رواية صدمتي في يوم زفافي الفصل الثالث 3 بقلم آلاء محمد
رواية صدمتي في يوم زفافي الجزء الثالث
رواية صدمتي في يوم زفافي البارت الثالث
رواية صدمتي في يوم زفافي الحلقة الثالثة
يارا / السبب هو اني عندي علامه مطرح الحادثة اللي حصلتلي زمان يا بابا ..
ايهاب / حادثه ايه يا بنتي .. أنا مش فاهم حاجة ..
يارا / في الوقت ده انت كنت مسافر يا ايهاب وانا مقولتلكش اللي حصل علشان مقلقكش عليا .. انا كنت في المطبخ ..
فلاااش ..
كانت يارا في المطبخ بتحضر الغدا بسرعه عشان مواعيد الدوا بتاعة اهلها .. كانت لسه طفله عندها ١٦ سنه ورغم كده كانت شايله المسؤوليه وبتخلي بالها من ابوها وامها كويس اوي .. نقلت الطاسه و فتحت الغاز عليها وفجاه والدها نادي عليها ..
والدها / يارا تعالي يا بنتي الحقيني ..
يارا سابت كل حاجة و نسيت الغاز مفتوح من خوفها علي ابوها وراحت ليه بسرعه ..
يارا / بابا مالك يا حبيبي ..
والدها بتعب / هاتيلي جهاز التنفس بسرعه ..
يارا جابته وحطته لابوها وفضلت قاعده جنبه و هي خايفه عليه .. فات وقت وبقي احسن وشالت الجهاز ..
يارا/ سلامتك يا قلبي .. إن شاء الله هتبقي كويس قريب .. انا قولت ل ايهاب وهيجبلك الدوا مستورد و هو جاي ..
والدها / وليه بس يا بنتي قلتيله يكلف نفسه .. العلاج ده غالي اوي اوي ..
يارا / مفيش حاجه غاليه عليك يا بابا انت مش عارف غلاوتك عندنا ولا ايه .. والله لو اخر مليم معايا او مع ايهاب مش هيسوي حاجة جنب صوت نفسك بس يا حبيبي .. انا هروح اجهز الاكل بقي عشان الدوا ..
والدها ابتسم و يارا باست ايده و دخلت المطبخ .. مسكت الكبريت و لعته و فجأة النار مسكت في كل حته ..
باك ..
يارا بدموع / ربنا ستر و عرفت أخرج بسرعه بس رقبتي كانت اتأذت جامد ..
ايهاب باستغراب/ انا مش فاهم انتي متقوليش عن حاجه زي كده وبعدين فين الحرق اللي انتي بتقولي عليه ده انا مش شايف في رقبتك غير علامه بسيطه اوي..
يارا / ما هو انا علشان كنت واخده كورس اسعافات اوليه عرفت اسعف نفسي واعمل اللازم بسرعه وطبعا ماما وبابا قلقوا عليا ونزلت لدكتوره التجميل اللي في الشارع اللي ورانا ساعدتني بسرعه ودخلتني عمليات في نفس الليله علشان الحرق ده ميسيبش علامه .. وفضلت شهرين بتعالج وبحط في كريمات ومراهم ومكنتش بنام بالليالي من الوجع لحد ما الحمد لله الاذى خف خالص زي ما انت شايف ومفضلش غير العلامه البسيطه دي .
ايهاب قام بضيق / انا مش فاهم بقى كل ده يحصل و انا معرفش .. ليه يا يارا …
يارا / انا والله محبتش اشغلك وارجعك من غربتك وانا عارفه ان انت كنت بتعمل كل ده عشان توفر تمن الدوا بتاع بابا وماما …
ايهاب / طب والعلامه دي تستاهل انه يعمل ده كله دي لونها قريب اوي من لون جلدك وطولها مش مكمل التلاته سنتي .. انا مختش بالي منها غير اما قولتي .. ازاي يعني يهدم حياته عشان حاجة تافهه زي دي .. أنا مش قادر اصدق …
يارا / هو ده اللي حصل انا دخلت الاوضه ولبست فستان شكله حلو زيي زي اي عروسه وعملت شعري وحطيت ميك اب وخرجت للريسبشن وانا فرحانه اوي هو كان مبسوط ومبتسم بس اول ما قرب مني وشاف رقبتي ملامحه اتبدلت تماما ورجع لورا و حصل اللي حصل ..
ايهاب/ الكلب الحقير .. انا هوريه والله لاعرفه مقامه .. واعرفه ازاي يتقي ربنا في بنات الناس ..
والدة يارا / ايهاب يا ابني اهدي .. خلاص ربنا ينتقم منه ع اللي عمله ده ..
يارا قامت و مسكته / اهدي يا ايهاب انا خلاص مش فارق معايا حاجة انا كل اللي عيزاه أطلق واخد كل حقوقي .. انا مش عايزة اعيش معاه تاني .
ايهاب بص لاخته بزعل و حضنها .. مكنش مصدق ان اخته حصلها كل ده وهي ساكته عشان متتفضحش ..
والدها/ انا اسف يا بنتي كان لازم اسأل عليه كويس و اتحقق منه قبل ما اجوزك ليه .. سامحيني ..
يارا قعدت جنب والدها / متقولش كده يا بابا انت بجد عملت اللي عليك .. هو اللي خدعني و قالي انه مش بيحكم بالمظاهر .. ده راح وقال لكل الناس اننا متخانقين و قالهم علي السبب كمان ..
والدتها قامت و حضنتها / ربنا ينتقم منه وحسبي الله ونعم الوكيل ف اي حد يبهدل بنات الناس معاه .. طالما عايزة تطلقي خلاص يا ابو ايهاب نطلقها ..
ايهاب سابهم و نزل راح لاحمد بيته .. خبط علي الباب بقوه .. والده احمد فتحت ..
نجيه / ايهاب ازيك يا ابني تعالي ..
ايهاب / فيه ستات غيرك يا طنط جوا ..
نجيه/ لا مفيش ..
ايهاب دخل بغضب و هجم علي اوضه احمد اللي اتخض اوي ..
احمد / انت ماسكني كده ليه يا عم اوعي كده ..
ايهاب/ بقي انت يلا تعمل ف اختي كده .. اختي اللي لو قعدت تدور عمرك كله مش هتلاقي ضفرها ..
احمد بسخرية / اختك هي اللي ضحكت عليا ومقالتليش ان هي معيوبه ..
ايهاب بغضب / اختي مش معيوبه اختي ست البنات كلهم واحنا فعلا غلطانين اللي وافقنا على واحد زيك .. اسمع انت هتطلقها والنهارده وهتديها كل حقوقها ومش هشوف وشك تاني مهما حصل ..
نجيه بتحاول تبعدهم عن بعض / استهدى بالله يا ابني واللي انت عايزه هننفذهولك ..
احمد ببجاحة / اطلقها اه لكن مش هتطول مني جنيه واحد انا اصلا اتخدعت في الجوازه دي وصرفت كتير اوي كفايه كده بقى عليكم ..
ايهاب / وديني لو ما ادتها حقوقها لارفع عليك قضيه اسوء سمعتك فيها و ابهدلك في المحاكم و اعرف الناس كلها انك معندكش اصل .. و شوف بقي منظرك هيبقي عامل ازاي قدامهم ..
ايهاب مشي وهو غضبان .. احمد قعد مكانه وهو متغاظ منهم .
احمد / هي غلطتي من الاول اني اتجوزت واحده اقل من مستوايا ..
نجيه / عندهم حق انت بهدلت بنتهم اوي يا ابني وانا ياما نبهتك وقلتلك اللي انت بتعمله ده حرام وغلط اتقي الله يا احمد وراجع نفسك وروح صالح مراتك وهي بنت حلال ممكن تسامحك .. الطلاق مش بالساهل يا احمد بعد ما دفعت كل الفلوس دي ..
احمد / لا عادي عندي انا بالساهل وزي ما جبتها اجيب ست ستها كمان و هتشوفي .. والله لاكون متجوز على اخر الشهر ده بالكتير واكسرها واكسر عينها قدام الكل ..
نجيه فضلت تقنع ابنها كثير يتنازل عن اللي في دماغه لكن هو كان مصمم شيطانه كان اقوى منه .. جه الليل واحمد كان قاعد في بيت اهل يارا ومعاه الماذون …
الماذون / يا جماعه فكروا الطلاق مش حاجه سهله خصوصا ان انتم لسه عرسان جداد ..
يارا / لو سمحت حضرتك انا عايزه اطلق ومش هرجع في كلامي ..
الماذون طلقهم .. واحمد أداها شيك بحقوقها .. دخلت اوضتها وهي منهارة .. نامت علي سريرها بتعب .. كان جواها حاجة بتنكر اللي حصلها و مش مصدقاه معقوله احمد اللي حبته بجد يعمل فيها كده .. فضلت تعيط بكل وجع جواها .. فات كذا يوم علي الحال ده يارا دايما قاعده ف اوضتها بتعيط بس وساكته ومش بتاكل ولا بتشرب و خست جدا و تحت عينها بقي مليان هالات ..
والدتها كانت قاعده جنبها / طيب كلي اي حاجه يا بنتي عشان خاطري .. حرام عليكي والله اللي انتي عملاه في نفسك ده و عشان ايه ده واحد ميستاهلش ..
يارا / انا مش زعلانه عليه يا ماما .. انا زعلانه علي نفسي الناس هتقول عليا ايه أما يعرفوا اني اتطلقت بعد شهر جواز تفتكري هيسبوني في حالي .. طيب انا هخرج ازاي و اعيش ازاي .. أنا خلاص كده حياتي وقفت ..
والدتها / يا بنتي الناس كده كده بتتكلم .. انتي ارمي حمولك علي الله و اقفي كده واجمدي .. انا بنتي عمرها ما كانت ضعيفه كده ..
يارا عيطت و اترمت ف حضن امها .. فضلت كده لحد ما نامت .. غطتها و قفلت النور و خرجت .. كان ابوها قاعد مع ايهاب زعلانين عشان يارا و اللي هي فيه ..
والدها/ وبعدين .. البت هتروح مننا يا ام ايهاب ..
ايهاب / انا بشوف يا بابا نوديها لدكتور نفسي .. يارا تعبانه اوي …
والدتها / لا حول ولا قوة الا بالله .. أعمل اي حاجه يا ابني المهم ترجع تقف علي رجليها .. دي كانت ماليه البيت حركه و ضحك و هزار و دنيا .. دلوقتى حاسه ان كل حاجة بقيت ميته ..
ايهاب / ربنا يسهل انا هشوف دكتورة تساعدها .. انا مش هسمح انها تعمل في نفسها كده ولا هخسر اختي ..
اما عند احمد كان قاعد في اوضته بيتكلم في التليفون ..
احمد / وانتي بقي يا مريم مش مخطوبة اوي مرتبطة .. اصل يعني بنت زيك شيك و دكتورة معقولة ميكونش فيه حد بتحبه ؟!
مريم / بصراحه لا .. اصل كل اللي اتقدموا مش من مستويا و كمان انا بيهمني اوي المظاهر و احب اللي اتجوزه يكون جنتل و شكله حلو ..
احمد ابتسم / طيب اي رأيك أما نحاول سوا .. انا ممكن اجي انا و والدتي نكلم اهلك و نتخطب ..
فضل يتكلم مع مريم و اتفق معاها علي كل حاجة .. قفل التليفون و خرج لاوضه نجيه و خبط عليها ..
نجية / ادخل ..
احمد دخل / ماما .. انا اتعرفت علي بنت و عايز اروح اخطبها ..
نجيه/ ده أمتي و ازاي .. وليه مقولتش ..
احمد / اتعرفت عليها الاسبوع اللي فات و هي عجباني وقررت اخطبها .. هي كويسه و شبهي و الأهم مش معيوبة زي الست هانم اللي كنت متجوزها ..
نجيه/ يا احمد كده عيب .. خلاص انتوا أطلقتوا و الموضوع انتهي بلاش تتكلم عليها .. عندك اخت خاف عليها ..
أحمد / مش موضوعنا دلوقتي يا ماما .. المهم اني اتفقت مع مريم خلاص اني هخطبها اخر الاسبوع ده ولو تمام اتجوزها اخر الشهر ..
نجيه / براحتك يا احمد بس هتندم و هتشوف ..
تاني يوم كانت يارا قاعده في عيادة دكتورة نفسيه ..
يارا / ايهاب انا خايفه .. يلا نمشي ارجوك ..
ايهاب/ اهدي يا حبيبتي .. احنا هنا عشان تبقي كويسه والدكتورة دي مشهورة اوي و شاطرة وان شاء الله تساعدك بس الأهم انتي تكوني عايزة تساعدي نفسك ..
الممرضه ندت علي يارا اللي اترددت جدا قبل ما تدخل .. بصت لاخوها و هو شارولها بمعني انه هيفضل مستنيها ومش هيمشي .. دخلت وهي خايفه بس هديت اول ما لقيت الدكتورة بتبستم ليها …
شيرين بابتسامه / اتفضلي .. ممكن اعرف اسمك ..
يارا / اسمي يارا ..
شيرين/ اسمك جميل .. احكيلي بقي .. ليه جايه هنا و لازم تعرفي ان اي كلمه بتقوليها مستحيل تطلع برا او حد يعرفها مهما كان الحد ده ..
يارا حكت كل حاجة حصلتها وهي بتعيط .. كان شريط حياتها كله بيتعاد قدام عينها ..
يارا / المشكله اني مقصدتش اخبي عليه .. انا والله مكنتش اعرف اصلا اني مفروض اقوله لان العلامه دي صغيرة اوي و كنت فاكرة ان عادي يعني اي حد ممكن يكون عنده حاجة زي كده مولود بيها مثلا .. مكنتش اعرف انها هتفرق معاه كده .
شيرين/ الحياة بين اي زوجين بتتبني علي المودة و الرحمه .. المودة من الود و المعاملة الطيبة .. والرحمة يعني بنرحم ضعف و عيوب و أخطاء الطرف التاني و بنتعامل علي انه انسان .. و مفيش انسان كامل ..
فات وقت وكانت جلسه يارا خلصت و طلعت لاخوها ..
ايهاب/ اي هتكملي ؟
يارا / ايوا هكمل .. انا ارتحت اوي اني لقيت حد فاهمني و فاهم دماغي .. هكمل يا ايهاب عشان عايزة اكون كويسه ..
يارا روحت مع اخوها وهي حاسه انها احسن و مرتاحه .. الخطوة دي كانت فارقه معاها جدا لأن اخيرا لقيت تفسير للي حصل .. قررت تغير نفسها و حياتها .. واول حاجة عملتها اول ما روحت بيتها مسكت تليفونها واتصلت باكتر واحده ظلمتها في الدنيا .. صحبتها نوران ..
يارا بتوتر / ازيك يا نوران .. وحشتيني ..
نوران / عايزة اي يا يارا .. راجعه ليه بعد اللي حصل ..
يارا / انا عارفه اني غلطانه .. وعارفه اني ظلمتك اما بعدت عنك من غير سبب و اتخليت عن اكتر واحده كانت بتحبني وعايزالي الخير ..
نوران / لا انتي بعدتي عشان جوزك قالك كده .. انتي حتي معزمتنيش علي فرحك .. بصي انا كل اللي اقدر اقوله اني مش زعلانه غير عليكي انتي .. وربنا يوفقك مع جوزك ..
يارا بدموع/ نوران انا اتطلقت ..
نوران بصدمه / ايه ! انتي بتقولي ايه ! احكي يا هانم ! ولا استني انا هجيلك .. نص ساعه و اكون عندك ..
اما عند ايهاب روح بيته و هو مبسوط ان يارا قررت تكمل و تتعالج .. مراته شافته بصتله بضيق ..
سلوي / مالك فرحان كده ليه !
ايهاب/ اخيرا يارا بدأت تتحسن و تقوم تاني .. أنا ودتها لدكتورة نفسيه و هي هتكمل ..
سلوي / يااه يعني أختك خلاص اتجننت ..
ايهاب / اختي مش مجنونه .. اختي اتصدمت وفرحتها اتكسرت واي حد مكانها كان انهار من اول دقيقه هي فضلت مستحمله عشان ابويا و امي ..
سلوي / يسلام .. ومين بقي اللي هيدفعلها تمن الجلسات .. متحلمش تدفعلها حاجة احنا اصلا ظروفنا وحشه ..
ايهاب/ لا ظروفنا الحمد لله معتدلة .. انتي اللي مفيش حاجه بتملي عينك و دايما عايزة اكتر .. و اوعي تدخلي في علاقتي بأهلي .. فاهمه ..
سلوي / اه وانت هتفضل دلدول اهلك كده كتير ..
ايهاب بعصبية / قولتلك ملكيش دعوة بحاجة و لو تاني مرة اتكلمتي كده اعملي حسابك كل حاجة هتنتهي و هطلقك .. فاهمه !
ايهاب دخل الاوضه وغير هدومه ونام … خلص اليوم بكل التعب اللي فيه بس كان الكل عنده امل ان كل حاجة تتصلح .. جه اخر الاسبوع و احمد كان قاعد مع والدته عند مريم بيتكلموا و بيتفقوا ..
مريم / بس انا مستحيل اتجوز علي عفش و ديكور واحده تانيه اللي مختاراه .. انا عايزة حاجة جديدة وانا اللي مختاراها ..
نجيه / يعني هنغير عفش بالوفات و ديكور عشان انتي عايزة كده .. والله هو ده اللي عندنا ..
احمد / طيب ايه رأيك لو نغير اوضه النوم بس .. اصل فعلا الحاجات دي هتتكلف كتير وانتي عارفه الاسعار عامله ازاي ف بدل ما ندفع في الشقه نخلي الفلوس نسافر بيها شهر عسل في مدريد او باريس .. وممكن بعد كده واحده واحده نغير ..
والد مريم/ خلاص يا احمد وانت شكلك ابن حلال وانا موافق عشان خاطر الست والدتك بس ..
اتفقوا علي كل حاجة و حددوا معاد للفرح علي طول ..
اما عند يارا كانت في اوضتها متوترة اوي ..
يارا / نوران انتي متأكده اني أنفع للشغلانه دي
نوران/ يا بنتي ايوا والله انا اتكلمت مع صاحب العيادة .. هي عيادة كبيرة جدا جدا وفيها كل التخصصات ومحتاجين مهندسين ديكور عشان يغيروا النظام .. وانا عارفه انك شاطرة اوي و ورتهم شغلك اللي كان معايا و عجبهم ..
يارا / بس انا بقالي كتير اوي ممسكتش الوان و لا عملت تصميمات ..
نوران / تتعلمي .. يلا بقي عشان هنتاخر ..
يارا ابتسمت ومسكت نوران / شكرا انك موجوده .. شكرا انك سامحتيني رغم اللي عملته ..
نوران / وانا امتي يعني مكنتش موجوده .. يلا يختي يلا ..
خرجوا من البيت بعد ما سلموا علي اهلها .. كانت يارا خايفه و متوترة و حاسه انها هتفشل بس دعم صحبتها و اخوها و أهلها أداها ثقه في نفسها و خلاها تقوي .. كانت قاعده بتعمل انترفيو مع الدكتور ..
الدكتور / انا اسمي انس دكتور جراح و صاحب العيادة .. ممكن تعرفيني علي نفسك ..
يارا ابتسمت/ انا يارا السلام .. عندي ٢٢ سنه ومتخرجة من فنون جميلة ..
الدكتور فضل يتكلم مع يارا واعجب بيها جدا و بدماغها جدا .. اتقبلت و بمرتب كويس كمان ..
يارا خرجت من المكتب مبسوطة ..
يارا / نوران انا اتقبلت اتقبلت ..
نوران حضنتها بفرحه / طيب الحمد لله يارب .. خلاص هتبقي امرأة عاملة و كده ..
يارا ضحكت و لسه هترد اتفاجئت ب الدكتورة شيرين ..
شيرين/ يارا .. انتي بتعملي ايه هنا ..
يارا / ازيك يا دكتورة .. انا كنت جايه اعمل انترفيو هنا واتقبلت ..
شيرين / بجد .. دي عيادة اخويا اصلا ..
يارا اتفاجئت جدا / يعني دكتور انس يبقي اخو حضرتك ..
شيرين / ايوا اخويا .. انا مبسوطة اوي انك بدأتي تشوفي حياتك و تكملي .. برافو عليكي ..
يارا سلمت علي الدكتورة و مشيت مع صحبتها .. اهلها فرحوا جدا و دعموها .. بدأت تشتغل و تشوف حياتها و تاخد كورسات كتير عشان تساعدها في مجالها .. كانت مبسوطة اوي و لأول مرة تحس ان ليها كيان و قيمه و في نفس الوقت فضلت شايله البيت و بتساعد ابوها و امها ..
يارا/ يلا يا ماما عشان تاكلي ..
والدتها / يا بنتي ليه تعبني نفسك بس .. انتي مش بترتاحي خالص .. بالليل واقفه بتعملي الأكل والصبح في شغلك و بعد الضهر بتذاكري للكورس بتاعك ..
يارا / والله يا ماما أنا مبسوطة كده .. أمتع وقت بالنسبالي وانا واقفه في المطبخ بعمل الأكل ليكي انتي و بابا و انا اصلا بحب الطبخ ..
والدتها / ربنا يوفقك يا بنتي و يديكي الصحه و العافيه ..
اما عند انس كان قاعد مع اخته بيشتغلوا .
انس / شيرين بقولك ايه ما تحكيلي عن يارا كده .. مش هي بتتعالج عندك ؟ حاسس اني عايز اعرفها ..
شيرين بصتله بخبث / وانت عايز تعرفها ليه .. الصنارة غمزت صح ..
انس ابتسم بتوهان / تقريبا كده .. هادية و لطيفه و جميلة و دايما بتضحك و بتهزر .. عفوية اوي و اللي في قلبها علي لسانها .. دي مرة قالتلي متقولش رأيك تاني عشان عكيت الدنيا في الديكور .. بريئة كده وحاسس انها متربية كويس ..
شيرين / هي من ناحيه متربية ف اه متربية لدرجة انها نفسيتها انهارت و اتكسرت بسبب الظلم .. بص انا مش هقدر احكيلك عشان دي أسرار مرضي بس اللي اقدر اقوله انها فعلا بنت كويسه و لو متردد او خايف يبقي بلاش لأنها اتجرحت كتير اوي ..
انس / طيب ما انا عايز اتعرف عليها اكتر بس هي مش مدياني فرصه و طريقتها رسميه اوي معايا ..
شيرين/ اتكلم معاها بصراحه و قولها مشاعرك وربنا يقدم اللي فيه الخير ..
تاني يوم كان احمد قاعد مع مريم خطيبته في حفلة من الحفلات اللي كانوا بيروحوها سوا ..
احمد / بس لبسك النهارده جامد اوي ..
مريم / عارفه .. الفستان ده ماركه اصلا وغالي اوي .
احمد / باين عليه والله يا حبيبتي .. الوقت اتأخر يلا نمشي عشان عندي شغل بدري و لسه هوصلك كمان ..
احمد و مريم خرجوا و فضلوا طول الطريق يتهزروا و يضحكوا .. احمد وصلها وراح لبيته بس في طريقه فجأة فقد السيطرة على العربية و اتقلبت بيه .. الناس اتلمت و الإسعاف جت اخدته .. اتصلوا بوالدته و خطيبته وبعد شويه كانوا قاعدين مع الدكتور في الاوضه ..
نجيه/ طمني يا دكتور ابني ماله ..
الدكتور/ هو كويس ايده اتكسرت و جبسناها بس المشكلة الكبيره في وشه ..
مريم / ايه ده ماله وشه يعني ..
الدكتور / العربية اما اتقلبت كل القزاز دخل في وشه وطبعا احنا طلعناه بس سايب اثر جامد ..
مريم / يعني هيبقي مشوه .. طيب ملوش عمليات ..
نجيه بدموع / ياعيني عليك يا ابني .. دا انت لسه في عز شبابك ..
الدكتور/ للاسف العمليات في حالته ملهاش فايده هي هتخفف الآثار بس مش هتضيعها خالص ..
نجيه و مريم خرجوا من عند الدكتور و راحوا ل احمد الاوضه ..
نجيه حضنته / حمد لله علي سلامتك يا روحي .. إن شاء الله هتبقي كويس ..
احمد / كويس ازاي .. أنا هبقي مشوه ..
نجيه / المهم انك كويس و ربنا نجاك .. انا هروح اتوضي واصلي ركعتين شكر لله ..
نجيه خرجت من الاوضه و احمد بص لمريم ..
احمد / مريم انتي ليه واقفه بعيد ..
مريم/ بص يا احمد انا مش هينفع ابقي معاك تاني .. اسفه يعني انت مبقتش راجل في عنيا و لا تلزمني .. هبعتلك شبكتك و كل حاجتك علي البيت ..
احمد / انتي بتقولي ايه يا مريم .. اهون عليكي تعملي فيا كده ..
مريم / انا مكدبتش عليك و قولتلك أهم شيء عندي الشكل وانت شكلك مبقاش ينفعني ولا يناسبني .. دبلتك اهي و هبعتلك باقي حاجتك اما اروح .. باي ..
مريم خرجت و احمد انهار و فضل يعيط و يكسر كل حاجة حواليه .. كان مجروح اوي ومش مصدق انه اتساب بالشكل ده .. دخلوا عليه الممرضين و ادوله حقنه مهدئة ونام ..
تاني يوم كانت يارا قاعده في كافيه مع انس ..
يارا / اتفضل يا استاذ انس .. اي الموضوع اللي كنت عايزني فيه ..
انس / بصراحه كده انا معجب بيكي جدا و عايز اتقدملك ..
يارا بصدمه / تتقدملي ! حضرتك عندك علم اني مطلقه ..
انس / ايوا عارف .. انتي ناسيه اني شوفت بطاقتك .. و بصراحه سألت عليكي وعرفت كل حاجة عنك إلا حاجة واحده ..
يارا/ انا أطلقت ليه مش كده !
انس / ايوا كده .. وسألت اختي بس رفضت تقولي وقالتلي اسالك بنفسي .. انا عارف اني مش من حقي اعرف وان الماضي شي خاص بيكي بس يعني اي اللي يخلي واحده جميلة زيك ومتعلمه تتطلق .. .
يارا ضحكت بسخرية / عشان معيوبة ..
انس / مش فاهم .. معيوبه ازاي يعني ..
يارا حكتله كل حاجة من اول ما شافت احمد لحد ما اتطلقت منه ..
انس / انتي بتتكلمي جد ! يعني ده سبب طلاقك!
يارا / اه هو ده السبب ..
انس/ اسمحيلي اقولك ان طليقك ده انسان سطحي و جاهل .. فيه واحد يطلق مراته عشان جرح بسيط ملهاش يد فيه ..
يارا / هو راح لحاله .. حضرتك بقي لسه عايز تتقدملي ؟
انس / طبعا .. انا اصلا كنت معجب بيكي من غير اعرف حاجة واما عرفت إعجابي بيكي زاد اكتر و متمسك بيكي اكتر ..
يارا / طيب مش حابب تشوف الجرح ده يمكن تغير رأيك ..
انس / هشوفه بس اما تكوني مراتي .. يارا انا إعجابي بيكي عشان حاجات تانيه خالص الشكل آخرها .. لو سمحتي وافقي و اديني فرصه .
يارا / اخر مرة حد قالي الجملة دي و نفذتها ندمت ندم عمري .. خايفه اوافق تاني اندم ..
انس ابتسم / اوعدك عمرك ما هتندمي .. صدقيني انا عايز نجرب سوا و واثق في ربنا اننا مش هنفشل ..
يارا كانت مترددة و قررت ترفض بس في حاجه جواها خلتها توافق و نزلت بسرعه اشترت فستان شيك و شوز لطيفه و رجعت البيت حكت لاهلها اللي فرحوا جدا .. كانوا ف اوضتها و نوران بتعدلها الطرحه ..
نوران / يا بنتي بقي اهدي مش عارفه اظبط الطرحه من توترك ده ..
يارا / خايفه اوي .. خايفه كل حاجة تتكرر تاني ..
نوران / متقلقيش خير ان شاءالله .. وبعدين انا معاكي و لو فكر بس يضايقك انا هوريه ..
يارا ضحكت/ فعلا .. المرادي هتكوني معايا ف كل خطوة و مش هسيبك غير اما توصلني لبيت الزوجية ..
فضلوا يهزروا لحد ما انس وصل ومعاه اخته .. عيلة يارا رحبوا بيهم جدا و كانوا مبسوطين لان باين ان انس راجل محترم و هيهوض يارا عن كل اللي شافته .. اتعرفوا عليه وحبوه جدا واتفقوا علي كل حاجة .. مرات اخوها كانت في المطبخ مع ايهاب بيوضبوه ..
سلوي / اختك دي ايه حظها فظيع .. يعني الأول كان غني ومعاه فلوس و منصب تقيل .. سابته و وقعت في واحد اغني منه و دكتور و عنده عيادات .. ايه اختك بتجبهم منين وليه بيموتوا عليها كده .
ايهاب/ حرام عليكي والله .. هي اللي شافته قليل دي كانت شبه الاموات و رجعناها بالعافيه .. بطلي بقي تبصيلها في حياتها و في رزقها ..
سلوي / طبعا ما انت لازم تقول كده ما هي اختك ..
إيهاب/ أنا بجد تعبت معاكي.. لينا كلام تاني في بيتنا ..
في الصاله كانت يارا قاعده في حضن امها و هي مبتسمه ..
والدة يارا/ مبروك يا حبيبتي ان شاء الله فرحتك هتم علي خير ..
يارا/ طول ما انتي بتدعيلي يا ماما هبقي كويسه ..
يارا اتخطبت ل انس وسط فرحه اهلها و صحبتها .. كانت حاسه كأنها اول مرة تتجوز .. انس كان حنين معاها اوي و بيجبلها كل حاجة بتحبها .. كانوا قاعدين في كافيه بيتكلموا ..
يارا / ليه يا انس تكلف نفسك و تجيب السفرة الغاليه دي .. ما أنا قولتلك نجيب التانيه احسن و نوفر الفلوس ..
انس / يستي انا موافق وعايز اجبلك كل اللي نفسك فيه .. ولازم تعرفي ان مفيش اي حاجة مهما كانت تغلي عليكي
يارا ابتسمت / انا مش عارفه اقولك ايه بجد ..
انس / يستي متقوليش حاجة .. تحبي نحجز شهر العسل فين ..
يارا بتردد / بصراحه انا طول عمري كان نفسي اسافر بورسعيد اوي .. ايه رايك ؟
انس / بورسعيد ! ده انا قولت هتطلبي نسافر بره مصر ..
يارا ضحكت / منكرش ان نفسي بس انا فرهوده اصلا و بتخنق من المطار والحاجات دي ف خلينا ف بورسعيد ..
انس / ماشي نحجز في بورسعيد يا قمري انا يعني عندي كام يورا ..
يارا اتكسفت / بس بقي عشان بتكسفني ..
انس / اممم بتتكسفي لا اعملي حسابك بقى مفيش كسوف خالص الفتره الجايه ها ..
يارا ضحكت و اتكلمت معاه وهي مبسوطة اوي …
اما عند احمد رجع البيت وهو مهموم و تعبان وباصص في الارض بكسره .
نجيه بخوف / مالك يا حبيبي شكلك عامل كده ليه !
احمد اترمى في حضنها وقال بعياط ..
احمد / بعد كل اللي عملته وكل النجاح اللي حققته في شغلي شالوني من مكاني وجابوا واحد تانى عشان شكلي مبقاش يليق بالشركه انتي متخيله يا ماما .. انا اللي كانوا بيحلفوا بشغلي وذكائي وموهبتي لمجرد ان شكلي اتغير شويه شالوني من شغلي وقعدوني في مكتب ميقعدش فيه واحد لسه بادئ شغل جديد .. وحتى كل زمايلي بعدوا عني وبقوا يقرفوا يكلموني ويبصولي..
نجيه حضنته / معلش يا ابني .. للاسف الناس بقيت كده بتحكم بالمظاهر وبس وكل اللي بيهمها الشكل واللبس والفلوس مبيهمهمش البني ادم اللي قدامهم اصله و معدنه ايه .. مانكرش يا حبيبي انك غلطت نفسي الغلطه دي لما طلقت يارا لمجرد ان عندها حاجه بسيطه اوي وكمان فضحتها .. الناس يا حبيبي عمرها ما بتتقيم بشكلها احنا بنقيم الناس على حسب اخلاقهم وتربيتهم وتعاملهم معانا ..
احمد انهار في العياط وامه فضلت حضناه و بتواسيه..
فات سنه على اليوم ده كانت يارا لابسه فستان فرح جميل اوي وداخله بيتها الجديد مع انس .. كانت فرحانه جدا رغم ان كان جواها خوف ان التجربه تتكرر تاني والتاريخ يعيد نفسه بس طمنت نفسها ان المره دي انس بيحبها بجد ومش هيسيبها ..
دخلت الاوضه غيرت هدومها ولبست قميص نوم لايق عليها وخرجت بخجل …
انس ابتسم / يا لهوي يا جدعان بقى كل الحاجات دي وكل القمر ده ليا لوحدي ..
يارا بقلق / بجد شكلي عجبك يعني العلامه اللي في رقبتي مش مضايقاك ..
انس / الا صحيح يا بنتي فين اصلا العلامه دي انا عماله ادور مش لاقيها …
يارا وشاورتله عليها …
انس / والله انت تافهه اوي .. هي دي العلامه اللي مخوفاكي اوي طب اهو …
انس قرب من رقبتها و باس العلامه بحب .. يارا اتكسفت …
يارا / انس انااا
انس / بس اسكتي خالص .. سيبك من الكلام ده عندنا حاجات اهم لازم نتكلم فيها ..
يارا اتكسفت اكتر و ارتبكت ..
انس حضنها / بحبك يا قلبي .
يارا / وانا كمان بحبك … انت عوضي من الدنيا عن كل اللي حصلي ربنا يخليك ليا يارب..
تمت ..
لقراءة الرواية كاملة اضغط على : (رواية صدمتي في يوم زفافي)
