتر ياساتر ياجماعه الامور مش بتتحل كده ….
ناصر وقف مره وحده بعد ماتعب من الجرى ورفع ايديه :
بااااس خلاص وقلع الطرحه وهو بيقلد صوت هند :انا مش هتجوزك يايويو
فكه وقفت واتصدمت وشيماء كمان
خالد :هههههههه عمو العروسه فيه شنب
المأذون :اعوذ بالله من غضب الله اعوذ بالله من غضب الله،، أكنت تريد ان تتزوج رجل؟
يوسف :بص لفكه وقرب ناحيتها : لأ انا هتجوز دى يامولانا
فكه بصتله
يوسف :بجد انتى صدقتى انى ممكن احب غيرك ولا اتجوز عليكى ؟
فكه اخدت نفس عميق وغمضت عنيها ودفنت وشها بين اديها
كنت هموت يايوسف
يوسف :دوقى شويه من اللى ليا اكتر من سنتين عايش فيه لوحدى
المأذون :حلت مشكله العروس ولكن مشكلة الشاهد الثانى مازالت قائمه ؟
ناصر :انا الشاهد التانى يامولانا اتفضل البطاقه اهى
اتكتب الكتاب والكانو وناصر شهدو على العقد وشيماء زغرتت ودموعها نازله غصب عنها
الكانو قرب منها :متجمدى شويه وتمسحى دموعك دى!
شيماء :غصب عنى دى دموع الفرح وبصتله وانتا كمان عنيك بتدمع اهى
الكانو مسح عنيه وانكر :لا طبعا عنين مين اللى بتدمع يبت انتى؟
شيماء :طب وربنا انتا دمعت
الكانو :لا مدمعتش
شيماء :لا دمعت
الكانو :طب خلاص عديها ……حاسه بأيه؟
شيماء :تصدق لو قلتلك مش عارفه مبسوطه على مرتاحه على خايفه احاسيس متلخبطه كلها
الكانو بيتنهد :كأنك بتوصفى اللى حاسس بيه بالظبط .
بصو الاتنين على فكه ويوسف اللى سرحانين فى عيون بعض وكأنهم بيحكو كل كلام الدنيا بعنيهم ومش حاسين باى حد حواليهم .
والكانو بص لشيماء وناصر وشاورلهم عشان ينسحبو،، وفعلا الكل خرج وقفلو باب الشقه وراهم وكل ده ولا يوسف ولا فكه انتبهولهم
الكانو بعد مانزلو بص لشيماء :هتروحى فين دلوقتى عشان اوصلك؟
شيماء :هبات النهارده فى العزبه فبيت فكه وبكره هسافر
الكانو :تمام تعالى اوصلك
شيماء :ملوش داعى انا هروح لوحدى
ناصر :يعنى لو مش هدايق حضرتك ممكن انا اوصلك انا موراييش حاجه
الكانو وافق ان ناصر يوصلها عشان كان مدايق ونفسه يتمشى شويه لوحده
ناصر اخد شيماء وخالد وراح يوصلهم بعد ماقلع الفستان طبعا ومسح الميكب
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية عزبة فكه)
