رواية انكسار الياسمين الفصل الثالث والعشرون 23 بقلم أمل مهدي
رواية انكسار الياسمين الجزء الثالث والعشرون
رواية انكسار الياسمين البارت الثالث والعشرون
رواية انكسار الياسمين الحلقة الثالثة والعشرون
مدري بيه الخلل متعلم عليك
مدري هيه الناس مدري شلونها
انت بعيونك تلمحلي بكلام
شفافي ع الـماكو وتشر اسنونها
________________
أيسر _
شغلت السياره وطلعت
عدلت المرايه عليها حتى لو هيه متريد تباوعلي المهم أملي عيني بيها
أيسر _ انتي ليش هلگد حلوه
ياسمين _ ترى عيب عليك تتحرش والله اگول للوالده
أيسر _ آني ما متحارش آني أگول الحقيقه انتي فعلا حلوه
أيسر_ تدرين آني ادرس بروسيا
ياسمين _ لاااا….
أيسر _ وأريد ازوج
ياسمين _ وآني شعليه…… گلتها بنتر
أيسر _ اذا اتقدملج توافقين…………!!!
ياسمين _ باوعتله لا انته مو طبيعي اوگف اريد انزل
لزمت يدة الباب
طگ القفل ونقفلت الأبواب اربعتهن….. ووگف السياره
ولتفت عليه…..
وقبل ما احجي…..
ايسر_ احلفج بعزيز گلبج اسمعيني لا تحجين…
ياسمين _ أحس دگات گلبي صارت تدگ براسي رغم اني بسيارة
بالشارع بس حسيت روحي بغرفه ونقفلت عليه الباب بلحظه خطر أبالي اماشي واسمعه واخلص….
أيسر _اني جدي بطلبي
فعلا اذا توافقين اتقدملج لگيت بيج كل المواصفات الاريدها
لزوجه الاتمنه اكمل وياها
ياسمين _ بهلسرعه صار يومين من شفتني شعرفت عني
أني شعرفت عنك لو تصور راح اطير من الفرح لان حضرتك عرضت عليه الزواج
أيسر _ آني كلشي عرفت عنج سالت وعرفتج عن قرب
وهسه احجيلج كلشي عني واذا تردين تعرفين هم أسألي
ياسمين _ حتى لو انت مقتنع وجدي بكلامك أهلك مراح يوافقون
الفرق بينه شاسع
وصلني ارجوك آني تعبانه ويني وين الزواج عندي طفل اريد اربي
أيسر _ اذا توافقين ابنج وياج ما تتركي نسافر وانتي تكملين دراسه
وهاي سوالف المستوى والطبقات ماكو عدنه وأهلي ما يدخلون
لان آني مسؤل عن أختياري
ياسمين _ يعني انته تحجي صدگ
أيسر _ أكيد آني مو زغير حتى اغشج واذا تسمحين اتصل عليج
بليل احجيلج كلشي عن حياتي آني بعد شهر ارجع اريد اسمع
قرارج….
ياسمين _ وسكت بعد ما حجه شغل السياره وطلع للروضه
كان الوقت مغرب نزلت من السياره بس نظرات بينه
حتى ما سلمت
شتت افكاري يعني صدك رايدني زواج مو يضحك عليه
فرق بينه جبير هو وين وآني وين
مترهم مستحيل هذا اكيد مجنون
رجعت للبيت تعبانه ومزعوجه حتى الكل سألني وأگلهم تعبانه
هلگد ما مبين عليه
نسيت أيسر گال راح اتصل بليل احجيلج عن حياتي
ابد ما كنت مقتنعه بطلبه
رحت للغرفه فرشت حتى انام…. شويه واجه رضى
عمه هاي بنيه تريدج
ياسمين _ الو منو
أيسر _ هلو ياسمين عندج وقت تسمعيني
ياسمين _ محد كان يمي…..سحبت الهوى بصدري بقلة صبر اسمعك….
آني قبل ثلاث سنوات طلعت الروسيا ادرس دراسات عليا
وتعرفت هناك على بنيه روسيه زميله بالدراسه حبينه بعضنه وتزوجنه
ياسمين _ اهلك ماكان الهم رأي بزواجك…
أيسر _ لا گالو هاي حياتك وانته حر بيها
تزوجنه وعشنه السنه الأولى احلى ايام من حبها اليه تعلمت تحجي عربي
وبديت اعلمها على الدين الإسلامي أهيئها حتى تستسلم وكانت سعيده وياي وعدها استعداد تغير نفسها ودينها من اجلي
بالسنه الثانيه بدت المشاكل وكانت حامل
بحكم شغلي ودراستي جنت ادخل بليل للشقه تعبان تتلكاني
متذمره وعصبيه على اشلون اتركها وحدها
كلمه گلته بلحظه بدون ما افكر بأبعادها هدمت كل البنيته
روحي اطلعي الصديقاتج غيري جو حتى لا اضوجين
كان قصدي تقضي وقت ما حسبت صديقاتها روس واكيد راح يأثرون عليها وترجع الحياتها السابقه
وبدت تتواصل ويه ثنين كانن مقربات الها كلش ورتاحيت من النگد
فتره…
وبيوم رجعت للبيت من وكت لكيت البنات بشقتنه وريحة الدخان خانكه الشقه
والشرب والاكل على الميز
ثرت بوجها وتعاركت اشلون ادخن وتشرب اذا مو حاسبه حسابي على لأقل تحسب حساب الطفل البطنها
من شافتني ما قبلت بالوضع
تحججت مو هيه صديقاتها يشربون
وهل مره اني منعتها منهم بس فات الأوان رفضت ووكفت بوجهي
وخيرتني بين ان تبقى يمي بهذا الوضع وبين ان ننفصل
ورضيت من أجل الطفل جنت مقرر بس تولد أخذه وارجع للعراق
بس مالحگت كان القدر اسرع
سكرانه وساقت السياره وسوت حادث والنتيجه الطفل ٦ شهور البطنها مات
انفصلت عنها بعد الحادث مباشرتا كل
هذا كان قبل سنه
هسه اجيت اجازه وجنت ناوي ما ارجع الا مزوج
الوحده هناك قاتله
افتريت على كل كرايبي والمعارف ما حصلت الانسانه البالي
حتى أيست….
بس من شفتج تجدد الأمل بداخلي وگلت هيه هاي الأدوار عليها
صح صار كلشي بسرعه بس اني من اول ما شفتج سالت وعرفت كلشي عنج البارحه اني واگف ابابكم
ها شنو رايج…….؟؟؟؟؟
ياسمين _ خليني افكر كم يوم وانته شوف اهلك
أيسر _ راح انتظر … الج يومين لا أكثر وراح احترم قرارك ايا كان
سديت الخط وحاولت انام ما گدرت أيسر خربطلي افكاري
رغم بين عليه صادق بنيته بس ما مقتنعه
طلعت الصبح للروضه لكيت أثير ينتظرني اخذني للبيت
كلهم موجودين الا هو ماكو
صعدت والعده مال التنظيف بيدي ضحكت مستهزاه
قصتي ويه أيسر مثل قصة سندريلا
تلكتني دينا
_آني اعتذ البارحه جبرني أيسر اتصل عليج اخاف سببتلج مشكله
_ گعدت على الكرسي…. انتي تعرفين اخوج ليش اتصل
_لا ما اعرف
سكتت منه يعرفون ولا مني
نظفت الغرفه من جديد لان هي طلبت مني
_خلصت بعد اكو شي انظفه…..!!!
دنيا _ ابتسمت…. ولا حسيت بالوقت تسلم ايدج
تعالي على غرفة اثير
دخلت للغرفه الثانيه لابنهم الزغير وبلشت ترتيب وتنظيف
نظفت المنور والمخزن وكل اشويه اتفقد علاوي الكا يلعب ويه دنيا
وارجع اكمل اخر شي دخلت غرفه
مبينه غرفة أيسر من الصوره الكبيره المعلقه على الحايط
تقربت اباوع شكله كلش حلو بالصوره
امبين عليهم الخير ومرتاحين
نظفتها واجيت للصوره وگفت مقابيلها
امسح بيها….
وافكر معقوله الدنيه تكافئني بيك آني نفسي ما مصدگه
أيسر _ عجبتج……؟؟؟
ياسمين _ اجاني الصوت من ورايه فززني….. التفتت
لاحظت بيني وبينه خطوه وحده اشلون ما حسيت عليه وهو يدخل
نظراته اخترقتني بس شفت بيها شي من الاطمئنان
ولأول مره اباوعله بتركيز بعد احلى واهيب من الصوره
ارتبكت…. اريد اجمع جمله معرفت
تلعثمت….. لا… وأي حلوه…….
اخذت أدوات التنظيف واريد اختفى من گدامه
أيسر _ ياسمين……..!!!
_ وگفت بدون ما التفت……… نعم
أيسر _ تقدم قريب عليه وگالها بتوسل. وصوت ناصي
ممكن اشوفج بره……
_ لااااا….. گلتها …. وطلعت اخذت علاوي ونزلت جوه
متوتره منين طلعلي أيسر مو جان راسي هادي ومرتاح
شفت عندي وكت مديت الصونده وبديت اغسل الممرات وبيني وبين نفسي اگول…
بس اليوم بعد ما اجي
اكيد اهله اول مايگولون تاخذ الخدامه النظفت بيتنه
تمنيت اختفى ويا حق رافع من ما قبل اجي هنا
اغسل وعلاوي وياي حتى تبللت ملابسه لان يلعب بالمي
ساعه وخلصت بس شنو ظهري احسه نگسم بالنص من التعب
لفيت الصونده ورجعتها بمكانها
ودخلت للمطبخ لبست عباتي ودكمتها وبدلت العلاوي همزين ويايه ملابس جايبه
ست رفل _ بعد باجر الحفله اريدج ويايه تجين من العصر لليل
ياسمين _ ما ادري اگول لاخويه اخاف ميقبل بليل ارجع
ست رفل _ معليج اني اتصل عليه واحجي ويا وهم بيها فايده الج
ياسمين _ ماشي
ست رفل _ صاحت وين أثير خلي يوصل ياسمين
طلعت للكراج اشوف أيسر اجه يركض والسويج بيده اشرلي
يله اصعدي…
باوعتله بنزعاج
_ اني اروح ماكو داعي
_ شبيج… خايفه مني لان كلتلج نطلع سوه……؟؟؟؟
_ لا طبعا
_ التفت بتجاه المطبخ وحجه بصوت ناصي
اترجاج تصعدين عندي حجي وياج….
_شكله وكلامه يطمني بس خايفه من اهله
صعدت بالكرسي الخلفي وعلاوي بحضني
أيسر _ عدلت المرايه حتى احجي وياها وحركت السياره
احسج بعدج ما مصدگه اني رايدج
_ انته اشلون مقتنع بالتگوله……!!!!
_ وليش ما اقتنع عجبتيني وأخلاقج حلوه ونتفق نعيش سوه شنو غريبه ……!!!!
_ اي غريبه بالنسبه للناس الحولينه كلها راح تسأل ليش اختاريتني آني
يسوق ويباوعلي بالمرايه ويحجي
أيسر _ ليش انتي مو بنيه مثل كل البنات زغيره وحلوه واكيد. تنخطبين
ياسمين _ وارمله وياها طفل ليش ما كلت…
أيسر _ اني ماتهمني هاي الأمور المهم انتي شخصج عجبتيني
واريد اكمل وياج حياتي
ياسمين _ اهلك عدهم علم….. يعني ست رفل شنو رايها
أيسر _ وگفت السياره اباب الروضه كان الدوام خلصان والشارع فارغ
التفتت عليها ورفعت المناظر
تخلص حفلة الخطوبه وافاتحهم
ياسمين _…….!!!! ما عرفت شنو اجاوب بالنسبه الوحده مثلي
أيسر فرصة العمر ولگطه مثل ما يگولون بس هوايه اشياء لسه
ما مقتنعه بيها الفارق الطبقي الفارق المادي
ايسر _ اشو ساكته گولي اي شي
ياسمين _ ما ادري فاتح اهلك والله كريم
أيسر _ اهم شي ما تتأخرين عليه لان عندي سفر حتى آخذج ويايه
ياسمين _ ابتسمت انشالله فتحت الباب ونزلت وتمشيت بس هالمره شعوري غير تبد الخوف وحل مكانه امل….
فر السياره وفات من يمي يضحك
أيسر _ خليني اوصلج البيت
_ لا مو هسه بعدين
_ تره اني البارحه ابابكم…..
_ باوعتله متعجبه شسوي ابابنه….
_ بعدين اگلج
ورفع ايده مسلم وراح والابتسامه مرسومه على وجها
رجعت للبيت وعين على الدرب وعين على علاوي والف سؤال
يتردد بخوف على بالي
معقوله اهله يوافقون بيه….؟؟؟
لا شهاده ولا مال ولا حال
ليش شنو ناقصني حلوه وز غيره….
اصحى ياسمين أيسر خالي مختلي
وانتي ارمله ووياج طفل منو يتحمل يربي ابن غيره
مره يحتي الأمل بنفسي واگول اخلص من العازه والفقر ومن ايمان
ومره اگول لا علاوي ورافع وخالتي ما اگدر اعوفهم
ذوله كل دنيتي
دخلت البيت واني صفنه تجيبني وصفنه توديني
تلكتني إيمان انطيتها المقسوم والباقي اجيب دوه لخالتي بيهن
ثاني يوم اتصلت ست رفل وحجت ويه رافع حتى اروح اساعدها بالحفله والترتيبات
وافق رافع بس شنو اول مره يوصيني هشكل گعدني گباله
رافع _ شوفي ياسمين لو ما نعرفه المديرة الروضه جان ماسمحتلج
توصلين بيتها
اليوم راح هواي ناس تجيهم اريدج مثل ما ربيتج تره البنيه زينتها
اخلاقها حافظي على نفسج اخاف احد يستضعفج لا تسمحين لاحد
يقلل من قيمتج وعليج بالمديره وبس ولا تتاخرين
_ هزيت راسي مأكده كلامه
ليش يوصيني اليوم بالذات كانه حس صاير شي جديد بحياتي
لبست عباتي والحجاب وأخذت علاوي بيدي وطلعت
شكد حجه عليه رافع يريدني اترك علاوي بالبيت ما قبلت حتى ظل يشك ويسألني…
صاير شي
اذا على إيمان اني عوفي يمي مو يمها
هي أولادها صگطت تربيتهم ترديها تحافظ على ابن أخوها…
طلعت اتمشه صدت عيني على ابو زين كاعد بالمحل مالته
نزلت راسي وحاولت اجاوزه بس هو لمحني
_ ام عليييي
ياسمين _ التفتت عليه محرجه شنو عذري حتى سلام ما اسلم عليه
وهو وگفلي وگفة اخ وساعدني بالمستشفى
اشلونك ابو زين….
_ اني زين انتي شلونج
سامعه شي
بدر مني شي
مرتين تفوتين ما تسلمين شنو السبب
_ هيج احسن حتى ما اكون السبب بمشاكل ابيتك
_ تقرب عليه عاقد حاجه..
مها جايتكم البيت……..؟؟؟
_ اي وحجت كلام محلو بحقي ورافع منعني اوگف اباب محلك
_ اويلي كل هذا صاير واني ما ادري و ابو حسن يجي ويروح وما يحجيلي
الله يصخم وجهج مها
ياسمين _ ارجوك لا تحجي وياها عادي تغار مثل كل زوجه
ابو زين_ انتي شتكولين غير انتي مثل اختي
بقه يصف بكفوفه مقهور تركته وكملت طريقي للروضه
ولا متندمه لان حجيت لابو زين على مها لأنها تستحق اكثر
يومها اشلون حرگت گلبي من تهمتني
بنص الطريق ودگ هورن التفتت لكيت أيسر جايني
وگف يمي مبتسم
_ اشلونج
_الحمد لله ليش ما نتظرتني يم الروضه
_گلبي ما ينطيني تمشين كل هذا الطريق تمنيت من بابكم آخذج
_ ابتسمت كلامه حلو
حلو من احد يهتم بيج شعور فرح على راحه على سعاده
مزيج من الاحاسيس ما ماره عليه الا بأيام سيد علي من كان يتفقد
كل شي يخصني
أيسر _ وين صافنه بيش تفكرين
ياسمين _ هيج مجرد افكار
أيسر _ خلي نتفق اتفاق اذا صرتي يمي ما اريد تفكرين باي شي غيري
اني ما احب الصفنات
_ ابتسمت طبعا شي اكيد
امل انولد بحياتي جديد كلامه طيرني فوك وشغل كل تفكيري
معقوله الايام تضحكلي من جديد
أيسر _ اليوم من تخلص الخطوبه راح افتح الموضوع ويه اهلي
ياسمين _ اختفت ابتسامتي ما ادري ليش خايفه
الله كريم
وصلت البيت الباب مفتوحه والكراسي مسطره بالكراج وبالحديقه
دخلت للمطبخ ست رفل مخبوصه بالتحضيرات
ست رفل _ بسرعه ياسمين حضري نفسج ترى الناس على جيه
ياسمين _ بالعبايه والحجاب ابقى
ست رفل _ اشلون غير انتي التقدمين الكيك والعصير لازم
تلبسين شي حلو تعالي
صاحت على دنيا
_ شوفيلها ثوب حلو من عندج لبسيه يله
ياسمين _ ما ردت اخذ من دنيا بس مضطره
صعدت وياها انطتني ثوب حلو ومستور ولان اني شويه اسمن من دنيا كان عليه كلش حلو ولبست حذاء شويه كعب
ورادت تمكيجني ما قبلت
دنيا _ عاد بس مسكاره وكحل
ياسمين _ عوفيني يمعوده جايين يخطبوج لو يخطبوني
لفيت الحجاب ونزلت وبدينه بالتحضيرات
الكيك حضرته بصواني هو والعصير
أيسر _ دخلت المطبخ فاجأني شكل ياسمين شنو هلجمال وهاي لا مكياج لا ملاعيب الصالونات
ابتسمت تدرين انتي احلى وحده بالموجودين حتى احلى من دنيا
ياسمين _ لا تبالغ اني كلش عاديه
ست رفل _ شسوي هنا اطلع شوف الناس بره
أيسر _ اي طالع
ست رفل _ شعنده أيسر اجان يحجي وياج
_ ارتبكت ما حجه شي….
كعدت علاوي يمي على كرسي واشتغل
اجو اهل الولد انترس الشارع سيارات والبيت نسوان وز لم وكلهم مبينين شخصيات
خطبو وتعالت الهلاهل والتهاني
بديت اقدم الكيك والعصير وكله على الاتكيت لان هاي الناس غير شكل شخصيات لبس واناقه وسيارات اخر موديل
اباوع الدنيا البدله والذهب اللبسته لو الكوشه الوراها
وهيه مثل الفراشه فرحانه كاعده بالوسط
تمنيت ادخل عالمهم وتخيلت نفسي انخطبت الايسر وهيج الناس
ملتمه تباركنه وفرحانه
تعبت بيدي الصينيه ورايحه جايه اقدم لكل وحده وابتسم هذا
العلمتنيا ست رفل
اشلون امشي شلون اقدم اشلون احجي وياهم
احس روحي اختنكت
وكانه غشاوه كانت على عيني ونكشفت
رجعت للمطبخ هالمره مالكيت علاوي بمكانه بدون شعور ركضت
ادوره واسأل وين راح
طار عقلي من الخوف طلعت للطرمه صار بوجهي ايسر
أيسر _ وين طالعه الرياجيل تارسه البيت
ياسمين _ علاوي ماكو…
أيسر _ هذا هو واكف ويه الجهال
_ اجاني يركض
حضنته شكد خفت عليه
خلصت الخطبه والكل فرحان راحو اهل الولد وبده يفرغ البيت
نزعت الحذاء والثوب وتشكلت بالمطبخ
عين على المواعين وعين على علاوي
ساعه أكثر وخلصت
ست رفل _ لو ما ليلت الدنيا جان نظفتيلي البيت
بس يله البنات ينظفون
انطتني المقسوم وأخذت علاوي وطلعت
صار بوجهي أيسر يله اوصلج
ست رفل _ لا أثير يوصلها أنت ابقى
ياسمين صعدت ويه أثير وصلني للبيت لان ليل
دخلت البيت واني مو فقط تعبانة جسد بل تعبانة فكر
اني اشلون صدكت روحي ممكن اجاري ايسر
هو وين واني وين فرق جبير
أحلمي ياسمين من حقج تحلمين بس حلم بسيط على گدج
وايسر حلم بعيد المنال
أيسر _
يوم يابه عندي موضوع وياكم ممكن تسمعوني…..
رفل _ خير گول وكعت گلبي
أيسر _ كل خير انشالله….
اني لگيت بنت الحلال واريد ازوج بسرعه….
ابو ايسر _ اشو بسرعه شنو راح اطير بابا هذا زواج لا تستعجل وتوكع مثل ذيج المره
رفل _ منيه نعرفها…..؟؟؟
أيسر _ اي يوم تعرفيها….
قبل أشكد لمتوني لان ارتبطت بالروسيه وخيبت املي وآمالكم
هسه هاي الانسانه درست أخلاقه ومشيت وراها وسالت عنها وعن اهلها
رفل _صغرت عيونها بمكر….. بس لا ياسمين….. !!!!!
أيسر _ اي هيه……
ابو ايسر _ لاااا اكيد تشاقه….
أيسر _ لا طبعا ليش الموضوع يتحمل شقه….
البنيه عجبتني اخلاقها قبل كل شي
رفل _ والله حسيت بس مو كل وحده تعجبك معناها توالمك
احنه وين…. وهيه وين
تأشر بأيدها احنه فوگ وهي جوه
ابو أيسر _ انته ما فكرت بوضعها ارمله وعدها طفل وفوگها خدامه
أيسر _ كل هذا مو مهم المهم هيه الانسانه الدخلت گلبي
واني اريدها واتحمل كلشي من ناحيتها
رفل _ انته تخبلت رسمي كلها شهر شهرين وترجع تسافر
نسيت دراستك مستقبلك
أيسر _ لا ما ناسي أخذها وياي عادي
وراح اساعدها تكمل دراسه
ابو أيسر _ وابنها بابا هاي مسؤليه بعدين تلتهي بدراستك لو بالطفل
رفل عقلي الابنج اني لحد الان ماخذه على گد عقله
تره لليوم ما حاجي وياك على غلطتك وزواجك من الروسيه
لشوكت تركض وره نزواتك
أيسر _ياسمين مو نزوه عرفت كلشي عنها وشفتها توالمني
يابه اترجاك اريدها بس روح ويايه بالبدايه الاخوها وبعدها عوفني
رفل _ انته ما صار سنه من انفصلت بعدك ما واعي من صدمتك انطي النفسك مجال مو اول وحده عجبتك ركضت وراها
ابو أيسر _ لا وفوگها خدامه لا شهاده لا مال ولا اصل
أيسر _ هذا كله لان فقره ليش احنه محتاجين فلوس
ابو أيسر _ انته ما تفكر بمكانتي ومنصبي الف واحد بس ااشر ينطيني بنته اعقل وتركها ما اصير لو ينهجم هذا البيت على راسك
تركنه وصعد لغرفته…
رفل _ لك ابني لا تحرجنه الناس شتكول علينه
أيسر _ اذا مترحون تخطبو ها اليه اني اروح وحدي……
كل هاي الشكليات اني متهمني ولا انتو ربيتوني عليها
المهم هيه….
رافع _
ياسمين مو على بعضها مو هاي لاعرفها اليوم خلصتها صفنات
اني حافظها
_ صاير وياج شي
_ التفتت مبتسمه لا ليش تسأل
_ من اجيتي ساكته اخاف ام زين سمعتج حجي
_ لا ما شايفتها اصلا
_ لعد شكو بويه…
_ ابتسمت…
تدري رافع احس بحنيتك من تگول بويه
_ اني ابوج واخوج وشتردين لا تصورين عجزي وهذا الكرسي
يبعدوني عنج
_ الله يخليك اليه اني عايشه بوجودك انته
دك الموبايل … عيني صارت عليه بقلق
راح رضى جابه من فوك الثلاجه
التفتت وگلبي يدك ويا
رضى _ الو منو
ياسمين هاي بنيه اسمها دنيا تريدج…
ياسمين _ اخذت الموبايل من رضى وكل العيون عليه
هلو دنيا….
دنيا _ هذا أيسر جبرني اتصل عليج
تحجين ويا…..؟؟؟
قبل ما اجاوب انسحب الموبايل من دنيا ووصلني صوته
هلو ياسمين…
ممكن احجي وياج اشويه ……
_ اي اي لحظه…. وتمشيت للغرفه بس شنو كل جسمي يرجف
وثلجت اديا
حسيت الكل عرف بيه
أيسر _ حاجيت اهلي بموضوعنه
ياسمين _ وشنو كان ردهم……؟؟؟؟
أيسر _ بعدهم متفاجئين من قراري بعدين احجي وياهم
ياسمين _ انت متأكد من قرارك بعدك ما تعرفني…
أيسر _ الاريد اعرفه عرفته…. انتي اذا تردين تسألين عن شي
گولي اني حاضر
تقريب عشر دقايق يحجي واني اسمعه كلامه يطمني
وهوايه بعد حجي من يصير موضوعنه رسمي نحجي
سديت الخط
وكلشي بداخلي يدور على خيط امل يفرحني ماكو
عقلي بس يقارن بين وضعه ووضعي ويرفض
بس گلبي يتمنى مثل أي بنيه تحلم بشاب مثل ايسر وحياة ورديه
نمت ليلي بقلق وتوجس بين عقل رافض
وأماني ترفرف فوگ أجنحة الفراشات الملونه
َ
أيسر قدملي نفسه على انه هو صاحب القرار وهو اليختار
بس الموضوع ما كان هشكل….
بعدني بفراشي نايمه واجتني إيمان
إيمان _ گومي ولج شمصخمه ابيت المديره البارحه
ياسمين _ فتحت عيني عبالي احلم
انتي شتگولين…
إيمان _ المديره گاعده بالهول تريدج
ووجها ما يگصه السيف…
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية انكسار الياسمين)
