رواية بيت النجاحي الفصل الأول 1 بقلم هند عبدالله
رواية بيت النجاحي الجزء الأول
رواية بيت النجاحي البارت الأول
رواية بيت النجاحي الحلقة الأولى
الله أكبر الله أكبر الصلاة خير من النوم
كريمة كل يوم تسمع الادان وتقوم بالراحة من جنب جوزها الاستاذ عرفة النجاحي الموظف في شركة المية
تزيح بالراحة اللحاف الستان الأزرق اللي كانت منجداه حماتها الحجة سنية الوكيل
وتحط رجلها في البانتوفل وتخرج تتسحب من الاوضة وهى بتقول أصبحنا وأصبح الملك لله
تولع الفرن وتدخل تتوضى وتصلي الفجر وبعدها تفتح الراديو
كريمة مش بتبص في الساعة بس بتعرف من كل برنامج تصحي مين يعني مثلا مع نشرة اخبار الساعة وهى المذيعة بتقول مع دقات السادسة بتدخل تصحي ولادها مدحت وعلا وسمير عشان المدرسة
مدحت في أولى ثانوي والتوأم علا وسمير في تالتة ابتدائي
تمد ايدها في الدولاب تطلع كيس الدقيق وبرطمان السمن وكام بيضة وكوباية سكر
وتضربهم كويس وتصبهم في الصنية وتدخلهم الفرن وتولع على البراد وهى واقفة تعمل السندوتشات وصوتها بيرن يا مدحت يا علا ياسمير يلا يا ولاد
هى قاصدة صوتها يطلع عشان عرفة يسمعه ويصحى بالراحة بدل ما تقف تصحيه ويبقى حاسس انه متأخر
مدحت : الله ياماما ريحة الكيكة تحفة
كريمة : لسة حبيبي خمس دقايق وتطلع من الفرن
بيجي صوت علا وسمير من ورا الكرفان المشغول اللي في الصالة
سيب القلم ده بتاعي
ياسلام ياختي مافيش بنات بتكتب بقلم جاف
ياغلاستك ياخويا مش مكتوب عليه للصبيان فقط
نيننني
كريمة : بس بس منك لها هو كل يوم كده ما ينفعش تمشو من غير نقار ابدا
في صوت واحد : ماهو اللي بدا يا ماما ، لا هى والله
بس خلاص انا هقول لبابا يجبلكم أقلام حبر انتو الاتنين يلا تعالو افطرو
هأحم
مع صوت نحنحة عرفة بتدب في البيت حالة زي نوبة صحيان الولاد بيبطلو خناق ومدحت بيعدل ياقة قميصه
حتى الفرن كأنه اختشي من صوته والكيكة تخلص وتطلع
عرفة : صباح الخير ياولاد
في صوت واحد : صباح النور يابابا
بعدها يدور بعنيه في المطبخ وهو بيقول ايه ده يا ولاد مش شايف من كتر نور الشمس اللي معانا في المطبخ
وترن ضحكة كريمة بكسوف
: ربنا ينور قلبك ياخويا
: ماهو منور بيكي ياست الستات
ويقعد عرفة يفطر مع ولاده وهى واقفة تجهز اكياس السندوتشات وتمد ايدها في التلاجة الايديال تطلع كيس اللحمة يفك
وتطفي المروحة اللي بتهز ورق الجرايد المفروش على ارفف النملية الصغيرة الواقفة جنب بوتاجاز المصانع الحربية
قدامهم الترابيزة الصغيرة اللي شايلة عدة الشاي وصنية الكيكة وطبق في بيض مسلوق وجبنة بالطماطم وحواليها قاعد عرفة وأولاده
وهى بتلف حواليهم وزي كل يوم
عرفة : اقعدي افطري معانا ياست الناس
كريمة : يوه ماهو اللي بتاكلوه بيشبعني ياخويا
مدحت : ياماما مافيش حاجة اسمها كده لازم تفطري معانا ولا خايفة تتخني بقى وبابا يبطل يعاكسك
عرفة : لا يمكن امك هتفضل حلوة في عيني لحد ما اموت
كل مرة يقول كده تتخض كريمة وتخبط على كتافه وهى بتقوله يومي قبل يومك ياخويا
خلصو فطورهم ونزلو على مدارسهم وعرفة راح على شغله في شركة المية مع صوت نجاة وهى بتقول بالسلامة يا حبيبي بالسلامة
وتفضل كريمة لوحدها في البيت متونسة بصوت الراديو وهى بتتحرك بين الاوض توضب سراير الولاد وتحضر خضار الغدا وتلم مطرح الفطار
ومع صوت صفية المهندس وهى بتقول إلى ربات البيوت بتقعد كريمة في بلكونة بيتها قدام السبرتاية تعمل فنجان قهوة وهى بتقرأ جرنان الاخبار وتتصعب وتقول مسم والنبي الدنيا اتقل خيرها
صوت تليفون البيت بيرن
: الو ايوة ياماما صباح الخير
……..
: والنبي صحيح اخويا حمادة جاي
…………
: يا حبيبي ياخويا تيجي بالسلامة
………
: صحيح والنبي الكويت جوها صعب انما مش أصعب من قلبة بوز سامية مراته
………..
: طبعا ياماما هعمله عزومة تشرف ده سي عرفة هيفرح قوي
……..
: زي بعضه ان كان تبعتي سعيدة تساعدني يومها يبقى كويس احسن انا مش عارفة مالي
………..
لا طبعا ياماما حمل ايه لا لا ده تلاقي ضهري بس اكمن شيلت السجاد نهار الاتنين
………
: متحرمش منك يا حبيبتي
وتقفل التليفون وهى بتقول يا حبيبي ياخويا مالكش بخت في الجوازتين لا المصرية نافعة ولا الأجنبية نافعة
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية بيت النجاحي)
