رواية انكسار الياسمين الفصل الرابع والعشرون 24 بقلم أمل مهدي
رواية انكسار الياسمين الجزء الرابع والعشرون
رواية انكسار الياسمين البارت الرابع والعشرون
رواية انكسار الياسمين الحلقة الرابعة والعشرون
الشك عندج طبع
والغيرة حرفة
اظنها وياج ماترسه اعله ضفه
وحقج انتي انتي ومتتغيرين
الميت ميتي ياعمي واعرفه
استجواب من الصبح لليل
والتحقيق موزون ومقفه
حال زينب… والسيد..
______________
ياسمين _
فتحت عيوني كل ضني احلم
إيمان _ گومي عيني شمصخمه البارحه ابيت المديره
_ شنو شگلتي…..!!!!!!
_ المديره بالاستقبال كاعده وجها ما يگصه السيف
_ سرت بداخلي رهبه
گمت….
عدلت دشداشتي وغسلت وجهي ورتبت شعري ورحتلها
باوعت بالمطبخ رافع يتريگ
باوعلي بنظره يبست بمكاني وكانه يگولي اني مو نصحتج وحذرتج
صباح الخير
ست رفل _ صباح النور
_ تقدمت بتجاها اهلا ست شنو هاي المفاجاه
خير خو ماكو شي
_ ما اعتقد مفاجأه اكيد عرفتي شنو الجابني
_ لااااا خير….
اباوعلها وجها ثگيل…..
_ شنو بينج وبين أيسر……؟؟؟
_ مابيناتنه شي…. فاتحني بموضوع زواج واني بعدني افكر
_ ها يعني احتمال توافقين…..!!!!
_باوعتلها مستغربه سؤالها ورفعت راسي مستنكره تصرفها….
واحتمال أرفض….
_ عفيه عليج ذكيه ما دام ابالج ترفضين يعني تعرفين الفرق البينج وبين ايسر
_……….!!!!!
_ ها اشو سكتي….
ايسر يدرس بجامعه بروسيا دراسات عليا
_ اي وشنو يعني…
_ اشلون شنو يعني……!!!!
گدامه طريق طويل يادوب مدبر مصاريف دراسته وتره لو مو احنه كل شهر نحوله جان ما كمل
ارفضي لا تنطي امل انتي كل مقوماتج شنو تگدرين تفهميني…..؟؟؟
_ رجاءا ست بلا تجريح
ابنج هو الرأدني وهو الفاتحني بالزواج اني لا مفكره بي ولا بغيره
_ بس من حجه وياج رحبتي بالفكره ونطيتي امل والدليل بديتي تفكرين…..!!!!
انتي ما ترهميله ابد لا توكفين عقبه بمستقبله
تردين اعددلج كم الفوارق البيننج وبينه……!!!!
_ ارجوج ست كافي تهينين بيه
ولا تنسين انتي بيتنه………..!!!!
انتي تحجين وكأنه اني العرضت عليه الزواج
ترى البارحه من رجعت خابرني يتوسل ان اوافق
وقبلها بيوم گال اني واگف اباب بيتنه
انتو ابعدو ابنكم عني اني ما أوافق عندي طفل محتاجني
رافع _ ما رتاحيت الست رفل وگلبي يگول اكو شي
من الصبح جايتنه
وگفت ورى الباب وسمعت الكلام الدار بين ياسمين والمديره
حركت الكرسي ودخلت للهول
_ اطمني ست
ياسمين رافضه
مستحيل توافق على هيج زواج حتى لو انتو رايديها
كان غلط مني سمحتلها تدخل بيتكم
ما ادري بيكم تنظرونه بعين زغيره
وتفكروت بفارق المستويات
ومثل ما گالت ياسمين ابعدو ابنكم عنا
_ هاي هيه لعد اني شريد هشكل متفقين…
طلعت المديره
رافع ما حجه وياي بس نظراته كافي حجت البداخله
ظليت كاعده بمكاني العبره خانگتني كلشي بيه يشمت ويلوم
بيه….
امل بسيط مثل خيط الشعاع عيشني هذا الأسبوع بسعاده
كان حلم حلو تمنيت اظل نايمه ما اصحى على
صوت ايمان
دخلت عليه إيمان وابتسامة الشماته مرسومه بوجها
إيمان _ شنو قصتج هالايام كل ما تطلعين تجينه وحده وراج
يوم وحده على رجلها واليوم هاي على ابنها
تره محمد الله يرحمه ما صار سنه على وفاته شبيج
فلفلتي على الزواج
ياسمين _ باوعتلها والحسره البصدري احسه نار تجوي بضلوعي
الله لا يرحمه…..
محد دمرني غيرج انتي ومحمد عساكم لا تشوفون الرحمة بحياتكم…
إيمان _ شنوو….. ولج اشو صايره تجاوزين
وهمت رافعه ايدها تريد تضربني
ياسمين _ انتفضت من مكاني…
اشلون نفسج ماتلعب من كمية الحقاره والخبث والدنائه
البيج ما ادري
الله ينتقم منج ومن اخوج بگبره
لا تدخلين بيه عوفيني بحالي عوفينييييي ….. صحت بكل مابيه قهر
دگ الموبايل
التفتنه ثنينه على الثلاجه…
إيمان _ بختج بالتليفون جان نتفته الشعرج
فتحت الخط منو
ياسمين…
هاج عيني خوش انوب صديقات يتصلن
ياسمين _ بس گلت الو اجاني صوته
أيسر _ امي جانت يمكم……..؟؟؟
ياسمين _ ارجوك بعد لا تتصل اني ما اوافق
ردت أغلق الخط…. گال
أيسر _ بروح امج لا اسدي خليني احجي وياج
ياسمين _ اول مره واحد يحلفني بروح أمي نزلت دمعتي
وإيمان مقابيلي فاتحه عيونها تراقبني
رجاءا أيسر اخويه ما موافق ولا اني روح قسمتك مو يمي شوف غيري
أيسر _ شحجت امي وياكم…..
ياسمين _ اشحجت…..!!! گول شنو الماحجته
الوالده كفت ووفت
الله يوفقك وتلكه بنت الحلال التناسبك اتمنه بعد ما تعب نفسك وتخابر
وسديت الخط…..
إيمان _ تفر بايدها اخذت الموبايل وراحت
مرت اربعة ايام…
العصر كانت طافيه الكهرباء طلعنه كلنه بالطرمه كعدنه
اندكت الباب…. فتحها رضى ورجع
بابا ولد يريدك
رافع _ حرك الكرسي بايده للباب
تفضل….
_السلام عليكم اقدملك نفسي ايسر
_اهلا وسهلا
ولتفتت أشرت الياسمين والإيمان دخلو جوه
إيمان _ انهجم بيتج جاي وراج يلمسعده افرحي
وگعتي على راسه ابن العالم
ياسمين _ عفتها ورحت اسمع شعنده جاي
كعدت قريب الباب
أيسر _ اني جاي اطلب ياسمين على سنة الله ورسوله
رافع _ آسف اگلك ما عدنه بنات للزواج
أيسر _ اني ما ادري امي شنو حجتلكم بس اتاكد القرار قراري
واني راح أخذها واسافر هناك أقدملها وحتى تكمل دراسه
وابنها اني مسؤل عنه
رافع _ تصور بهاي السهوله تريد تأخذها وتغربها واهلك ماراضين
انت بعدك ما عايش الحياة وصعوبتها
لان اهلك بظهرك سانديك نصيحه لا تخالف كلامهم وراح تلگه الأحسن من ياسمين روح سافر والله يوفقك
أيسرحاول شكد يقنعه الرافع ما گدر……
ورافع اكد له حتى لو اهلك بنفسهم اجو يخطبون ما ترهم
انتو من عالم واحنه من عالم
طلع أيسر مأيس من رافع
واني بمكاني كعدت احس بكسرة خاطر نزلت دموعي بحرگه
طلع رافع وشافني بصف الباب ابجي بس هو الوحيد اليفهم عليه
اخذني بحضنه يطبطب على كتفي
رافع _ لا تبجين بويه
انتي غاليه الميعرف قيمتج ما يستاهل يوصل لذيال ثوبج
ياسمين _
ونگلبت صفحه من صفحات الانكسار بحياتي
اعرف في قرارة نفسي ان الفارق الاجتماعي والمادي راح يكون عقبه كبيره بحياتنه
وحتى مع أمنية قلبي ان يتحقق هذا الزواج عقلي كان يرفض ويقف حاجز أمام رغبتي
رفض رافع كان متوقع بالنسبه الي حسيته ما يريدني اخوض هاي التجربه لان راح تتعقد حياتي اكثر ويمكن تفشل
فحسم الموضوع من البدايه يدري بيه امشي ورى بثقه عمياء
رغم ما حجه ويايه لحد الان
واني ختاريت الابتعاد لان ما عندي هاي القوه أن أواجه هاي الفجوه الاجتماعيه الواضحه بيني وبين أيسر
سيد علي _
بعد ثلاث ايام طلعت زينب للبيت نفسيته تحطمت من عرفت الطفل مات وتصيح من وجع بطنها
واحنه للان ما گلنالها بعملية العقد
احساسي بالذنب اتجاها لان تأخرت عليه زاد همي وملامه نفسي
ان اني جزء من الاسباب الضيعت طفلنا
اوليتها كل اهتمامي وعنايتي
صارت هيه شغلي الشاغل كل أسبوع أخذها المكان
أهلها جانت كل سنه تشوفهم هسه مرتين اني عايف شغلي واخذها للنجف
التفتت البيتي والحياتي
توقفت عن البحث عن ياسمين هاي الفتره
حاولت اعوض زينب شكد ما أكدر من اهتمامي
بس هوس الحمل كان ملازم زينب كل شهر تسويلي مناحه اريد اروح للدكتوره ليش ما حملت للان
حاولت افهمها أكثر من مره عدنه ياسمين وليث وغيث نعمه واني مكتفي
ما فاد تعبتني
وبيوم فاتحتها انو بعد ما يصير عدها طفل خطر على حياتها
خلص لازم تستسلم للأمر الواقع وتقبل يقضاء رب العالمين وقدره
بالبدايه انهارت تبجي ونفسيتها تعبت
بعدين بدت
تهمل اكلها وهملت صحتها وهملت نفسها هاجس الخلفه مصيطر عليها
انصابت بفقر دم حاد
اول مره دخلت المستشفى كان نسبة الدم ٥ حطولها بطلين دم
ورجعنه على أمل تعوض الباقي بالاكل
نصحوني اغير الها جو البيت لأن نفسيتها تعبانه
اخذتها للشمال رغم كانت الضروف صعبه تفجيرات وغتيالات
تركت شغلي بيد العمال والجهال امي احتارت بيهم
اسبوع ورجعنه وهيه هم رجعت كما كانت اهملتني واهملت نفسها
وبده تقصيرها واضح بالبيت حتى اتجاه اولادنا
وامي شايله الحمل كله
مرت سنه وبيها وما تسوء اكثر
واني خلص صبري بديت احاسبها ونتعارك وصوتي يطلع خارج غرفتي
وامي تهديني وتسكتني
السيد_ صار سنه كلشي سويتلج تركت شغلي وكابلتج طلعتج
ونستج عالجتج
تحملت اهمالج الهنا وكافي اصحى أطفال ما اريد عدنه ٣ خير وبركه
زينب _ انته وحيد وردت اجيبلك ولد يسندوك ويساعدوك
السيد _ وهاي جبتيلي ثنين كافي الله سبحانه وتعالى ما راد اكثر واني راضي بقسمته
التفتي النفسج اني تعبت مالي وحلالي بيد الغربه
اشلون اعوفه واظل ابجي وياج…….!!!!
زينب _ اريد اسوي عمليه افتح العقد لان احس نفسي حالي حال اي غرض بالبيت
السيد _ هذا اشلون منطق عندج جهال محتاجيج ربيهم واني الأرجع تعبان بحاجتج تتلگيني تهونين تعبي كافي زينب تعبتيني
بعدين الدكتوره كالت الحمل بي خطر على حياتج
زينب _ واني كلت اريد افتح العقد واسوي طفل والا
السيد _ ظلت تلح واني منطيها اذن الطرشه احسها مريضا نفسيا بهوس الحمل والأطفال تحس بنقص
و بيوم گالت وديني يم اهلي ابقى يمهم ارتاح
واني ما مانعت
عفتها على راحتها راحت وتركتني وتركت الاولاد امي محتاره بيهم
فات اسبوع والثاني والثالث ومن اتصل تگول اتركني ارتاح كم يوم
من بعد شهر اتصل عليه مهيمن يعاتبني اشلون ما تجي الزينب وتشوفها
السيد _ كل ما اتصل تگول اريد ارتاح خليها على راحتها
مهيمن _ زينب بالمستشفى سوت عمليه
السيد_ شنو ليش اشبيها….
مهيمن _ شنو شبيها….!!!! غير انته تدري بيها وجايبها حتى تسوي العمليه
السيد_ يا عمليه….!!! انطينياها اذا يمك
مهيمن _ ما تكدر تحجي وياك حالتها تعبانه
السيد _ ظل فكري يمها بس حلفت يمين اذا البالي صحيح يا زينب الا نهايتج اليوم…
صعدت سيارتي وطلعت للنجف…
وصلت المغرب گبل رحت للمستشفى
وهناك عرفت مسويه العمليه فاتحه العقد
وسائت حالتها بسبب المضاعفات بحيث احتاجت ثلاث بطاله دم
وبعدها اضطرت الطبيبه تسويلها عمليه ثانيه ترفع الرحم الها
باوعتلها منتهيه عمليتين كبرى بأسبوع واحد
السيد _ هسه شنو الستفاديتي
صحتج راحت شنو جنتي تتأملين يسولج الاطفال
مهيمن _ شدعواك علي هيه بيا حال وانته تلومها
السيد _ اذا زوجتك خالفت كلامك وجاهلتك وسوت البراسه
شسوي…..!!!
مهيمن _ شحدها الا تطلع من ملة محمد
السيد _ واختك سوت كل هذني بدون علمي وهاي هيه يمك خلي تحجيلك
مهيمن _ شنو يعني انته ماعندك علم بيها
السيد _ اختك استغفلتني وسوت البراسه والمره التشتغل من ورايه
ما تلزمني….
فيما الله….
مهيمن _ انطي مجال نتفاهم عليييي
السيد _ هواي انطيت مجال صار أكثر من سنه حياتي جحيم
وهامله بيتها وأولادها وهاي النتيجه
طلعت أعصاب ركض ورايه مهيمن راد مني ابقى ما رضيت
رحت لأمير المؤمنين
صليت وكعدت اتامل وافكر كلشي عندي كلشي املك المال والأصل والأولاد احترام الناس
بس ما مرتاح ….
ابويه نفس الشي جان ويه بنت عمه ما مرتاح وما شاف السعاده الا من أخذ أمي
احس كاعد تنعاد الايام ويايه
رفعت راسي بانحاء الضريح ودعيت
آني ابنكم يابو الحسنين والله يعلم ماشي على مبدأكم وعقيدتكم
ما خالفت ولا ظلمت بحياتي احد غيرها وطالبها منك بحق جدي رسول الله
دليني دربها ولو بس تبريني الذمه….
ويه الفجر طلعت القبر والدي تعبان ونفسي مكسوره
كعدت يم راسه شكيتله حالي احسه يسمعني من احجي ويا
الدنيه حاربتني من عفتني لليوم
شسوي حتى ارتاح سيد …..
رجعت من النجف حتى خواتي ما شفتهن والموبايل كل شويه يرن
زينب…
واني قفلته خليها عند اهلها يحتارو ن بيها
خل يفيدها العناد
فرعين عندي بسوگ الكاظميه واحد والثاني بالشورجه ماالحگ
حياتي عباره عن شغل
اطلع الغبشه ما ارجع للمغرب وخطر التفجيرات والحرايق الدصير يقلقني
فلوسي كلها بالسوگ
ارجع للبيت هلكان
اميمه _ مراح ترجع مرتك صار خمس شهور كافي تعاقبها
السيد _اني ما معاقبها آني اكتشفت جنت ما اعرفها
شگد راعيتها وخفت الله بيها
بس هيه ما قدرت كل هذا كسرت حجايتي وسوت البراسها
اميمه _ يوميه تخابر وتحجي ويه جهاله كسرة گلبي
رجعها الخاطري
ظليت تسع أشهر معاند إلى أن زارنه عمي الثاني وغصب عني رجعوها
بحجة تحبك وكل هذا سوته الاجلك خسرت صحتها وكلشي من اجلك
وفروها عليه
رجعت زينب للبيت ولاولاها بس مو زينب القديمه
متغيره هواي تتلاسن ويه امي وتخلق مشاكل وعصبيه
رجعت من شغلي بنهاية يوم متعب
ركنت السياره بالباب ودخلت اني كل مره اوگف شويه املي عيوني بمنظر شجرة الياسمين وهيه مفيه بوردها وعطرها بالبيت
صدت عيني على الشجرة لكيتها ذبلانه
اجيت اتفحصها ريحة نفط
انجنيت
السيد _ صحتهم كلهم بعصبيه
منو راش الشجره نفط وموتها
اميمه _ اني الصبح رشيت الاشجار جانت مورده وريحتها تفوح
السيد _ هاي الصبح روحي شوفيها ميته
اميمه _ صدك تحجي منو يعني يموتها
السيد _ اني اسأل
باوعت الزينب نظراتها غريبه وتبعدها عني
احجي زينب انتي
زينب _ اي آني موتتها
السيد _ من حرگة گلبي جريتها من شعرها وضربتها وهاي اول مره أمد أيدي عليها
اميمه _ لايمه على بختك عوفها وحلتها من ايدي
السيد _ والله اذا ما حجيتي هسه السبب الخلاج تموتيها
ما اظلين بالبيت هسه اتصل باخوج يجي ياخذج
زينب _ ما اريدها اكرها
اميمه _ لا يبين انجنت البنت ليش يمه هيه شجره
زينب _ رايح جاي يمر بيها ما شايفته اشلون يباوعلها
سيد علي _ باوعت آلامي دسمعين
ولج هيه شجره ليكون عبالج مره
زينب _ ادري بيها شجره بس تحبها انته
سيد علي _ انتي صايره ما تنطاقين يوميه كاعد تجاوزين
حدودج وياي لا تصورين افوتها الج هاي المره
عزلت روحي بغرفه وهجرتها
احس الأمل بروحي مات من ماتت شجرت الياسمين
ياسمين _
طلعت للسوگ بلكت الگي شغل وهم اسوگ للبيت
افتريت أكثر المحلات أصحابها رجال وقله اليشغلون عاملات عدهم
واني صارت بيه خوفه من المعمل والصارلي بي
مريت من يم محل الحجيه القماشه
وگفت اشويه اباوع الاقمشه آخ لو باقيه السياره كان هسه بايعتها
وعندي محل قماش مثل هذا……
لا مو مثل هذا ازغر بس اي على كد فلوسها
الله لا ينطيك حسن ضيعتها وضيعتني اتفرج على الاقمشه واحجي بگلبي
الحجيه _ ها حبيبه انتي مو الجيتيني ذيج المره تردين شغل
ياسمين _ التفتت شگد حبيتها هاي الحجيه وجها سمح وحلو تحجي
اي ذكرتيني
ام حسين _ شلون ما اذكر انتي وهذا وجهج الحلو
ياسمين _ تسلمين حجيه انتي الاحلى
ام حسين _ هذا وليدج…..؟؟؟
_ اي حجيه
_ يا شكداتج ومزوجه
_ گولي شگداتج وترملتي
_ يا يمه هذا يتيم الوليد
_ اي حجيه هذا علاوي
_ يمه فدوه شلون حلو
سالتني هواي عن اهلي وعن وضعنه واني اجاوبها وكل شويه تصفن ابوجهي
وجرها هااااا خوش
اشوفج تكلبين بالقماش وتحجين ويه روحج
ياسمين _ والله حجيه احب هاي الشغله وتمنيت افتحلي محل مثل هذا بس ما رهمت
الحجيه _ بعدج تردين شغل
ياسمين _ اي والله عندج احد يشغلني……؟؟؟
الحجيه _ اذا أسواق جبيره تشتغلين
ياسمين _ حجيه اني عد رجال ما اشتغل اخويه ما يقبل
ام حسين _ جا تعاليلي يجوز افتح محل قماش واحطج بي
ياسمين _ هههه الله كريم
اسوگت ورجعت للبيت
امشي واحسب اذا كل يوم اسوگ هلكد راح يخلصن الفلوس
العندي وارجع مفلسه اشلون يربي يمتى تفرجها عليه
دخلت البيت والعلاگه هدت حيلي حبيبتي امي من هاي تمرضت يوميه علاگة المسواك تهد كتفها وما تشتكي
من غير الخبز والمكينه
لكيت بنيه مرتبه كاعده بالاستقبال تسولف ويه خالتي راجحه
تبين تعرفها
ياسمين _ مرحبا
هاله _ مرحبا عيني
راجحه _ هاي ياسمين مرت المرحوم ابني
هاله _ الله يرحمه… ياعيني اهلا وسهلا
ياسمين _ اهلا بيج ست…..
احجي بگلبي رحت للمطبخ شربت مي عطشانه
الناس تترحم عليه ما يدرون شنو سوه بيه
واني لليوم اعاني من كسرته
إيمان _ لكيتلج شغل شنو رايج تخبزين للمعلمات
ياسمين _ يا معلمات….!!!
إيمان _ هاي الكاعده ويه امي تعرفها من زمان واجتي تريد خبر عبالها بعدها امي تشتغل
ياسمين _ صفنت اشويه افكر
بس الخبز وحرارة التنور شيحملها
إيمان _ بس بي فلوس ويامه اكلنه من ورى
بعد انتي كيفج
ياسمين _ فكرت اجرب… عجبني ابقى ما عجبني ابطل
اتفقت ويه ست هاله
على ثاني يوم أخذلها الخبز للمدرسه
جهزت العجين وخبزته أصبح وحسبت كل ثمان گرص بكيس
وصفطتهن بعلاگتين كبار
رافع كاعد گبالي يبا على بعدم رضى
ياسمين _ ليش ما راضي مو خالتي وامي جانن يخبزن
رافع _ هذا الشغل مو الج وابنج وراج لا تحترگين
ياسمين _ هيه شغله موقته بلكت الكي شغل احسن واعوفها
رافع _
رضى يروح وياج
طلعت اني شايله قسم وقسم بيد رضى وعلاوي گايدته بيدي
مشينه مسافه للشارع العام
وصلنه فرع المدرسه
كانو سادي بصبات منعا الدخول السيارات
لان هاي الفتره كثرة التفجيرات على المدارس والأسواق والدوائر الحكوميه
جعل من الدوله تتخذ تدابير امنيه وتحاوطهن الصبات الكونكريتيه
على الشارع اكو صيطره
مرينه من يمها وصلنه الفرع مال المدرسه الأكياس ثگيله
خليناها على الصبات ووگفنه نرتاح اشويه
كان الدوام بعده ما خلصان
ظافر _
أخيتي الله يساعدج
ياسمين _ التفتت ولد لابس عسكري يبين من الصيطره جاي
ويساعدك
رجع سأل
_ هذا الخبز تبيعو مو
ياسمين _ اي بس موصيني عليه
_ رحمه للبطن الشالتج اريد كيس واحد اريد اتريك
ياسمين _ من گال للبطن الشالتج سحبت واحد ونطيته
ولو ما ينطيني فلوس هم اقبل من ذكر امي
ابتسم وگال _اشكرج رحماله والديج انطيتها الفلوس ورجعت للصيطره واني احجي بكلبي
الله يستر عليها شگد شايله جمال…. وثگل
ياسمين _ وگفت سياره عاليه بصفنه وصاحبها نزل الجامعه وحجه
د. امجد _ هذا خبز بيت….؟؟؟
رضى _ اي عمو شوفه
د. امجد _ نزلت من السياره وفتريت شفت الخبز زين
التفتت للبنيه خطيه شابه زغيره وياها ذوله يمكن اخوانها
هذا شگد يطلع كله اريده
ياسمين _ حتاريت شگول اني جايبته للمعلمات
د. امجد _ زين نصه بيعي الي والباقي ودي الهن
رضى _ عمه انطياله وباجر نجيب للمعلمات اخاف ما ياخذنه
ياسمين _ اشو ظلت أبالي صدك لو ما أخذنه يبقى على گلبي
أخذه كله
د. امجد _ اي هسه تمام
انتي دائما هنا توگفين حتى اشتري منج
ياسمين _ ما ادري والله هاي اول مره
د. امجد ها لعد الله يوفقج
اخذ الخبز وراح
واحنه رجعنه نضحك
رضى _ هههه ما طولنه خمس دقايق وبعناهن
صدك گالت بيبي راجحه هسه يتلكنكم النايمات لظهر ياخذنه
ياسمين _ ههههه خطيه غير رزقنه عليهن
دخلنه البيت…
إيمان _ شو رجعتو بسرعه
رضى _ بعدنه ما وصلنه للمدرسه تفرهد هاي الناس ما تخبز
صدك نايمه للظهاري
راجحه _ لعد اشحجيت بيبي الوكت تغير والنسوان بعد ما تتعب روحها
أيمان _ لعد اشبي حظي ما يرتاح مرگضني ويا
راجحه _ انتي بالذات لاتحجين على الحظ
الله نصفج ورفع حظج برافع وله منو يتحمل لسانج جان من زمان رجعتي على گلبي
رافع _ كاعد اسمع
ابتسمت ودرت وجهي بس خالتي دواج…
رضى _ اي والله بيبي حتى يمكن هيه فگرت ابويه وتكسر….
كلنه ضحكنه…. گالها براءه
إيمان _ گم الله يطيح حظك تحجي على امك يا سافل
هو هذا حظي حتى ويه ولدي ما گعد
كله منج ظلي احجي عليه….
رافع _ تعال رضى منو اشترى منكم…….؟؟؟
_ واحد عسكري من الصيطره والثاني عنده سياره نزل اخذه
رافع _ ياسمين باجر اذا ترحين لفي الشال على وجهج بس عيونج طلعيهن
ياسمين _ صار
ثاني يوم ضاعفت العدد وجيسته وأخذته النفس المكان
تعبنه اني رضى لمن وصلنا
اتصلت على ست هاله اخذت قسم هيه والمعلمات والباقي خليته على الصبه
ظافر _ خليت الريوك كدامي وافكر بس بهاي البنيه شكد حلوه
ميثم _ لاحظت ظافر صافن غمزت الأمير….
اگلك هذا الخبز شگد طيب مال بيت مو
أمير _ اي والله مشتاق الخبز البيت شوكت انزل واكل من ايد امي
جان شتريت بعد ياظافر
ظافر _ باجر اذا اجت هاي البنيه هم نشتري
ميثم _ اول مره اشوفها هاي البنيه باجر تجي ظافر شتگول
ظافر _ اي هم اول مره اشوفها الله يستر عليها
لو شايفين شكلها اشلون حلوه وحتى هيئتها
مو مال وحده خبازه
أمير _ ليش شبيها الخبازه هم مهنه الضروف تجبر الواحد كلشي يشتغل
ظافر _ صفنت اريد تطلع من راسي ماكو بلكت باجر هم تجي واخذ منها خبز
العصر اند كت الباب
رضى _ فتحت الباب شرطي
_ ابوك موجود
رضى _ اي عمو…. بابا شرطي يريدك
كلنه انتبهنه
راجحه _ خير اللهم خير
رافع _ بيدي كلاص الجاي انطيته الايمان
وحركت الكرسي للباب
نعم تفضل….
_ حضرتك رافع اكرم
_ اي آني
_ تفضل الضابط يريدك بالمركز…
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
