رواية مكتوبة على إسمي الفصل التاسع والخمسون 59 بقلم ملك ابراهيم
رواية مكتوبة على إسمي الجزء التاسع والخمسون
رواية مكتوبة على إسمي البارت التاسع والخمسون
رواية مكتوبة على إسمي الحلقة التاسعة والخمسون
انت ازاي كده!! ازاي الحاجة وعكسها!!
عامر اتكلم بحزن: انتي اللي رسمتي صورة مزيفة ليا في خيالك ومصممه تصدقي الصورة دي ورافضة تشوفي صورتي الحقيقية.. بس انا قررت اخليكي تشوفي كل الحقيقه.
آيات بدهشة: حقيقة ايه ؟
عامر: حقيقة عامر الجارحي اللي انتي مكتوبة على اسمه.
آيات بصتله بدهشة وعامر كمل كلامه وقال: هنروح دلوقتي شقتي.. أول مكان إتجمعنا فيه مع بعض وهتبدأ الحكاية من هناك.
آيات بصتله بدهشة وعامر مسك أيديها وخرجوا من الشركة واخدها في عربيته وآيات كانت مش فاهمة هو يقصد ايه وعامر أخدها شقته وآيات دخلت معاه وقالت بستغراب: انا مش فاهمة حاجة يا عامر!
عامر طلب منها تقعد وقعد قدامها وقال: انا قررت أعرفك الحقيقة النهاردة.. لازم تعرفي مين هو عامر الجارحى اللي انتي مكتوبة على اسمه وابو الطفل اللي في بطنك.
آيات بصتله بصدمة وعامر بدأ كلامه وقال: انا عارف ان انتي حامل يا آيات وانا عايز ابني او بنتي يعيشوا حياة سوية وميشوفوش اللي انا شوفته.. انا اتربيت في بيت حزين.. اللي ربتني ام مقهورة كل لحظة في حياتها علي شبابها اللي بينتهي يوم ورا التاني وهي وحيدة.. زوجة عاشت اكتر من 15 سنه لوحدها.. وزوج فكر في سعادته ومفكرش في أي حد تاني وسافر وساب ابنه في آكتر وقت محتاجه فيه.. امي كانت بتعاني من الوحدة واحساس انها ست جوزها سابها وفضل ست تانيه عليها.. اصعب إحساس علي اي ست.. كنت أوقات كتير بصحى بالليل علي صوت بكائها جمبي.. كنت بسمعها بتكلم نفسها من الوحدة.. ايام وليالي كتير مكنتش بفكر في حاجة غير ازاي أسعدها واعوضها.. ولما كبرت واتخرجت من الجامعة لقيت جدي بيخسر كل فلوسه.. كان شايف انه اتظلم لإنه كان واهب حياته للشغل وللعيلة ولما كبر ملقاش ابنه الوحيد جمبه وبدأ يخسر كل ده وأنا كنت بحاول أصلح من وراه لحد ما المحامي كلمني في يوم وقالي.. جدك هيتجوز بنت صغيرة يتيمه مقابل الفلوس.. مقدرتش اقف اتفرج وجدي بيضيع مستقبل بنت صغيرة ملهاش ذنب.. اتحركت بسرعة وروحت امنع الجوازة دي ودفعت ل ابو البنت الفلوس اللي اتفق عليها مع جدي مقابل ان الجوازة دي متكملش لكن ابو البنت صمم ان الجوازة تكمل لان كان في فرح وكل اهل البلد حاضرين وقالي ان لو ده محصلش مستقبل البنت هيضيع واهل البلد هيتكلموا في حقها وهيسألوا ليه العريس مجاش ليلة الفرح.. قررت أتجوز البنت عشان أحميها وعشان مكنتش اضمن ان ممكن ابوها يروح لجدي من ورايا ويجوزهاله برضه وبجوازي منها مبقاش ينفع ان جدي يتجوزها واتفقت مع ابو البنت اني بعد فترة هطلقها وتكمل حياتها عادي زي اي بنت في سنها..
آيات بصتله باحراج وقالت: البنت دي كانت انا.
عامر هز راسه بالايجاب وكمل كلامه : لما اتجوزتك وجدي عرف كان بيعاند معايا اكتر وبيخسر فلوسه وبيبيع كل حاجة بخسارة وبعد كده المرض زاد عليه ومات بعد ما خسرنا كل حاجة وأنا كان مطلوب مني اني احافظ ل امي على المستوى اللي كانت عايشة فيه طول عمرها.. إشتغلت كتير.. مكنتش بنام ليل ولا نهار.. مع الايام شغلي بدأ يكبر وقدرت أعوض إللي خسرناه وبعد فترة ظهر عزيز في حياة امي.. عمري ما ارتحت ليه بس كنت بقول لنفسي يمكن كرهي ليه ده غيرة علي امي.. طبيعي ان اي ولد يغير على امه وكنت شاكك في الأول انه طمعان في فلوسي وبيخدع امي لكن وجوده في حياتها كان سبب لسعادتها وأخيرا شوفتها فرحانه وسعيدة في حياتها بعد سنين كتير من الحزن وكنت مستعد اضحي ب اي حاجة عشان سعادتها دي تدوم.
وسط كل المشاكل دي نسيت اني مطلقتش البنت اللي انا اتجوزتها وبعد خمس سنين جالي جواب من عمها بيقولي مراتك مستنياك ووقتها بس عرفت اني مطلقتش البنت وانها لسه مكتوبة على إسمي..
روحت البلد عشان اعتذرلها واطلقها وتاخد كل حقوقها وتسامحنى بس لقيت عمها بيقولى انها هربت عشان تدور عليا.. احساسي بالذنب مفرقنيش لحظة واحدة لحد ما قابلتها بالصدفة وكان هدفي في الاول اني أقرب منها عشان اعوضها عن السنين اللي ضاعت من عمرها بسببي بس لقيت نفسي من غير ما احس حبتها.. حسيت انها البنت اللي انا بتمنى تكون هي شريكة حياتي .. هي نفسها مراتي ومكتوبة على إسمي.. عملت كل اللي اقدر عليه عشان اخليها تحبني ويوم ما قالت انها بتحبني كنت حاسس اني ملكت الدنيا كلها.. كان نفسي أعيشها اجمل سنين عمرها معايا لكن كل الظروف كانت ضدي!! وكل تفكيري بقى ازاي أحميها من كل اللي حواليا.. بقت اغلي حاجة عندي لدرجة اني ببعدها عني عشان احافظ عليها..
آيات كانت بتبكي وهي بتسمع كلام عامر لأنها فعلا مكانتش مقدرة انه هو اللي انقذها وان باباها كان بيبعها للي يدفع ولولا عامر كانت حياتها اتدمرت ومع ذالك عامر عمره ما حسسها بكده ودايما يتعامل معاها علي انها اغلى حاجة في حياته وهي مقدرتش كل ده.
عامر كمل كلامه وقالها: عزيز كان مخطط مع بلطجيه انهم يخطفوكي.. وهو اللي اتفق مع البلطجيه انهم يضربوا شريف وكانوا ممكن يموتوه بس ربنا نجاه.
آيات بصتله بصدمة وعامر كمل كلامه وقال: ولما انا رجعتك البلد عند عمك خطفوا امي وميرنا لأنها كانت بتساعدني اني اكشفه وميرنا وافقت تساعدني مقابل الفلوس هي وكوكو صاحبها.. كل اللي حواليا كانت حياتهم معرضه للخطر وانا بعدتك عشان مكنتش هستحمل انك تتعرضي لأي اذى.
آيات ببكاء: وليه معرفتنيش ان كل ده بيحصل.. علي الاقل كنت هبقى مقدرة إللي انت بتعمله عشاني!
عامر: في حاجات مكنش ينفع تعرفيها وحاجات لو عرفتيها كنت هعرض حياتك للخطر اكتر واللي قلقني عليكي اكتر لما لقيتك اتعاطفتي مع علاء رغم اللي كان عايز يعمله فيكي.. وقتها خوفت ان اي حد يقدر يستغلك ويستغل عاطفتك.. عشان كده بعدتك عني لحد ما احل كل المشاكل دي وارجعك لحضني تاني.
آيات بصتله بحزن وبكت وقالت: انا عشت طول عمري خايفة يا عامر.. مش انت لوحدك اللي اتربيت في بيت حزين.. انا اتربيت في بيت كله قسوة.. لما اتجوزتني كنت بستناك كل ليلة عشان تيجي وتنقذني منهم.. كنت بحلم انك جيت وخدتني معاك ولما اصحى الاقي مرات ابويا اللي كانت بتعاملني اسوء معاملة ممكن تتخيلها!! انا عشت ايام صعبة كتير يا عامر مهما احكيلك مش هتتخيلها.. عشان كده طول الوقت وانا خايفه اخسرك.. خايفه تبعد عني.. مش قادرة اصدق انك بتحبني.. مش قادرة اصدق حنيتك وخوفك عليا.. في خوف جوايا طول الوقت.. بس الخوف ده بقى انك تسيبني وتبعد تاني.. بعادك عني بقى بالنسبة ليا كابوس بيطاردني.. اول لما تبعد بخاف انك مترجعش تاني.. انا طول الوقت خايفه وبحاول اداري خوفي برد فعلي العنيف.. بحاول اثبت لنفسي اني قويه واقدر اعيش من غيرك بس ده مش حقيقي ابدا.. انا خايفه تبعد عني يا عامر..
قامت وقفت وقربت منه وهي بتبكي وقالت: الخوف ده غصب عني يا عامر.. انا مش عايزاك تبعد عني.. انا عايزاك تطمني وبس.
عامر وقف قدامها وقال: آيات انا بحبك.. انتي ليه مش عايزة تصدقي.. انتي روحي يا آيات واغلي عندي من روحي.. عايزك تطمني وتثقي فيا.. انا مقدرش اسيبك وابعد عنك صدقيني.
آيات بكت آكتر وقالت: انا مشكلتي في الخوف يا عامر.. لما بتبعد عني بخاف ومبعرفش انا بقول ايه!
عامر ضم وشها بين أيديه وقالها: لما تثقي فيا مش هتخافي تاني. آيات انا عايز ابني او بنتي يتربوا في بيت مبني على الحب والتفاهم والثقة.. مش عايز أولادي يعيشوا إللي احنا عشناه.
آيات هزت راسها بالايجاب وعامر ضمها لحضنه وهي ضمته آكتر بقوة وكأنها بتطمن نفسها انه موجود معاها.
عامر كمان كان بيطمن قلبه ان حبيبته رجعتله تاني بس كان محتاج وقت اكتر يعرفها عليه اكتر ويكسب ثقتها فيه.
بعد عنها بهدوء وقالها: ادخلي ارتاحي جوه يا آيات انتي تعبتي النهاردة وانا هنزل لان عندي مشوار مهم.
آيات بصتله بقلق وعامر قال: احنا اتفقنا تتعودي تثقي فيا صح ؟
هزت راسها بالايجاب وعامر قبل جبينها بحب وقالها: في اكل في التلاجة وهتلاقي هنا كل حاجة ممكن تحتاجيها وانا مش هتأخر عليكي اطمني.
هزت راسها بالايجاب وعامر خرج وآيات قعدت تفكر في الكلام إللي قاله.
رواية مكتوبة على إسمي بقلمي ملك إبراهيم.
عند شريف وهاجر.
شريف وقف بعربيته قدام بيت هاجر وبصلها واتكلم بهدوء: هاجر انتي عارفه احنا جاين نزوركم بكره ليه؟
ردت هاجر بخجل: لا.
شريف ابتسم وقال: هاجر تقبلي تتجوزيني ؟؟
هاجر جسمها ارتجف من شدة الخجل والتوتر وشريف كمل كلامه وقال: هاجر انا يمكن مش بعرف اقول كلام حلو بحكم ان المشاعر اللي جوايا اتجاهك مشاعر اول مرة أحس بيها.. انا عمري ما حبيت بنت قبلك وحياتي كانت عبارة عن شغلي ووالدتي وعامر وخالتي ومفيش حد تاني بيشغل حياتي غيرهم.. انتي قدرتي تشغلي قلبي وعقلي وتفكيري.. قدرتي تعملي اللي مفيش بنت غيرك قدرت تعمله.. انا بحبك يا هاجر وبتمنى انك توافقي على طلبي.
هاجر ابتسمت بسعادة وقالت برقة: كل ده ومش بتعرف تقول كلام حلو..انت قولت أجمل كلام في الدنيا.
شريف ابتسم بحب لما شاف سعادتها الواضحة وسألها: يعني موافقة؟
هاجر هزت راسها بالايجاب وقالت: موافقة.
ومقدرتش تفضل معاه في العربية من شدة الخجل ونزلت تجري علي بيتها وشريف كان بيبتسم بسعادة.
رواية مكتوبة على إسمي بقلمي ملك إبراهيم.
عند امجد وبيسان.
بيسان دخلت مع امجد غرفة مكتبه في شركته القديمة وقالت: فاكر يا أمجد لما انا وانت كنا بنحلم اننا نأسس شركة صغيرة زي دي مع بعض.. مكنتش اعرف اننا لما نتخرج أحلامي هتكبر معايا والشركة الصغيرة تبقى اخر طموحاتي!
امجد ابتسم وسألها: ووصلتي ل طموحاتك اللي حلمتي بيها ؟
بيسان بتوتر: لا يا أمجد.. لاني اكتشفت ان عشان اوصل ل طموحاتي هناك كان لازم اتنازل عن حاجات كتير مينفعش اتنازل عنها.. وانت اكيد عارف أخلاقي كويس.
امجد ابتسم ووقف قدامها وسألها: عارف أخلاقك كويس يا بيسان وكنت بتمنى انك متستعجليش ونحقق احلامنا هنا مع بعض.
بيسان بصتله بشتياق وقالت: ولسه ليا مكان في احلامك يا أمجد؟
امجد: كل اللي اقدر اقولهولك اني لما شافتك النهاردة حسيت نفس اللي كنت بحسه زمان.
بيسان برقه: يعني في امل اننا نرجع تاني؟
امجد: مفيش بنت قدرت تاخد مكانك يا بيسان.. وده اكتشفته اول لما شفتك النهاردة وده معناه ان لسه في امل.
بيسان ابتسمت بسعادة و امجد بصلها بحب وابتسم.
رواية مكتوبة على إسمي بقلمي ملك إبراهيم.
في المستشفى.
دخل عامر المستشفى وهو حاسس بألم شديد في الجرح كان بيحاول يخفى شعوره بالألم قدام آيات واول لما وصل المستشفى دخل غرفة الدكتور.
عامر: مساء الخير يا دكتور.
الدكتور اول لما شاف عامر فهم وقاله: حاسس بألم في الجرح طبعا مكان الرصاصة لانك مصمم تظهر قدام الكل وكأن الجرح ده مش مأثر فيك!
عامر: انا كنت كويس الصبح بس مع الشغل طول اليوم والالم بيزيد عليا.
الدكتور قام وقف وقال: ليه مش مقدر انك كنت مصاب ب رصاصة وكان ممكن تكون حالتك خطيرة بس ربنا أراد ان الرصاصة تكون سطحية ومتسببش أذى ليك وده مش معناه انك مش محتاج للراحة والاهتمام بالجرح.
وطلب منه انه يخلع القميص عشان يغير له على الجرح وعامر قال بهدوء: مش عايز اللي حواليا يحسوا ب ألمي يا دكتور.
الدكتور شاف الجرح وقال: لازم تاخد راحة.. اللي انت بتعمل ده غلط يا باشمهندس.
عامر بص قدامه وقال: هاخد راحة أكيد بس مش دلوقتي.
الدكتور غير له علي الجرح وقال: الجرح محتاج يتغير عليه باستمرار ياريت متهملش ده كمان.
عامر هز راسه بالايجاب ولبس القميص بتاعه وشكر الدكتور وخرج من المستشفى ركب عربيته واتصل على شريف وعرف انه رجع البيت عند والدته وعامر اتحرك بالعربية في اتجاه بيت خالته ميرفت.
عامر اول لما دخل بيت شريف كانت ميسرة قاعدة مع اختها وعامر قرب منهم وسلم عليهم وميسرة اتكلمت مع عامر بقلق: عامر انت شكلك تعبان يا حبيبي.
واتكلمت ميرفت: المفروض ترتاح يا عامر اللي انت بتعمله ده غلط.
عامر ابتسم وطمنهم: انا كويس جدا ومش تعبان ولا حاجة.. انا كويس طول ما انتم بخير.
اتكلمت معاه ميسرة بلهفة: شريف قالي انك رجعت آيات مراتك.. هي فين عامر انا نفسي اعتذرلها على كل اللي عملته معاها.
رد عامر بأبتسامة: انا اتكلمت مع آيات يا امي في كل حاجة وخلاص واتفقنا اننا نبدأ من جديد وكمان في خبر عايز اقولكم عليه.. آيات حامل.
ميسرة وميرفت فرحوا من قلبهم وميسرة ضمت عامر بحب وعيونها لمعت بالدموع وقالت: معقول يا عامر.. الف مبروك يا حبيبي.
عامر ابتسم في حضن امه بسعادة وميرفت ضحكت وقالت: هتبقي تيته يا ميسرة.
ميسرة بصتلهم وقالت: انا مش مصدقة.. هي الايام جريت بسرعة كده!! انا لسه فكرة يوم ما ولدت عامر وشيلته في حضني.. اليوم ده كأنه إمبارح.
عامر قبّل ايديها بحب وقال: ربنا يخليكي لينا يا امي وتشيلي أولادي كمان.
ميسرة ابتسمت بسعادة وشريف قال ل والدته: وحضرتك يا ميرفت هانم مش عايزة تشيلي أولادي انتي كمان.
ميرفت بسعادة: دا يبقى يوم المنى يا حبيبي.
رد شريف: يبقى تجهزوا نفسكم بكره ان شاء الله.
ميرفت بدهشة: نجهز نفسنا ل إيه ؟!
رد عامر: هنروح نخطب ل شريف.. هاجر أخت امجد.
ميرفت ابتسمت بسعادة وقالت: هاجر بنت جميلة ومؤدبة.. ربنا يكمل فرحتكم علي خير يا حبيبي.
ميسرة سألت عامر بفضول: عامر هي آيات فين دلوقتي ؟ في الفيلا ؟
رد عامر: لا يا أمي آيات في شقتي.. انا قررت ابيع الفيلا.. الفيلا دي فيها ذكريات لينا مش حابب افتكرها.. هشتري فيلا جديدة ونبدأ فيها من جديد.
ميسرة ابتسمت وقالت: ربنا يوفقكم يا حبيبي.. وانا قررت اني اعيش مع ميرفت هنا على طول.. شريف هو كمان هيتجوز وكل واحد فيكم هيبقى له حياته الخاصة وانا وميرفت هنعيش هنا مع بعض.
رد عامر بالرفض: لا طبعا يا أمي.. انتي هتعيشي معايا.
و رد شريف: وانا كمان مقدرش اعيش بعيد عن امي.
اتكلمت ميرفت بأبتسامة: مين قال انكم هتعيشوا بعيد عننا.. احنا هنفضل دايما معاكم لأخر يوم في عمرنا.. بس لازم يكون لكم حياتك الخاصة واحنا لما نزهق من بعض انا وميسرة هنيجي نقعد عند كل واحد فيكم شويه.
عامر رد بهدوء: سيبوا كل حاجة لوقتها.. المهم دلوقتي إحنا عايزين نفرح بالعريس بتاعنا.
ميرفت اتكلمت مع عامر: وانت كمان يا عامر عايزين نفرح بيك انت وآيات احنا مفرحناش بيكم!
رد عامر بأبتسامة وهو بيبص قدامه بتفكير: لا فرحتي انا وآيات هتكون مختلفة… #نهاية الجزء الأول ❤️
إللي اللقاء مع الجزء الثاني من رواية مكتوبة على إسمي ❤️😱
طبعا انا محبتش اعلن ان في جزء تاني من الرواية غير في نهاية الجزء الأول لأن الجزء الثاني هتكون أحداث مختلفه وهيظهر فيه شخصيات جديدة مع ابطالنا وان شاء الله هناخد فترة اجازة أجهز فيها الجزء الثاني وهعلن عن ميعاد النشر الجديد هنا على صفحتي الرسمية فقط صفحة👈( الكاتبة ملك إبراهيم ) واي شخص هيعلن علي صفحته ميعاد مزيف ويخدع المتابعين عشان يجمع تفاعل انا هقدم فيه ابلاغات حقوق ملكية.
ودي مقتطفات سريعة من (الجزء الثاني) 😍😱
داخل مبني السجن.
دخل شاب بيظهر عليه الهيبة والغموض مكتب مأمور السجن واتكلم بثبات: انا معايا تصريح أقابل عزيز المحمدي.
مأمور السجن: اهلا بحضرتك وفي توصيه كبيرة مع التصريح.. أتفضل والمسجون هيكون هنا حالا.
بعد دقايق قليله دخل عسكري ومعاه عزيز اللي اول لما شاف الشاب جري عليه وقال:
امير ابني حبيبي شوفت اللي حصل فيا.. شوفت عامر الجارحى عمل فيا ايه واختك الغبيه كانت بتساعده!
رد امير بثبات: متقلقش يا بابا انا رجعت من السفر مخصوص عشانك ووكلتلك اكبر محامي وميرنا انا هتصرف معاها.
عزيز برجاء: أكيد انت مش هتسيبني محبوس هنا يا امير صح؟
امير بص قدامه وقال بثقة: اطمن يا بابا.. انا هعمل المستحيل عشان اخرجك من هنا وبالنسبه ل عامر الجارحى.. انا راجع مخصوص عشانه ولازم ادفعه تمن اللي هو عمله معاك غالي اوي.
رواية مكتوبة على إسمي 2 بقلمي ملك إبراهيم.
عند علاء ومختار.
علاء شرب من الكاس اللي قدامه وقال: انا لازم انتقم من عامر الجارحى .. مش هسيبه يعيش حياته براحة وسعادة وهو مدمر حياتي.. بقى انا على اخر الزمن يتقالي يا جوز لولا!!
مختار وهو بيشرب كاس جمبه: عامر بعد ما شارك امجد وعملوا الشركة الجديدة دي وبقى هو رقم واحد بدون منافس ومفيش أي حد قادر عليه.. احنا لازم نوقع عامر الجارحى ونخلص منه بأي طريقة.
رواية مكتوبة على إسمي 2 بقلمي ملك إبراهيم.
عند آيات وعامر.
آيات كانت قاعدة بتذاكر وعامر بيشتغل علي اللاب بتاعه ومركز في شغل مهم وآيات زفرت فجأة بغضب وقالت: انا مش عايزة ادرس هندسة دي طلعت صعبة آوي.
رد عامر وهو بيبص في اللاب: مش صعبة ولا حاجة انتي بس محتاجة تركزي شويه.
آيات وقفت قدامه وقالت بغضب: قصدك ان انا مش بركز ومش هعرف أنجح في الكلية دي صح ؟
عامر بصلها بصدمة وقال: بس انا مقولتش كده!
ايات بعناد: بس انت تقصد كده.. وبعدين انت عارف انا مش قادرة اركز ليه؟ عشان انا حامل يا باشمهندس والمفروض انك بابا الطفل إللي أنا شايله مسؤليته لوحدي والطبيعي إنك تساعدني وتذاكرلي عشان انا بفهم منك انت اكتر من اي حد تاني لكن انت مش مهتم بيا ابدا وكل تركيزك واهتمامك ب شغلك وبس وانا اخر اهتمامتك!!
عامر قفل اللاب وقالها: آيات حبيبتي هو الحمل بيقلب معاكي بفقدان ذاكرة ولا ايه!! مش انا قولتلك أساعدك في مذاكرتك وإنتي رفضتي وقولتي انك فاهمة كل حاجة ومش محتاجة مساعدة!
ردت آيات: اه انا مش محتاجة مساعدة بس محتاجة اهتمام.. محتاجة احس اني مهمة في حياتك.. شوف امجد وشريف بيعملوا ايه مع بيسان وهاجر واتعلم منهم.. شريف كل يوم يتصل ب هاجر بالساعات ويفضلوا يتكلموا في التليفون طول الليل ويقولها كلام حب!
عامر: طب دول مخطوبين وطبيعي يتصل بيها ويقولها كلام حب.. انا بقى اتصل بيكي ليه يا حبيبتي وانتي قدامي اهو وبقولك كل كلام الحب وانتي قدامي.
آيات: لا طبعا المشاعر بتكون مختلفه بين المخطوبين والمتجوزين وانا من حقي اعيش مشاعر المخطوبين دي!
عامر: ااااه هي هبت معاكي.. آيات هو انتي مش ناويه تولدي بقى وتخلصيني من الجنان ده!
آيات شهقت بصدمة: انا مجنونه.
عامر: لاااا دي هبت خالص انا خارج تكوني خلصتي برحتك.
وقرب عامر من باب الشقة واول لما فتح لقى كوكو وميرنا في وشه: عااااامر احنا رجعناااا…😱😂 بقلمي ملك إبراهيم.
امير المحمدي وعلاء ومختار ياتري مثلث الأشرار دول ناوين على ايه مع عامر 🤔 وعامر وآيات 🥰 وشريف وهاجر 🥰وامجد وبيسان🥰 وفارس وهدير🥰 طبعا مش قادرة اقول وميرنا وكوكو 🤭😂 الجزء الثاني هيكون أجمد بكتير ان شاء الله
لقراءة الرواية كاملة اضغط على : (رواية مكتوبة على إسمي)
