رواية انكسار الياسمين الفصل السابع والعشرون 27 بقلم أمل مهدي

رواية انكسار الياسمين الجزء السابع والعشرون

رواية انكسار الياسمين البارت السابع والعشرون

رواية انكسار الياسمين الحلقة السابعة والعشرون

العدها واحد ميت يسلونها
على طول الوكت يحچولي نكات
روحي صعبة وعجزوا يضحكونها
مدري بيه الخلل متعلم عليك
مدري هيه الناس مدري شلونها
___________________
ياسمين _
فتحت عيوني بالجهه الثانيه من الصبه بالگاع كل جسمي يوجعني تحركت اريد أوكف اشوف
الدم تارس أيدي وعلاوي جوايه يگح مختنك بالتراب والدخان
وگفته تلمست كل جسمه ما بي شي الحمد لله
بس هذا منين الدم ما حاسه أيدي تنزف بيش انجرحت ما ادري
الناس تصيح والسيارات متفلشه
والصيطره ماكو لا سقف ولاصبات ولا مبين شي من المكان
حتى الجنود ماكو
شفت سيارتين مشتعل بيهن النار والناس تحاول تطفيهن
وهوسه الكل يصيح والناس تركض اللتمت من كل مكان
صحت رضى… ماكو رد
او ما اسمع على كثر الصياح والهوسه
وگفت الخبز مطشر ورضى ماكو
الخوف تملكني الناس تتراكض المضروب براسه والممد بالشارع
شلت علاوي بتك ايد لان أيدي الثانيه ما ادري بيش انضربت
مشگوگه من العكس للكف وتنزف
امشي منا واروح منا واصيح رضى وينك
زاد خوفي وبجيت من شفت ايد مقطوعه وواگعه بصف الصبه
لا ياربي دخيلك رافع يموت كل امله بهذا الولد
اتحرك بين الصبات ولكيته واكع بحالت إغماء واكو دم براسه من وره
باوعت محد بحال الثاني شفت بطل المي النجيبه يوميه محشور بين الصبه بمكانه
سحبته وغسلت وجها
شفته سحب نفس وتقريبا وعه
خليت راسه بحضني واحجي ويا
تقدم مني ولد أخذه من حضني ونيمه على السديه
ياسمين_ وين ماخذه…
_ ما رد عليه صاحبه گال انتي هم گومي ويا الإسعاف اجت
واخذ علاوي مني ويسكت بي جان يبجي
صعد بالبدايه رضى واني كعدت يمه وانطاني علاوي بحضني
وصعدو بعد واحدجريح مكسوره رجله
سدو الباب الخلفيه ونطلقت بكل سرعتها تدوي بصوت صفارته
العالي
بالبدايه ما كانت توجعني أيدي بس من صعدت الإسعاف
موتتني من الوجع وعلاوي بحضني يبجي وعيني على رضى
فتح عيونه بس ما يحجي كانه فاقد الذاكره من أثر الضربه
وصلنه المستشفى تلكونه ممرضين ودكاتره ركض يشيلون بالناس
اخذو رضى دخلو غرفه جبيره واني ورى امشي
الردها هوسه
كلها مصاويب من الانفجار وعلى كل واحد لمه مال ممرضين واطباء
دخلت ويه رضى
تلكتني دكتوره. تعالي خلاشوف ايدج
ياسمين _ عوفيني آني شوفي رضى
الدكتوره _ منو رضى وينه….
ياسمين _ هذا مضروب براسه
الدكتوره _ صاحت على طبيب وحجت ويا بالانكليزي
ورجعت عليه يله نزلي هذا الطفل اريد اشوف ايدج
باوعت الوحدي اتلفت هسه عرفو بالانفجار منو يجيني
وذكرت ظافر بجيت يجوز مات….
الدكتوره كصت ردان العبايه وضربت أيدي ابرتين بنج
وبدت تخيطها
من حسن حظج الجرح صطحي ما واصل للاعصاب
جان احتاجيتي عمليه
كلملتني وركبتلي مغذي وابره بداخله
عيني على رضى ضمدو براسه ونطو سرير
گال الطبيب هذا يبقى تحت المراقبه عنده رجه بالدماغ
كعدت على السرير رضى متمدد دايخ من أثر الضربه واني أيدي مشدوده
وعلاوي شبع بجي من الخوف ونام
اباوع واتفقد الجرحى الجابوهم ولا عسكري بيهم گلبي ظل يم ظافر
الصيطره تفلشت والسيارات حترگت ودمرت معقوله همه كلشي ما بيهم
فات ممرض من يمي…. سالته
ياسمين _من رخصتك سوال
الممرض _ اي تفضلي
ياسمين _هم اكو عسكريين ويه الجرحى مال الانفجار
الممرض _ ما اعتقد العسكريين ياخذهم المدينة الطب مخصصيلهم طابق الهم
هنا بس المدنين
ياسمين _ اشكرك…
الممرض _ ممنون
وين مدينة الطب حتى ما ان دلها وذكرت من باوعتله يتمشه راجع للصيطره
آخ يا حظج يا ياسمين هسه لو باقي لكم دقيقه واگف يمي جان…..
استغفر الله
انشالله مابي شي وخطيه صاحبه أمير لو الولد الباقين كلهم
عدهم اهل وعوائل
بين افكاري وهواجسي المخوفتني
اشوف رافع دخل وإيمان تدفع بالكرسي وگفت والعبره بصدري
تلگيتهم
إيمان _ بس شافت رضي مشدود راسه صرخت وحضنته
ورافع لزم أيدي وعيونه بعيوني احسه گوه لازم دموعه
حضنته لا تخاف بس أيدي مجروحه
سحب إيمان من رضه وحضنه هنا شفته نزلت دموعه وبجه بقهر
ويبوسه
خما متاذي بابا
رضى _ زين بس دايخ شويه
طلعنه للبيت بنفس اليوم جروحنه بسيطه
وبالي كله يم ظافر
وكل عقلي ظليت لليل عيني على الباب انتظره يجي
هو گال العصر اجي اقابل اخوج…. ليش ما اجه
تمنيت يجي ولو بس اطمئن عليه سالم مابي شي
ظليت ليلتي أتگلب والم ايدي
وألم گلبي المايهد أ…. واخرها استسلمت للنوم
كعدت ثاني يوم راسي ما أكدر اشيله لزمتني بارده وجسمي ينفض
حرارتي مرتفعه
واون من ايدي
راجحه _ اسم الله عليج يمه
بردانه….
ولك رضى جيبلي بطانيات اغطيها
رافع _ مشيت الكرسي الغرفة ياسمين اشوفها…
هاي شنو شدعوه هلكد مغطيها……
راجحه _ غير بردانه وندفيها
رافع _ تلمست جبينها مصخنه نار
ياسمين تسمعيني……. ماكو رد
إيمان امشي انتي ورضى اخذوها للطبيب
إيمان _ وين اكو طبيب هسه خليها العصر
_ لعد جيبي خاولي ومي اسويلها گمادات كشفتها خالتي خانگتها جايبه كل بطانيات البيت وذابتهم عليها
ظليت يمها اسحب بالحراره إلى أن فتحت عينها…..
الشي الظل أبالي ما تحجي بس فاتحه عينها بتجاه الباب
كانه تنتظر احد
ياسمين
للعصر گوه گدرت امشي اخذتني ايمات للطبيب طلع الجرح ملتهب
ضمده ونطاني ابر وادويه كومه
أكثر من أسبوع اني بالفراش اكعد بس حتى اخذ الدوه واكل شويه
كل يوم يمر وظافر ما يجي. تزيد الكآبه عندي
وگلبي يگلي بعد ما اشوفه
رافع يجي يمي واحس بعيونه حجي بس ما يحجي
من بعد ١٠ ايام شويه تحسنت رحت اني وإيمان للطبيب يشيل الخيط من ايدي
كلنه وطلعنه
ياسمين – اريد امشي على الشارع اشوف مكان الانفجار
إيمان _ والله بطرانه بيج حيل تمشين مو تگولين مريضه……!!!!
ياسمين _ اذا ما تردين تجين ارجعي للبيت اني اروح
إيمان _ وشگول الاخوج هسه الگا واكفلنه بالباب
ياسمين _ مشيت وعفته تحجي….
إيمان _ لو ادري شعندج ترحين هناك…. انتظريني
ابتليت بيكم بلوه من خرب حظي الگواد الجابني على رافع واخته
ياسمين امشي گدامها
وهي تمشي ودردم ورايه
وصلت قريب على الصيطره مرجعيها مثل قبل ومنظفين المكان
باوعت اربع جنود واكفين يفتشون السيارات
ركزت بوجودهم ولا واحد شايفته قبل
ظليت اتقدم الى ان بينت گدامي لوحه جبيره بيه صور ثلاثه
شهداء ركزت بيهم
صورة ظافر من ضمنهم
وگفت ارجف كتمت صوتي بأيدي بجيت ما تحملت اشوفه
حتى بصورته مبتسم
إيمان _ شبيج تبجين…. متحجين
باوعت بتجاه ما مركزه نظرها خطيه ذوله الاستشهدو بلانفجار
والله خوفتني عبالي بيج شي
امشي يمعوده هاي قسمتهم شبدينه تبجين عليهم …
تفر بأديها…
هاي لو رايح واحد من عدنه هم نلگه احد يبجي علينه
رجعت مهدود حيلي مامصدگه كل شويه تنعاد صورته
من عافني يضحك فرحان
واتخيله بطوله وقيافته بملابسه العسكريه المنطيته هيبه اكثر
وهو مشه لأجله…..
امشي وامسح دمعه تنزل الثانيه ما عندي صيطره على جسمي
احس بصدري صرخه مخنوگه
وصلت البيت دخلت غرفتي نزعت حجابي التفت على حيطان الغرفه حسيته طابكه على انفاسي إلى ان وصلت الكنتور بي مرايه على طول الباب
شفت نفسي بيها
ملامحي باهته شبه ميته
ظافر فتحلي باب للأمل تكفل ابني اليتيم
اختارني بدون ما يسأل عن حياتي شلون كانت
ثنينهنه جنه مكملين البعضنه
هو محتاج ضحكة علاوي وزوجه بسيطه واني جنت محتاجه أب
الابني… ورجال يكفيني هم العيشه وبهذلتها
همست ويه نفسي احاجي…
ليش طلعت بحياتي
ليش عرفتك حتى ينكسر گلبي
حتى جرحك يوجعني كل ما اذكرك
حجيت بوجع…….
اشعدهه الدنيه طالبتني بثار
ليش يوميه تكسرني
ماكافي تعبت…. والله تعبت
صرخت من گلبي….. آخخخخخ يمه… آخ يمه
گلته واني منهاره بجيت بقهر بوجع بدموع من دم گلبي
احس نار بداخلي تغلى ليش كل هذا يصير بيه
راجحه _ يمه بنيتي اسم الله عليج
ماده اديها بالهوى وتتلمس إلى أن وصلتني وأخذت راسي بحضنها
وبدت تنشر وتقر أ آيات
واني ابجي منهاره مثل طفل تايه
على صوتي رافع وإيمان ورضى كلهم التمو عليه
رافع _ شبيها منو محاجيها
إيمان _ محد محاجيها هيه من شافت صور الشهداء بالصيطره
لهسه تبجي
رافع _ وشوداها للصيطره ماكو غيرج
إيمان _ هيه راحت حتى اسألها ركظتني وراها
رافع _ اقتربت منها….
سحبتها بحضني
امسد على شعرها….. هدت شويه
اني ما ردت اگلج بالخبر لان جنتي مريضه
ادعيله بالرحمه هو وجماعته مو قسمتج المستقبل گدامج
بعدج زغيره
ياسمين _ اني احس روحي عجوز بهذا عمري وشبعت كفخات ودروس وكانه الدنيا ما عدها غيري تعلمه
تدري رافع…
احجي وعيوني تباوع للفراغ…
ظافر گلي أشياء اني ما مفكره ولا متحضره الهن
رافع _ اشلون يعني
ياسمين _ ظافر حب علاوي واني حبيت حبه اله
وعدني يصيرله اب ويوفرله الحياة الكريمه اليحتاجها كل طفل
تخيل ما مفكره بالمدرسه هو حسب عمره وگال السنه الجايه يسجله
جان يحجيلي اشلون راح يعلمه ويوصله وشنو يجيبله
صنعلي حلم وعيشني بي
انسان غيور وشهم ويحب الأطفال بس الله ما قسمله
كان وجهي نحس عليه ما تهنه بشبابه
رافع _ هذا أجله لا تحملين نفسج الذنب
_ ليش الإنسان الزين ما عنده حظ بالدنيا ………!!!
رافع _ مو شرط
ياسمين _ التفتت عليه لا شرط….
انت… واني وظافر…. ولتفتت على خالتي
وامي وخالتي
رافع _ نزل راسه حسيته مقتنع بس يغلطني
كل واحد ياخذ نصيبه واذا احنه عدنه الستر والصحه اكو ناس مرتاحه والله ميسرها الهم بس تتحسر على يوم تنام بدون ألم
الحمد لله على كل شئ
ياسمين _
تعدت الايام واني كلشي بيه تغير
اخذت على نفسي عهد لازم أحقق المشروع البراسي
مستحيل اعلق مستقبلي على شخص
اني أحقق الاريده واسعاله عندي علاوي ورافع وخالتي ورضى
همه ذوله كلهم حياتي
رايحه جايه بالغرفه افكر شلون ابدي
الفلوس الجمعتين صرفتهن طبيب وعلاج الايدي
الموبايل بيدي يوميه اتصل على ام رغد اختفت الرقم ما يتحصل ما ادري غيرته لو شنو ما اعرف
راجحه _ ما حصلتيها ابد
ياسمين _ يطلع مثل مشغول وينگطع يمكن مغيرته
حسن _ خابر يها على الانترنيت احسن تحصلوها
راجحه _ وهذا شنو الانترليت الكلته دعلم عمتك ما تشوفها
اشلون محتاره
حسن _ انترليت شنووووو انترنيت طريقه جديده للاتصال لا تصرفين رصيد ولا دوخه
ياسمين _ اني ما احجي ويا بس انجبرت اريد افهم شلون اتصل بالانترنيت
يعني شلون وين الكا اريد اتصل
هاي محلات مفتحه بيها حاسبات وانترنت نروح ونتصل اذا جاوبت خير على خير ما اجاوب نترك الها رساله
ياسمين _ وديني عليهم
حسن _ المحلات كلها ولد اشلون تدخلين بنصهم
ياسمين _ عادي مو جنت اوكف بالشارع وابيع الخبز واحجي ويه هذا وذاك
وديني على محل
ثاني يوم اخذني المحل بي هواي حاسبات ومسوي قواطع بينهن
حتى يفصلهن عن بعضهم
دخلت المحل هوسه أكثرهم يلعبون العاب وسماعات باذانهم
شغله ما ةشايفتها قبل
حاجيت الولد المسؤل عن المحل انو عندي اتصال
كال عادي على تطبيق سكايب
نزل الرقم ودك وهم يدك وبعدين يقطع ظليت ادك إلى أن ياست
كلتله اترك الرساله عادي
گال اي اكتبي اي شي تردين
وفعلا كتبت رساله مطوله وتركتها
انتظرت يوم يومين ماكو وبعدين أيست لازم اشوف غير طريقه
زارتنه اليوم ست هاله
هاله _ ولو جيتي متأخره بس والله ظل بالي يمج
ياسمين _ انتي تشرفيني باي وقت وذكرت أخوها الدكتور
دكتور امجد اشلونه
هاله _ الحمد لله حتى سالني عليج اخاف متاذيه
بس لا الحمد لله زينه اشوفج
هاله _ ششوكت ترجعين تخبزين
راجحه _ ياخبز بعد ما تكدر اديها تاذيها
ياسمين _ طلعت ايدي شافتها
هاله _ اعتذر ما ادري بيج متاذيه
الحمد لله شويه احسن
كالت راح اجيبلج ادويه من اخويه لا تشترين
راحت ووره يومين اجتني جايبه مسكنات وكبسول التهاب
وعصارات كلشي ولفاف كلشي جابتلي
هاله _ عندي شغله الج حلوه ومريحه تشتغلين
ياسمين _ الله وايدج بس اني خبز بعد ما اخبز رافع ميقبل
هاله _ لا مو خبز شغله بعيده عن الخبز
ياسمين _ گولي ست
هاله _ والدتي مره كبيره بالسن ومقعده محتاجين وحده تعتني بيها
توكلها تشربه تسبحها تنطيها الدوه بنتظام
تقوم بكل واجباتها
كانت عدها معينه افريقيه وخلص عقدها وما قبلت تجدده سافرت
واني اريد وحده ثقه ولهذا ختاريتج
الراتب خير من الله والجمعه الج اما بقية الاسبوع ترافقيها
والبيت كبير وراقي وبس د. امجد وزوجته هم دكتوره ما عدهم اطفال
شگلتي……
صراحه اني ما ناويه اشتغل بس اذا غيرت راي انطيج خبر
هاله _ كيفج انتظر منج رد….. بس والله ترتاحين فكري زين
ياسمين _ الله كريم
ياسمين _
ما الي نفس اشتغل اي شغله لازم أدبر فلوس وافتح المشروع البالي
كافي ذله ومهانه تعبت
احجي واتصل على ام رغد يفصل وارجع اتصل
رحت على محل الانترنيت وفتحت الرقم نفس الرساله موجوده محد فاتحها
أيست لازم صاير شي لام رغد مو من عادتها تطول هلگد بدون ما تتصل وتسال عني
اليوم طلعت اني اسوك اخذت علاوي بأيدي وامشي بين المحلات
بالسوگ
ام حسين _
ماكو مره تجيني الا اساله بلكت اعرف هاي البنت وين اهلها
كاعده وعيني على الرايح الجاي وشفتها بين الناس بيدها علاگه والأيد الثانيه لازمه ولدها خطيه ولا يفارگها
بسرعه تمشيت عليها….
لزمت اديها
الحجيه _ وينج جا مو گلتلج مري بيه ليش گطعتي
ياسمين _ التفتت الحجيه….. ابتسمت
مرحبا حجيه
الحجيه _ هله ومية هله تعالي اريد اشوفج وسحبتني من ايدي
ياسمين _ اني هم بصراحه جنت ناويه اجيج عندي حجي وياج
الحجيه _اي گولي اسمعج
ياسمين _ رايده افتح محل مال قماش
الحجيه _ عقدت حواجبي مستغربه….. وينننن
ياسمين _ هنا بالسوگ… واريد منج تساعديني
الحجيه _ عيوني الج گولي شتردين
بس لا تفتحين گبالي وتاخذين معاميلي
ياسمين هههههه لا اشلون اسويها
اني ردت اعرف المحلات ايجارها شگد وشكد فلوس تكفيني
افتح محل على گد الحال
الحجيه _ انتي گوليلي شگد عندج واني اجاوبج
ياسمين _ ها ما عندي بس أبالي اخذ قرض من المصرف واسدده
من المحل
الحجيه _ جا عفيه عليج دبري ٥ ملايين وانه اسويلج محل
ياسمين _هيج مثل محلج يصير
الحجيه _ لا مثل محلي يرادلج هواي انه حالي كله بهذا المحل
بس ابدي بالتدبري وهو يكبر ورى رزق رب العالمين
ياسمين _ انشالله…
رجعت للبيت فرحانه حسيت حلمي بده يتحقق
قبل فتره رافع كال اخذي قرض على راتي اذا يفيدج
بس اني جنت رافضه هاي الفكره لان هو راتبه قليل وكان عندي امل بام رغد ترد عليه
واطلب منها حتى لو تدايني …
ثاني يوم اخذت رافع للمصرف وقدمنه استمارة قرض
وبما انه راتب رعايه گالو ما يستحق أكثر من مليونين
خابت كل آمالي رجعت كل سعي بتحقيق هذا الحلم بائت بالفشل
كلش انقهرت
إيمان _ اشتغلي سنه عد ست هاله تره خوش راتب تحسبلج ولمى منهم
ياسمين _ فكرت شويه ورافع يباوعلى….
رافع _ انسي موضوع الشغل
ياسمين_ باوعتله مو سنه محتاجه ست شهور
رافع _ كافي ياسمين اي شغل وحدج ماكو
سيد علي _
نايم حسيت انجر مني موبايلي فتحت عيني زينب تگلب بي
سحبته من ايدها
انتي التالي وياج مراح تبطلين شك…..!!!
زينب _ منو هاي ام حسين وشعدك وياها
السيد _ لج بابا هاي معميله من زمان تاخذ مني قماش وبعدين مره ابگد امي
زينب _ هذا الحجي تقنع بي نفسك اني ما اصدك الا اسمعها انطيني الموبايل اتصل عليها
السيد _ نجوم السما اقربلج كافي مخجلتني ويه الناس
زينب _ انت واحد اناني وخاين
السيد _ اول شي نصي صوتج لا تصيحين بوجهي
وثاني شي عيب تگولين خاين اشوكت خنتج اني
زينب _ هاي ام حسين شنو علاقتك بيهههه أحجيلي تريد تزوجك
تصرخ بعصبيه….
السيد _ لا انتي تخبلت رسمي يا زواج……
زينب _ انت مثل ابوك مترتاح الا تزوج الثانيه الخيانه بدمك
اشلون خان عمتي ويه امك……
سيد علي _ قبل ما تكمل صطرتها راشدي وكعتها بالكاع
من ذكرت سيرة ابويه وامي ما اعرف اشصار بيه
انهارت تصرخ وتلطم…. صوتها وصل بره دخلت امي والجهال وصارت هوسه والكل يبا وعلى
اميمه _ شبيك وياها
زينب _ ضربني اني ما ابقا بعد ويه ابنج
اميمه _ لا سيد ليش ضربتها مو حرام……
السيد _ كافي تعبت اجي اريد ارتاح ساعه تشتغلني تحقيق
لو تفتش بالموبايل
أگلها….
يابنت الناس بطلي غيره راح تهجمين حياتنه…. ما تسمعني
هسه حجت على أبويه…. استغفر الله واتوب اليه
اني اتصل باخوج اريد اشوفه يرضه بالحجي الحجيتي
اميمه _ اشحجت غير تگول….. .
زينب _ شنو جذبت
ابوك خان عمتي ويه امك……!!!!!
السيد _ وبعدج تعيديها…..
اميمه _ خلفله عليج شنو اشسامعه جان يتمعشك بيه قبل الزواج
مو عيب هيج تحجين عليه وعلى عمج وهاي اني الادافعلج
واغطي على سوالفج ويه السيد
زينب _ اني ما حجيت غلط هذا الواقع
سيد علي _ خلص آني فاض بيه بعد ما اتحملج وصلت بيج تحجين على سيد حسين الناس كلها تحلف باسمه
وتهمين على امي
تعديتي حدودج
اخابر مهيمن واشوف يقبل بتصرفاتج
اميمه _كافي سيد لا تتصل بمهيمن ولا تكبرها صالح مرتك
وكافي مشاكل
ياسمين _
فكرت بكل الحلول ما دبرتها
فضطريت أأجل مشروعي إلى أن الم مبلغ وابلش
ما كان كدامي غير افكر بعرض ست هاله واشتغل كم شهر واجمع مبلغ
حتى افتح بي المحل
قنعت رافع بالگوه
ونطيت خبر الست هاله على موافقتي
هاي الفتره انشغلت العالم بدخول داعش وحتلاله للمدن الغربيه والشماليه
صقطت الرمادي وتبعتها تكريت واخيرا…
الموصل صقطت
ارتكب داعش ابشع جرائمه بحق المدنين العزل وبالاخص المسيحين والآيزيدين
سلب أموالهم واخذ نسائهم وأطفالهم سبايا
وقام بمجازر تقشعر منها الابدان وتدمي جبين الإنسانيه
تحت مسمى الدين
وراية الاسلام
فما كان على السيد السستاني زعيم الحوزه الدينيه الا ان يعلن الجهاد الكفائي ضد الدواعش المرتدين الكفره
حسن _
اجه من بره مهتم…..
الدواعش احتلونه من البارحه الاذاعات والناس كلها تحجي
راح يطبون بغداد يحتلوها واصلين ابو غريب
رافع _ هاي اشوكت
حسن _غير انته كاعد بالبيت
اطلع واسمع الجوامع تكبر السيد علن الجهاد الكفائي
السوگ صاير هوسه الشباب كلها راحت تطوع
إيمان _ ياساتر يا ربي معقوله داعش يطبونه لعد الجيش شنو شغله
ما يكدرلهم همه غير على كثرهم مثل الدود اجونه
ياسمين _ خرب حظج ياسمين ادور عليه داعش
حسن _ آني راح اطوع واعدت جماعتي راح اروح انسجل
بالحشد
إيمان _ يبو عليج إيمان وين امولى تروح للموت برجليك
حسن _ يطوني سلاح وراتب ليش اموت……!!!!
رافع _ تطوع يعني تقاتل لا عبالك لعبه يعني موت وحياة
حسن _ اروح واشوف……
اجو جماعته وطلع راح يطوع….
إيمان _ ظلت تبجي ما راضيه
راجحه _هسه يشوفها صدك ويرجعلج هذا شايف حرب شايف
ضيم
ايمان_ ماتحجي ويا انته مو ابو ما تخاف عليه
رافع _ ليش امنعه ديگولون جهاد عوفي بلكت يسويله شغله بوجه حظ
احسن من السربته ويه الهتليه والمصقطين جماعته
بعدين… كلشي بأمر الله سبحانه وتعالى
قل لا يصيبنا الا ما كتبه الله لنا
ثاني يوم كاعدين بالمطبخ
اندكت الباب…. طلع رضى يفتحها
عيني على الباب من انفتحت
شفت سياره سوده راقيه بالباب
رجع رضى… باوعلي ياشر بأيده
****************************