رواية موعد مع القدر (تحدي الإعاقة) الفصل الرابع والعشرون 24 بقلم لبنى دراز
رواية موعد مع القدر (تحدي الإعاقة) البارت الرابع والعشرون
رواية موعد مع القدر (تحدي الإعاقة) الجزء الرابع والعشرون
رواية موعد مع القدر (تحدي الإعاقة) الحلقة الرابعة والعشرون
لتنجح في تحقيق أي حلم أو أمنية في الحياة عليك أن تؤمن بنفسك وبقدرتك على تحقيق كل ما ماتريد وأن تؤمن كذلك بمقدرتك الكبيرة التي ستنجح من خلالها في القضاء على كافة العراقيل التي قد تصادفك، إضافة إلى إيمانك بأحلامك وبأهميتها وفوائدها التي تعود عليك وعلى المجتمع الذي تعيش فيه.
تحدى الإعاقة بقلمى✍️_________________لبنى دراز
فـ بيت أيمن الهواري
روح من النادى باله مشغول بعد ما قابل هيثم ومش عارف يفكر ياترى يصدقه ولا لأ وشارد
فادية:: احضرلك الغدا يا حبيبى؟
أيمن:: سرحان ومش سامع أمه
فادية:: أيمن ..يا أيييمن ..وخبطته ع كتفه ..انت يا واد انت رحت فين كدا
أيمن:: انتبه بخضة..ايه فى ايه مالك يا أمى
فادية::اسم الله عليك يا ضنايا ..مالك يا حبيبى سرحان فـ ايه..بكلمك من ساعة ما دخلت وانت مش معايا خالص
أيمن:: لا. ياحبيبتى مش سرحان ولا حاجة ..بس ماسمعتكيش ..كنتى بتقولى ايه بقى
فادية:: بمكر.. واضح بقى ان الست منة واحدة تفكيرك ومسيطررة لدرجة ما سمعتنيش ههههههه
أيمن:: دى مين دى بس اللى تاخدنى منك ياجميل انت ..ده انتى اول حب فـ حياتى يا فوفة قلبى و باس راسها و ايدها..بقوخااالص
يا ست الكل أبنك حبيبك واقع من الجوع ألحقييينى بسرعة..
فادية :: من عينى يا ضنايا حاضر ادخل غير هدومك وانا هحضرلك الغدا..
أيمن::تسلم ايدك وعينيكى ياحبيبتى ربنا مايحرمنيش منك ابدا يارب..
سابها ودخل اوضته وبرضوا باله مشغول ومش عارف يعمل ايه.. قعد ع سريره و مسك فونه اتصل ع أيهم
أيمن:: الو..السلام عليكم
أيهم:: وعليكم السلام ورحمة الله ..وانا اقول موبايلى منور ليه اتارى أيمون باشا عليه
أيمن:: ولا بطل بكش وقولى بتعمل ايه دلوقتي
أيهم:: بدلع..ايييه ..انا بكاش وقدرت تقولها يا قاسى يا محطم قلوب العذارى ههههههههههههه
أيمن:: بنرفزة ..ولااااا ..اخلص بتعمل ايه دلوقتي ..
أيهم :: بجدية..ايه يا أبنى مالك فى أيه متعصب ومتظرظر ليه كدا
أيمن:: يا أيهم أخلص و أنجز لو فاضى هات الزفت التانى شوفه فين وتعالولى بسرعة
أيهم:: خضتنى يا ابنى فى ايه ..فوفة جرالها حاجة ..طمنى..
أيمن:: لا يا أيهم ..أمى كويسة الحمدلله ..بس أخلص هى كلمة و رد غطاها فاضى تيجى ولا لأ
أيهم:: يا ابنى حتى لو مش فاضى ..هسيب اللى فـ إيدى واجيلك جري.. وحاضر هشوف ساجد فين و نيجي لك ..بس طمنى انت كويس فيك ايه
أيمن:: يووووه بقى لما تيجى يا أيهم هتعرف كل حاجة يلا مستنيكم سلام
وقفل السكة ودماغه هتنفجر من كتر التفكير ..معقول فى حد ممكن يسلم اخته كدا بالطريقة دى ..
بقلمى✍️________________لبنى دراز
فـ بيت الألفى
عادل واخد هدير فـ حضنه ومش عايز يسيبها وبيعاكس فـ سلوى اللى متغاظة منهم الاتنين كالعادة طبعا
سلوى:: بغيظ ..وانت ان شاء الله هتفضل حابسها فـ حضنك كدا كتير ولا ايه
عادل:: الله ..بنتى حبيبتى ..انتى زعلانة ليه بقى يا سولى
هدير:: بهمس.. سولى غيرانة عليك يا دولا ههههههههههههه
عادل:: بذات نفس الهمس..بس ياشقية ..اسكتى علشان شكلها هتعلقنا ..و هنام ع الكنبة الليلة ههههههههههههه
هدير:: اممممم كل ده عشان حتة حضن صغنون قد كدهو
سلوى:: مش هنخلص بقى من الحوارات الجانبية دى ..بت انتى قومى كدا من حضن جوزى يلا و روحى شوفى جوزك فين اجرى كلميه يلا
هدير:: حاضر يا مامتى ولسة هتقوم
عادل:: شدها تانى لـ حضنه ..اوعى فـ يوم تسيبى حضنى علشان حضن حد تانى فاهمة ..ده الحضن الوحيد اللى هتلاقى فيه اللى مش هتلاقيه فـ اى حضن تانى
هدير:: وانا عمرى ما اسيب حضنك أبدا حتى لو روحت لحضن تانى ..انت سندى يا بابا و عزى و فخرى ومهما بعدت أكيد هرجع لحضنك ..أيهم عمره ما هياخدنى منك مهما كنت بحبه ..انت حبى الاول يا دولا
سلوى متابعة بغيظ وساكتة… هى مش غيرانة لانها بنتها و عارفة قد ايه قوة العلاقة بينهم بس عايزة عادل يتقبل ان هدير خلاص بقى فى راجل تانى فـ حياتها غيره ..
سلوى:: بغيظ… وبعدين بقى فـ جو العشق الممنوع ده ..قومى يا بت يلا كدا انا اولى بحضن جوزى ..وبتشدها من حضنه
عادل:: شد سلوى و خدها فـ حضنه هى كمان.. انتوا الاتنين مالكمش غير حضنى ..ولغااية ما الشقية دى تروح بيت الواد الجبلة ده مش هتفارق حضن ابوها ابدا ..صح يا ديدى
هدير:: طبعا طبعا يا بابتى ولا كلام بعد كلام دولااا حبيبيييي
عادل::بمكر.. اممممم طب ايه رايك يا ديدى أخليه متعلق كدا لا طايل سما و لا ارض لغاية ما تتخرجى ..
هدير:: بزعل طفولى.. ايه.. يستنى 7سنين يا بابتى وعملت حركتها المعتادة بوز البطة
سلوى:: بضحك..يا ديدى يا حبيبتى أبوكى خلاص مخه لسع و الود وده يسيب خطيبك متعلق كدا طول عمره ههههههههههههه
هدير:: بمرح.. ايه تا مامتشى بتقول لسع اشطاااات بقى يا مزة ههههههههههههه
عادل:: لـ سلوى..امممممم بقى انا مخى لسع ماااشى يا سولى لينا اوضة تلمنا يا قلبى و ساعتها هوريكى اللسعان ع حق ربنا ههههههههههههه
سلوى:: بضحك ..الله يجازيكم خليتونى اتكلم زيكم ههههههههههههه
هدير:: بتتقمص شخصية سلوى ..وبتعدل النضارة ..بنت ارتقى بأسلوبك شوية ده مش اسلوب دكتورة ..وطلعت تجرى🏃♀️🏃♀️🏃♀️
بقلمى✍️_______________لبنى دراز
بيت أيمن الهوارى
بعد ما اتصل بـ أيهم طلع اتغدى
و قعد مع مامته يتفرج ع التليفزيون بس دماغه مشغولة وحرفيا هتنفجر من كتر التفكير وشوية وجرس الباب رن وقام فتح
ساجد:: بهزار ..ما انت زى القرد أهو ..فى ايه بقى ؟؟ و ايه حكاية تعالوا بسرعة دى
أيهم:: ايه يا ابنى خير خليتنا سيبنا اللى ورانا واللى قدامنا وجينا جري
أيمن:: طب أدخل انت وهو الاول وبعدين ابقوا افتحولى تحقيق
دخلوا وسلموا ع فادية وكالعادة باسوا ايدها و راسها ..
ساجد:: فوفة قلبى فين الاكل والحلويات و اللى ما لذ وطاب
أيمن:: لـ ساجد بطل طفاسة و غور قدامى انت وهو هنقعد فـ اوضتى عايزكم فـ حاجة مهمة
فادية::خلاص يا حبايبى ادخلوا و انا هعملكم كل اللى فـ نفسكم و أجيبهلكم ..
وسابتهم يدخلوا اوضة أيمن وهى راحت المطبخ
فـ اوضة أيمن
أيهم:: لـ أيمن ..ها فى ايه بقى مالك
أيمن:: هيثم الشرنوبى
ساجد:: اشمعنى
أيمن:: يا مصبر العقل يارب..يا ابنى خلينى اكمل
أيهم::لـ ساجد.. بس يا زفت انت..و لـ أيمن وانت يا طين كمل ماله سي بتاع ده ابن الشرنوبى
أيمن:: كان جاى يكلمنى بخصوص الحادثة و بيقول عنده الدليل اللى يثبت ع ماهى انها المحرّضة الاولى..وابتدى يحكى كل حاجة من وقت ما هيثم طلب يـقابله لغاية ما قال انه مستنى مساعدته ..بس يا عم منك له ومن وقتها ودماغى اتشلت و مش عارف أفكر
ساجد:: بصدمة.. يانهاااار اسوووس….هو فى كدا بيسلم أخته بكل بساطة كدا
أيمن:: هو ده بالظبط اللى هيجننى و مخلي دماغى واقفة انه بيسلم اخته تسليم أهالى
أيهم:: وانت ناوى ع أيه ..هتساعده وتثبت تدبير الحادثة ع ماهى ولا هترفض
أيمن:: يا أيهم. انا من بدرى بدور ع اى دليل علشان اجيب حق منة وهى كانت مجرد حبيبة دلوقتي هى مراتى يعنى واجب عليا اجيب لها حقها وقبل ما تدخل بيتى لازم اللى كانوا السبب فـ قعدتها دى يتعدموا مش يتحبسوا بس
ساجد:: طيب هتبتدى ازاى او منين..
أيمن:: بحيرة ..مش عارف ..علشان كدا بعتلكم نفكر سوا..
أيهم:: بتفكير ..رامز ..نروح له ونتكلم معاه وهو هيقول لنا نعمل ايه
ساجد:: بتذكر..مش ده قريبك وكيل النيابة
أيهم:: أه هو واد جدع ومش بيتأخر ع حد ..قوم البس يا أيمن وتعال نروح له يلا
أيمن:: طيب كلمه يا ابنى الاول خد منه ميعاد ..مش هنطب عليه كدا مرة واحدة
أيهم:: طب ثوانى ..وطلع فونه واتصل ع رامز
أيهم:: الووو رامز باشا اللى واحشنى من زمان
رامز:: أيهم بيه العريس اللى اخيرا دخل القفص ههههههه
أيهم:: اسكت يا عم ده أبوها مطلع عينى ومش عارف انا هصبر الـ3 سنين دول ازاى
رامز:: احبسهولك ياباشا وخدها واجرى ههههههههههههه
أيهم::ههههههههههههه لا ياعم وع ايه الطيب احسن ..المهم انت فـ البيت دلوقتي ولا فين
رامز :: فـ النيابة المسائية كان عندى تحقيق و يادوب مخلصه
أيهم :: طيب انا عايزك ممكن تستنانى ولا نتقابل برة
رامز:: نتقابل فـ كافيه(….) عارفه؟
أيهم:: اه طبعا يا باشا عارفه ..خلاص نصاية و اكون عندك يلا سلام وقفل الفون ..وبص لـ أيمن يلا يا كابتن بينا
وبالفعل قاموا التلاتة وراحوا يقابلوا رامز فـ الكافيه
و شوية و وصلوا وكان رامز مستنيهم
أيهم:: السلام عليكم ورحمة الله
رامز:: وعليكم السلام ورحمة الله يا اهلا وسهلا اتفضلوا يا شباب
أيهم:: من غير مقدمات كدا .. أيمن واقع فـ مشكلة حلها عندك
رامز:: ههههههه وش كدا طيب استريحوا الاول واشربوا حاجة
أيمن:: استاذ رامز مش وقت راحة ولا شرب ..انا بجد تعبان ومش عارف أفكر
رامز:: يا ستااار ..للدرجة دى ..طيب احكيلى فى ايه
أيمن:: شوف يا استاذ رامز..
رامز:: مبدئيا كدا ..بلاش القاب وخليها رامز بس احنا شباب زى بعض. .. خلينا فـ المهم احكى وانا سمعك
أيمن:: حكى كل حاجة من اول الحادثة لغاية مقابلة هيثم
رامز:: بعصبية ..وانت ازاى ساكت كل ده ماقولتش ليه من وقتها ..انا فاكر الحادثة وانها اتقيدت قضاء وقدر
أيمن:: وقتها ماكنتش اعرف حاجة حتى لو كنت شاكك.. بس أيهم و ساجد بصراحة هما اللى دوروا واثبتوا فعلا انها مقصودة ودلوقتى كل حاجة قدامك
رامز :: علشان افتح التحقيق رسمى لازم دليل مادى وده مش هيحصل غير بطريقة واحدة
أيهم:: الحقنا بيها ابوس ايدك
رامز:: بص يا سيدى انتوا هتعملوا ……. تمام كدا؟
ساجد:: ده كدا اشطااات قوى
أيمن:: تمام انا مش عارف أشكرك ازاى يا رامز .
رامز:: ياعم مافيش بين الاصحاب شكر ولا انت مش بتعتبرنى صاحبك زيهم
أيمن:: حبيبى والله يا رامز ..دلوقتى نشرب براحتنا ههههههه وقعدوا شوية
وبعد كدا خرجوا من الكافيه وهو مرتاح نوعا ما
أيهم:: ها يا أيمو ناوى تروح ولا ع فين
أيمن :: عايز اشوف منة بفكر اروح لها شويه
أيهم :: خلاص خدنى فـ طريقك أروح لـ شعنونتى ههههههه وانت ياض يا ساجد
ساجد:: يعنى هى جات عليا هروح للحتة بتاعتى انا كمان
أيمن:: ماتحترم نفسك منك ليه واتكلموا كويس هو انتوا شقاطينهم ؟؟
أيهم:: سيبنالك انت الاحترام والعقل يا خويا .. يلا بينا نرمى الواد ده فـ سكتنا كدا و نطلع احنا بعد كدا للى مطيرين العقل والقلب ومجننين اهالينا ههههههههههههه
ومشيوا وكل واحد فيهم رايح لحبيبته يشوفها
_____________
بيت المنياوى
قاعدة منة مع اخواتها التوأم المشاكس بيضحكوا ويهزرو وفجأة
مصطفى:: بفضول.. منة انتى بتحبى أيمن؟
محمد:: ايه يا عم صاصا السؤال ده..ماتسألش فـ اللى مالكش فيه
مصطفى:: مسألش ليه يعنى يا سي ميدو ..مش بقى جوزها خلاص..وبعدين بصراحة بقى كان باين عليه اوى يوم حفلة التكريم انه وااااقع ع الاخر ههههههههههههه
منة:: لـ صاصا..انا مش عارفة انت هتفهمنى ولا لأ .. بس كلمة بحبه دى قليلة اوى انا تخطيت ما بعد الحب بمراحل…بس خايفة اوى..خايفة يكون حبه ليا مش حقيقى..خايفة يكون مجرد شفقة ..او احساس بالذنب لانه زقنى من العربية صدقنى يا مصطفى مش عارفة..
بس كل اللى عارفاه انى بعشقه ومش هستحمل ان هو بالذات يكون بيحبنى شفقة مش اكتر
بتتكلم وهى شاردة فـ افكارها لدرجة ما سمعتش جرس الباب ولا حست باللى دخل وسمعها
أيمن:: بحب..قعد قصادها ع فكرة زعلان منك اوى ..
منة:: أنتبهت انه موجود.. وقالت زعلان مني انا؟؟ لييه؟؟
أيمن::عشان انا ما حبيتش ولا هحب غيرك ..انا عشت سنين بحلم بس اقولك بحبك يبقى لما تبقي مكتوبة ع اسمى واقدر اقولك كل اللى جوايا ليكى.. ابقى بحبك شفقة ؟؟
منة:: أيمن
أيمن:: قلبه
منة:: محتاجة اطمن اكتر
أيمن:: مسك ايدها..بكرة الايام تثبتلك ان خوفك ده مالوش اساس
منة:: أيمن ..وضعى دلوقتي غير و ممكن يجى وقت و..
أيمن::حط صباعه ع بؤقها.. شششش ماتكمليش عمرى ما أفكر حتى مجرد تفكير ولا حتى فـ خيالى ..أنتى حلم ماصدقت حققته ومن الطبيعى احافظ عليه مش أضيعه .. ومسك إيدها وهو بيتكلم .. يا منة حلم عمرى نكون سوا فـ بيت واحد وأخيرا بقيتى ع اسمى ..لو انتى عديتى ما بعد الحب بمراحل فـ أنا وصلت لمرحلة مش عارف اوصفها عدت ما بعد العشق بكتير ههههههههههههه انا مجنون بيكى.. و بإيدها شاور ع قلبه ..انتى هنا ومش هتطلعى منه ومافيش حاجة هتفرقنا غير موتى فاهمة
منة:: قاطعته.. ممكن ماتقولش كدا تانى.. ماتجيبش سيرة الموت ربنا يباركلى فيك يا حبيبى
أيمن:: ياااااه قد ايه كان نفسي اسمعها منك ..ممكن ماتبطليش تقوليها
منة :: أيمن
أيمن:: عيون أيمن وقلب أيمن و روح أيمن انتى يا منة
منة:: بحبك
أيمن بيجاهد نفسه علشان مش ياخدها فـ حضنه ..هى مراته بس لسة فـ بيت أهلها ولازم يحافظ عليها
___________________
بعد شوية وقت ابتدت الدراسة
والنهاردة اول يوم لـ منة وهدير فـ الكلية ونازلة هدير علشان تعدى تاخد منة اتفاجئت باللى واقف تحت العمارة
أيهم:: صباح الجمال ياقمر ايه يابت الحلاوة دى
هدير:: هيمو حبيبى ..صباح الحلاوة ياسطى ..ايه اللى جابك بدرى كدا
أيهم::قلبى اللى جابنى ياختى… ينفع يعنى اول يوم لـ حبيبة قلبي فـ الكلية النهاردة وتروح لوحدها
هدير:: يااااه ع كدا بقى بتحبها لدرجة سايب شغلك عشانها
أيهم:: يالههههويز يا جودعان.. بحبها بس دى روحى كدا ..عارفة يابت يا ديدى لو فتحتى قلبى كدا هتلاقيها فارشة ومربعة فـ ارض القلب كدا مش سايبة حتة فاضية لـ حد يعدى حتى
هدير :: يابختها ..عن أذنك بقى يا أخويا ..ينفعش اقف معاك اصل جوزى بيغير عليا ههههههه
أيهم:: بأندهاش ..أخوكى ..خدى ابت تعالى هنا.. رايحة فين يا هانم كدا وسيبانى
هدير:: هطلع لـ منة علشان أنزلها ونروح الكلية
أيهم:: تعالى ياحبيبتى ليها جوز طلع يجيبها وتانى مرة ماتسيبينيش وتمشى مش يبقى أبوكى خانقنى وانتى تمشى كدا ببساطة ومن وراه نازل عادل لسعه ع قفاه
عادل:: مالك ومال ابوها ع الصبح ياض انت
أيهم:: حط ايده ع قفاه ..حبيبى ياعمى ..منور يا كبير والله صباح الورد يا ريس
هدير:: ههههههههههههه حبيبى المزنوق يلا بينا
_________________
عند منة طلع أيمن علشان ياخدها يوديها الكلية اول يوم..
رن جرس الباب وفتح محمود
أيمن:: صباح الخير يا عمى
محمود:: صباح الورد يا أيمن اتفضل يا ابنى ادخل
أيمن:: لا معلش سامحنى بس ياترى منة جاهزة
منة :: من ورا محمود صباح الخير يا أيمن ..انا جاهزة ..يلا بينا
محمود:: لـ منة..بمكر..اممممم صباح الخير لـ أيمن بس و بابا راحت عليه مش كدا
منة:: بضحك ..ومين اللى صبحت عليك جوة بحضن وبوسة كبيييرة قد كدهوو
أيمن:: بضحك ..لاااا بقى كدا انا اغير ..
محمود:: لـ أيمن واد انت انا اه بحبك بس تغير عليها مني اخليها عندى ومش هتشوفها تانى فاهم
أيمن:: ههههههههههههه لا و ع ايه الطيب احسن ..احضنها براحتك يا عمى لغاية ما اخدها منك..وبص لـ منة اللى بتضحك عليهم.. بتضحكى انتى ومبسوطة هااا
منة:: مبسوطة جداااا ههههههههههههه شكلكم كدا عامل زى عمو عادل وأيهم ههههههههههههه
محمود وأيمن:: ههههههههههههه ههههههههههههه
محمود:: لااااا دول حاجة تانية خااالص
أيمن:: حرام عليكى بقى انا زى أيهم .. عايزانى اتلسع ع قفايا زيه ولا ايه ههههههههههههه
محمود:: بمكر ..اممممم طيب يلا انزلوا بسرعة قبل ما اعملها ههههههههههههه
وفعلا نزلوا وهما بيضحكوا و اول ما شافوا أيهم وهدير مستنينهم بصوا لبعض وضحكوا جامد مش عارفين يسكتوا..
أيهم:: الله هو فى ايه ..ما تضحكونا معاكم
أيمن:: بلاش احسن ..ههههههههههههه
هدير:: منة انتوا شربتوا ايه فوق بالظبط عايزة افهم
منة:: ما بلاش يا بلوتى احسن ههههههههههههه
أيهم :: ما تقول ياض بتضحكوا ع ايه ولا هو سر حربى يعنى
أيمن :: ههههههههههههه أفتكر انى قولتلك بلااااش
أيهم :: ما تخلص يا جدع انت بقيت ثقيل ليه كدا
منة:: بضحك..ههههههههههههه
سورى يا أيهم بس بصراحة افتكرت عمو عادل واللى بيعمله فيك لما بيشوفك ههههههههههههه
أيهم::تلقائيا حط ايده ع قفاه وبص لـ هدير بغيظ شافها بتضحك عاجبك كدا عمايل أبوكى.. خلت الجوز دول يتريقوا علينا يلا ياختى علشان تلحقوا كليتكم .. ومشيوا وهم بيضحكوا ومبسوطين انهم كل واحد مع حبيبته بحرية وصلوا الجامعة ودخلوا بشغف وحب كبير لتحقيق حلمهم
منة:: طلبت من أيمن يقف وعينها ع مبنى كلية الطب ..عشت عمرى بحلم باليوم ده وأخيرا انا هنا وحققت أول خطوة فـ حلمى وبصت لـ أيمن ..بس عارف كنت نفسى أكون جرّاحة أورام بس مش مهم قدر الله وما شاء فعل ..المهم انى ان شاء الله أكون أكبر دكتورة مخ وأعصاب فـ الشرق الاوسط وأقدر أقدم الدعم والعلاج لكل اللى زيى
أيمن:: بحب .. انتى هتكونى اكبر دكتورة فـ العالم كله مش الشرق الاوسط بس وانا متأكد من ده .
منة:: بأبتسامة.. انت جايب الثقة دى منين
أيمن:: لأ معلش بقى انا واثق ان حبيبتى قدها و قدود.. وبكرة أفكرك
منة :: حبيبى ربنا يخليك ليا ..مش عارفة من غير دعمك ده كنت عملت ايه..
أيمن:: بحب ..حبيبة قلبى انا ..ماتعمليش اى حاجه غير انك تستنى هنا هجيبلك جدول محاضراتك و أجى ع طول ..ماشى
منة:: هزت راسها بالموافقة بأبتسامة جننت قلبه
سابها ومشى وهى بتكلم نفسها يا ترى هدير وأيهم فين مش شيفاهم ليه وفكرت تطلع الموبايل تتصل ع هدير وقع منها ومش عارفة تجيبه وهى لوحدها و بتبص يمين وشمال يمكن تشوفها او تشوف أيهم او أيمن لكن مافيش حد وفجأة شافت بنتين ومعاهم شاب شكلهم معجبهاش بس مضطرة انها تكلمهم
منة:: لو سمحتى يا انسة ممكن طلب؟!
البنت:: باللبانة وبلبس كاشف اكتر ما ساتر و بسخرية..انتى بتكلمينى انا
منة:: بحزن..اسفة بس بلييز موبايلى وقع مني.. ممكن لوسمحتى تجيبهولى من فضلك
البنت التانية:: بتريقة.. اووووه يا حراااام.. ازاى يسيبوكى لوحدك كدا ..مش واخدين بالهم منك ليه
الشاب:: ايه يا جميل..ههههههه فين الشوفيير بتاعك اللى بيسوق لك الكرسى يجيبلك موبايلك اللى وقع منك
منة:: بدموع بتهدد بالنزول ..اسفة ع ازعاجكم بس بليز ممكن تدينى موبايلى لو سمحت
البنت الاولى:: بسخرية.. عايزاه قومى خديه وراحت زقاه بعيد شوية
منة:: بكل الوجع اللى جواها ..بصت لهم ودموعها خير رد ع حالها ..قالت ..انا فعلا اول مرة أحس انى عاجزة بسبب ناس زيكم مش بيراعوا شعور حد
وقبل ما تكمل كلامها شافت حد جه وطى فـ الأرض وجاب لها الموبايل
د/ رؤوف:: بكل احترام..اتفضلى يا ستى موبايلك وبلاش دموع لانك اقوى منهم ..وبص للبنتين والشاب ..انتوا مثال سيئ للمجتمع الغير متحضر واللى مش بيقدر ظروف الغير و بيتنمر حتى ع المرض للاسف انا مش عارف انتوا ازاى داخلين كلية طب ..ازاى هتبقوا دكاترة وتحلفوا اليمين انكم تنقذوا الارواح وتتعاملوا بأنسانية مع المرضى وانتوا اساسا معدومى الانسانية ..وبعدين بص للبنت الاولى ..ده مش منظر طالبة محترمة ولا ده لبس ينفع تدخلى بيه مكان عريق وقلعة علم زى الجامعة ابدا .. ده اخره تروحى بيه كباريه مش كلية الطب
منة:: بدموع ..بصت لـ دكتور رؤوف ولسة هتتكلم قاطعها
أيمن:: بخضة.. حبيبتى مالك بتعيطى ليه ايه اللى حصل
د/رؤوف:: كابتن أيمن ..ماتقلقش ماحصلش حاجة ..
منة:: بدموع.. لـ أيمن موبايلى وقع مني ..وحكت له اللى حصل والدكتور رؤوف رد عليهم ..أرجوك يا أيمن وصلنى المدرج مش لاقية هدير ومش عارفة هى فين
أخدها أيمن وصلها المدرج وفضل معاها يهديها لغاية ما جات هدير اول ما عرفت وقعدت معاها وبعد شوية دخل دكتور رؤوف المحاضرة وقبل ما يبدأ نده ع منة
د/رؤوف:: لـ منة ..لو سمحتى قربى ..ساعدتها هدير تقرب ..و بص للطلبة والطالبات وكمل كلامه. .. منة محمود المنياوى من أوائل الجمهورية في الثانوية العامة ولاعبة باسكت من كام شهر بس كانت زيكم وماتفرقش عنكم في شيئ ولكن قدر الله يحصل لها حادثة نتيجتها طبعا انتوا شايفينها قصاد عينيكم وكنت انا الدكتور المعالج ليها ..عجبنى فيها نظرة الرضا اللى فـ عينيها وتقبلها لـ ظروفها وقالتلى وقتها ..
(انا قررت اتحدى المرض وأنتصر ف المعركة صحيح هو غلبنى فـ اول جولة وقعدت ع كرسى متحرك بس اوعدك هتكون أخر جولة وهتغلّب عليه بأرادتى ويقينى ف الله
لانى ببساطة انا مش عاجزة حتى لو قعدت ع الكرسى المتحرك ..انا اقدر اعمل كل حاجة طالما عقلى وعينى وايدى شغالين وتفكيرى صاحى و زهنى حاضر .. رجلى جزء مني بس مش كُلي )
النهاردة هى معانا في كلية الطب بس للاسف فى اشباه بنأدمين معدومى الضمير و الانسانية و للاسف موجودين فـ نفس المدرج هنا تنمروا عليها وحسسوها فعلا بعجزها لـ أول مرة.. وشاور ع البنتين والشاب اللى تنمروا ع منة وبص ليهم ..انتوا التلاتة هتعتذروا لزميلتكم وهتخرجوا من المحاضرة وممنوعين من حضور اى محاضرة ليا طول السنة والكلام موجه للكل.. اعتقد انت كطالب طب اول حاجة بتتعلمها الضمير المهنى والانسانية ولو تجردت منهم يبقى مالكش مكان هنا او ع الاقل معايا انتهى كلامى.. وبص لـ منة انتى وعدتينى وكنتى قد وعدك وانا كمان بوعدك قصاد كل دفعتك انى مش هبطل بحث لغاية ما اوصل لعلاج حالتك بإذن الله.. وبص تانى لـ البنتين والشاب اتفضلوا برة.. بس بعد ماتعتذروا
وبالفعل اعتذروا لـ منة وخرجوا من المحاضرة ورجعت منة مكانها بمساعدة هدير وابتدت أول يوم دراسة و أول خطوة فـ تحقيق حلمها
___________________
ماهى:: أيمن انا كدا كدا ضايعة بس قبل ما أروح لازم احرق قلبك عليها حتى لو ده اخر يوم فـ عمرى .وبحركة سريعة ع غفلة سحبت السلاح من اللى واقف جنبها وطلعت رصاصة
وفجأة ……
هديييييررررر ……؟؟؟؟؟
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية موعد مع القدر (تحدي الإعاقة))
