رواية عزبة فكه الفصل التاسع 9 بقلم ريناد
رواية عزبة فكه الجزء التاسع
رواية عزبة فكه البارت التاسع
رواية عزبة فكه الحلقة التاسعة
يوسف اخد فكه للدكتور اللى بشرهم بخبر
حملها فى ٤٠ يوم، ووصاه انها لازم ترتاح
وتتغذى كويس لان الحمل ضعيف نتيجه
ضعف الام وكتبلها على مقويات وفيتامينات
يوسف كان طاير من السعاده وكان حاسس انه خلاص اخد كل حاجه حلوه من الدنيا..
روحو وبشرو شيماء اللى ابتسمت وعلى
الرغم من وجعها الا انها فرحت لفرحت
يوسف اللى شايفه السعاده هتنط من عنيه
وفكه طلعت فوق وبشرت ام يوسف اللى
فضلت تزغرت لغاية مالمت الجيران كلهم
وكلهم باركو لفكه وفرحولها لانهم مشافوش منها غير كل حب وعطف على الكبير قبل الصغير،،
وام يوسف حلفت عليها انها متنزلش الشغل تانى
ام يوسف :انتى من هنا ورايح يابنتى هتقعدى فى البيت ومش هتنزلى الشغل ده الا لما تولدى
فكه : ياخبر ياخالتى ازاى وشيماء هتعمل ايه مش هتقدر لوحدها؟
ام يوسف :انا هنزل بدالك
فكه :بتقولي ايه ياخالتى انتى تنزلى الشارع؟
ام يوسف :وفيها ايه يعني وهو انا اول مره انزل الشارع يعني؟
يووه يافكريه يابنتى دا الشارع ده ياما خد من جتتى رقات لما كان يوسف صغير اسماله عليه،،،
كنت بببع خضار وجرجير ومبطلتش غير لما ابو شيماء الله يرحمه وافق يشغله معاه فى الورشه ويعلمه الشغلانه… واول مايوسف بقا يجيب القرش حلف عليا ماانزلش تانى،، وانا سمعت كلامه
مع انه كان عيل مفعوص صغير لكن هو
كان راجلى ساعتها
فكه بفخر :من صغره راجل ربنا يحميه يارب،، بس انا خايفه على تعبك ياخالتى
ام يوسف :لا متخافيش عليا وانا قلت
كلمه وحده مفيش نزول شغل يعنى مافيش،، وابقى كسرى كلامى يافكريه
يوسف كان واقف على الباب وسامع كل كلامهم ومبتسم ورد هو علي امه :
لا عاش ولا كان ولا اتولد اللى يكسر كلمة ست الكل جدة ابنى
ام يوسف :مبروك ياحبيبى ويكملها على خير ويتربى فعزك يارب،، انا هعد الساعات
عشان اشيله بين ايديا واحضنه،، وبصتلهم هما الاتنين لقتهم بيبصو لبعض اووى،، فهمت انهم محتاجين يقعدو لوحدهم شويه وانها لازم تسيبهم،،
ام يوسف :طب هنزل انا اساعد شيماء احسن زمانها محتاسه لوحدها
يوسف :معاها بريزه
فكه : اهو بريزه ده حوسه لوحده
يوسف :دنا متحلفله هعلقه من رجليه فى المروحه واسيبه يومين متعلق
فكه :حرام عليك دا غلبان هو مخه على اده هيعمل ايه؟
يوسف :شششش،، وبيشوح بأديه قدامها فكل حته،،
انسى بريزه انسيه اوعى تفكرى
فيه طول مانتى حامل،، ولا حتى يجى فخيالك احسن الواد يجى زيه،، عليا النعمه اربطه واربطك واربط بريزه فكام موتور من الورشه واغرقكم فى البحر
فكه :هههههه تف من بوقك وبعدين ابنى انا هيطلع زى بريزه ليه؟
دا ابوه ملك الفكاكه والمفهوميه
يوسف :فكاكه!!؟ فيه وحده تقول لجوزها فكاكه،، اه يبنت المفككه
فكه :بطل بقا هزار وتعالا هنا قرب عليت
يوسف :منا قريب اهو
فكه :لا قرب كمان خلينى ابص لعنيك اووى عشان ابنى يورث عنيك ويدوب بيهم البنات
يوسف بحنيه :انا بحبك اووى يافكريه اوووى
فكريه :وانا بموووت فيك
*****************
فى القاهره
بكر :اهلا بالرجاله اتفضلو تعالو
خليل :اهو بيكا اهو،، منكم ليه انتو بقا واتفاهمو
الراجل :ايه يامعلم بيكا متتهاود معانا فى
السعر شويه دحنا برضو زباينك،، وراعى
حتى مشوارنا واننا جايينلك من اسكندريه
بيكا :والله يارجاله احنا بنوزع باقل من سعر اى ديلر واسال بره،، دا غير السمعه
واكيد انت عارف بضاعتنا عامله ازاى،، وبعدين البضاعه مش انا صاحبها البضاعه دى بتاعت اخويا،، وانا بوزع بس يعنى مقدرش اكلمه
الراجل :طب ممكن احنا نكلمه؟
بيكا :اه استنو خمسه هصحيه،، وفتح اوضه الكانو اللى كانت فى وش الصاله لكن ملقاش الكانو،،، بصلهم وقالهم الكانو خرج يارجاله والله،، حتى بصوا بنفسكم
الرجاله بصو جوا الاوضه وشافو حاجه اول ماشافوها تنحو وبصو لبعض!!
الراجل الاولانى :هى
التانى :لا،، يمكن شبهها
الاولانى :لا والنعمه هى انا عمرى مانساها
ابدا دنا قعدت ٣ شهور متجبس بسببها.
بيكا :فيه ايه يارجاله متفهمونى؟
الرجاله الاتنين شاورو على صوره بالحجم
الطبيعى لفكه فاوضه الكانوا
بيكا بلهفه :تعرفوها؟ شفتوها قبل كده،، شوفتوها فين قولو وليكم عليا احلى خصم على البضاعه
الراجل الاول :دى ياسيدى فاتحه مطعم سمك عندنا فى اسكندريه،، وخدت خرابه
نضفتها ووضبتها،،
جينا نصيع عليها ونطلع مصلحه كسرت عضمنا وفرجت علينا خلق الله،، وكسرت عيننا وسط الناس،، الا انتا تعرفها؟
بيكا بفرحه :الا اعرفها،، دى معرفه العمر كله.
اسمعو متجيبوش سيره لاى حد غيرى انكم تعرفوها،، ولا تعرفو مكانها،، وانا هسافر معاكم وورونى مكانها اشطه
الرجاله :اشطه
الرجاله مشيو وخله قرب منه،، ناوى على ايه؟
بيكا :انا حلفت زمان انى هرجعها لكانو متكتفه تحت رجليه وفعلا هعمل كده وهعملهاله مفاجأه كمان بس عايزك تشوفلنا اتنين كفائه،، ووجه جديد عشان نراقبها من بعيد لبعيد من غير ماتحس
خله :طب ماانول انا الشرف ده؟
بكر :ماهى تعرف شكلك يافكيك ولو لمحتك هتهرب ومش هنعرفلها طريق تانى لكن احنا نفضل بعيد وفى اللحظه المناسبه هووووب
خله :دماغ الماظ متكلفه
بيكا :امال ايه يابنى هو انا بعمل دماغ
صرم زيك
وفعلا بكر سافر هو وخله واتنين تانى،،
والرجاله معاهم اخدوهم ودلوهم على المكان ومشيو،،
لكن فكه مكنتش موجوده فاليوم دا،،
بس الرجاله كان معاهم صورتها وعارفين
شكلها،، وبيكا وصاهم اول مايشوفوها
يقطروها ومتغبش عن عنيهم ابدا،،
لكن القعده طولت اسبوعين وهى مش ظاهره لغايه ماجه ميعاد اعادة الكشف بتاعتها ونزلت مع يوسف عشان يروحو للدكتور
والرجاله اول مالمحوها عرفوها واتحركو
وراها وبلغو بيكا اللى جه بموتوسكل هو
وخله ولا بسين خوز عشان فكه متعرفهمش
استناها وهى نازله من عند الدكتور
ويوسف ماسك ايدها وبيهزرو مع بعض
بيكا :والله زمان يافكه ومين ده ياترى؟
اتجوزتى ولا مرافقه؟ مش مهم،،، بس وحياتك لتدفعى التمن غالى اوووى واخلى كانو يطلع على جتتك اللى عمله فيا بسببك
بيكا مشى وراها لكن ملقيش اى فرصه
انه يقربلها من يوسف،،
وطلعت العماره بتاعتها بعد ماخلصت كشف ورجعت مع يوسف، وفضلت كده شهر تانى والرجاله زهقوا،،
لكن بيكا كان بيدفعلهم ومش مخليهم
يتحركو من القهوه ليل ولا نهار لغاية ما
اهل الحته شكو فيهم وابتدو يسألوهم
هما مين وبيعملو ايه كل يوم هنا؟
الرجاله فهموهم انهم مخبرين والبوليص
بيخلى كل حاره فيها اتنين فى الخفا
عشان يبلغو عن اى حاجه مش مظبوطه
القهوجى :بس شكلكم مش مخبرين خالص لا مؤاخزه؟ دانتو بتضربو فيه بوليص بيضرب حشيش!!
الراجل :مهو ده تكتيك ياخفيف عشان
الناس متشكش فينا طب بزمتك انتا
نفسك صدقت اننا مخبرين
القهوجى :بصراحه لا لغاية مقولتولى
الراجل :شفت بقه اهم من الشغل ايه
القهوجى :تظبيط الشغل ياباشا تحيا
الحكومه،، وضربلهم تعظيم سلام
الراجل :هششش نزل ايدك هتفضحنا
القهوجى :تمام يافندم ومشى لجوه
الراجل التانى :الله يحرقك يابيكا شكلك
هتلبسنا فحيطه،، وادى قعده كمان اما
نشوف اخرتها هات زفت قهوه يبنى
القهوجى :حاضر ياباشا عينى
فكه كانت تقريبا فى اخر الشهر التالت وكانت دايما زهقانه من قعدة الاوضه
وفيوم طلبت من يوسف انه ياخدهم
فسحه على البحر كلهم،، ويوسف وافق
بس بشرط فكه متنزلش الميه وهى وافقت،،
بعد كام يوم حضرو للفسحه لكن يوسف
جاله شغل فجأه ومقدرش يروح معاهم
وقالهم يروحو لوحدهم فى المكان بتاعهم
عشان مفيش حد يعرفه
وهما ماشيين ام يوسف داخت وضغطها
وطى واطرت تقعد فى البيت ومفضلش
غير فكه وشيماء بس اللى هيروحو
ويوسف قرر انهم ياخدو بريزه معاهم
فكه وشيماء رفضو لكن يوسف قلهم
افرض دلوقتى طلع كلب سعران عليكم
هتعملو ايه هاه؟ ارموله بريزه واهربو انتو
فكه :كنت عايزاك معايه
يوسف :الجيات كتير روحى فكى عن نفسك انتى النهارده ووعد منى هخرج انا وانتى بس قريب،،
خلاص يافتتى الحلوه؟ وباسها
فكه وشيماء نزلو ويوسف بينده على بريزه
عشان يروح معاهم
يوسف :ولا يابريزه
بريزه يبصله ويبص بعيد وميردش
يوسف :بريزه انتا يازفت طب والله لو جيت عندك لعلقك
بريزه بيتأفأف وراحله وهو بيهز فأديه،،،
ايوه ياسطى عاوز ايه؟
يوسف :انا يالا مش قايلك من امبارح انك
هتروح مع شيماء وفكريه على البحر يلا
بريزه بغيظ :اااايوه قلت
يوسف :طب وايه
بريزه :ايه ايه
يوسف :يلا يبنى هيتأخرو
بريزه :لا مهو انا مش هروح معاهم
يوسف :ليه ان شاء الله
بريزه :افتكرت حاجه مهمه ومتنفعش تتأجل لازم تتعمل النهارده
يوسف :وياترى يابريزه بيه ايه هى الحاجه دى ممكن اعرفها؟
بريزه بيهز دماغه لا
يوسف :ايه سر يعنى؟
بريزه :اه سر وبعدين مش امك رايحه معاهم!
يوسف :امك برضو تانى يابن الجزمه
بريزه :اله مش هى امك ولا ايه؟ مش عارف انا بتزعل من كلمة امك ليه!!
يوسف :امى مش رايحه يابريزه بيه
بريزه :ليه
يوسف :صبرنى يارب تعبت يابريزه عندك مانع
بريزه :طب ولما امك تعبانه يسيبوها يعنى
ويروحو يتفسحو دا ايه ده!!
يوسف يضحك هو وشيماء وفكه
تصدق صح
فكه :خلاص يايوسف هنروح لوحدنا الدنيا امان وشطنا محدش يعرفه متقلقش وبعدين مراتك بميت راجل ولا ايه؟
يوسف رفع اديه :فدى اشهدلك بس يعنى انتى حامل وانا خايف عليكى اووى يافكريه
فكه :ياعم قول يارب.. سلام ياقلب فكريه
يوسف :سلام ياعيونى لا اله الا الله
فكه :محمدا رسول الله
شيماء :ايييييه هو احنا رايحين نحارب
سلام ياعم يلا يابنتى
يوسف :سلام يالمضه خلى بالك منها هاه
شيماء :لا مش هخلى بالى وطلعتله لسانها
يوسف :ادخل يلا يابريزه هات قطاعه من
جوه للسان الطويل ده نقصره شويه
بريزه :حاضر يسطا ويدخل جرى
شيماء :يخيبك يابريزه متجريش غير فى
الاذيه،، يلا يافكريه قبل مايجى بريزه بالقطاعه وضحكو وجريو
فكه وشيماء وصلو الشط
فكه :يلا افرشى معايه المفرش ده
شيماء :بعد مانخرج من الميه
فكه :طب روحى وانا هفرشه
شيماء :وانتى مش هتنزلى
فكه :انزل ايه يابنتى انتى ناسيه انى حامل ولا ايه؟ انا هقعد على الشط بس فى الحته القريبه دى شويه
شيماء :امال ايه فايدة الخروجه بس
فكه :اهو نشم هوا ونشوف البحر
شيماء :طيب خلاص انا كمان مش هنزل زيك
فكه :لا ياحبيبتى انزلى واتبسطى انا مبسوطه والله كده
شيماء :طب خلاص عشر دقايق بس واجيلك وراحت نزلت البحر
فكه بتفرش المفرش وبتغنى :
بين شطين ومييه عشقتهم عينيه ياغالين
عليا ياغاليين عليه ياهل اسكندريييه
صوت من وراها :اخص عليكى واهل مصر
مبقوش غاليين عليكى خلاص؟ تؤتؤتؤ مكانش العشم يا…فكه
فكه ملامحها اتجمدت الصوت ده مش غريب دا صوت بيكا ولفت بخوف ووقعت
لورا لما شافت بكر و٣ رجاله معاه وزحفت
لورا وهى بتترعش
فكه :بكببك
بكر :ايييه بتكاكى ليه مكنتيش متوقعه صح؟ فاكره انك لو فى قمقم هتبعدى علينا!!
فكه حطت ايدها على بطنها :بيكا انا دلوقتى ست متجوزه وحامل انتا عاوز منى
ايه سيبونى فحالى بقا
بيكا :سيبك من الفلوس اللى لهفتيها وهربتى وسيبك من دراعى اللى اتكسر واتجبس بسببك طب هروبك من الكانو ده
هيعدى كده من غير حساب؟ لا يافككوكتى بتحلمى
شيماء لمحت الرجاله مع فكه وشافت منظر فكه طلعت جرى
بيكا للرجاله :هاتوها
الرجاله مسكو فكه وقوموها وهى بتصرخ
سيبنى فحالى يابيكا حرام عليك
شيماء جايه من بعيد
سيبوها ياولاد الكلب انتو مين وعايزين منها ايه؟
بكر بصلها لقاها خارجه من الميه بهدومها
لازقه على جسمها وشعرها مبلول وعجبته
اوووى
بكر :الله عروسه البحر تعاليلى يابطه ومسك دراعها
فكه :بيكا الادى والله العظيم مارحمك
بيكا :ههههههه خوفت انا كده،، خدوها
وهجم على شيماء اللى بتقاوم فيه لكن من غير فايده لانها كانت زى العصفور بين ايديه..
فكه بتعافر مع الرجاله لكن مش قادره
طلعت مطوتها وقدرت تعور واحد وتهرب
من الاتنين التانيين وجريت على شيماء
بتحوش بيكا من فوقيها،،
بكر انتبه لها وقام مسكها من شعرها وفضل يضربها بالبوكس
فبطنها لغاية موقعت فى الارض مش قادره
تتحرك
شيماء بتصرخ عليها وتحوش فيه لاكن مش قادره واول مافكه وقعت سابها وراح لشيماء،، وانقض عليها زى الصقر
شيماء :بتصرخ وتقاوم بكل قوتها وتنده على فكه لكن فكه فعالم تانى
لكن بعد شويه فكه فتحت عنيها بالعافيه لقت بكر جمبها وهو بيتهجم على شيماء،،
والرجاله واقفين يضحكو،، ومره وحده
مسكت مطوتها اللى كانت جمبها وواحد من الرجاله شافها وجرى عليها،،
لكن هى كانت اسرع منه وغرزتها فجمبة بكر
الرجاله وقفو متنحين وبيكا مسك جمبه
وطلع المطوه وبيتكلم بالعافيه وزاحف
ناحية فكه وهى تزحف بعيد عنه وكل ده
والرجاله واقفين مذهولين من اللى حصل
رفع ايده وهينزل بالمطوه على فكه لكن
وقعت من ايده مره وحده ووقع على الارض.. وفكه مسكت المطوه وغرزتها تاني فقلبه
الرجاله رايحين ناحية فكه
فكه بضعف :استنو ….استنو هتستفادو
ايه هاه؛؟ هتستفادو ايه؟ ايه مصلحتكم؟ ولا حاجه فاكرين الكانو هيشكركم لما ترجعونى وترجعوله اخوه ميت؟ ابدا دا مش بعيد يقتلكم فيها
الرجاله بصو لبعض وبصو لفكه تانى
فكه :قلبوه وخدوه ارموه فأى خرابه
وهو عداواته كتير محدش هيدور عليكم
الراجل :والله بتتكلم صح احنا ايه يدخلنا
فى العوق ده
خله :بتقول ايه ياعم دا صاحبنا برضو
الراجل :صاحبى وصاحبك واتفرقو الصحاب
خله :يعنى ايه
الراجل :يعنى الكانو لايعرف احنا فين ولا
بنعمل ايه ولا ان بيكا معانا اصلا يبقا فكك
من اللى يشكك
خله بتردد :انتو شايفين كده؟
الرجاله :مفيش غير كده وشالو بيكا ومشيو بيه
شيماء بصت لفكه شافتها بتتألم و هدومها غرقانه دم
والرمل شارب من دمها كتير اووى
مسكت التليفون بتاعها وبتتصل بيوسف لكن رقمه مشغول حاولت كتير لكن
فى الاخر اداها مغلق و خايفه تسيب فكريه يرجعولها تانى
ولازم تمشى مسافه عشان تلاقى تاكسى
ومش هتقدر تشيلها،، والدنيا لفت بيها وبتبكى،،
وفكه غمضت عنيها واغمى عليها،،
جربت تجرها لكن مقدرتش فضلت تصرخ
بعلوا صوتها :
يااااااارب متخدهاش منى انا مصدقت لقيتها يااارب،، وقررت اخيرا انها
تسيبها وتجرى تجيب حد يساعدها
وفعلا سابتها وجريت لكن قلبها مشغول عليها
فى الورشه :
ولا يابريزه
بريزه :امممم
يوسف :ايه اممم دى جاك مو قولى يلا ايه
الحاجه المهمه اللى مرضتش تروح البحر
عشانها النهارده يلا دول كانو عاملين ساندوتشات مخ وكبده وبسطرمه يلا
بريزه :هه
يوسف :هه لا دا الموضوع كبير بقا ومسك
سلك لمسه فبعضه طلع طشاش،، ولا هتقول ولا اكهربك
بريزه :ياعم هقول وخلاص،، اصل امى النهارده عامله محشى ولحمه ضانى ههع
يوسف :اااااه يااابن الطفسه قولتلى،، وانا اقول ايه اللى يحوش بريزه من اكل،، كان
لازم اعرف انه اكل احسن منه،، طب ويامعفن دا سر عشان تخبيه يعني؟
بريزه :مش عاوز اقاطع ياسطى افرض حصلت حاجه والطبخه مكملتش اعمل ايه
انا يعنى
العيال الشغاله :ههههه خايفك تحسد المحشى ياسطى هههههه
بريزه :شايف شايف عشان متبقاش تحوشنى اهم ضحكو عليا وكل ده بسببك
طب والنعمه لاخلى امى تقول لامك انك بتضحك العيال عليا
يوسف :تانى امك طب وربنا منا سايبك ويوسف بيجرى فى الورشه وبريزه بيجرى
قدامه،، يبن الجزمه بقا انا تقولى هخلى امى تقول لامك بلعب معاك انا يلا يامعفن
امسكوه ياعيال والنعمه لكهربك يابريزه
بص انا مش باخد منك حاجه باليوميه اللى بتاخدها انا هكهربك بيها
بريزه خلاص يسطا سماح بالله عليك مش قادر اجرى تانى
يوسف :خلاص الله يحرقك غور روح، باقى اليوم اجازه روح اقعد جمب المحشى
بريزه :هييييه وجرى
يوسف :روح ياوقعتى السوده
يوسف طلع تليفونه يتصل بفكه وشيماء لكن لقاه فاصل شحن حطه على الشاحن
وراح قعد شويه وافتكر انه لازم يكلم
المعلم انور عشان يستعجل الطلبيةالجديده
قام فتح التليفون واول مافتحه التليفون
تن تن تن تن تن تن تن تن تن تن تن تن تن
يوسف :ايه ده ياترى مين اللى حاول يكلمنى كل ده وقلبه اتقبض اول ماشاف
شمامه حاول الاتصال بك ٢٠ من المرات
اتصل بيها بسرعه وهى اول مالقيته بيتصل
فتحت الحقنى يايوسف فكريه بتموت
يوسف سمع الكلمه دى وحس كأنه جسمه كله مشلول مش قادر ينطق ولا يتحرك بس عنيه مبرقه
شيماء :يووووووسف الحقنى بقولك،، وهنا يوسف اتحرك بسرعه واخد تاكس من على اول الطريق وخلاه ساق على اقصى سرعه ومسافت ما وصل شيماء كانت جابت اتنين رجاله ورايحين يشيلو فكه
كان وصل يوسف وصرخ وهو بيجري عليهم :
ابعدو عنها،، وجرى وشالها وحطها فى التاكسي وركب هو و شيماء معاها وطلعو على المستشفى،،
وطول الطريق يسأل شيماء حصل ايه وهى بس بتعيط ومش عارفه تتكلم ولا تقوله ايه
وصلو المستشفى واخدو فكه ودخلوها العمليات وشيماء ويوسف منهارين بره
يوسف يابنتى قوليلى حصل ايه؟
شيماء :طلعو علينا شوية شباب وكانو عايزين يغتصبونى وفكريه دافعت عنى
لكن واحد فيهم ضربها
يوسف :وبعدين؟
شيماء :مشيو لما فكريه عورت واحد فيهم
يوسف :بيضرب فى الحيطه بأديه الاتنين
ملعون ابو الشغل اللى خلانى اسيبكم تروحو لوحدكم، دى غلطتى انا غلطتى انا
الدكتور طلع من جوه جرى عليه يوسف بيسأله عن الحاله لكن الدكتور بيجرى ومردش عليه ودخل اوضه جاب دكتور تانى والاتنين جايين يجرو ودخلو عند فكه
يوسف شافهم واتسند على الحيطه والدنيا كلها لفت بيه
############
فى القاهره :
الكانو :امال الولا بكر فين مش متعود يغيب المده دى كلها وكل اما اكلمه يقولى مصلحه هتعجبك مصلحه هتعجبك وخلاص،، هو مقالكش يابه رايح فين ولا بيعمل ايه؟
العدوى :متسيبه يشوف رزقه مالك بيه مش يمكن اتفتحله باب رزق جديد الهى ربنا يرزقه ويبعد عنه البوليص وولاد الحلال يارب
كانو :هههههههه كل الناس تقول يبعد ولاد الحرام الا انتا بتقول يبعد ولاد الحلال
العدوى :هههه وهيعمل ايه هو بولاد الحلال مصلحته مع ولاد الحرام
الكانو :طب هروح اشوف اخبار الدنيا انا
عاوز حاجه
عدوى :لا لما تيجى ابقا اقولك سلام
الكانو سلام
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية عزبة فكه)
